ب ڕاستى ژسه‌یرترین كردار و بڕیاران د ڤى وه‌لاتی دا دهێنه بیستن، ب جۆره‌كی كو تاكێ ڤى وه‌لاتى هه‌ست بكه‌ت نه‌یارێن دلخۆشى و ژیانا وى یێ ڕێڤه‌به‌ریا وى دكه‌ن، داوى سوپرایز ژى كو د ڤێ قه‌یرانا مه‌زن دا هاته پێشكێشكرن، بڕیارا ژماره (17330) ل رێكه‌فتى (26/10/2016) یا جه‌نابێ وه‌زیرێ ناڤخۆیه كو تێدا هاتیه هه‌ر ترۆمبێله‌كا ل رێڤه‌به‌ریێن هاتنوچوونێ یێن هه‌رێمێ هاتبیته تۆماركرن ئه‌ڤجا چ هه‌میشه‌یی بیت یان كاتى (واته ترۆمبێلێن نه‌یاسایی، ئانكو دبێژنێ تۆزوبا كو پتریا وان د ده‌ستێن ده‌وله‌مه‌ند و خودان شیانان دایه، ناگریت!!) پێدڤیه د 60 رۆژان دا سه‌ره‌دانا رێڤه‌به‌ریێن په‌یوه‌ندیدار بكه‌ن، داكو سزایێن خوه ئێكلا بكه‌ن، ئه‌گه‌ر سزایێن خوه ئێكلا نه‌كه‌ن پشتى ڤى ده‌مێ هاتیه دیاركرن، دێ سزا بنه دوقات!، هه‌ژى گوتنێ یه هه‌تا نوكه ئاخر ده‌م بۆ ئێكلاكرنا سزایێن سه‌ر ترۆمبێلان ئه‌و ده‌م بوو كو سالیانا ترۆمبێلێ نوو دكرنه‌ڤه.
من په‌یوه‌ندى ب لایه‌نێ یاسایی ڤه نینه كانێ وه‌زیرى چه‌ند ده‌ستهه‌لات هه‌یه یان نینه، لێ ب ڕاستى یا سه‌یره سه‌رۆكێ حكوومه‌تا هه‌رێما كوردستانێ نێچیرڤان بارزانى چه‌ندین جاران ب خوه دان ب وێ چه‌ندێ ئینایه كو پشوو درێژیا خه‌لكێ كورستانێ ژ هه‌ژى ده‌ستخۆشیێ و سوپاسیێ یه. لێ جهێ پرسیارێ یه گه‌لو ب ڤى ئاوایی به‌رسڤا پشودرێژییا خه‌لكێ كوردستانێ دهێته دان؟!، حكوومه‌ته‌ك ل سه‌ر حسابا به‌ریكا فه‌رمانبه‌ران خوه بڕێڤه دبه‌ت و نێزیكى 10 مووچه‌یان قه‌ردارێ فه‌رمانبه‌رێن خوه‌یه، ئه‌ڤجا ژ نیشكه‌كێ ڤه ده‌مه‌كێ كێم دیار دكه‌ت كو خه‌لكێ هه‌ژار قه‌رزان بده‌ن؟!، ئه‌ڤجا قوربان بۆچى هه‌وه به‌رنامه‌ك نه‌ددانا كو ئه‌وان قه‌رزێن ل سه‌ر شوفێرێن فه‌رمانبه‌ر به‌ر مووچه‌یێن وان ب ئێخن كو سێ ساڵ ده‌رباز بوون نه‌شێن مووچێن وان بده‌نێ؟!، حكوومه‌ت مینا بابێ جڤاكی یه، ئه‌گه‌ر حكوومه‌ت نه‌شێت چاڤه‌رێ قه‌رێن خوه بكه‌ت، بوچى هه‌مان حكوومه‌ت داخوازێ دكه‌ت فه‌رمانبه‌رێن وێ چاڤه‌ڕێى قه‌ردارێ خوه بكه‌ن؟!، ئه‌ڤ بڕیارا جه‌نابێ وه‌زیرێ ناڤخۆ په‌یامه‌كا ناڕاسته‌وخۆیه بۆ فه‌رمانبه‌ران كو نابیت هوین ژى سه‌برێ ل سه‌ر قه‌ردارێ خوه (حكوومه‌تێ) بكێشن!، ئه‌ڤجا نه‌مه‌نته‌قترین سزا ئه‌ون یێن ڕێڤه‌به‌ریێن هاتنوچوونێ دانایه سه‌ر سه‌رپێچیكاران!.
ده‌نگه‌ك د ناڤ جڤاكی دا هه‌یه كو دبێژن د ڤى باردۆخێ نه‌ئاسایی دا ده‌لیڤه یێ چێ بووى هه‌رێما كوردستانێ ب سه‌ركردایه‌تیا پارتى چه‌كى بكڕیت و بۆ ده‌لیڤه‌یێن به‌رته‌نگ یه‌ده‌گێ خوه وه‌ربگریت، ژبه‌ركو دیار نینه سوبه‌هى ئه‌ڤ ده‌لیڤه‌یا چه‌ك كڕینێ بمینیت، له‌وما حكوومه‌تا هه‌رێمێ گڤاشتنا ل سه‌ر ئابوورێ خه‌لكێ كوردستانێ دكه‌ت، بۆچوونه‌كا دی یا هه‌ى دبێژن، هه‌رێما كوردستانێ ب سه‌ركردایه‌تییا پارتى به‌رنامه‌یێ هه‌ى ده‌وڵه‌تا كوردى ڕابگه‌هینن، له‌وما پاره‌ى كۆم دكه‌ن ئه‌گه‌ر هات و گڤاشتنه‌كا زێده كه‌فته سه‌ر ده‌وڵه‌تا دهێته ڕاگه‌هاندن و پشته‌ڤانیه‌كا وه‌كى پێدڤى نه‌بوو، بشێن ڤێ ده‌وڵه‌تێ ب وى پاره‌ى ڕاگرن هه‌تاكو په‌یوه‌ندیێن دبلۆماسى و ئابوورى دئێخنه سه‌ر ڕێڕه‌وا پێدڤى، ئه‌ڤان جۆره بۆچوونان هیڤیه‌كا مه‌زن ژ بۆ خه‌لكێ كوردستانێ ب تایبه‌ت جه‌ماوه‌رێ پارتى ئافراندیه كو بێ ده‌نگیێ ل هه‌مبه‌ر ڤان گڤاشتنێن ئابوورى هه‌لبژێرن، لێ گه‌لو بۆچى هه‌تا نوكه ب تنێ فه‌رمانبه‌ر و پێشمه‌رگه و خانه‌نشین باجا گران دده‌ن؟!، بۆچى به‌ژن كورت و كێم ئه‌ندام و چینا هه‌ژار كو خوه‌دى كێمترین داهاتن باجێ دده‌ن؟!، وه‌رگرتنا ترۆمبێلێن میرى ل رێڤه‌به‌ر و به‌رپرسێن حكوومى ب ڕه‌نگه‌كێ ئه‌كتیڤ هاته ئازراندن و ئه‌گه‌ر یێ شاش نه‌بم بڕیار هاته دان ترۆمبێلێن ڕێڤه‌به‌ران ب جۆره‌كێ قستى بفرۆشنه ڕێڤه‌به‌ران یان ژى ژێ وه‌ربگرن، هه‌روه‌سا خه‌رجیێن ترۆمبێلێن میری ژى ل سه‌ر ڕێڤه‌به‌ران بیت، كانێ ئه‌و به‌رنامه؟!، كا كێمكرنه‌كا پێدڤی یا بودجه‌یێن ڕێڤه‌به‌ریان؟!، گه‌لو پارتى دیموكراتى كوردستان مینا سه‌ركێش و به‌رپرسێ ئێكێ یێ حكوومه‌تا هه‌ریمێ كو هیچ حزبه‌كا كوردستانێ ل سه‌ر ئاستێ هه‌ر چار پارچه‌یان هندى وێ شۆڕه‌ش نه‌كریه و معانات و به‌دبه‌ختی یێن خه‌لكى نه‌دیتینه، ئه‌ڤه مه‌نتقه چینا پێشمه‌رگه و هه‌ژار هێشتا سۆته‌مه‌نى یێن سه‌ره‌كى یێن ڤى ولاتى بن؟!، دبیستین دبێژن بلا زارۆكێن پێشمه‌رگه‌ى ژى بازرگانیێ و كه‌سابه‌تێ بكه‌ن!، گه‌لۆ تاوانا وانه بابێن وان یێن پێشمه‌رگه نه‌شیاینه وان فێرى بازرگانیێ بكه‌ن؟!.
ئه‌گه‌ر هات و هه‌ر ئه‌و سورپرایز نه‌بوو، پارتى دێ چاوا به‌رسڤا بێهن فره‌هیا خه‌لكى ده‌ته‌ڤه؟!. نیڤ مووچه و چل رۆژ پتر جاره‌ك و داوا قه‌رزان ژى دكه‌ن!. ل داویێ دبێژم كاك نێچیرڤان ب سوپاسیێ شیر ناهێته كڕین خه‌ڵك بده‌ته زارۆكێن خوه، حكوومه‌ت پارا دده‌ت پاش وه‌ردگریت.
نووترين نووچه
- پەرلەمانتارەكێ رۆسی: سەرۆك بارزانی ئەشقا كوردستانێ د دلێ هەموویان دا چاند
- بەغدا ل گەل هندێ یە هەلبژارتن ب پشكداریا هەموو ئالی و پێكهاتێن كوردستانێ بهێنە كرن
- ئەو دەولەتا میلیشیا ل ئیراقێ دروستكرین دژ كوردستانێ بكار دئینیت
- بڕیارا هەلبژارتنێن كوردستانێ د دەستێن نێچیرڤان بارزانی دایە و ئامادەبوونا وی بۆ بەغدا گەلەك یا گرنگە
- هەردو بانكێن ئیراقێ رەشید و رافیدەین د لیستا رەش دانە و دۆلار بۆ ناهێتە هنارتن
- ب پشكداریا نێچیرڤان بارزانی كۆمبوونا هەڤپەیمانیا بڕێڤەبرنا دەولەتێ هاتە كرن
- سەرۆكێ هەرێما كوردستانێ ل گەل سەرۆككۆمارێ ئیراقێ كۆمبوو
- سەرۆكێ هەرێما كوردستانێ سوپاسیا فایق زێدانی ژ بەر رۆلێ وی یێ كاریگەر كر
- فەرەنسا هەڤسۆزی و پشتەڤانیا خوە بۆ هەرێما كوردستانێ دوپاتكر
- نەوال مووسەوی: مەرەم ژ ئارمانجگرتنا كۆرمۆر تێكدانا رێككەفتنا د ناڤبەرا حوكمەتا هەرێما كوردستانێ و حوکمەتا ئیراقێ دا یە
كامی كمال
تەڤگەرا گۆڕان ژ دایکبوویا کەربێ یە!
