پارتى دیمۆكراتى كوردستان مینا حزبه‌كا نه‌ته‌وه‌یی كو خوه‌دى زێده‌ترین جه‌ماوه‌ره ل كوردستانا باشۆر ب تایبه‌ت، هه‌تا ئه‌ڤرۆ ژى به‌گڕه‌وه‌ندێ وێ یێ دیرۆكى و شۆڕشگێریا نه‌ته‌وه‌یی پترین كاریگه‌ریا هه‌ى ل سه‌ر ئاستێ وێ یێ جه‌ماوه‌رى، به‌رى زێده‌تر ژ سه‌د ساڵان ماڵباته‌كێ ل ده‌ڤه‌را بارزان جهێ خوه د ناڤ دلێ خه‌لكێ كوردستانێ ڤه‌كر و ئه‌ڤ جه گرتنه هێدى هێدى گه‌هشته ڕاده‌یه‌كێ كو خه‌لكێ به‌رهه‌ڤ بیت جانێ خوه بده‌ت بۆ ئه‌و ڕێباز و به‌رنامه‌یێن ماڵبات ئانكو شێخێن بارزان دادڕێژن، بێ گومان ئه‌و هه‌بوونا ئێكسانی و دادپه‌روه‌ریێ و نه‌بوونا زۆرداریێ و دژایه‌تیكرنا ئه‌و ده‌به‌گ و ئاغایێن زۆردارى دكر و دژایه‌تیكرنا سیاسه‌تا دوژمنێن نه‌ته‌وه‌یا كورد ب تایبه‌ت ده‌سه‌ڵاتدارێن عیراقێ فاكته‌رێن سه‌ره‌كى بوون كو ئه‌ڤ ماڵباته ببیته په‌ناگه‌هه‌ك ژ بۆ لێ قه‌ومیایی و خه‌لكێن ژێر زۆرداریێ دا، رێژه‌یه‌كا هه‌ره زۆر یا خه‌لكێ كوردستانێ ژى ل ژێر زولم و زۆرداریێ بوون، ب ڤى ئاوایی رێبازا مالباتا بارزانى ل سه‌رده‌مێ شێخ عه‌بدلسه‌لامێ بارزانى بۆ بنیاته‌ك بۆ بزاڤه‌كا سیاسى و شۆرشگێرى بۆ گه‌لێ كوردستانێ كو هه‌تا نها ژى پارتى دیمۆكراتى كوردستان ب وێ دیرۆكێ و به‌گڕه‌وه‌ندێ رێژه‌یه‌كا زۆر یا جه‌ماوه‌رى ل دۆرێن خوه كۆم دكه‌ت، واته به‌گڕه‌وه‌ندێ دیرۆكى و ئه‌و قوربانیدانا خه‌لكێ كوردستانێ ل سه‌ر رێبازا پارتى و بارزانى داى فاكته‌رێن سه‌ره‌كینه كو نوكه پارتى مینا حزبا ئێكێ ل كوردستانێ دهێته هه‌ژمارتن، هه‌روه‌سا بابه‌تێن كه‌لتۆرى، ئه‌ڤ خوه‌ش ڤیانا مالباتا بارزانى ژ لایێ جه‌ماوه‌رێ پارتیڤه یێ بۆیه كه‌لتۆر، واته پڕانیا جه‌ماوه‌رێ پارتى مینا بیروباوه‌رێن ڕوحى ژ دایك و باب و كه‌س و كارانڤه مینا میرات بیروباوه‌رێن سیاسى و نه‌ته‌وه‌یی وه‌ردرگرن، لێ ئه‌گه‌ر پارتى گوهارتنان ل گه‌ل واقعى نه‌كه‌ت ئه‌ڤ خوه‌ش ڤیانه هه‌تا داویێ نابیت، هه‌روه‌سا خاله‌كا دیكه یا گرنگ كو پارتى مفاى لێ وه‌ردگریت هه‌بوونا ئارمانجا ده‌وله‌تا كوردیه د سیاسه‌تا پارتیدا، ئه‌ڤ فاكته‌رێن مه به‌حس ژێ كرى هۆكارێن سه‌ره‌كینه كو پارتى ل سه‌رێ لیستا حزبێن كوردستانى دهێت، لێ گه‌له‌ك خالێن نێگه‌تیڤ یێن هه‌ین كو هه‌ڤڕكێن پارتى ل دژى پارتى مفاى ژێ دبینن، ئێك ژ وان نه‌بوونا چاڤدێریه‌كا باش ل سه‌ر ئیدارى و ماددایاتان، هه‌روه‌سا گرنگى نه‌دان و خوه بێ منه‌ت كرن ل ته‌خێ دلسوز و قوربانیده‌ران، بێ شیانى ژ لایێ رێخستنێ و ڕاگه‌هاندنێ ڤه، ئه‌ڤان چه‌ند فاكته‌ران برینه‌كا مه‌زنێ ل له‌شێ پارتى ڤه‌كرى و باجه‌كا مه‌زن دده‌ت و ئه‌گه‌ر به‌رده‌وامى هه‌بیت دێ پارتى زۆر زیانمه‌ندتر بیت و ئه‌ز باوه‌رم د چه‌ند سالێن داهاتیدا ل سه‌رێ لیستێ نامینت و دیرۆك و قوربانیدانێن خوه دێ قوربانێ چه‌ند به‌رپرس و كه‌ساتیان كه‌ت.
ل ڤێ داویێ پارتى هنده‌ك بریار ده‌ركرن و هنده‌ك به‌رپرس لادان و پڕانیا وان ژى جهێن وان لێك گوهارتن، ب دیتنا من ئه‌ڤ گوهۆرینێن پارتى كرین ئه‌گه‌ر چ پێنگاڤێن نه‌رێنى نه‌بوون، لێ ل ئاست داخوازیێن جه‌ماوه‌رێ پارتى نینن، ڕاسته گه‌له‌ك ژ به‌رپرسێن سه‌ركردایه‌تى و لق و مه‌كته‌بێن پارتى خه‌لكێن قوربانیده‌رو دلسۆزن، لێ دوباره و سێ باره و چار باره‌بوونا وان ل سه‌ر كورسیێ به‌رپرسیاره‌تیێ جه‌ماوه‌رێ پارتى دلگران دكه‌ت، هیڤی یێن وان كه‌سان دمرینیت یێن كو هیڤی هه‌ى و كاردكه‌ن سه‌رده‌مه‌ك بهێت كو به‌رپرسیاره‌تییه‌كێ د ناڤ رێزێن پارتیدا وه‌ربگرن، جه‌ماوه‌رێ پارتى تێنى یێن گوهارتنانن، گوهارتنێن جه‌وهه‌رى نه‌ك ب تنێ ئالوگوڕ كرنا به‌رپرسان، پارتى پێدڤیه واقعیتر بیت وێ ڕاستیێ ژبیر نه‌كه‌ت كو ده‌رگه‌ه گرتن ل سه‌ر جه‌ماوه‌رێ خوه بێ باج نابیت، هه‌كه چ هه‌تا نها ژى ب بێ منه‌تیێ ژ دلسۆزان و قوربانیده‌ران بۆ پارتى یا چوویه سه‌ر، لێ پارتى كو خوه‌دى ده‌وله‌مه‌ندترین دیرۆكا شۆره‌ِشگێرى و نه‌ته‌وه‌یه نه‌شیایه نیڤیا جه‌ماوه‌رێ كوردستانێ ڕازى بكه‌ت كو ل پشت پارتى ڕابوه‌ستن، بۆ نموونه هه‌كه په‌رله‌مانى كێشه‌یێن سیاسى و ئیدارى و قانوونى ل كوردستانێ چێكرن، ژ شاشى یێن سیاسه‌تا پارتیه كو نه‌شیایه د ئاست هێزا دیرۆكى و قوربانیده‌ریێن خوه دا ده‌نگان ل هه‌لبژارتناندا بئینیت و سه‌رۆكى په‌رله‌مانى نه‌كه‌ڤیته د ده‌ستێن نه‌یارێن وێ و دۆستێن دوژمنێن وێ دا!، ڕاسته پارتى سیاسه‌تا وێ یا ستراتیژى ل گه‌ل گه‌له‌ك وه‌ڵاتێن زلهێزێن جیهانێ ب هێزترین سیاسه‌ته ل سه‌ر ئاستێ حزبێن كوردستانێ، لێ گه‌ره‌كه ژ بیر نه‌كه‌ت هێزا جه‌ماوه‌رى یا بێ هه‌ڤتایه.
نووترين نووچه
- پەرلەمانتارەكێ رۆسی: سەرۆك بارزانی ئەشقا كوردستانێ د دلێ هەموویان دا چاند
- بەغدا ل گەل هندێ یە هەلبژارتن ب پشكداریا هەموو ئالی و پێكهاتێن كوردستانێ بهێنە كرن
- ئەو دەولەتا میلیشیا ل ئیراقێ دروستكرین دژ كوردستانێ بكار دئینیت
- بڕیارا هەلبژارتنێن كوردستانێ د دەستێن نێچیرڤان بارزانی دایە و ئامادەبوونا وی بۆ بەغدا گەلەك یا گرنگە
- هەردو بانكێن ئیراقێ رەشید و رافیدەین د لیستا رەش دانە و دۆلار بۆ ناهێتە هنارتن
- ب پشكداریا نێچیرڤان بارزانی كۆمبوونا هەڤپەیمانیا بڕێڤەبرنا دەولەتێ هاتە كرن
- سەرۆكێ هەرێما كوردستانێ ل گەل سەرۆككۆمارێ ئیراقێ كۆمبوو
- سەرۆكێ هەرێما كوردستانێ سوپاسیا فایق زێدانی ژ بەر رۆلێ وی یێ كاریگەر كر
- فەرەنسا هەڤسۆزی و پشتەڤانیا خوە بۆ هەرێما كوردستانێ دوپاتكر
- نەوال مووسەوی: مەرەم ژ ئارمانجگرتنا كۆرمۆر تێكدانا رێككەفتنا د ناڤبەرا حوكمەتا هەرێما كوردستانێ و حوکمەتا ئیراقێ دا یە
كامی كمال
ترامپ دشێت چ بكه‌ت؟
دوناڵد جۆن ترامپ كو چل و پێنجه‌مین سه‌رۆكێ ویلایه‌تێن ئێكگرتیێن ئه‌مریكایه، د بانگه‌شه‌یێن هه‌ڵبژاردنێن سه‌رۆكاتیا ئه‌مریكا دا بزاڤه‌كا مه‌زن كر كو بێژیته خه‌لكێ جیهانێ و ئه‌مریكا مه ل به‌ره گوهارتنێن دیار و مه‌زن د سیاسه‌تا خوه دا بكه‌ین و ئێدى ده‌مێ نه‌رمیێ و بێ ده‌نگیێ بسه‌رچوو، ترامپ تا ڕاده‌یه‌كێ یێ سه‌ركه‌فتى بوو و ئه‌ڤ چه‌نده دیار كر، سه‌خمه‌راتى ڕه‌خنه‌یێن دژوار ژ لایێ هنده‌ك وڵات و نڤیسه‌رێن ناڤدارێن جیهانێ و پێكئانینا خوه‌نیشادانان ل دژى ترامپ، ناڤبرى شیا سه‌ركه‌فتنێ بئینیت و ببیته سه‌رۆكێ ویلایه‌تێن ئێكگرتى یێن ئه‌مریكا، د قووناغێن ده‌سپێكێدا ده‌مێ ترامپ چوویه كوچكا سپى هیمایێن گوهارتنێن سیاسه‌تا ئه‌مریكا به‌رچاڤ و ئاشكه‌را بوون، ترامپ ده‌ست ب گه‌فان كر و كرنه كردار بۆ نموونه هه‌ر د هه‌یاما ده‌سپێكێدا گڤاشتنێن ئابوورى ل سه‌ر ئیرانێ زێده كرن و دژایه‌تییا ڕێكه‌فتنێن ئیداره‌یا ئوباما دگه‌ل ئیرانێ دكه‌ت و ب گشتى ل دژى وه‌رگرتنا په‌نابه‌ران ڕادوه‌ستیت ب تایبه‌ت په‌نابه‌رێن ب ئایین بسلمان.
