باشترین به‌یاننامه و هه‌ڵویستێ دیرۆكى یێ په‌كه‌كێ ئه‌و بوو ده‌مێ ئۆجه‌لان سه‌رۆكێ زیندانكری یێ په‌كه‌كێ ل نه‌ورۆزا سالا 2013ێ، پشتگیریا خوه ژ بۆ پرۆسا ئاشتیێ ل توركیا ڕاگه‌هاندى، غاندى یێ هندى فه‌لسه‌فه‌ك هه‌بوو كو ب (ساتیاگراها) واته (به‌رگریا بێ توندوتیژی) دهاته نیاسین، شیا ب وێ فه‌لسه‌فێ سه‌رنجا جیهانێ ڕاكێشیت و هندیان ل سه‌ر داگیركاریا به‌ریتانیا مه‌زن زاڵ بكه‌ت.
ل توركیا په‌رله‌مان و سیسته‌مه‌ك یێ هه‌ی كو ب هه‌لبژاردنه‌كا دیموكراسى لایه‌ن و حزبێن سیاسى دشێن بگه‌هنه گوپیتكا ده‌سه‌لاتێ، ئه‌ڤ چه‌نده شانسه‌كێ مه‌زنه ل به‌ر كوردێن باكور داكو وان پێدڤى ب چه‌كى نه‌بیت ب تایبه‌تی د ده‌مه‌كی دا كو وانا حزبێن فه‌رمى یێن سیاسى ژی یێن هه‌ین، ئه‌ڤ ده‌لیڤه بۆ كوردێن پارچێن دی نه‌بوون و نینن، ژ به‌ركو داگیركه‌رێن پارچێن دی خوه‌دى چ سیسته‌مێن هه‌لبژاردنان و دیموكراسیه‌تێ نه‌بوون.
ئه‌گه‌ر ب ته‌خمینى پیڤه‌ره‌كێ دانین ئه‌و به‌رهه‌مێن بۆ كوردێن باكور د مه‌هه‌كا ئاشتیێ دا دگه‌ل حكوومه‌تا توركیا بده‌ستڤه هاتى د هه‌مى دیرۆكا كوردان دا ب چه‌كى و شه‌ڕى بده‌ستڤه نه‌هاتبوون. د وان چه‌ند سالان دا كو پرۆسا ئاشتیێ ب ڕه‌نگه‌كێ ئه‌رێنى دوماند و د هه‌ر كێشه‌یه‌كا ته‌كنیكی دا ژى په‌كه‌كێ ب سه‌ركردایه‌تیا گه‌فێن شه‌ڕى ل دژى توركیایێ دكرن و دگۆت (ئه‌مێ توركیا بكه‌ینه خوین ئه‌گه‌ر ئه‌ڤ داخوازا مه ب جه نه‌ئینیت!).
د هه‌لبژاردنێن ده‌سپێكێ یێن توركیا دا ل سالا 2015ێ هه‌ده‌پێ كو سیاسه‌تا وێ د ژێر كونترۆلا قه‌ندیلی دایه شیا بۆ جارا ئێكێ د دیرۆكێ دا مینا حزبه‌كا كوردى ڕێژه‌یه‌كا به‌رچاڤ یا ده‌نگان بده‌ستڤه بینیت، گه‌له‌ك ده‌نگده‌رێن وێ ب مه‌به‌ستا بهێزكرنا بناغه‌یێ پڕۆسا ئاشتێى هه‌ده‌په هه‌لبژارد ژبه‌ركو وانا وه‌سا هزر دكر كو هه‌ده‌په پتر پێتڤیا ب پڕۆسا ئاشتیێ هه‌ی، ژبه‌ركو كورد مفادارێن ئێكێ یێن پڕۆسا ئاشتیێ نه، لێ جهێ حه‌یبه‌تیێ بوو كو نه‌ك ب تنێ هه‌ده‌پێ پشكدارى د حكوومه‌تێ دا نه‌كر، به‌لكى به‌رده‌وام په‌كه‌كێ دژایه‌تییا خوه بۆ ئاكپارتى دووپات دكر!، د ده‌مه‌كی دا بۆ هه‌می لایه‌نه‌كى و جیهانێ یا خویا بوو كو د سه‌ر هه‌مى كێماسیان دا ژى ئاكپارتى پێنگاڤێن مه‌زن و دیرۆكى ژبۆ پێشڤه‌برنا دۆزا كوردى هاڤێتن.
بۆ جارا ئێكێ د دیرۆكێ دا هه‌ده‌پێ 78 كورسى بده‌ستڤه ئینان، ئه‌ردۆغان وه‌كو سه‌ركه‌فتیێ ئێكێ یێ هه‌لبژاردنان داخواز ژ هه‌ده‌پێ كر كو حكوومه‌تێ دگه‌ل دا پێك بئینن، لێ هه‌ده‌پێ ل ژێر فشارا قه‌ندیلی دا نه‌په‌ژراند، ئه‌ردۆغان دووچارى ئه‌زمه‌كێ ببوو كو كلیلا وێ دده‌ستێن هه‌ده‌پێ دا بوو، د وێ ناڤبه‌رێ دا ل ته‌موزا 2015ێ ل باژێركێ باكورێ كوردستانێ “سروج”ێ د په‌قینه‌كا تیرۆرستی دا نێزیكى 31 ولاتیێن كورد هاتنه كوشتن، پشتى وێ په‌قینێ په‌كه‌كێ بێ هیچ به‌ڵگه‌یه‌كا فه‌رمى توركیا تاوانبار كر ب ئه‌نجامدانا په‌قینێ، و ڕابوو دو پولیسێن سڤیلێن توركیا د خه‌وێ دا كوشتن وه‌كو سزادانا توركیا و تولڤه‌كرنا سروجێ!. ڤێ پێنگاڤا شاشا په‌كه‌كێ دیرۆك بۆ پاشڤه گوهارته‌ڤه و ل جهێ پڕۆسا ئاشتیێ، ده‌نگێ فیشه‌ك و تۆپ و فڕۆكه و قێریێن كوردان جه گرته‌ڤه، زێده‌تر ژ ملیۆن كورد ئاواره بوون و خانیێن وانا كاڤل بوون، پرۆسا ئاشتیێ ڕاوه‌ستیا، په‌كه‌كه كو هێدى هێدى ل سه‌ر ئاستێ جیهانێ ب ئه‌رێنى دهاته نیاسین، دووباره وه‌كو حزبه‌كا توندوتیژ و تێكده‌ر هاته پێش و به‌حس كرن ل ده‌رخستنا په‌كه‌كێ د لیستا تیرۆرێ دا نه‌ما، هه‌ده‌پێ ل هه‌لبژاردنێن جارا دویێ یێن مه‌ها 11یا سالا 2015ێ ده‌نگێن خوه ب ڕه‌نگه‌كى به‌رچاڤ كێم كرن و حزبا ئه‌ردۆغان شیا ب پڕانیا ده‌نگان حكوومه‌تێ پێك بئینیت. واته سیاسه‌تا په‌كه‌كێ شكه‌ستن خوار كو ل سه‌ر ئاستێ جیهانێ وێنه‌یه‌كێ نه‌رێنى ل سه‌رخوه داناڤه، سه‌ربازى شكه‌ستن خوار و نه‌شیا ل گونده‌كێ باكور ژى ده‌ستهه‌لاتێ بگریت، بۆ ئه‌گه‌رێ كاڤكرنا پڕانیا باژێر و باژێركێن باكور، بۆ ئه‌گه‌رێ قوربانى بوونا هزاران خه‌لكێ كوردستانێ كو پڕانیا وان سڤیلن، ب سه‌دان هزار كورد ئاواره بوون، پڕۆسا ئاشتیێ نه‌هێلا و نها داخوازا ئاشتیێ دكه‌ت!!، پێدڤیه ل په‌كه‌كێ بپرسین گه‌لو توله‌یا قوربانى یێن باژێركێ سروجێ ڤه‌كر ژبه‌ر هندێ شه‌ڕ به‌سه؟!، ئانكو به‌رهه‌مێ شه‌ڕى وان چێكرى ژبلى قوربانیدانه‌كا مه‌زن و پاشڤه‌چوونا دۆزا كوردی بوو چه‌ند ده‌هه‌كا، چیا دی بوو؟!. پێدڤییه چه‌ك بۆ پێشخستنا سیاسه‌تێ بیت، نه‌ك سیاسه‌ت و پێشڤه‌چوون ب چه‌كى ب هه‌ڕفن و تێك بشكێن وه‌كو یا په‌كه‌كه دكه‌ت!.
