NO IORG
نووترين نووچه
Authors Posts by به‌يار باڤي

به‌يار باڤي

به‌يار باڤي
99 POSTS 0 COMMENTS

138

ژ ئه‌نجامێ ئه‌زموونه‌كا درێژ و كارێ مه‌ یێ راسته‌وخۆ دگه‌ل ته‌خا هه‌ژار و ده‌ست كورت وهه‌ر وه‌سا ئامارێن ب ئه‌ڤێ چه‌ندێ ڤه‌ گرێداى وزێده‌بارى كه‌توارێ هه‌ى و رۆژانه‌ ب چاڤ دبینین بۆ مه‌ دیار دبیت كو
جودا ژسالێن بورى ئه‌ڤ ساله‌ رێژا خه‌لكێ هه‌ژار و ده‌ست كورت ل هه‌رێما مه‌ پتر دهێته‌ به‌رچاڤ وبۆ ئه‌ڤێ راستیێ ژى چه‌ندین ئاماژه‌ هه‌نه‌ مینا :
1- هه‌ژمارا زۆرا ئه‌وى خه‌لكێ (كه‌س و خێزان) یێن كو ب شێوه‌یه‌ك ئاشكرا داخوازا هاریكاریا ماددى ( دراڤى ) دكه‌ن .
2- ئه‌و ئامارێن ژئالیێ حكومه‌تێ وناڤه‌ندێن په‌یوه‌ندیدارڤه‌ ده‌ردكه‌ڤن و ئاماژێ ب رێژا بلندبونا ئاستێ پلا هه‌ژاریێ و بێكاریێ دده‌ن .
3- به‌رده‌وامیا قه‌یرانا ئابوورى (كو كه‌فته‌ دسالا چارێ دا) و دگه‌لدا به‌رده‌وامیا سیسته‌مێ كێم كرنا مۆچه‌یێن فه‌رمانبه‌ران..
4- ئه‌ڤه‌ بتنێ سێ چار رۆژ بۆ جه‌ژنێ ماینه‌ لێ هێشتا رێژه‌یه‌ك به‌رچاڤ ژ خه‌لكێ پێتڤیێن ئه‌ڤێ جه‌ژنێ نه‌كرینه‌ , هنده‌ك ب هیڤى یا وه‌رگرتنا مۆچه‌ى ( نیڤ مۆچه‌ى!) یان ژى كه‌ره‌ما ده‌وله‌مه‌نده‌كى كو زه‌كاتێ بده‌تێ ..
ئه‌ڤه‌ و چه‌ندێن ئاماژه‌یێن دیتر كو هه‌مى ئه‌وێ راستیێ دیار دكه‌ن كو رێژا هه‌ژاریێ وده‌ست كورتیێ دناڤ خه‌لكێ مه‌دا گه‌له‌ك گه‌له‌ك یا به‌رفره‌ه بوى ,وبه‌رامبه‌ر ئه‌ڤێ چه‌ندێ رێژا دانا هاریكاریێ یان ژى ( زه‌كاتێ ) ژئالیێ كه‌سێن ده‌وله‌مه‌ند و سه‌رمایه‌دار ڤه‌ گه‌له‌ك یاكێم بوى هه‌تا راده‌یه‌كى دهێته‌ گوتن كا چه‌وا نوكه‌ ب سه‌د رێك و به‌هانه‌یان ئه‌ڤ زه‌نگینه‌ ژ دانا باجا حكومه‌تێ دڕه‌ڤن هۆسا ب سه‌د رێك و به‌هانه‌یان ژدانا زه‌كاتێ و هاریكاریێ ژى بۆ خه‌لكێ هه‌ژار دڕه‌ڤن !
راسته‌ چ تشت ره‌ها ( مگلق ) نینن و لهه‌مو جه و سه‌رده‌مان كه‌سێن ده‌ست ڤه‌كه‌رى و خێر خواز هه‌نه‌ بۆ هاریكارى و پشته‌ڤانیا خه‌لكێ هه‌ژار بتایبه‌ت د ئه‌ڤان هه‌لكه‌فتێن ئایینى جڤاكى ( هه‌یڤا ره‌مه‌زانێ و هاتنا جه‌ژنى ) كو پێتڤیێن خێزانان گه‌له‌ك زێده‌و به‌رفره‌ه دبن .. لێ
ئه‌و كه‌توارێ جڤاكى یێ به‌رچاڤ ئه‌وێ راستیێ دیار دكه‌ن دئه‌ڤ ساله‌دا ئه‌ڤ هاریكارى و پشته‌ڤانیا ( ماددى ) نه‌ دئاسته‌ك پێتڤى دابو و به‌لكو هه‌مبه‌ر كرن دگه‌ل سالێن بورى گه‌له‌ك ل كێمێ دایه‌ و هه‌ر وه‌كو دهێته‌
گوتن ل ئه‌ڤێ ده‌ڤه‌رێ هه‌ژماره‌كا زۆرا ده‌وله‌مه‌ندا هه‌نه‌ ( كو پتریا ئه‌وان ئه‌ون یێن كو ل ناڤبه‌را شه‌ڤ ورۆژه‌كان دا بوینه‌ مه‌لیونێر ! ) ب دروستى زه‌كاتا مالێ خۆ ناده‌ن یان ژى هه‌تا دهێته‌ گوتن كو هه‌نه‌ هه‌ما قه‌ت زه‌كاتێ ژى ناده‌ن !
ژ ده‌ست دانا هنده‌ك ره‌وشت وبهایێن جڤاكى یێن به‌رز كو ئێك ژئه‌وان پشته‌ڤانى كرن و درێژكرنا ده‌ستێ هاریكاریێ یه‌ بۆ كه‌سێن هه‌ژار و ده‌ست كورت (بتایبه‌ت ل ده‌مێ حكومه‌ت ب ئه‌ڤى ئه‌ركى نه‌ رابیت) ئاماژه‌یه‌كا مه‌ترسیداره‌ لسه‌ر ئارامى و سه‌لامه‌تیا جڤاكى و هه‌روه‌سا ل هه‌مان ده‌مدا ئاماژه‌یه‌كا دیاره‌ لسه‌ر په‌یدابون و به‌ربه‌ڵاڤبونا گیانێ هه‌ڤڕكى و ململانێ و كه‌رب و كینێ لناڤبه‌را ته‌خێن جڤاكى بتایبه‌ت كه‌سێن ته‌خا هه‌ژار و ده‌ست كورت و هه‌تا ته‌خا ناڤنجى ژى( وه‌كو فه‌رمانبه‌ران ) به‌رامبه‌ر كه‌سێن ته‌خا ده‌وله‌مه‌ند و سه‌رمایه‌دار ,به‌لكو ل گه‌له‌ك حاله‌تان ئه‌ڤ كه‌رب و كینه‌ به‌رفره‌ه دبیت به‌رامبه‌ر هه‌ر هێمایه‌كێ ده‌ستهه‌ڵاتێ , ژبه‌ركو ئه‌ركێ ده‌ستهه‌ڵاتێ یه‌ دابین كرنا خزمه‌تگوزاریێن ژیانێ بۆ هاولاتیان و هه‌ر وه‌سا كێم كرنا جوداهیێن ته‌خایه‌تى ..
ئه‌ڤجا ئه‌ركێ حكومه‌تێ یه‌ ب دام و ده‌زگه‌هێن په‌یوه‌ندارڤه‌ خۆشگوزه‌
رانیا خه‌لكێ خۆ ژئه‌ركێن خۆ یێن پله‌ ئێك لبه‌ر چاڤ دانیت بتایبه‌تَ برێكا ئه‌كتیڤ كرنا سیسته‌مێ وه‌رگرتنا باجێ ژ ده‌وله‌مه‌ند و سه‌رمایه‌ داران و ئه‌ڤى داهاتى بێخت دخزمه‌تا هه‌ژار و ده‌ست كورتان دا كو رۆژ بۆ رۆژێ ئه‌ڤ ته‌خه‌ یا به‌رفره‌ه دبیت … و ئه‌ڤ سیسته‌مه‌ هه‌تا راده‌یه‌ك مه‌زن ل هه‌مو وه‌ڵاتێن جیهانێ دهێته‌ په‌یره‌و كرن ,و بئه‌ڤى ره‌نگى دێ ئه‌ڤى ده‌وله‌مه‌ندى ئێخت دبن ئه‌ركێ وى یێ سروشتى ڤه‌ كو چ خێرو منه‌تا ل كه‌سێ ناكه‌ت و ل هه‌مان ده‌مدا ژى دێ كه‌رامه‌تا ئه‌ڤى كه‌سێ ده‌ست كورت و هه‌ژار ژى هێته‌ پاراستن ..