جهێ پرسیارێ ئه‌وه كو ترامپ دشێت سیاسه‌تا ستراتیژى یا ویلایه‌تێن ئه‌مریكا بگوهۆریت؟!، گه‌لو ئه‌مریكا كو ب وێ هندێ یا به‌رنیاسه پلانێن سیاسى بۆ نیڤ سه‌ده‌یێ دادڕێژیت و كار بۆ ئارمانجێن خوه دكه‌ت، كه‌سه‌ك دشێت ب چه‌ند رۆژ ئانكو چه‌ند مه‌ه و ساله‌كا پێشیا شه‌مه‌نده‌فه‌را وێ بگریت و به‌رێ وێ به‌ره‌ف لایه‌كێ دیكه بده‌ت؟، بێ گومان ب دیتنا من مه‌حاله، واته ئه‌گه‌ر ئه‌مریكا ئه‌و ئه‌مریكا بیت یاكو زلهێزترین و پێشكه‌فتیترین ولاتێ جیهانێیه، ب چ واته‌یه‌كێ كه‌سه‌ك دشێت هه‌مى باڵانسان به‌رۆڤاژى بكه‌ت؟!، نه‌خێر ب دیتنا من ستراتیژیا سیاسی یا ئه‌مریكا یا دارێشتییه و بتنێ سه‌رۆكێن ئه‌مریكا دئێخنه د قووناغا پراكتیزه كرنێدا، ئه‌مریكا بۆ سه‌ركه‌فتنێن خوه یێن سیاسى هه‌ر پێنگاڤه‌كێ دهاڤێژیت، جوداهیا سیاسه‌تا ئه‌مریكا دگه‌ل وڵاتێن رۆژهه‌لاتا ناڤین ئه‌وه كو سیاسه‌تا ئه‌مریكا یا دیار نینه، وڵاتێن دیكه نه‌شێن د سلاڤ و گرنژینا ئه‌مریكا تێبگه‌هن، بۆ نمونه ئه‌مریكا زۆر ب راسته‌وخوه و دڕاگه‌هاندنێدا پشتگیرییا حوكمه‌تا نورى مالكى دكر، لێ ده‌مێ ل نورى مالكى قه‌ومى و د شه‌ڤه‌كێدا پارێزگه‌ها مووسل كه‌فتیه د ده‌ستێ داعشدا و د ده‌مه‌كێ كێمدا به‌غدایا شیعه‌یان ل مرنێ نزیك بووى، ئه‌مریكا بێ ده‌نگى هه‌ڵبژارد و پشت دا به‌غدا، د ده‌مه‌كێدا هه‌ولێر ب هێلا سۆر دا زانین و ب ڕژدى به‌رگیرى ل ئه‌وله‌هیا هه‌ولێرێ كر هه‌رچه‌ند د راگه‌هاندنێ و به‌یاننامه‌یاندا كوچكا سپى زێده‌تر به‌رگیرى ل مالكى دكر، ئه‌ڤ سیاسه‌تا ئه‌مریكا گه‌له‌ك جاران ئه‌زمونێن دایه مه كو پێدڤیه ئه‌م ل شوونا به‌رێخوه بده‌ینه گرنژین ئانكو ڕوومه‌تێ توڕه یێ ئه‌مریكا، ئه‌م ل به‌رژه‌وه‌ندى یێن وێ بنێرین و بشێین خوه دگه‌ل ستراتیژییا وێ یا سیاسى بگونجینین.
د سه‌رده‌مێ داهاتیدا كو ترامپ دێ سه‌رۆكاتیا ئه‌مریكا كه‌ت، وه‌سا دیاره كو دێ ئه‌مریكا پێتر ژ هه‌ر بواره‌كێ دیكه گرنگیێ ب بهێزكرنا هه‌ژمونێ خوه یێ سیاسى و سه‌ربازى ده‌ت، دیاره ده‌مێ هاتى كو ئه‌مریكا گورزێن سه‌ربازى ل نه‌یارێن خوه بده‌ت و ئاینده‌یا خوه مینا ب هێزترین وڵاتێ جیهانێ پێتر پشت راست بكه‌ت، له‌وما گه‌ر ئه‌م هزر بكه‌ین سایكولوژییا دوناڵد ترامپ یا ئالۆزه ئانكو كه‌سه‌كه دێ سیاسه‌تا ئه‌مریكا تێكده‌ت و مه‌ترسیان ل سه‌ر وى ولاتى چێكه‌ت، ئه‌م دشاشین. ب دیتنا من د ڤێ قووناغێدا دۆزا كوردى بابه‌ته‌كێ گرنگه د سیاسه‌تا كۆچكا سپیدا و دێ كوردستان پێنگاڤێن باش چیته پێش، ژ به‌ركو ئه‌مریكا ب ڕژدیتر و بهێزتر ل به‌رێ دێ دژایه‌تییا دۆژمنێن خوه كه‌ت كو دوژمنێن مه و وان ئێكن.
خوه‌ش ده‌رباز كرن ل گه‌ل نوورى مالكى!
به‌لێ جه‌نابى مالكى بێگومان خه‌لكێ كوردستانێ خوشگوزه‌رانیێ دخوازن، لێ خوشگوزه‌رانى نه‌ك ل ژێر ده‌بابه و زریپۆشێن حه‌شدا شه‌عبی دا بیت. نوورى مالكى هه‌یام هه‌یام بزاڤێ دكه‌ت ب ده‌ستێن خوه یێن ژه‌هراوى رومه‌تێ كورداندا بشێلیت، مالكى به‌رى كو رۆندكێن تیمساحان ببارینیت پێدڤیه ل ده‌سپێكێ ب بڕینا بۆدجه و مووچه‌یێن خه‌لكێ كوردستانێ و گه‌فكرن ب هێزێن دیجله ناخێ خوه یێ ڕاسته‌قینه یێ ژه‌نگى نیشا نه‌دابا و نه گۆتبا كورده‌ك ل جهه‌كێ عه‌ره‌به‌كێ بكوژیت پێدڤیه ئه‌م ژى كورده‌كى بكوژین (دم بالدم)!!، داكو شیابا وه‌كى دوژمنه‌كێ دۆزا كوردى هنده‌ك كوردێن دی كه‌ژى مینا وان نوكه‌ره كوردان یێن كو پشتگیریێ ل سیاسه‌تا وى دكه‌ن خاپاندبان و ئارمانجێن خوه پێكابان، ده‌مێ مالكى بڕیارا بڕینا بۆدجێ هه‌رێما كوردستانێ ده‌ركرى ژبه‌ر برسیكرنا ئه‌ندام و لایه‌نگرێن حزبه‌كێ نه‌بوو، ژبه‌ر ئالوزكرنا ژیانا پشكه‌كا خه‌لكێ كوردستانێ نه‌بوو، ژبه‌ر كو هه‌مى خه‌لكێ كوردستانێ ب لایه‌نگرێن عه‌ره‌بان و حه‌شدا شه‌عبى و مالكى بخوه ژى ڤه ڕاستى قه‌یرانێ هاتن، واته ب تنێ ژ به‌ر كوردبوونێ بوو ئه‌ڤ پێنگاڤه هاڤێتن، هه‌ر مرۆڤه‌كێ فام ڤان راستیان دزانیت.
هه‌ر كورده‌كێ مافێ هه‌ى حوكمڕانیا پارتى دیمۆكراتى كوردستان نه‌خوازیت و ڕه‌خنه‌یێن توند ئاراسته‌ى گوپیتكا ده‌سه‌لاتێ و سه‌رۆك بارزانى ژى بكه‌ت، لێ هه‌ڤالینى كرن و هه‌ڤسه‌نگه‌ر بوون ل گه‌ل نوورى مالكیه‌كێ كو هه‌مى هێزا خوه ب كار دئێخیت ب تنێ كوردستانێ ژ ناڤ ببه‌ت، گوپیتكا بێ ڕه‌وشتیێ و نه‌مرۆڤبوونێ یه، ب دیتنا من د ڤان ده‌ماندا پێدڤى ناكه‌ت ل كوردستانێ مینا نه‌ته‌وه‌یا كورد به‌رنگاریا مالكى بكه‌ین، به‌لكى ئه‌ركه‌كێ مرۆڤى و ئه‌خلاقى یێ هه‌ر تاكه‌كێ یه ئیدانا كریار و گۆتن و هه‌لویستێن نوورى مالكى بكه‌ت، مخابن د نوكه دا مالكى مینا رووبه‌رێ راسته‌قینه یێ ئیرانێ و هیلالا شیعى ل عیراقێ ب هاریكاریا هنده‌ك حزبێن دیرۆكره‌شێن سیاسی یێ شیای ب ره‌نگه‌كێ زۆر ئه‌كتیڤ تابۆرێ پێنجێ دابمه‌زرینیت و ساده‌یی و نه‌زانینا پشكه‌كا كوردان ب ساناهى كه‌یس بكه‌ت.