نووترين نووچه
- نێچیرڤان بارزانی: پشتەڤانیێ ل سەرەدانا سۆدانی بۆ ئەمریكا دكەین
- هەبوون و پاراستنا قەوارەیێ سیاسییێ هەرێما كوردستانێ یێ گرێدایە ب سیاسەتا دەرڤە یا ئەمریكا ڤە
- مە داخواز ژ كۆنگرێسێ كریە فشارێ ل بەغدا بكەت بۆ دەستپێكرنا هنارتنا پەترۆلا هەرێمێ
- هەكە پارێزگار كورد نەبیت مەترسی ل سەر كەركووكێ یا هەی
- ئەردۆغان یێ نەچارە هندەک گوهۆڕینێن مەزن بکەت
- سەرۆك بارزانی: هێشتا دەنگ و رەنگێ شۆڤینی بۆ دژایەتیكرنا كوردان د ناڤ دەولەتا ئیراقێدا دهێتە دیتن
- نێچیرڤان بارزانی: دخوازین حوكمەتا ئیراقێ ئەركێ خوە بەرامبەر قوربانیێن ئەنفالێ بجهبینیت
- مەسرور بارزانی: ئەنفال تاوانەكا كێم وێنەیە و ناهێتە ژبیركرن
- بسپۆرەكێ قانوونا نێڤدەولەتی: ئیراقێ ب بەرنامەیەكێ دارێشتی هەوا ئەنفالێ بجهئینا
- پەیڤدارێ سەرۆكاتییا هەرێمێ: پرسا مووچەی پێنگاڤەكا گرنگ چوویە پێش
كامی كمال
په‌ژراندنا بارزانى ب تنێ خالا هه‌ڤگرتنێ یه
ئێك ژ ئه‌و خالێن به‌رده‌وام حزبێن سیاسى خه‌لكێ وه‌لاتى پێ دخاپینن و ژ ڕێ دبه‌ن، تاوانباركرنا هه‌ڤدویه ل سه‌ر ئێك نه‌گرتنا ناڤمالا كوردى، ئه‌ڤ درێژكرنا په‌نجه‌یا تۆمه‌تێ ژ بال حزبێن كوردی ڤه بۆ هه‌ڤدو، پرسیارێن ئالۆز د ناڤ مه‌ژیێ تاكێن وه‌لاتی دا ب گشتى ئافراندینه، ڤه‌شارتنا ڕاستیان و واقعێ ئه‌ڤرۆ یێ كوردستانێ ل ژێر سیهوانا قانوونێن لاستیكى و دیموكراسیه‌تێ ڤه هاریكاریه‌كا مه‌زنه بۆ هنده‌ك حزبێن كوردستانێ كو جه‌وهه‌رێ كێشه‌یێن سیاسى یێن هه‌رێمى ل به‌ر چاڤێن خه‌لكێ كوردستانێ به‌رزه بكه‌ن، پڕانیا حزبێن كوردستانێ د درووشم و بانگه‌وازێن خوه دا داخوازا هه‌ڤگرتنێ دكه‌ن، لێ دبه‌رهه‌ڤ نینن دان ب ڕاستیان بئینن و به‌رژه‌وه‌ندیێن وانێن به‌رته‌نگێن حزبى و كه‌ساتى ڕێكێ ناده‌ن ئێكڕێزیا گه‌لێ كورد چێ بكه‌ن.
ژ بۆ ئێكگرتنێ پێدڤیه ته‌ڤ لایه‌ن و حزبێن كوردستانى پێكڤه خاله‌كا هه‌ڤپشك په‌یدا بكه‌ن، پشتگیریا ب هێزترین كاراكته‌رێ سیاسیێ كوردستانێ بكه‌ن، ئه‌و كه‌سێن ڕێكا گه‌هشتنا ئارمانجێ 40% ڤه‌بڕى بیت، ئه‌و ماف نینه داخوازێ ژ كه‌سه‌كێ بكه‌ن كو 90% ڕێكا گه‌هشتنا ئارمانجێ ب سه‌ركه‌فتیانه ڤه‌بڕى بیت. هه‌ر كه‌س و هه‌ر حزبه‌ك ب حزبا گۆڕان و په‌كه‌كێ ڤه باش دزانن كو نها بارزانى وه‌ك سه‌ركرده‌یه‌كێ كورد، پتر ژ هه‌ر سه‌ركرده‌كێ دی یێ كورد سه‌ركه‌فتنێن سیاسى ل سه‌ر ئاستێ جیهانێ یێن تۆمار كرین، دزانن نها بارزانى ل ده‌ف پڕانیا وه‌لاتێن زلهێزێن جیهانێ ب تایبه‌ت ئه‌مریكا و ئورۆپا و ئیسرائیلێ و گه‌له‌ك وه‌لاتێن ده‌ڤه‌رێ ژى ژماره‌یه‌كا مه‌زنه و گرنگى ب هه‌لویست و ڕاوێژێن وى دهێنه‌دان و هیچ ژ سه‌رۆكێن وان حزبان ل دوور ژى ئه‌و ڕۆل نینه یێ كو بارزانى هه‌ى، ل سه‌ر هه‌مى ئه‌و بزاڤێن هنده‌ك حزبێن كوردستانێ دكرن داكو جیهان وه‌كو سه‌رۆكێ هه‌رێمێ ل بارزانى نه‌نێرن، لێ دیسا چ كاریگه‌ریه‌ك ل سه‌ر وه‌لاتان چێ نه‌كر و تا ڕاده‌یه‌كێ هنده‌ك ژ وان وه‌لاتان نه‌ك ب تنێ مینا سه‌رۆكێ هه‌رێمێ به‌لكى مینا سه‌رۆك ده‌وڵه‌ت سه‌ره‌ده‌ریێ دگه‌ل بارزانى دكه‌ن، هه‌ر كورده‌ك دڤێ ب په‌رژینیت، مه‌نتق و واقع دبێژیت بارزانى كه‌سێ ئێكێ یه ل سه‌رانسه‌رێ كوردستانێ كو جیهان مینا نوونه‌رێ ته‌ڤایا گه‌لێ كورد سه‌ره‌ده‌ریێ دگه‌ل دكه‌ن، ئه‌ڤ خالێن مه به‌حس كرین مه‌لاقى و موجامه‌له نینن، واقعه‌كه كو ب تنێ گرێ یێن ده‌روونى و به‌رژه‌وه‌ندیێن به‌رته‌نگێن حزبى و كه‌سێتى وه‌ناكه‌ن چاڤێن هنده‌ك خه‌لك و حزبێن كوردستانێ ببینن، د ڕاستی دا بارزانى ئه‌گه‌ر بخوازیت ژى ئه‌و ماف نینه بزڤریته پاش!، بۆ نموونه ل دووڤ حزبا پارتیا كرێكارێن كوردستانێ یان بزاڤا گوڕان سیاسه‌تێ بكه‌ت و باردۆخێ وه‌لاتى بۆ سه‌رده‌مێ به‌رى چل سالان پتر ڤه‌گه‌ڕینیت!.