هەمى دەزگەه و بەرپرس و ئەندامێن وێ ب گشتى ب هەمى هێز و شیانێن خوەڤە سەنگەر ل دژى حکوومەتا هەرێما کوردستانێ گرتیە، لێ چما د وێ حکوومەتێ دا ناڤەکێشن و ب کێمی ڤە دا بشێن بەرنامە و ئەجندایێن خوە ژ بۆ جەماوەرێ خوە دیار بکەن؟!، گەلۆ ئەڤ تەڤگەرە ئۆپۆزسیۆنە ئانکو پشکەکە ژ حکوومەتێ؟!، مادەم ب گۆتن و بۆچوونا گۆڕان حکوومەتا هەرێما کوردستانێ ژ هەژى هەڕفتنێ و ژناڤبرنێ یە، هەروەکى بەرپرسێن وێ گۆتى سەدام حوسێن ل دەستهەلاتا ڤێ هەرێمێ باشتر بوو!، پرسیارەکا جدى دهێتە پێش ئارمانجا ڤێ تەڤگەرێ چی یە کو نەڤێت ژ ڤێ حکوومەتێ ب فەرمى ڤەکێشت؟!، بەرسڤا ڤێ پرسیارێ یا دیارە ئەگەر مرۆڤ هەست ب نیازێن گۆڕان بکەت، ئەڤ تەڤگەرە باش دزانیت هەردەمێ ژ حکوومەتێ ڤەکێشا و خوە ئێکلا کرەڤە، ئێدى ئەکتیڤکرنا پەرلەمانێ کوردستانێ ب ساناهى دکەڤیت و چ ئاستەنگ بۆ حزبان نامینن کو ئێدى بێ هەبوونا گۆڕان و “یوسف محمد” سەرۆکایەتیەکا نوو ژبۆ پەرلەمانى دیار بکەن، هەروەسا ئەگەرەکێ دی کو گۆڕان نکاریت بریارێ بدەت خوە ژ حکوومەتێ ڤەکێشیت ئیمتیازاتێن نها و یێن پاشەرۆژێنە، گۆڕان ژ وێ چەندێ دترسیت دهەر گوهڕینەکا چاڤەڕێ نەکری دا ژ دەستکەفت و ئیمتیازاتان بێ بەهر ببیتەڤە.
بۆچى نیازێن گۆڕان هەردەم پرسیارێن پڕ ب گۆمان هەلدگریت؟ بزاڤا گۆڕان ب سەرکردایەتیا نەوشێروان مستەفا هاتە دامەزراندن، د ڤان پێنجى سالێن داویێ دا گرۆپەک ل سلێمانیێ هاتە چێکرن کو ئارمانجا وان چێکرنا کەلتورەکێ کەرب و کینێ بیت دگەل ماڵباتا بارزانى، ژبەرکو مالباتا بارزانى ژى خوەدى کێشەیەکا نەتەوەیی بوون و ل هەمبەر نەیار و دوژمنێن کوردان ڕادوەستیان، ژ لایێ گەلەک ژ دوژمنێن گەلێ کوردڤە هاتنە پشتەڤانیکرن و شیان ڤى کەلتورى تا ڕادەیەکا مەترسیدار ب ئافرینن، یەکێتى نشتیمانى کوردستان د سالێن نۆتان دا مفایەکێ زۆر ل ڤى کەلتورێ دژی بارزانى دیت و شیان حزبا خوە ل سەر ڤێ ڕێڕەوا دژەبارزانى دەوڵەمەند بکەن و جەماوەرەکێ زۆر پەیدا بکەن، پشتى کو “جەلال تاڵەبانى” گەهشتیە وێ باوەرێ کو شەڕکرن و ئالۆزى دگەل مالباتا بارزانى هەتا ئەگەر بشێت ل داویێ مالباتا بارزانى ل حوکمڕانیا کوردستانێ ژى دوور ب ئێخیت ئێدى ئەو ب خوە ژى دێ ب داوى هێت، واتە شەڕکرن دگەل بارزانى خوەکوژیەکا ئاشکرایە، لەوما ئێدى بڕیار هاتە دان ل سەر هەمى پرسگرێک و کێشەیاندا ل هەڤ بکەن و پێکڤە ڤى ولاتى ب ڕێڤە ببەن. ژبەرکو کەلتورێ دژەبارزانى یێ زالە ل دەڤەرێن سلێمانیێ، نەوشێروان مستەفا شیا دووبارە مفاى ژێ ببینتەڤە و جەماوەرەکێ باش ل دەوروبەرێن خوە کۆم بکەت و ئەڤ کارە ژى ئەنجام دا، تەڤگەرا گۆڕان ژ دایکبوویێ ئێش و ئازارێن خەلکێ کوردستانێ نینە، هەروەسا ژبەر کارێزما بوون و هشیارى و پاقژیا نەشیروان ژى جەماوەر پەیدا نەکریە، ژ بەرهەبوونا گەندەڵى و ڕێکەفتنا ستراتیژى د ناڤبەرا پارتى و ئێکەتیێ دا ژى ئەڤ بزاڤە خۆرت نەبوو، تەڤگەرا گۆڕان ژ کەلتورێ کەربێ و کینێ ژ دایک بوو، لەوما ئەڤ بزاڤە نەشیایە خوەدى بەرنامە و ئەجندایەکێ نەتەوى بیت و هیچ پرسگرێک و کێشەیەکا خەلکێ کوردستانێ چارەسەر بکەت، بەلکى بەرۆڤاژى هەردەما ڤێ بزاڤێ دەلیڤە دیت بیت بزاڤ یا کرى زیانێ ب پارتى دیموکراتى کوردستان بگەهینیت و گرنگ نەبوویە کو بەرژەوەندیێن خەلکێ کوردستانێ ژى د ئاگرێ کەرب و کینێن وان دا بسۆژن!. ئەگەر ئەڤ تەشەنجا دەروونى و شوڤێنیەتا د ناخێ سەرۆکێ ڤێ تەڤگەرێ دا نەبایە، داشێت پتر مفاى وەرگریت ژ کێماسیێن حکوومەتێ و ئەو ڤالاتیێن د ژیانا خەلکى دا هەى ژبەر هەبوونا گەندەلیێ و نایەکسانیێ و خەلکێ سادە ب کار ئینیت و مەرەمێن خوە یێن کەربوکینێ و مەترسیدار ب پێک بێت، ئەگەر نەوشێروان مستەفا ب تنێ شیابا کونترۆلا دەروونێ خوە کربا و هەمى دیرۆک و دەستکەفتنێن پارتى لێکدان زیرو نەکربان، پشت ڕاستم خەلکەکى پتر داباوەر ژێ کەن و گەهنە رێزێن ڤێ تەڤگەرێ، لێ نەوشێروان ب تنێ شیا مفاى ژ وى خەلکى وەربگریت یێن مینا وى خوەدى کەرب و کین ل دژى پارتى، ئەڤ جۆرە تەڤگەرێن ل سەر ڤان بناغەیێن شاش دهێنە دامەزراندن، د هەر کاودانەکی دا ئەگەرێن ئیفلاسا سیاسى و هەڕفتنا جەماوەرى چاڤەڕێ دکەت، هەروەسا دگەل پێشڤەچوونا ئاستێ رۆشنبیرى و کەلتوریێ جڤاکى ئەڤ جۆرە تەڤگەرە لاواز و بێ شیان دبن.
ژبلى عیراقچیێ وان چ كریه؟!
پشتى هه‌ڕفتنا ڕژێما دكتاتۆرا به‌عس و سه‌ر ژ نوو ئاڤاكرنا عیراقێ پشتى سالا 2003یێ، سه‌رۆكێ هه‌رێما كوردستانێ مه‌سعود بارزانى ڕاستى زۆر كێشه‌یان بوو دگه‌ل حكوومه‌تێن ل دویف ئێكێن عیراقێ و ته‌حه‌ددا دگه‌ل هه‌مى دژایه‌تى كرنێن عیراقیان كر، بێى كو حزبێن دی یێن كوردستانێ ب تنێ ئێك هه‌لویست ژى ژێ هاتبیته دیتن، هه‌مى جه‌ماوه‌رێ كوردستانێ شاهدێن وێ چه‌ندێنه و به‌ڵگه ل به‌ر ده‌ستن كو سه‌رۆك بارزانى نه‌هێلا ئالایێ ڕژێما به‌عسا هه‌ڕفتی ل عیراقێ بمینیت، عارف قوربانى نڤیسه‌رێ ناڤدارێ كوردستانێ كو كادره‌كێ دیارێ یه‌كێتى نیشتیمانى كوردستانه، د بابه‌ته‌كێ دا نڤیسی بوو ((د هه‌ڤدیتنه‌كا من دگه‌ل نه‌وشێروان دا وى به‌حسێ هه‌ڵویستێن بارزانى دكرن ل به‌غدا، نه‌وشێروان دگۆت بارزانى ل 2003ێ داخواز كر دگه‌ل بچینه به‌غدا ژبه‌ر داڕشتنا دستوورێ عیراقێ و جێگیركرنا مافێن كوردان د دستووری دا، ده‌مێ ل به‌غدا مه‌دیتى هیچ گرنگى ب مافێن گه‌لێ كورد د دستوورێ نوو دا نه‌هاتیه‌دان، بارزانى گه‌ف ل به‌غدا كرن و گوتێ ب ڤى ئاوایی دێ ڤه‌كێشین و ب هیچ ڕه‌نگه‌كێ پشكداریێ د ئاڤاكرنا عیراقێ دا ناكه‌ین، وى ده‌مى “زالماى خه‌لیل زاد” ل كۆمبوونێ یێ به‌رهه‌ڤ بوو و په‌یوه‌ندى ب “جۆرج بۆش” سه‌رۆكى وى ده‌مى یێ ئه‌مریكاڤه كر و دیار بوو بۆشی داخواز كر ب تله‌فونێ دگه‌ل بارزانى بپه‌یڤیت، لێ بارزانى ڕه‌ت كر به‌رسڤا بۆش بده‌ت و گۆته زالماى خه‌لیل زاد ببۆره به‌رسڤێ ناده‌م، بلا شه‌رمزارێ كه‌سه‌كى ببم نه‌كو یێ ملله‌تێ خوه))، ئه‌ڤه ب شاهده‌یا نه‌وشێروان هه‌لویستێ سه‌رۆك بارزانى بوویه دگه‌ل عیراقێ و ئه‌مریكا، هێشتا به‌ڵگێن ڤیدیویی یێ د توڕا یوتیوبێ دا هه‌ى ده‌مێ بارزانى دبێژیته توركیا گه‌ر هوین مایتێكرنێ د كه‌ركووكێ دا بكه‌ن كو هنده‌ك توركمان لێ هه‌نه، ئه‌م دێ مایتێكرنێ د دیاربه‌كر و باكوور دا كه‌ین كو 30 ملیۆن كورد لێ هه‌نه، بارزانى ته‌حه‌دا كرن، هه‌تا كو سیسته‌مێ فیدرال، ناساندنا هێزا پێشمه‌رگه مینا هێزه‌كا یاسایی، مادى 140 و…هتد، د دستوورێ عیراقێ دا جێگیر كرن، هیچ لایه‌نه‌ك نه‌شێت ڤان ڕاستیان ئینكار بكه‌ت، لێ وه چ كریه؟!، ئیمزا كرن ل سه‌ر سیسته‌مێ فیدرالیا پارێزگه‌ها، به‌رگیركرن ب شێوه‌یه‌كێ زۆرێ توند ل ڤه‌مانا نورى مالكى ل ده‌ستهه‌لاتێ، ڕاده‌ستكرنا نه‌فتا هه‌رێما كوردستانێ بۆ به‌غدا، پێشنیار كرن بۆ به‌غدا بۆدجه و مووچه‌یێن خه‌لكێ كوردستانێ ببڕن و خه‌لكى بۆ هه‌ڕفتنا پارتى برسى بكه‌ن!، داخواز كرن كو نه‌فتا كه‌ركووكێ ڕاوه‌ستینن، داخواز ژ به‌غدا كر كو نه‌فتا كه‌ركووكێ ڕاده‌ستێ هه‌رێمێ نه‌كه‌ن، ژبلى ڤان هه‌لویستێن نه‌كوردانه و دژه نه‌ته‌وه‌یا كورد، گه‌لو كه‌سه‌ك دكاریت ب تنێ ئێك هه‌لویستێ فه‌رمى یێ ڤان هه‌مى حزبان (ژبلى پارتى) ل دژى ئێك دوژمنێ كوردان دیار بكه‌ت؟!.
