NO IORG
نووترين نووچه
Authors Posts by به‌يار باڤي

به‌يار باڤي

به‌يار باڤي
99 POSTS 0 COMMENTS

43

– به‌یار باڤى –
بابه‌تێ مه‌یێ گۆشه‌یا جڤاكى ل حه‌فتیا بۆرى لسه‌ر مژارا كێمى یا گازا سپى و وه‌رزێ زڤستانێ و سڕو سه‌ڕمایێ بۆ وكارتێكرنا ئه‌ڤێ چه‌ندێ لسه‌ر خێزانێ و بتایبه‌ت زارۆكان .. و وه‌ك گرۆڤه‌ بۆ ئاكامێن ئه‌ڤێ چه‌ندێ مه‌ ئاماژه‌ دا ئه‌وان بۆیه‌رێن سۆتنا چه‌ندین مالان دئه‌ڤ ساله‌ رۆداین ژ ئه‌نجامێ نه‌بونا سوته‌مه‌نیێ و په‌نا برن بۆ بكارئینانا ئالاڤێن كه‌هره‌بێ و بخراب كارئینانا ئه‌ڤان ئاڵاڤان و دئه‌نجام دا ئه‌ڤ رودان و كاره‌ساتێن سۆتنێ ژێ په‌یدا دبن و قوربانیان ل دۆڤ خۆ دهێلن بتایبه‌ت ژن و زارۆك , و وه‌ك میناك ئه‌ڤ بۆیه‌را ل ناڤه‌راستا ئه‌ڤێ مه‌هێ ل چه‌مچه‌مال روداى و دئه‌نجام دا ژنه‌ك بناڤێ سێوان و سێ زارۆكێن خۆ بوینه‌ قوربانى ( ژنا ژیێ وێ 23 سالى پشتى بویه‌رێ ب هه‌شت رۆژان ئانكو ل 24 ئه‌ڤێ مه‌هێ ل نه‌خۆشخانێ گیانێ خۆ ژده‌ست دا ژئه‌گه‌رێ سۆتنا دژوار ) ..
تشتێ نه‌ پێَشبین كرى وقه‌ت د خه‌یالان ژى دا هزر لێ نه‌ دهات كرن پشتى به‌ڵاڤ بونا بابه‌تى ب رۆژه‌كێ ( ئانكو پشتى رودانێ ب چه‌ند رۆژان ) د ده‌زگه‌هێن راگه‌هاندنێ دا هاته‌ به‌ڵاڤ كرن كو ئه‌ڤ بویه‌را ل چه‌مچه‌مال رۆداى و سۆتنا ژنه‌كێ ودگه‌ل سێ زارۆیێن وێ ( كو دژیێ شه‌ش هه‌یڤى هه‌تا هه‌شت سالى دا بون ) نه‌ رۆدانه‌كا قه‌زاو قه‌ده‌ر بۆ به‌لكو هه‌ڤژینێ ئه‌ڤێ ژنێ پێ هاتیه‌ گونه‌هبار كرن و ژبه‌ر ڤێ ئه‌گه‌رێ هاتیه‌ گرتن و دوسه‌یا وى ل ژێر ڤه‌كولینێ یه‌ ..
به‌ربه‌ڵاڤ بونا ئه‌ڤى نۆچه‌ى ب زووترین ده‌م ل هه‌مو كوژیێت كوردستانێ به‌ڵاڤ بو و خه‌م و دلگرانى ئێخسته‌ ناڤ مالا هه‌ر خێزانه‌كا لبه‌ر شاشا تیڤى ئه‌ڤ نۆچه‌ دیتى و بهیستى بتایبه‌ت دیمه‌نێ ئه‌وان چه‌ند په‌یڤێت كێم یێن ب زه‌حمه‌ت ژده‌ڤێ ئه‌ڤێ خانما د بهارا ژیێ خۆ یێ گه‌نجاتیێ ده‌ردكه‌فتن ژبه‌رى وه‌غه‌را دوماهیێ بكه‌ت ..
ئه‌ڤرۆكه‌ ل جڤاكێ مه‌یێ هه‌رێما كوردستانێ توندو تیژى یا خێزانى ئێكه‌ ژئه‌وان دیارده‌یێن ترسناك كو هه‌ره‌شێ ل سه‌لامه‌تیا جڤاكى بگشتى دكه‌ت هه‌تا راده‌یه‌كى ژ شێوازێن توندو تیژى یا ته‌قلیدى و بكار ئینانا ئاڵاڤ و ئامرازێن كلاسیك ده‌رباز بویه‌ بۆ شێوازێن دى یێن جودا جودا كو ره‌نگه‌ رێژه‌یه‌ك مه‌زن
دباده‌كێن دادگه‌هان دا ب شێوێ دروست و هۆكارێن دروست نه‌هاتبن تۆمار كرن !
لدۆڤ هنده‌ك ئامارێن رێڤه‌به‌ریا گشتى یا به‌رهه‌نگاربونا توندو تیژیێ یا خێزانى ل هه‌رێما كوردستانێ ( ئه‌ڤ رێڤه‌به‌رى یه‌ ل ساڵا 2007 هاتیه‌ دامه‌زراندن ) كو ل ئه‌ڤ ساله‌ به‌ڵاڤ بوینه‌ , هنده‌ك ئامارێن ترسناك لبه‌ر چاڤ دكه‌ڤن كو پێتڤى یه‌ لایه‌نێن په‌یوه‌ندیدار ب رژدى لسه‌ر راوه‌ستن و ل ئه‌گه‌ران و هه‌روه‌سا رێكێن چاره‌سه‌ریێ بگه‌رن, كو وه‌ك میناك دماوێ سالێن ( 2008- 2017 ) نیزیكى 57 هه‌زار حاله‌تێن توندو تیژى یا دژى ژنێ هاتینه‌ تومار كرن ژوانا ؛ 474 حاله‌تێن كوشتنێ , 2334 حاله‌تێن سۆتنێ , 1245 حاله‌تێن خۆ سۆتنێ …
ئه‌ڤێن خوارێ ژى هنده‌ك ئه‌و ئامار و داتایێن گرێداى ره‌وشا ئافره‌تێ و توندو تیژى یا خێزانى ل هه‌رێما مه‌ یا كوردستانێ ل ماوێ ئه‌ڤان هه‌شت نه‌ه سالێن بۆرى هاتین تۆمار كرن و به‌ڵاڤ كرن :
– رێژا خۆ كوشتنێ ( تقریبا ) هه‌ر رۆژ ئێك ژن و كچ دبیته‌ قوربان .
– بلندترین رێژا سوتنێ ل ساڵا 2010 ێ بو , 299 ژن و كچ بوینه‌ قوربان .
– بلندترین رێژا خۆ كوشتنێ ب سۆتنێ هه‌رل سالا 2010 ێ بو, 142 ژن و كچ بوینه‌ قوربان.
– بلندترین رێژا خۆ كوشتنێ ( ژ ده‌رڤه‌ى خۆ سۆتنێ ) ساڵا 2017 بۆ , 85 ژن و كچ .
– بلندترین رێژا كوشتنێ , ساڵا 2015 ێ بو , 55 ژن و كچ .
زێده‌بارى ئه‌ڤان هه‌ژمار و ئامارێن ترسناك و كاره‌ساتى , هه‌كه‌ر ئه‌م ل باده‌كێن دادگه‌هێن هه‌ر سێ پارێزگه‌هێن هه‌رێمێ بنێرین دێ بینین دماوێ هه‌شت سالێن بۆرى دا 52 هه‌زار حاله‌تێن ژێكڤه‌بونا هه‌ڤژینان ( به‌ردان ) چێ بوینه‌ , كو ئه‌ڤه‌ ژى هه‌ژماره‌كا مه‌زنه‌ و هه‌لبه‌ت گه‌له‌ك نه‌كبه‌تى یا ل دۆڤ خۆ دهیلێت و دیساڤه‌ قوربانیێن سه‌ره‌كى ژن و زارۆكن …
ب وێ ئومێدى ساڵا نوى 2019 مزگینى یێت خۆش دگه‌ل خۆ بینیت و نه‌خۆشى و نه‌كبه‌تى یێن خێزانا كوردستانێ كێمتر ببن ..

