NO IORG
نووترين نووچه
Authors Posts by به‌يار باڤي

به‌يار باڤي

به‌يار باڤي
99 POSTS 0 COMMENTS

70

– به‌یار باڤى –
مژارا نقۆم بوونا به‌له‌مه‌كێ ل ده‌ریا ئیجه‌ یا دناڤبه‌را توركیا و وه‌ڵاتێ یونان دا ژبه‌رى یا حه‌فتى یه‌كێ و قوربانیێن ئه‌وێ كو پتر ژ سیه كه‌سان بون و پترى یا وان خه‌لكێ زاخۆ و دهوك بون , ئه‌ڤ بویه‌را تراژیدى و خه‌مگین زێده‌بارى هه‌ڤخه‌مى یا خه‌لكێ بۆ قوربانیان و كه‌س و كارێن وان دیساڤه‌ مژارا دیاردا كۆچبه‌ریێ ژ هه‌رێما كوردستانێ بۆ ژده‌رڤه‌ى وه‌ڵاتى ئازراند و بو بابه‌تێ گه‌رمێ ده‌زگایێن رۆژنامه‌ڤانى و مه‌دیایێ ب گشتى ..
ل دۆڤ ئامارێن فه‌رمى یێن ژ ئالیێ لایه‌نێن په‌یوه‌ندیدار ڤه‌ هاتینه‌ به‌ڵاڤ كرن دماوێ ئه‌ڤان چار سالێن دوماهیێ 350 كه‌س یێن خه‌لكێ هه‌رێما كوردستانێ دده‌ریا ئیجه‌دا خه‌ندقینه‌ و لاشێ160 ژێ بۆ كه‌س و كاران بۆ كوردستانێ هاتینه‌ ڤه‌گه‌راندن ..
ئه‌ڤ هه‌ژمارا زێده‌یا قوربانیان و هه‌روه‌سا هه‌ژمارا زێده‌یا یا خه‌لكێ مه‌ یێ كو ژ هه‌رێما كوردستانێ كۆچبه‌ر دبیت كو هه‌مو ته‌خ و تویژێن جڤاكى ب خۆڤه‌ دگریت و رۆژ بۆ رۆژێ د زێده‌بوونێ دایه‌ , ئه‌ڤ چه‌نده‌ مینا زه‌نگه‌كا مه‌ترسیێ یه‌ لسه‌ر ئه‌ڤرۆ و پێشه‌رۆژا وه‌لات و جڤاكێ مه‌ و پێتڤى یه‌ حكومه‌ت ولایه‌نێن په‌یوه‌ندار لسه‌ر راوه‌ستن وهه‌مو لایه‌نێن گرێداى بابه‌تى بێخن به‌ر شرۆڤه‌كرن و دۆڤچونێ ب مه‌ره‌ما دیتنا رێكێن چاره‌سه‌ریێ و ئێدى به‌س ئه‌ڤ خه‌لكێ بێ گونه‌ه ببیت قوربانى تۆرێن قه‌چاغچیان و پێلێن بێ ره‌حمێن ده‌ریا ئیجه‌ .
هه‌ر چه‌نده‌ چو ئامارێن فه‌رمى یێن دروست یێن هه‌ژمارا خه‌لكێ كوچبه‌ر ژ هه‌رێما كوردستانێ بۆ ژده‌رڤه‌ نینن لێ ل دۆڤ هنده‌ك ئامارێن به‌ڵاڤ بوین نێزیكى 240 هه‌زار كه‌س ل ئه‌ڤان چار پێنج سالێن دوماهیێ كۆچبه‌ربوینه‌
( ب ئێزدى و كریستیان ڤه‌ ) و ئه‌ڤه‌ژى هه‌ژماره‌كا مه‌زن و بالكێشه‌ بو وه‌ڵاته‌كێ وه‌كو وه‌ڵاتێ مه‌ كو هه‌ژمارا ئاكنجیێن وى بتنێ لناڤبه‌را پێنج شه‌ش مه‌لیون كه‌سان بیت !
• ئه‌گه‌رێن كۆچبه‌ریێ : هه‌ر چه‌نده‌ گه‌له‌ك جاران بابه‌تێ ئه‌گه‌رێن كۆچبه‌ریێ ژ هه‌رێما مه‌ بۆ ژ ده‌رڤه‌ى وه‌ڵاتى هاتینه‌ ئاماژه‌ پێ كرن لێ بۆ ئه‌ڤێ قۆناغێ ( كو بتایبه‌ت ئه‌گه‌رێ فاكته‌رێ شه‌ڕى لسه‌ر هه‌رێما كوردستانێ ژێ هاتى یه‌ ده‌ر ) چه‌ندین فاكته‌رێن دى هه‌ر وه‌ك خۆ ماینه‌ :
– فاكته‌رێ سیاسى :رێك نه‌كه‌فتن و هه‌ڤنه‌گرتن و به‌ربژاله‌یى یا هێزێن سیاسى یێن ده‌ستهه‌ڵاتا هه‌رێمێ گه‌له‌ك به‌رنامه‌ و پرۆژه‌یێن گرنگ و گرێداى ژیان وپێشه‌رۆژا هاوڵاتیان هه‌لاویستى
هێلاینه‌ وبێ ئومێدى ل ده‌ڤ رێژه‌كا مه‌زن ژخه‌لكێ په‌یدا كریه‌.
– فاكته‌رێ ئابوورى :ونمونه‌ رێژا بلندا بێ كاریێ و هه‌روه‌سا نه‌ دامه‌زراندنێ بتایبه‌ت بۆگه‌نجان وده‌رچویێن زانكو وپه‌یمانگه‌ها و مۆچێ كێم وچاره‌سه‌ر نه‌كرنا بابه‌تێ سیسته‌مێ (پاشه‌كه‌وت) و نه‌بونا سولفه‌یێن هه‌ڤژینیێ و ئاڤاهیان و پالپشتیا گه‌نجان …
– فاكته‌رێ جڤاكى :خالا هه‌رى به‌رچاڤ دئه‌ڤى بوارى دا هه‌ست كرن ب نه‌داد په‌روه‌ریا جڤاكى یه‌ بتایبه‌ت كو سیسته‌مێ ئه‌ڤى جڤاكێ مه‌ یێ وه‌كو جڤاكه‌كێ لسه‌ر دو ته‌خا هاتى پارڤه‌ كرن دهێته‌ به‌رچاڤ ؛ ته‌خا بچوك یا خانه‌دان و خودان هه‌مو تشت و (امتیازات) و پێتڤیێن خۆشگوزه‌رانیێ و ته‌خا مه‌زن یا گشتى كو ب هیڤى یا موچه‌ى یان داهاته‌كێ كێم و ئه‌ڤرو بۆ سوباهى دژیت بێى كو بشێت به‌رنامه‌یه‌كى بۆ پاشه‌رۆژا خۆ یان خۆ و زارۆكێن خۆ دانیت .. ئه‌ڤه‌ و زێده‌بارى چاڤ لێ كرنێ و هه‌ر وه‌سا كه‌لتور و بهایێن جڤاكى ..
– فاكته‌رێ ده‌روونى : جڤاكه‌ك ب درێژاهى یا پێنجى شێست ساڵان دناڤ ژینگه‌هه‌كا شه‌رو كوشتن و راگوهاستن و مالوێرانى دا ده‌ربازببیت هه‌لبه‌ت دێ ئه‌ڤ تاكێ جڤاكى تۆشى هنده‌ك
گڤاشتنێن ده‌روونى بیت , و زێده‌بارى فاكته‌رێ جوگرافى یا هه‌رێمێ ( یا به‌رته‌نگ ) كو ره‌نگه‌ ئه‌ڤ زارۆكێ ل سه‌رهه‌لدانا 1991ێ ژیێ وى حه‌فت ساڵ ئه‌ڤرو ژیێ وى بۆ یه‌ 35 سال هه‌مى ده‌ركه‌فتن و گه‌ڕیانا وى ژ چارچوڤێ پارێزگه‌ها خۆ ده‌رنه‌كه‌فتى یه‌ وهه‌ر رۆژ هه‌مان مرۆڤ و هه‌مان ئاڤاهى و هه‌مان دیمه‌نان دوباره‌ دبینیت ( و ئه‌ڤه‌ ژى وه‌كو بێ تاقه‌تى و بێهن ته‌نگى یه‌كێ ل ده‌ف په‌یدا دكه‌ت ) و هه‌وڵا گهۆرینێ دده‌ت بتایبه‌ت سه‌رده‌مێ گلوبالیزم وئاشنا بۆن لسه‌ر جیهانا ژده‌رڤه‌.
• رێكێن چاره‌سه‌ریێ :هه‌لبه‌ت تێ گه‌هشتن وچاره‌سه‌ر كرنا فاكته‌ر و ئه‌گه‌رێن كۆچبه‌ریێ ( وه‌كو یێن ئاماژه‌ پێ كرى ) ب ئه‌ڤى ره‌نگێ به‌رفره‌ه و بێ به‌رنامه‌یى و ئینانا كاره‌ساتا بۆ كه‌سى و خێزانان بخوه‌ دبیته‌ رێكه‌ چاره‌یه‌ك بۆ كێم كرنا ئاكامێن نه‌رێنى یێن ئه‌ڤێ دیاردێ .. ئه‌ڤه‌ژى ب پله‌ ئێك ئه‌ركێ حكومه‌تێ و دام و ده‌زگه‌هێن په‌یوه‌ندیداره‌ .