پێدڤى بوو ماددێ 140 ل داویا سالا 2007ێ جێبه‌جێ ببا، یاسایێن نه‌فت و غازا هاتبانه دانان، لێ دیار بوو حكوومه‌تا مالكى نیازێن باش نینن، سه‌خمه‌راتى ڤێ چه‌ندێ هێزێن سه‌ربازى ب ناڤێ دیجله چێكرن و ئینانه سه‌ر سنوورێن كوردستانێ، به‌رى كو وان هێزان دابمه‌زرینیت سه‌رۆك بارزانى هوشدارى دا، لێ ئێكه‌تیێ و بزاڤا گۆڕان بزاڤ كرن خه‌لكێ كوردستانێ وه‌سا تێ بگه‌هینن كو بارزانى و مالكى كێشێن كه‌سێتى یێن هه‌ین، ئه‌گه‌ر نه مالكى هیچ كێشه‌یه‌ك نینه دگه‌ل كوردان!، هه‌تاكو مالكى دیجله ئینا سه‌رسنوورێن كوردستانێ و گه‌فێن مه‌ترسیدار ل كوردستانێ كرن، ئه‌ڤجا دیار بوو كا نیازێن مالكى چنه، ئه‌ڤه هنده‌ك ژ وان فاكته‌ران بوون كو ئێدى سه‌رۆك بارزانى بگه‌هیته وێ باوه‌ریێ داگیرنه‌كرنا كوردستانێ هه‌تا نوكه ژلایێ عیراقێ ڤه ب تنێ نه‌بوونا هێزێ و شیانایه، له‌وما سه‌رۆك بارزانى نه‌چار بوو لایه‌نێ سیاسى و ئابوورى و سه‌ربازى یێ كوردستانێ سه‌ربخوه بكه‌ت، ئه‌ڤ چه‌نده ژى باره‌كێ نه‌ئاسایی ل كوردستانێ ئافراند، بارزانى خراب ل جهێ خرابتر هه‌لبژارد، باش د وێ ڕاستیێ تێگه‌هشت ئه‌گه‌ر هێشتا عیراق یا لاواز، سه‌ربخوه‌ییا ئابوورى و سه‌ربازى و سیاسى ڕانه‌گه‌هینیت، ده‌مێ عیراق ب هێز دبیت ئێدى ئه‌و ده‌لیڤه دێ زۆر ب زه‌حمه‌ت كه‌ڤن، ئه‌ڤجا عیراقێ بۆ شكه‌ست پێ ئینانا پێنگاڤێن سه‌ربخوه‌ییا كوردستانێ بودجه ب ته‌مامى بڕى، ل سه‌ر هه‌مى ئه‌و گڤاشتنێن كو چێ بووین، شه‌ڕێ داعش ده‌ست پێ كر و پتر ژ دو ملیۆن ئاواره‌یان هاتنه ولاتى، بهایێ نه‌فتێ دابه‌زى، نوكه ژی پڕانیا حزبێن كوردستانێ نه‌ك ب تنێ خوه ب به‌رپرس نابینن و هه‌ڤكار نینن، به‌لكى یێن بووینه مالكى یێن كوردستانێ!.
به‌رهه‌مێ سیاسه‌تا قه‌ندیلی، كش و ماتكرنا هه‌ده‌پێ!
ئێك ژ به‌رهه‌مێن سیاسه‌تا قه‌ندیلی، گرتنا هه‌ڤسه‌رۆك و ئه‌ندام په‌رله‌مانێن هه‌ده‌پێ بوو، سیاسه‌تا ته‌ندروست بۆ ب ده‌ستڤه‌ئینانا ده‌ستكه‌فتانه، لێ ده‌مێ سیاسه‌ت دكه‌ڤیته د ده‌ستێن لایه‌نێن ده‌ره‌كی دا، بێگومان به‌رهه‌مێ سیاسى و ئه‌و ئارمانجا كو ب ڕاگه‌هاندن ژ پێخه‌مه‌ت كار دكه‌ن، دێ ژێك دوور بن.
په‌كه‌كێ ب كردارێن خوه یێن سه‌یر یا دسه‌لمینیت كو د ڕێڕه‌وه‌كێ دا قوربانیێ ب كوردان دده‌ت ل دژى درووشم و په‌یامێن وێنه، بۆ نموونه كردارێن خوه‌كوژى ده‌مێ ژ بۆ به‌رگیریێ دهێنه ئه‌نجامدان، ئانكو د ده‌مه‌كی دا بیت كو شه‌ڕڤان ژ پێخه‌مه‌ت ڕزگاركرنا هه‌ڤالێن خوه جانێ خوه گورى دكه‌ن، ئانكو د ده‌مه‌كی دا بیت كو نه‌خوازیت ب دیل بكه‌ڤیته د ده‌ستێن دوژمنی دا، كاره‌كێ دلسۆزانه و ئاساییه، لێ خوه په‌قاندن ب (TNT) د هێڕشكرنێ دا، هیمایێن مه‌ترسیدارن كو د دیرۆكا كوردان دا وێنه نه‌بوویه و ب تنێ د نوكه دا ئه‌و ئیسلامیێن توندوتیژ و ڕادیكال ڤێ كریارێ ئه‌نجام دده‌ن، ئه‌و كه‌سێ جانێ خوه ب هێڕشكرنێ قوربان دكه‌ت، پتر مینا كه‌ره‌سته‌یه‌كێ بێ جان و مه‌ژى دهێته ب كارئینان، په‌قاندن د ناڤ باژێران دا ل دژى دۆزا كوردییه كو نها سیاسه‌تا په‌كه‌كێ په‌یره‌و دكه‌ت!. ل سه‌رده‌مێ پڕۆسا ئاشتیێ به‌رده‌وام مه ئاگه‌ه ژ لێدوانێن ئاگرینێن سه‌ركرده‌یێن په‌كه‌كێ ل قه‌ندیل دبوو ل دژى توركیا، ڕاستیه‌كا حاشا هه‌لنه‌گره كو د دیرۆكا كوردان دا چ جاران دۆزا كوردان مینا سه‌رده‌مێ حوكمڕانیا ئه‌ردۆگان پێشكه‌فتن ب خوه‌ڤه نه‌دیت بوون، هه‌رێ نیازێن ئه‌ردۆگان پاقژ بوون ئانه؟، ناڤبرى مینا ته‌كتیك ئه‌و پڕۆسه ب كار دئینا ئان نه، ئه‌ڤ چه‌نده گرنگ نه‌بوو، یا گرنگ ئه‌و بوو كو چ جاران كورد ده‌ستپێشخه‌ریێ بۆ توندوتیژیێ نه‌كه‌ن و ئه‌گه‌ر نیازێن ئه‌ردۆگانی ژى پاقژ نه‌بانه، گه‌ره‌كه كوردان سه‌لماندبا، د ده‌مه‌كی دا حزبه‌ك ده‌ست ب كارێن توندوتیژى دكه‌ت كو ده‌لیڤا سیاسى و تێك گه‌هشتن ل پێش نه‌ما بیت، ئه‌گه‌ر ده‌لیڤا تێكگه‌هشتن و سیاسه‌تكرنێ مابیت، واته ئه‌و لایه‌نێ ده‌ست ب شه‌ڕ و توندوتیژیێ دكه‌ت، مه‌حكوم دبیت و پاقژ نه‌بوونا نیه‌تێن خوه دسه‌لمینیت، د باشترین باردۆخ دا كو بۆ كوردستانێ چێ بووى، بۆ نموونه ئازادیا ئاخفتنێ ب زمانێ دایكێ، ڤه‌كرنا كه‌نالێن كوردى و خواندن ب زمانێ كوردى، ئازادیا سیاسى تا ڕاده‌یه‌كێ لێدوانێن ڤیدیویی یێن “جه‌میل بایك” ل نیڤا دیار به‌كر ب به‌رهه‌ڤیا هزاران كوردان په‌خش دكرن، وێنه‌یێن سه‌رۆك و ئالایێن حزبێن كوردان ل هه‌ر جهه‌كى بلند دكرن، خوه خاپاندنه ئه‌گه‌ر بێژین ئه‌ردۆگان نه‌دشیا دژایه‌تییا ڤان پێنگاڤان بكه‌ت و ڕۆلێ سه‌ره‌كى یێ وى نه‌بوویه، د وى سه‌رده‌می دا هه‌ده‌پێ ب جۆره‌كێ شه‌ڕێ ده‌روونى و ڕاگه‌هاندنێ ل دژى ئه‌ردۆگان به‌رپا دكر، هه‌ر وه‌كى د هه‌مى دیرۆكێ و نوكه‌یا توركیا دا كوردان دوژمن و نه‌یار نه‌بووینه، ب تنێ ئه‌ردۆگان نه‌بیت!، ئه‌ڤ دژایه‌تیكرنا ئه‌ردۆگان ژ لایه‌كی ڤه و ڕه‌تكرنا هه‌ده‌پێ كو پشكداریێ د حكومه‌تا ئاكپارتی دا بكه‌ت و كوشتنا پۆلیسێن سڤیلێن توركیا د خه‌وێ دا و هه‌لگرتنا به‌رپرسیاریه‌تا وێ ڕوودانێ ژ لایێ په‌كه‌كێ ڤه، پێنگاڤێن سه‌ره‌كی یێن كوشتنا پڕۆسا ئاشتیێ و خه‌ندقاندنا هه‌ناسا ئازادیا گه‌لێ كورد ل باكوور بوون. ئه‌ڤ كاودانه ژ ئه‌نجامێن شه‌ڕێن ده‌وڵه‌تان بوون ل سه‌ر هژمار و خوین و مافێن كوردان، د ڤان هه‌ڤكێشه‌یان دا وه‌لاتێ ئیرانێ ڕۆله‌كێ مه‌زن هه‌بوو، ب هاریكاریا قه‌ندیل سه‌ركه‌فتنه‌كا مه‌زن ب ده‌ستڤه ئینا، ڕژێما ئیرانێ باش ئه‌و ڕاستى دزانى ئه‌گه‌ر پرسگرێكا كوردان ل توركیا چاره‌سه‌ر ببیت، دێ پێنگاڤه‌كا مه‌زن كوردێن رۆژهه‌لات نێزیكى ب ده‌ستڤه‌ئینانا مافێن نه‌ته‌وه‌یێن خوه بن و كارته‌كا سیاسى یا وێ ل دژى توركیا دێ سۆژیت و به‌رۆڤاژى توركیا دێ بیته خوه‌دى كارته‌كا بهێزتر ل دژى ئیرانێ كو به‌حسكرن لسه‌ر مافێن نێزیكى ده‌ه ملیۆن كوردان ل ئیرانێ د هه‌رده‌مه‌كێ پێدڤی دا ب ئینیته رۆژه‌ڤێ.