75

به‌یار باڤى
هه‌ر ژ ناڤه‌راستا ساڵا ده‌رباز بوویى 2018ێ ب دروستى پشتى هه‌لبژارتنێن په‌رله‌مانێ ئیراقێ و ل دووڤدا هه‌لبژارتنێن په‌رله‌مانێ كوردستانێ ل دووماهیا هه‌یڤا ئیلونێ.. ل سه‌ر ئاستێ بلندێ حوكمه‌تا هه‌رێمێ، هه‌روه‌سا په‌رله‌مانتاران (د هه‌وا بانگه‌شێن خوه‌ دا) و ل سه‌ر ئاستێ ناڤه‌ندێن جودا جودا یێن سیاسى و جڤاكى و ره‌وشه‌نبیرى و ئابورى سوحبه‌تا پێشبینیا هنده‌ك گوهۆرینێن ریشه‌یى دهاته‌ كرن كو ئه‌نجام د به‌رژه‌وه‌ندیا هاوڵاتیان دا بیت بتایبه‌ت ته‌خا هه‌ژار و خودان داهاتیه‌ك كێم..
هه‌لبه‌ت ته‌خه‌كا مه‌زن ژ خه‌لكێ مه‌ هیڤیێن مه‌زن ب ئه‌ڤێ چه‌ندێ هه‌بون كو به‌رهه‌مێ وێ ل ساڵا نو یا 2019ێ ببینن و ده‌ربازى ئه‌وان نه‌خۆشى و نه‌كبه‌تیێن سالێن بۆرى ببن، بتایبه‌ت ئه‌ڤان چار پێنج سالێن قه‌یرانا ئابوورى و هه‌مه‌ جۆر.. و گه‌له‌ك هۆكار و بهانه‌ هه‌بون كو خه‌لكێ مه‌ (یان ژى پتریا خه‌لكێ مه‌) هه‌تا راده‌یه‌كێ مه‌زن گه‌شبین ببیت و باوه‌رى ب ئه‌ڤان گوهۆرین و پێشهاتێن نوو یێن ئه‌رێنى بكه‌ت بتایبه‌ت یێن گرێدایى دو خالێن سه‌ره‌كى وه‌ك نه‌مانا شه‌ڕێ چار سالان ل سه‌ر وه‌ڵاتێ مه‌ سه‌پاندى كو كارتێكرن ل سه‌ر هه‌موو سه‌كته‌رێن ژیانا خه‌لكى دا هه‌بو، هه‌روه‌سا خالا دویێ بلند بوونا بهایێ په‌ترولێ ل سه‌ر ئاستێ جیهانێ كو نێزیكى 100 % بلند بوى هه‌مبه‌رى كێمترین بهایێ به‌ریا نها.. ل وه‌ڵاته‌كى مینا وه‌ڵاتێ مه‌ (سه‌ره‌راى ئاسته‌نگان) گه‌له‌ك خالێن بهێز هه‌نه‌ كو هاوڵاتى گه‌شبین ببیت و خه‌ونێن خۆش ب پاشه‌رۆژێ ڤه‌ ببینیت هه‌كه‌ ئیراده‌ و پلان و نه‌خشه‌ و ستراتیژیه‌كا زانستى ژ ئالیێ حوكمه‌تێ ڤه‌ بهێته‌ دارشتن، ئه‌و و گرنگترین خالێن بهێز ژى ئه‌ڤێن ل خوارێ نه‌:-
1- رێژا كێم و ناڤنجیا خه‌لكێ هه‌رێما كوردستانێ: ل دووڤ دووماهى ئامارا ده‌زگه‌هێ پلانا حوكمه‌تا هه‌رێما كوردستانێ هاتیه‌ به‌ڵاڤ كرن هژمارا ئاكنجیێن هه‌رێمى (هه‌ر سێ پارێزگه‌هێن دهوك، هه‌ولێر، سلێمانى ل گه‌ل حه‌له‌بچه‌) نێزیكى 5 ملیون و پێنج سه‌د هزار كه‌سانن، كو ئه‌ڤ هژماره‌ ژى هژماره‌كا گه‌له‌ك كێمه‌ ل دووڤ ژینگه‌ها ئابورى و سروشتیا ده‌وله‌مه‌ندا هه‌رێما كوردستانێ.
2- رێژا مه‌زن یا كه‌سێن گه‌نج و شیانێن كار كرنێ هه‌ین: دیسا ل دووڤ ئامارێن دهێنه‌ به‌ڵاڤ كرن هژمارا كه‌سێن گه‌نج ژ هژمارا گشتى (هێزا كارى) هێزا هه‌ره‌ مه‌زنه‌ ژ سه‌رجه‌مێ رۆنشتڤانێن هه‌رێمێ كو دبێژنه‌ ئه‌ڤێ دیاردێ ژى جڤاكێ گه‌نج كو ل گه‌له‌ك وه‌ڵاتان ئه‌ڤ هێزه‌ لێ په‌یدا نابیت و پێدڤى ب هێزا گه‌نجێن بیانى نه‌.
3- داهاتێ ئابووریێ ب هێز (په‌ترول): هه‌كه‌ بتنى داهاتێ په‌ترولێ ل به‌رچاڤ بگرین كو حوكمه‌ت ب شێوه‌یه‌كێ سه‌ره‌كى ( 90 % ) پشتا خوه‌ ب ئه‌ڤى داهاتى ڤه‌ گرێ دده‌ت ل گه‌ل یێ چاندنێ.. دێ بینین ئه‌ڤ داهاته‌ هه‌كه‌ ب شێوه‌یه‌كێ رێك و پێك بهێته‌ مه‌زاختن تێرا ئه‌وێ چه‌ندێ هه‌یه‌ كو هاوڵاتیێ مه‌ وه‌كو هاولاتیێ وه‌ڵاتێن كه‌نداڤى د خۆش گوزه‌ران بن هه‌روه‌سا ژ ئالیێ خزمه‌تگوزه‌رانیێ ژى ڤه‌ .
4- جهێ ستراتیژى یێ هه‌رێمێ: جوگرافیا سیاسى ستراتیژیا هه‌رێما كوردستانێ كو دكه‌ڤیته‌ ناڤه‌راستا ده‌ڤه‌ره‌كا گرنك و پڕى هه‌ڤڕكى و ململانێ و ئالووزى (هه‌ڤسویێ ئیراقێ و ئیرانێ و توركیا و سوریا) دبیته‌ جهێ سه‌رنج راكێشانێ و ل سه‌ر راوه‌ستانێ ل سه‌ر ئاستێ ده‌ڤه‌رێ و جیهانێ كو ئه‌ڤرو گه‌رمترین مه‌یدانا ململانێ یا زلهێزێن جیهانێ یه‌ .
هه‌لبه‌ت خالێن رێگر و ئاسته‌نگ ژى بۆ هه‌ر پرۆژه‌ و نه‌خشه‌یه‌كى هه‌نه‌، لێ ده‌ما خالێن بهێز ژ یێن رێگر پتر بن وى ده‌مى بتنێ ئیراده‌كا بهێز دڤێت ژبو ده‌رباز بون ژ خالێن لاواز و رێگر و ئاسته‌نگان و ئه‌ڤه‌ژى مینا شۆره‌شه‌كا سپیه‌ كو به‌رهه‌مێ وێ بۆ هه‌موو ته‌خ و چینێن جڤاكى بیت ب شێوه‌یه‌كێ دادپه‌روه‌رانه‌ .