136

كورد دبێژن خوین ل داروبه‌را نه‌كه‌ڤت , وه‌ك به‌رچاڤ كرنا ئه‌نجام و ئاكامێن تراژیدى و مالوێرانیێ لسه‌ر كه‌سێن توش دبنێ به‌لكو هه‌تا ئه‌وێن دبازنا نێزیك ژى دا ب پیڤه‌رێ خێله‌كى و عه‌شیره‌تى یێ كه‌ڤن ..
ل گۆَره‌ى هنده‌ك ڤه‌كولین و ژێده‌رێن دیرووكى هه‌تا سالێن بیستان ژى ژ چه‌رخێ بیستێ كێم خێل و عه‌شیرێن كوردان یێن هه‌ڤسوى و هه‌ڤسنوور هه‌بن كو په‌یوه‌ندیێن سروشتى دگه‌ل ئێك هه‌بن ,به‌لكو پتریا جاران هه‌ڤڕكى و ململانێ وتالان و تالان كرن و كوشتن و تۆل وتۆلڤه‌كرن رویێ دیارێ ئه‌ڤان په‌یوه‌ندیان بو ,وهه‌لبه‌ت سیاسه‌تا ده‌وله‌تا ئۆسمانى ژى هه‌ر لسه‌ر خوه‌شَ كرنا ئاگرێ دوبه‌ركیێ دناڤ ئه‌ڤان پێكهاته‌یێن جڤاكێ كوردى دا دهاته‌ مه‌شاندن ,وئه‌ڤێن خوارێ ژى دوو نموونه‌یێن به‌ربه‌ڵاڤن ژ ئه‌ڤێ (كوشتنا ب غه‌در) و ب پشته‌ڤانیا ده‌وله‌تێ , ودئه‌نجامدا تۆلڤه‌كرن ژلایێ كه‌سه‌كى ژده‌رڤه‌ى بازنا ئێكێ(باب , كوڕ, برا ) هاتیه‌ ئه‌نجامدان و تۆل و حه‌یف هاتیه‌ هلاندن ) ..
• كوشتنا شه‌كر ئاغایێ گراڤى … و تولڤه‌كرنا وى ژئالیێ میسویێ گورگان ڤه‌:
بهزرا من ئه‌ڤ بویه‌ره‌ ڤه‌دگه‌ریت بو دوماهیا چه‌رخێ هه‌ژدێ یان ژى سالێن ده‌ستپێكا 1800ێ ولدوڤ گوتنا مه‌لا مه‌حمودێ بایه‌زیدى ( كو ل سالا 1867وه‌فات كریه‌) دبێژت شه‌كر ئاغا مروڤه‌كێ زێده‌ جامێر و مێَرچاك و وه‌لاتپارێز بو..ل كه‌لا شاخێ بو,ئه‌و چه‌ند ساڵ بو حكومه‌تا ئوسمانى ب هه‌مو رێَكا نه‌دشیا ئه‌ڤى مێرچاكى بێخت دبن كونترولا خۆڤه‌ .. هه‌تا دوماهى جار والیێ ئه‌رزه‌رومىِ ب رێكا خائینه‌كى ژ ئاغایێن چه‌لێ ب ناڤێ ئیبراهیم به‌گ ب نهێنى رێك دكه‌ڤن ,و ئه‌ڤ ئیبراهیم به‌گه‌ سوزو په‌یمانا
ب دره‌و دده‌ت شه‌كر ئاغاى كو سه‌ره‌دانا ئه‌وى بكه‌ت ب برایانه‌ سێ شه‌ڤ و رۆژا ل دیوانا وى مێهڤان بمینت .. لێ ل شه‌ڤا سیێ وه‌كو دگه‌ل خولامێن خۆ پێش وه‌خت رێك كه‌فتى د دیوانێَ ڤه‌,دره‌نگ شه‌ڤ شه‌كر ئاغاى دده‌ن به‌ر خه‌نجه‌را و دكوژن و سه‌رێ وى دبڕن كو بۆ والیێ ئه‌رزه‌رومێ ببن (وسترانا شه‌كر ئاغا گه‌له‌ك یا به‌ربه‌لاڤه‌).
ژن وخوشكێن شه‌كر ئاغاى ده‌رسوكێن خۆ ل ناڤ گه‌له‌ك كه‌سان و ناڤداران دگه‌رینن كو كه‌سه‌ك شینى یا ئه‌وان راكه‌ت و تۆلا شه‌كر ئاغاى هه‌لده‌ت لێ كه‌سه‌ك نه‌چو دبن ئه‌ڤى بارى ڤه‌..ل دوماهیێ كه‌سه‌ك ژته‌خا گشتى و چو گرێدانا خونێ ژى دگه‌ل ئه‌وان نه‌هه‌ى ب ناڤێ موسا (میسو ) ژبابكێ گورگان ژ ئێلا هاجان ئه‌ڤى خوینێ لسه‌ر خۆ دكه‌ته‌ مال هه‌تا كو ده‌رفه‌تا خوه‌ دبینیت ئه‌ڤى كۆژه‌كى ل دیوانا وى دگه‌ل چه‌ند هه‌ڤكارێن وى دكوژیت ..وبئه‌ڤى ره‌نگى ناڤ و ده‌نگه‌كێ مه‌زن بۆ به‌لاڤ بو وشینى ژى هاته‌ راكرن..
*كوشتنا حاجو ئاغایێ هه‌ڤێركى … و تولڤه‌كرنا وى ژئالیێ عه‌لیكێ به‌تێ ڤه‌ :
ل سالا 1896 وپشتى بۆ ده‌مه‌ك درێژ حاجو ئاغا یێ هه‌ڤێركى خۆ راده‌ستى ده‌وله‌تا ئوسمانى نه‌كرى و به‌رخوه‌دان كرى ( خۆ جهێن مه‌دیاتێ و گوندێن ده‌ورو به‌رێن وێ بون ),دیساڤه‌ ب پیلانه‌كێ هاته‌ خاپاندن (كه‌سه‌ك هه‌ر ژ كوردێن هه‌ڤدژى وى !) دبێژته‌ ئه‌فسه‌رێ ئوسمانى هه‌كه‌ر بێژن حاجو ئاغاى ئه‌ڤه‌ هه‌ڤژینا ته‌ دگه‌ل مه‌ هاتیه‌ ئێخسیر كرن هینگێ ئه‌و نه‌شێت به‌رخودانێ بكه‌ت و شه‌ره‌ف ل ده‌ف ئه‌وى گه‌له‌كه‌ و دێ خۆ راده‌ستى مه‌ كه‌ت ,هۆَسا كه‌سه‌كى ب جل و به‌رگێن ژنا دخه‌ملینن ولسه‌ر پشتا هه‌سپه‌كى دكه‌ن ودئینن ودبه‌ن و پشتى حاجو ئاغا ئه‌ڤى دیمه‌نى ژدوور دبینت بڕیارا خۆ راده‌ست كرنێ دده‌ت هه‌ر چه‌ند هه‌ردو هه‌ڤالێن وى یێن ئێزدى دبێژنێ باوه‌ریا خۆ ب دوژمنى نه‌ئینه‌ و ئه‌ڤه‌ پیلانه‌ , لێ ئه‌و دبێژت ( بلا ئه‌ز بكه‌ڤم ده‌ست دوژمنى و نه‌كو نامیسا من ) هه‌لبه‌ت ئه‌و ژى به‌ختێ خۆ دده‌نێ كو سه‌ره‌ده‌ریا خراب دگه‌ل نه‌كه‌ن ده‌ما خۆ ته‌سلیم دكه‌ت!
پشتى خۆ راده‌ستى دوژمنى دكه‌ت دگه‌ل دو هه‌ڤالێن خۆ یێن ئێزدى ,ئێكسه‌ر ئه‌فسه‌رێ ئوسمانى ئه‌وى دگه‌ل هه‌ردو هه‌ڤالێن وى راده‌ستى دوژمنێ وى یێ توند ( جه‌مو ) ى دكه‌ن ,جه‌مو ژى ب هه‌مى هۆڤاتى ده‌ست و لنگێن وى گرێدده‌ت و وه‌ك په‌زه‌كى سه‌رێ وى دبڕیت ل ناڤ خه‌لكێ دگێریت ,هه‌لبه‌ت هه‌ردو هه‌ڤالێن وى ژى كوشتن ..
ژنكا حاجوى كه‌فیك وده‌رسووكێن خۆ گێران كى هه‌یه‌ تۆلا حاجو ئاغاى ڤه‌كه‌ت .. ل دوماهیێ عه‌لیكێ به‌تێ (كورێ برایێ حاجۆ ئاغاى) ئه‌ڤ تولڤه‌كرنه‌ لسه‌ر خۆ كره‌ مال و لبهارا 1912 سینگ و سینگ كه‌ته‌ به‌راهیكا ( جه‌مویێ كوژه‌ك ) و ئه‌و كوشت و ناڤ و ده‌نگێ وى ژڤێرێ ده‌ست پێكر وهاته‌ دانان وه‌ك سه‌روكێ عه‌شیرا هه‌ڤێركان .. ولسالا 1914 دیسا دژى ئوسمانیا ب سه‌رهه‌لدانه‌كێ رابۆ و ده‌رگه‌هێ زیندانا نسێبینێ شكاند وهه‌مو زیندانى ئازاد كرن … ومخابن ل 18/8/1919وه‌كو به‌ره‌ڤان دچیته‌ ناڤ شه‌ره‌كێ لناڤبه‌را دو بنه‌مالێن عه‌شیرێ داو ب گولله‌یه‌كا كوره‌ دهێته‌ كوشتن ..
ئه‌ڤه‌ وه‌كو دوو نموونێن دو به‌ره‌كى و كوشتن و تۆَل و تولڤه‌كرن دناڤ كه‌لتورێ مه‌یێ جڤاكى دا لسه‌رده‌مێن بورى دا , كو دئه‌نجامدا هه‌ر زه‌ره‌رمه‌ندێ ئێكێ ودوماهیێ خه‌لكێ مه‌بو !