هه‌ر چاوا بیت جهێ داخێ یه دۆزا كوردى ل ژێر سیاسه‌تا قه‌ندیلی ڕاستى دربه‌كا مه‌زن بوو، ده‌لیڤه بۆ شوڤێنیان چێ بوو كو كوردستانێ وێران بكه‌ن و ژه‌هرا خوه ب ڕێژنه سه‌ر جانێ لاوێن كوردان ل باكوور، هه‌ر لایه‌نێ ل باكوور سه‌ركه‌فتنێ بخوازیت بۆ كوردان، گه‌ره‌كه ل ژێر هه‌ژموونا قه‌ندیلی ده‌ربكه‌ڤیت و به‌رژه‌وه‌ندیێن كوردان بپارێزیت، هه‌رچه‌نده ب چ بهایه‌كێ بیت په‌كه‌كه ڤێ چه‌ندێ ناپه‌ژرینیت، لێ د جه‌وهه‌ر دا په‌كه‌كه به‌رۆڤاژى به‌رژه‌وه‌ندیێن كوردان كار دكه‌ت، ل باشوور دوستێن مالكى، ل رۆژئاڤا و رۆژهه‌لات و باكوور دوستێن به‌شاری و ویلایه‌تا فه‌قیهن، خالێن ئاشكرانه كو په‌كه‌كه به‌رۆڤاژیا په‌یامێن خوه كار دكه‌ت.
پارتى د قه‌یرانا باوه‌ریێ دا
د كابینا شه‌شێ یا حكوومه‌تا هه‌رێما كوردستانێ دا، سه‌ربارى وێ چه‌ندێ كو زێده‌تر ژ نیڤا جه‌ماوه‌رێ ئێكه‌تی نیشتیمانى كوردستان گه‌هشتبوونه ته‌ڤگه‌را گۆڕان، لێ پارتى دیموكراتى كوردستان نیڤا وه‌زاره‌ت و پۆستێن خوه یێن میری ل سه‌ر حسابا ده‌نگده‌رێن خوه پێشكێشى ئێكه‌تیێ كربوون، بۆ هه‌ڵبژارتنێن ڤێ داویێ پارتى پابه‌ندبوونا خوه بۆ ڕێكه‌فتنا ستراتیژى دگه‌ل ئێكه‌تیێ ده‌ربڕى كو ب هه‌ڤرا ب ئێك لیستك به‌ره‌ف هه‌ڵبژارتنان بچن، ل گۆڕ دیتنا پارتى بۆ پاراستنا ئێكه‌تیا ڕێزێن كوردى و گرنگیا ئه‌وله‌هى و باردوخێ كوردستانێ، ده‌ستبه‌ردان ژ چه‌ندین پۆستێن خوه بۆ ئێكه‌تیێ گه‌ڕه‌كه، لێ ئێكه‌تیێ په‌یوه‌ندیێن خوه دگه‌ل پارتى ب فاكته‌رێ كێمبوونا ده‌نگێن خوه یێن حزبى ددیت، له‌وما بریارا داویێ دا كو ب لیسته‌كا جودا ژ پارتى پشكداریێ د هه‌ڵبژارتنان دا بكه‌ت، ئه‌ڤجاره ب به‌ڵگه هاته سه‌لماندن كو ده‌نگده‌رێن ئێكه‌تیێ بۆ نێزیكى نیڤا ده‌نگه‌ده‌رێن پارتی كێم ببوون، دیسا پارتى ته‌كه‌ز ل سه‌ر ڕێكه‌فتنا ستراتیژى دگه‌ل ئێكه‌تیێ كر و ژ باڵ مه‌زنه به‌رپرسێن پارتى ڤه داخویانى هاتنه دان كو ئه‌لته‌رناتیڤێ ئێكه‌تیێ ل ده‌ف پارتى هه‌ر ئێكه‌تی ب خوه‌یه. ب دیتنا من ژبه‌ر دیرۆكا سه‌رۆكێ ته‌ڤگه‌را گۆڕان، پارتى باوه‌رى ب وێ ته‌ڤگه‌رێ نه‌بوو، له‌وما پارتى پشكداركرنا گۆڕان د حكوومه‌تێ دا ب گه‌شبینى نه‌دنێڕٍى، لێ ئێكه‌تیێ دیسان پشكدارى پێكرنا گۆڕان د حكوومه‌تێ دا كره مه‌رجێ پشكداریا خوه د حكوومه‌تا نوو دا!، د وى ده‌می دا پارتى نه‌چار بوو كو ل سه‌ر پێكئینانا حكوومه‌تێ دگه‌ل ته‌ڤگه‌را گۆڕان ل هه‌ڤ هاتنێ بكه‌ت، دیسا ئێكه‌تى ڕازى نه‌بوو كو پۆستێن خوه ل دویف ئیستیحقاقێن خوه یێن هه‌لبژارتنان وه‌رگریت و به‌گڕاوه‌ندێ شۆڕشگێریێ دكره به‌هانه كو ئیستیحقاقه‌كێ زێده‌تر بۆ وان گه‌ره‌كه!، واته ئێكه‌تیێ فشار ل پارتى دكر كو نه‌یاره‌كێ وێ پشكداریێ د حكوومه‌تا هه‌رێمێ دا بكه‌ت و د هه‌مان ده‌م دا داخواز دكر ل سه‌ر به‌رنامه‌یێن كه‌ڤن (حكوومه‌تا بێ گۆڕان) وه‌زاره‌ت و پۆستان وه‌رگرن!، لێ دیسا پارتى ڕازى بوو و پێنج وه‌زاره‌ت دانه ئێكه‌تى، د ده‌مه‌كی دا پارتى نێزیكى دوقاتا ئێكه‌تیێ ده‌نگ هه‌بوون، پێنج وه‌زاره‌ت ب تنێ وه‌رگرتن!.
پارتى مینا حزبا زۆرینه ب سازانه‌كا ڕژد و چه‌ندین ڕوونشتنان دگه‌ل ته‌ڤگه‌را گۆڕان و ب مه‌رجێ پابه‌ندبوونا وێ ته‌ڤگه‌رێ ب چار ساڵێن ئارامیێ، گۆڕان پشكداری د كابینا حه‌فتێ دا كر و سه‌رۆكێ په‌رله‌مانى ژى ڕاده‌ستێ وێ ته‌ڤگه‌رێ كر، لێ پشتى دو سال ب سه‌ر ژیێ كابینا حه‌فتێ دا ده‌رباز بووین، ته‌ڤگه‌را گۆڕان ژ نشكه‌كێ ڤه بێ هیچ گوهداریكرنا هه‌ستیاریا باردوخێ كوردستانێ كو د شه‌ڕه‌كێ دژوار دا ده‌رباز دبوو، ئه‌رزانبوونا بهایێ نه‌فتێ و هاتنا ئاواران كو ب ڕێژه‌یا 30%ێ یا خه‌لكێ كوردستانێ پێك دئینا، ئیستیفزاز و شه‌ڕه‌كێ دژوارێ سایكۆڵوژى ل دژى پارتی ده‌ست پێ كره‌ڤه، ل سالا 2013ێ ویلایه‌تا سه‌رۆكى هه‌رێما كوردستانێ ڕێزدار “مه‌سعود بارزانى” ب داوى هات، لێ ژبه‌رنه‌بوونا هیچ یاسایه‌كا تایبه‌ت ب هه‌ڵبژارتنا سه‌رۆكێ هه‌رێمێ و ئاڵوزیا ده‌ڤه‌رێ ب گشتى، ب ڕێكه‌فتن د ناڤبه‌را هه‌مى لایه‌نان دا ب گشتى ویلایه‌تا جه‌نابێ وى بۆ دو سالان هاته درێژكرن، هه‌ر د هه‌مان ده‌م دا بارزانى به‌یاننامه‌یه‌ك ده‌رخست و داخواز كر په‌رله‌مان و لایه‌نێن په‌یوه‌ندیدار ل سه‌ر ڤێ مژارێ ل هه‌ڤهاتنێ بكه‌ن، داكو پشتى ڤان دو سالان ڤى ئه‌مانه‌تى ڕاده‌ستێ كه‌سه‌كێ دی بكه‌ت كو ب یاسایی هاتبیته هه‌ڵبژارتن، دیسا دو مه‌هان به‌رى داوى هاتنا وان دو ساڵێن ل سه‌ر ڕێكه‌فتین، بارزانى دووباره داخواز ژ په‌رله‌مانى كر گرنگیێ ب ڤێ كێشا سیاسى و یاسایی بده‌ن و ئێكلا بكه‌ن، لێ په‌رله‌مانێ كوردستانێ ب سه‌رۆكایه‌تیا ته‌ڤگه‌را گۆڕان ب خوه!، هیچ ل سه‌ر ڤێ مژارا هه‌ستیار نه‌جڤیان و گرنگى پێ نه‌دا!، هه‌تا كو دو ڕۆژ ماین بۆ داوى هاتنا ویلایه‌تا بارزانى كو لسه‌ر ڕێكه‌فت بوون، ئه‌ڤجا ل نشكه‌كێڤه بزاڤا گۆڕان ب مێهڤانداریا قونسولێ ئیرانێ و موئامره‌كا ئاشكرا ل په‌رله‌مانى كره ئالۆزى و دخواست كورسیكا سه‌رۆكایه‌تیا هه‌رێمێ ڤالا بمینیت، ژلایه‌كێ دی ڤه ل ده‌ڤه‌رێن نیلى و كه‌سك هێڕشى سه‌ر باره‌گایێن پارتى كرن، ب كورتى بۆ پارتى دیار بوو كو داخوازا گۆڕان ب تنێ نه‌مانا پارتیه، پێدڤیه گۆڕان زانیبا كو ب سازان هاتینه د حكوومه‌تێ دا و بێ سازانا دگه‌ل پارتى نه‌شێن بسازن!، دوورخستنا پارتى د هه‌ڤكێشێن سیاسی دا، خه‌ونه‌كا دوژمنكارانه و نه‌زانانه‌یا ته‌ڤگه‌را گۆڕان بوو كو تا نها ئه‌و و هه‌مى خه‌لكێ كوردستانێ یێ باجێ دده‌ن، له‌وما دبێژم پارتى كێشه دگه‌ل به‌خشینا پۆست و ئیمتیازا نینه، لێ ب تنێ باوه‌ریا وێ ب لایه‌نان یا لاواز بووى.