ده‌مێ كۆمپانیه‌كا نه‌فتێ سه‌ركه‌فتن بڤێت گه‌ره‌كه هه‌مى لایه‌ن و ڕێڤه‌به‌ریێن كۆمپانیایێ دان ب سه‌ركه‌فتیترین كه‌سێ كۆمپانیایێ بئینن و ب سه‌رۆك ب په‌ژرینن و ب هه‌ڤرا به‌رنامێن كۆمپانیێ ببه‌نه پێش، لێ بریارا ئێكلاكه‌ر ڕاده‌ستى كه‌سێ ئێكێ بهێته كرن، دژایه‌تیكرنا سه‌ركه‌فتیترین كه‌سێ كۆمپانیایێ هێمایێن نه‌بوونا دلسوزیێ یه ژ بۆ كۆمپانیێ. د هه‌مى بیاڤه‌كێ ژیانێ دا ئه‌ڤه مینا قانوونه‌كا نه‌گهۆره، د ناڤ خێزانه‌كێ دا ئه‌گه‌ر سه‌ركه‌فتیترین كه‌س باشترین ڕۆل نه‌بیت، سه‌ركه‌فتنا خێزانێ وه‌كو پێدڤى نابیت.
فه‌رموون گه‌ر وه ئێكگرتن دڤێت و خه‌مخۆرێن به‌رژه‌وه‌ندیێن كوردستانێ نه و ئارمانجا وه سه‌ركه‌فتنا دۆزا گه‌لێ كورد و ئازادبوونا وه‌لاتی یه، خالا هه‌ڤگرتنێ پشتگیریا سه‌ركه‌فتیترین كه‌سێ كوردستانێ یه كو ئه‌و ژى واقع دبێژیت بارزانی یه، دژایه‌تیكرنا بارزانى د ڤى باردۆخێ ئالۆزێ ڕۆژهه‌لاتا ناڤه‌ڕاست دا سه‌یرترین و نه‌لوژیكترین كارێن هنده‌ك كوردایه، دژایه‌تیكرنا سه‌نگه‌رێن پێشمه‌رگه و په‌یوه‌ندیێن دبلوماسى و سیاسى و ئابوورى یێن هه‌رێما كوردستانێ نه و ..هتد، كو دامه‌زرێنه‌ر و بناغه‌یێ سه‌ره‌كى یێن وان بارزانی یه ئه‌گه‌ر د دیتنا ته یێ وه‌لاتی دا كو سه‌ر ب هه‌ر حزبه‌كێ ڤه بى، بارزانى سه‌ركه‌فتیترین نینه، پێدڤییه ل دووڤ به‌لگه‌یان بگه‌ڕى و بشێى ژ بۆ به‌رژه‌وه‌ندیێن خوه و وه‌لاتێ خوه دان ب واقعی ب ئینى و هه‌ر ئاخفتنه‌كا حزبا ته دبێژیت نه‌كه‌یه واقعه‌ك كو هزر تێدا نه‌هێته كرن!.
ئه‌گه‌ر په‌ژراندنا سه‌ركه‌فتیترین و بهێزترین كه‌سایه‌تیێ وه‌لاتى خالا ئێكگرتنێ نه‌بیت، دپرسین ئه‌و خال چی یه كو ئێكگرتنا ناڤمالا كوردى چێ دكه‌ت؟!، ئه‌گه‌ر هه‌ر حزبه‌ك بێژیت پێدڤییه هه‌مى لایه‌ن و حزبێن كوردستانێ سیاسه‌تا من ب په‌ژرینن و ل دووڤ من بهێن، ئێكگرتنا ناڤ مالا كوردى دێ چاوا هێته هه‌بوونێ؟!.