85

ل ده‌ستپێكا ئه‌ڤێ مه‌هێ د چارچۆڤێ كونفرانسه‌كێ بوارێ خێزانى دا كو ل هه‌ولێرێ هاتبو به‌ستن چه‌ند ئامارێن سه‌رنج راكێش هاتنه‌ راگه‌هاندن , و ئێك ژئه‌وان ئاماران ( كو پشت به‌ستن ب دوسه‌یێن ل ئه‌نجومه‌نێ دادوه‌ریا هه‌رێمێ هاتینه‌ به‌ستن) دیاردكه‌ن كو رێژه‌یا گرێبه‌ستێن هه‌ڤژینیێ بتایبه‌ت ل ئه‌ڤان سێ سالێن دوماهیێ گه‌له‌ك ل كێمێ داینه‌ هه‌تا راده‌یه‌كى بتنێ لناڤبه‌را ساڵا 2016 ێ هه‌مبه‌رى 2015ێ 11530 حاله‌ت كێم كرینه‌ !
ئانكو ل دوڤ ئه‌وان ئامارێن هاتین دیار كرن ل سالا 2015 هه‌ژمارا گرێبه‌ستێن هه‌ڤژینیێ (43410 )گرێبه‌ست بون ,ل ده‌مه‌كى هه‌ژمارا ئه‌ڤان گرێبه‌ستا ل سالا 2015بۆ( 31880 )گرێبه‌ستا هاته‌ خوارێ.. ئه‌ڤه‌ ل ده‌مه‌كى ل دوڤ رێژا زێده‌بونێ و ژدایك بویا (رێژا ژدایكبویان ساڵانه‌ نێزیكى3 %ێ یه‌ ) دڤیا ئه‌ڤ رێژه‌یا گرێبه‌ستێن هه‌ڤژینیێ ژى ساڵ بۆ سالێ دزێده‌بونێ دابان نه‌كو ل كێمێ دابان ..
و تشتێ گرێداى ئه‌ڤێ دیاردێ لێ ب شێوه‌یه‌كێ به‌روڤاژ دیارده‌یا به‌ردانێ یه‌ كو به‌روڤاژى یا هه‌ڤژینیێ ساڵ بۆ سالێ د زێده‌بوونێ دایه‌ هه‌تا راده‌یه‌كى گه‌هشتى20% به‌رامبه‌ر گرێبه‌ستێن هه‌ڤژینییێ!
بو نموونه‌ لدوڤ ئامارێن هاتین به‌ڵاڤ كرن دماوێ هه‌ردو سالێن 2015 و 2016 پتر ژ 15000 پازده‌هه‌زار حاله‌تێن به‌ردانێ ل دادگه‌هێن هه‌رێمێ هاتینه‌ تومار كرن , ئانكو به‌رامبه‌ر هه‌ر پێنج حاله‌تێن َپێكئینانا خێزانێ حاله‌ته‌كێ به‌ردانێ رودایه‌ و خێزانه‌ك هاتیه‌ هه‌لوه‌شاندن..
بابه‌تێ مه‌ لسه‌ر ئه‌ڤێ دیاردا كێم بونا رێژه‌یا گرێبه‌ستێن هه‌ڤژینییێ یه‌ ( و لهه‌ژماره‌كا ژبه‌رى نوكه‌ ئه‌م لسه‌ر ئه‌گه‌رێن زێده‌بونا حاله‌تێن به‌ردانێ ئاخفتبوین ) .
هه‌كه‌ر ئه‌م ل ئه‌وان ئه‌گه‌ران بگه‌رین یێن كو دبن هۆكار و پالده‌رێن ئه‌ڤێ دیاردێ ( كو رێژا گرێبه‌ستێن هه‌ڤژینییێ ل هه‌رێما مه‌ كێم ببیت , بتایبه‌ت ل ئه‌ڤان سێ چار سالێن دوماهیێ ) دێ بۆ مه‌ هنده‌ك ژئه‌وان ئه‌گه‌ران دیار بن , وه‌ك ئه‌ڤێن ل خوارێ :
1- لاوازى یا بارێ ئابوورى : گرێبه‌ستا هه‌ڤژینیێ و پێكئینانا خێزانێ گرێدایى كۆمه‌كا پێتڤى و كه‌ره‌ستێن ماددى هه‌یه‌ هه‌تا كو بشێت خۆ راگریت..لێ ده‌ما ره‌وشا ئابورى یا لاواز بیت هه‌لبه‌ت هزر ل ئه‌ڤى پروژه‌ى ناهێته‌ كرن یان دێ هێت پاش ئێخستن !
2- بێكارى و نه‌بونا ده‌لیڤا دامه‌زراندنێ : بتایبه‌ت بۆ گه‌نجان كو هه‌بونا داهاته‌كێ هه‌یڤانه‌ مه‌رجێ سه‌ره‌كى یه‌ كو ئه‌ڤ َخێزانه‌ بشێت خۆ ڕاگرت وبه‌رده‌وامیێ ب هه‌بونا خۆ بدت ,لێ ل دۆڤ كه‌توارێ ئه‌ڤان چه‌ند سالێن دوماهیێ نه‌بتنێ ده‌لیڤا دامه‌زراندنێ ژى نه‌مایه‌ به‌لكو ده‌لیڤا كارى ژى لبه‌ر گه‌نجان نه‌مایه‌ , هه‌تا راده‌یه‌كى رێژا بێكاریێ گه‌هشتیه‌ دسه‌ر 12%ێ دا كو ئه‌ڤه‌ رێژه‌یه‌ك گه‌له‌ك مه‌ترسیداره‌ .
3- شه‌ڕ و جه‌نگ وچونا گه‌نجان بۆ به‌روكێن شه‌ڕى : ئه‌ڤ ڕه‌وشا جه‌نگ و شه‌رێ سێ ساله‌ ب سه‌روه‌ڵاتێ مه‌دا هاتیه‌ سه‌پاندن بۆیه‌ ئه‌گه‌را وێ چه‌ندێ ب هه‌زاران گه‌نجێن مه‌ قه‌ستا به‌روكێن شه‌ڕى و به‌ره‌ڤانیێ ژ وه‌ڵاتى بكه‌ن و بئه‌ڤێ
چه‌ندێ ژى هزرا ژنئینانێ وپێكئینانا خێزانێ دهێته‌ پاشئێخستن.
4- راوه‌ستاندنا پێشینه‌یێن دراڤى یێن هه‌ڤژینییێ : بۆ ماوێ چه‌ند ساڵان ب رێكا دانا ئه‌وان پێشینه‌یێن هه‌ڤژینییێ ( سولفێن زه‌واجێ ) بۆ گه‌نجان ,ئه‌ڤ چه‌نده‌ ببو هوكاره‌ك كۆ گه‌نج ب هیڤى و گه‌رماتیه‌ك مه‌زنتر خۆ باڤێژن پرۆسه‌یه‌یا هه‌ڤژینییێ (پێنج مه‌لیون دینار بون)..لێ ب راوه‌ستانا ئه‌ڤێ پێشینه‌یێ سستى كه‌فته‌ ئه‌ڤێَ گرێبه‌ستا هه‌ڤژینییێ ژى.
5- قه‌یرانا ئاكنجیبونێ : هه‌ر چه‌نده‌ ئه‌ڤ خاله‌ ب فاكته‌رێ ئابوورى ڤه‌ گرێدایه‌,كو ل خالا ئێكێ ئاماژه‌ پێ هاتیه‌ كرن لێ دهه‌مان ده‌مدا وه‌كو خاله‌كا سه‌ره‌كى دهێته‌ به‌رچاڤ بۆ خێزانه‌كا ئارام و سه‌ركه‌فتى وگه‌له‌ك جاران نه‌بونا ئاڤاهیێ سه‌ربخوه‌ دبیته‌ ئه‌گه‌را سه‌ره‌كى یا پاشئێخستنا هزرا پێك ئینانا خێزانێ,بتایبه‌ت ئه‌ڤروكه‌ ل دوڤ ئامارێن ( رێكخراوا به‌رگرى ژ مافێ كرێداران ) پتر ژ 120000 سه‌دو بیست هه‌زار خێزان دئاڤاهیێن كرێ ڤه‌ دژین …
6- چوونا ژده‌رڤه‌ : بتایبه‌ت ئه‌ڤ مشه‌ختبونه‌ پتر ره‌گه‌زێ نێر بخۆڤه‌ دگریت .. وئه‌ڤه‌ژى دبیته‌ ئه‌گه‌ره‌كا دى كو رێَژه‌یا كچێن نه‌شو كرى زێده‌ بیت و یا كۆران ل كێمێ بده‌ت ..
7- ته‌كنه‌لوژیا : مژوول بون و هیبوونا هنده‌ك گه‌نجان لسه‌ر ئه‌ڤان ئالاڤێن ته‌كنه‌لوژى؛ ئه‌نته‌رنێتێ و موبایلێ ومالپه‌رێن جڤاكى … كارتێكرنه‌ك نیگه‌تێف ل هنده‌ك گه‌نجان كریه‌ كو هزرێ ل گرێبه‌ستا هه‌ڤژینییێ نه‌كه‌ن !
بهه‌ر حال دڤیا حكومه‌تێ به‌رنامه‌یێن تایبه‌ت هه‌بن بۆ هاریكارى وپشته‌ڤانیا گه‌نجان ژبو پێكئینانا خێزانێ , ژبه‌ركو جڤاكێ ساخله‌م ئه‌وه‌ یێ لسه‌ر بنسترا خێزانا ساخله‌م دهێته‌ ئاڤا كرن و به‌روڤاژ جڤاك توشى گه‌له‌ك نه‌كبه‌تى و نه‌هامه‌تیا دبیت …!

