ئافه‌تا تیرۆرێ به‌رسینگا پرانیا وه‌ڵاتێن رۆژهه‌ڵاتا ناڤین گرتیه‌ و زیانه‌كا ئێكجار مه‌زن گه‌هاندیه‌ ره‌وشا پێشڤه‌چوون و ناڤو بانگێن ڤێ ده‌ڤه‌رێ و وه‌رارا جڤاكی و هه‌روه‌سا پرسا پێكڤه‌ژیانێ د ڤان وه‌ڵاتان دا كو ئێدی ژیان ل خه‌لكی كریه‌ دۆزه‌خ و نه‌چاركرنه‌ رێكا ئاوه‌ره‌بوونێ ب هه‌لبژێرن ب تایبه‌ت پێكهاته‌یێن مه‌سیحی و ئێزدی و سابئه‌. ل سه‌ر ڤێ ره‌وشا نه‌خازراوا ده‌ڤه‌را رۆژهه‌ڵاتا ناڤین توشبووی ب مخابنی ڤه‌ ئه‌ڤ پێلا ره‌شا تیرۆرێ ل بن په‌ردا ئایینێ ئیسلامێ دهێته‌ ئه‌نجامدان و كو ئه‌ڤه‌ ژی دووره‌ ژ گیانێ ئایینێ ئیسلامێ و په‌یاما وێ یا مرۆڤانه‌. رۆژهه‌ڵات د ڤی شه‌ری دا یا دكه‌لیت و رۆژانه‌ خه‌لكێ بێ گونه‌ه د ئاگرێ توندڕه‌وێن ئیسلامی دا دكه‌لیت و ئه‌ڤ ڕه‌وتێ توندڕه‌و چ رێك نه‌ماینه‌ ب كار نه‌ئیاینه‌ بۆ گه‌هاندنا هزرا خوه‌ و گه‌له‌ك سه‌كۆیێن مزگه‌فت و كه‌ناڵێن تیله‌ڤزیۆنی و رادیۆ و رۆژنامه‌ و مالپه‌رێن ئنته‌رنێتێ بكار دئینن و خه‌لكێ ساویلكه‌ رادكێشنه‌ ناڤ ره‌فێن خوه‌ و شیانه‌ هه‌تا ڕاده‌كی باش د ڤی بیاڤی سه‌ر بكه‌ڤن. په‌چداركرنا هزرێن توندڕه‌و و هشككرنا سه‌كۆ و راگه‌هاندنا وان پێدڤیه‌كا كۆمكیه‌ و ل سه‌ر ته‌ڤ چینێن جڤاكی و ناڤده‌وله‌تی دراوه‌ستیت. ل سه‌ر ڤێ بیرۆكێ هونه‌رمه‌ندێ سعودی ( ناصر القصبی) كو ئه‌ڤ هونه‌رمه‌نده‌ یێ به‌رنیاسه‌ ب ره‌خنه‌گرتنێ ل جڤاكا سعودی لێ ب ئاوایه‌كێ كۆمیدیانه‌ و ڤێ جارێ ب ئاوایێ خوه‌ یێ كۆمیدیانه‌ هێرشی هزرێن توندڕه‌وێن ئیسلامی یێن ئه‌ڤرۆ ده‌ڤه‌ر و سعودی و ده‌ڤه‌را رۆژهه‌ڵاتا ناڤین ڤه‌گرتی، دكه‌ت. ب زنجیره‌ خه‌له‌كێن ( سیلفی) ل كه‌نالێ MBC كو یا تایبه‌ت بوو ب ره‌خنه‌ لێگرتنا هزرا تیرۆرستێن داعشێ و ته‌ڤ توندڕه‌وێن ئیسلامی، ب دیتنا من گه‌له‌ك یا كاریگه‌رتربوو ژ توَپبارانكرنا فرۆكان و ب ملیۆنه‌ها گه‌نجان ب تایبه‌تی ل وه‌لاتێن عه‌ره‌بی ئه‌ڤ خه‌له‌كه‌ دیتن و كارتێكرنا وان خه‌له‌كا ل سه‌ر وان گه‌نجان بێگومان دێ یا كاریگه‌رتر بیت ژ هزار خوتبان، د ده‌مه‌كی دا زانایێن ئایینی ل وان وه‌لاتان نه‌شیان هزرا كوژه‌كا داعشێ ریسوا بكه‌ن، لێ ئه‌ڤێ كومێدیا (ناصر القصبی) یا خودان بنگه‌هه‌كێ جه‌ماوه‌ریی یا مه‌زن شیا ڤێ چه‌ندێ بكه‌ت. !!!.