بۆچى سوپایێ توركیا هاته هه‌رێما كوردستانێ؟
ئه‌ڤه ئه‌و پرسیاره یا كو پڕانیا نه‌یارێن پارتى د شه‌ڕێ سایكولۆژی دا ل دژى پارتى ب كار دئینن، ب تایبه‌ت پارتیا كاركه‌رێن كوردستانێ كو به‌رده‌وام ل سه‌ر كه‌ناڵ و ده‌زگه‌هێن خوه یێن ڕاگه‌هاندنێ و سوشیال میدیایێ مینا كه‌ره‌سته‌یه‌كێ ڕێكخستنێ بۆ سه‌ردابرن و خاپاندنا خه‌لكێ كوردستانێ مفاى ژێ وه‌ردگریت، ب تایبه‌ت جیلێ نوو كو ب باشى ئاگاداری ڕه‌وشا سیاسیا به‌ریا نها نینن و ڕێكخستن و ڕاگه‌هاندنا پارتیا دیموكراتا كوردستانێ ژى نه‌شیایه وه‌كى پێدڤى كار ل سه‌ر بكه‌ت و ڤان كه‌سه‌رته‌یێن بێ بناغه‌یێن ڕێكخستى یێن په‌كه‌كێ ژ ناڤ ببه‌ت كو ل دژى پارتى دهێنه بكار ئینان. د سپێده‌یه‌كا هاڤینا سالا 1995ێ دا په‌كه‌كێ ده‌مژمێر سفر دانا و ل هه‌مى كوردستانێ هه‌ر مه‌قه‌ڕ و لیجنه‌كا پارتى دیموكراتى كوردستان كو ده‌ستێ وان گه‌هشتبایێ كره ئارمانجا خوه یا سه‌ربازى و ژ نشكه‌كێ ڤه شه‌ڕه‌كێ خویناوى ل كوردستانێ به‌رپا كر، ب جۆره‌كى په‌كه‌كێ شه‌ڕ ل دژى باشوور دكر كو ئێدى گولێن هاونان ل نیڤا باژێركێن كوردستانێ ددان و خه‌لكێ سڤیل دكرنه قوربانى، قوتابى ل نیڤا ئامێدیێ و دێره‌لوك هاتنه شه‌هیدكرن ب گوله هاونێن په‌كه‌كێ، كه‌مینه‌یا وان ته‌كسى دكرنه ئارمانج كو سه‌رنشینێن وان سڤیل بوون و ب ساخى هاتنه سۆتن ، په‌كه‌كێ ئه‌رزاق و كه‌ل و په‌لێن خه‌لكێن گوندان ب خورتى دبرن و تالان دكرن، ئه‌وان خێزان یێن كۆمكوژ كرین كو زارۆ دلاندكێ دا سۆتینه و…هتد، ئه‌ڤ چه‌ندا من ئاماژه پێداى هیچ كه‌سه‌ك نكاریت ئینكارێ لێ بكه‌ت و پڕانیا خه‌لكێ كوردستانێ دیده‌ڤانێن ئه‌ڤ كارێن دڕنده‌یێن په‌كه‌كێ بوون كو ل دژى باشوورێ كوردستانێ ئه‌نجامداى، په‌كه‌كێ ده‌مێ سڤیل د تاكسیان دا دسۆتن، ڕێكێن سه‌ره‌كیێن د ناڤبه‌را باژێركان دا دگرتن و ب قه‌ناس و بیكه‌یسیا هه‌مى ترۆمبێل بێ جودایی دكرنه ئارمانج، گوله هاون ل نیڤا باژێركان دخستن، سه‌لماند ب تنێ شه‌ڕێ وان دگه‌ل پارتى نه‌بوو، به‌لكى شه‌ڕێ وان ب كه‌رب و كینه‌كا زۆر دگه‌ل باشوورێ كوردستانێ بوو، ژبه‌ركو مه‌رج نه‌بوو ئه‌و خه‌لكێ وان دزانى كو سڤیلن و دكوشتن، پارتى بن.
د وى شه‌ڕی دا رۆژانه جه‌نازێن لاوان ل گوند و باژێركان تازى و شینى چێ دكرن، ڕه‌وش ب جۆره‌كێ نه‌خوه‌ش ببوو كو ژیان ل به‌رچاڤێن خه‌لكێ كوردستانێ ڕه‌ش ببوو. ئێدى پرسیاره‌ك دهێته هه‌بوونێ بۆ هه‌ر تاكه‌كى، ئه‌گه‌ر پارتى پلانه‌ك بۆ ڕاوه‌ستاندنا ئه‌و تاوان و كوشتارا په‌كه‌كێ ب سه‌رێ خه‌لكى دئینا، نه‌دانابا و چرایێ كه‌سك بۆ سوپایێ توركیا هه‌لنه‌كربا، دا چاوا فرمێسكێن دایك و كه‌س و كارێن خه‌لكێ ولاتى زوها بن؟!، گه‌لو سوپایێ توركیا هاته كوردستانێ، پشتى ڤێ چه‌ندێ خه‌لك ئارامتر لێ نه‌هات؟، گومان تێدا نینه توركیا ل وى سه‌رده‌مى ب تایبه‌ت، دوژمنه‌كێ سه‌رسه‌ختێ هه‌بوونا كوردستانێ بوو، لێ ب دیتنا من دوژمنتر نه‌بوو ژ په‌كه‌كێ!، ژ به‌ركو ئه‌وا كو په‌كه‌كێ د وان سالان دا ب سه‌رێ كوردێن باشوور ئیناى، د هه‌مى سه‌د ساڵێن ده‌رباز بوویی دا توركیا دگه‌ل باشوور نه‌كربوو!، گه‌له‌ك جاران سه‌ركردان دناڤبه‌را هه‌ڵبژارتنان دا هه‌لبژارتنا باش نینه، به‌لكى ب تنێ هه‌لبژارتنێن خراب و خرابتر یێن ل پێشیا وان، هاتنا سوپایێ توركیا یا خراب بوو، لێ ئه‌گه‌ر نه‌هاتبان دا زۆر خرابتر بیت. ژبه‌ر ڤێ چه‌ندێ ئه‌گه‌رێ سه‌ره‌كیێ هاتنا سوپایێ توركیا بۆ هه‌رێما كوردستانێ په‌كه‌كه ب خوه بوویه نه‌ك پارتى، پارتى شه‌ڕ ل دژى په‌كه‌كێ ده‌ست پێ نه‌كر، ب تنێ قوربانى یێن شه‌ڕى چه‌كدارێن پارتى نه‌بوون، له‌وما پارتى لوژیكى پێنگاڤ هاڤێته پێش و شیا ئه‌و ئاگرێ په‌كه‌كێ هه‌لكری ب ڤه‌مرینیت!.
كێشه‌یا مه‌زن د سیاسه‌تا په‌كه‌كێ دا، شاشى یێن وان ده‌مكى و پارچه‌یی نینن، به‌لكى بناغه و ستراتیژییه‌تا وان یا ل سه‌ر دچن یا شاش و نه‌لۆژیكه، د هه‌مى قووناغان دا په‌كه‌كێ یا ڤیای ب خۆرتى و خوه سه‌پاندن ببیته نوونه‌رێ گه‌لێ كورد، ژ پێخه‌مه‌ت ڤێ چه‌ندێ ژى ده‌هان هزار خه‌لك كرنه قوربانى، و هه‌تا نوكه ژى هیچ مفایه‌ك ژ شاشى یێن خوه نه‌دیتیه و یا به‌رده‌وامه!، ل رۆژئاڤا و باكورێَ كوردستانێ ژى نوكه هه‌مان سیاسه‌تا شاش دكه‌ن به‌هانه دا كو چه‌ندین ولاتێن نه‌یارێن كوردان له‌شكه‌ركێشیێ بكه‌ن، ب تایبه‌ت كو ده‌لیڤه دا سوپایێن خوه ببه‌نه د ئاخا رۆژئاڤا دا و نه‌هێلن كورد مفاى ژ ڤێ ده‌لیڤا چێبووى وه‌ربگرن و وێ پارچه‌یا كوردستانێ ژ بن ده‌ستیێ ڕزگار بكه‌ن.
شه‌ڕێ موسل و پاشه‌ڕۆژا ده‌ڤه‌رێ
رۆژهه‌لاتا ناڤین ب تایبه‌ت ولاتێن عیراقێ و سووریێ، یێن بووینه ته‌ختێ شه‌تره‌نجا وه‌لاتێن زلهێزێن جیهانێ، ئه‌مریكا هه‌ڤپه‌یمانێن وێ، دگه‌ل ئیرانێ و رۆسیا و هه‌ڤپه‌یمانێن وان وه‌كى هه‌ڤڕكێن دژوار و دوژمنێن هه‌ڤدو یاریه‌كا بێ وژدانانه ل سه‌ر دكه‌ن بۆ ئێكلاكرنا هژمارێن خوه یێن سیاسى و سه‌ربازى و ئابوورى، قوربانى ژى زارۆك و خه‌لكێ سڤیلێن ڤان هه‌ردو ولاتانه ب جۆره‌كێ سه‌ره‌كى. چ پێ نه‌ڤێت ڕێكخراوا داعش به‌ره‌كێ سه‌ر وێ ته‌ختێ شه‌تره‌نجێنه و هه‌مى لایه‌نان بزاڤ یا كری كو بۆ به‌رژه‌وه‌ندیێن خوه ب كار بینن، لێ ب ڕه‌نگه‌كێ سه‌ره‌كى ئه‌مریكا و هه‌ڤپه‌یمانێن وێ سه‌ركه‌فتى یێن ڤێ یاریێ نه.