37

به‌یار باڤى
جودا ژ هه‌موو پله‌ و پوستێن دى یێن حیزبى و حكومى و فه‌رمى چ پوست وه‌كو یێ په‌رله‌مانتاریێ شرین نه‌بوینه‌ و نه‌بوینه‌ جهێ هه‌ڤركى و ململانێ كو هه‌تا هه‌كه‌ جاران هنده‌ك كه‌س نیڤه‌ك مال و سه‌روه‌تێَ خوه‌ ژى د ئه‌ڤێ رێیێ دا بكه‌ن قوربان!
ئه‌ڤ دیارده‌ هه‌لبژارتن بۆ هه‌لبژارتنێ گه‌رمتر دبیت و ل گه‌لدا هه‌ڤڕكى ژى خورتتر و دژوارتر دبیت، نه‌ك بتنێ دناڤبه‌را ئالیێن هه‌ڤڕكێن سیاسى و ئایدیولوژیێن ژێك جودا به‌لكو هه‌تا دناڤبه‌را كاندیدێن ئێك ئالیێ سیاسى!
د جڤاكێن مه‌ده‌نى و پێشكه‌فتى دا پیڤه‌رێ سه‌ره‌كى یێ ده‌ستنیشان كرن و هه‌لبژارتنا كاندیدى پیڤه‌رێ خزمه‌ت كرنێ یه‌ گرنگ نینه‌ ئه‌و كه‌س كى بیت یان باگره‌وه‌ندێ وى چ بیت، بۆ نموونه‌ وه‌ڵاته‌كێ قه‌باره‌ بچووكێ مینا سوێدێ د هه‌لبژارتنێن په‌رله‌مانى یێن ل ڤێ دووماهیێ هاتینه‌ ئه‌نجامدان یازده‌ به‌ربژێر كورد بون ..
تشتێ جهێ سه‌رنج راكێشانێ ل هه‌رێما كوردستانێ پوستێ په‌رله‌مانتاریێ (چ بۆ په‌رله‌مانێ هه‌رێمێ بیت یان یێ ئیراقێ) ژ شانا هنگڤینى شرینتر لێ هاتیه‌ و حه‌زا هه‌ر كه‌سێ دچیتێ ژ ئه‌ندامێ مه‌كته‌ب سیاسى بگره‌ هه‌تا وه‌زیر و دادوه‌ر و عه‌میدى و زانكویێ و ئاغاو بازرگان و زه‌لامێن ئایینى … هتد
و وه‌كو ئه‌م دبینین و كه‌توارێ مه‌ یێ جڤاكى و قوناغا ئه‌م تێرا ده‌رباز دبین دێ بینین ده‌زگه‌هێ ته‌قلیدى یێ عه‌شیره‌تێ ژ ده‌زگه‌هێن سه‌ره‌كیه‌ كو ئه‌ڤ هه‌موو كاندیده‌ قه‌ست بكه‌نێ و هه‌تا راده‌یه‌ك مه‌زن پشتا خوه‌ پێ گرێ بده‌ن و هیڤیێن خوه‌ بۆ (چونا په‌رله‌مانى) ل سه‌ر ئاڤا بكه‌ن و ئه‌وێ پتر ره‌صید ل ئه‌ڤى وارگه‌هێ (عه‌شیره‌تێ) هه‌بیت وه‌كى دیار پتر هیڤیێن سه‌ركه‌فتنێ هه‌بۆن!
راسته‌ دناڤ ئه‌ڤان كه‌ساندا كه‌سێن شاره‌زا و تایبه‌تمه‌ند و دلسوز هه‌نه‌ كو حه‌زا خزمه‌تێ و خزمه‌تكرنێ لده‌ف هه‌یه‌ و بلا ئه‌ڤه‌ ژى ئانكو پیڤه‌رێ خزمه‌تێ ببیته‌ پیڤه‌رێ هه‌لبژارتنێَ و ئه‌وى ده‌مى هیچ ئاریشه‌ نینه‌ چه‌ند یێ نێزیكى ته‌ بیت یان دوورى ته‌ بیت .. ژبه‌ركو تو یێ ئه‌وى د هه‌لبژێرى بچیت خزمه‌تا وه‌ڵاته‌كى بكه‌ت نه‌ك ده‌ڤه‌ره‌كێ ئه‌و هنده‌ك یاسایان ده‌ربێخن د به‌رژه‌وه‌ندیا گشتى دا نه‌ك د چارچۆڤێ پێكهاته‌یه‌كێ دا !

84

– به‌یار باڤى –
رۆژه‌ك وه‌كو سوباهى 6ى مه‌ها ئیلونێ رێك دكه‌ڤیت دگه‌ل دوماهى رۆژا ب ناڤ ئه‌نفال كو ب ئه‌نفالا 8 یا ده‌ڤه‌را به‌هدینان دهێته‌ ناڤ كرن ل سالا 1988ێ , و دهێته‌ هه‌ژمارتن ئه‌نفالا دوماهیێ ژ زنجیره‌ ئه‌نفالێن كو ل مه‌ها سۆباتا ئه‌وێ سالێ ده‌ست پێ كرى و تێدا ب هه‌زاران خه‌لكێ مه‌یێ بێ گونه‌ه شه‌هید و بریندار و ده‌ربه‌ده‌ر و بێ سه‌رو شون بوى و زێده‌بارى سۆتن و كاڤل كرنا گوندێن كوردستانێ و هه‌ر وه‌سا سۆتن و تێكدانا سروشتى هه‌تا دگه‌هیته‌ گیانداران ژى ..
ئه‌ڤ كریارا ب ناڤ ئه‌نفال ب هه‌مو رامانا خۆڤه‌ تاوانه‌كا مه‌زن و كریاره‌كا هۆڤانه‌بو دده‌رحه‌قێ خه‌لكێ كوردستانێ و سروشت و ژینگه‌ها وه‌ڵاتێ مه‌دا هاتیه‌ ئه‌نجام دان كو هه‌تا گه‌هشتى یه‌ راده‌یه‌كى چه‌كێ كیماوى بهێته‌ ب كار ئینان ..
ئه‌وان چه‌ند رۆژێن پشتى ئه‌نفالان ل جڤاته‌كێ سوحبه‌ت هه‌ر لسه‌ر ئه‌ڤێ كریارا هۆڤانه‌ بۆ و ئه‌و تاوانا دده‌رحه‌قێ ئه‌ڤى خه‌لكى دا هاتى كرن .. وئێك ژكه‌سێن ل ئه‌وێ جڤاتێ رونشتى ئێك ژ كه‌سێن به‌شدار دئه‌ڤێ هه‌وا ئه‌نفالێن به‌هدینان دا كرى بو و هه‌تا گوندێَن سه‌ر توخیبى ژى دگه‌ل فه‌وجا خۆ و و ( ئه‌زبه‌نى ) یێ خۆ دا بو , و هه‌لبه‌ت ئه‌و گونده‌ هاتنه‌ سۆتن و كاڤل كرن و خه‌لكێ وان ژى ئه‌ڤێ مرن و گرتنێ قورتال بۆى هند ڤێرا گه‌هشتن به‌ره‌ڤ سنورى بچن و خۆ ل توركیا ببینن ..
هه‌ر ل ئه‌وێ جڤاتێ ناسیاره‌كێ دانعه‌مر یێ ئه‌وى كه‌سى ژى ئاماده‌بو و قه‌سێت ڕه‌ق گوتنێ ژبۆ ئه‌ڤ كریارا ئه‌وان كرى دده‌رحه‌قێ ملله‌تێ خۆ دا بتایبه‌ت ئه‌و گوندێن لسه‌ر توخیبى كو خه‌لكه‌كێ هه‌ژار و بێ تاوان ومرۆڤ دوست ب خۆڤه‌ دگریت, لێ ژبه‌رى ئاخفتنا خۆ ب دوماهى بینیت ئه‌ڤێ دى ئێكسه‌ر به‌رسڤ دا و گوتێ مام ژخودێ باوه‌ر بكه‌ هه‌تا ئه‌م چوین و هاتین ژى من ئێك گوله‌ نه‌ ته‌قاندى یه‌ , مامۆى گوتێ ئه‌رێ ما هون چوبون سه‌فرێ تۆ هۆسا خۆ بێ گونه‌ه دبینى , به‌رسڤ دا و گوتێ ئه‌رێ تو دزانێ شولێ من چ بو, و ( ئه‌زبه‌نى) ئه‌ز ب چى ئه‌ركى راسپاردبوم گوت بتنێَ ئه‌ز هاتبوم ته‌كلیف كرن كو بۆ ( ئه‌ز به‌نى ) ل جه‌ركێت ژاژى بگه‌رم ل بن ئاخێ ڤه‌ بتایبه‌ت ل ئه‌وان خانیێت هاتینه‌ سۆتن ژ به‌ركو ئه‌وى دگۆت ئه‌ڤى ژاژى یێ دجه‌ركى دا بن ئاخ كرى تامه‌كا دى هه‌یه‌ !
مخابن و هه‌ر وه‌كو ئه‌ڤه‌ راستى یه‌كا مه‌ یا جڤاكى كو بیردانكا مه‌ ئه‌ڤان كاره‌سات و نه‌كبه‌تى و مال وێرانى یێن ب سه‌رێ مه‌ هاتین تۆمار ناكه‌ت و هه‌ر زو دهێن ژبیر كرن و ل ئه‌ڤى رۆژگارێَ مه‌ یێ ئه‌ڤرو ئه‌ڤ ( ئه‌زبه‌نى) یێ هه‌ بێ كو هه‌تا جه‌ركێ ژاژى یێ مالێن گوندیێن هه‌ژار ژى ژبن ئاخێ ده‌ردئێخست نه‌ بتنێ هه‌ست ب كێماتیى و ئێشانا وژدانێ ناكه‌ت به‌لكو هه‌ر ژ كه‌سێن ل رێزا به‌راهیكێ یه‌ !