مه‌زنترین تاوان و شاشیێن هنده‌ك حزب و لایه‌نێن كوردستانێ ل دژى ڤى گه‌لى ئه‌نجام دده‌ن، هه‌ڤركی كرنا نێگه‌تیڤه، واته خوه ئینانه پێش ب ڕه‌شكرنا به‌رامبه‌ر، نه‌ك خوه باشتر كرن ژ به‌رامبه‌ر، پارتى دیمۆكراتى كوردستان سه‌خمه‌راتى وێ چه‌ندێ كو گه‌له‌ك تێبینى و ره‌خنه‌یێن ل ئیداره‌كرنا وێ بۆ كوردستانێ هه‌ى، لێ پارتى یێ شیای ژ هه‌مى لایه‌كێڤه پترین خزمه‌تا كوردستانێ بكه‌ت، ب تایبه‌ت ژ لایێ سیاسى و دیپلۆماسى و په‌یوه‌ندیێن نێڤده‌وڵه‌تى و شه‌ڕێ ل دژى تیرۆرێ، هه‌كه حزبێن دیكه دخوازن پارتى بده‌نه لایه‌كێ و ل جهێ وێ حوكمڕانیا كوردستانێ بكه‌ن، پێدڤیه وێ ڕاستیێ بزانن ب پشتگیریكرنا نیاز پیس و ده‌وون ره‌ش و نه‌خوه‌شه‌كێ مینا مالكى نه‌شێن پارتى ئیفلیج بكه‌ن، ب دژایه‌تیكرنا كه‌سایه‌تیا مه‌سعود بارزانى نه‌شێن خوه ژ هه‌ژى كورسیكا سه‌رۆكاتیا هه‌رێمێ بكه‌ن، به‌روڤاژى ئه‌ڤ هه‌ڤركیا نێگه‌تیڤا حزبێن كوردستانێ مینا حزب باشترین خزمه‌ت بۆ پارتى دكه‌ت!، جه‌نابێ نه‌وشیروان مسته‌فا تو و هه‌ڤسه‌نگه‌رێن خوه ل ده‌ستپێكا شه‌ڕێ داعش هه‌تا نها ل سه‌نگه‌ران نه‌هاتینه دیتن و پترین ده‌م وه ل ئه‌ورۆپا ده‌رباز كرن، ئه‌رێ ژ بلى كۆمه‌كا نه‌خۆشێن ده‌روونى و ساده فامان، كى دێ بێژیت نه‌وشیروان ژ بارزانى بۆ ده‌سه‌لاتێ باشتر و ژ هه‌ژیتره؟.
بێگومان دیرۆكا كوردان یا ته‌عله، نه‌ڤى یێن پاشه‌رۆژێ دێ ل وه‌لاتێن دیكه ب شه‌رمزارى به‌حسێ دیرۆكا وه‌ڵاتێ خوه كه‌ن، ژبه‌ر كو دیرۆكا ڤى وه‌لاتى یا پڕه ژ خیانه‌تێ و وه‌لاتفرۆشیێ، د هه‌مى قووناغێن سه‌دان سالێن ده‌رباز بووی یدا ئه‌و كوردێن نانێ جاشاتیێ و وه‌لاتفرۆشیێ دخوار و ل جهێ سه‌ربه‌رزیێ و ئازادیێ ژ بۆ خوه و مالبات و وه‌لاتێ خوه، سه‌رشۆڕى و نوكه‌رى و شه‌ره‌ف فرۆشى هه‌لدبژارد سه‌ركه‌فتن دئینا و دگه‌هشتنه ئارمانجێن خوه، لێ خۆشبه‌ختانه ل سه‌رده‌مێ سه‌رۆك بارزانى هه‌تا نها وه‌لاتفرۆش یێ شكه‌ستنێ وه‌ردگرن و بارزانى رۆژ ل دووڤ رۆژێ بهێزتر دبیت و ده‌ستكه‌فتێن زێده‌تر ب ده‌ست دئینیت، د نوكه دا پێدڤیه مالكى و هه‌ڤپه‌یمانێن وى ب تایبه‌ت ئه‌و ب ناڤ كوردێن ل كوردستانێ ل به‌ر سازا مالكى دله‌یزن، وێ راستیێ بزانن بارزانى خوه‌دى چه‌ندین هێزایه كو وه‌ناكه‌ن چ جاران لاواز ببیت، ئێك هێزا گه‌ل، دو كه‌ساتیه‌كا پاك و ب هێز، سێ پشتگیریا نێڤده‌وله‌تى.
مێشكێ رۆژهه‌لاتى و ڤیان بۆ ژیانا رۆژئاڤایی
گه‌له‌ك جاران ل گه‌ل هه‌ڤالان ئانكو ل جهێن كارى و جهێن گشتى دبینین ده‌مێ به‌له‌كێن پێ یێن كچه‌كێ دریس بن و ل سه‌ر جادێ ده‌رباز دبیت، نه‌فره‌ت و كینه ل چاڤێن هنده‌ك كه‌سان دبارن و گه‌له‌ك جاران ئاخفتنێن كرێت و نه ژهه‌ژى دبێژنێ، ئه‌گه‌ر چه‌ند ئه‌و ژن خوه‌یی تر بیت پتر هه‌ست ب بێ شه‌ره‌فیێ دكه‌ن!، سه‌رنجێ بده‌ن ئه‌گه‌ر ژنه‌ك ل دهوكێ دگه‌ل كه‌سه‌كێ هه‌ولێرى خوه بده‌ته ڕه‌ڤاندن ئان به‌رۆڤاژى ب گشتى خه‌لكێ باژێرى دناخێ خوه‌دا هه‌ست ب كێماسیێ دكه‌ن!، د ده‌مه‌كی دا هه‌كه كه‌سه‌ك جاده‌یان بسۆژیت و تێلێن كه‌هره‌یێ ببریت ل به‌رچاڤێن وان، ئان دارێن كه‌سك و بلند ژناڤ ببه‌ت، ده‌ره‌به‌گه‌ك ئانكو به‌رپرسه‌ك خراپترین زۆرداریێ لێ بكه‌ت و سامانێ وى لێ داگیر بكه‌ت، ب چ ئاوایه‌كێ هه‌ست ب بێ شه‌ره‌فیێ ناكه‌ت!. ده‌مێ كه‌سه‌ك دچیت هه‌تا داوى هه‌ناسه ته‌ملقێ بۆ به‌رپرس ئان ده‌ره‌به‌گه‌كێ زۆردار و نه‌ژهه‌ژى دكه‌ت، هه‌ست ب بێ شه‌ره‌فیێ ناكه‌ت!. دكتور سامان هه‌له‌بجه‌یی به‌رى زێده‌تر ژ ده‌ه سالان د بابه‌ته‌كێ خوه‌دا ل گوڤاره‌كێ بناڤێ (سایك) نڤیسیبوو (زانایه‌كێ ئه‌جنه‌بى دبێژیت: شه‌ره‌فا تاكێ رۆژهه‌لاتاناڤین ل حه‌فت سه‌نتیمێترا ده‌رباز نابیت و ئه‌و حه‌فت سه‌نتیمه‌تر دناڤ رانێن كورو كچێن واندایه، واته ل وان حه‌فت سه‌نتیمێترا زیانێ نه‌كه‌ن چو بابه‌ته‌كێ دیتر شه‌ره‌ف نینه ل ده‌ف وان، لێ تاكێ رۆژئاڤایی شه‌ره‌فا وى ب قه‌باره‌یا سنورێن هه‌مى ولاتێ وى دبه‌رفرهن، ئه‌گه‌ر كه‌سه‌ك قرومكه‌كێ جگارێ پاڤێژیته ناڤ جادێ دێ ل سه‌ر به‌رسڤ هێن داكو هه‌ست ب بێ شه‌ره‌فیێ نه‌كه‌ن.
پێشكه‌فتن و تێگه‌هشتنا جڤاكان ب گشتى پێدڤى یا ب قووناغ و ده‌مێن درێژ هه‌ى، هه‌ر تاكه‌ك د جڤاكی دا داخوازا ژیانه‌كا به‌خته‌وه‌رو بێ كێشه دكه‌ت و ئێكسانى و مافێن وى بهێنه دابین كرن، لێ جهێ پرسیارێیه چ لایه‌ن و كه‌سه‌كن كو مافێن تاكى دابین دكه‌ن و په‌رێن ئێكسانیێ ب ئه‌سمانێ جڤاكیدا دكێشن؟!، ب دیتنا من پێدڤیه به‌رى هه‌ر تشته‌كێ ئه‌م مینا جڤاكه‌كا ڤه‌مایی ژ لایێ مافێن مرۆڤ و تێگه‌هشتن ل ژیانه‌كا به‌خته‌وه‌ر وێ راستیێ بزانین كو ئه‌م دنه‌زانین، هه‌تاكو مرۆڤ نه‌زانیت كو یێ نه‌زانه نه‌شێت زانینێ وه‌ربگریت، هه‌كه سه‌رنجێ بده‌ى پیره‌مێره‌كێ كه‌ڤن گه‌ر چه‌ند دنیایا پێشكه‌فتى نه‌دیت بیت و یێ نه‌خوێنده‌وار بیت لێ بپه‌رژینیت كو یێ نه‌زانه زۆر ژیرتر و باشتره ژ وى لاوى یێ وه‌سا هزر دكه‌ت زۆر یێ زانایه و پووته ب ئامۆژگارى و زانینا كه‌سێن دیكه ناكه‌ت، واته د قووناغا ئێكێدا پێدڤیه ئه‌م هزرێن نوى و سه‌رده‌م بێ هزر كرن و پویته پێدان ره‌د نه‌كه‌ین، بو نمونه گه‌له‌ك جاران ده‌مێ به‌حسێ دیموكراسیه‌تێ دهێته كرن ژلایێ گه‌له‌ك كه‌سانڤه ب توندى دهێته ره‌د كرن، دده‌مه‌كێدا به‌رده‌وام ژى داخوازا مافێن خوه ژ لایه‌نێن دیكه دكه‌ن!، واته ئه‌ڤ كه‌سه ل رامانا ده‌سته‌واژه‌یه دیمۆكراسیه‌تێ نه‌گه‌هشتینه و ب هزر كرن ڤێ ده‌سته‌واژێ لێكدان زێرو دكه‌ن.