68

– به‌یار باڤى –
ل زڤستانا ئه‌ڤ ساله‌ گه‌له‌ك بویه‌رێن دلته‌زین یێن ئاگر به‌ربوونا مالان و ل دۆڤ خۆ هێلانا چه‌ندین قوربانیان بسه‌ر هنده‌ك خێزانێن مه‌یێن هه‌رێما كوردستانێ دا هاتن كو هه‌ر جار پترى یا ئه‌ڤان قوربانیان ژن و زارۆك بون و دوماهى رودان ژى ئه‌و بویه‌را ئاگر به‌ربونا ماله‌كێ ل ده‌ڤه‌را چه‌مچه‌مال یا سه‌ر ب پارێزگه‌ها سلێمانیێ ڤه‌ بو روداى و دئه‌نجامدا سێ زارۆك بۆینه‌ قوربانى ..
ره‌نگه‌ بۆ هنده‌ك كه‌سان ئاماژه‌ كرن ب ئه‌ڤان جۆره‌ بابه‌تان نه‌تشته‌كێ گرنگ و جهێ لسه‌ر راوه‌ستانێ بیت بتایبه‌ت ئه‌وێن كو هه‌ر موحتاجى ( سوپا گازێ ) نابن و وه‌كو تشته‌كێ گرێداى فلكلورى ته‌ماشه‌ دكه‌نێ ژبه‌ركو رابون و رونشتنا وان بسیسته‌مێ سپلێتێ و ساڕكرن وگه‌رم كرنا ئوتوماتیكى ڤه‌ گرێدایه‌!
لێ مه‌ بڤێت نه‌ڤێت ئه‌ڤ ره‌وشا بێ سه‌روبه‌رى یا كه‌هره‌بێ و نه‌ دابه‌ش كرنا گازا سپى لسه‌ر هاولاتیان ( چ وه‌ك نادابه‌ش كرن یان دره‌نگ دابه‌ش كرن) خه‌لكێ مه‌ ئێخستى یه‌ د ده‌رده‌سه‌رى وته‌نگاڤى یه‌ك به‌رچاڤدا وئه‌ڤ ره‌وشه‌ رێژا هه‌رى مه‌زن یا خه‌لكێ مه‌ بخۆڤه‌ دگریت ژبه‌ركو پتریا خه‌لكێ مه‌ ژ ته‌خا هه‌ژار و ده‌ست كورته‌ , بتایبه‌ت ئه‌ڤرو ته‌خا فه‌رمانبه‌ران ژى كه‌فتیه‌ سه‌ر ته‌خا هه‌ژاران !
تشتێ خه‌لكێ مه‌ پێشبینى دكر ,كو ئه‌وان ل ساڵابورى به‌هرا خۆ ژ ئه‌ڤێ گازا سپى هه‌ر نه‌ وه‌رگرتبو ره‌نگه‌ ئه‌ڤ ساله‌ زووتر بهێت دابه‌ش كرن , لێ دیسا ئه‌و پێشبینى وه‌كو خۆ ده‌رنه‌كه‌فت ژبه‌ركو نه‌بتنێ ئه‌ڤ گازه‌ ل وه‌ختێ خۆ نه‌هات و دره‌نگ هات ( مه‌به‌ست ل سه‌نته‌رێ باژێر) لێ دگه‌ل هاتنا وێ یا دره‌نگ ژى هه‌تا نوكه‌ پتریا خێزانان هێشتا پلێتێن وه‌رگرتنا گازێ ژده‌ف شونكارێن خۆیێن ئاهێن خوارنێ وه‌رنه‌گرتینه‌ ژبه‌ركو ئه‌و ژىدبێژن هێشتا حكومه‌تێ لسه‌ر ئه‌وان دابه‌ش نه‌كرینه‌!
ئه‌ڤ نه‌بوونا گازاسپى دئه‌ڤى وه‌رزێ زڤستانێ و سه‌ڕمایێ دا, ونێزیكه‌ دێ سال ژى ب دوماهى هێت, ئه‌ڤێ چه‌ندێ كارتێكرنه‌كا مه‌زن لسه‌ر ره‌وشا خێزانێ هه‌یه‌ بتایبه‌ت ئه‌گه‌ر ئه‌ڤ خێزانه‌ خودان زارۆك بیت و ره‌وشا وێ یا ئابورى یا لاوازبیت ,و كارتێكرنا ئه‌ڤێ چه‌ندێ ژگه‌له‌ك ئالیان ڤه‌ لسه‌ر خێزانێ و زارۆكان دیار دبیت وه‌ك :
– ژ ئالیێ ساخله‌مى ڤه‌ : په‌یدا بونا شۆبه‌ و نه‌خوشیان بتایبه‌ت كوخكێ و ئه‌نفلوه‌نزایێ كو ژ ئه‌گه‌رێ سه‌ڕمایێ په‌یدا دبن و نه‌خوشیێن ڤه‌گرن دناڤبه‌را ئه‌ندامێن خێزانێ دا ..
– ژ ئالیێ په‌روه‌رده‌یى و زانستى ڤه‌ :بتایبه‌ت ئه‌گه‌ر ئه‌ڤ خێزانه‌ خۆدان زارۆیێن قوتابى بیت , ئه‌ڤ قوتابیه‌ پێتڤى كه‌ش و هه‌وایه‌كێ گه‌رم و ساخله‌من كو وانه‌یێن خۆ بخوینن و ئه‌ركێن خۆ به‌رهه‌ڤ بكه‌ن و بجه بینن ,ئانكو ژوورا وان سوپه‌یا خۆ یاتایبه‌ت هه‌بت ..و به‌روڤاژ ل كه‌ش و هه‌وایه‌كێ جودا و قه‌له‌بالغ كارتێكرن ل ئاستێ وان یێ زانستى و په‌روه‌رده‌یى دهێت كرن .
– ژئالیێ ده‌روونى ڤه‌ : هه‌ر وه‌خته‌كێ مرۆڤ كه‌فته‌ دقوناغه‌كێ دا خۆ دگه‌ل كه‌سێن دى هه‌مبه‌ر ( مقارنه‌ ) بكه‌ت دێ تۆشى ئالوزیێ و نه‌ره‌حه‌تیێ بیت بتایبه‌ت ده‌مێ هه‌ست ب جودا بونا ئاستێ جڤاكى یێ جودا بكه‌ت و ئه‌ڤه‌ژى دێ به‌رێ وى ده‌ته‌ قوناغه‌كا دى كو هه‌ست ب نه‌ دادپه‌روریا جڤاكى بكه‌ت ودئه‌نجامدا كه‌فتن دگێژه‌ڤانك و ئالووزیێ دا ,كو ئه‌ڤه‌ دبیته‌ ئه‌گه‌را نه‌ ئارامى و تێكچونا ره‌وشا ده‌روونى ..
ئه‌ڤه‌و زێده‌بارى كارتێكرنا نه‌بونا گازا سپى لسه‌ر تێكدانا ژینگه‌هێ ژ ئه‌نجامێ بڕینا داران بۆ سۆتنێ چ ژ موحتاجى و نه‌زانین بیت یان ژ ئه‌نقه‌ست و مه‌ره‌ما بازرگانى پێ كرنێ بیت ژ ئالیێ كه‌سێن ده‌ررون نزم ڤه‌ كو ئه‌ڤێ چه‌ندێ ب ده‌رفه‌ت و به‌هانه‌ دبینن ..
و زیانا ژ هه‌میێ مه‌زنتر و ئه‌نجامێ ژهه‌میێ كاره‌ساتتر ده‌ما ئه‌ڤ خێزانه‌ هزرێ ل ئه‌نته‌رناتیڤه‌كى ( به‌دیله‌كى ) بۆ سوپا گازێ دكه‌ن و كه‌هره‌بێ ب رێكێن جودا جودا بۆ گه‌رم كرنێ بكار دئینن و دئه‌نجام دا گه‌له‌ك ئه‌ڤ جۆره‌ كاره‌ساته‌ ژێ په‌یدا دبن ژ ئه‌نجامێ شۆتا كه‌هره‌بێ و خراب بكارئینانێ …
و ره‌نگه‌ ئه‌ڤ ( سه‌یدایێن ! ) كاروبارێن گازا سپى و دابه‌ش كرنا وێ بسه‌ر هاوڵاتیاندا دده‌ستێ وان دا , رۆژێ هه‌مویێ ئێك خۆله‌ك كه‌هره‌ب ژمالێن وان ناچیت .. له‌ورا هه‌ست ب ئه‌ڤى ده‌ردى ناكه‌ن وپلانا پێش وه‌خت بۆ چاره‌سه‌ریێ بۆ نا دارێژن !

154

– به‌یار باڤى –
رۆژا 3 ى مه‌ها كانونا ئێكێ ب رۆژا خودان پێتڤیێن تایبه‌ت یان ژى وه‌كو هنده‌ك دبێژن رۆژا كه‌مئه‌ندامان دهێته‌ هه‌ژمارتن كۆ بو ئێكه‌م جار ل سالا 1992ێ ل ئه‌ڤێ رۆژێ ژئالیێ نه‌ته‌وێن ئێكگرتى ڤه‌ رێككه‌فتن لسه‌ر هاته‌ كرن وهه‌تا ئه‌ڤرو 166وه‌ڵاتان ئیمزا لسه‌ر كریه‌..
ل هه‌رێما مه‌یا كوردستانێ ژى وه‌كو هه‌ر سال چالاكى و كونگره‌ ومێزگه‌ردێن گرێداى ئه‌ڤێ هه‌لكه‌فتێ ژئالیێ سازى و ناڤه‌ندێن حكومى و جڤاكێ سڤیل و رێكخراوێن گرێداى ئه‌ڤێ ته‌خێ ( بتایبه‌ت كه‌مئه‌ندامان ) هاتنه‌ ساز كرن و مینا جاران ئاماژه‌ بۆ ره‌وشا خراب و په‌ریشانى یا ئه‌ڤان كه‌سان هاته‌ كرن بتایبه‌ت ژئالیێ ئابوورى ڤه‌ ..
ل دۆڤ ئامارێن وه‌زاره‌تا كاروبارێن جڤاكى ل هه‌رێما كوردستانێ زێده‌تر ژسه‌د هه‌زار كه‌سێن خودان پێتڤیێن تایبه‌ت هه‌نه‌,كو لدۆڤ ئامارێن ساڵا 2015ته‌نها ل پارێزگه‌ها دهوكێ دگه‌ل قه‌زایێن ب سه‌رڤه‌ پترى بیست و پێنج هه‌زار كه‌سێن كه‌مئه‌ندام هه‌بون زێده‌بارى نێزیكى نه‌ه هه‌زار كه‌سێن دانعه‌مر كو رێژه‌یه‌ك مه‌زن ژێ نه‌خۆش و شیانێن كاركرنێ نه‌ هه‌ین ( هه‌لبه‌ت پتره‌ ژ سێ سالان ناڤێن نو ژى نه‌هاتینه‌ تومار كرن) ئانكو هه‌ژمار هێشتا پتره‌ ..
هه‌لبه‌ت هه‌ر كه‌سێ نێزیكى ئه‌ڤان كه‌سان یان ئاگه‌هدارى ره‌وشا ئه‌وان بیت بتنێ ئه‌و دزانیت ئه‌ڤ كه‌سێن هه‌ چه‌ند ره‌وشه‌كا نه‌خۆش و ئالووز وتراژیدى دا دژین ,بتایبه‌ت ل ئه‌ڤان سێ چار سالێن دوماهیێ كو ئه‌و هاریكاریا (مۆچێ) هه‌یڤانه‌ كو بتنێ َسه‌دو پێنجى هه‌زار دینار بون ئه‌وژى كه‌فتى به‌ر پاشكه‌وتێ وبویه‌ سه‌دو بیست هه‌زار دینار , یا ژ ئه‌ڤێ ژى خرابتر ئه‌ڤ هاریكاریه‌ ژ كه‌سێن دانعه‌مر ( یێن كو ژیێ وان دسه‌ر ژیێ شێست سالیێ دا) هاتیه‌ راوه‌ستان ب به‌هانه‌یا دوباره‌ كرنا جه‌ردێ و (مقابله‌ كرنێ ! ) كو ئه‌و ژى هاته‌
كرن وهێشتا پیره‌ژن و پێره‌مێرێن مه‌ چاڤ ل به‌ندا وه‌رگرتنا ئه‌ڤى مۆچێ كێمن و پترى سێ سالایه‌ و هێشتا تشته‌ك دیار نینه‌ و مخابن ساڵ بۆ سالێ هه‌ژماره‌كا ئه‌ڤان دانعه‌مرا وه‌غه‌ر دكه‌ن و حه‌سره‌تا وه‌رگرتنا ئه‌ڤى مۆچه‌ى د دلدا دمینت !
هه‌ر چه‌نده‌ ل ساڵا 2011 ێ پرۆژه‌ یاسایه‌ك رێك و پێك گرێداى ماف و ئیمتیازاتێن كه‌سێ په‌ككه‌فتى ل په‌رله‌مانێ كوردستانێ هاتبو په‌سه‌ند كرن لێ هه‌تا نوكه‌ كار پێ نه‌هاتیه‌ كرن!
راسته‌ ئارێشا سه‌ره‌كى یا خودان پێتڤیێن تایبه‌ت (یان ژى كه‌مئه‌ندامان ) ئالیێ ئابورى یه‌ كو هه‌تا ئه‌ڤ جۆره‌ هاریكاریا ئه‌و وه‌ردگرن ژى تشته‌ك كێمه‌ وچارێكا پێتڤیێن ئه‌وان دابین ناكه‌ت , زێده‌بارى گڤاشتنێن ده‌روونى و چه‌ندین گرفتارى و ئاریشێن دى یێن وه‌ك :
1- پشت گوه ئێخستن و نه‌به‌رچاڤ كرنا ره‌وشا كه‌سێن كه‌مئه‌ندام د سیسته‌مێ ئاڤا كرنا ئاڤاهیان دا وه‌ك دائیرێن حكومى و مۆل و هه‌ر وه‌سا خواندنگه‌ه و ویستگه‌ه و جهێن راوه‌ستانێ و جادده‌ …
2- نه‌بونا هاریكاریێ و راكرنا رسوماتان ژ كه‌سێ په‌ككه‌فتى وه‌كو دبیاڤێ هاتن و چون وسه‌فه‌ر كرنێ یان كڕینا كه‌ره‌سته‌یه‌كى یان ترومپێله‌كا تایبه‌ت ب په‌ككه‌فتى ڤه‌ ..
3- نه‌بونا هاریكارى و پشته‌ڤانیێ دبیاڤێ چاڤدێرى و چاره‌سه‌رى یا پزیشكى ..
4- نه‌بونا هاریكارى وپشته‌ڤانى یا ماددى بۆ پروسه‌یا پێكئینانا خێزانێ ..
5- نه‌بون یان كێمى یا ده‌رفه‌تا خواندن وته‌مام كرنا خواندنێ بۆ كه‌سێ خودان پێتڤیێ تایبه‌ت, بۆ نموونه‌ قوتابیێن په‌یمانگه‌هێن خودان پێتڤیێن تایبه‌ت ل دهوكێ ب شێوه‌یه‌ك سه‌ركه‌فتیانه‌ قوناغا سیێ ناڤنجى ده‌رباز كرینه‌ لێ دجهدا ماینه‌ و ژئالیێ په‌روه‌ردێ ڤه‌ نه‌هاتینه‌ وه‌رگرتن ,ژبه‌ركو ئه‌ڤ جوره‌ به‌رهه‌ڤى یه‌ بۆ نه‌هاتیه‌ كرن !
ب وێ ئومێدێ د ساڵا نوى دا ئه‌ڤ پرۆژه‌ یاسایا گرێداى ماف و ئیمتیازاتێن خودان پێتڤیێن تایبه‌ت بكه‌ڤیته‌ دبوارێ جێ به‌جێ كرنێ دا و ئێدى كه‌سێن ئه‌ڤێ ته‌خا جڤاكى هه‌ست ب زۆلم و نه‌دادپه‌روه‌رى یا جڤاكى نه‌كه‌ن.