42

– به‌یار باڤى –
ئێك ژ سیمایێن هه‌لبژارتنێن مه‌ یێن هه‌رێما كوردستانێ ,بتایبه‌ت ل ئه‌ڤان دو هه‌لبژارتنێن دوماهیێ دێ بۆ مه‌ دیار بیت كو ڤالابونا مه‌یدانا هه‌لبژارتنایه‌ ژئه‌وان كاندیدێن كاریزما و خودان ئه‌و هێز و پێگه‌ه و ناڤ و ده‌نگه‌ كو پێتڤى ب ریكلامێ نه‌بیت و سه‌ركه‌فتنا ئه‌و یا مسوگه‌ربیت , دده‌مه‌كى دا كو ل قوناغێن پێشین هه‌تا راده‌یه‌كى ئه‌ڤ جۆره‌ كاندیده‌ دناڤ لیستێن به‌ربژێراندا دهاتنه‌ دیتن كو جهه‌كێ تایبه‌ت ل ده‌ف خه‌لكى هه‌بو و هه‌تا راده‌یه‌ك مه‌زن سه‌ركه‌فتنا وى دپرۆسه‌یا هه‌لبژارتناندا یا گره‌نتى ومسوگه‌ر بو نه‌بتنێ پشت به‌ستن ب جه‌ماوه‌رێَ حیزبا خۆ یان عه‌شیره‌تا خۆ به‌لكو ژده‌رڤه‌ى ئه‌ڤى چارچۆڤه‌ى ژى ..
ئێك ژئه‌ندامێن خۆلا ئێكێ یا په‌رله‌مانێ كوردستانێ (پشتى هه‌لبژارتنێن 1992) كو خودان پێگه‌هه‌ك ره‌وشه‌نبیرى و جڤاكى ناڤداره‌ لسه‌ر ئاستێ هه‌رێما كوردستانێ , دبێژیت راسته‌ ئه‌ز لسه‌ر لیستا فلان حیزبێ مه‌ و هه‌ر لسه‌ر لیستا ئه‌وێ حیزبێ هاتبوم كاندید كرن پشتى كو سكرتێرێ ئه‌وێ حیزبێ په‌یوه‌ندى ب من كرى و ئه‌ز ئاگادار كریم كو ئه‌وان ئه‌ز یێ لسه‌ر لیستا خۆ كاندید كریم به‌لێ دیساڤه‌ دبێژیت دهه‌مان ده‌م دا هه‌ر سێ حیزبێن دى ژى په‌یوه‌ندى ب من دكرن و ژمن دخواستن كو رازى بم لسه‌ر لیستا ئه‌وان بهێم كاندید كرن !
ل ڤێرێ راستى یه‌ك بۆ مرۆڤى دیار دبیت كۆ هه‌بونا كه‌سێن ژ چارچۆڤه‌یه‌كێ جوگرافى و ئایدیولوژى یێ سنووردار كرى مه‌زنتر چه‌ند گرنگه‌ بۆئه‌ڤرۆوپێشه‌رۆژا وه‌ڵاتى كو ل دۆڤ ناڤ وپێگه‌ها خۆ یاجڤاكى سیاسى ره‌وشه‌نبیرى خودان هزر وپرۆژه‌یێن خزمه‌تا ته‌خا گشتى بن.
مخابن سال بۆ سالێ هه‌بونا ئه‌ڤان جۆره‌ كه‌سان دناڤ جڤاكێ مه‌دا یا كێم دبیت و هه‌ر وه‌سا دلیستێن كاندیدێن هه‌لبژارتنان ژى زو ب زو ئه‌ڤ ناڤه‌ ببه‌ر چاڤ ناكه‌ڤن به‌لكو مرۆڤ دشێت
بێژیت هه‌تا راده‌یه‌ك مه‌زن هه‌مو ئه‌و كاندید هه‌مو هێزا خۆ دمه‌زێخن و شه‌ڤ و رۆژان دكه‌ن ئێك ژبۆ ب ده‌ستڤه‌ ئینانا ده‌نگێ هاوڵاتیان !
هه‌لبه‌ت ئه‌ڤێ دیاردێ ژى ( دیاردا نه‌بونا كاندیدێ كاریزما ) كۆمه‌كا فاكته‌ر و ئه‌گه‌رێن ژئێك جودا هه‌یه‌ :
– كز بون و لاوازبونا هنده‌ك تێگه‌ه و به‌هایێن گشتى ( نه‌ته‌وه‌یى و نیشتمانى و روحى .. ) به‌راوورد كرن دگه‌ل سالانێن ژبه‌رى نوكه‌ ..
– زالبونا هنده‌ك به‌هایێن ماددى و به‌رژه‌وه‌ندى یا تاكى , كو دئه‌نجامدا هه‌تا ئه‌گه‌ر كه‌سه‌ك خودان نیه‌ت و نیازه‌كا پاك ژى بیت دێ به‌روڤاژ هێته‌ ته‌فسیر كرن .. و هه‌بونا ئه‌ڤان خێر و بێر و ئیمتیازاتێن په‌رله‌مانتاران ب ده‌ستخۆڤه‌ ئیناین ئه‌گه‌رێ سه‌ره‌كى یێ سه‌رهه‌لدانا ئه‌ڤێ دیتنێ و بۆچونێ یه‌ .
– ده‌ست نیشان كرنا كاندیدان ژ ئالیێ ئه‌حزاب و ناڤه‌ندێن وان یێن سیاسى لسه‌ر بنه‌مایێ ( ته‌زكیا ) ئه‌ڤێ كه‌سێ بالا ده‌ست یان لسه‌ر بنه‌مایێ سه‌ر ب ئه‌ڤێ عه‌شیره‌تى و بنه‌مالێ یه‌ زێده‌تر چارچۆڤێ جه‌ماوه‌رى كاندیدى سنووردار دكه‌ت و نابیته‌ كاندیدێ كاریزما ئه‌وێ كو ژخۆ پشت راست و ب ساناهى ب سه‌ركه‌ڤیت.
– ته‌كنه‌لوژیا سه‌رده‌مانه‌ و ئاڵاڤێن بله‌ز یێن سوشیال میدیایێ هه‌مو سنوور و پیروزى به‌زاندینه‌ هه‌ر چه‌نده‌ دهنده‌ك بیاڤان دا دبیته‌ هاریكار ژبَۆ ناساندنا كاندیدى لێ د هه‌مان ده‌م دا دهێته‌ بكار ئینان بۆ شێواندن و ناڤ زراندنا كه‌سان ژى و كارتێكرنێَ لێَ دكه‌ت .. وگۆتنا كوردى ژى راسته‌ ده‌ما دبێژیت هه‌تا دره‌و دبیته‌ راستى گه‌له‌ك خودان تێ دچیت ..
ئانكو كورت و كرمانج د ژینگه‌هه‌كا هۆسا یاجڤاكى ,سیاسى , ره‌وشه‌نبیرى یا ب
زه‌حمه‌ته‌ كاندیده‌كێ كاریزما ل مه‌یدانێ ببینى كو ب زه‌ندو باسكێن خۆ بشێت ده‌نگێن مه‌زن كۆم بكه‌ت یان ژى هه‌ر بتنێ ناڤێ وى تێرا سه‌ركه‌فتنا وى هه‌بیت .. !
:

135

– به‌یار باڤى –
ئه‌ڤ ساله‌ ژى مینا چه‌ند سالێن بۆرى و بهه‌لكه‌فتا بۆرینا 3 ساڵان لسه‌ر كریارا ئه‌نفالێن به‌هدینان ( كو ب ئه‌نفالا هه‌شت هاتبو ناڤ كرن ) یاكو ل رۆژا 25/ 8 / 1988 ێ ژئالیێ رژێمێ ڤه‌ هاتیه‌ ئه‌نجام دان وتێدا ب هه‌زاران ژخه‌لكێ مه‌ شه‌هید وبێ سه‌روشون بوى و ب ره‌نگه‌ك ئاشكرا چه‌كێ كیمیاوى هاتى بكارئینان وبسه‌دان گوند هاتینه‌ وێران كرن .. دیسا وه‌كو سالێن بۆرى ده‌زگه‌هێن مه‌یێن راگه‌هاندنێ ل ل ئه‌ڤان چه‌ند رۆژێن بۆرى ب شێوه‌یه‌ك به‌رفره‌ه لسه‌ر ئه‌ڤێ بویه‌رێ ئاخفتن و مێزگه‌رد هاتن گرێدان و دیدار دگه‌ل چه‌ندین ( شاهد حالێن ) ئه‌ڤێ كریارا هۆڤانه‌ هانه‌ كرن و هه‌روه‌سا دگه‌ل كه‌س وكارێن قوربانییان كو هه‌ر ئێكى ب ره‌نگه‌ك تراژیدى به‌حسا ئه‌وان دیمه‌ن وبویه‌ران دكر یێن كو بچاڤێن خۆ دیتین ودناڤدا ژیاین ژ دیمه‌نێن كوشتن وئه‌شكه‌نجه‌دانێ وهه‌تا راگوهاستنێ بۆ ده‌ڤه‌رێن دور و نه‌دیار!
تشتێ بالكێش دپترى یا ئه‌ڤان به‌رنامه‌ و دیدارێن ته‌له‌ڤزیونى دا دهاته‌ دیتن و نمایش كرن دیمه‌نێ كه‌لها نزاركێ بۆ یاكو دكه‌ڤیته‌ رۆژهه‌لاتا دهۆكێ ,كو كه‌لهه‌كا عه‌سكه‌رى یا سه‌رده‌مێ رژێمێ یه‌ و دئه‌وى سه‌رده‌مى دا ئه‌ڤ خه‌لكێ مه‌ یێ ببه‌ر لێهمشتا ئه‌نفالان كه‌فتى دهاته‌ راگوهاستن بۆ ئه‌ڤێ كه‌لهێ و بشێوه‌یه‌ك هۆڤانه‌ دهاتنه‌ ئه‌شكه‌نجه‌دان و دڕندایه‌تى دگه‌هشته‌ ئه‌وى ڕاده‌ى كۆ ل به‌رچاڤێن ژن و زارۆیان كۆر و باب و برَا ب بلوكا بهێنه‌ شه‌هید كرن و پشتى بورینا چه‌ندین ساڵان ژى هێشتا شونمایێن ئه‌ڤێ هۆڤاتیێ و خوینا سورا شه‌هیدان ب دیوارێن كه‌لهێ ڤه‌ دیار و زیندى بمینن ..
چه‌ندین جاران مه‌ گوه لێ ببو كو وه‌كو رێزگرتنه‌ك بۆ قوربانیێن ئه‌ڤێ كریارا هۆڤانه‌ و هه‌ر وه‌سا وه‌كو بیرئانین ب دیكومه‌نتكارى كرنا ئه‌ڤێ زۆلم و زۆرداریا بسه‌رێ خه‌لكێ مه‌ هاتى پرۆژه‌یه‌ك هاتیه‌ پێش كێش كرن كۆ ئه‌ڤ كه‌لها نزاركێ ببیته‌ موزه‌خانه‌یه‌ك پێكهاتى ژ وێنه‌یێن شه‌هیدێن ئه‌نفالا به‌هدینان و هه‌روه‌سا هه‌ر تشته‌كێ گرێداى ئه‌ڤان قوربانییان و هه‌ر به‌لگه‌نامه‌یه‌كا ئاماژێ ب ئه‌ڤێ تاوانێ دكه‌ت كو ل به‌رچاڤێن نفشێ ئه‌ڤرو وپێشه‌رۆژێ بمینیت و ئه‌و زۆلم زۆرداریا بسه‌رێ باب وباپیران هاتیه‌ كرن نه‌هێته‌ ژبیر كرن ,وهه‌ر وه‌سا ژبۆ خه‌لكَێ بیانى ژى كۆ ده‌ما سه‌ره‌دانا ئه‌ڤێ ( موزه‌خانێ ) دكه‌ن به‌رپه‌ره‌ك ژ دیرووكا تراژیدى یا ملله‌تێ مه‌ بۆ ئه‌وان رۆهن و ئاشكرا ببیت ..
لێ مخابن پشتى بورینا 27 سالان لسه‌ر حوكمدارى یا مه‌ یا خۆمالى هێشتا ئه‌ڤ كه‌لها هێمایێ زۆلم و زۆرداریێ جهه‌كێ خڕ و خالى یه‌ و مفا ژێ نه‌هاتیه‌ وه‌رگرتن كو ببیت موزه‌خانه‌یه‌ك وێنه‌یێن شه‌هید و قوربانیێن كریارا هۆڤانه‌یا بناڤ ئه‌نفال هه‌مبێز بكه‌ت دگه‌ل هه‌ر به‌لگه‌نامه‌و تشته‌كێ پێڤه‌ گرێداى كو قه‌باره‌و ڤه‌رێژا ئه‌ڤێ تاوانا مه‌زن یاكو بسه‌رێ خه‌لكێ مه‌ هاتى بهێته‌ دیكومه‌نت كرن و لبه‌رچاڤ زیندى بمینیت ..
هه‌كه‌ر بهانه‌یا بجه نه‌ئینانا ئه‌ڤى پرۆژێ ( ب موزه‌خانه‌كرنا كه‌لهێ) قه‌یرانا دارایى بیت, بتنێ ئه‌ڤه‌ سێ چار ساله‌كن ئه‌ڤێ قه‌یرانێ سه‌رهه‌لداى ,پێتڤى بۆ هه‌ر ژ ئه‌وان سالێن ژبه‌رى قه‌یرانێ ئه‌ڤ پرۆژه‌ هاتبا بجه ئینان كو لئه‌وى ده‌مى دگه‌له‌ك بیاڤێن جودا جوداده‌ پاره‌ دهاته‌ مه‌زاختن و هه‌تا راده‌یه‌كى هنده‌ك جاران بۆ نمایش كرنا شانویه‌كێ نێزیكى بیست مه‌لیون دینار دهاتن مه‌زاختن وبۆ گێرانا ڤیسته‌ڤاله‌كێ پتر ژ دوسه‌د ملیونان دیناران !
ئه‌رێ ئاڤاكرنا ئه‌ڤان ڤیلله‌یێن زه‌به‌لاح و مۆل و ئوتێل و مۆتێل وجهێن گوزارى ل ئه‌ڤى باژێرى گرنگتر بو یان ژى ئه‌ڤ پرۆژێ ده‌ربڕینى ژكاره‌ساته‌كا نه‌ته‌وى مرۆڤایه‌تى دكه‌ت ؟!
هه‌لبه‌ت ملله‌تێن (زیندى) یێن جیهانێ بتایبه‌ت ئه‌وێن دناڤ شه‌ڕو جه‌نگان را ده‌ربازبوین و كاره‌سات بسه‌رێ هاتین ئه‌ڤان جۆره‌ پروژه‌یان لبه‌راهیكا هه‌ر تشته‌كێ دى ددانن ژبه‌ركو دبیته‌ پشكه‌كا گرنگ ژ دیرووكا ئه‌وان و هه‌روه‌سا مفایه‌كێ دى ژى ئه‌وژى بۆ راكێشانا پالپشتى و سۆزا خه‌لكێ بیانى .. و هندى رۆژه‌ك ب سه‌ر ئه‌ڤان بویه‌رێن تراژیدى را ده‌رباز بیت و نه‌هێته‌ دیكومه‌نت كرن شونمایه‌ك ژێ دهێته‌ به‌ر زه‌كرن یان ژبیر كرن .. و ئه‌ڤه‌ 30 سال ژى ده‌رباز بون ؟!