ئه‌گه‌ر ئه‌م داخوازا ژیانه‌كا به‌خته‌وه‌ر دكه‌ین مینا ژیانا تاكێن ئه‌وروپى و ئه‌مریكى ببینه خوه‌دى مافێن ژیانێ و ل ده‌سه‌لاتداران دخوازین مافێن تاكى دابین بكه‌ن و ب ئێكسانى سه‌ره‌ده‌ریێ دگه‌ل جڤاكى بكه‌ت، پێدڤیه ئه‌م ل گه‌ل زاتێ خوه د ڕاست و دروست بین، ئێك/ ئه‌م دوڕوى نه‌بین و ڕێز رێزگرتنا كه‌سه‌كێ گه‌نده‌لكار و خراب بۆ به‌رژه‌وه‌ندیێن تایبه‌ت نه‌گرین و ده‌ست ژ ته‌مه‌لقێ به‌رده‌ین، ل ولاتێن ئه‌ورۆپا پێناسه‌یا په‌روه‌ردێ زور جودایه بۆ نموونه دایك و بابه‌كێ ئه‌وروپى ب گشتى د به‌رهه‌ڤ نینن پتر ژ دوو زارۆكان هه‌بن د ده‌مه‌كێدا ل ئه‌ورۆپا ژیانا زارۆیان زور باشتر و پشتراستتره ل رۆژهه‌لاتاناڤین، لێ ئه‌و بهایێ په‌روه‌ردێ دزانن و پێدڤیه ئه‌م بشێین سیسته‌مێ په‌روه‌رده‌یا ئه‌ورۆپاییا فێر ببین و پراكتیزه بكه‌ین، نه‌ك مینا نها پڕانیا دایك و بابێن ولاتێ مه قوتان و ترساندنا زارۆى ب باشترین په‌روه‌رده‌و خوه ب په‌روه‌ردێڤه وه‌ستاندن دبینن!، هه‌كه ب راستى ئه‌م دخوازین یێن ژ مه ب ده‌سه‌لاتدارتر مافێن مه بده‌نه‌مه، پێدڤیه ئه‌م ئێكه‌م جار مافێن وان دابین بكه‌ین یێن كو ئه‌م ل وان ب ده‌سه‌لاتتر، به‌روڤاژى ڤێ چه‌ندێ خوه‌خاپاندنه، مافێن جڤاكا جڤاك بخوه دابین دكه‌ت، ب تنێ پێدڤیه جڤاك سیسته‌مێن باش یێن په‌روه‌ردێ و دیمۆكراسى بپه‌رژینیت.
مه‌ترسیێن ئیسلاما سیاسی
گه‌له‌ك جاران ده‌مێن گه‌نگه‌شه ل سه‌ر ئیسلاما سیاسى دهێنه‌كرن، گه‌له‌ك ژ وان كه‌سێن به‌رگیریێ ل ئیسلاما سیاسى دكه‌ن، ئانكو ئه‌ندامێن حزبێن ئیسلامینه، وه‌سا خوه‌یا دكه‌ن هه‌كه سیسته‌مێ حوكمڕانیێ و ڕێڤه‌به‌رییا جڤاكان د چارچووڤه‌ێ قانوونێن ئیسلامێدا ده‌رنه‌كه‌ڤن، دێ یه‌كسانى و دادپه‌روه‌رى بالێن خوه ب سه‌ر هه‌مى جهه‌كێدا كێشن، دێ سكس و دزى و نایه‌كسانى و نه‌زانین …هتد، ب هه‌مى ڤه ب داوى هێن و نامینن، حزبێن ئیسلامى كار دكه‌ن ژ بۆى چه‌سپاندنا ده‌قێن شه‌ریعه‌تێ ئیسلامى د ناڤ قانوونێن په‌رله‌مانى و زالكرنا سه‌روه‌ری و حوكمێ مه‌لا و مرۆڤێن ئایینى ل سه‌ر جڤاكى، ل سه‌ر دیكتاتۆرى و تیرۆرا ئیسلاما سیاسى یا نوكه د ڕۆژه‌ڤێ دا، ئه‌و به‌هانه‌یان دگرن و دبێژن ل چ وه‌لاته‌كێ جیهانێ ئیسلامێ ب دروستى پراكتیزه ناكه‌ن ژ به‌ر هندێ هه‌تا نوكه نموونه نینن ژ حوكمڕانیا ئیسلاما سیاسى !، (بێ كو بزانین وان چ زه‌مانه‌ت هه‌یه دێ ئه‌و ئیسلاما ئه‌و به‌حس دكه‌ن، پراكتیزه كه‌ن و ل داویێ وه‌كو هه‌مى نموونه‌یێن دیكه نابنه دیكتاتۆر و ڕادیكال و ل داویێ تیرۆرست).
د ڤى بابه‌تیدا من دڤێت بێژم، داعش و ئه‌لقاعیده و ئه‌نسار سوننه … هتد، هه‌مى ل ده‌مێ دامه‌زراى و یێن بێ هێز و لاواز، دنه‌رم و نیان بوون، هه‌میان ل ژێر په‌رده‌هێ (خودێ یێ گۆتى) و ئیسلام به‌خته‌وه‌رى و ڕوناهییه، و كۆمكرنا سه‌دان و هزاران زارۆیان ل بن خیڤه‌ت و د مزگه‌فتان دا و شووشتنا مه‌ژیێ وان و پڕكرن ب گۆتارێن مینا بمره بۆ پشتى ژیانا سه‌ر زه‌ڤیێ و نیشادانا ڕوویه‌كێ ڕه‌ش ل سه‌ر ڕوومه‌تێ كه‌سێن سكیۆلاریزم ئانكو هه‌ر بیروباوه‌ره‌كێ دیكه ژ بلى بیروباوه‌رێن ئیسلامى، نیشاندانا سیسته‌م و ناڤێ ئازادیێ و دیمۆكراسیێ مینا جهێن له‌شفرۆشیێ و مه‌یخانه و بێ نامووسى د زێهنا زارۆیان دا، شیاینه بنیاتێ تیرۆرێ و هزر و كه‌لتورێ كوشتنێ و توقاندنێ دابمه‌زرینن، نوكه هه‌مى مرۆڤاتى ب ئیسلامڤه باجا وان شاشیان دده‌نه‌ڤه كو وه‌سا هزر دكر ئیسلاما سیاسى دێ به‌خته‌وه‌ریێ ئینیت.
هه‌كه ل كوردستانێ و هه‌ر وه‌ڵاته‌كێ جیهانێ، ئیسلاما سیاسى ب هێز ببیت و بشێن سیسته‌م و یاسایێن خوه بگوهڕن، بێ گومان دێ ل پێنگاڤێن ده‌سپێكێ مزگه‌فتان كه‌نه جهێن په‌روه‌رده‌كرنا توندوتیژیێ و ئافراندنا ڕادیكالیه‌تێ د ناڤ چینێ نووى یێ جڤاكیدا ل ژێر ناڤێ بهێزكرنا ئایینێ خودێ مه‌زن، بێ گومان دبیت گه‌له‌ك ژ كه‌س و ئه‌ندامێن حزبێن ئیسلامى نه‌زانن ئانكو فامێ وان نه‌چیتێ كو ب هێزكرنا ئیسلاما سیاسى هه‌مى ده‌مه‌كێ مه‌ترسییه ڕێكخراێن مینا داعش لێ چێ ببن، ئه‌گه‌رنه ئه‌ز باوه‌رم گه‌له‌ك ژ وان كه‌سان دێ پاشگه‌ز بنه‌ڤه و پاشه‌ڕۆژا نه‌ڤى یێن خوه نائێخنه د به‌ندا سیسته‌مه‌كێدا كو وێرانكارى و توقاندن لێ چێدبیت، پێدڤیه ل سه‌ر هه‌ر كه‌سه‌كێ كو ئیدیعایا ب هێزكرنا ئیسلاما سیاسى دكه‌ن، هزر ل پاشه‌ڕۆژا نه‌ڤى و وه‌لاتێ خوه بكه‌نه‌ڤه، ئیسلام ده‌مێ دكه‌ڤیته د ناڤ چه‌رخێن سیاسه‌تێ دا، ب ناڤێ پاقژیێ و پێكڤه‌ژیانێ و خه‌لكی دخاپینن و جهێ خوه ڤه‌دكه‌ن، هه‌تا كو ب هێز دبیت، ده‌مێ بهێز بۆ ئێدى دێ بیته بابه‌ته‌كێ دیكه و خوین و ڕوحا مرۆڤان دێ بێ نرخترین كه‌ره‌سته بیت ل ده‌ف وان ب تایبه‌ت هه‌كه كه‌سه‌كێ باوه‌رى ب ڕه‌فتار و كارێن وان نه‌بیت، و دێ ل ڤێره ئیسلاما سیاسى مینا ئه‌تۆمێ لێ هێت كو هه‌رده‌مه‌كێ بپه‌قیت، داعش و نموونه‌یێن وان لێ بئافریت، ژ به‌ر هندێ پێدڤیه تاك و جڤاك ب گشتى ل ڤێ مه‌ترسیێ دئاگادار بن و وه‌لاته‌كێ ئاڤا نه‌كه‌ن پڕ ژ هزرا توندوتیژى و ڤالا ژ فه‌رهه‌نگى و مرى ل زانستێ و كاڤل ژ ئازادیێ و ژیانێ و زانینێ، بۆ نه‌ڤى یێن داهاتى كو ڕه‌نج و نه‌خۆشى بۆ نه‌ڤى یێن مه هه‌میانه و دێ هه‌مى باجا ئاڤاكرن و ب هێز كرنا ئیسلاما سیاسى ده‌ین.
لاوازیا كادر و راگه‌هاندنا پارتى
پارتى دیمۆكراتى كوردستان خوه‌دى ده‌وله‌مه‌ندترین دیرۆكا شوڕشگێری یه ل كوردستانێ و شیایه هه‌ستا نه‌ته‌وه‌یی و ناسناما كوردستانى د ناڤ ناخێ تاكێ كورد دا ل هه‌مى كوردستانێ تا ڕاده‌یه‌كێ زۆر بپارێزیت، پارتى مینا فێرگه‌هه‌كێ و بنیاته‌كێ خوه پێگه‌هاندنێ بوویه بۆ گه‌له‌ك سه‌ركردێن كورد كو نها د ناڤ رێزێن حزبێن دیتریێن كوردستانێ دا كادر و سه‌ركرده‌و سه‌رۆك حزبن، پارتى د دیرۆكا خوه دا ستراتیژیه‌كا نه‌ته‌وه‌یی و درووشمێن (بێ فێل و دره‌و) هه‌بوون و چ جاران خه‌لكێ كوردستانێ ب دروشمێن مه‌زن و بێ بنیات نه‌خاپاندیه، واته پارتى دشیا گه‌له‌ك جاران د شۆره‌ِشێ دا ب ناڤێ رزگاركرنا پارچه‌یێن دیتر یێن كوردستانێ خه‌لكى بخاپینیت و ڕێژه‌یه‌كا مه‌زنا لاوێن باكۆرو رۆژئاڤا و رۆژهه‌لات بینته د ناڤ ڕێزێن خوه دا، لێ چ جاران ئه‌ڤ پرسه بۆ به‌رژه‌وه‌ندیێن حزبى ب كارنه‌ئیناینه و لاوێن پارچه‌یێن كوردستانێ ب كه‌یس نه‌گرتینه، رێبازا بارزانى نێزیكى چه‌رخه‌كێ ل په‌كه‌كێ دێرینتره، په‌كه‌كێ هزاران لاو كرنه قوربانى ب ناڤێ ڕزگاركرنا كوردستانا مه‌زن و نها دیار بوو چ به‌رنامه هه‌ر بۆ كوردستانێ بچووك ژى نه‌بوونه‌و نینن!!، ژ به‌ر كو ئێدى ناڤێ كوردستانێ د پرۆگرام و ستراتیژیا واندا ناهێ بیستن!، ئه‌ڤه مینا نموونه كو ئه‌م هه‌ڤجودایه‌كێ بكه‌ین د ناڤبه‌را پارتى و حزبه‌كا دی دا كو خه‌لكه‌كێ زۆر بۆ مه‌ره‌مێن ڤه‌شارتى یێن حزبى بۆ خوه كه‌یس لێگرتینه، واته پارتى دشیا به‌رى هه‌بوونا په‌كه‌كێ ڤى كارى ل گه‌ل كوردان بكه‌ت و هێزا خوه چه‌ندین به‌رامبه‌ر لێ بكه‌ت، لێ پارتى خوه‌دى ستراتیژیه‌كا پاقژ بوویه و ئه‌وێن كو دزانى نه‌شێت بكه‌ت، چ جاران بۆ خاپاندنێ د رێكخستن و راگه‌هاندنا خوه دا ب كارنه‌ئیناینه.