109

ژ ئه‌وان كێشه‌ و ئاریشه‌یێن خێزانان و هه‌ڤژینان ل ئه‌ڤان سالێن دووماهیێ،كو هه‌ر كه‌س هه‌ست پێ دكه‌ت و وه‌ك دیارده‌ به‌ربه‌ڵاڤ بویه‌ دناڤ جڤاكى دا ئه‌وه‌ كو زه‌لام یێ چویه‌ ژ ده‌رڤه‌ى وه‌ڵاتى ب هیڤى یا وه‌رگرتنا مافێ په‌نابه‌ریێ و هه‌ڤژینا خوه‌ ل ڤێرێ هێلایه‌ ( یان ژى هه‌ڤژین و زارۆ پێكڤه‌ ل ڤێرێ هێلاینه‌ ) هه‌تا كو ده‌رفه‌ته‌كێ دبینیت و ئه‌وان ژى ڤه‌كێشیت بۆ ئه‌وى وه‌ڵاتێ ئه‌و لێَ ..و ئه‌ڤ جۆرێ هه‌ڤژینان ژى دو جوینن؛ یێ ئێكێ هه‌ر د ئه‌سل دا زه‌لام یێ ژ ده‌رڤه‌ و هاتیه‌ بۆ خوه‌ ئێك ڤه‌گوهاستیه‌ و یێ ل هیڤیا رێكارێن قانوونى هه‌تا كو هه‌ڤژینا خوه‌ ببه‌ت ئه‌وى وه‌ڵاتێ ئه‌و لێ ئاكنجى و پتریا جاران ئه‌ڤ ژنا ل ڤێرێ د مینیت بێ زارۆیه‌ یان ژى ره‌نگه‌ زارۆیه‌ك هه‌بیت و جۆرێ دویێ هه‌ردو هه‌ڤژین د ئه‌سل دا خه‌لكێ ڤێرێ نه‌ و ئاكنجیێن وه‌ڵاتینه‌، لێ زه‌لامى قه‌ستا ژ ده‌رڤه‌ كریه‌ بۆ هه‌ر مه‌به‌سته‌كا هه‌بیت, و پتریا جاران ئه‌ڤ جۆرێ هه‌ڤژینان خودان كۆمه‌ك زارۆنه‌، هه‌روه‌سا خودان به‌رپرساتى و ئیلتیزاماتێن جڤاكى…
ئه‌ڤێ دیاردێ گه‌له‌ك كارتێكرن ل سه‌ر خێزانا گرێداى بابه‌تى كریه‌ ب تایبه‌ت ل سه‌ر ژنێ و هه‌لبه‌ت ل سه‌ر زارۆیان هه‌كه‌ خودان زارۆ بن , و ئه‌ڤرۆ هه‌كه‌ ئه‌م سه‌ح بكه‌ینه‌ دوسه‌یێن دادگه‌هێن كوردستانێ، دێ بینین د پڕن ژ ئه‌ڤان كێشه‌یان بتایبه‌ت ل ده‌ما گیروبونا هه‌ڤژینێ ب ساڵان و زه‌لام نه‌شیایه‌ ( یان نه‌ڤیایه‌ ! ) ئه‌وێ یان ئه‌وێ و زارۆیێن وێ ڤه‌كێشت بۆ وه‌ڵاتێ ئه‌و لێ مشه‌خت…
و ئه‌گه‌رێن په‌یدا بونا ئه‌ڤێ ئاریشێ (كو هه‌تا گه‌له‌ك جاران د گه‌هیته‌ دادگه‌هێ و گه‌له‌ك ژ ئه‌وان ب جودابون و به‌ردان ب دوماهیك دهێن) ب هزرا من ڤه‌دگه‌رن بۆ كۆمه‌كا ئه‌گه‌ران , ئه‌و ژى ئه‌ڤه‌نه‌:
1- نه‌راستگویى (ب تایبه‌ت ژئالیێ زه‌لامى ڤه‌): گه‌له‌ك زه‌لام هه‌ر ل ده‌ستپێكێ راستیا ره‌وشا خوه‌ ل ئه‌وى وه‌لاتێ بیانى بۆ ژنێ و مالباتا دیار ناكه‌ن و ( ره‌نگه‌ یێ ب هه‌ڤژین بیت و خودان ئیلتزاماتێن جڤاكى و قانوونى بیت به‌رامبه‌ر ئه‌وێ هه‌ڤژینا ئه‌وى هه‌ى و نه‌شێت (یان نه‌ڤێت !) زوو خوه‌ ژێ خلاس بكه‌ت و ئه‌ڤا دى ڤه‌كێشت .
2 – نه‌ زه‌لالى و رۆهن نه‌كرنا سه‌روبه‌رێ قانوونێن گرێدایى مشه‌ختبونێ: دیسا ئه‌ڤ خاله‌ ژى پتر ب زه‌لامى ڤه‌ گرێدایه‌ (بتایبه‌ت بۆ ئه‌وێ ژ ده‌رڤه‌ هاتى و كچێ ل ڤێرێ دخوازیت) له‌ورا پێدڤى بو راستیا كه‌توارێ هه‌یى ژ ئالیێ رێكارێن قانوونى ڤه‌ بۆ چه‌وانیا برنا هه‌ڤژینا خوه‌ دیار كربان ژبه‌ر هه‌ر وه‌لاته‌كى هنده‌ك یاساو و رێنمایێن جودا هه‌نه‌، له‌وا هنده‌ك كه‌س زوو ب سه‌رئێك ڤه‌ دهێن و هنده‌ ب ساڵان ڤه‌ د كێشن .
3- گڤاشتنێن كه‌س و كارێن كچێ (هه‌ڤژینێ) (ژبه‌ر گه‌له‌ك ئه‌گه‌ران بتایبه‌ت ده‌ما ئه‌ڤ ڤه‌مانا كچێ گه‌له‌ك گیرو دبیت دایك و باب و كه‌س و كار مایتێكرنه‌كا زێده‌ دكه‌ن كۆ زه‌ڵام هه‌ر چ زوویه‌ كچان وان ڤه‌كێشیت (سحب) بكه‌ت بۆ وه‌ڵاتێ ئه‌و لێ بتایبه‌ت هه‌كه‌ ره‌وشا وان یا ئابوورى نه‌خوش بیت و ئه‌ڤ كچه‌ (یان ئه‌ڤ كچه‌ ب زارۆ ڤه‌ بۆ ئه‌وان ببیته‌ بارگرانى) یان ژى وه‌كو ترس ژ گیروبونا هێشتا پتر و فه‌قه‌تیان و گوتگوتكێن خه‌لكى و نه‌حه‌زا وه‌كو ئه‌و دبێژن!
4- چاڤ لێ كرن : فاكته‌رێ چاڤ لێ كرنێ د هه‌ر كریاره‌ك و دیارده‌یه‌كا جڤاكى دا فاكته‌ره‌كێ سه‌ره‌كى یه‌ بۆ هزر كرن ل كریارێ، هه‌روه‌سا هاڤێتنا پێنگاڤێ و د ئه‌ڤى بیاڤى ژى دا ئه‌ڤ كچا شوو كرى، هه‌روه‌سا دایك و باب و كه‌س و كارێن وێ دێ بینن فلان زه‌لام یێ ژده‌رڤه‌ پشتى ده‌مه‌كى هه‌ڤژینا خوه‌ ( یان هه‌ڤژینا خوه‌ ب زارۆ ڤه‌) ڤه‌كێشا و ( لم الشمل ) چێبو , ل ڤێرێ ئێكسه‌ر ئه‌و پرس ل ده‌ڤ په‌یدا بۆ بۆچى هه‌ڤژینێ وێ ژى هۆسا زوو ئه‌و نه‌بر .. هه‌لبه‌ت گومان و بێ باوه‌رى ل ئه‌ڤێ خالێ ده‌ست پێ دكه‌ت بێى كو هزر بكه‌ت ره‌نگه‌ ره‌وشا (قانوونى, جڤاكى, ئابوورى …) یا هه‌ڤژینێ وێ ل گه‌ل هه‌ڤژینێ ئه‌ڤا دى جودایه‌، هه‌روه‌سا ره‌نگه‌ هه‌ر ئێك ل وه‌ڵاته‌كێ جودا بیت و هه‌لبه‌ت رێنما و قانوونێن خوه‌ یێن جودا هه‌نه‌،د ئه‌ڤى بیاڤێ وه‌رگرتنا مشه‌ختان دا هه‌روه‌سا ب ئێك گه‌هشتنا هه‌ڤژینان …