123

به‌یار باڤى
ئه‌زموونا ئه‌ڤان چه‌ند هه‌لبّژارتنێن بورى (بتایبه‌ت یێن په‌رله‌مانێ كوردستانێ و ئیراقێ) ل هه‌رێما كوردستانێ كو هه‌موو ته‌خ و چینێن جڤاكى تێدا پشكد ادبن، ئه‌ڤێ پروسێ دیارده‌كا جڤاكى یا بالكێش ژى ل گه‌ل خوه‌ ئینا كو مینا ئاریشه‌كا جڤاكى یا به‌رچاڤ سه‌رێ خوه‌ هه‌لدده‌ت، ئه‌وژى په‌یدابونا دلمانێ و ژئێك عاجزبونێ یه‌ دناڤ كه‌سێن پشكدارى هه‌لبژارتنان دبن، هه‌تا راده‌یه‌كى ئه‌ڤ دلمان و ژ ئێك عاجز بونه‌ دگه‌هیته‌ ئاستێ دوبه‌ره‌كى و ژئێك دابڕینێ دناڤبه‌را كه‌سێن پشكدارى هه‌لبژارتنان دبن .. و ئه‌ڤ دیارده‌ ژى ل سه‌ر چه‌ندین ئاستێن ژ ئێَك جودا دیار دبیت:
– ناكوكى و ژ ئێك دابڕین ل گه‌ل كه‌سانێن هزر دكر دێ ده‌نگێ خوه‌ ده‌تێ و ده‌نگ نه‌دایێ: ئه‌ڤ ناكوكى و دلمانه‌ دناڤبه‌را كاندیدى (بتایبه‌ت كاندیدێ سه‌ركه‌فتن ب ده‌ستڤه‌ نه‌ئیناى) و كه‌سانێن دى ئه‌وێن كو هزر دكر كو دێ ده‌نگێ خوه‌ ده‌تێ و پشته‌ڤانیێ لێ دكه‌ن یان ژى جۆره‌ سوز و په‌یمانه‌ك دایێ و دووماهیێ سوزا خوه‌ بجه نه‌ئیناى و ده‌نگ ب كاندیده‌ك دى داى!
بتایبه‌ت ئه‌ڤ دلمان و ژ ئێك دابڕین ژ ئالیێ كاندیدى و كه‌س و كارێن ویڤه‌ ل گه‌ل كه‌سانێن خودان ناڤ و به‌رپرساتى و پێگه‌هه‌ك جڤاكى په‌یدا دبیت، ژبه‌ركو ئه‌ڤان كارتێكرنا خوه‌ ل سه‌ر كه‌سێن دى یێن ده‌وروبه‌ر ژى هه‌بویه‌.. ب ئه‌ڤى ره‌نگى ئه‌ڤ كاندیده‌ هزر دكه‌ت كو دربه‌كێ مه‌زن لێدایه‌! و د ئه‌ڤێ كریارێ دا نه‌ك بتنێ ئه‌ڤ هه‌سته‌ و ئه‌ڤ هه‌لویسته‌ ل ده‌ف كه‌سێ كاندیدى بتنێ په‌یدا بویه‌، به‌لكو گه‌له‌ك جاران كه‌س وكارێن وى و ئه‌وێن باندورا ئه‌وى ژى ل سه‌ر هه‌ى دكه‌ڤن د ئه‌ڤێ بازنا دوبه‌ره‌كیێ ل گه‌ل به‌ره‌یێ دى هه‌تا راده‌یه‌كى د هه‌لبژارتنێن پاشه‌رۆژێ ژى دا دبه‌ن و دبنه‌ دو به‌ره‌یێن هه‌ڤدژ!
– ناكوكى ل گه‌ل هه‌ڤالێن كارى: دیسا ده‌مێ ئه‌ڤ كاندیده‌ (بتایبه‌ت یێ سه‌رنه‌كه‌فتى) كارمه‌نده‌ك یان فه‌رمانبه‌ره‌ك بیت ل جهه‌كى و كۆمه‌كا (هه‌ڤالان !) هه‌بیت و هه‌ر رۆژ مل ب ملێ ئێكڤه‌ ل ئێك جه یان ئێك ده‌زگه‌ه و فه‌رمانگه‌ه كار بكه‌ن و د ئه‌نجام دا بۆ دیار ببیت (یان هه‌تا هه‌كه‌ بتنێ وه‌كو هه‌ست كرن ژى ل ده‌ف په‌یدا ببیت) كو ئه‌ڤ كه‌سێن وه‌كو هه‌ڤال به‌رێ خوه‌ دده‌ته‌ ئه‌وان و رۆژانه‌ ل گه‌ل ئێكن.. و ل دووماهیێ پشته‌ڤانى لێ نه‌كرین دیسا دێ هه‌ست ب (غه‌درێ) كه‌ت و د ئه‌نجام دا نه‌ك بتنێ دێ په‌یوه‌ندى دناڤبه‌را ئه‌وان دا سست و لاواز بن، به‌لكو دلمان و هه‌ڤڕكیه‌كا كوور و دوور ژى دێ په‌یدا بیت..
– ناكوكى ل سه‌ر ئاستێ خێزانێ و خزم و كه‌س و كاران: بتایبه‌ت ده‌ما هه‌ر ئێك ژ هه‌ڤژینان سه‌ر ب عه‌شیره‌ته‌كا جودا بیت، گه‌له‌ك جاران د ئه‌ڤى حاله‌تى دا ئاریشه‌ دناڤبه‌را هه‌ردو هه‌ڤژینان په‌یدا دبیت بتایبه‌ت ده‌مێ ئێك ژ وان بزاڤێ دكه‌ت ره‌ئیا خوه‌ ل سه‌ر ئالیێ دى ب سه‌پینیت كو ده‌نگێ خوه‌ بده‌ت مرۆڤێ وى/ وێ..
ئه‌ڤه‌ و گه‌له‌ك نموونێن دى یێن په‌یدابونا دوبه‌ره‌كى و دلمانێ دناڤبه‌را كه‌سێن گرێداى هه‌لبژارتنان كو د ئه‌نجامدا وه‌كو ئاریشه‌یه‌كا جڤاكى یا نه‌رێنى و زیانبه‌خش كارتێكرنا خوه‌ نه‌ك بتنێ ل سه‌ر كه‌سێن گرێداى بابه‌تى هه‌یه‌، به‌لكو ئه‌ڤ كارتێكرنه‌ ژ سنوورێ ئه‌وان ژى ده‌رباز دبیت و دگه‌هیته‌ زارۆیێن ئه‌وان و كه‌س و كاران و كه‌سێن نێزیك ژى دبنه‌ قوربانى وى شه‌ڕێ وان به‌رژه‌وه‌ندى تێدا نه‌یى!
ئه‌ڤه‌ هه‌موو ژ سه‌ده‌ما ئه‌وێ چه‌ندێ یه‌ كو سیسته‌مێ مه‌ یێ جڤاكى هه‌تا راده‌یه‌ك مه‌زن ل سه‌ر بنه‌مایێ عه‌شیره‌تى و خێله‌كیه‌، به‌روڤاژى جڤاكێن مه‌ده‌نى و پێشكه‌فتى كو بتنێ مرۆڤ خودانێ خوه‌یه‌ و چاوا بڕیارێ بده‌ت كه‌سێ ماف نینه‌ مایێ خوه‌ تێ بكه‌ت.
*سه‌رهاتیا زه‌ینه‌با نه‌روێَجى وه‌ك نموونه‌: كو به‌رى ساله‌كێ كچه‌ گه‌نجه‌كا نه‌روێجى (ب ره‌گه‌ز عیراقى) د هه‌لبژارتنێن په‌رله‌مانێ ئه‌وى وه‌ڵاتى دا هژماره‌كا باش یا ده‌نگان ب ده‌ستخوه‌ڤه‌ ئینا و بۆ ئه‌ندام په‌رله‌مان هه‌رچه‌نده‌ ب ره‌گه‌ز نه‌ خه‌لكا ئه‌وى وه‌ڵاتى بو لێ خه‌لكه‌كێ دنیاسى كۆ :
– ده‌ما هێشتا ئه‌و زارۆ ل گه‌ل خواندنێ گۆڤار و روژنامه‌ ددانه‌ به‌رملێ خوه‌ و ل سه‌ر جاددان دفروتن.
– ل ژیێ سنێله‌یێ د ماركێته‌كى دا كار دكر و هه‌تا راده‌یه‌كى به‌ر ده‌رگه‌هێ ژ ده‌رڤه‌ ژى پاقژ (مسح) دكر! ل ژیێ گه‌نجاتیێ ل باژێرڤانیێ هاته‌ دامه‌زراندن و دیسا كارێ خزمه‌تگوزرایێ دكر.. ژبه‌ر ئه‌ڤێ خزمه‌تێ خه‌لكێ ده‌نگێ خوه‌ دایێ و دلێ كه‌سێ ژى ژ كه‌سێ نه‌ماو چ ئارێشه‌ ژى نه‌چێبون!.

100

– به‌یار باڤى –
دناڤ هه‌ر جڤاكه‌كى دا هنده‌ك ره‌وشت و بهایێن جڤاكى هه‌نه‌ دگه‌ل بوورینا ده‌مى دقالبه‌كى دا دهێنه‌ بوهژاندن و مۆركا ئه‌وى جڤاكى بخۆڤه‌ دگرن ودبیته‌ به‌شه‌ك ژ كه‌لتورێ جڤاكى یێ ئه‌وى ملله‌تى , هه‌لبه‌ت ب هه‌ردو ئالیێن خۆ یێن ئه‌رێنى و نه‌رێنى ڤه‌ .. و سه‌ردم بۆ سه‌رده‌مى ل دۆڤ وه‌رار و گهۆرینێن جڤاكى و فاكته‌رێن ژێك جودا ئه‌ڤ ره‌وشت و بهایێن جڤاكى ژى دكه‌ڤن به‌ر گهۆرینێ یان ژى نه‌مانێ وهنده‌ك ره‌وشت وبهایێن دى یێن نوى جهێ وان دگرن ولسه‌ر خه‌لكێ زال دبن .
دناڤ جڤاكێ مه‌یێ كورده‌وارى ژى بتایبه‌ت جڤاكه‌كێ كلاسیك و گوندیاتى و هه‌تا راده‌یه‌كى دابڕى ژ باژێرڤانیێ كۆمه‌كا ئه‌ڤان عادات و ته‌قالید و ره‌وشت و بهایێن جڤاكى هه‌بون كو ببون ئێك ژ سیمایێن ئه‌ڤى جڤاكى .
و وه‌ك میناك ژبۆ ئالیێ ئه‌رێنى یێن ئه‌ڤان ره‌وشت و بهایێن ل ناڤ جڤاكێ مه‌ یێ كوردستانێ كو سیمایێ گیانێ هه‌ڤكارى و پشته‌ڤانى و ئێك گرتنێ دناڤبه‌را تاكێن جڤاكى دا دیار دكر و ئه‌م دشێن بێژین هه‌تا سالێن حه‌فتیان ژى دهاته‌ هه‌ست پێ كرن , ئه‌م دشێن ئاماژێ ب ئه‌ڤان چه‌ند نموونێن ل خوارێ دیار بكه‌ین :
– زباره‌ :جۆره‌ هاریكارى یه‌ك بۆ ژبۆ ئه‌وان كه‌سێن ده‌ست كورت و شیانێن برێڤه‌برنا كاروبارێن خۆ نه‌هه‌ین , وخه‌لكێ گوندى رادبون ب ئه‌نجامدانا ئه‌ڤى كارى بۆ ئه‌وى كه‌سى و بێ به‌رامبه‌ر بۆ نموونه‌ دچون ره‌زێ وى دكولان یان سه‌ربانێ خانیێ وى ئاخ دكرن ( ئاخ بان ) , ده‌مێ خانیێ وى دگه‌هشته‌ قوناغا دوماهیێ و پێتڤى رانانان و ئاخبان كرنێ با .
– زیافه‌ت : ساخله‌ته‌كێ دى یێ جڤاكى بو هه‌ر ئێڤار ل رۆژه‌كا دیار كرى ژ حه‌فتیێ هه‌ر خێزانه‌كا گوندى خوارن دگه‌ل زارۆكێ خۆ دهنارته‌ جهه‌كێ دیار كرى ل ناڤ گوندى ( وه‌ك سه‌ر بانێ مزگه‌فتێ یان حه‌وشا مزگه‌فتێ ) وئه‌و زارۆیێن گوندى و هه‌تا یێن مه‌زن ژى هه‌مو هه‌ر ئێك دا كه‌ڤچكێ خۆ هه‌لگریت و پێكڤه‌ لسه‌ر ئه‌وان جۆرێن خوارنان راوه‌ستن و ژێ خون ..و ل دوماهیكێ هه‌ر ئێك دا سێنیكا خۆ یا ڤالا ڤه‌گه‌رینیت مالێ !
– پێكئینان صه‌لاحه‌ت : ل ده‌مێ چۆنا خه‌لكێ گوندى بۆ گونده‌كێ دى ب مه‌ره‌ما به‌شداربون دشاهیه‌كێ دا یا هه‌ر هه‌لكه‌فته‌كا دى یا خێرێ, ژبه‌رى ئه‌ڤ كه‌سێن هه‌ ژگوندى ده‌ركه‌ڤن و بكه‌ڤنه‌ ڕێ ( كو پتریا جاران ژكه‌سێن دانعه‌مر و رهسپى یێن گوندى پێك دهات ) دا پسیار ژئێك ودو كه‌ن ئه‌رێ هنده‌ك كه‌س ل گوندێ مه‌هه‌نه‌ ناكۆك و ژێك دلماى , هه‌كه‌ر دیار ببا كو دناڤبه‌را هنده‌ك كه‌سان دا دلمان و نه‌خۆشى هه‌یه‌ ئه‌وان وى وه‌ختى ئه‌و سه‌فه‌ره‌ نه‌دكر و دازڤڕن هه‌تا كو ئه‌و دو كه‌سه‌ یان ئه‌و دو بنه‌ماله‌ پێك نه‌ ئینابان و ئاشت نه‌كربان .. وپشتى هینگێ دا ده‌ست ب سه‌فه‌را خۆ كه‌ن!
– سۆز و په‌یمان , یان ژى ئاخفتنا زه‌ڵامان : وه‌كو پشت راست كرنا كه‌سێ به‌رامبه‌ر و دانا باوه‌ریێ ئه‌و چه‌ند به‌س بۆ كو كه‌سه‌ك بێژیته‌ یێ به‌رامبه‌ر ئه‌ز سوزێ دده‌م یان , ب ئه‌ڤان سمبێلان , یان سۆزا زه‌لامان , یان سۆزا
عه‌هدێ به‌رێ .. و ده‌ربڕینا ئه‌ڤێ باوه‌رى دانێ ب گه‌له‌ك شێوازێن دى هه‌تا ئه‌گه‌ر ئه‌و بابه‌تێ كێشه‌ لسه‌ر چه‌ندێ مه‌زن و ئالۆز و هه‌ستیار با . بتنێ ئه‌و سۆزا بۆ یێ به‌رامبه‌ر هاتبا دان وه‌كو گه‌ره‌نتى یه‌كێ بۆ ژبۆ كه‌سێ به‌رامبه‌ر ..
– قوربانى دان : سه‌رهاتى و داستانێن مه‌یێن فلكلورى و هه‌تا یین سه‌رده‌مێن نێزیك ژى پڕن ژئه‌وان نموونێن وه‌فاداریێ دناڤبه‌را دۆست و هه‌ڤالان دا كو هه‌ڤاله‌كى نه‌بتنێ قوربانى ب سه‌روه‌ت ومالێ خۆ دایه‌ د ڕێكا هه‌ڤالێ خۆ دا به‌لكو گه‌له‌ك جاران سه‌رێ خۆ ژى بۆكریه‌ قوربان وه‌ك میناك ده‌ما ل ساڵا 1896ێ له‌شكه‌رێ ئۆسمانى ب فێل حاجۆ ئاغایێ هه‌ڤێركى(حاجو ئاغایێ ئێكێ) گرتین وپشتى هینگێ سه‌رێ وى دگه‌ل هه‌ردو هه‌ڤچه‌په‌رێن وى یێن ئێزدى بڕین ,ژبه‌رى حاجو ئاغا خۆ ته‌سلیم بكه‌ت ( هه‌لبه‌ت دبن هنده‌ك كاودان و گڤاشتنێن ده‌روونى دابو ) هه‌ردو هه‌ڤالێن وى یێن ئێزدى گوتنێ هه‌ر چه‌نده‌ مه‌ باوه‌رى بئه‌ڤێ لێبوورینا ئۆسمانییا نینه‌ لێ هه‌كه‌ر سه‌رێ مه‌ژى تێ بچیت ئه‌م دێ دگه‌ل ته‌بین .. هه‌ر وه‌كو ئه‌وان پێشبینى دكر ئێكسه‌ر ئه‌و هه‌ردو دگه‌ل ئاغایێ وان ب شێوه‌یه‌ك هۆڤانه‌ هاتن سه‌ر بڕین , ئانكو خۆ كرنه‌ قوربانى هه‌ڤال و هه‌ڤچه‌په‌رێ خۆ ..