سه‌رنجه‌ك ل سه‌ر پارتى د 16ێ ته‌باخێ دا
پارتى دیموكراتى كوردستان وه‌كو حزب ژ دو هێزێن سه‌ره‌كى ژ دایك بوویه، (ئێك) ژ ڕه‌نج و ئازارێن دیرۆكى یێن گه‌لێ كوردستانێ كو گه‌لێ كورد تێنى یێ بزاڤه‌كا شوڕشگێرى بوون داكو خوه ل ژێر سته‌ما دوژمنان قورتال بكه‌ن، (دو) ژ خه‌باتا بێ ڤه‌بڕینا ماڵباتا بارزانى كو ل سه‌رده‌مێ شێخ عه‌بدولسه‌لام بارزانى یێ دویێ بۆ ڕزگاركرنا نه‌ته‌وه‌ێ كورد ده‌ست پێ كر. د دیرۆكا كوردان دا مه‌زنترین درب یێ كو دوژمنان ل كه‌لتورێ گه‌لێ كورد داى، زالكرنا بریارێن ده‌ره‌به‌گان بوو ل سه‌ر هه‌مى لایه‌نێن ژیانا خه‌لكێ كوردستانێ، واته ده‌ره‌به‌گ هه‌م دادوه‌ر بوون، هه‌م ئاسایش، هه‌م سزاده‌ر، كونترۆلا ده‌ره‌به‌گان ژى د ده‌ستێن دوژمنان دا بوو، هه‌روه‌سا ل شوینا قوتابخانه و زانكۆ و سه‌نته‌رێن ڕه‌وشنبیرى و فێرگه‌هان، ب تنێ په‌ره ب زانستێ ئایینى دهاته دان (خواندنا فه‌قییاتیێ)، د دیرۆكا كوردان دا مالباتا بارزانى زووتر ژ هه‌مى هوز و ماڵباته‌كێ شیا ل سه‌ر هنده‌ك قانوونێن نێگه‌تیڤێن جڤاكى زاڵ بیت، گه‌هشته ڕاده‌یه‌كێ كو هه‌ر هوزه‌ك یان ماڵباته‌ك یان كه‌سه‌ك كو راستى زۆرداریه‌كێ هاتبایه ل كوردستانێ، باشترین ڕێك بۆ قورتالبوونێ ده‌رگه‌هێ ماڵباتا بارزان ددیت، ئه‌ڤێ یه‌كسانیێ و خوه‌دیكرنا خه‌لكێ لێقه‌ومى ژ لایێ ماڵباتا بارزانی ڤه بۆ فاكته‌ر كو خه‌لكێ كوردستانێ باوه‌ریێ پێ ب ئینن و هێدى هێدى هزرا بزاڤه‌كا شوڕشگێرى بۆ ڕزگاركرنا ته‌ڤایا نه‌ته‌وه‌یێ كورد ژ بن ده‌ستیێ ژلایێ ماڵباتا بارزانى چێ بوو و كه‌فته د وارێ پراكتیك دا، ل ده‌سپێكا چه‌رخێ 19ێ شێخ عه‌بدولسه‌لام بارزانی ده‌ست ب شۆڕشا پارتى زانیێ كر بۆ ڕزگاركرنا نه‌ته‌وه‌یێ كورد كو ل سالا 1914ێ ب خیانه‌تا ده‌ره‌به‌گه‌كێ كورد ل رۆژهه‌لاتى كوردستانێ هاته ده‌سته‌سه‌ر كرن و ڕاده‌ستێ عوسمانیان كر و ل مووسلێ هاته سێداره‌دان، پاشان شێخ ئه‌حمه‌د بارزانى و بارزانیێ نه‌مر بێ ڤه‌برین به‌رده‌وامى ب به‌رخوه‌دانێ دا، ئه‌ڤ چه‌نده بوونه ژێده‌ر كو پارتى دیموكراتى كوردستان دابمه‌زریت، واته پارتى ژ دایكبوویا ئێش و ئازارێن گه‌له‌كی یه، كو پتریا حزبێن دی یێن كوردى ل ولاتێن دی و ل ژێر به‌ند و مه‌رجێن ده‌وڵه‌تێن دی سه‌رهه‌ل دا بوون كو هنده‌ك ژ وانان ب دژایه‌تیكرنا پارتى دیموكراتى كوردستان هێزێ ژ نه‌یارێن گه‌لێ كورد وه‌ردگریت و وه‌ردگرن.
ئه‌ڤ باگڕه‌وه‌ندێ دیرۆكیێ ب هێزێ پارتى هه‌ى چ حزبێن دی یێن كوردستانى نینن، پێدڤییه بپرسین بۆچى پارتى وه‌كى پێدڤى ده‌نگێن خه‌لكێ كوردستانێ نینن؟!، هێشتا برینێن گه‌له‌ك ژ بریندارێن شۆڕشێن پارتى ب دروستى تیمار نه‌بووینه، چ فاكته‌ر هه‌نه كو جیلێ نها ده‌نگى دده‌نه هنده‌ك لایه‌نان كو د هه‌مى دیرۆكا خوه دا دژایه‌تیا بزاڤا ڕزگاری خوازا گه‌لى كورد ب سه‌ركردایه‌تیا بارزانى دكر؟، خوه ئه‌و حزب نه ژلایێ گه‌نده‌لیێ ڤه و نه ژلایێ یه‌كسانیا جڤاكی ڤه ژى ل پێش نینن!. (ب گشتى) ئێك ژ وان فاكته‌ران كو كاریگه‌ریا وێ یا نێگه‌تیڤه ل سه‌ر هێزا جه‌ماوه‌ریا پارتى، لاوازیا ئاستێ كادر و ڕێكخستیێن پارتی یه، یا دویێ لاوازیا ڕاگه‌هاندنا پارتی یه، ده‌مێ لاوه‌كێ هه‌رزه‌كار دچیته ده‌ف كادرێ حزبه‌كا دژه‌پارتى، مه‌ژیێ وان پڕ دبیت ل ڤان ڕسته‌یان (پارتى نه‌فت دزه، پارتى عه‌میلا فلان ده‌وڵه‌تێ یه، پارتى حزبه‌كا هوزی یه، پارتى كورد كوژه و..هتد) ده‌مێ وى كه‌سى دڤێت دووڤچوونێ بكه‌ت كا چ ڕاستى بۆ ڤان تۆمه‌تان هه‌یه، پڕانیا كادرێن پارتى نه‌شاره‌زایی یا د باده‌كا نه‌فتێ دا هه‌ى كو ئه‌و نه‌فت فاكته‌ره‌كێ سه‌ره‌كى بوو كو هه‌مى جیهانا پێشكه‌فتى ئه‌وله‌هیا كوردستانێ ب گرنگ بزانن و تاكه ژێده‌رێ باشێ ئابووریا هه‌رێمێ یه و جیهان ژى نوكه مینا ده‌وڵه‌ت سه‌ره‌ده‌ریێ دگه‌ل بكه‌ن، نه‌دشێن ڕوون بكه‌ن كو پارتى ئێك موساوه‌مه ل هه‌مبه‌ر هیچ ده‌ڵه‌ته‌كێ نه‌كریه ل سه‌ر بابه‌تێن نه‌ته‌وه‌یی و هه‌ر په‌یوه‌ندیه‌كا پارتى دگه‌ل ده‌وڵه‌ته‌كێ هه‌بیت د به‌رژه‌وه‌ندیا هه‌مى خه‌لكێ كوردستانێ دایه ب هه‌مى ده‌ڤه‌ر و لایه‌ن ڤه، نه‌دشێن ڕوون بكه‌ن كو ڕێبازا بارزانى مه‌زنترین درب ل زۆرداریا ئاغا و ده‌ره‌به‌گان دایه كو خه‌لكێ كوردستانێ ل سه‌ر ڤى بناغه‌ى باوه‌ریه‌كا مه‌زن ب دامه‌زراندنا پارتى هه‌بوو، نه‌شێن ڕوون بكه‌ن كو د هه‌مى شه‌ڕه‌كێ ناڤخوه دا به‌ڵگه‌یێن هه‌ین كو پارتى ب تنێ به‌ره‌ڤانی یا ژ هه‌بوونا خوه كرى وه‌كو بزاڤه‌كا نه‌ته‌وه‌یی یا كوردى!، بۆچى كادر و ڕێكخستى و ڕاگه‌هاندنا پارتى نه‌شێن بۆ جیلێ نوو به‌رسڤا ڤان پرسیاران بده‌ن؟!، ژ به‌ركو ئه‌و پیڤه‌رێ كادر ل سه‌ر دهێنه دامه‌زراندن یێ شاشه، كادر ل سه‌ر ئه‌ساسێ خزمایه‌تیێ و نیاسینێ دهێنه دامه‌زراندن، ئه‌ڤجا ژى ب ده‌گمه‌ن نه‌بیت نابینین خوڵه‌ك بۆ بلندكرنا ئاستێ وان بهێته ڤه‌كرن، تاك تاك نه‌بیت مێژوویا پارتى ب دروستى نزانن، دجه‌وهه‌رێ سیاسه‌تا پارتى ناگه‌هن!!، هه‌روه‌سا ب گشتى كادر و به‌رپرسێن ڕاگه‌هاندنا پارتى پتر مژوولى په‌رژه‌وه‌ندى یێن تایبه‌تن هه‌تاكو ده‌رخستنا ڕاستیا بۆ جڤاكى.