75

هه‌رێمه‌ك … و هه‌شتێ و سێ عه‌شیر !
ل گۆره‌ى هنده‌ك ڤه‌كولین و ئامارێن هاتینه‌ به‌لاڤ كرن ,ل سالا 1993ێ هه‌ژمارا عه‌شیره‌تێن هه‌رێما كوردستانێ 83 عه‌شیره‌تێن سه‌ره‌كى نه‌ و ئه‌ڤ عه‌شیره‌ته‌ ژى ژ 835 ئیجاخ و بابك و بنه‌مالان پێك دهێن !
هه‌لبه‌ت هه‌كه‌ ئه‌م ل سه‌ر كه‌توارێ جڤاكى یێ هه‌رێما كوردستانێ ل قوناغا به‌رى سه‌رهه‌لدانا 1991ێ راوه‌ستین دێ بۆ مه‌ دیار بیت كو ره‌نگه‌ ئه‌ڤ هژماره‌ هێشتا مه‌زنتر بیت,بتایبه‌ت هه‌كه‌ ئه‌م بزانین كو هه‌تا راده‌یه‌ك مه‌زن هه‌ر عه‌شیره‌ته‌ك ل سه‌ر دو جه‌مسه‌ران و دو بنه‌مالێن هه‌ڤڕك هاتیه‌ پارڤه‌ كرن .. هه‌لبه‌ت هه‌ڤركى ب پله‌ ئێك ل سه‌ر ده‌ستهه‌لاتێ !
ئه‌ڤى كه‌توارێ جڤاكى و ئه‌ڤى سیسته‌مێ كه‌ڤن و كلاسیك هه‌رچه‌نده‌ ژ روویێ سه‌رڤه‌ سه‌رڤه‌ هنده‌ك باشیێن خوه‌ ژى هه‌نه‌( وه‌ك پاراستنا كه‌لتور و فلكلورێ مللى … ) لێ د ناڤه‌رۆكدا به‌ربه‌ست و ئاسته‌نگه‌كا مه‌زنه‌ د رێیا جڤاكه‌كێ دا كو ل سه‌ر بنه‌مایێ قانووونونێ و دادپه‌روه‌ریا جڤاكى بهێته‌ ئاڤاكرن و د هه‌مان ده‌م دا ئاڵاڤه‌كێ ب ساناهى یه‌ بهێته‌ بكار ئینان ژ ئالیێ دوژمنان ڤه‌ بۆ ڤه‌مراندنا هه‌ر چرایه‌كێ گه‌ش كو هه‌وڵا به‌ڵاڤ كرنا روناهیێ بده‌ت ..!
بۆ نموونه‌ هه‌كه‌ ئه‌م به‌رپه‌رێن چه‌ند سه‌ده‌یێن ده‌رباز بویى ژ دیروكا سیاسى – جڤاكى یا كوردستانێ وه‌رگه‌رینین هه‌تا جه‌نگا جیهانى یا ئێكێ دێ بۆ مه‌ دیار بیت حه‌تا هه‌كه‌ جاره‌كێ چرایه‌كێ گه‌ش و مه‌شخه‌لا سه‌رهه‌لدانه‌كێ , یاخیبونه‌كێ ,شۆره‌شه‌كێ دناڤ چارچۆڤێ عه‌شیره‌ته‌كێ دا ژى هه‌لدا بیت ژى دێ بینى ل ئالیێ دى یێ به‌رامبه‌ر بابه‌لیسكه‌كا بهێز یا كۆما عه‌شیره‌تان) ئه‌و چرایه‌ دور پێچ كرینه‌ و ب هه‌مو هێز هه‌ولا كز كرن و ڤه‌مراندنا ئه‌ڤى چرایى داینه‌ و ناڤێن مینا (خان عه‌بدالێ به‌دلیسى,شه‌كر ئاغایێ گراڤى ,به‌درخان به‌گ و كورێن وى , حاجو ئاغایێ هه‌ڤێركى یێ دویێ , شێخ عه‌بدولسه‌لامێ بارزانى …) باشترین گرۆڤێن ئه‌ڤێ راستیێ نه‌..كو هێزا عه‌شیران ل به‌رى هێزا دوژمنى هه‌ولا ژناڤبرنا ئه‌وان دایه‌ !
و ژئالیێ تیورا جڤاكى ژى ڤه‌ مینا ( ئیبن خلدون ) دبێژت: سیسته‌مێ خێله‌كى و عه‌شیره‌تى ئه‌وى ده‌مى بهێز دكه‌ڤیت و گه‌شه‌ دكه‌ت ده‌مێ
ده‌ستهه‌لاتا ناوه‌ندى ( مه‌ركه‌ز ) لاواز دبیت , و به‌روڤاژ ده‌ما ده‌ستهه‌لات یا بهێز بیت ئه‌ڤ ده‌زگه‌هه‌ ئانكو (عه‌شیره‌ت) لاواز دبیت و رولێ وێ كێم دبیت.
ب مخابنى ڤه‌ كه‌توارێ بیست و پێنج سالێن ( حوكمرانى یا كوردى ) ل هه‌رێما كوردستانێ ده‌زگه‌هێ پتر مفادار ژ ئه‌ڤى سیسته‌مى ده‌زگه‌هێ عه‌شیره‌تێ بۆ .. نه‌ ئارامیا سیاسى ,هه‌ڤركى یا به‌رده‌وام,كه‌ش و هه‌وایێ شه‌ڕى و مایتێكرنا ده‌ره‌كى بازارێ عه‌شیره‌تێ گه‌رم كر و هه‌ر هێزه‌ك ( ل ناڤ ده‌ستهه‌لاتێ یان ژ ده‌رڤه‌ى ده‌ستهه‌ڵاتێ , چه‌پره‌و یان راست ره‌و , عیلمانى یان ئایینى …) هه‌ر ئێكى ده‌ستێ خوه‌ بۆ عه‌شیره‌تێ درێژ كر و ئه‌و لێهات و زیره‌كتره‌ یێ بشێت پتر جه‌مسه‌رێ ئه‌ڤێ عه‌شیرێ یان ئه‌وا دى رازى بكه‌ت .. و به‌ربژار كرن بۆ په‌رله‌مانى به‌رچاڤترین ڤه‌رێژا ئه‌ڤى كه‌توارى یه‌,دیسان ب پلا دویێ هه‌تا راده‌یه‌ك به‌رچاڤ پارڤه‌كرنا پوست و پله‌یێن ئیدارى ژى هه‌ر ل سه‌ر ئه‌ڤى بنه‌مایى ب كه‌سان هاتینه‌ دان، ئه‌ڤجا چ ل دام و ده‌زگه‌هان یان ئه‌نجومه‌نان ل سه‌ر ئاستێ (سه‌نته‌رێن پارێزگه‌هان, قه‌زایان ,شاره‌وانیا,هه‌تا راده‌یه‌كى زانكویان ژى …!) لێ ئه‌ڤێ جارێ ل سه‌ر بنه‌مایه‌كێ نزمتر ژ ئاستێ كه‌سێن جه‌مسه‌رێن عه‌شیرێ ئانكو ل سه‌ر ئاستێ كه‌سانێن گرێدایى (بابك و بنه‌مالێن دیار كرى …)!
ره‌وشه‌كا كاره‌سات و مه‌رگه‌ساته‌ كو ئه‌ڤرو جڤاكێ مه‌ تێرا ده‌رباز دبیت , ل سه‌ر ده‌رازینكا چه‌رخێ بیست و ئێكێ و شێوازێ چه‌رخێن كه‌ڤن په‌یره‌و بكه‌ن! هه‌تا ئه‌گه‌ر ڤه‌رێژ و ئاكامێن نه‌رینى یێن ئه‌ڤێ چه‌ندێ ل رۆژگارا مه‌ یا ئه‌ڤرۆ ژى دیار نه‌بن، لێ ل پاشه‌رۆژه‌ك نه‌ دوور دێ دیار بن، لێ ره‌نگه‌ ل ئه‌وى ده‌مى فایده‌ نه‌كه‌ت ..و بابه‌ت ئه‌و نینه‌ هه‌تا چ راده‌ ئه‌ڤ كه‌سێ هه‌ ( یێ ژ ئه‌ڤێ پێكهاتێ هاتى ده‌ست نیشان كرن بۆ ئه‌ڤى جهى یان ئه‌ڤى پله‌و پوسته‌ى) یێ خودان شیانه‌ یان نه‌، هه‌ژى ئه‌ڤى جهى یه‌ یان نه‌.. به‌لكو بابه‌ت سیسته‌م كرنا دام و ده‌زگه‌هایه‌ د ئه‌ڤى چارچوڤه‌ى دا و ل سه‌ر بنه‌مایێ ئه‌ڤێ دیتنێ و ئه‌و مه‌ترسیا ل دووڤ خوه‌ دئینیت ..ژبه‌ركو هه‌كه‌ ره‌وش ب ئه‌ڤى ره‌نگى بیت و هه‌لبژارتنا كه‌سان ژ بۆ پله‌و پوستان ل سه‌ر ئه‌ڤى بنه‌مایێ ( هێزا جڤاكى – ماددى ) بیت هه‌تا بیست سالێن دى ژى دناڤ سیسته‌مه‌ك ب ئه‌ڤى ره‌نگى ( نیمچه‌ داخستى ) ده‌رفه‌ت بۆ كۆرێن كه‌سێن هه‌ژار و ته‌خا گشتى نا ڤه‌بیت كۆ چ پله‌و پوستێن شایسته‌ وه‌رگرن ( كونیزیكى 90 % ) ژ پێكهاتا جڤاكى یه‌ ..
و ب ئه‌ڤى ره‌نگى ژ ئالیه‌كى ڤه‌ دو روویاتى و سالوسى یا به‌رچاڤ ( مه‌لاقى ) و كه‌رب و كینا نخافتى، هه‌روه‌سا بێ ئومێدى و هه‌ست ب نه‌ دادپه‌روه‌ریا جڤاكى دبنه‌ ژ دیارده‌ و سیمایێن به‌رچاڤێن جڤاكى ..كو هه‌ر هه‌مو ژى سیمایێن جڤاكه‌كێ نه‌ ساخله‌م نیشا دده‌ن!

69

بابه‌تێ سزادانا كابرایه‌كى ب 11 سالان زیندانى ژ ئالیێ دادگه‌هێ ڤه‌ ل قه‌زا كفرى سه‌ر ب ئیداره‌یا گه‌رمیان ب سه‌ده‌ما دزى یا چه‌ند قوتیكێنَ شیرێ زاۆیان و چه‌ند حه‌فازه‌یان ژ ئالیێ كه‌سه‌كێ هه‌ژار د ژیێ پێنجى سالیێ دا.. ئه‌ڤ بابه‌ته‌ بویه‌ مژارا گه‌رما چه‌ند كه‌نالێن راگه‌هاندنێ و سوشیال میدیایێ و مالپه‌رێن جڤاكى ل ئه‌ڤان چه‌ند رۆژێن ده‌رباز بووى , كو پتریا نڤیسین و كومێنتا ب چاڤه‌ك زۆلم و نه‌عه‌داله‌تى ل ئه‌ڤى سزایى د نێرن یێ كو ل سه‌ر ( تاوانبارى ) هاتیه‌ سه‌پاندن,و خودانێن ئه‌ڤان بۆچونان ژى كو به‌ره‌ڤانیێ ژ كه‌سێ هاتیه‌ گرتن دكه‌ن پشتا خوه‌ ب ئه‌ڤان خالان ڤه‌ د به‌ستن:
1.ئه‌ڤ جوره‌ سزایێ مه‌زن ( 11 سال زیندان ) ل گه‌ل ئه‌ڤێ كریارا هه‌تا راده‌یه‌كى به‌ر نه‌كه‌فتى و بچووك ( قوتیكێن شیرى و حه‌فازێن زارۆیان ) ناگونجیت .. ئانكو هه‌تا هه‌كه‌ دادوه‌ر یێ رژد با ژى ل سه‌ر سه‌پاندنا سزاى بلا سزایه‌كێ ئارمانج پێ ( ردع / هوشدارى ) با، چه‌ند هه‌یڤه‌ك نه‌ پتر.
2.ئه‌و ره‌وشا خراب و هه‌ژارى یا كو ئه‌و كابرایه‌ و خێزانا وى تێدا
د ژیان پێدڤى بو هاتبا ل به‌ر چاڤ وه‌رگرتن ( خوه‌دانێ كومه‌كا زارۆیان و ل گه‌لدا زارۆیێ پێدڤى شیرى + كرێدار + خودان نیڤ موچه‌ 300 هزار دینار ..كو ره‌نگه‌ هه‌ر تێرا ئیجارا خانى ناكه‌ت)!.
3.ئه‌ڤ قه‌یرانا نوكه‌ وه‌ڵاتێ مه‌ تێرا ده‌رباز دبیت كو ئێدى نه‌ ده‌لیڤا كارى وه‌ك جاران مایه‌ و نه‌ ژى بها و ره‌وشتێن جڤاكى وه‌كو خوه‌ ماینه‌ كو پشته‌ڤانى و هاریكاریا كه‌سێن هۆسا هه‌ژار و ده‌ست كورت بهێته‌ كرن ( هه‌تا ژ ئالیێ كه‌سێن خزم و ناسیار ژى)! ل ده‌مه‌كى كو پێدڤیێن خێزانێ هه‌ر وه‌كو خوه‌ ماینه‌ ,بتایبه‌ت هه‌كه‌ ئه‌ڤ خێزانه‌ خودان زارۆ بیت ..
4.ل وه‌ڵاته‌كێ وه‌كو یێ مه‌ كو ژ وه‌لاتێن پێشیێ دهێته‌ هژمارتن ب رێژا گه‌نده‌لیێ و ل به‌ر چاڤێ رۆژێ دزیێن مه‌زن دهێنه‌ كرن و دزیكه‌رێن مه‌زن ناهێنه‌ دادگه‌ه كرن ..بۆچى دادگه‌ه بتنێ بۆ ئه‌ڤان به‌له‌نگازا هه‌بیت , ژبه‌ركو ئه‌وان چ كه‌سێ خوه‌ نینه‌ ؟!
5.دیسا وه‌كو دهێته‌ گوتن كو ئه‌ڤى كابرایى نه‌ ژ بو مه‌ره‌ما خوه‌ زه‌نگین كرنێ و ب ده‌ستڤه‌ئینانا پاره‌ى ئه‌ڤ كریاره‌ ئه‌نجام دایه‌،به‌لكو (هه‌رچه‌نده‌ كریاره‌كا ڤارێ بویى یه‌ و ژ بۆ دابین كرنا پێدڤیا زاویێ خوه‌ یێ پێدڤى ب شیرى و حه‌فازا ئه‌ڤ كریاره‌ ئه‌نجام دایه‌.
6. هه‌تا ژ ئالیێ ووژدان و مرۆڤایه‌تى ژى ڤه‌ ,ئه‌رێ دروسته‌ ژن و كۆمه‌ك زارۆ بۆ ماوێ یازده‌ سالان ژ سه‌میانێ خوه‌ بهێنه‌ ڤه‌قه‌تاندن ژ ئه‌گه‌رێ كریاره‌كا ب ئه‌ڤى ره‌نگى .. ل ده‌مه‌كى كو ده‌ست كورت و هه‌ژارن و كه‌سه‌ك نینه‌ سه‌راگوهیا وان بكه‌ت ؟!
ل ڤێرێ هه‌لبه‌ت هنده‌ك بۆچونێن هه‌ڤدژ ژى هاتنه‌ به‌رچاڤ (هه‌رچه‌نده‌ كێم بون) لێ خودانێن ئه‌وان ( وه‌ك فریشته‌ ! ) خوه‌ ددا نیاسین و دگوتن ( دزى هه‌ر دزى یه‌ چ مه‌زن بیت یان بچووك ) , ( بلا ئه‌وى كابراى بۆ خوه‌ كاره‌ك كربا و ئه‌و پارێ پێدڤى بۆ كرینا شیرى دابین كربا )!
ژ ئالیێ جڤاكى ڤه‌ گه‌له‌ك زانا ب تێرو ته‌سه‌لى ل سه‌ر ئه‌ڤان جۆره‌ بابه‌تان راوه‌ستاینه‌ و پتریا جاران ئه‌ڤان كریارێن ڤارێبونێ ( تاوانێ ) ڤه‌دگه‌رینن بۆ ئه‌وێ ژینگه‌ها جڤاكى ,ئابورى, و سیاسى ..یا كو ئه‌ڤ كه‌سه‌ د ناڤدا دژیت هه‌تا راده‌یه‌كى زانایه‌كێ جڤاكى دبێژت هه‌ر جڤاكه‌ك هه‌ژى ئه‌وان تاوانبارایه‌ یێن كو دناڤدا ده‌ردكه‌ڤن ئانكو ( د خولقن)! ژبه‌ركو ل ده‌ما بێكارى و هه‌ژارى و واسته‌ و واسته‌كارى و به‌رتیل دان و دزیێن په‌رده‌پوش كرى ب عه‌بایێ قانوونێ بهێنه‌ كرن و نه‌بونا دادپه‌روه‌ریا جڤاكى ..هه‌لبه‌ت ڤه‌رێژا ئه‌ڤى سیسته‌مى دێ كه‌سێن هۆسا ژێ په‌یدا بن !
ڤیكتور هۆگو یێ فره‌نسى ( 1802 – 1885 ) نیڤشكێ رومانا وى لدور ( كه‌سێن به‌له‌نگاز ) ل سه‌ر مژاره‌كا ب ئه‌ڤى ره‌نگى یه‌ كو ل ده‌مێ نانه‌كێ ژ نانپێژیه‌كێ ددزیت داكو بۆ زارۆیێ برسى یێ برایێ خوه‌ بینیت ,ب ئه‌ڤێ سه‌ده‌مى دهێته‌ گرتن و ب بریارا ( دادگه‌هێ ) ب ناڤێ قانوونێ پێنج سالان دهێته‌ زیندان كرن …سڵاڤ لقانوونێ!