93

– به‌یار باڤى –
ژ به‌رى یا دو رۆژان د دیداره‌كێ دا ل كه‌ناله‌كێ مه‌یێ ئاسمانى دگه‌ل رێڤه‌به‌رێ گشتى یێ چاڤدێرى و گه‌شه‌پێدانا جڤاكى ل پارێزگه‌ها سلێمانیێ , ئاماژه‌ ب چه‌ندێن ئامارێن سه‌رنج راكێش هاته‌ كرن ل دور رێژه‌یا گرێبه‌ستێن هه‌ڤژینیێ و هه‌ر وه‌سا حاله‌تێن به‌ردانێ و جودا بونێ د ماوێ ئه‌ڤان چار سالێن بورى دا 2014 هه‌تا 2017 لسه‌ر ئاستێ پارێزگه‌ها سلێمانیێ, كو دئه‌ڤى ماوه‌ى دا نێزیكى 51000پێنجى وئێك هه‌زار گرێبه‌ستێن هه‌ڤژینیێ هاتینه‌ تومار كرن , و به‌رامبه‌ر ئه‌ڤێ چه‌ندێ نێزیكى 17000 هه‌ڤده‌ هه‌زار حاله‌تێن به‌ردانێ هاتینه‌ تۆمار كرن !
هه‌ر چه‌نده‌ ئه‌ڤ ئاماره‌ بتنێ ب پارێزگه‌هه‌كێ ڤه‌ ژ هه‌ر سێ چار پارێزگه‌هێن هه‌رێما مه‌ یا كوردستانێ ڤه‌ گرێداینه‌ لێ دهه‌مان وه‌خت دا هه‌تا راده‌یه‌ك مه‌زن وێنه‌یه‌كه‌ ژ وینێ مه‌زن یێ كه‌توارێ مه‌یێ جڤاكى ل هه‌رێما مه‌ یا كوردستانێ , ژبه‌ركو هه‌تا راده‌یه‌ك مه‌زن كاودانێن جڤاكى, ئابورى , سیاسى .. یێن ئه‌ڤى جڤاكى وه‌كو ئێك یان ژى نێزیكى ئێكن بتایبه‌ت ل ئه‌ڤى ماوێ چار سالێن ئاماژه‌ پێ كرى و سه‌رهه‌لدانا كۆمه‌كا قه‌یرانان ( هه‌ر چه‌نده‌ ره‌نگه‌ ئامارێن هه‌ر دو سێ پارێزگه‌هێن دى یێن هه‌رێمێ نه‌ ب ئه‌ڤى ره‌نگى بن ئانكو كێمتر بن ) .
كاره‌ساته‌كا مه‌زنه‌ به‌رامبه‌ر هه‌ر سێ حاله‌تێن هه‌ڤژینیێ حاله‌ته‌كێ جودابونێ یان ژى به‌ردانێ ( ته‌لاقێ ) هه‌نبیت,و ئه‌ڤه‌ژى ئاماره‌كا زێده‌ مه‌زن و نه‌سروشتى یه‌ و هه‌روه‌سا ئاماژه‌یه‌كا پڕى مه‌ترسى یه‌ لسه‌ر تاكى و خێزانێ وجڤاكى ب تایبه‌ت
ل پاشه‌رۆژێ كو پتر ئه‌نجام و ئاكامێن ئه‌ڤێ دیاردێ دێ زه‌لال و دیار بن ..
ئه‌ڤ رێژه‌یا ب ئه‌ڤى قه‌باره‌ى مه‌زن هه‌تا كو مه‌زنتره‌ ژ ئه‌و رێژه‌یا ل ئیراقێ ب گشتى و هه‌ر وه‌سا وه‌ڵاتێن ده‌ورو به‌ر و یێن عه‌ره‌بى ژى هه‌تاكو وه‌ڵاتێن كه‌نداڤى ژى .. هه‌ر چه‌نده‌ هه‌ر جڤاكه‌ك خودان كه‌لتور و هنده‌ك خالێن ژێك جودانه‌ لێ ده‌ما رێژه‌ بگه‌هیته‌ ئاسته‌كێ ب ئه‌ڤى ره‌نگى كو به‌رامبه‌ر سێ حاله‌تێن هه‌ڤژینیێ ئێكا به‌ردانێ هه‌بیت ئه‌ڤه‌ زه‌نگا مه‌ترسیێ یه‌ و پێتڤى لسه‌ر حكومه‌تێ و ناڤه‌ندێن په‌یوه‌ندیدار لسه‌ر راوه‌ستن و ب هورى ل ئه‌گه‌ران و رێكێن چاره‌سه‌ریێ بگه‌رن ژبه‌ركو دماوێ ئه‌ڤان چه‌ند سالێن بورى دا كۆمه‌كا گهۆرینێن جڤاكى وئابورى و سیاسى … هتد بسه‌ر جڤاكێ مه‌ یێ كوردستانێ دا هاتینه‌ ژ ئه‌گه‌را چه‌ندین فاكته‌رێن ژێك جودا و هه‌كه‌ر دده‌مێ گونجاى دا ئه‌ڤ فاكته‌ر و هۆكاره‌ نه‌كه‌ڤن به‌ر دوڤچۆن و لێكولینێ و ددوڤدا لێگه‌ڕیان ودیتنا رێكێن چاره‌سه‌ریێ ئێدى دێ ژبه‌ر كونترول ده‌ركه‌ڤن ودێ یا بزه‌حمه‌ت بیت چاره‌سه‌رى بۆ بهێته‌ كرن و زێده‌بارى ئاكام و ڤه‌رێژا وێ یا نه‌رێنى لسه‌ر تاكى و خێزانێ و جڤاكى , وه‌ك میناك :
• زێده‌بونا هه‌ژماره‌كا زۆر یا زارۆیێن ژهه‌ست وسۆزا دایك و بابینیێ بێ به‌هر بوین و دئه‌نجام دا ئه‌وژى توشى ئاریشه‌و گریێن ده‌روونى و جڤاكى ببن .
• هه‌ژماره‌كا زۆر یا ژنێن بێ سه‌میان و بێ سه‌رپه‌رشت ( ژ ئه‌گه‌رێ به‌ردانێ وجودابونێ ) ونه‌بون یان كێمبونا ده‌لیڤا ژنو شوكرنێ و پێكئینانا خێزانێ, هه‌ر دئه‌ڤى حاله‌تى ژى دا ئه‌ڤ ژنه‌ تۆشى كۆمه‌كا ئاریشێن ده‌روونى و جڤاكى وئابوورى دبیت ,هه‌ر وه‌سا بۆ زه‌لامى ژى كو تۆشى كۆمه‌كا ئه‌ڤان جۆره‌ ئاریشه‌یان دبیت لێ ب ره‌نگه‌ك كێمتر ژ ژنێ ژبه‌ركو هێزا ئه‌وان گڤاشتنێن جڤاكى و كه‌لتورى پتر لسه‌ر ره‌گه‌زێ مێ دهێن سه‌پاندن .