ده‌مێ داعش ل ناڤه‌ڕاستا 2014ێ، وه‌كى ئێكه‌م پێنگاڤ مووسل داگیر كرى، مفایه‌كێ مه‌زن دیت كو ده‌ست ب سه‌ر چه‌كه‌كێ زه‌به‌لاح و پێشكه‌فتیێ ئه‌مریكی دا گرت، ده‌ڤه‌ره‌كا به‌رفره‌ه داگیر كر و ئابوورێ خوه بهێز ئێخست و نفوزا خوه زێده كر، وه‌كى ئێكه‌م درب كو ئه‌مریكا ل هێزا ئیرانێ داى ب ڕێیا داعش، پشتا مالكى ل زه‌ڤیێ دا مینا ب هێزترین زه‌لامێ ئیرانێ كو سه‌رۆك وه‌زیرانێ عیراقێ بوو، پاشان ئه‌مریكا ب به‌هانه‌یا هه‌بوونا داعش و گه‌فێن تیرۆرێ ل سه‌ر كوردان و كاره‌سات و تراژیدیێن ب سه‌ر خه‌لكێ ده‌ڤه‌رێ دا هاتى شیا كوردان وه‌كى هه‌ڤپه‌یمانه‌كێ خوه یێ سه‌ره‌كى كو دبێ چه‌ك و نفوزه‌كا پێدڤیا سیاسى بوون ل جیهانێ، هه‌م چه‌كدار بكه‌ت، هه‌م ل سه‌ر ئاستێ جیهانێ بكه‌ته ژماره‌یه‌كا گرنگ و پێناسه‌یا وان كو د زێهنیه‌تا جیهانێ دا مینا نه‌ته‌وه‌یه‌كێ شه‌ڕخواز و مه‌ترسیدار هاتبوونه نیاسین بگوهڕیت، هه‌رچه‌نده گه‌لێ كورد د ڤێ هه‌ڤكێشێ دا قوربانیێن زۆر دان و كاره‌ساتێن مه‌زن ب سه‌ردا هاتن، لێ دڕاستیدا وه‌كى ئه‌و ئاماژه و هیمایێن هه‌تا نوكه پێ دهێنه‌دان و دیارن، ده‌ستكه‌فتێن زۆرێن هه‌بووین و كورد ئۆتۆماتیك یێن شیاین سۆزا جیهانێ ژبۆ خوه ڕابكێشن كو هه‌ژى ده‌وله‌تا خوه یا سه‌ربخوه‌نه، ب دیتنا من ئه‌ڤه ئێك ژ ئارمانجێن ئه‌مریكا و ئیسرائیل بوویه، ڕاسته هه‌رێما كوردستانێ ل رۆژهه‌لاتا ناڤین ده‌ڤه‌ره‌كا جوگرافى یا كێم ب خوه‌ڤه گرتیه، لێ بناغێ دابه‌شكرنا چه‌ندین وه‌لاتێن پۆلیسى و نه‌یارێن ئه‌مریكا و ئیسرائیلێ نه و دبیت ببیته بنگه‌هه‌كێ گرنگ بۆ به‌لاڤه‌كرنا سیسته‌مه‌كێ سیكۆلاریزم ل ده‌ڤه‌رێ و هاریكار بیت بۆ نه‌هێلانا هزرا توندوتیژى ل دژى وه‌لاتێن ڕۆژئاڤا و ئیسرائیلێ.
یا ب سه‌رسوڕمانه گه‌ر هێزه‌كا سه‌ربازى بێ ده‌ستكه‌فتێن سیاسى یا ڕژد بیت پشكداریێ د شه‌ڕه‌كی دا بكه‌ت، مووسل جهێ عه‌ره‌بێن سوننه‌یه و ڕێژه‌یه‌كا زۆرێن كوردان ژى تێدا دژین دگه‌ل چه‌ندین كه‌مینه نه‌ته‌وه‌یێن دی، چ پێ نه‌ڤێت حه‌شدا شه‌عبى د ژێر كونترۆلا ئیرانێ دایه و ئه‌و وه‌لات دخوازیت ب ڕێیا هێزێن نێزیكى خوه ئه‌جندایێن خوه ل ده‌ڤه‌رێ بجه بینیت و هێلا شیعى ل مووسلێ بۆ سووریێ و لبنانێ و..هتد درێژ بكه‌ت، بێگومان ڕژدیا په‌كه‌كێ بۆ پشكداریكرنێ د ڤى شه‌ڕی دا ب تنێ وێ پرسیایێ چێ دكه‌ت گه‌لو مووسلێ چ په‌یوه‌ندى ب په‌كه‌كێ ڤه هه‌یه؟!، ئه‌ڤ چه‌نده خویا دكه‌ت كو په‌كه‌كه ژى یا ب ئه‌جندایێ لایه‌نه‌كی ڤه گرێدایه، ئه‌مریكا ب چ ئاوایه‌كى دگه‌ل پشكداریكرنا په‌كه‌كێ نه‌بوویه، واته په‌كه‌كه گه‌ر گرێدایی ب ئه‌جندایێ ئیرانێ ڤه نه‌بیت چ كار و ئارمانجه‌كا دی هه‌یه د ڤى شه‌ڕی دا؟!، په‌كه‌كه كو ب ئاشكرایی بالا ژ خوه‌ڕا چێ دكه‌ت ب ناڤێ یه‌په‌گه و یه‌په‌ژه و یه‌په‌شه و…هتد، كو ب ئاشكرایی عه‌گید ده‌مهات دان ب وێ چه‌ندێ كر كو ژلایێ عیراقێ ڤه مووچه بۆ یه‌په‌شێ دهێته دابینكرن، پرسیاره گه‌لو حكوومه‌تا عیراقێ كو ل بن هه‌ژموونا ئیرانێ دایه، گه‌ر بۆ بجهئینانا ئه‌جندایێ ئیرانێ نه‌بیت، بۆچى دێ بودجه‌ى بۆ په‌كه‌كێ دابین كه‌ت د ده‌مه‌كی دا بۆ پێشمه‌رگه‌ى دابین ناكه‌ت مینا هێزه‌كا یاسایی د دستورێ عیراقێ دا؟!،
توركیا ژ ئالیه‌كی ڤه یا ڕژده پشكداریێ بكه‌ت، مه‌به‌ستا وێ لاوازكرنا په‌كه‌كێ یه و مینا هه‌ڤپه‌یمانێ ئه‌مریكا و ئه‌نداما ناتۆ دێ پشكدار بیت، بێگومان ئه‌مریكا دێ هه‌ر هێزه‌كا ده‌رڤه‌ى هه‌ڤپه‌یمانێن خوه كه‌ته ئارمانجا سه‌ربازى كو لڤینێ بۆ شه‌ڕێ مووسل بكه‌ت، ب ڤێ چه‌ندێ دێ شكه‌ستنێ ب ئه‌جندایێ ئیرانێ ئینن، ئه‌گه‌رێن زۆرن حه‌شدا شه‌عبى ل مووسل تراژیدیا ب ئافرینیت، كو دێ به‌هانه‌یه‌كێ بۆ ئه‌مریكا چێ بیت ل سه‌رداخوازا عه‌ربێن سوننه هێزێن خوه ل مووسلێ جێگیر بكه‌ت و ده‌مه‌كێ درێژ بمینن و د پاشه‌رۆژێ دا ده‌وله‌ته‌كا سوننه ل ته‌نشت ده‌وله‌تا كوردى بهێته دیتن ل سه‌رئاخا عیراقا نوكه.
سەرەدانا سەرۆکى بۆ بەغدا ڤەکێشان بوو ژ سەربخوەبوونێ؟
د سالێن دەرباز بوویی دا دیدەڤانێن وێ چەندێ بووین کو بەرەیەک ل کوردستانێ هەیە ل دژى هەر پێنگاڤەکا بارزانی ڕادوەستیت و چەندین جاران ژى هەلویستێ وان یێ نوو ل دژى هەلویستێ وان یێ کەڤن بوویە، بۆ نموونە دەمێ تورکیا هێزێن سەربازى ل سەر سنوورێ کوردستانێ کۆم کرى و گەف ل داگیرکرنا وەلاتى دکر، یا خویا بوو سەرۆک بارزانى بوو ل بەرسینگێ تورکیا ڕاوەستیاى تا وى ڕادەى گۆتێ ئەگەر هوین مایتێکرنێ ل کەرکووکێ بکەن، ئەم دێ مایتێکرنێ ل دیار بەکر کەین کو باژێرێ کوردایە، ل وى سەردەمى بەرەیێ دژە بارزانى دگۆت بارزانى دێ باردۆخێ وەلاتى تێک دەت و پێدڤیە ئەم دگەل تورکیا خوەدى پەیوەندیێن باش بین، دەمێ تورکیا ل سیاسەتا خوە یا شاش پاشڤەچووى و پەیوەندیێن ئابوورى و دبلوماسى و سیاسى یێن باش دگەل هەرێما کوردستانێ گرێداى و بێى کو سەرۆک بارزانى هیچ خواستەکا وى سەردەمى یا تورکیا بجه ب ئینینت مینا شەڕکرن دگەل پەکەکێ، دەستبەردان ژ کوردستانی بوونا کەرکووکێ، نەهێلانا پێشمەرگەى مینا هێزەکا یاسایی و چەندین داخوازیێن دی، دیسا چەندین سالن ئەوى بەرەی دژایەتیا پەیوەندیێن هەرێما کوردستانێ و تورکیا دکەن بێ چ بەلگەیەکا مەنتق، کو هیچ کوردەکێ دلسوز نینە مفاى ژ وان پەیوەندیان وەرنەگریت.