لێ پرسیارا گرنگ ئه‌وه پارتى بۆچى ئه‌وا كرى و دكه‌ت نه‌شێت بۆ خه‌لكێ كوردستانێ به‌یان بكه‌ت و هه‌م لایه‌نى مۆرالى یێ كادر و لایه‌نگرێن خوه خورت بكه‌ت و هه‌م ژى رێكخستن و جه‌ماوه‌رێ خوه به‌رفره‌هتر بكه‌ت؟!، باده‌كا نه‌فتێ ئێك ژ گرنگترین باده‌كێن جیهانی یه كو بالانس و ڕێره‌وێن سیاسى و سه‌ربازى و ئابوورى یێن جیهانێ دگوهۆڕیت، پارتى شیا نه‌فتا كوردستانێ ل ژێر كونترۆلا به‌غدا ده‌ربینیت و د هه‌مان ده‌م دا باوه‌ریێ ب وه‌ڵاته‌كێ مینا توركیا بینیت كو ڕه‌شترین دیرۆك یا ل گه‌ل نه‌ته‌وه‌یا كورد هه‌ى و د ناڤ ئاخا وى ولاتی دا بۆڕیێن خوه یێن نه‌فتێ ڕابكێشیت بۆ بازارێن جیهانێ، ئه‌ڤ باده‌كه فاكته‌ره‌كێ سه‌ره‌كى بوو كو زلهێزێن جیهانێ د هه‌وارا كوردێن باشۆر بهێن و پارێزگاریێ ژ ڤى وه‌لاتى بكه‌ن، هه‌روه‌سا فاكته‌ره‌كێ سه‌ره‌كیه كو ب ساناهى گه‌له‌ك وه‌ڵاتێن پێدڤى یێن نه‌فتى دژاتیا سه‌ربخوه‌بوونا كوردستانێ نه‌كه‌ن، فاكته‌ره‌كێ سه‌ره‌كی یه كو كورد ل فشار و كه‌له‌ڕه‌قیا سه‌ركرده‌یێن به‌غدا بێ منه‌ت بوونه و به‌غدا نه‌شێت فشارێن زێده‌ترێن سیاسى و سه‌ربازى و ئابوورى ل سه‌ر هه‌رێما كوردستانێ چێ بكه‌ت، هه‌روه‌سا ئه‌ڤ باده‌كه سه‌خمه‌راتى وێ چه‌ندێ هه‌رێما كوردستانێ د قه‌یرانه‌كا مه‌زن یا ئابووریدا ده‌رباز دبیت لێ ژیانا خه‌لكێ كوردستانێ حه‌تا ڕاده‌یه‌كێ ئێكلاكه‌ره‌ڤه ل سه‌ر داهاتێ نه‌فتا هه‌رێما كوردستانێ یه، مخابن هه‌تا نها پڕانیا خه‌لكێ كوردستانێ ڤان پێنگاڤ و ده‌ستكه‌فتێن پارتى به‌رۆڤاژى لێك دده‌نه‌ڤه!، ئه‌ڤ كارێن مه‌زنێن پارتى و دیرۆكا وێ، ل شوونا وێ چه‌ندێ كو پارتى بۆ كۆمكرنا جه‌ماوه‌رى بكاربینیت، نه‌یارێن پارتى ب ڕێكا ده‌زگه‌هێن ڕاگه‌هاندنێ و رێخستنێن خوه دا هه‌ر تشته‌كێ به‌روڤاژى بۆ خه‌لكى دیار دكه‌ن!. گه‌لۆ سه‌رۆك بارزانى نه‌هێلا ئالایێ به‌عسیان ل عیراقێ بمینیت، بارزانى نه‌هێلا ئارتێشا توركیا ل سالا 2003یێ بهێته كوردستانێ، بارزانى بوو باوه‌ری ب توركیا ئینا و پێشمه‌رگه فرێكرنه كۆبانێ كو كۆبانێ نه‌كه‌فته د ده‌ستێن داعش دا، بارزانى دهه‌مى سه‌ركه‌فتنێن باشۆر دا كاراكته‌ر و قوربانیده‌رێ سه‌ره‌كى بوویه، هه‌مى حزبێن دیتر یێن كوردستانى كێمتر ژ چارێكا پارتى ده‌ستكه‌فت بۆ ڤى ولاتى نینن، بێگومان دیاركرنا ڤان ده‌ستكه‌فتنا بۆ خه‌لكێ كوردستانێ كارێ ڕاگه‌هاندنێ و كادرێن پارتییه، واته راگه‌هاندن و كادرێن پارتی د ئاسته‌كێ لاواز دانه، ب تنێ راگه‌هاندنا پارتى بۆ خوه ده‌وڵه‌مه‌ندكرنا هنده‌ك كه‌ساتیان دهێته بكارئینان!، ئه‌ڤه خاله‌كا لاوازا پارتیه، دبیت گه‌له‌ك ژخوێنه‌ران هه‌بوونا گه‌نده‌لیێ و نایه‌كسانیێ هه‌كه بزانن كو پارتى مینا پێدڤى جه‌ماوه‌ر نینه، ئه‌ڤه ژى ڕاسته و خاله‌كا كاریگه‌ره، لێ گه‌نده‌لى خاله‌كا هه‌ڤپشكه و هه‌مى حزبێن كوردستانێ گه‌نده‌ڵن، لێ ئه‌و دزانن خرابی یێن خوه باش نیشا بده‌ن و باشى یێن پارتى ژى خراب نیشا بده‌ن.
گه‌نده‌ڵى بۆچى هه‌یه و چاره‌سه‌رى چیه؟
دیاردا گه‌نده‌ڵیێ ڤایرۆسه‌ك نینه ژ وه‌ڵاته‌كێ بهێته ڤه‌گوهاستن بۆ وه‌ڵاته‌كێ دیتر، هه‌روه‌سا فاكته‌رێن هه‌بوونا گه‌نده‌ڵیێ ب ڕه‌نگه‌كێ گشتگرتى و دژوار ژ به‌ر ده‌ست پیسى و بێ وه‌فایا به‌رپرسه‌كێ ئان چه‌ند به‌رپرسان نینه ژبۆ وه‌ڵاتى، گه‌نده‌لى ده‌مێ ب ڕه‌نگه‌كێ دژوار و گشتى ڕه‌هێن خوه د ناڤ وه‌ڵاتی دا دكێشیت، نیشانه‌كا سه‌ره‌كی یا لاوازیا ئاستێ ره‌وشه‌نبیرى و كه‌لتۆریا جڤاكی یه، ل هه‌مى جیهانا پێشكه‌فتى ژى ل سه‌ر ئاستێ تاك گه‌نده‌ڵی یا هه‌ى، لێ ب چ جۆره‌كێ كه‌سه‌ك ئانكو چه‌ند كه‌سه‌ك نكارن ڤێ دیارده‌یێ مه‌زن و به‌ربه‌لاڤ بكه‌ن. بۆ تاكێن جڤاكێ مه ب گشتى جهێ پرسیارێیه بۆچى ده‌ستهه‌ڵاتا كوردستانێ نه‌شیاینه مینا پێدڤی ل دژى گه‌نده‌ڵیێ ڕابوه‌ستن و ب كێمی ڤه ڤێ دیاردێ لاواز بكه‌ن؟!.