50

ئه‌ڤا ل سه‌رى نڤێسى مانشێتێ ل سه‌ر شاشه‌یا ئێك ژ كه‌نالێن مه‌ یێن ئاسمانى یێن بناڤ و ده‌نگ بوو، به‌رى چه‌ند رۆژه‌كا ل بنێ شاشێ هاتبوو نمایش كرن و ل ماوێ رۆژێ هه‌مویێ دهاته‌ خوار !
پسیار ئه‌وه‌ ئه‌رێ ئه‌ڤان كه‌نالان یێن كو ب پروفیشنال و خودان ناڤ و ده‌نگن و ب سه‌دان كارمه‌ند د بیاڤێن جۆرا و جۆر دا لێ كار دكه‌ن و بودجه‌یه‌كا زه‌به‌لاح لێ دهێته‌ مه‌زاختن … ما راوێژكاره‌ك جڤاكى نینه‌ ؟!
ژبه‌ركو هه‌ر كه‌سێ ئه‌ڤى نۆچه‌ى بخوینیت كو نڤێسیه‌ (ئه‌ڤ ساله‌ ل هه‌رێما كوردستانێ رێژا هه‌ڤژینیێ پتر بو ژ رێژا به‌ردانێ ) ئێكسه‌ر دێ هزر كه‌ت كو ل سالێن بورى یان ل هنده‌ك سالان ژ سالێن بورى رێژه‌یا به‌ردانێ پتر بو، و ئه‌ڤێ هزر كرنێ ژى چ راستى بۆ نینه‌ نه‌ك بتنێ ل سه‌ر ئاستێ هه‌رێما كوردستانێ، به‌لكو ل سه‌ر ئاستێ هه‌مو وه‌لاتێن رۆژهه‌لات ژى ب ده‌گمه‌ن بهێته‌ دیتن كو ل وه‌ڵاته‌كى هژمارا حاله‌تێن به‌ردانێ پتر بن ژ یێن هه‌ڤژینیێ!.
بو نموونه‌ وه‌ڵاته‌ك وه‌كو كوێتێ كو ل سه‌رێ رێزبه‌ندا وه‌ڵاتێن عه‌ره‌بى دهێت، ب هژمارا زێده‌یا به‌ردانێ دیساڤه‌ رێژه‌یا به‌ردانێ ( وه‌ك نموونه‌ د ماوێ ساله‌كێ دا ) هه‌مبه‌ر كرن ل گه‌ل ه‌ژمارا حاله‌تێن هه‌ڤژینیێ حاله‌تێن هه‌ڤژینیێ پترن ( هه‌ر چه‌نده‌ ب رێژه‌یه‌ك كێم ) .. و ده‌رباره‌ى ئیراقێ ل دووڤ ئامارێن 2015 ئیراق ل رێزبه‌ندا هه‌شتێ دهێت یا وه‌ڵاتێن عه‌ره‌بى ب رێژا زێده‌یا حاله‌تێن به‌ردانێ هه‌مبه‌ر كرن ل گه‌ل هژمارا حاله‌تێن هه‌ڤژینیێ كو نێزیكى هه‌ر پێنج حاله‌تێن گرێبه‌ستێن هه‌ڤژینیێ به‌رامبه‌ر حاله‌ته‌كێ به‌ردانێ یه‌ و ئه‌ڤ رێژه‌یه‌ ژى نێزیكى ئه‌وێ رێژێ یه‌ یاكو ل ئه‌ڤان سێ چار سالێن دووماهیێ ل هه‌رێما كوردستانێ دهێته‌ به‌رچاڤ ( وه‌ك نموونه‌ ل سالا 2015 به‌رامبه‌ر 40000 گرێبه‌ستێن هه‌ڤژینیێ نێزیكى 8000 حاله‌تێن به‌ردانێ هاتینه‌ تومار كرن ) ئانكو هه‌ر ئه‌ڤ هژماره‌یه‌ ژى دبێژیت: به‌رامبه‌ر هه‌ر پێنج حاله‌تێن هه‌ڤژینیێ ئێكا به‌ردانێ هاتیه‌ تومار كرن , و ئامارێن ساڵا 2016 هه‌ر ئه‌نجام نێزیكى ئه‌ڤێ رێژه‌یێ نه‌ ..لێ ب شێوه‌یه‌كى سال بۆ سالێ رێژه‌یا گرێبه‌ستێن هه‌ڤژینیێ كێم دبن و به‌روڤاژ حاله‌تێن به‌ردانێ زێده‌ دبن , هه‌لبه‌ت ئه‌ڤێ دیاردێ ژى هوكارێن خوه‌ هه‌نه‌ لێ ئه‌ڤه‌ بابه‌ته‌كێ دى یه‌ …
تشتێ مه‌ دڤێت دیار بكه‌ین رۆلێ كاریگه‌ر یێ راگه‌هاندنێ یه‌ د به‌رچاڤ كرنا هنده‌ك بابه‌تێن جڤاكى یێن هۆسا هه‌ستیار و گرێدایى پتریا ته‌خ و
تویژێن جڤاكى نه‌خاسمه‌ بلندى یان نزمى یا هژمارێ گرێدایى خێزانێ یه‌ چ ژئالیێ خوه‌ یێ ئه‌رێنى ( پێكئینانا خێزانێ ) یان نه‌رێنى ( هه‌لوه‌شیانا خێزانێ) و كاریگه‌ریا وێ ل سه‌ر هه‌ردو هه‌ڤژینان و ئه‌ندامێن پێڤه‌ گرێدایى ..
له‌ورا پێدڤى بۆ دارشتنا هه‌ر بابه‌ته‌كى ( بتایبه‌ت وه‌كو مانشێتێ سه‌ره‌كى) دووڤچون ل راستیا بابه‌تى بهێته‌ كرن و پشت به‌ستن ب ئامار و داتایێن فه‌رمى و ژێده‌رێن باوه‌ر پێ كرى.