بەرى سەرەدانا ڤێ داویێ یا سەرۆک بارزانى بۆ پایتەختێ عیراقێ ئەو بەرەیێ دژەپارتى بەردەوام پێلێن دژایەتیا سەرۆک بارزانى دئازراندن ب وێ بهانەیێ کو بارزانى پەیوەندیێن خوە دگەل بەغدایێ سار کرینە و سەرەدانا بەغدا ناکەت و نییەتێن بەغدایێ دباشن، لێ بارزانى سیاسەتەکا شاش بڕێڤە دبەت، دەمێ بارزانى چوویە بەغدا دیسان دژایەتیا بارزانى دکەنەڤە ب بهانەیا وێ چەندێ کو بارزانى ئەم ڕادەستى بەغدا کرینەڤە، وەکى بەلگە ژى ل بەغدا پشتگیرى بۆ حکوومەتا عەبادى ڕاگەهاند و بەحسێ پێکهاتنێن ئابوورى و سەربازى و سیاسى دگەل عیراقێ کرن و..هتد، ب گۆتنا وان ئێدى ئەڤ چەندە واتە پاشگەز بوون ل سەربخوەبوونێ و خەونا بارزانى و مالباتا وى کو زێدەتر ژ سەد سالانە قوربانیێ بۆ ددەن، ب ڕاستى ئەڤ جۆرە خاپاندنە ب تنێ جڤاکێن پاشڤەمایى دگریت، پێدڤیە هەر تاکەکێ ڤى وەلاتى وێ ڕاستیێ بزانیت چ جاران د سیاسەتا پارتی دا نەبوویە دژایەتیا هیچ وەلات و لایەنەکى بکەت و هەمى دەمان ب تنێ بەرگیریا کری، پارتى باوەرى ب تۆلڤەکرنێ نینە، ب دیتنا پارتى تۆلڤەکرن واتە پاقژکرنا خوینێ ب خوینێ، لەوما سەرەدانا سەرۆک بارزانى بۆ بەغدا بۆ گەهاندنا وێ پەیامێ بوویە کو ب سەربخوەبوونا کوردستانێ دێ شێین پەیوەندیێن باشتر و ب مفاتر پێکڤە گرێدەین د هەمى وارەکى دا، ئابوورى و سیاسى و ئەمنى و سەربازی و…هتد و د داهاتی دا بۆ ڤێ پەیامێ سەرەدانا ئیرانێ ژى دکەت، بارزانى ل بەغدا د کۆنگرەکێ رۆژنامەڤانی دا دگەل “عەمار حەکیم” زۆر ب ئاشکرایی گۆت ئەم جودا نابین، بەلکى دێ سەربخوە بین، واتە ئەم عیراقى نینین داکو جودا ببین، ئەم یێت هاتینە داگیرکرن و دێ خوە سەربخوە کەینەڤە، ئەڤ هەلویستێ سەرۆک بارزانى بۆ ئەو عەرەبێن شوفێنى کو ل دژى هەبوونا کوردستانێنە زۆریا دژوار بوو، ژبەرکو بارزانى ب وى هەلویستێ خوە گۆتە عەرەبان ئەم نوکە ژى د ئاخا عیراقێ دا نینین و ئەم یێت هاتینە داگیرکرن و دێ مافێن خوە زڤرینین و سەر ئاخا خوە دەوڵەتا خوە چێ کەین، لێ مخابن بەرەیێ دژە پارتى هەتا ئەڤ هەلویستێ سەرۆکى ژى بەر ڤاژى لێک ددا!، مخابن ژبەر نەبوونا ڕەوشنبیرییا سیاسیا پێدڤى هندەک خەلکێن پارتی ژى باوەر ب بەرەیێ دژەپارتی دکر!.
تاکێن رۆژهەلاتا ناڤین پەروەردەیا سیاسى گەرەکە، خەلکێن وەلاتێن ڕۆژئاڤا پێدڤیا وان زێدە ب تێگەهێ سیاسى نینە و ب تنێ وان پێدڤى ب دەستهەلاتەکێ یە کو د وارێن خزمەتگوزارى و مافێن مرۆڤان دا پترین خزمەتا وان بکەت، لێ مەزنترین پرسگرێکا خەلکێ ڕۆژهەلاتا ناڤین ئەوە کو پێدڤیە هەر تاکەک پەروەردەیەکا باش یا سیاسى هەبیت داکو بشێت د سیاسەتا دەستهەلاتدارێن وەلاتێ خوە بگەهیت، ژبەرکو وەلاتێن رۆژئاڤا و ئورۆپى سیاسەتێ ل دەرڤەى وەلاتێن خوە دکەن، لێ ل رۆژهەلاتا ناڤین سیاسەت کەفتیە د کولانان دا ژى، ئەگەر لێى تێنەگەهن ژیانا وان ڕەش دکەت، پێدڤیە تاکێ جڤاکى بزانیت مەبەست و بەرنامە و ستراتیژیەتا هەر حزبەکا وەلاتێ وى چی یە.
ڕێره‌وا خوه‌نیشادانێن د ڕێ دا
كوردستان د هه‌ستیارترین ده‌م دا ده‌رباز دبیت، ڕۆژ بۆ ڕۆژ هیمایێن نێزیكبوونا كوردستانێ بۆ سه‌ربخوه‌یێ پتر دیار دبن ب تایبه‌ت د ڤێ داویێ دا كو لڤینێن دبلوماسى و سیاسى د ناڤبه‌را ولاتێن زلهێزێن جیهانێ و كوردستانێ دا زۆر چالاك بووینه، وه‌كى دیار سه‌رۆكێ هه‌رێما كوردستانێ ڕێزدار مه‌سعود بارزانى چاڤه‌ڕێى ده‌مێ پێدڤیه بۆ پراكتیزه‌كرنا ئه‌جندایێ خوه كو ڕاگه‌هاندنا ده‌وله‌تا كوردی یه، بێگومان شه‌ڕێ مووسلێ گرێدانه‌كا مه‌زن ب ڤێ چه‌ندێ ڤه هه‌یه، ژ به‌ركو هه‌م نه‌خشه و سنوورێ هه‌رێما كوردستانێ ل داویا شه‌ڕێ مووسلێ دێ ئێكلا بنه‌ڤه و هه‌م ژى دێ ڕێكه‌فتنێن نوو یێن سیاسى و ئه‌منى هێنه گرێدان كو ژ بۆ هه‌رێما كوردستانێ یا گرنگه ڕێكه‌فتنه‌ك د ناڤبه‌را عیراقێ و هه‌ڤپه‌یمانان و هه‌رێما كوردستانێ دا هه‌بیت داكو قووناغا پشتى شه‌ڕێ مووسلێ بهێته دیاركرن و پشتڕاستیێ بده‌نه كوردستانێ هه‌ر لایه‌نه‌كێ حوكمڕانیێ ل وى باژێرى دكه‌ت، مه‌ترسى نه‌بیت ل سه‌ر ئه‌وله‌هیا هه‌رێما كوردستانێ. بێگومان چه‌ند كورد زێده‌تر به‌ره‌ف سه‌ربخوه‌یێ نێزیك دبن گڤاشتن و كارتێن نه‌یارێن هه‌بوونا ده‌وله‌ته‌كا كوردى زێده‌تر دبن، د ڕاستی دا خوه‌نیشادان بۆ داخوازكرنا مووچه‌یان نه‌ك ب تنێ مافه‌كێ ڕه‌وایێ خه‌لكێ كوردستانێ یه، به‌لكى بۆ حكوومه‌تا هه‌رێما كوردستانێ و سیاسه‌تا هه‌رێمێ ب گشتى پێنگاڤه‌كا ئه‌رێنی یه، ژ به‌ركو ئه‌ڤ چه‌نده فاكته‌ره‌كێ گرنگه كو جڤاكێن نیڤده‌وله‌تى پتر هه‌ست ب ئازار و ئه‌و گڤاشتنێن ئابوورى یێن ل سه‌ر خه‌لكێ هه‌رێما كوردستانێ چێ بووى بكه‌ن، و چ گومان تێدا نینن كو فاكته‌رێ سه‌ره‌كى یێ ڤێ قه‌یرانا ئابووریا هه‌رێما كوردستانێ گرتى، ژ ئه‌نجامێ سیاسه‌تا شاش و شوفێنیا به‌غدایێ یه كو ل هه‌رمبه‌رى هه‌رێما كوردستانێ گرتیه‌به‌ر، له‌وما گازنده كرن و خوه‌نیشادانێن خه‌لكێ هه‌رێما كوردستانێ پتر دێ ڤان ڕاستیان دیار كه‌ت و فاكته‌ره‌كێ گرنگه كو كورد بۆ ب ده‌ستڤه‌ئینانا پشتگیریا نیڤده‌وله‌تى ژى كار پێ بكه‌ن، لێ د ڕاستی دا ل هه‌ر كاودانه‌كێ مه‌زن كو چێ دبیت، پێدڤیه لایه‌نێن نه‌ڕێنى نه‌هێنه ژبیركرن، بێگومان نه‌یارێن ده‌وله‌تا كوردى دێ شێن د ڤان حاله‌تان دا مفاى بینن و ل دژى هه‌رێما كوردستانێ كارتێن گڤاشتنێ ب كار بینن و ڕێڕه‌و و ئارمانجا خوه‌نیشادانان بگهۆڕن بۆ بجهئینانا ئه‌جندایێن خوه ل دژى ئارمانج و ئه‌جندایێن كوردستانێ، ب دیتنا من دوژمنێن ئازادیا كوردستانێ دێ شێن تا ڕاده‌یه‌كێ زیانێ گه‌هینه هه‌رێما كوردستانێ ب تایبه‌ت ئالۆزكرنا ئه‌وله‌هیێ و قوربانیكرنا هنده‌ك خه‌لكێن دی كو پتریا وان بێ ئاگه‌ه و نه‌زانن د وارێ سیاسی دا دبنه نێچیرا ولاتێن دوژمن و هنده‌ك لایه‌نێن كوردى، كو ژبۆ وان جانێ كوردان بهایێ داخوازیه‌كا بچووك یا دوژمنێن كوردستانێ نینه و خوه‌دى دیرۆكه‌كا خرابن د ڤان مژاران دا، ل خوه‌نیشادانێن 17ێ شوباتا 2011ێ ئه‌ڤ ڕاستیه هاتیه سه‌لماندن، ئه‌و حكوومه‌تا به‌رده‌وام ئۆپۆزسیۆنێ داخوازا هه‌رفاندنا وێ دكر و زێده‌تر ژ مه‌هه‌كێ خه‌لكه‌ك كره قوربانى، ژیانا خه‌لكى ئالۆز كر و ل وى سه‌رده‌مى هه‌تا نها ژى سایكۆلۆژیا خه‌لكێ تێك دایه، و كاریگه‌ریێن وێ یێن نێگه‌تیڤ یێن ماین ل سه‌ر لایه‌نێ جڤاكى و بازرگانى، و ل داویێ ئه‌و ب خوه پشكدارێ وێ حكوومه‌تێ بوون و نه‌شیان ئێك چاكسازى ب تنێ د وه‌زاره‌ته‌كێ دا ژى بكه‌ن كو خوه‌دى چه‌ندین وه‌زاره‌ت و پۆستێن بلندن، جهێ پرسیارێ یه ئه‌و ئۆپۆزسیۆنا خه‌لكه‌ك دایه كوشتن د خوه‌نیشادانێن 17 شوباتێ دا و باردوخ ئالۆزكرى و ل داویێ پشكدارى د وێ حكوومه‌تێ دا كرى یاكو بۆ هه‌ڕفتنا وێ زارۆك ژى ب كوشتن داین، چ به‌رسڤ بۆ قوربانى یێن وى سه‌رده‌مى هه‌بوون؟!، گه‌لو خوینا وان چ به‌رهه‌مه‌ك هه‌بوو، ژبلى بجهئینانا ئه‌جندایه‌كێ ده‌ره‌كى كو ب تنێ تێكچوونا هه‌رێما كوردستانێ ئارمانج بوو؟!. چاڤه‌ڕێى خوه‌نیشادانه‌كا دی دهێته‌كرن كو دیسا دێ لوبى و شانه‌یێن نه‌یارێن كوردستانێ چالاك بن، كو جهێن بازرگانى و كاروكه‌سابه‌تا خه‌لكى دێ بنه ئارمانج، خه‌لكه‌ك دێ بیته قوربانى، باره‌گا و ئاڤاهیێن پارتى دیموكراتى كوردستان وه‌كى حزبا كار دكه‌ت بۆ سه‌ربخۆیێ دێ بنه ئارمانجا سه‌ره‌كى، ئارمانج دێ ده‌رخستنا پارتى بیت ل سلێمانى و گه‌رمیان ب مه‌به‌ستا ژێك جوداكرنا هه‌رێما كوردستانێ. چ گومان تێدا نینه ئه‌ڤ كارتا نه‌یاران دێ وه‌كى هه‌مى كارتێن دی سۆژیت، لێ مخابن ترس ل قوربانیبوونا خه‌لكه‌كی و تێكچوونا سایكۆلۆژیا خه‌لكێ كوردستانێ ب گشتی یه.