پشتى سه‌رهه‌لدانا 1991ێ ده‌لیڤه‌ك بۆ كوردان چێبوو كو د ڕێڤه‌به‌ریێ دا خوه بسه‌لمینن بۆ جیهانێ، بێ گومان ل گه‌ل ڤێ ڕێڤه‌به‌ریێ هنده‌ك ئه‌ركێن دیتر ل سه‌ر ملێن ده‌ستهه‌ڵاتا كوردى بوون، بۆ نموونه هه‌تا چ ڕاده داشێن نموونه‌كا جوان یا پێكڤه‌ژیانا هه‌مى نه‌ته‌وه‌و ئاینان تێدا وێنه بكه‌ن ژ بۆ جیهانێ؟، هه‌تا چ ڕاده‌یه‌ك داشێن سیسته‌مه‌كێ دیمۆكراسى تێدا په‌یره‌و بكه‌ن و ئازادیا تاك و بیروباوه‌رێن جودا و ئازادیا رۆژنامه‌ڤانى د ڤى وه‌لاتی دا په‌یره‌و بكه‌ن؟، پێدڤى بوو ل سه‌ر سه‌ركراتیا كوردستانێ ل ژێر هه‌ر بارگرانى و كاودانه‌كێ دا بیت، نه‌هێلن پشكه‌كا مه‌زنا كوردان بگه‌هنه حوكمه‌تا عیراقێ و بێژنه جیهانێ مه سه‌رۆكاتیا سه‌دام حوسێن پێ باشتره ژ حوكمڕانیا كوردان و چه‌ندین خالێن دیتر كو مینا ئه‌رك ل سه‌ر ملێن سه‌ركرداتیا كوردستانێ بوون، هه‌تا ڕاده‌یه‌كێ زۆر سه‌ركرداتیا كوردستانێ ب تایبه‌ت سه‌رۆكێ هه‌رێما كوردستانێ مه‌سعود بارزانى یێ سه‌ركه‌فتى بوو بۆ جێبجێكرنا ڤان خالێن مه به‌حس لێ كرى، لێ هه‌تا كو ئه‌ڤ خاله جێبجێ كرین هه‌م سه‌ركرداتیا كوردان ب تایبه‌ت سه‌رۆك بارزانى مینا كه‌سایه‌تییه‌كێ كارێزمایى باجه‌كا زۆردا، هه‌م ژى گه‌له‌ك خه‌لكێن ئاست بلندو شوڕشگێرو ژ هه‌ژى ژیانه‌كا باشتر بوونه قوربانى، پشتى سه‌رهه‌لدانێ ڕاسته جڤاكا كوردى هه‌تا ڕاده‌یه‌كێ كێم دیر ببون ژ بیروباوه‌رێن هۆزى، لێ د ڕاستیدا ئه‌و دووریاتی یا ستراتیژى نه‌بوو، به‌لكى ب تنێ ژ به‌ر برسی بوون و ئه‌و نه‌خوه‌شیێن خه‌لكى دیتى ئاگه‌ه ژ بیروباوه‌رێن هوزى نه‌مابوون، جڤاك ده‌مێ برسى و ماندى دبن ب ساناهیتر سته‌مگه‌ران دنیاسن و كار ب لۆژیكێ مه‌ژى دكه‌ن، لێ ده‌مێ تێر دبن و ده‌مه‌كێ كورت ده‌رباز دبیت ئێدى ده‌مێ سه‌رخوه‌خوڕیێ و تێكدانێ ده‌ست پێ دكه‌ت، (بێ گومان مه‌به‌ستا من ل جڤاكێن ئاست نزمه)، د دیرۆكا كورداندا ده‌ره‌به‌گ نه‌شیاینه بێ خه‌لك چ جاران ل دژى به‌رخوه‌دان و شوڕشێن كوردان ڕاوه‌ستن و ده‌ستكه‌فتێن شۆره‌ِشا ژناڤ ببه‌ن، هه‌مى ده‌ما ده‌ره‌به‌گ بڕیار بده‌ستێن هۆزا خوه بوونه‌و شیاینه ب ئێك بڕیار هزاران چه‌كداران كۆم بكه‌ن و مینا زركێتكێن ئازریایی ب شۆره‌ِشێ و ده‌ستكه‌فتێن وێرا به‌رده‌ن و ل داویێ وێ چه‌ندێ بكه‌ن یاكو وڵاتێن داگیركه‌ر نه‌شیان بكه‌ن!، ب دیتنا من بارزانیێ نه‌مر و ماڵباتا وى تا ڕاده‌یه‌كێ باش دڤان ڕاستیان تێگه‌هشتن و د هه‌ر قووناغه‌كێ دا مینا پێدڤى سه‌ره‌ده‌رى د گه‌ل واقعی دا دكر، ل ده‌سپێكا حوكمڕانیا پشتى سه‌رهه‌لدانێ سه‌رۆك بارزانى دژایه‌تیا لۆژیكا هۆزى و ده‌ره‌به‌گان نه‌كر، ل شوونا دوژمن و نه‌یارێن دۆزا كوردى ده‌ره‌به‌گان بكڕن و ل دژى ده‌ستكه‌فتان ب كار ب ئینن، سه‌رۆك بارزانى بخوه ئه‌ڤ كاره كرو ده‌ره‌به‌گ تێركرن و پاره بۆ كوچكێن وان مه‌زاختن ده‌سه‌لاته‌كا زۆر یا ئیدارى ژى ڕاده‌ستێ وان كر، گه‌له‌ك ژ وان ده‌ره‌به‌گان یێن كو پاره‌و بودجه‌و ئیمتیازات ل سه‌رۆك بارزانى وه‌رگرتى ل دژى شوڕشێن پارتى بوون، لێ سه‌رۆك بارزانى باش دزانى ده‌وله‌تێن داگیركه‌ر دبه‌رهه‌ڤن ب ملیاردان دۆلاران بمه‌زێخن ژ پێخه‌مه‌ت ژناڤبرنا هه‌ناسه‌یا كوردستانا باشۆر، لێ ژبه‌ر ژیرییاتیا سه‌رۆكێ كوردستانێ ل باشور وان وڵاتان سه‌ركه‌فتن نه‌ئینان، هه‌رچه‌نده هه‌تا نوكه‌ژى پلانێن وان دبه‌رده‌وامن.
ل ڤێره خه‌لكێ شۆڕه‌شگێر و ژ هه‌ژى ژیانه‌كا باشتر ژبه‌ر پێیان دچن، هه‌تاكو ئه‌ڤ وه‌ڵاته سه‌ربخوه نه‌بیت، مه‌حاله كه‌سه‌ك بشێت ل دژى نایه‌كسانیێ ڕاوه‌ستیت، ژ به‌ر كو جڤاك د ناخ دا ل گه‌ل یه‌كسانیێ نینن، ب تنێ پێدڤیه ب زۆرى یه‌كسانى بهێته چه‌سپاندن، د هه‌مى هه‌لبژارتنان دا شه‌ڕێن خه‌لكى ل سه‌ر ئایدولۆژیا شاش یا هۆزیه، ڕاستیه‌كا ته‌عله خه‌لك ب گشتى ب گۆتن داخوازا یه‌كسانیێ دكه‌ن و ب كریار ل گه‌ل نایه‌كسانیێ نه.
مه‌ترسیا حزبێن ئایدولۆژى
بێى جوداهى حزبێن ئایدولۆژى هزر و پێشكه‌فتنێن ئه‌و مرۆڤێن دكه‌ڤنه ل ژێر كاریگه‌ریا واندا د سنۆره‌كێ خورافى و خاپینۆكدا دیل دكه‌ن هه‌تا كو دكه‌نه كه‌لتور!، ئه‌ڤجا ئایدولۆژیا سنۆردار و ڕادیكال مینا ژه‌هرێ گیانێ جڤاكى دگریت و ب توندى ل دژى لیبرالیه‌تێ ڕادوه‌ستن، د هه‌مى سه‌رده‌ماندا كه‌سایه‌تى یێن فه‌لسه‌فى و شاره‌زا بۆ پێكاندنا مه‌ره‌مێن خوه‌و زالكرنا ئایدولۆژیا خوه ل سه‌ر جڤاكان، مفا ل وان فاكته‌ران وه‌ردگرن كو دبنه ئه‌گه‌رێن ئێش و ئازارێن خه‌لكى، نایه‌كسانى و سته‌ما ده‌سه‌ڵاتداران ل سه‌ر جڤاكان بۆ بهێزكرنا مه‌ره‌مێن خوه ئیستیغلال دكه‌ن و دكارن د ده‌مه‌كێ كێمدا ڕێژه‌یه‌كا زۆریا خه‌لكى ل دوروبه‌رێن خوه كۆم بكه‌ن، د ناڤ وان جڤاكاندا ئه‌وێن یه‌كسانى و مافێن مرۆڤان تێدا ب ڕه‌نگه‌كێ باش دهێته په‌یره‌و كرن، زه‌حمه‌ته كه‌سێن فه‌لسه‌فى و شاره‌زا بشێن حزبێن ئایدولۆژى بهێز بكه‌ن.
كوردستان ب گشتى وڵاته‌كه خه‌لكێ وێ د هه‌مى سه‌رده‌مه‌كێدا ڕاستى ئازار و به‌دبه‌ختیه‌كا زۆر بوونه، له‌وما حزبێن ئایدۆلوژى ب ساناهیتر شیاینه خه‌ڵكى ب درووشم و گۆتنێن خاپینۆك ل ده‌وروبه‌رێن خوه كۆم بكه‌ن، ئیسلاما سیاسى مینا ئایدولۆژیایه‌كا سنۆردار كاریگه‌ریه‌كا ب هێز یا هه‌بووى ل سه‌ر جڤاكێ كوردى، سه‌خمه‌راتى وێ چه‌ندێ كو به‌گڕه‌وه‌نده‌كێ ڕوحى و ئه‌سمانى ل پشت زه‌لامێن ئیسلامی هه‌یه و ده‌لیڤه‌یێن خاپاندنێ بۆ وان ب ساناهیترن، لێ ژ به‌ر كو ئیسلاما سیاسى زۆر نموونه‌یێن شكه‌ست خوارى و خراب یێن تۆماركرى ل سه‌ر ئاستێ جیهانێ و دیرۆكى و هه‌ر جهه‌كێ تێدا باڵاده‌ستیا خوه تێدا دیت، بیت سته‌م و نایه‌كسانیه‌كا زۆر یا به‌رپاكرى كو به‌رۆڤاژى درووشم و گۆتنێن وان بوونه، له‌وما بۆ ئه‌و خه‌لكێن كێم هشیار ژى یا هاتیه سه‌لماندن كو ئه‌ڤ ئایدولۆژیه یا مه‌ترسیداره و گه‌ره‌كه خوه ژێ بپارێزن، ل كوردستانێ ژى هێدى هێدى ژ به‌ر ڤان ئه‌گه‌ران خه‌لك ب گشتى خوه ل ئیسلاما سیاسى دپارێزن و پێشكه‌فتنا حزبێن ئیسلامى یا بزه‌حمه‌ته د ناڤ جڤاكێ كوردی دا، ب تایبه‌ت هه‌كه حزبێن سكیۆلاریزم ب هشیارى حوكمڕانیێ بكه‌ن و بزاڤێ بكه‌ن ژیانا خه‌لكى تا وى ڕاده‌ى خۆش بكه‌ن كو ناچار نه‌بن بۆ گوهارتنا ده‌سه‌ڵاتێ و سیسته‌مێ حوكمڕانیێ خوه بخاپینن!. ل دووڤ ئیسلاما سیاسی دا حزبا په‌كه‌كێ ب سه‌رۆكایه‌تیا ” عه‌بدوللا ئوجه‌لان” شیا ب باشى ئیستیغلالا زۆلم و زۆرداریا حوكمه‌تێن توركیا ل سه‌رگه‌لێ كورد بكه‌ت و ڕێژه‌یه‌كا زۆر یا كوردان ل دوروبه‌رێن خوه كۆم بكه‌ت، ئوجه‌لان شاره‌زایانه پێنگاڤ هاڤێتن، هه‌مان به‌رنامه و فه‌لسه‌فه‌یا كۆمونیستى ئێخسته د فه‌لسه‌فه‌یا په‌كه‌كێ دا لێ ب فۆنه‌تیكه‌كا دیكه یا سیاسى، ئوجه‌لان دزانى سیسته‌مێ كۆمونیستى شكه‌ستنێ خوارى و خه‌لكێن جڤاكى تا وى ڕاده‌ى فێم دكه‌ن كو ئه‌زمۆنه‌كا شكه‌ستى دوباره نه‌كه‌نه‌ڤه، له‌وما خوه ژ وێ فه‌لسه‌فێ جودا كر، لێ د ڕاستی دا هه‌كه جودایه‌ك د ناڤبه‌را فه‌لسه‌فا په‌كه‌كێ و كۆمۆنسیتی ژى هه‌بیت، د جه‌وهه‌ر دا هه‌مان ڕێڕه‌وا ڕادیكاڵیه یاكو كۆمۆنیست و ئیسلاما سیاسى ل سه‌ر دچن.