116

ئه‌ڤه‌ هه‌یامه‌كه‌ ( بتایبه‌ت پشتى به‌ربه‌لاڤبونا هه‌والێ گیان ژده‌ستانا پتر ژكه‌سه‌كى ل نه‌خوشخانه‌یێن مه‌,كو كه‌س وكارێن ئه‌وان دبێژن چاره‌سه‌ریا دروست بۆ نه‌هاتبو كرن)ئه‌ڤان رودانا وچه‌ندین رودانێن هاوشێوه‌ كارتێكرنا خۆ یانه‌رێنى دناڤ خه‌لكێ مه‌دا كریه‌ هه‌تا راده‌یه‌كى ده‌ما سوحبه‌ت دهێته‌ سه‌ر بابه‌تێ نه‌خوشیه‌كا جه‌سته‌ى ,كه‌سان هه‌نه‌ دبێژن هه‌تا مرۆڤ مه‌جبور مه‌جبور نه‌بیت بلا نه‌چیته‌ نه‌خۆشخانێ وبكه‌ڤیته‌ ده‌ستێ دختورا !
هه‌مو زانست لسه‌ره‌كى و زانستا پزیشكى لسه‌ره‌كى ژبه‌ركو ئێكه‌م زانسته‌ سه‌ره‌ده‌ریا راسته‌وخو دگه‌ل مروڤى و گیانێ مروڤى دكه‌ت , له‌ورا هه‌ر ژكه‌ڤندا ئه‌ڤ زانسته‌ ب پیشه‌نگ و تاجا زانستا هاتیه‌ هه‌ژمارتن و كه‌سێ نوژدار ژى ل دوڤ ئه‌ڤێ چه‌ندێ كه‌سایه‌تیه‌كا شایسته‌ و پێگه‌هه‌كێ جڤاكى یێ مه‌زن و به‌رچاڤ دناڤ جڤاكى دا هه‌بو وهه‌تا روژگارێ مه‌یێ ئه‌ڤروژى ناڤێ چه‌ندین حه‌كیم و نوژداران د بیردانكا مه‌یا جڤاكیدا ماینه‌ پاراستى سه‌ره‌رایى بورینا ده‌هان و سه‌دان ساڵان ..
لێ ئه‌ڤا ئه‌ڤروكه‌ ل كه‌توارێ هه‌رێما مه‌ یا كوردستانێ دا دبیاڤى ساخله‌میێ و خزمه‌تگوزاریێن پێشكێشى هاولاتیان دهێنه‌ كرن ,بتایبه‌ت ل ده‌ڤه‌را مه‌ یا به‌هدینان دبینینین دێ بومه‌ دیار بیت كو هه‌تا راده‌یه‌ك مه‌زن خه‌لكێ مه‌یێ مافداره‌ گله‌و گازنده‌یان بكه‌ت وهه‌روه‌سا یێ دو دل ژبو چاره‌سه‌ریێ قه‌ستا هنده‌ك ناڤه‌ندێن ساخله‌میێ بكه‌ت .. و ئۆبالا ئه‌ڤێ چه‌ندێ ژى نه‌بتنێ ئێك ئالى یه‌ , به‌لكو پتر ژئالیه‌كى بخۆڤه‌دگریت :
– حكومه‌ت : سه‌ره‌رایى پێشكه‌فتنا ته‌كنه‌لوژى و رێك و ئالاڤێن َكونترول كرنێ ,هێشتا ب رێكێن جۆراو جۆر ده‌رمان دهێنه‌ هاورده‌( أستیراد ) كرن و گه‌له‌ك ژئه‌ڤان كه‌سانێن ب ئه‌ڤى كارى رادبن بازرگانێن بتنێ چاڤ ل قازانجینه‌ و تشته‌كى ژئه‌لف بایا ساخله‌میێ نزانن ..وه‌ك نموونه‌ وهه‌روه‌كو ل ده‌زگایێن مه‌یێن راگه‌هاندنێ دا هاتیه‌ به‌ڵاڤ كرن بتنێ دماوێ ساله‌كێ دا ژئه‌ڤان سالێن بورى چه‌ند سه‌د ته‌نێن ده‌رمانێن ئێكسپایر ل خاله‌كا سنورێ هاتینه‌ ده‌ست بسه‌ردا گرتن و ژناڤ برن ,پسیار ئه‌رێ ئه‌وێن ده‌رباز بوین ونه‌هاتین كه‌شف كرن چه‌ندین ته‌ن بون دماوێن بورى دا ؟!
– وه‌كو كه‌توارێ ده‌ڤه‌را به‌هدینا هه‌مبه‌ر كرن دگه‌ل هه‌رسێ پارێزگه‌هێن دى یێن كوردستانێ كێمترین رێژا نوژداران ل ئه‌ڤێ پارێزگه‌هێ هه‌نه‌ , كو ئه‌ڤه‌ژى دبیته‌ فاكته‌ره‌كێ دى یێَ ڤبه‌رنه‌كه‌تنا خزمه‌تێن ساخله‌مى یێن پێتڤى بۆ هاولاتیان ورێژه‌یه‌كا زورا نه‌خوشان به‌رامبه‌ر هه‌ژماره‌كا كێم یا نوژداران بتایبه‌ت ل نه‌خوشخانان و سه‌نته‌رێن ساخله‌میان ب ره‌نگه‌ك
زه‌ڵال ئه‌ڤ دیمه‌نى كاره‌ساتى دهێته‌ به‌رچاڤ َ, وبئه‌ڤى شێوه‌ى ژى خزمه‌ت وه‌كو پێتڤى بۆ نه‌خۆشى ناهێته‌ پێشكێش كرن ؛ ده‌ه نه‌خۆش ل هنداڤ سه‌رێ نوژداره‌كى ..!
– ده‌رچویێن نوى و كێم ئه‌زموونى : دهه‌ر بیاڤه‌كێ زانستى دا ( نه‌خاسم یێ نوژداریێ ) پێتڤى یه‌ ئه‌ڤ كه‌سێن ل كولیژێن نوژدارى ده‌ردكه‌ڤن بكه‌ڤن دبن راهێنانه‌كا چڕ و بهێز وهه‌ر وه‌سا خۆلێن تایبه‌ت ل نافخۆ و ژده‌رڤه‌ى وه‌ڵاتى كو ببیت شه‌نگسته‌یه‌ك بۆ ئه‌نجامدانا كارێ خۆ یێ نوژداریێ ب هه‌مى ئه‌مانه‌ت و بپشت راستى وهه‌ر وه‌سا پشته‌ڤانیه‌كا ماددى یا باش بۆ وان بهێته‌ كرن .. دئه‌ڤى بیاڤى دا ئه‌م دشێن نموونه‌یه‌كێ به‌رچاڤ بكه‌ین بو ئه‌و كێم و كاسیا دئه‌ڤى بیاڤى دا هه‌ى : ژبه‌رى دو هه‌یڤان بو سنێله‌ك توشى نه‌خوشیا (صوركا)دبیت وكه‌س وكارێن وى ژى دئینین نه‌خوشخانێ وژئالیێ چه‌ند نوژدارێن گه‌نج ڤه‌ ده‌رزیكه‌ك بۆ دهێته‌ دانان و كه‌س و كارێن وى ژى سنیله‌ى ڤه‌دگه‌رینن مال , هه‌ر رۆژا پاشتر پێ وى ئه‌وێ ده‌رزى لێداى ئێڤتى ( وه‌رمى )و دوجاران هندى قه‌بارێ خۆ یێ سروشتى لێ هات .. وهه‌تا نوكه‌ یێ عیلاجا بو دكرن وهێشتا پێ وى یێ ب وه‌رمه‌ ..دوماهى جار دختوره‌كى ل كلینیكا تایبه‌ت گوته‌ كه‌س وكاران دڤێت بۆ ماوێ پێنج سالا ئه‌ڤان ده‌رمانان بوى بكرن و بكاربینت هه‌تا كو پێ وى چاك ببیت و ڤه‌گه‌رت ره‌وشا خۆ به‌رێ. .. وئه‌گه‌ر ژى یان ده‌رزى بدروستى نه‌هاتبو لێدان یان یا ئێكسپایر بو هه‌ر وه‌كو ژ بابێ سنێله‌ى را هاتیه‌ گوتن ..ئه‌وى ژى گوت هه‌ر چه‌وا بیت ئه‌و گه‌نجێن نوژدار ژى هه‌كه‌ر شاشیه‌ك ژى كربن هه‌ر وه‌كو كورێن مه‌نه‌ ومه‌نه‌ڤیا چ سكاڵا تومار بكه‌ین ,هه‌ر چه‌نده‌ مه‌زاختنێن زۆر بۆ كرینا ده‌رمانان دڤێن وبارێ وان یێ ئابورى ژى زۆر لاوازه‌ ..
ئانكو لڤێرێ پێتڤى یه‌ راوه‌ستانه‌كا خه‌مخورانه‌ و (جدى) ژئالیێ حكومه‌تێ ولایه‌نێن په‌یوه‌ندیدارڤه‌ لسه‌ر ئه‌ڤى بابه‌تى هه‌بت چونكى گرێداى گیانێ مروڤى یه‌ , وهۆسا هاولاتیێ نه‌خۆش ژى دێ پتر ب پشت راستى قه‌ستا نه‌خوشخانێ و سه‌نته‌رێ چاره‌سه‌ریێ كه‌ت !

86

ب ده‌ستورا خوینده‌ڤانێن هێژا ,ئه‌ڤێ جارێ مه‌ڤیا ستایلێ گوشه‌یا خۆ یا جڤاكى بگهۆرین .. وه‌ك ناڤه‌رۆك هه‌مان مژارێن جڤاكى بن ..لێ ب شێوێ هه‌لبه‌ستێ ( پوسته‌رێن كورت ) كو چه‌ند بابه‌تێن نه‌وه‌كهه‌ڤیێ و بێ دادى یا جڤاكى بخۆڤه‌ دگرن ..بتایبه‌ت دوهى و ئه‌ڤرو چالاكیا ( دیدارا نه‌وروز یا هه‌لبه‌ستێ یاسیێ ) ل هۆلا ئێكه‌تیا نڤیسه‌ران دهوك و هه‌ردو قه‌زایێن زاخو و شێخان دهێته‌ ساز كرن ..
1 ( لشه‌ڤێن جه‌ژنا )
ل شه‌ڤێن جه‌ژنا
شه‌ش شه‌ش خدام
فیستانێ به‌ژنا
خاتوینه‌كێ ددورین ..
و لشه‌ڤێن جه‌ژنا
زارۆكێن هه‌ژارا دخه‌ودا
بۆ جوت پێلاڤه‌كێ دگرین !
2 (سێ ژن )
سێ ژن
ل دوكانا زێرینگرى روینشتن ؛
– یائێكێ ماموستایه‌كا قه‌یره‌
هه‌مى مۆچێ خوه‌
دا ب گوستیل و بازن
– یادووێ خانمه‌ك كریستیان
خاچه‌ك دا چێكرن
– و یاسیێ هه‌ڤژینا
هه‌ژاره‌كێ تاخا من
جوت گوهاریتَ خو
بو كریا خانى فروتن !
3 ( سێ گۆشا مرنێ )
سیاسه‌تمه‌دارێ فێلباز
ئه‌كته‌رێ بانگـــخواز
و ده‌نگده‌رێ قـــــاز
ئه‌نجام : باژێره‌كێ
بێ كه‌هره‌ب و گاز !