ئه‌گه‌ر ئه‌و خه‌سله‌تێن باش یێن د پارتی دا هه‌ین ل سه‌ر هه‌مى كێماسیان را ژى، ئه‌و دیرۆكا زێرین و پڕ قوربانیدانا پارتى هه‌ى، ئه‌و كارێن پارتى بۆ سه‌رخستنا دبلوماسیه‌ت و سیاسه‌ت و ئابوورێ كوردستانێ كرین، ئه‌و په‌یوه‌ندى یێن نیڤده‌وڵه‌تى كو پارتى بۆ كوردان چێ كرین، هه‌ر حزبه‌كا دی خودان بایه، ب كێمی ڤه د سه‌د سالان دا زۆر زه‌حمه‌ت بوو هه‌ڤڕك هه‌بن، لێ جهێ داخێ یه پارتى نه‌شیایه ڕاستیا بگه‌هینیته جه‌ماوه‌رێ كوردستانێ، نه‌شیایه به‌رسڤێ بده‌ت، بۆچى گه‌نده‌ڵى هه‌یه؟!، بۆچى هنده‌ك ده‌ره‌به‌گان كو جاش بوون ڕوڵ گێراڤه؟!، ئه‌ڤان هه‌مى پرسیاران به‌رسڤێن هه‌ین، لێ بۆچى كادرێن پارتى نزانن؟!، ئه‌ڤ پرسیاره دڤێت ژ به‌رپرسێن شوله‌ژێ یێن پارتى بهێته‌كرن.
د ڤان بیره‌وه‌ریان دا پێدڤی یه ل شوینا ده‌ست قوتانێ و ئاهه‌نگ گێرانان، پارتى هزر بكه‌ت، بۆچى سه‌رۆك بارزانى پشتى زێده‌تر ژ نیڤ چه‌رخێ پێشمه‌رگایه‌تیێ و خزمه‌تێ دێ پێدڤى ب هندێ بیت پرۆپاكندا بۆ هه‌ڵبژاردنان بكه‌ت؟!، ده‌مێ كادرێ پارتى نه‌شیا بیت په‌یاما سه‌رۆك بارزانى بگه‌هینیت، بارزانى نه‌چاره وى كارى ژى ئه‌و ب خوه بكه‌ت كو ب وى ب تنێ ئه‌ڤ بۆشایی یه پڕ نابن.
فوئاد حسێن دشێت چ بگهۆریت؟
پشتى ڤه‌مرینا ڕۆلێ ڕێزدار جه‌لال تاڵه‌بانى د هه‌ڤكێشێن سیاسی دا، ده‌نگ و هه‌لویستێ سه‌ركردێن ئێكه‌تى نشتیمانى كوردستان بۆ سه‌ر چه‌ندین جه‌مسه‌رێن جودا جودا پارڤه بوون، ل ده‌ڤه‌رێن گه‌رمیان و سلێمانیێ كو ل ژێر ده‌سه‌لاتا ئێكه‌تیێ بوون، سیاسه‌ته‌كا دیاركرى نه‌بوو كو پارتى دیموكراتى كوردستان بشێت، ب ڕه‌نگه‌كێ سه‌ره‌كى سه‌رده‌ریێ دگه‌ل بكه‌ت، ئێكه‌تى دهه‌لبژارتنێن سالا 2013ێ دا ب لیسته‌كا جودا ژ پارتى پشكدار بوو، و نێزیكیا خوه ژ پارتى وه‌كو فاكته‌ره‌كێ سه‌ره‌كى یێ كێمبوونا ده‌نگێن خوه یێن پێشتر و زێده‌بوونا ده‌نگێن بزاڤا گۆڕان ددیت، ده‌مێ دیسان گۆڕان پتر ژ یه‌كێتیێ ده‌نگ ئینای، پارتى داخواز ژ ئێكه‌تیێ كر و گۆتێ وه چ جێگر نینن و مه دڤێت دگه‌ل وه‌دا حكوومه‌تێ پێك ب ئینین، ئێكه‌تێى د به‌رسڤێ دا گۆت ب مه‌رجه‌كى دێ پشكدارى حكوومه‌تێ بین كو گۆڕان ژى پشكدار ببیت، واته ئێكه‌تیێ ب خوه بێ كو هه‌ست پێ بكه‌ت گۆڕان دكره ئه‌لته‌رناتیڤێ خوه دا ژ به‌ركو گۆڕان پتر ژ یه‌كێتى ده‌نگ ئینا بوون و پشكداریا وان د حكوومه‌تێ دا پتر ژ یه‌كێتیێ ئیستیحقاق هه‌بوون، ژبۆ چێ نه‌بوونا ئالۆزیان ل ده‌ڤه‌رێن ژێر كونترۆلا یه‌كێتیێ و دابینكرنا چه‌ند سالێن ئارام بۆ حوكمڕانیا خوه، پارتى ژى نه‌چار بوو گرنگیه‌كا باش ب بزاڤا گۆڕان بده‌ت و نه‌وشێروان مسته‌فایێ سه‌رۆكێ وێ ژى كره ژماره‌یه‌كا گرنگ د هه‌ڤكێشێن سیاسى و ئیداریێن هه‌رێمێ دا، نه‌وشێروان ژى سۆز دان كو چار سالێن داهاتى سالێن ئارامیێ بن بۆ خه‌لكێ كوردستانێ و حوكمڕانیێ، لێ دو سال ب دروستى ده‌رباز نه‌بوون، ژ نشكه‌كێ ڤه دیسان نه‌وشێروان هه‌مى نیه‌تێن خوه یێن پشت په‌ردێ دیار كرن كو ئارمانجا وى یا دروست ژناڤبرنا ده‌ستهه‌لاتا بارزانییه، نه‌وشێروان وه‌سا هزر دكه‌ت یاسایی بیت، ئانكو بێ یاسایی، باش بیت یان خراب، مه‌نتق بیت یان نه‌مه‌نتق، پێدڤیه مالباتا بارزانى ل كوردستانێ بهێنه ڕاكرن و نه‌مینیت، دروست وه‌كو كه‌سه‌كى ب دژوارى دوچارێ نه‌خوشیا ده‌روونى ببیت، هنده‌ك سه‌ركردێن یه‌كێتیێ و حزبێن دی ژى ب ئاوایه‌كێ دیار پشتگیریا سیاسه‌تا نه‌وشێروان مسته‌فا كر، ئه‌ڤ چه‌نده بۆ پارتى و بارزانى یا دیار و ئاشكرایه، ژ لایه‌كى گۆڕان و یه‌كێتى دبێژن پارتییه ناهێلیت ئێكگرتن چێ ببیت و ئه‌م دیموكراسینه و هه‌میان دپه‌ژرینین و ژلایه‌كێ دی ڤه و دهه‌ستیارترین ده‌م دا دچنه به‌غدا دبێژن ئێدى پارتى واجیها كوردان نینه و ئه‌م پڕانینه و سیاسه‌تا پارتى ب داوى هات!