هه‌كه ب هوورى د جودازهیا ئایدولوژیاكا مینا یا په‌كه‌كێ و ئیسلاما توندوتیرا سیاسى بنێرین، جوداهیه‌كا زۆر د ناڤبه‌را وان دا نینه و مافێن ده‌سپێكێ یێن مرۆڤاتیێ ل ده‌ف هه‌ردو ئایدولۆژیان یا پێشێلكریه، ده‌مێ ئه‌ندام ئان چه‌كداره‌كێ ڕێكخراوه‌كا مینا داعش یان ئه‌لقاعیده بڕیارێ دده‌ت ڕێزێن وان ب جه بهێلیت و ڤه‌گه‌ڕیته ژیانا خوه یا ئاسایی، حوكمێ وى كوشتنه!، د ناڤ په‌كه‌كێ دا ژى هه‌مان چاره‌نڤیس چاڤه‌ڕێى وى گه‌ریلایه یێ كو دڤێت رێزێن په‌كه‌كێ بجه بهێلیت و ڤه‌گه‌ریته ناڤ ماڵباتا خوه!، د ده‌مه‌كێدا هه‌ردو لایه‌ن ب به‌هانه‌یا شۆره‌ِشكرنێ و بده‌ستڤه‌ئینانا مافێن مرۆڤان و یه‌كسانیێ خه‌لكى ل خوه كۆم دكه‌ن و ل سه‌ر بچووكترین مافێن ده‌سپێكیێ یێن ژیانێ ئه‌ندامێن خوه دكوژن!، گه‌ریلاك پتر ژ سى ساڵان شۆڕشێ بۆ ئایدولۆژیایا په‌كه‌كێ دكه‌ت ل سه‌ر هێلانا ڕێزێن په‌كه‌كێ حوكمێ وى مه‌رگه!، هه‌مى حزبێن ئایدۆلوژى مینا هه‌ڤ ل زارۆكینیێ و سینێله‌یێ باشتر دشێن خه‌لكى بخاپینن، خه‌لكێ كوردستانێ سه‌خمه‌راتى زۆردارى و شوڤێنیا توركان ل سه‌ر گه‌لێ كورد، نها دهه‌ڵبژاردانێن توركیادا ده‌نگى ناده‌نه حزبه‌كا ئایدۆلوژیا ڕادیكاڵا مینا په‌كه‌كێ. هه‌كه سه‌رنجێ بده‌ین نها په‌كه‌كه ب ئاشكه‌رایى دبێژیت ئه‌م بۆ نه‌ته‌وه‌یا كورد بتنێ شۆڕه‌شێ ناكه‌ین، دبێژن ئه‌م ده‌وڵه‌تا نه‌ته‌وه‌یی ڕا دكه‌ین و ئه‌ڤ داخوازیه كه‌ڤنه‌په‌رستیه، واته هه‌ر ل ده‌سپێكێ هه‌مان باوه‌ر هه‌بوو، لێ نه‌دشیان كورده‌كێ بۆ ئایدولۆژیایه‌كێ بخاپینن هه‌كه ڕاستى گۆتبا!.
ئه‌و ده‌مێن دیكتاتۆرى باشتربیت ژ دیمۆكراسیێ
ئێك ژ مه‌زنترین كێشه‌یان كو ئاڕاسه‌تى جڤاكان دبن، تێنه‌گه‌هشتنه ژ پێناسه و كارێ سیسته‌مان، واته پراكتیزه‌كرنا سیسته‌مه‌كێ كو لێ تێنه‌گه‌هین، دیمۆكراسیێ وى ده‌مى بهایێ خوه یا هه‌ى ده‌مێ خزمه‌تا جڤاكى ب گشتى دكه‌ت، نه‌ك د خزمه‌تا حزب و لایه‌نێن سیاسی و بارزگانی دا بیت ل سه‌ر حسابا خه‌لكێ هه‌ژار، ل گه‌ل پێشڤه‌چوونێن زانستى و كه‌لتۆرى و بلندبوونا ئاستێ ڕه‌وشه‌نبیریا جڤاكان پلانێن ده‌سه‌ڵاتدارێن نیازخراب ژى پێش دكه‌ڤن و ب ژیرانه‌تر نه‌خشه‌یان دكێشن، دیمۆكراسی و ئازادیا رۆژنامه‌ڤانى ژ نموونه‌یێن وان كه‌ره‌سته‌یانه كو ده‌سهه‌لاتدار و لایه‌نێن سیاسى دشێن بۆ به‌رژه‌وه‌ندیێن خوه یێن تایبه‌ت ماسكان ل سه‌ر ڕوومه‌تێ خوه بێخن و خه‌لكێ جڤاكى پێ بخاپینن.
نها ل وه‌لاتێ مه دیمۆكراسی زێده‌تر مینا نه‌خۆشیا په‌نجه‌شێرێ یا لێ هاتی، به‌رهه‌مێ دیمۆكراسیێ د كوردستانێ دا یا بوویه ئیستفزاز و ناڤزراندن، كه‌لتۆرێ جڤیندانێ و شه‌ڕێ ده‌روونى د ناڤبه‌را خه‌لكێن كوردستانێدا، خراب مفا وه‌رگرتن ژ چه‌مكێ دیمۆكراسیێ ب ڕه‌نگه‌كێ كاریگه‌ر و مه‌ترسیدارتر ژ لایێ ده‌سه‌لاتدارێن سلێمانیێ ڤه دهێته وه‌رگرتن، ئه‌ڤجا پڕانیا خه‌لكێن جڤاكى ب ئاوایه‌كێ لێ تێدگه‌هن هه‌ر وه‌كى ل وى باژێرى باشترین دیمۆكراسی ل سه‌ر ئاستێ كوردستانێ هه‌یه!، ب به‌رده‌وامى ڕه‌خنه و بابه‌تێن میدیایی یێن سلێمانیێ دخوینم و دبیستم، من نه‌دیت ئه‌و نڤیسه‌ر و رۆژنامه‌ڤانێن وى باژێرى كو به‌رده‌وام دژایه‌تیا حوكمه‌تا هه‌رێما كوردستانێ دكه‌ن ب تایبه‌ت پارتى دیمۆكراتى كوردستان، جاره‌كێ ب تنێ ڕه‌خنێ ل “نوورى مالكى” بگرن!، من نه‌دیت ڕه‌خنێ ل “حه‌نان فه‌تلاوی”ـه‌كێ بگرن كو ب ئاشكه‌را دگۆت چه‌ندین سالان من كار دكر كو ماددێ 140 نه‌هێته جێبێ كرن، من نه‌دیت ئێك جار ژ ده‌سه‌لاتدارێن سلێمانیێ بپرسن و بێژنێ داهاتێ ڤى باژێرى بۆ كێ دچیت و چاوا دهێته خه‌رجكرن!، ده‌مێ په‌كه‌كه ل ده‌ڤه‌را ئامێدیێ كه‌سه‌كێ تیرۆر دكه‌ت ئانكو ل رۆژئاڤا دیكتاتۆریه‌كا ڕه‌ها په‌یره‌و دكه‌ت، من نه‌دیت ئێك ژ وان ب ناڤ ره‌ۆشه‌نبیر و نادلسۆزێن خوه‌دى ماسكێن دلسۆزیێ ڕه‌خنه‌یه‌كێ ئاراسته‌یى په‌كه‌كێ بكه‌ن!، هه‌كه ڕه‌خنه و توندوتیژیا وان ل دژى پارتى ژ پێخه‌مه‌ت به‌رژه‌وه‌ندیێن خه‌لكێ كوردستانێ بیت، پێدڤیه بپرسین گه‌لۆ ئه‌و لاوێن په‌كه‌كه ب ساناهى دده‌نه به‌ر ده‌ستدرێژیا گولله‌یان، ئه‌و خه‌لكێن ل رۆژئاڤایێ كوردستانێ دهاڤێنه د زیندانێدا ل سه‌ر بلندكرنا ئالایێ كوردستانێ، بۆچى ڕه‌خنه ناكه‌ن؟!، كه‌سێن مینا حه‌نان فه‌تلاویێ كو ب ئاشكه‌رایی دوژمنیا خوه ژ بۆ كوردستانێ ڕادگه‌هینن نینه و ژ لایێ ده‌سه‌لاتدارێن سلێمانیێ ڤه ب گه‌رمى دهێنه پێشوازیكرن، بۆچى ڕه‌خنه ناكه‌ن؟!، گه‌لۆ “سروه عه‌بدلواحد” په‌رله‌مانتارا گۆڕان خراپترین هێڕشا سایكۆلۆژى كره سه‌ر هه‌ستێن خه‌لكێ كوردستانێ ب تایبه‌ت مالباتێن شه‌هیدان ده‌مێ بۆ كه‌ناله‌كێ عه‌ره‌بى یێ سه‌ر ب نوورى مالكیڤه گۆتى: خێزانێن شه‌هیدان خوه دفرۆشن ژ به‌ر نه‌بوونا پاره‌ى، كو د دیرۆكا كوردان دا نه‌بوویه دوژمنێن ده‌ره‌كى ژى ب ڤى ئاوایی بێ ڕێزیێ به‌رامبه‌ر خێزانێن شه‌هیدێن كوردستانێ بكه‌ن، ژ هه‌ژى ئێك ڕه‌خنه‌گرتنێ نه‌بوو؟!، واته ڕه‌خنه‌گرتن ژ لایێ نڤیسه‌ر و خوه ب ڕه‌وشه‌نبیر زانێن سلێمانیێ ب تنێ بۆ دژایه‌تیكرنا پارتى دیمۆكراتى كوردستانه و بۆ وه‌رگرتنا ده‌سه‌لاتێ یه، ل ڤێره‌یه دیمۆكراسی دبیته ئێش بۆ جڤاكى و مینا كه‌ره‌سته‌یه‌كێ بۆ تێكدانا كه‌لتۆرێ پێكڤه‌ژیانێ دهێته بكارئینان.