62

– به‌یار باڤى –
وه‌كو ته‌قلیده‌ك ساڵانه‌ ل ئه‌ڤان چه‌ند سالێن دوماهیێ ل رۆژا 25 /11 ,كو رێك دكه‌ڤیت دگه‌ل رۆژا به‌رهه‌نگاربونا توندو تیژیێ دژى ئافره‌تان (كو ل سالا 1999ێ ژئالیێ UNڤه‌ هاتیه‌ راگه‌هاندن),رێڤه‌به‌ریا گشتى یا به‌رهه‌نگاربونا توندو تیژیێ ل هه‌رێما كوردستانێ رادبیت ب سازكرنا كۆنفرانسێ خۆیێ ساڵانه‌ ل هه‌ولێرا پایته‌خت كۆ تێدا ره‌وشا ئافره‌تێ ل هه‌رێما كوردستانێ دئێخت به‌رچاڤ دگه‌ل به‌رچاڤ كرنا ئه‌وان ئامار و داتایێن هاتین تۆمار كرن و گرێداى توندوتیژیێ و هه‌ر وه‌سا نه‌خشه‌و پرۆژه‌یێن پیشه‌رۆژێ و ستراتیژیا رێڤه‌به‌ریێ و حكومه‌تێ ب گشتى ..
ئه‌م ژى وه‌ك مێهڤان هاتبوین داخواز كرن بۆ به‌شدار بۆن دئه‌ڤێ كونفرانسێ دا , بۆ من ئێك ژخالێن بالكێش یێن ئه‌ڤێ كونفرانسێ ئه‌و په‌یڤ بۆ یا كونسولێ ژاپونى پێشكێش كرى كو بۆ هه‌مو ئامادبویان جهێ سه‌رنج راكێشانێ بۆ و دهه‌مان ده‌مدا جهێ دلخۆشیێ و ده‌ست قوتانه‌كا گه‌رم ده‌مێ كو په‌یڤا خۆ بزمانێ كوردى پێشكێش كرى كو پشكه‌ك مه‌زن ژێ بێى نڤیسین وهه‌ر ژبه‌ر دگۆت وتێدا ئاماژه‌ ب چه‌ندین مژارێن جودا جودا دكر ولبه‌راهیكێ بابه‌تێ گرێداى ئافره‌تێ و ئه‌رك و مافێن وێ دجڤاكى دا ..
هه‌ڤاله‌ك ل ته‌نشتا من رونشتى بۆ گۆت تۆ دزانێ ئه‌ڤى كابرایێ ژاپونى مه‌سجه‌ك گه‌هاند كو ئه‌م ژاپونى ب هه‌مو تشتى ل به‌راهیكێ نه‌ , نه‌ بتنێ ب ته‌كنه‌لۆژیایێ به‌لكو ب زمانى ژى !
لدۆڤ را بۆ ده‌مێ برگه‌یا هونه‌رى و پیشكێش كرنا سترانه‌كێ ژلایێ هونه‌رمه‌ند ده‌شنێ موراد ڤه‌ , ئه‌وژى دگه‌ل تیما خۆ یا موزیكێ هاته‌ سه‌ر سته‌یجێ و چه‌نده‌كێ ب ئه‌ڤێ هه‌لكه‌فتێ ب ئینگلیزى ئاخفت و لدۆڤ را ب كوردى گۆت ئه‌ڤه‌ بئه‌ڤێ هه‌لكه‌فتێ دێ سترانه‌كێ پێشكێش كه‌م و به‌رێ خۆدا تیما خۆ یا موزیكێ وچه‌ندین جاران ب ده‌ست و چاڤان هیما كر بۆ ئه‌ڤان براده‌رێن لسه‌ر كونترولێ لێ چ دیار نه‌بو , دوماهیێ گۆت داخوازا لێ بوورینێ دكه‌م ژبه‌ركو ئامیرێن ده‌نگى ( كونترولى ) نه‌دروستن نه‌شێم سترانا خۆ پێشكێش كه‌م .. چۆ و پشتى ده‌مه‌ك دى ( پشتى ئاریشا ته‌كنیكى هاتى چاره‌سه‌ر كرن ) ژنو زڤرى و برگه‌یا خۆ یا سترانێ پێشكێش كر !
دیساڤه‌ من ژى به‌رسڤا ئه‌وى براده‌رێ خۆ دا من گۆتێ ئه‌رێ تۆ دزانێ ئه‌ڤێ برگه‌یا ( ئارێشا ته‌كنیكى یا ئامیرێن ده‌نگى ) و پاشئێخستنا برگه‌یا هونه‌رى مه‌كوردان ژى ڤیا مه‌سجه‌كێ بگه‌هینین ئه‌ڤى كابرایێ ژاپونى و بێژین چه‌ند ئامیرێن هه‌وه‌ یێن ته‌كنه‌لۆژى نو وپێشكه‌فتى بن شێوێ بكارئینانا مه‌ دگه‌ل ئه‌ڤان كه‌ره‌سته‌ وئامیران دێ یا كلاسیكى بیت و وه‌كو پێتڤى ئه‌م نه‌شێن و نزانین بكار بینین !
ژبه‌ركو سه‌رێ هنده‌ ساڵایه‌ دگه‌ل ڤه‌كرنا هنده‌ زانكو و په‌یمانگه‌ها وده‌رچۆنا هه‌زاران قوتابیان و خۆل و راهێنانێن به‌رده‌وام دبوارێ ته‌كنیكى و ته‌كنه‌لۆژى دا و ئه‌ڤان ئاڤاهیێن بلند و هۆتێل و مۆتیل مۆل و ریستورانتێن جۆراو جۆر ده‌ما به‌بابه‌ت دگه‌هیته‌ برێڤه‌برنا كاره‌كێ ته‌كنیكى یێ ساده‌ گرێداى سیسته‌م و كونترول كرنا ده‌نگى یان نمایش كرنا داتا شویه‌كێ سه‌روبه‌ر تێك دچیت وگه‌له‌ك جاران كێشه‌ دئه‌ڤى بوارى دا په‌یدا دبن یان ده‌نگ ناگه‌هیت یان سیسته‌م ب دروستى كار ناكه‌ت , ئه‌جا وه‌كو عورفه‌كى لێ هاتى یه‌ كابرایێ پێشكێشكار ژى ب ساناهى دێ بێژیت داخوازێ لێ بورینى دكه‌ین ژبه‌ر كێشه‌یه‌كا ته‌كنیكى مه‌ نه‌شیا ئه‌ڤێ برگه‌یێ پێشكێش بكه‌ین , هه‌تا پشتى هینگێ ب ده‌مه‌كى دهێته‌ چاره‌سه‌ر كرن , وهنده‌ك جاران ژى ناهێت چاره‌سه‌ر كرن هه‌كه‌ر كه‌هره‌ب چو !
ئه‌ڤه‌یه‌ ئێك ژ ئه‌وان خالێن جهێ سه‌رنج راكێشانێ و لسه‌ر راوه‌ستانێ گرێداى وه‌رارا جڤاكى ل پتریا جڤاكێن مه‌یێن رۆژهه‌ڵات كۆ پێشكه‌فتنا ته‌كنه‌لۆژیایێ دگه‌ل پێشكه‌فتنا جڤاكى نه‌ یا هه‌ڤسه‌نگه‌ و دئێك ئاراسته‌ و دگه‌ل ئێك ناچن , و لڤێرێ ودگه‌ل هاتنا هه‌ر ئامێر و ته‌كنه‌لۆژیه‌كا نو ئه‌م پێتڤى خۆ گونجاندن و فێركرن و راهێنانێن نوى نه‌ ..