• په‌یدابونا دوبه‌ره‌كى و دلمان و دلره‌شیێ لجهى گیانێ ئێكگرتن و حه‌ژ ئێك كرن و باوه‌ریێ بتایبه‌ت دناڤبه‌را كه‌س وكارێن ژن ومێرێن ژێك جودا بوى.

• شێواندن یان شكاندنا وینێ هه‌ڤژینیێ و پێكئینانا خێزانێ وه‌كو پرۆسه‌یه‌كا جڤاكى یاپیروز دچاڤێ ئه‌وان كچ وكۆرێن پرۆسه‌یا هه‌ڤژینیێ پێك نه‌ئیناى.
ئه‌ڤه‌و كۆمه‌كا ڤه‌رێژ و ده‌رئه‌نجامێن دى یێن نه‌رێنى كۆ كاریگه‌رى یا خۆ لسه‌ر تاكى و خێزانێ و جڤاكى بگشتى هه‌ین ..
و ژبۆ رێكێن چاره‌سه‌ریێ ژى پێتڤى یه‌ حكومه‌ت و ناڤه‌ندێن گرێداى بابه‌تى كۆمه‌كا رێكێن چاره‌سه‌ریێ ببینن لبه‌راهیكێ رابۆن ب هه‌وه‌كا گشتى یا هشیارى یا ئه‌وان گه‌نجێن ( كچ و كورێن ) ژنۆ خێزانێ پێك دئینن ژئالیێ جڤاكى , ئایینى ,نوژدارى , یاسایى بهێن ره‌وشه‌نبیر كرن دخۆلێن تایبه‌ت گرێداى بۆ ئه‌ڤێ مه‌به‌ستێ …

39

– به‌یار باڤى –
دێ بیته‌ چل رۆژ و هێشتا كه‌سێن په‌ككه‌فتى وخودان پێتڤیێن تایبه‌ت مۆچه‌یــێ ( مینحه‌,یان ژى هاریكارى ) یا مه‌ها نیسانێ وه‌رنه‌گرتین ,ئه‌ڤه‌ ل ده‌مه‌كى بتنێ وه‌زاره‌تا په‌روه‌ردێ و وه‌زاره‌تا كاروبارێن جڤاكى نه‌بن ( كو ئه‌ڤ ته‌خا په‌ككه‌فتیان سه‌ر ب وه‌زاره‌تا كاروبارێن جڤاكى ڤه‌نه‌ ) هه‌مو وه‌زاره‌ت و ده‌سته‌یێن دى مۆچه‌ وه‌رگرتینه‌,و لدوڤ داخویانیێن وه‌زاره‌تا دارایى بڕیاره‌ ل ئه‌ڤان چه‌ند رۆژێن نێزیك مۆچێ فه‌رمانبه‌رێن ئه‌ڤان هه‌ردو وه‌زاره‌تان ودگه‌لدا یێن په‌ككه‌فتیا ژى بهێته‌ دان.
ژسه‌ده‌ما ئه‌ڤێ گیروبونێ و هه‌روه‌سا ئێخستنا مۆچێ ئه‌ڤێ ته‌خا په‌ككه‌فتیان ل رێزبه‌ندیا دوماهیا لیستا هه‌مو وه‌زاره‌ت وده‌سته‌یان ژبه‌ریا حه‌فتى یه‌كێ هه‌ژماره‌كا په‌ككه‌فتیان ل هه‌ولێرێ و به‌رامبه‌ر ئاڤاهیێ په‌رله‌مانى خڕڤه‌بونه‌كا نه‌ڕازیبونێ ئه‌نجامدان ووه‌كو كاردانه‌ڤه‌ ونه‌ڕازیبون لسه‌ر ئه‌ڤێ چه‌ندێ كورسێكێن خۆ سۆتن!
و بۆزانین ئه‌ڤ مۆچه‌ یان ژى هاریكاریا هه‌یڤانه‌ بتنێ كوژمێ سه‌دو بیست هه‌زار دینارن ئانكو سه‌د دولار , و ئه‌ڤ كوژمه‌ژى تێرا مه‌زاختنێن حه‌فتیه‌كێ ناكه‌ن بۆ خێزانه‌كا دو سێ كه‌سى بتایبه‌ت بۆ كه‌سێ په‌ككه‌فتى هه‌كه‌ر ئه‌و سه‌میانێ مالێ بیت یان ئه‌ڤ خێزانه‌ یا كرێدار بیت …
ئه‌رێ رایه‌دار و شیره‌تكار و خه‌بیرێن حكومه‌تێ ( كو ئه‌ڤروكه‌ ب سه‌ده‌ها ل بن ئه‌ڤان ناڤان هاتینه‌ دامه‌زراندن) كارێ هه‌وه‌ چیه‌,ئه‌ركێ هه‌وه‌ چیه‌,شاره‌زاییى یا
هه‌وه‌ بۆچى یه‌ ( هه‌كه‌ر هه‌وه‌ شاره‌زاییى هه‌بیت ! ) هه‌كه‌ر هون ل دۆڤ گرنگى و پێتڤى یا هه‌ر ته‌خ وتویژه‌كێ نه‌خشه‌و پلان و پرۆژه‌یان پێشكێشى حكومه‌تێ و وه‌زاره‌تێن خۆ نه‌كه‌ن ودیار نه‌كه‌ن كو ئه‌ڤ ته‌خاهه‌ ژته‌خا دى پتر پێتڤى چاڤدێرى و پشته‌ڤانیێ یه‌ ولڤێرێ مه‌به‌ست ته‌خا په‌ككه‌فتیان و خۆدان پێتڤیێن تایبه‌تن كۆ ل پتریا وه‌ڵاتێن جیهانێ ژئالیێ گرنگى پێدانێ و چاڤدێریێ و پشته‌ڤانیێ ل رێزا به‌راهیكێ دهێن هه‌تا راده‌یه‌كى ژبلى هاریكارى و شته‌ڤانیا ماددى خزمه‌تكار ژى بۆ دهێنه‌ دابین كرن كۆ خزمه‌تا ئه‌وان بكه‌ن و زێده‌بارى خزمه‌تێن نوژدارى و ته‌رفیهى و یێن جۆراو جۆر .. ئه‌ڤه‌ زێده‌بارى ئه‌ركه‌كێ نیشتمانى یه‌ دهه‌مان ده‌م دا ئه‌ركه‌كێ مرۆڤایه‌تى یه‌ ژى .. ژبه‌ركو ژ سه‌ده‌ما ئه‌ڤێ په‌ككه‌فتنا جه‌سته‌یى و ژده‌ستدانا هێز وشیانا كارى كۆمه‌كا ئاریشێن جڤاكى وده‌روونى ژى بۆ په‌یدا دبن,
ئانكو بتنێ تشتێ وه‌كو هاریكارى و خزمه‌ت بۆ ئه‌ڤان كه‌سان دهێته‌ كرن ئه‌ڤ مۆچێ سه‌دو بیست هزار دینارى یه‌ و ئه‌و ژى ل دوماهیا هه‌مو وه‌زاره‌تان !
به‌راوورد كرن دگه‌ل ئامارێن ساڵا 2013 ێ ئه‌ڤرۆ هه‌ژمارا ئه‌و كه‌سێن په‌ككه‌فتى و خودان پێتڤیێن تایبه‌ت كۆ ئه‌ڤ مۆچێ كێم بۆ دهێته‌ مه‌زاختن گه‌له‌ك كێمتر بویه‌ ژ به‌ریا ئه‌ڤان چار پێنج ساڵان ژبه‌ركو دئه‌ڤى ماوه‌ى دا مۆچێ كه‌سێن دانعه‌مر ( دسه‌ر ژیێ شێست سالیێدا و هه‌روه‌سا یێ ژنێن بێ سه‌میان و چه‌ند ته‌خێن دى هاتیه‌ راوه‌ستاندن) ژبه‌ركو دبێژن هێشتا ئامار وپشكنین وجه‌رد بدوماهى نه‌هاتیه‌ !
ره‌وش و كاودان ب چى ره‌نگى بن , بهانه‌ چى بن وچه‌ند بن پێتڤى یه‌ ئه‌ڤ ته‌خا
هه‌ یا په‌ككه‌فتیان ( و هه‌ر وه‌سا ته‌خێن دى یێن خودان پێتڤیێن تایبه‌ت) نه‌هێت په‌راوێز كرن وپێتڤى یه‌ رێزه‌كا شایسته‌ ل ئه‌وان بهێته‌ گرتن,پێتڤى یه‌ هه‌مو كه‌س خۆ ب خودانێ ئه‌وان بزانیت وهه‌ر وه‌زیره‌ك خۆ ب وه‌زیرێ ئه‌وان بزانیت .. ژبه‌ركو دۆڤ ره‌وشا وان یا تایبه‌ت ئه‌وان ئه‌و شیان و میكانیزمه‌ نینن گڤاشتنان بكه‌ن و بشێوه‌یه‌كى پێتڤى به‌ره‌ڤانیێ ژ مافێن خۆ بكه‌ن و داخوزایێن خۆ بینن به‌ر چاڤ ,و بتنێ تشتێ شیاین بكه‌ن وه‌كو كاردانه‌ڤه‌ به‌رامبه‌ر گیرو بونا ( مۆچه‌یێ سه‌دو بیست هه‌زارى) وسه‌رنجا حكومه‌تێ وڕایا گشتى بكێشن كورسیكێن خۆ سۆتن ..
ئه‌رێ دوكێلا سۆتنا ئه‌ڤان كورسیكان دێ ژجامێن تارى یێن مونیكایا جه‌نابێ وه‌زیرى ده‌رباز بیت یاكو بهایێ وێ به‌رامبه‌ر مۆچێ پێنج سه‌د په‌ككه‌فتیان!؟