94

ماوێ چار سالایه‌ دگه‌ل چه‌ندین هه‌ڤالێن دى دگه‌ل رێكخراوا skl یاسویدى ب ئه‌نجامدانا هنده‌ك كارو خزمه‌تێن جڤاكى هاتینه‌ راسپاردن لسه‌ر ئاستێ پارێزگه‌ها دهوكێ .. وئه‌ركێ ب مه‌ هاتیه‌ راسپاردن ئالیێ چاڤدێرى وهشیاریا جڤاكى بو ژبۆ ته‌خا خودان پێتڤى یێن تایبه‌ت وكه‌س وكارێن وان و هه‌روه‌سا زێده‌تر لئێك گه‌هشتن وهه‌ماهه‌نگى ل ناڤبه‌را كه‌رتێ چاڤدێریا جڤاكى و دام وده‌زگه‌هێن فه‌رمى وجڤاكى بشێوه‌یه‌ك گشتى, و ئامرازێن بجه ئینانا ئه‌ڤى پرۆژه‌ى مه‌ چه‌ندین شێوازێن جوراو جور هه‌لبژارتن وه‌ك ( پروگرامێن ته‌له‌ڤزیونى , كۆر و سمینار بۆ ته‌خێن جودا جودا یێن جڤاكى ,چاپ كرنا نامیلكه‌یان ل دور هنده‌ك نه‌خوشیان بتایبه‌ت یێن زارۆكان وه‌ك ئیفلیجا مێشكى ,مه‌نغولى , هیموفیلیا ,ئوتیزم …و نابینان, نابیستان و په‌ككه‌فتیێن جه‌سته‌یى دگه‌ل ده‌لیلێ رێڤه‌به‌ریا گشتى ودیار كرنا ئه‌و رێڤه‌به‌رى و په‌یمانگه‌ه و سه‌نته‌رێن بسه‌رڤه‌ …
دئه‌ڤى ماوێ چار سالێن بورى دا ب هاریكاریا هه‌ڤالان مه‌ مه‌شیا نێزیكى 72 حه‌فتێ و دو چالاكیان ئه‌نجام بده‌ین وه‌ك ( دو خولێن جڤاكى لسه‌ر ئاستێ هه‌ر شه‌ش قه‌زایان كو 35 سمینار بۆ كه‌سێن خودان پێتڤیێن تایبه‌ت وكه‌س وكارێن وان وته‌خێن دى یێن جڤاكى بخوڤه‌ دگرتن وهه‌روه‌سا ئاماده‌كرنا 24 خه‌له‌كێن ته‌له‌فزیونى لهه‌ردو كه‌نالێن ( ده‌لال ) یێ لوكال ل زاخو و( وار) یى ئاسمانى ل دهوك وچاپ كرنا 9په‌رتوكان)
ماوێ پرۆژه‌ى یێ چار سالا ب دوماهى هات .. ول ده‌ستپێكا ئه‌ڤێ هه‌یڤێ ئه‌م هاتین ئاگادار كرن كو ل هه‌ولێرێ ئاماده‌بین بو رێ دو وورك شوپ و ره‌سمێن دوماهى هاتنا ئه‌ڤى پرۆژێ چار سالى كو ل هه‌ردو روژێن 12و 13ى ئه‌ڤێ مه‌هێ ل هه‌ولێر ودهوك هاتنه‌ به‌ستن وتێدا ب ده‌هان كه‌سێن دكه‌رتێ جڤاكى دا كاردكه‌ن ژ دهوك هه‌ولێر و سلێمانیێ و هه‌روه‌سا ژ به‌غدا و پارێزگه‌ها دیوانیه‌ (كو ل هه‌مان ده‌م پرۆژێ چارسالى ل ئه‌وێ پارێزگه‌هێ ژى دهاته‌ جێ به‌جێ كرن ) ئاماده‌بون.و ل هه‌ردو رۆژا لسه‌ر ئه‌و كار و چالاكیێن دئه‌ڤى ماوه‌ى دا هاتینه‌ ئه‌نجام
دان گه‌نگه‌شه‌ هاتنه‌ كرن و هزرێن نوى بۆ پرۆژێ چار سالێن داهاتى كو به‌رفره‌هتر خزمه‌تا ته‌خێن جڤاكى بكه‌ت ..
وده‌مێ برگا هه‌لسه‌نگاندنا كارو چالاكیێن ئه‌ڤان چار سالێن ده‌رباز بوى هاتى شاره‌زایێ پلان دانانێ یێ رێكخراوێ مستر ( غونار ئه‌ندرسون ) هات ئاخفتنێ و لسه‌ر ئه‌وان چالاكیێن ل دام و ده‌زگه‌هێن چاڤدێریا جڤاكى ل پارێزگه‌ها دهوكێ هاتین ئه‌نجام دان ئاخفتنه‌ك ئاراسته‌ى ئاماده‌بویا كر ( كو پتریا وان رێڤه‌به‌ر و كارمه‌ندێن سازیێن جڤاكى بون ) بۆ من هه‌ر وه‌كو ( كه‌هره‌ب من بگرت !) هه‌سته‌كا سه‌یر ل ده‌ف من په‌یدا كر ده‌ما گوتى : دماوێ ئه‌ڤان چار سالان دا كه‌سه‌كى دناڤ ئه‌ڤى پرۆژه‌ى دا كارو خزمه‌ته‌ك هه‌ژى كریه‌ ئه‌م دبێژنێ قاره‌مان ( ناڤێ نڤیسه‌رێ ئه‌ڤێ گوشا جڤاكى ئینا) و چه‌ندین جاران په‌یڤا قاره‌مان(بگل)ژئالیێ وه‌رگێر ماموستا سه‌عید زه‌نگه‌نه‌ڤه‌ هاته‌ دوباره‌ كرن دگه‌ل ده‌ست قوتانا ئاماده‌بویان .. و بهه‌مان شێوه‌ و بهه‌مان په‌سن ل رۆژا پاشتر ل وورك شوپا ل دهوكێ و ئاماده‌بویێن رێڤه‌به‌ر و كارمه‌ندێن هه‌مو رێڤه‌به‌رى وسه‌نته‌ر و
په‌یمانگه‌هێن سه‌ر ب رێڤه‌به‌ریا گشتى یا چاڤدێرى و جڤاكى یا پارێزگه‌ها دهوكێ و چه‌ند نوینه‌رێن دام و ده‌زگه‌هێن دى هه‌ر په‌یڤا ( قاره‌مان ) ژئالیێ ماموستایێن رێكخراوا سوێدى بۆ نڤیسه‌رێ ئه‌ڤێ گۆشا جڤاكى هاته‌ ئاراسته‌ كرن كو دئه‌ڤى ماوه‌ى دا كارو چالاكیێن هه‌ژى ئه‌نجام داینه‌ دگه‌ل دانا دیاریه‌كا سمبولى وده‌ست قوتانا به‌شداربویان ..
د ده‌لیڤه‌یه‌كا هۆسا دا هه‌مو هه‌ستێن من تێكه‌لى ئێك بون بتنێ من شیا بێژم سوپاسیا هه‌وه‌ دكه‌م بۆ ئه‌ڤێ دیتن وهه‌لسه‌نگاندنا هه‌وه‌ بۆ كارێ مه‌ كرى و ئه‌ڤه‌ ئه‌ركه‌ لسه‌ر ملێن مه‌ بتایبه‌ت به‌رامبه‌ر خه‌لكێ مه‌یێ هه‌ژار و خودان پێتڤیێت تایبه‌ت, دیسا هه‌كه‌ر مه‌ خزمه‌ته‌ك ژى كربیت به‌رهه‌مێ هاریكارى و هه‌ماهه‌نگیێ یه‌ دگه‌ل كۆمه‌كا هه‌ڤالێن دى ( وئێك ب ئێك ناڤێن ئه‌وان مه‌گوتن ) وئێك ژێ هه‌ڤالێ مه‌یێ ل ئه‌ڤێ رۆژنامێ كاك ( حه‌مزه‌ ره‌زیكى ) یه‌ كو ب ئه‌ركێ ڤه‌گوهاستنا هه‌ر هه‌شت په‌رتوكێن خودان پێتڤیێن تایبه‌ت رابویه‌ ژ زمانێ عه‌ره‌بى بۆ كوردى وهه‌ر وه‌سا ته‌له‌فزیونا ( وار) و ( ده‌لال ) و هه‌ر كه‌س و ئالیه‌كێ هاریكار دئه‌ڤى بوارى دا ..
+ خالا سه‌ره‌كى دئه‌ڤى بیاڤى دا من دڤێت بێژم ( كو مه‌ره‌ما سه‌ره‌كى یا نڤیسینا ئه‌ڤى بابه‌تى یه‌) ئه‌وه‌ خوزى ل ئه‌ڤى وه‌ڵاتێ مه‌ هه‌كه‌ر رێزگرتن ژى بۆ كه‌سێن خزمه‌تكار و ماندى بوى نه‌هێته‌ كرن ژى بلا دژایه‌تیا ئه‌وان ژى نه‌هێته‌ كرن و ئاسته‌نگ و پیلان ژى بۆ نه‌هێنه‌ دارشتن !
و سوپاس بۆ رێكخراوا سوێدى كو ب دوراتیا هه‌زاران كیلو مه‌تران وێنه‌یه‌ك بچوك ل كوژى یه‌كێ وه‌ڵاتێ مه‌ تومار كرن !

website security