66

به‌یار باڤى
هه‌رچه‌نده‌ هه‌تا نها چ ئامارێن فه‌رمى و یێن دروست و باوه‌ر پێ كرى ل به‌رده‌ست نینن ل سه‌ر هژمارا زارۆیێن هێتیم (یێن كو باب یان ژى دایك و باب هه‌ردو ژ ده‌ست داین) هه‌روه‌سا هژمارا ئه‌وان ژنێن هه‌ڤژینێن خوه‌ ژ ده‌ست داین چ ژ ئه‌گه‌رێ كوشتن و مرنێ یان ژى به‌ردان و هێلانێ، هه‌روه‌سا هژمارا كه‌سێن په‌ككه‌فتى چ ژ ئه‌گه‌رێ شه‌ڕى و جه‌نگى یان ژى هۆكارێن سروشتى..
لێ ل گۆره‌ى داخویانیا په‌رله‌مانتاره‌كێ خولا نوو یا عیراقێ به‌رى چه‌ند رۆژه‌كا (كو هژمارا زارۆیێن هێتیم ل عیراقێ د سه‌ر پێنج ملیۆن زارۆیان دایه‌ (ژبلى یێن پارێزگه‌ها مۆسل و ئه‌نبار و هنده‌ك قه‌زایێن كه‌ركوك و صلاح الدین).
هه‌روه‌سا د ئه‌ڤێ مژارێ دا رێكخراوا نه‌ته‌وێن ئێكگرتى یا كاروبارێن زارۆیان (یونیسیف) به‌رى ساله‌كێ د راپورتا خوه‌ یا سالانه‌ دا ئاماژه‌ ب هژماره‌كا مه‌زنتر و ترسناكتر كریه‌ كو هژمارا زارۆیێن هێتیم ل عیراقێ پترن ژ 6 ملیۆن زارۆیان.
ده‌رباره‌ى هژمارا ژنێن هه‌ڤژینێن خوه‌ ژ ده‌ست داین (بیژن و به‌رداى) داتایێن ده‌زگایێ ناڤه‌ندى یێ ئامارێ ل عیراقێ دده‌ته‌ دیار كرن كو ئه‌ڤ هژماره‌ نێزیكى دو ملیۆن ژنان بخوه‌ڤه‌ دگریت..
و ل گۆره‌ى باده‌كێن وه‌زاره‌تا كاروبارێن ژنان ل عیراقێ ژ ئه‌ڤێ هژمارا ژنێن بیژن و
به‌رداى پترى 300 هزاران بتنێ ل به‌غدایا پایته‌خت دژین .
هه‌لبه‌ت گه‌له‌ك ئه‌گه‌ر هه‌نه‌ بۆ ئه‌ڤێ هژمارا مه‌زن یا ژنێن هه‌ڤژینێن خوه‌ ژ ده‌ست داین ل به‌راهیكێ شه‌ڕو جه‌نگێن به‌رده‌وام و توندوتیژى یا ل سه‌ر بنه‌مایێ ئیته‌نى و مه‌زهه‌بى هه‌روه‌سا به‌ربه‌ڵاڤبونا دیاردا كوشتن و تاوانا رێكخستى.. و ل گۆره‌ى ئامارێن رێكخراوا هه‌وار هاتنا نیڤ ده‌وله‌تى كو باره‌گایێ وێ یێ سه‌ره‌كى ل باژێرێ لوس ئه‌نجلوس ل ئه‌مریكایه‌ دیار دكه‌ت كو نێزیكى 60% ژ هژمارا ئه‌ڤ ژنێن هه‌ڤژینێن خوه‌ ژ ده‌ست داین د ماوێ ئه‌ڤان پازده‌ سالێن دوماهیكێ دا بویه‌ ..
و زێده‌بارى ئه‌ڤێ هژمارا مه‌زن یا ژن و زارۆیێن بێ سه‌میان لدووڤ ئامارێن هنده‌ك ئامارێن نه‌ فه‌رمى هژمارا كه‌سێن په‌ككه‌فتى ژى پترى 2 ملیۆن كه‌سایه‌ و هنده‌ك ئامار ئه‌ڤێ هژمارێ دگه‌هینن 3 ملیۆن كه‌سان كۆ پتریا وان ره‌گه‌زێ نێر بخوه‌ڤه‌ دگرن ژ ئه‌نجامێ كریارێن شه‌ڕ و جه‌نگى و ژ ده‌ستدانا ئه‌ندامه‌كى یان پتر ژ جه‌سته‌یێ خوه‌ .
لێ وه‌كو دیار پتریا ئه‌ڤان كه‌سان ژ هه‌رسێ جۆرێن ئاماژه‌ پێ كرى د ره‌وشه‌كا خراب یا ئابوورى دا ژیانا خوه‌ دبه‌نه‌ سه‌ر و نه‌شێن پێدڤیێن خوه‌ دابین بكه‌ن ..
وه‌ڵاته‌ك ب ئه‌ڤى ره‌نگى كۆ نێزیكى 9 ملیۆن كه‌سان د باره‌كێ جڤاكى ساخله‌مى و هه‌لبه‌ت ده‌روونى یێ نه‌گونجاى دا بژیت پێدڤى ب وه‌خته‌كێ درێژ و مه‌زاختنێن زه‌به‌لاحه‌ هه‌تا كو چه‌نده‌كێ ڤه‌گه‌ریت شێوازێ ژیانا سروشتى نه‌خاسمه‌ بۆ نفشێ پاشه‌رۆژێ كو هه‌كه‌ لدووڤ قه‌بارێ ئه‌ڤێ ره‌وشا خراب نه‌خشه‌ و پرۆژێن مه‌زن و ستراتیژى نه‌هێن دانان دێ ڤه‌رێژا ئه‌ڤى كه‌توارى كاره‌ساتێن خرابتر و مه‌زنتر بن .
و وه‌ك كه‌توارێ هه‌ى و دهێته‌ دیتن ئه‌و چاڤدێرى و گرنگیدانا پێدڤى ب ئه‌ڤێ
ته‌خێ ناهێته‌ كرن ( كو وه‌كو ته‌خا خودان پێدڤیێن تایبه‌ت دهێته‌ دیتن) و هه‌تا ئه‌و خزمه‌ت و هاریكاریێن بۆ ئه‌ڤان كه‌سان ژى دهێنه‌ پێشكێشكرن ژى گه‌له‌ك كێمه‌ و جهێ شه‌رمێ یه‌ كو چارێكا پێدڤیێن وان دابین ناكه‌ت وه‌ك نموونه‌ نێزیكى سه‌د دولاران وه‌كو هاریكارى یێن هه‌یڤانه‌ !.