خوازی مه‌ ژی ل هه‌رێما كوردستانێ هونه‌ره‌كێ ب ڤی شێوه‌ی هه‌بیت و ب رێیا وی شه‌رێ هزرا داعشێ بكه‌ین. .. ب دیتنا من دێ گه‌له‌ك باشتر بیت ژ هنده‌ك تشتێن دی یێن هونه‌ری ئه‌وێن دهێنه‌ كرن ل بن ناڤێن زه‌به‌لاح و د بنه‌ره‌تدا چوو ژێرخانه‌ مه‌ بۆ نه‌ی و چ كاریگه‌ریا خوه‌ ژی ناكه‌ن. . لێ هه‌تا نوكه‌ مه‌ چ به‌رهه‌مێن هونه‌ری یێن دژی هزرا داعشێ نه‌دیتینه‌. !!!

فه‌رماندێ فرقا زێرین یا له‌شكرێ عیراقێ د دو داخۆیانیێن جودا دا بۆ دو ده‌زگه‌هێن راگه‌هاندنێ ل هه‌رێما كوردستانێ د ئێك رۆژ دا به‌حسێ بارودۆخێ شه‌رێ ره‌مادی دكه‌ت، لێ ئه‌و هه‌ردو داخۆیانی وه‌كو ئێك نینن و بارودۆخێ وی باژێری یێ ل به‌ر مه‌ شێلی بووی كا ب دروستی چاره‌نڤیسێ وی گه‌هشتیه‌ كیرێ و كێ كونترۆل ل سه‌ر كریه‌، له‌شكرێ عیراقێ؟ یان تیرۆرستێن داعشێ؟.
د مالپه‌رێ فه‌رمیێ پارتی دیموكراتی كوردستان دا ل 20 نیسانێ، فه‌رماندێ فرقا زێرین دبێژیت ( بارودۆخێ باژێرێ ره‌مادی گه‌له‌ك یێ خرابه‌ و پتریا وی یێ كه‌فتیه‌ د ده‌ستێ تیرۆرستێن داعشێ دا و هێزێن عیراقێ گه‌له‌ك ده‌ڤه‌ر بێ شه‌ر یێن چۆلكرین و خه‌لكێ ره‌مادی هه‌موو ئاواره‌بوون).
لێ د هه‌مان رۆژدا د داخۆیانیه‌كا دی دا بۆ رۆژناما وار یا هژمار1310 (به‌رپه‌رێ 3) دبێژیت( هێزێن فرقا زێرین یا له‌شكرێ عیراقێ دۆرپێچا سه‌ر ره‌مادی شكاند و گه‌هشتنه‌ ناڤا وی باژێری ).
دیسا بۆ مالپه‌رێ فه‌رمیێ پارتی دبێژیت (هه‌موو هێزێن عیراقی یا خوه‌ ڤه‌كێشای و جهێن خوه‌ یێن چۆلكرین و شه‌ر نه‌كریه‌، له‌وما داعشێ پێشڤه‌چوونه‌كا مه‌زن یا كری و هه‌تاكو نه‌خوه‌شخانا ره‌مادی هه‌موو یا كونترۆلكری و هه‌موو ده‌ڤه‌رێن ستراتیژی ل ره‌مادی یێن كه‌فتینه‌ د ده‌ستێ تیرۆرستێن داعشێ دا و ئه‌م د شه‌ری دا د به‌رده‌وامین و فرۆكێن عیراقی و هه‌ڤپه‌یمانیا نێڤده‌وله‌تی به‌رده‌وام مولگێن تیرۆرستان توبباران دكه‌ن و ب سه‌دان تیرۆرست یێن كوشتین).
لێ بۆ وار دبێژیت(داعش ل هه‌موو ده‌ڤه‌رێن پارێزگه‌ها ئه‌نبار د شكه‌ستنێ دایه‌ و دۆرپێچ ل سه‌ر ره‌مادی نه‌مایه‌).
ئه‌ڤ هه‌ردو داخۆیانیێن ژێكجودا گه‌له‌ك پرسیاران ل ده‌ف خوانده‌ڤانان په‌یدا دكه‌ن، ئه‌رێ فه‌رماندێ فرقا زێرین د ناڤ شه‌رێ ره‌مادی دایه‌ و د جه‌رگێ وی باژێری دایه‌ و پێزانینێن دروست ل سه‌ر وی شه‌ری هه‌نه‌، یان به‌رۆڤاژی ڤێ چه‌ندێ یه‌؟ ، یان ئه‌وی مه‌به‌سته‌ك پێ هه‌یه‌ و ڤیایه‌ راستیا ژێوارێ شه‌رێ ره‌مادی ڤه‌شێریت؟ یان ژی هه‌ردو داخۆیانیێن فه‌رماندێ ناڤبری وه‌كو هه‌ڤن، لێ ئێك ژ وان هه‌ردو ده‌زگه‌هێن راگه‌هاندنێ (مالپه‌رێ فه‌رمی یێ پارتی) یان ( رۆژناما وار) ب دروستی داخۆیانیا وی فه‌رمانده‌ی ڤه‌نه‌گوهاستیه‌.. !.