ب دیتنا من باشترین ڕێكه چاره‌یه بۆ قورتالبوونا ڤى وه‌لاتى ژ گه‌نده‌لیێ، ژ كه‌لتۆرێ دووبه‌ره‌كى و كینه و گرێ یێن ده‌روونى یێن سیاسى، بۆ چێكرنا دادپه‌روه‌ریێ و مافێن تاكێن وه‌لاتى، هه‌بوونا دیكتاتۆریه‌كا ب جۆره‌كێ دادوه‌ر، جڤاك هه‌كه زۆر د هشیار نه‌بن، دیمۆكراسیا ڕه‌ها په‌نجه‌شێره، د جڤاكێ مه دا ژ بلى ڕێژه‌یه‌كا كێم پڕانیا جڤاكى نزانن سنۆرێن مایتێكرنێن وان حه‌تا چ ڕاده‌نه ل گه‌ل ده‌وروبه‌ر و كه‌سوكاران، واته دێ چاوا د زمان و مه‌به‌ستا نڤیسه‌ره‌كێ گه‌هن كو بۆ مه‌ره‌مه‌كا چه‌په‌ڵ دژاتیا لایه‌نه‌كێ دكه‌ت؟!، له‌وما پێدڤیه ده‌سهه‌لاتا سیاسى ده‌لیڤێ نه‌ده‌ت زێده‌تر ئه‌ڤ نه‌خۆشیه په‌ره‌ى بستینیت، پێدڤیه ل گه‌ل هه‌بوونا دیكتاتۆریه‌كا عادیلانه، نیازێن پاك ژ باڵ بڕیار ب ده‌ستێن وه‌لاتیڤه هه‌بن و گرنگێى ب تایبه‌ت بده‌نه كه‌رتێ په‌روه‌ده‌یی و فه‌رهه‌نگى داكو خه‌لكێ جڤاكى هێدى هێدى بگه‌هنه ئاسته‌كێ كو دیمۆكراسی ڕۆناهیه‌ك بیت د ژیانێدا نه‌ك ئێش و ژان!، پشتڕاستم هه‌كه حوكمه‌ته‌كا دیكتاتۆرا عادیلانه هه‌بایه، چه‌ند یا خراب بایه، دا باشتر بیت ژ ڤێ به‌ره‌لایا نوكه هه‌م د ئیداره‌دانا وه‌لاتی دا هه‌ی ب تایبه‌ت دیارده‌یا گه‌نده‌ڵیێ، هه‌م ب ڤى ڕه‌نگێ رێزێن كوردان تێك نه‌دچوون.
بۆچى كوشتنا خه‌لكێ سڤیل ئاسایه ؟!
د ده‌سپێكا سه‌رهه‌ڵدانا شۆره‌ِشا په‌كه‌كێ دا ل ئه‌و سه‌رده‌مێ هاتیه دامه‌زراندن هه‌تا به‌رى چه‌ند ساڵان، درووشمێن زه‌به‌لاح و سه‌یر هه‌بوون و یێن هه‌ین، لێ درووشمێن وان زوى زوى ل دویف ده‌مى و به‌رژه‌وه‌ندیێن ئارمانجا وان یا ڕاسته‌قینه و ڤه‌شارتى دهێنه گوهۆڕین!!، وان ل ده‌سپێكێ ته‌كه‌ز ل سه‌ر چێكرنا ده‌وڵه‌ته‌كا كوردى یا مه‌زن ل سه‌ر ئاستێ هه‌رچار پارچه‌یێن كوردستانێ دكر، هزاران گه‌نج ل سه‌ر ڤێ بانگه‌وازێ مینا چه‌كدار و خوه‌گوریكه‌ر گه‌هشتنه ڕێزێن په‌كه‌كێ ژ به‌ر كو خه‌لكێ كوردستانا باكۆر ب تایبه‌ت تێهنی یێن شۆره‌شه‌كێ بوون داكو ژ بنده‌ستیێ و سته‌ما توركان قورتال ببن، په‌كه‌كێ ژى ئه‌ڤ ده‌لیڤه بۆ كۆمڤه‌كرنا هێزه‌كا سه‌ربازى و ڕێكخستى ب كه‌یس گرتن و شیان د ده‌مه‌كێ كێم دا خه‌لكه‌كێ ل دروبه‌رێن خوه كۆم بكه‌ن، ده‌هان هزار كه‌سان ڕێخستن ژ بۆ په‌كه‌كێ دكرن و سه‌دان و هزاران كه‌س قوربانی بوون و هاتنه كوشتن، هه‌مى ژ پێخه‌مه‌ت ڤان درووشمێن زه‌به‌لاح و ڕزگاربوونا نه‌ته‌وه‌یا كورد، ل داویێ و پشتى ڤان هه‌مى قوربانیدانان، ل نشكه‌كێڤه په‌كه‌كێ درووشمێن خوه گوهۆڕین هه‌تا ڕاده‌یه‌كێ كو دبێژن: ئه‌م ده‌وڵه‌ت نه‌ته‌وه ڕه‌د دكه‌ین و داخوازیه‌كا كه‌ڤنپه‌رستانه‌یه كو هنده‌ك سه‌ركرده‌یێن كوردان دكه‌ن، ئه‌م بۆ مافێن گه‌لان شۆره‌شێ دكه‌ین!.
هه‌ر حزبه‌ك ئان ڕێكخراوه‌ك ده‌مێ دهێته دامه‌زراندن، خوه‌دى ئارمانجه‌كه كو بشێت خه‌لكه‌كێ ل دوروبه‌رێن خوه كۆم بكه‌ت و بۆ وێ ئارمانجێ تێبكۆشیت، یا كو گه‌ره‌كه خه‌لك لێ بزانیت ئه‌وه كو نیازێن وێ حزبێ ئانكو ڕیكخراوێ چنه و ئه‌و درووشمێن بكاردئینن و ئارمانجا وان یا ڕاسته‌قینه ئێكن، ئان نه؟.
د نوكه دا ل جهێ ده‌وڵه‌تا كوردستانا مه‌زن، درووشما وان یا بوویه (ئه‌مێ شۆره‌شێ دكه‌ین داكو هه‌مى گه‌لێن بنده‌ست ئازاد بكه‌ین، ئه‌مێ ل دووڤ ڕێباز و فه‌لسه‌فه‌یا ڕێبه‌ر ئاپۆ شۆڕه‌شێ بكه‌ین و مافێن گه‌لێن بنده‌ست وه‌ربگرین)، گه‌لۆ ب ڕاستى لاوێن كوردان ب وێ مه‌به‌ستێ ته‌ڤلى ڕێزێن وه ببوون؟!، گه‌لۆ گه‌ر گه‌ریلایه‌كێ وه بێژیت ماده‌م ده‌وله‌ت نه‌ته‌وى هوون ڕه‌د بكه‌ن ئه‌زێ ده‌ست ژ شۆڕه‌شێ به‌رده‌م و ئه‌ز بۆ گه‌لان نه‌هاتمه شۆڕه‌شێ، دێ چاوا به‌رسڤێ ده‌ن؟!، ئه‌و هزاران قوربانى یێن وه‌داین بۆ ده‌وڵه‌تا كوردستانا مه‌زن، وه چ ده‌ستكه‌فت ب ده‌ست ئینان د هه‌ژى وێ قوربانیدانێ و خوینا وان هه‌مى لاوێن كوردان دا بیت؟!، ب ڕاستى به‌رسڤا وه بۆ كه‌س و كارێن وان هه‌مى قوربانیان چییه كو بۆ ده‌وڵه‌تا هه‌رچار پارچه گه‌هشتبوونه ڕێزێن وه و جانێ خوه قوربانى كر؟!.
دڕاستی دا ئه‌ڤ چه‌پ و لۆفه‌یێن كو د ستراتیژیا په‌كه‌كێ دا هه‌ی و درووشمێن مه‌زن و زه‌به‌لاح و خه‌یالى، وێ چه‌ندێ نیشا دده‌ت كو نیازێن وان و درووشمێن وان گه‌له‌ك ژێكجودا و دوورن، ب دیتنا من نیازێن دروستێن په‌كه‌كێ پیرۆزكرنا ئایدولۆژیایه‌كا سنۆرداره كو چ په‌یوه‌ندى ب نه‌ته‌وه‌یا كوردان ڤه نینه، ب تنێ درووشمكرنا كورداتیێ مینا ئامرازه‌كێ بكاردئینن كو خه‌لكه‌كێ ل خوه كۆم بكه‌ن، ئانكو دروستكرنا جۆره ئاینه‌كێ دیكه‌یه كو پرتووك و ئایدۆلۆژیایا ئوجه‌لان تێدا پیرۆز بكه‌ن و په‌كه‌كێ چو خه‌م نینه ملیۆنان كه‌س ببنه قوربانى ژپێخه‌مه‌ت سه‌ركه‌فتنا وێ ئایدۆلۆژیایێ!، ئانكو ئه‌ندامێن وان بچن خوه ب ڕه‌خنه‌گرێن ڕێبازا ئۆجه‌لانڤه بپه‌قینن!.
د زێهنیه‌تا په‌كه‌كێ دا وه‌سا هاتیه چاندن كو دڤێت د پاشه‌ڕۆژێ دا ئه‌و سیسته‌مێن ته‌ڤایا وڵاتێن جیهانێ بگوهڕن و ئه‌ورۆپى و ئه‌مریكى ژى ل سه‌ر بنیاتێ فه‌لسه‌فه‌یا ئاپۆ سیسته‌مێ خوه یێ حوكمڕانیێ دابڕێژن، ژبه‌ر ڤێ چه‌ندێ ژى كو ئه‌و دان ب سیسته‌مێن ئه‌وروپى و ئه‌مریكا نائینن و وه‌سا هزر دكه‌ن كو ئه‌و دێ سه‌ركه‌فتنێ ئینن د گوهۆڕینا سیسته‌مێ ته‌ڤایا جیهانێ دا!، ژ بۆ وان گرنگ نینه جیهان پێناسا تیرۆرێ ل سه‌ر وان دابنیت ئاننه!، هه‌ر وه‌كى خه‌یالێن ئیسلاما جیهادى، هه‌ر ژبه‌ر ڤێ چه‌ندێ ژى ژ لایێ په‌كه‌كێڤه كوشتنا مرۆڤان بۆ سه‌رخستنا ئایدۆلۆژیایا تایبه‌ت ب وان چ بهایه‌ك نینه.
له‌وما پێدڤیه نه‌ته‌وه‌یا كورد پتر هزر د سیاسه‌تا په‌كه‌كێدا بكه‌ن و هشیار بن، زۆر مخابن كو كێشه‌یا نه‌ته‌وه‌یی یا كوردان یا بوویه ئامراز و كه‌ره‌سته‌یێن ئافراندنا هێزێ داكو هنده‌ك ئارمانجێن دیكه یێن ڤه‌شارتى ب به‌هانه‌یا كوردایه‌تیێ بپێكن، د نوكه دا ئه‌و ئارمانجا په‌كه‌كێ یا ڕاسته‌قینه نه‌ك خزمه‌تا نه‌ته‌وه‌یا كورد ناكه‌ت، به‌لكى به‌رده‌وام زیانێن مه‌زن ژى پێدگه‌هینیت.
نيشاندان
WP Facebook Auto Publish Powered By : XYZScripts.com