53

_ به‌یار باڤى _
ژبه‌رى یا چه‌ند رۆژه‌كان دگه‌ل هه‌ڤاله‌كێ خۆ یێ نێزیك چومه‌ هه‌ولێرێ كو چه‌ندین ساله‌ ل وه‌ڵاته‌كێ ئه‌سكه‌نده‌ناڤى دژیت و بویه‌ خودان ناسناما ئه‌وى وه‌ڵاتى , كو بسه‌ره‌دان هاتبو كوردستانێ و به‌ره‌ڤ وه‌ڵاتێ ژێ هاتى زڤرى ..
دئه‌وان دوسێ ده‌مژمێرێن درێكێ دا لناڤبه‌را زاخو وهه‌ولێرێ مه‌ بوراندین دیمه‌نێن گیانه‌وه‌رێن كوشتى ژ ئه‌گه‌را لێدانا ترومپێلان ل هه‌ردو ره‌خێن جاددێ یان ژى ماینه‌ ب نیڤا جاددێ ڤه‌ به‌رچاڤ بون مینا پشیك و صه‌و …هتد
بۆ من دیتنا ئه‌ڤان دیمه‌نان تشته‌كێ نه‌یێ نو بو ل ئه‌ڤێ ژینگه‌ها هنده‌ ساله‌ ئه‌م تێدا دژین به‌لكو بۆیه‌ دیمه‌نه‌كێ رۆژانه‌ بتایبه‌ت پشتى هاتنا ئه‌ڤێ هه‌ژمارا زێده‌ یا ترۆمپێلان و كێماسى یا سیسته‌مێ شه‌قام وجادده‌یان گرێداى ئه‌ڤى بوارى ..
لێ ئه‌ڤ دیمه‌نه‌ بۆ هه‌ڤالێ من یێ كو نیڤه‌ك ژیێ خۆ ل ئه‌وروپا ده‌رباز كرى و خودان هه‌سته‌ك نازك به‌رامبه‌ر ئه‌ڤان گیانه‌وه‌رێن بێ زیان و هۆسا ب شێوه‌یه‌ك رۆژانه‌ وبه‌رچاڤ بهێنه‌ كوشتن تشته‌ك جهێ دلگرانیێ و قه‌ت نه‌سروشتى بو هه‌تا راده‌یه‌كى هه‌تا گه‌هشتنا مه‌ بۆ هه‌ولێرێ بابه‌ت بۆ بابه‌تێ گرنگى یا هه‌بون و پاراستنا ئه‌ڤان گیانه‌وه‌ران كو ئه‌ڤرو جڤاكێ ئه‌وروپى گرنگى یه‌ك مه‌زن پێ دده‌ت هه‌تا راده‌یه‌كى مه‌زن ده‌زگه‌ه و كۆمه‌له‌و رێكخراوێن گرێداى ئه‌ڤى بابه‌تى هه‌ته‌ چ وه‌كو خودان كرن و سه‌راگوهى كرن یان ژى به‌ره‌ڤانى ژێ كرن ..
و گوت هه‌كه‌ر ل ده‌مێ چێكرنا ئه‌ڤان شه‌قامێن درێژ هزر ل چێكرنا هنده‌ك ده‌روازه‌یان ژى هاتبا كرن بۆ ده‌رباز بونا ئه‌ڤان ئاژه‌ل و گیانه‌وه‌ران هنده‌ ژێ
نه‌دهاتن كوشتن و داهینه‌ پاراستن ..
ب راستى ئه‌ڤ براده‌رێ من ژدل حه‌ژ ئه‌ڤان جۆره‌ گیانه‌وه‌رێن مالوفى دكر و دگه‌ل هاتنا وى بۆ كوردستانێ پشیكه‌ك بۆ خۆ خودان كربى وماتى ژێ دكر و هه‌تا دڤیا پشیكا خۆ دگه‌ل خۆ ببه‌ت ژده‌رڤه‌ وبۆ ئه‌ڤێ مه‌به‌ستێ په‌یوه‌ندى ب كه‌سه‌كى كر ( نێزیكى كارو بارێن فروكه‌خانێ وگه‌شت وگوزارێ بو ) كو هه‌كه‌ر هات وسه‌فه‌را بهێت ئه‌و ڤه‌گه‌ریت كوردستانێ ئه‌و دێ شێت پشیكا خۆ دگه‌ل خۆ ببه‌ت !
من ژى گوتێ برا خێره‌ تو هنده‌ خۆ ب بابه‌تێ پشیكێ ڤه‌ مژول دكه‌ى, گوت ئه‌ڤ پشیكا ئه‌ز به‌حس دكم گه‌له‌ك یابچوكه‌ ونازكه‌ وپشیكێن دى یێن مه‌زن هه‌مو وێ ئازار دده‌ن بتنێ ده‌لیڤێن خۆشى و ئارامیا وێ ئه‌و چه‌نده‌یه‌ وه‌ختێ پشیكێن دى ژێ دوور یان ژى نڤستى ..
من گوتێ ئه‌رێ برا هه‌ر ژینگه‌ها مرۆڤ لێ بژیت فێرى كه‌لتور و ره‌وشت و بهایێن وان یێن جڤاكى دبیت و ئه‌ڤان سالانێن درێژ تۆ ل ئه‌ڤى وه‌ڵاتى هه‌لبه‌ت ئه‌ڤ كه‌لتوره‌ یێ بویه‌ به‌شه‌ك ژ سیسته‌مێ ژیانێ ل ده‌ف ته‌ .. لێ ئه‌ڤروكه‌ ل ئه‌ڤى وه‌ڵاتێ مه‌ ره‌نگه‌ كێم كه‌س هه‌بن ئه‌ڤ بابه‌ته‌ بۆ ئه‌وان خه‌م بیت یان ژى هه‌تا هزرێ لێ بكه‌ن نه‌بتنێ لسه‌ر ئه‌ڤان جادده‌یان رۆژانه‌ ئه‌ڤ گیانه‌وه‌رێن مالوفى و كه‌هى و كوڤى ژى دهێنه‌ كوشتن ژ ئه‌گه‌رێ لێدانا ترومپێلان به‌لكو هه‌تا چۆل و چیایێن مه‌ ژى ئه‌ڤرو رۆژ بۆ رۆژێ یێت ژ گیانه‌وه‌رێن كوڤى و ته‌یرو ته‌والا ڤالا دبن ,ئه‌و چیایێن هه‌ر ژدوور ده‌نگێ كه‌و وشالیل و بلبلا دهاته‌ گوهێن ته‌ ب زه‌حمه‌ت تو گوه ل ده‌نگه‌كى ژئه‌ڤان ببێ .. ئه‌و كومتێن هێلینێن باز و قورتان هه‌مبێز دكرن ئه‌ڤرو كه‌ڤره‌ به‌رێن بێ گیانن ..ئه‌و په‌زكویڤى وسیخور وكێرڤیشك و روڤیێن بوینه‌ به‌شه‌ك ژ ژینگه‌ه وسروشتێ مه‌ ئه‌ڤرو ناڤێ وان بتنێ دێ د چیرۆك و سه‌رهاتیێن فلكلورى دا بهیسین … هشیارى یا ژینگه‌هێ دوماهى تشته‌ هزر لێ بهێت كرن , ڤێجار پشیكا ته‌ و شانصێ خۆ هه‌كه‌ر جاره‌كادى تۆ زڤرى و هێشتا ئه‌و دژیانێ دا مابیت و ئه‌و شانص هه‌بیت دگه‌ل خۆ ببه‌ى ئه‌سكه‌نده‌ناڤیا !

38

– به‌یار باڤى –
دوهى ئانكو 6ى ئه‌ڤێ مه‌ها چریا دووێ ئێكه‌م رۆنشتنا خۆلا پێنجێ یا په‌رله‌مانێ كوردستانێ یێ نو هه‌لبژاتى بو ل هۆلا په‌رله‌مانى ل هه‌ولێرا پایته‌خت , كو ل هه‌لبژارتنێن 30ى ئیلونا بۆرى هاتیه‌ هه‌لبژارتن و ژچه‌ند فراكسیونێن جودا پێك دهێت ..
ب مخابنى ڤه‌ ب دیتنا رێژه‌یه‌ك مه‌زن ژ خه‌لكێ مه‌ ل ماوێ هه‌ر چار خۆلێن په‌رله‌مانى یێن بۆریدا ئه‌ڤى ده‌زگایێ گرنگ نه‌شیا ئه‌وى وینێ ئه‌رێنى وپێشبین كرى (كو نوینه‌رێن راسته‌قینه‌ یێن خه‌لكینه‌) بده‌ت خه‌لكێ و جاده‌یا كوردستانێ به‌لكو به‌روڤاژ پتر وه‌كو جهه‌كێ هه‌ڤڕكى و ململانێ و پاراستنا به‌رژوه‌ندى و ده‌ستكه‌فتیان دهاته‌ دیتن , و بئه‌ڤى ره‌نگى رۆژ بۆ رۆژێ سه‌نگ و هه‌یبه‌تا ئه‌ڤى ده‌زگایى دچاڤێ خه‌لكى و رایا گشتى دا كێم بو هه‌تا گه‌هشتیه‌ ئه‌وى راده‌ى كو ببیته‌ گه‌رمترین بابه‌ت ل سوشیال مه‌دیایێ بهێته‌ ئازراندن و ئاخفتن لسه‌ر بهێته‌ كرن زێده‌بارى ئه‌نجامدانا خڕڤه‌بونا و ده‌ركرنا به‌یاننامێن نه‌ڕازیبونێ ژئالیێ رێكخراوێن جڤاكێ سڤیل بۆ رێگرتن ل ئه‌وان ده‌ستكه‌فت وئیمتیازاتێن په‌رله‌مانتاران (ب یاسا بۆ خۆ رێكخستین!) وه‌كو مۆچه‌یه‌كێ زه‌به‌لاح وخانه‌نشین كرن و وه‌رگرتنا موسته‌حه‌قاتێن شه‌ش هه‌یڤێن خانه‌نشین كرنێ 48 مه‌لیون دیناران, بتایبه‌ت ل وه‌ڵاته‌كى كو مۆچێ كه‌سه‌كێ بیست سالان خزمه‌ت كرى بتنێ 220 هزار دینارن , ومۆچێ كه‌سه‌كێ په‌ككه‌فتى دیساڤه‌ 150 هه‌زار دینارن ( و نوكه‌ پشتى پاشكه‌وتێ 120 هه‌زار دینارن ) !
و زێده‌بارى هنده‌ك گازندێن گشتى وه‌كو نه‌ده‌ركرنا یاسایێن چاكسازیێ و هه‌ر وه‌سا رێكخستن و ئێكگرتنا له‌شكه‌رێ كوردستانێ و ده‌ستوورى (كو ره‌نگه‌ هۆكارێن جودا جودا هه‌بن ) لێ هه‌ر ئه‌ڤ چه‌نده‌ ژى ئه‌ڤرو یان سوبه‌ ئه‌ركێ په‌رله‌مانى یه‌ ئه‌ڤان یاسایان ده‌ربێخیت ) .
ب هه‌ر حال خه‌لكێ مه‌یێ هه‌رێما كوردستانێ چار خۆلێن په‌رله‌مانى دانه‌ رێ و ئه‌ڤه‌ خۆلا پێنجێ ژى كه‌فته‌ كارى ( و هه‌لبه‌ت هه‌ر خۆله‌ك دناڤ ره‌وش و سه‌قایه‌كێ سیاسى و ئابورى یێ جودا ده‌بو) لێ تشتێ نه‌هێته‌ ڤه‌شارتن ئه‌وه‌ كو ئه‌ڤى په‌رله‌مانى نه‌شیا ئه‌وى وێنێ ئه‌رێنى و شایسته‌ بده‌ت خه‌لكێ كوردستانێ كو هه‌لگرێ ئه‌وێ په‌یامێ یه‌ ئه‌وا پێ هاتى راسپاردن و
گه‌هشتى یه‌ راده‌یه‌كى كو په‌رله‌مانتار وه‌كو ته‌خه‌كا بلندا ده‌وله‌مه‌ند و ( ئه‌رستوكراتى ) بهێنه‌ ته‌ماشه‌كرن .. ب چه‌پره‌وو راستره‌وێن خۆڤه‌ , ب عیلمانى و بانگخوازێن خۆڤه‌ !
په‌رله‌مانتاره‌ك ژ یێن خۆلێن به‌رێ جامێرى جۆر و مودێلا ترومپێلا وى یا نورمال بو لێ ئه‌و ترومپێل فروت و ئێكا جۆرێ … ئاخر مودێل كرى , ژێ پرسین ته‌بۆچى ترومپێلا خۆ فرۆت هنده‌ ساله‌ ته‌گه‌له‌ك په‌سنا وێ دكر و بێ قوسیر بو , گوت ئه‌ڤرو قه‌ره‌چان ژى ئه‌ڤ جۆره‌ ترومپێل هه‌نه‌ !( وكابرا ئه‌ڤرو خودان هه‌ر تشت و باش بازرگانه‌) وگه‌له‌ك نمونێن وه‌كو وى..
تشتێ نۆ دئه‌ڤێ خۆلا نویا په‌رله‌مانى دا كو هه‌تا راده‌یه‌كى ببیت جهێ ئومێد به‌خشینێ :
– پترى یا ئه‌ندام په‌رله‌مانێن ئه‌ڤێ خۆلێ كه‌سێن گه‌نجن و هه‌تا راده‌یه‌ك مه‌زن نفشێ پشتى سه‌رهه‌لدانێ نه‌, و كه‌فتینه‌ به‌ر ئه‌وان قوناغێن هه‌ڤركى و ململانێ ….
– ره‌وشا ئابوورى و سیاسى یا هه‌رێمێ هه‌تا راده‌یه‌ك مه‌زن یا جودایه‌ و ئارامتره‌ ژ خۆلا ژبه‌رى نوكه‌ ..
– بڕیاردان لسه‌ر هه‌ر یاسایه‌كا ( مه‌ره‌م چاكسازى بیت ) هه‌تا راده‌یه‌ك مه‌زن دێ ئاسانتر بیت ژ خۆلێن بۆرى ژبه‌ركو كۆمكرنا ده‌نگێن پێتڤى دێ ئاسانتر بیت.. وئه‌و كێش و ڤه‌كێشا جاران و هه‌ر ئێك ئۆبالێ باڤێژیت سه‌ر ملێ یێ دى نامینیت ..
– هاتنا كه‌سانێن خۆدان پێگه‌هێن جڤاكى و جه‌ماوه‌رى ژ ته‌خا گشتى یا جڤاكى گهۆرینه‌كێ ل ل نێرینا خه‌لكى دكه‌ت بۆ ئه‌وێ فۆرما هنده‌ ساله‌ په‌رله‌مان پێ دهێت نیاسین, مینا هاتنا كه‌سه‌كێ كارێ عه‌ره‌بانچیێ دكر یان ژى كه‌سه‌كى بێژیت وه‌كو جاران هاتن و چونا من بۆ په‌رله‌مانى و ژپه‌رله‌مانى بۆ مال دێ ب پایسكلى بیت !
و گوتنا كوردى ژى دبێژیت هه‌كه‌ر بمینێ دێ بینێ ..