، بۆ پارتى خویا دكه‌ن كو ئارمانجا وان ئێكگرتن نینه به‌لكى ژناڤبرنا پارتیه، نییه‌ت زۆر یا گرنگه، ئه‌گه‌ر پارتى زانى نییه‌تێن وان یێن پاك نینن چ بكه‌ت باشه؟، به‌رى كۆمبوونا په‌رله‌مانى یا 23 حوزه‌یرانا 2015ێ، چه‌ندین كۆمبوونێن گرنگ و د ژینگه‌هه‌كا ئارام و لێك تێگه‌هشتنێ دا هاتنه كرن و هه‌مى تشته‌ك ب پوزه‌تیڤ دچوونه پێش، هه‌ڤڕكیێن پارتى ژ نشكه‌كێ ڤه ب ئینانا بالیۆزێ ولاته‌كێ بیانى، هه‌مى هه‌بوون و دیرۆكا سه‌رۆك بارزانى و پارتى ئیستیفزاز كر، هه‌مى هه‌ڤكێشێن ئه‌رێنى به‌رۆڤاژى كرن بێ گوهدانا هیچ سازان و تێكگه‌هشتنه‌كێ بزاڤ كرن كو ئه‌جندایه‌كێ تایبه‌ت ب سه‌ر پارتی دا بسه‌پینن، له‌وما پارتى د ڤى ده‌می دا باوه‌رى ب نیازێن ده‌سه‌لاتدارێن وانا نه‌مایه، بۆ پارتى كورسیكا سه‌رۆكێ په‌رله‌مانى وه‌كو ده‌ستكه‌فتێن حزبى هیچ گرنگییه‌ك نینه و د سالێن ده‌رباز بوویی دا ئه‌ڤ چه‌نده یا سه‌لماندى ده‌مێ كورسیكێن خوه پێنجى ب پێنجى دگه‌ل ئێكه‌تێى پارڤه‌كرى، د ده‌مه‌كی دا ئێكه‌تیێ نیڤا پارتى ده‌نگ نه‌بوون، لێ د نها دا پارتى باوه‌رى ب نیه‌تێن وان نه‌مایه و مافێ پارتیه، ژبه‌ركو ئه‌و ب ئاشكرا نه‌كو ب نهێنى دبێژن ئه‌م دێ پارتى ل سه‌ر ده‌ستهه‌لاتا كوردستانێ ڕاكه‌ین ب یاسا بیت ئان نه‌یاسا، تێگه‌هشتن بیت ئان نه گرنگ نینه!، پارتى ژى كو خوه ب خودانێ سه‌ره‌كیێ شوڕشێن نێزیكى سه‌د سالیا باشوور دبینیت، ژبۆ ڕازیكرنا دلێ ولاتێن داگیركه‌ر ولاتى قوربانى ناكه‌ت، نها بۆ نیشادانا نیه‌ت پاقژیێ پارتى فوئاد حسێن سه‌رۆكێ دیوانا سه‌رۆكایه‌تیا هه‌رێمێ ڕاسپاردیه كو دگه‌ل هه‌مى لایه‌نه‌كى كوم ببیت و داوى ب كێشه‌یان ب ئینن، لێ ب دیتنا من ب ساناهى پێكهاتنه‌كا باش چێ نابیت ژ به‌ركو كونترۆل بده‌ستێن وان حزبان نییه‌تێن باش نینن، ب تنێ ئه‌گه‌ر مه‌جبور ببن دگه‌ل پارتى پێك بهێن، لێ پێدڤیه وێ ڕاستێى بزانن ئه‌گه‌ر ب دیموكراسى و خۆشى تێك گه‌هشتن نه‌بیت و پێك نه‌هێن، پارتى و هه‌ڤپه‌یمانێن وێ یێن نیڤده‌وڵه‌تى ڕێك و كارتێن زۆر یێن مه‌زنێن ماین كو د هزرا نه‌یارێن پارتی دا ژى نینن و ل وى ده‌مى ئه‌و حزب دێ باجه‌كا مه‌زن ژى ده‌ن، حزبه‌كا بچووك و سه‌رۆك حزبه‌ك نكاریت ستراتیژیه‌تا درێژخایه‌نا ولاتێن زلهێزێن جیهانێ بگهۆڕیت.
په‌كه‌كه و نه‌فت و گازا كوردستانێ
ئه‌گه‌ر كوردستان ده‌ڤه‌ره‌كا ده‌وله‌مه‌ند ب سامانێن سروشتی بتایبه‌ت نه‌فتێ نه‌بایه دبیت دامه‌زراندنا ده‌وله‌تا كوردی ب ساناهیتر بایه و ئه‌ڤ هه‌موو كاره‌ساتێن دیروَكی ب سه‌رێ ملله‌تێ مه نه‌هاتبان، ژ به‌رڤێ چه‌ندێ ئازاد كرنا كوردستانێ و ڕامالینا ده‌ستهه‌لاتا عێراقێ ل هه‌رێما كوردستانێ چه‌ند ده‌ستكه‌فته‌كا مه‌زن بوو، لێ سه‌ربه‌خوَ فرۆتنا نه‌فتا كوردستانێ ئه‌ساسێ چێكرنا ده‌وله‌تا كوردییه و ده‌ستكه‌فته‌كا مه‌زنتره، له‌وما هه‌ر ده‌ست درێژییه‌ك بوَ سه‌ر سه‌ربه‌خوَ فرۆتنا نه‌فت و گازا كوردستانێ ده‌ست درێژییه بوَ سه‌ر ئه‌ساسێ ده‌وله‌تا كوردی و خه‌بات و قوَربانیدانا خه‌لكێ كوردستانێ.