مووچه یان ده‌وله‌ت؟
د ژیانا مرۆڤایه‌تیێ دا دو جۆرێن به‌رژه‌وه‌ندیان هه‌نه، ئێك به‌رژه‌وه‌ندیێن تایبه‌ت، دو به‌رژه‌وه‌ندیێن گشتى، د ناڤ جڤاكێن ڤه‌مایی دا به‌رده‌وام به‌رژه‌وه‌ندیێن گشتى ئه‌رزان دهێنه فرۆتن، د ده‌مه‌كی دا هه‌مى ده‌ما به‌رژه‌وه‌ندیێن گشتى و به‌رژه‌وه‌ندیێن تایبه‌ت پێكڤه دگرێداینه و گه‌له‌ك جاران گرنگی نه‌دان ب به‌رژه‌وه‌ندیێن گشتى باج دانا وێ زۆر پتره ژ باج دانا گرنگی نه‌دانێ ب به‌رژه‌وه‌ندیێن تایبه‌ت.
كوردستان د قه‌یرانه‌كا دژوار یا سیاسی و دارایی دا ده‌رباز دبیت، به‌رى كو ئه‌م ژ به‌ر نه‌بوونا مووچه و باردوخێ دژوارێ كوردستانێ ده‌وله‌تا كوردى ڕه‌ت بكه‌ین، پێدڤیه وێ ڕاستیێ بزانین ژ به‌ر نه‌بوونا ده‌وله‌تێ یه ئه‌م ڕاستى ڤان هه‌مى قه‌یرانێن دژوار و شه‌ڕێ داعش بووینه، كو ب ڤى ئاوایی مه قوربانی دان و دده‌ین، ئه‌گه‌ر ئه‌م خوه‌دى ده‌وله‌ت باین، دا ئه‌ڤ هه‌مى ئاریشه ب ساناهى هێنه چاره‌سه‌ركرن، بۆ نموونه: ئه‌گه‌ر مه ده‌وله‌تا خوه هه‌بایه:
1. دا شێین خوه‌دى چه‌كه‌كێ بهێز بین و وه‌لاتێ خوه ژ هێرش و مه‌ترسیێن ڕێكخراوه‌كا تیرۆرستی مینا داعش پارێزین به‌رى كو ئه‌و بگه‌هن كاره‌ساتێن مینا كاره‌ساتا شنگالێ ب سه‌رێ گه‌لێ مه بینن.
2. دا شێین سنوورێن خوه كونترۆل كه‌ین و ڕێكێ ل هه‌بوونا سیخۆر و تێكده‌رێن دوژمن گرین، كو ئه‌گه‌ره‌كێ سه‌ره‌كیێ قه‌یرانێن وه‌لاتى، ده‌ستێ ده‌ره‌كی یه كو حزبێن كوردستانێ پال دده‌ن بۆ چێكرنا ئالۆزیان.
3. په‌یوه‌ندیێن حزبان ب ڕێكێن نه‌شه‌رعى و شاش، دا سنووردار بن و هیچ لایه‌ك نه‌دشیا ل دووڤ به‌رژه‌وه‌ندیێن تایبه‌تێن حزبى وه‌لاتى قوربانى ئه‌جندایێن ولاته‌كێ دی بكه‌ت.
4. هه‌بوونا ده‌وله‌تا كوردى حه‌شارگه‌ها بۆ گه‌نده‌لكاران ناهێلیت كو ژ به‌ر قانوونێ خوه تێدا ڤه‌شێرن و حزبه‌ك یان لایه‌نه‌ك ژى ل كوردستانێ بشێت به‌ره‌ڤانیێ ژێ بكه‌ت، ئه‌ڤ چه‌نده ژى بۆ به‌رهنگاركرنا گه‌نده‌لیێ زۆر یا گرنگه كو د نوكه دا زۆر یا ب زه‌حمه‌ته.
5. هه‌تا نوكه د بچووكترین چالاكی و كۆمبوونێن نیڤده‌وله‌تی دا ئه‌م كورد ژ به‌ر عیراقێ نه‌شێین به‌شدار بین، بۆ نموونه چه‌ندین جاران وه‌لاتێن جیهانێ ل سه‌ر شه‌ڕێ داعش كۆم بووینه، لێ نوونه‌رێ كوردان تێدا نه‌بوویه د ده‌مه‌كی دا هێزا پێشمه‌رگێن كوردستانێ وه‌كو لایه‌نه‌كێ سه‌ره‌كى ل سه‌ر زه‌ڤیێ هه‌یبه‌ت و هێزا داعشێ شكاندیه.
6. نه‌بوونا ده‌وله‌تێ په‌یوه‌ندیێن كوردستانێ دگه‌ل وه‌لاتێن جیهانێ زۆر سنووردار كرینه، ئه‌ڤێ چه‌ندێ ژى كاریگه‌ریێن نێگه‌تیڤ ل سه‌ر ئابوورێ كوردستانێ یێن هه‌ین كو نه‌چارین باجه‌كا زۆرتر بده‌ین، داكو ولاتێن دی سه‌ره‌ده‌ریێ دگه‌ل مه كوردان بكه‌ن، بۆ نموونه چه‌ندین سالن ئه‌م نه‌فتا خوه زۆر ئه‌رزانتر و ب زه‌حمه‌تتر د بازارێن جیهانێ دا دفرۆشین.
7. ئه‌گه‌ر مه ده‌وله‌ت هه‌بایه ئه‌ڤ قه‌یرانێن نها به‌روكێن وه‌لاتى گرتى ب ساناهى چێ نه‌دبوون، لێ ئه‌گه‌ر ئه‌م ڕاستى قه‌یرانه‌كا ب ڤى ئاوایی ژى بباین، دا شێین كۆژمه‌كێ پاره‌ى ب قه‌رز ژ بانكه‌كا نیڤده‌وله‌تى وه‌رگرین و وه‌لات مینا نها نه‌دكه‌فته د ژێر فشارا برسی بوونێ دا.
8. ژبه‌ر نه‌بوونا ده‌وله‌تێ ئه‌م نه‌شیاینه گرنگیی ب پێشخستنا كه‌لتورى و زانستى و هه‌مى لایه‌نه‌كێ وه‌لاتى بده‌ین كو ئه‌ڤ چه‌نده زۆر یا گرنگه بۆ به‌خته‌وه‌ریا جڤاكان.
و چه‌ندین خالێن دی كو مفایێن ده‌وله‌تا سه‌ربخۆیی ب ساناهى ناهێنه هژمارتن، له‌وما پێدڤیه تاكێ كورد وێ راستیێ بپه‌ژرینیت كو ده‌وله‌ت بۆ چ حزبان تایبه‌ت نینه و نه‌بوونا ده‌وله‌تێ فاكته‌رێ مه‌زنێ هه‌بوونا هه‌مى قه‌یرانا و قوربانیدانێن گه‌لێ مه‌یه، ده‌مێ ده‌وله‌ت هاته دامه‌زراندن، خه‌لك دێ جۆر و سه‌ركرده‌یێن حوكمڕانیێ هه‌لبژێریت، لێ گرنگ ئه‌وه كو ده‌وله‌تا كوردى هه‌بیت، د ده‌وله‌تا كوردی دا كه‌سه‌كێ نه‌ته‌وه‌یه‌كێ دی نه‌شێت حوكمى ل مه بكه‌ت، ئه‌گه‌ر هات و ب ده‌نگدان ژى ب ڕه‌گه‌ز نه‌ته‌وه‌یه‌كێ دی بوو سه‌ركرده ل ولاتى چ جاران نه‌شێت ژ به‌ر كوردبوونێ دژایه‌تیا مه بكه‌ت، گومان تێدا نینه چێبوونا ده‌وله‌تا كوردى نانێ گه‌له‌ك وه‌لات فرۆشێن كورد ژى دێ بڕیت، دێ ده‌ستێن چه‌په‌لێن گه‌له‌ك وه‌لاتان د ناڤ ڕێزێن كوردان دا هێنه بڕین و نه‌شێن ب كه‌یفا خوه سه‌ره‌ده‌ریێ دگه‌ل واقعێ كوردستانێ بكه‌ن و حوكمى ل سه‌ر ئابوور و سیاسه‌تا كوردستانێ بكه‌ن، له‌وما بزاڤكرن بۆ چێكرنا ده‌وله‌تا كوردى به‌رژه‌وه‌ندیێن گه‌له‌ك وه‌لات و لایه‌نان دئێخیته د مه‌ترسیێ دا، ئه‌ڤ چه‌نده ژى وه‌دكه‌ت ئه‌و لایه‌ن و ده‌وله‌ت به‌رده‌وام بزاڤێ بكه‌ن داكو ئه‌ڤ ده‌وله‌ته نه‌هێته دامه‌زراندن.
نيشاندان
WP Facebook Auto Publish Powered By : XYZScripts.com