51

– به‌یار باڤى –
ژبه‌رى چه‌ند رۆژان براده‌ره‌ك خه‌لكى ئێك ژئه‌ڤان گوندێن به‌ر بنێ زنجیرا چیایێ بێخیرى ( یێ كو دكه‌ڤیت باكوورێ رۆژئاڤایێ زاخو ) وپتر ب كارێ رێنجبه‌راتیێ و جوتكاریێ ژیانا خو دبه‌ت سه‌ر , گۆت ئه‌م یێ سوحبه‌تا گوندى و ئاڤا كرنا گوندى و ژیانا گوندان دكه‌ین گوت ژنشكه‌كێ ڤه‌ من دیت بازرگانه‌ك ( حه‌فك ستویر ! ) هات و هه‌ما بێى كو شاره‌زاى لسه‌ر گوندى و ئاقار و نه‌خشێ گوندى هه‌بیت به‌رێ خۆ دا ئه‌وى چیایێ بلند یێ ل سه‌متا گوندى و تبلا خۆ درێژ كره‌ كومته‌كێ بلند یێ چیاى و گوته‌ من تۆ ئه‌وى كومتێ چیاى نافروشى ئه‌ز دێ ده‌فته‌ره‌ك دولارى ده‌مه‌ته‌ !
دبێژیت ب سوحبه‌ت ڤه‌ مه‌ گۆتێ هه‌ما ته‌ ژمه‌ كڕى ژى مادێ چه‌وا تاپۆ كه‌ى , دبێژیت گۆته‌ من تۆ پارێ خۆ وه‌ربگره‌ تاپۆ كرن خه‌ما من (دبێژیت كابراى نڤیسینگه‌هه‌كا كرینا ئه‌ردو خانیان ژى هه‌بو) !
ب هه‌ر حالێ هه‌ى كابرا ده‌ست ڤالا زڤرى و ئه‌و كومتێ چیاى نه‌كڕى كو دگوت دێ ئاڤاهیه‌كى لێ ئاڤا كه‌م ,ئاڤاهیه‌كێ گه‌شتیارى !
هه‌لبه‌ت ئه‌و چیایه‌ مینا هه‌مو چیایان ژینگه‌هه‌كا سروشتى یه‌ و مولكێ گشتى یه‌ وه‌كو هه‌مو جهێن سروشتى وخوه‌زایى ولسه‌ر چ ده‌ورو زه‌مانان نه‌هاتینه‌ تاپۆ كرن یان لسه‌ر ناڤێ كه‌سان هاتبن نڤێسین.
ئه‌ڤێ سوحبه‌تێ سۆحبه‌ته‌كا دى ئینا بیرا من سوحبه‌تا گه‌لیێ زاخو كو ئه‌ڤان رۆژا دهنده‌ك چارچۆڤێن به‌رته‌نگدا بگه‌رمى سوحبه‌ت لسه‌ر دهێته‌ كرن كۆ ببیته‌ جهه‌كێ گه‌شتیارى بتایبه‌ت پشتى ڤه‌گوهازتنا رێَكا هاتن و چۆنا ترومپێلان ژ ئه‌ڤى گه‌لى بۆ تۆنێلا ب ته‌نشتا گه‌لى ڤه‌ هاتى چێ كرن و لئه‌ڤ ساله‌ هاتى یه‌ ڤه‌كرن ..
گه‌لیێ زاخۆ یێ كو ب چه‌ند كیلو مه‌ترێن كێم دكه‌ڤیته‌ باشورێ باژێرى خودان ناڤ و پێگه‌هه‌كا دیاره‌ ژ گه‌له‌ك ئالیێن دیروكى و كه‌لتورى و ستراتیژى ڤه‌ وه‌كو ئاماژه‌ پێ كرنا سه‌ركردێ له‌شكه‌رێ یونانى زه‌ینه‌فونى ( سالا 401 پێش زایینێ ) كو دڤه‌گه‌ڕیانا خۆ یاده‌ه هه‌زار له‌شكه‌رى دا ئاماژێ ب ئه‌وێ به‌رهه‌نگاریا خه‌لكێ ڤێ ده‌ڤه‌رێ دكه‌ت .. و هه‌روه‌سا هه‌تا لسه‌ر ده‌مێ شۆره‌شا ئه‌یلولێ و هه‌تا ل ده‌ستپێكا سه‌رهه‌لدانا 1991ێ ژى ئێك ژ ئه‌وان جهێن هێمایێن به‌رگرى و خۆراگریا پێشمه‌رگێ كوردستانێ بۆ , زێده‌بارى وێ چه‌ندێ كو لسه‌ر ئاستێ كوردستانێ و ده‌ڤه‌رێ ژى ب درێژاهى یا ده‌هان سالان رێیه‌كا گرنگ وسه‌ره‌كى یا هاتن وچونا نافخۆى و نێڤ ده‌وله‌تى ناڤ و ده‌نگێ خۆ هه‌بو ..
جهه‌كێ هۆسا گرنگ و هه‌روه‌سا بیاڤه‌ك مه‌زن ژ ژینگه‌ها سروشتى بخۆڤه‌ دگریت ئه‌ڤرۆ پتر ب ره‌وش و جوان دهێته‌ به‌ر چاڤ بتایبه‌ت پشتى ڤه‌گوهازتنا هه‌ژمارا زۆرا ترۆمپێلان بۆ تونێلێ و ئێدى گه‌لى ژ ئه‌وێ ره‌وشا نه‌سروشتى یا تێر قه‌له‌باله‌غ و ڤه‌رێژ و دوكێل و به‌رماییكێن ترۆمپێلا قورتال بوى ..
و ئه‌ڤ ره‌وشا نوى و سروشتێ خوه‌زای و جوانێ گه‌لیێ زاخو ده‌رفه‌ته‌كه‌ ئه‌ڤ جهه‌ بهێته‌ ( ئیستغلال كرن ) بۆ خزمه‌تا خه‌لكێ ب گشتى و بئه‌ڤى شێوێ خۆ یێ سروشتى دگه‌ل به‌رجه‌سته‌ كرنا ئالاڤێن پێتڤى بهێته‌ بكار ئینان بۆ گه‌شت و گوزارێ بۆ هاولاتیان بتایبه‌ت پشتى كو پتریا ئه‌ڤ ده‌ڤه‌رێن ده‌ورو به‌ر هاتینه‌ تێكدان و شێواندن و ده‌ست ب سه‌ردا گرتن ژ ئالیێ ( حه‌فك ستویرا ) ڤه‌ !
ئێخستنا ئه‌ڤى جهى ( گه‌لیێ زاخو ) بۆ جهه‌ك گه‌شت و گوزارى و گه‌هاندنا خزمه‌ت و ئاسانكاریێن پێتڤى دێ گه‌له‌ك خزمه‌تا خه‌لكێ ده‌ڤه‌رێ كه‌ت بتایبه‌ت خه‌لكێ زاخۆ كو جهه‌ك نێزیكه‌ و هه‌ر وه‌سا دووره‌ ژ مه‌ترسیێن رێكێ یان جهێ قه‌ست بكه‌نێ و زێده‌بارى ئه‌وێ چه‌ندێ كو بیاڤه‌كێ مه‌زن بخۆڤه‌ دگریت كۆ هه‌ژماره‌كا زۆرا گه‌شتیاران هه‌مبێز بكه‌ت .. لێ هه‌كه‌ر حكومه‌ت پێ رابیت نه‌كو بكه‌ڤیت ده‌ستێ بازرگان و (به‌رپرسێن بازرگان ) دا ..كو وى ده‌مى مه‌ترسیا فروتنا كه‌ڤرو دارو به‌را ژى دهێت كرن چه‌وا كو دهێته‌ گۆتن كو ئه‌و گر و زویرێن هنداڤى زاخۆ و هه‌وه‌سا پتر ژ نیڤه‌كا ره‌خ و روى یێن خابیرى ژى هاتینه‌ فروتن و تاپو كرن !