د ڤی ماوه‌یێ ده‌رباز بوویی دا په‌كه‌كێ چه‌ندین جاران ب ڕاسته‌وخوَ دژایه‌تییا خوه ژبوَ بوڕییا نه‌فتا هه‌رێما كوردستانێ ده‌ربڕییه، د هه‌مان ده‌دم دا بزاڤ دكر جه‌ماوه‌رێ ساده‌لوژیك دسیاسه‌تێدا بخاپینن و بێژن ئه‌م نینین بوَرٍِیێ دپه‌قینین و میتا توركیایه ڤی كاری دكه‌ت، واته وان هه‌م دڤێت ئه‌ساسێ ده‌وله‌تا كوردی ژناڤ ببه‌ن، هه‌م جه‌ماوه‌رێ خوه‌ژی ژ ده‌ست نه‌ده‌ن! پێدڤییه هه‌موو تاكێن كورد بێ جیاوازییا حزبی خوه‌دی هێلێن سوَر بن ل بابه‌تێن نیشتیمانی و نه‌ته‌وی، نه‌فت و گازا كوردستانێ بتنێ ملكێ پارتی دیموكراتی كوردستان نینن، ئه‌گه‌ر پارتی شیا نه‌فت و گازا كوردستانێ بێخیته د خزمه‌تا گه‌لێ كورد دا و كوردستانێ به‌ره‌ف ده‌وله‌ت بوونێ ببه‌ت، بوَچی گه‌لێ كورد پێ نه‌خوه‌ش ببیت؟ّ!. په‌كه‌كه جار ڕادگه‌هینیت مه بوَڕییا نه‌فتا كوردستان – به‌نده‌رێ جیهان یا په‌قاندی و ده‌مێ پێلێن ناڕه‌زاییێ ژ جه‌ماوه‌ر و حزبێن كوردستانی دبینیت، بزاڤێ دكه‌ت بێخیته دئستویێ میتا توركیادا. ل ڤێره پێدڤییه ئه‌م ژ په‌كه‌كێ بپرسین، ئه‌گه‌ر توركیا بوَڕییا نه‌فتێ بپه‌قینیت، بوَچی ده‌لیڤه دا هه‌رێما كوردستانێ وێ بوَڕییێ ڕابكێشیت؟ چه‌ندین مه‌زنه كوَمپانیایێن جیهانێ یێن مینا ئیكسون موَبیل، چیڤروَن، توَتاڵ ب ده‌هان ساڵان گرێبه‌ست ل سه‌ر ئه‌ساسێ وێ بوَڕیێ دگه‌ل هه‌رێما كوردستانێ یێن ئیمزا كرین و بگره دناڤبه‌را وان و به‌غدا ناكوكی یێن مه‌زن چێبوون و ژ بال حوكمه‌تا عێراقێ ڤه چوونه د لیستا ڕه‌ش دا، هه‌روه‌كو شاره‌زایێن بیاڤێ نه‌فتێ دبێژن: ئه‌ڤ كومپانیایێن مه‌زنێن نه‌فتێ د هه‌ر بواره‌كی دا كوَمه‌كا ڕاوێژكارێن مه‌زن یێن هه‌ین و هه‌تاكو لێكدانه‌ڤه‌یا ئابووری و سیاسی و ئه‌منی یێن كامل نه‌كه‌ن پێنگاڤێ ناهاڤێژن، ب ڕاستی ئایا وه‌كو په‌كه‌كه دیار دكه‌ت توركیا هند یا نه‌زانه وه‌سا ب ساناهی پێ ل ئه‌ته‌كێتێن ده‌وڵه‌تداریێ دانیت و دژایه‌تییا به‌رژه‌وه‌ندیێن وان كوَمپانیایا بكه‌ت و خوه توشی ئێحراجا سیاسی، ده‌ستدانا باوه‌رییا ئابووری، ده‌ستدانا هه‌ڤپه‌یمانێن ئابووری بكه‌ت و ئه‌زمه‌كا ئابووری ژی ل وه‌لاتێ خوه دروست بكه‌ت، ژ به‌رچ و سودێ وان چییه بَوڕیێ بپه‌قینن؟! ئه‌گه‌ر وه‌كو په‌كه‌كه دبێژیت نیازه‌ك ژی هه‌بیت توركیا بوَڕیا نه‌فتا هه‌رێما كوردستانێ ڕاگریت داكو كوردستان سه‌ربخوه نه‌بیت د ڤی ده‌می دا ڤی كاری ئه‌نجام ناده‌ت، ئه‌گه‌ر ڤی كاری بكه‌ت پشتی ڕاگه‌هاندنا ده‌وله‌تا كوردی دێ ڤی كاری ئه‌نجام ده‌ت دا بشێت بناغێ ده‌وله‌تێ ژناڤ ببه‌ت نه‌ك نوكه نیازێن خوه ئاشكه‌را بكه‌ت و باشوور به‌ره‌ف هه‌ڤپه‌یمانیێ دگه‌ل به‌غدا ببه‌ته‌ڤه، لێ ئه‌ڤ كاره دووره ژ واقعی و خالێن نێگه‌تیڤ بوَ توركیا زوَر زوَرترن ژ خالێن پوَزه‌تیڤ و توركیا ڤێ خوه‌كوژیا سیاسی و ئابووری و ئه‌منی ئه‌نجام ناده‌ت.
یا بالكێش و جهێ پرسیارێ بوَ په‌كه‌كێ، بوَچی (ب گوتنا وه) كردارا میتێ و په‌یاما وه مینا هه‌ڤن ل دژی باشوور؟! ئه‌گه‌ر میتا توركیا ڤی كاری ئه‌نجام دده‌ت، بوَچی هوون ڤی كاری ب مه‌ردانه شه‌رمزار ناكه‌ن؟!
ئه‌گه‌ر مه‌به‌ستا په‌كه‌كێ دژایه‌تییا هه‌رێما كوردستانێ نینه بوَچی بوَڕیا گازا روسیا و ئیرانێ و ئازه‌ربایجانێ بوَ توركیا ناپه‌قینن، لێ هێشتا نزیكی چه‌ندین هه‌یڤ یێن ماین پڕوَژێ هنارتنا گازێ بوَ توركیا ب دووماهی بهێت، په‌كه‌كێ دژایه‌تییا خوه ڕاگه‌هاند؟!
یا دیار و سه‌لماندییه ئایدوَلوَژیا و كردارێن په‌كه‌كێنه ڤان كاران ئه‌نجام دده‌ن، ئه‌گه‌ر په‌كه‌كه ڤی كاری ب به‌یاننامه‌كێ شه‌رمزار بكه‌ت، ئه‌ڤ كاره بساناهی ناهێته كرن، ئارمانجا پێشمه‌رگه و گه‌ریلایێن په‌كه‌كێ وه‌كو جه‌نگاوه‌ر، ئازارد بوونا نه‌ته‌وه‌یا كورده، پێدڤییه په‌كه‌كه ئێكه‌م جار دلسوَزی هه‌بیت دگه‌ل خوونا شه‌هیدێن خوه و ڕه‌نج قوربانیدا گه‌ریلایێن خوه ژ بلی نه‌ته‌وه‌یا خوه، ژ به‌ركو لاوێن كورد بوَ كوردایه‌تیێ یێن گه‌هشتیه په‌كه‌كێ نه‌ك دژایه‌تی كرنا بناغێ ده‌وڵه‌تا كوردی، هیڤیدارم كورد بوون بهێزتر ل حزبی بوونێ لێ بهێت داكو هنده‌ك سه‌ركرده‌یێن نیاز خراپ ده‌لیڤه نه‌بیت ب ناڤێ كوردایه‌تیێ ئارمانجێن خوه یێن تایبه‌ت ل سه‌ر حسابا گه‌لێ مه بپێكن.
داعش خێره‌كا سیاسی ژی بوو
هه‌كه ب هه‌ست و نێرینه‌كا دوور ژ تێگه‌ها سیاسی ئه‌ڤ مانشێتێ ل سه‌ری بهێته خواندن، دبێت ڕه‌نگدانه‌ڤه‌یێن خراب ژ بوَ بابه‌تی بهێنه‌دان، ژ به‌ر ڤێ چه‌ندێ هیڤیدارم به‌ری خواندنا بابه‌تی بریارێ ل سه‌ر ناڤه‌ڕوكا بابه‌تی نه‌ده‌ن.