69

– به‌یار باڤى –
د ژیانا مه‌یا رۆژانه‌دا ل كه‌توارێ مه‌ یێ جڤاكى یێ هه‌رێما كوردستانێ رۆژانه‌ دێ چه‌ندین سوحبه‌ت و سه‌رهاتیێن هنده‌ك كه‌سانێن جامێر و دلسۆز و ده‌ست پاك بهیسێ یان دێ ب چاڤ بینى كۆ سه‌ره‌رایى خزمه‌تا مه‌زنا ئه‌وان بۆ خه‌لكێ خۆ كرى و ئه‌وێ دلسوزى و وه‌فادرى یا دكارێ خۆ دا ئه‌نجام داى به‌رامبه‌ر ئه‌ڤێ چه‌ندێ تشته‌ك بۆ نه‌هاتیه‌ كرن ( مه‌به‌ست نه‌ بتنێ ئالیێ ماددى یه‌ به‌لكو هه‌تا مه‌عنه‌وى وى ژى ) به‌لكو به‌روڤاژ پیلان بۆ هاتینه‌ دانین وخه‌فك بۆ هاتینه‌ ڤه‌دان كۆ بهێنه‌ په‌راوێز كرن وشكاندن وبێ بها كرن ,و گوتنا مه‌زنا ژى دبێژیت خۆش خزمه‌تو بێ قیمه‌تو !
وبه‌رۆڤاژ ژى كه‌سه‌كێ هه‌لپه‌رێس وناپاك دهه‌مو ژیانا خۆدا جاره‌كێ كه‌و ب دارێ وى كه‌تبیت وبتنێ ئێك كارێ باش ئه‌نجام دابیت دێ فوكس و رۆناهیێ ئێخن هنداف ئه‌ڤى كارى و مه‌زن كه‌ن وئینن به‌رچاڤ وخودانى ژى دێ كه‌ن قاره‌مان و به‌لكو دێ بیته‌ به‌هانه‌ و رێ خوشكه‌ر بۆ پێدانا پله‌و پوسته‌یان ژى !
د ئه‌ڤى بیاڤى دا دفلكلورێ مه‌یێ كوردى دا چیرۆكه‌ سه‌رهاتیه‌ك هه‌یه‌ دبیژیت :
كابرایه‌ك هه‌بو هه‌ر ساڵ ل ده‌مه‌كێ دیاركرى جانه‌گایه‌ك سه‌ر ژێ دكر و گۆشتى وى لسه‌ر خه‌لكێ به‌لاڤ دكر و دگوت ئه‌ڤ قوربانه‌ بخێرا سه‌رێ سۆلتانى یه‌ خودێ بۆ مه‌ ب پارێزیت ..
بۆ چه‌ندین سالان كارێ ئه‌ڤى كابراى هه‌ر ئه‌ڤه‌ بو دانا قوربانى ب خێرا سه‌رێ سۆلتانى كو خودێ سۆلتانى ب پارێزیت و دوور بكه‌ت ژ هه‌ر به‌لاوو ئاتافه‌كێ .
رۆژه‌كێ كابرایى هزرێن خۆ كرن و دگه‌ل خۆ گۆت ئه‌رێ ئه‌ڤه‌ سه‌رێ هنده‌ ساڵایه‌ ئه‌ز ئه‌ڤێ چه‌ندێ دكه‌م و هه‌ر سال قوربانه‌كى ب خێرا سه‌رێ سۆلتانى دده‌م ئه‌رێ سوڵتان ب ئه‌ڤێ چه‌ندێ دزانیت , ئه‌رێ ئه‌ڤ خه‌لكێ ئه‌ز ئه‌ڤى گۆشتێ خێرێ ب سه‌ر ئه‌واندا به‌ڵاڤ دكه‌م ئه‌ڤ چه‌نده‌ گه‌هاندینه‌ سولتَانى و سۆلتان ژى نه‌ دووره‌ و هه‌ر یێ ل ئه‌ڤى باژێرى .. هزره‌ك بر و ئێك ئینا گۆت جارێ ئه‌ڤێ جارێ ئه‌ز دێ ب شێوازه‌كێ دى ئه‌ڤێ كریارێ ( دانا قوربانى) پێش كێش كه‌م ؛ رۆژا پاشتر وه‌كو هه‌ر سال و هه‌ر ل ئه‌وى جهێ جاران جانه‌گایێ خۆ سه‌ر ژێ كر و بانگ ل خه‌لكێ كر هێى وه‌رنه‌ گۆشتێ خێرێ هێى وه‌رنه‌ گوشتێ خێرێ ئه‌ڤ خه‌لكه‌ هه‌مو لێ داڕژى وبه‌هرا خۆ برن و پسیار ژێ كرن ئه‌ڤه‌ خێرا چى یه‌؟ گۆت ئه‌ڤ قوربانه‌ درێكا خودێ دا یه‌ كۆ خودێ به‌لا سۆلتانى ژمه‌ ڤه‌كه‌ت !
دبێژن هێشتا رۆژ ئاڤا نه‌بوى ئێلچى هاتن و دملێ وى ڕا گرتن و گوتنێ توى فلان كه‌س گوت به‌لێ خێر بیت ؟ گۆتنێ نه‌ ئاخڤه‌ سۆلتانى تویێ خواستى !
ده‌مێ لبه‌ر سینگێ سۆلتانێ راه‌وه‌ستاى گوت سۆلتانێ مه‌زن خێربیت گونه‌ها من
چیه‌ هه‌وه‌ ئه‌ز خواستیم ؟ سۆلتانى ژى گوتێ ما گونه‌ه ژ ئه‌ڤێ مه‌زنتر هه‌یه‌ تۆ جانه‌گایه‌كى سه‌رژێ دكه‌ى و لسه‌ر خه‌لكێ به‌ڵاڤ دكه‌ى و دبێژى ئه‌ڤ قوربانه‌ بۆ هندێ یه‌ خودێ زوى به‌لا سۆلتانى ژمه‌ ڤه‌كه‌ت .. وهه‌تا نوكه‌ ئه‌ڤه‌ حه‌فت كه‌س هاتن ئه‌ڤه‌ تشته‌ گه‌هاندن من ,ئه‌ڤه‌ تۆ دێ گه‌هى یه‌ سزایێ خۆ, و گازى جه‌لادا كر سه‌رێ وى ببڕن ,ئینا كابراى گوتێ سۆلتانێ من به‌س ده‌رفه‌تێ بده‌ من بۆته‌ مه‌ره‌ما خۆ ژ ئه‌ڤێ چه‌ندێ دیار بكه‌م , سۆلتانى گۆتێ هه‌ما بێژه‌ ته‌ چ هه‌یه‌ .. كابراى ژى سه‌رهاتیا خۆ ژ سه‌رى هه‌تا دوماهیێ بۆ سۆلتانى گۆت كو چه‌وا ئه‌ڤه‌ سه‌رێ هنده‌ ساڵایه‌ ئه‌و هه‌ر ساڵ قۆربانه‌كى ب خێرا سه‌رێ سۆلتانى دده‌ت و دوعا دكه‌ت خودێ سۆلتانى ب پارێزیت لێ كه‌سه‌كى ئه‌ڤ چه‌نده‌ نه‌ گه‌هاندى یه‌ سۆلتانى لێ ده‌ما ب ئه‌ڤى ره‌نگى قوربان داى وبێ دوعایى ل سۆلتانى كرى ئه‌ها هۆسا دجهدا خه‌به‌ر گه‌هاندن سۆلتانى وڤیان ئه‌وى سزا بده‌ن !
ئه‌ڤجا مخابن ب ئه‌ڤى ڕه‌نگى ئه‌ڤرۆكه‌ دجڤاكێ مه‌دا بۆ كارین باش و كریارێن خێرێ و چاكیێ ژ ئالیێ كه‌سێن باش و جامێرڤه‌ زو ب زو كه‌سێ نابینى ئه‌ڤێ چه‌ندێ ببینیت یان لبه‌رچاڤ وه‌رگریت یان ژى بگه‌هینیت جهێ مه‌به‌ستێ .. لێ به‌روڤاژ ئاماده‌نه‌ ب هه‌مو شیان ئه‌ڤان كارێن باش و چاكیان مۆخه‌ل و بێژینگ بكه‌ن بتنێ ئێك شاشیێ دناڤ دا دیار بكه‌ن و لدوڤَ را مه‌زن بكه‌ن و بێخن بن فوكس روناهیێ ب مه‌ره‌ما شكاندنا ئه‌ڤى كه‌سێ پاك و چالاك و خودان كار و خزمه‌تێن ژێهاتى .. نیفاق و نه‌كامى , بوختان و بێ به‌ختى نه‌خۆشیێن گرانن !

website security