52

– به‌یار باڤى –
وه‌كو ته‌قلیده‌ك ل هه‌ر پێنج ئه‌ڤان ڤه‌ستیڤالێن دهوك یێن سینه‌مایێ كو ئه‌ڤه‌ ژى دێ بیته‌ یا شه‌شێ ,هه‌ر جار بۆ جاره‌كێ یان ژى پتر ژ زاخو قه‌ستا دهوكێ دكه‌م بۆ دیتنا چه‌ند فیلمه‌كان ژ ئه‌ڤان فیلمێن دهێنه‌ نمایش كرن ..
ئه‌ڤ ساله‌ژى ل شه‌شه‌مین ڤه‌ستیڤالا دهوك یاسینه‌مایێ كو ل رۆژانێن 20 هه‌تا 27 ى ئه‌ڤێ مه‌هێ به‌رده‌وام دبیت وتێدا 105فیلمێن كوردى و بیانى دهێنه‌ نمایش .. رۆژا دووێ یا ڤه‌ستیڤالى بۆ ده‌مژمێر حه‌فتى ئێڤارى ئه‌ز و هه‌ڤالێ خۆ یێ نڤیسه‌ر كاك عصمت به‌ده‌ل مه‌ قه‌ستا دهوك مۆل كر فیلمه‌كێ ئه‌رمه‌نى هه‌لبژارت ب ناڤێ ( YEVA ) ل هۆلا ژماره‌ 1 .. ب راستى جهێ سه‌ر سومانێ بوم ده‌ما مه‌ دیتى كو هه‌ژمارا كه‌سێن ئاماده‌بوى بتنێ شه‌ش كه‌سن !
ژ به‌رى چۆنا ژوور بۆ دیتنا فیلمى هه‌ر ل ئه‌ڤى جهى هه‌ڤاله‌كێ مه‌ یێ دى یێ نڤیسه‌رێ دهوكێ سلاڤى مه‌ كر وه‌ سا دیار بۆ ئه‌وى ده‌مژمێر پێنج هه‌لبژارتبو بۆ دیتنا فیلمه‌كى دى یێ بیانى ,ئه‌وى ژى گازنده‌ دكر كو ئه‌و فیلمێ ئه‌و چوى بۆ دیتنا وى هه‌ژمارا ئاماده‌بویان ژ تبلێن ده‌سته‌كى كێمتر بون !
ب راستى ئه‌ڤ كه‌توارێ قه‌یرانا بینه‌رێ سینه‌مایێ ب ئه‌ڤى ره‌نگێ بالكێش جهێ
لسه‌ر راوه‌ستانێ یه‌ بتایبه‌ت ژ ئالیێ ئه‌ڤ لایه‌نێن ب ئه‌ڤان چالاكیان رادبن و بهه‌یڤان پێڤه‌ مژول دبن و هه‌ژماره‌كا زۆر ژكارمه‌ند و گه‌نجان به‌رده‌وام د ئاماده‌ باشیێ دانه‌ هه‌تا كو ڤه‌ستیڤال ب دوماهى دهێت و زێده‌ بارى مه‌زاختنێن زۆر و هه‌روه‌سا هه‌وه‌كا راگه‌هاندنێ یا سه‌رانسه‌رى كو ئه‌نجام ب ئه‌ڤى ره‌نگى بن .. !
هه‌ر چه‌نده‌ وه‌كو من بهیستى كو چونا خه‌لكێ مه‌ بۆ دیتنا فیلمێن كوردى باشتره‌ ژ چونا فیلمێن بیانى , لێ بشیوه‌یه‌ك گشتى ئه‌م دشێن بێژین ئه‌ڤرو مه‌ ل هه‌رێما كوردستانێ قه‌یرانا بینه‌رێ سینه‌مایێ هه‌یه‌,بتایبه‌ت ل ئه‌ڤێ شه‌شه‌مین ڤه‌ستیڤالا دهوك یا فیلمێن سینه‌مایێ كو سه‌ره‌رایى گه‌له‌ك فاكته‌رێن هاریكار و رێ خوشكه‌ر بۆ بینه‌رى وه‌ك میناك :
– بهایێ كێم یێ پلێتا چونا ژوور (بتنێ سێ هه‌زار دینار) !
– رێك وپێكى یا جهێ نمایش كرنا فیلمان چ لهۆلا زانكویێ یان ژى دهۆك مۆل .
– ئه‌ته‌كیتا رێزگرتن و جوانیا پێشوازى و سه‌ره‌ده‌ریێ ژئالیێ ئه‌وان تیمێن كچ و كۆرێن پێشوازیا مێهڤانان دكرن ژ پلێت بڕان هه‌تا یێن ده‌رگه‌هێ هۆلا سینه‌مایێ.
– به‌رده‌ست كرنا كه‌ته‌لوكا فیلمێن فیسته‌ڤالێ كو تێدا جه و ده‌مێ دیار كرى ب بۆ هه‌ر فیلمه‌كى و بشێوه‌یه‌ك نامیله‌كه‌یا جوان و بێ به‌رامبه‌ر .
– هه‌لبژارتنا دو جهان ( هۆلا زانكوا دهوك و هه‌ر وه‌سا دهوك مۆل ) كۆ ره‌نگه‌ چونا جهێ ئێكێ بۆ ئێكى ب زه‌حمه‌ت بیت ئه‌ڤ جهێ دووێ هه‌تا راده‌یه‌كى نێزیكتره‌ .
ئانكو ئه‌م دشێن بێژین كو هه‌تا راده‌یه‌ك مه‌زن بابه‌تێ نه‌بونا ( جه‌مهورێ ) سینه‌مایێ ب ئه‌ڤى ره‌نگێ به‌رچاڤ نه‌گرێداى بابه‌تێ ماددى یه‌ یان ژى ئالیه‌كێ كه‌لتورێ بهایێن جڤاكى یێ ڕێگر به‌لكو گرێداى هنده‌ك فاكته‌رێن گشتى یه‌ وه‌ك:
-نه‌بونا پیشه‌سازى ( صناعه‌ ) یا سینه‌مایێ ل هه‌رێما كوردستانێ چ لسه‌ر ئاستێ حكومه‌تێ یان ژى كه‌رتێ تایبه‌ت .
– گرنگى نه‌دان ب زه‌مینه‌سازى یه‌كا پێش وه‌خت بۆ به‌ڵاڤ كرن و حه‌ژێ كرنا سینه‌مایێ ل ده‌ف خه‌لكى ئه‌وژى ب رێكا ڤه‌كرنا هۆلێن سینه‌مایێ ,هه‌تا ئه‌گه‌ر ئێك هۆل ژى بیت ل سه‌نته‌رێ پارێزگه‌هێ یان یان باژێرێن دى یێن مه‌زن ..
-گرنكى نه‌دانا پێتڤى ب ناڤه‌ندێن تایبه‌ت یێن بوارێن هونه‌رى و درامایێ ئه‌وێن هه‌ین ل زانكو و په‌یمانگه‌هان ب رێكا پشته‌ڤانى كرن بۆ به‌رهه‌م ئینانا به‌رهه‌مێن هونه‌رى یێن خۆمالى و هه‌ر وه‌سا سازكرنا ڤه‌ستیڤال و به‌ریكانه‌یان دناڤبه‌را ئه‌ڤان ناڤه‌ندان دا لسه‌ر ئاستێ هه‌رێمێ .
-دیساڤه‌ ئه‌و گڤاشتنێن ده‌روونى یێن لسه‌ر تاكێ مه‌ هه‌ین ژ ئه‌نجامێ ئه‌ڤێ ره‌وشا ئالووز و قه‌یرانێن ل دۆڤ ئێك بتایبه‌ت ل ئه‌ڤان چه‌ند سالێن دوماهیێ , فاكته‌ره‌كێ دى یه‌ كو چونا سینه‌مایێ ببیت دوماهى تشت ئه‌و هزر لێ بكه‌ت!
ل دوماهیێ دبێژم بتنێ وه‌كو بینه‌ره‌ك و حه‌ژیكه‌ره‌كێ سینه‌مایێ من ئه‌ڤ دیتن و تێبینى به‌رچاڤ كرن ,و هه‌لسه‌نگاندن بلا بۆ كه‌سێن تایبه‌تمه‌ندێن ئه‌ڤى بوارێ بیت .

website security