داعش وه‌كو رێكخراوه‌كا تیرۆری و خوه‌دی مه‌ترسیدارترین كریارێن هۆڤانه‌نه د ڤان سالێن داویدا دروستبوویه، به‌لكی به‌رهه‌مێ ئایدولوژیایه‌كا كه‌ڤنار و پڕكینه و مه‌ترسیداره كو سه‌دان ساڵن تۆڤێ وێ دهێته چاندن و پشتی ده‌ركه‌فتنا چه‌ندین رێكخراوێن دیتر یێن تیرۆری مینا قاعیده و تالیبان و ئه‌نصار.. . هتد، ئه‌ڤ رێكخراوه هاته مه‌یدانێ كو هێشتا توندتره ل وان رێكخراوان.
وڵاتێن وه‌كی ئه‌ورۆپا و ئه‌مریكا ژی ل گه‌ل وه‌ڵاتێن روَژهه‌ڵاتا ناڤین ب گشتی هه‌ست ب مه‌ترسیا كه‌سانێن توندڕو یێن ئیسلامی دكرن و دكه‌ن، ژ به‌ر ڕاماڵینا تیرۆرستان د ناڤ جاده و كوڵانێن وه‌لاتێن خوه‌دا، ئه‌وان ب هاریكاریا هنده‌ك وڵاتێن دیتر یێن كه‌نداڤ ب تایبه‌ت، بزاڤا كۆمكرنا وان كه‌سێن مه‌ترسیدار كرن، هه‌ر وه‌كی چاوا گلێش و زبل پێدڤی ب كۆم كرنێنه به‌ری سۆتنێ، ئه‌و كه‌سانێن توندڕو و مه‌ترسیدارژی ل ده‌ف وان وه‌سا پێدڤی ب كیمكرنێ بوون، به‌ری ژناڤبرنێ، ل گه‌ل ڤێ چه‌ندێ ئه‌مریكا و هه‌ڤپه‌یمانێن وێ پڕۆژه‌یه‌ك یا ل ڕۆژهه‌ڵاتا ناڤه‌ڕاست هه‌ی، ئه‌وژی لاوازكرن و دابه‌شكرنا وڵاتێن دیكتاتور و شه‌ڕخواز كو ئه‌و ب مه‌ترسی ل سه‌ر پاشه‌رۆژا وڵاتێن خوه دبینن، هه‌كه سه‌رنجێ بده‌ین شه‌ڕی ژناڤبرنا حوكمه‌تا دیكتاتۆر یا به‌عس ژی ئه‌مریكا زێده‌تر ب ئارتێشا پیاده یا ئه‌مریكی كار ژ بۆ پڕاكتیزه‌كرنا پڕۆژه‌یێ خوه دكر، لێ پشتی شه‌ڕێ عیراقێ ل ساڵا 2003 یێ پتر ئه‌مریكا ب ڕێكا رێكخراوێن تیروری و لایه‌نێن نافخوه‌یی یێن وه‌ڵاتێن دیتر كار ژ بۆ جێبه‌جێكرنا پڕوَژه‌یێن خوه دكه‌ت.
كورد كو سه‌دان ساڵن وه‌كی ملله‌ته‌كێ بن ده‌ست و ئاشتیخواز ژ بوَ مافێن مرۆڤی و نه‌ته‌وه‌یی یێن ڕه‌وایێن خوه خه‌باتێ دكه‌ن، لێ چ جارا نه‌شیاینه ژ بو جیهانێ ب گشتی ڤێ ڕاستیێ بسه‌لمینن، ژ به‌ركو هه‌می ده‌مه‌كێ لۆبی و ڕاگه‌هاندن و سیاسه‌تا دوژمنێن كوردان ڕوڵه‌كێ ب هێزتر هه‌بوو و ل دژی دوزا كوردی ب ڕه‌نگه‌كێ ئه‌كتیڤ كار دكر، ژ به‌ر به‌رژه‌وه‌ندیێن ئابووری و سیاسی و سه‌ربازی، وه‌ڵاتێن زلهێزێن مینا بریتانیا و ئه‌مریكا و فه‌ره‌نسا و ئه‌ڵمانیا. .. هتد، چاڤپووشی ل ئێش و ئازارێن گه‌لێ كورد دكر و هه‌تا گه‌له‌ك جاران پشتگیریا دیكتاتوران ژی دكر.
سه‌دان ساڵان كوردان ل دژی دیكتاتۆر و خوین مێژ و شۆڤێنیا شه‌ڕ دكر، لێ چ جاران جیهانێ دان ب وێ چه‌ندێ نه‌كر كو شه‌ڕێ كوردان ل گه‌ل رژێما به‌عس شه‌ڕ كرنه‌ل رژێمه‌كا تیرۆری و دیكتاتۆر، چ جاران بریتانیا و وه‌ڵاتێن ئه‌ورۆپی نه‌دڤیا ب په‌رژینن كو شه‌ڕی كوردان ل گه‌ل ئوسمانی و سه‌فه‌ویان بوَ ڕزگاركرنا گه‌له‌كێ بن ده‌سته. .. هتد،
لێ شه‌ڕێ كوردان ل گه‌ل داعش هه‌می هه‌ڤكێشه به‌روڤاژی كرن، كورد شیان د شه‌رێ داعشێ دا دلێ تاك تاكێن خه‌لكێن ئاشتیخوازێن ئه‌ورۆپا و ئه‌مریكا بۆ لایێ خوه‌ڤه بكێشن، شیان جه‌وهه‌رێ پێشمه‌رگه كو د چاڤێن جیهانێدا وه‌كی رێكخراوه‌كا مه‌ترسیدار هاتبوو نیاسین دیار بكه‌ن كو پێشمه‌رگه به‌رگیریكه‌رێ ئاشتیێ یه و ل دژی تیرۆرێ و توندوتیژیێ ژ بوَ هه‌می جیهانێ دجه‌نگیت و خوینێ دڕێژیت، كورد شیان د شه‌ڕێ داعشێ دا وان ڕاستیا دیار بكه‌ن كو سه‌دان ساڵن دوژمنێن كوردان ژ به‌ر چاڤێن گه‌لێن جیهانێ به‌روڤاژی نیشا دده‌ن،
ڕاسته مه كوردان قوربانیه‌كا مه‌زندا، گه‌له‌ك جوان و خورتێن مه جانێ خوه كره فیدایێ كوردستانێ، لێ ژ بوَ ئاڤاكرنا وڵاته‌كێ دیاره قوربانیدان دڤێت، جهێ داخێ یه داكو مرۆڤایه‌تی بژیت و نه‌مریت هه‌رده‌م هنده‌ك دبنه قوربانی، لێ ئه‌ڤ قوربانیدانه خودان به‌رهه‌مه‌كێ زۆر پیرۆز و پڕ بهایه، ژ به‌ركو ئه‌ڤ خوینه بناغه‌یێ ده‌وڵه‌تا كوردی چێكر و كوردستانا سه‌ربخو كره راستیه‌ك كو كه‌س نه‌شێت ڕێگیریێ لێ بكه‌ت.
نيشاندانWP Facebook Auto Publish Powered By : XYZScripts.com