كامى كه‌مال
د سروشتێ مرۆڤایه‌تیێ دا دو جۆره‌ به‌رژه‌وه‌ندى یێن هه‌ین كو حه‌ز و پێنگاڤێن مرۆڤان ل دۆر سه‌ره‌ده‌ریكرنێ ل گه‌ل خوه‌ و مرۆڤایه‌تیێ و ژینگه‌هێ و وه‌لاتى و ژبۆ پاشه‌رۆژێ ژی ئاراسته‌ دكه‌ن، ئێك ژ وانا (به‌رژه‌وندیێن تایبه‌ت)ن و، یا دوویێ ژی (به‌رژه‌وه‌ندیێن گشتی)نه‌، گرنگیدانا تاكێن جڤاكا مه‌ ب به‌رژه‌وه‌ندیێن تایبه‌ت مینا: بزاڤكرن ژبۆ ب ده‌ستڤه‌ئینانا ئیمتیاز و پاره‌ و پله‌یان و خوشگوزه‌رانیێ…هتد د گۆپیتكێ دایه‌، دناڤ دابونه‌ریت و كه‌لتوورێ وه‌لاتێ مه‌دا به‌رژه‌وه‌ندیێن تایبه‌ت گه‌له‌ك دپیرۆزن هه‌تا ڕاده‌یه‌كێ كو سه‌رێ به‌رژه‌وه‌ندیێن گشتى بۆ پێكاندنا به‌رژه‌وه‌ندیێن تایبه‌ت دهه‌رشینین و ژناڤدبه‌ین، واته‌ ب گشتى تاكێ مه‌ یێ به‌رهه‌ڤه‌ هه‌مى جۆره‌ قوربانیه‌كێ بخوه‌ و وه‌لاتێ خوه‌ بده‌ت ژبۆ مه‌به‌ستا پێكاندنا به‌رژه‌وه‌ندیێن تایبه‌ت (هه‌لبه‌ت گرنگیدان ب به‌رژه‌وه‌ندیێن تایبه‌ت كاره‌كێ نه‌ڕه‌واو نادروست نینه‌، لێ ب مه‌رجه‌كێ پاراستن و بده‌ستڤه‌ئینانا به‌رژه‌وه‌ندیێن تایبه‌ت ل سه‌ر هه‌ژمارا به‌رژه‌وه‌ندیێن گشتى نه‌هێنه‌ مه‌زاختن!)، لێ د ناڤ كه‌لتوورێ مه‌دا به‌رژه‌وه‌ندیێن گشتى بێ بهاو لاوازترین بابه‌تن د په‌روه‌رده‌و كه‌لتوورێ جڤاكا مه‌دا، د ده‌مه‌كێ دا كو جانێ (روحا) به‌رژه‌وه‌ندیێن تایبه‌ت د ناڤ له‌شێ به‌رژه‌وه‌ندیێن گشتى دا دژیت و ئه‌گه‌ر به‌رژه‌وه‌ندیێن گشتى د ساخله‌م نه‌بن مه‌حاله‌ به‌رژه‌وه‌ندیێن تایبه‌ت دبێ ئازار بن، جڤاكه‌ك بێ پاراستنا به‌رژوه‌ندیێن گشتى تاما به‌خته‌وه‌ریێ و ئارامیا ناكه‌ت. پاراستنا ژینگه‌هێ، رێزگرتن ل قانوونێ، هه‌لویست وه‌رگرتن ل دژى نادادیێ و نائێكسانیێ، كارو چالاكیێن مرۆڤى و هاریكاریكرنێن جۆراوجۆر ژبۆ مرۆڤایه‌تیێ ژ نموونه‌یێن گرنگدانێ یه‌ ب به‌رژه‌وه‌ندیێن گشتی، ئه‌گه‌ر جڤاكه‌كا به‌رژه‌وه‌ندیێن گشتى واته‌ به‌رژه‌وه‌ندیێن گرێدایى ب مرۆڤایه‌تیێ و نیشتیمانى ڤه‌ بێبها كرن، بێگومان هه‌ر چ جوانى و نازكى و هه‌سته‌كا مرۆڤایه‌تیێ و ئێكسانى و ئارامیه‌كه‌ دێ ژناڤچن و تالان و فێلكرن و دره‌و گه‌نده‌لى دێ جهێ وان گرن و بنه‌ میكانزم ژبۆ پێكاندنا به‌رژه‌وه‌ندیێن ته‌نگێن تایبه‌تى، ل وى ده‌مى قه‌یرانا ئارامیا ده‌روونى ل سه‌ر جڤاكێ ب گشتى زال دبیت. هه‌كه‌ هه‌ڤبه‌ریه‌كا نهایا وه‌لاتێ خوه‌ ل گه‌ل به‌رى زێده‌تر ژ بیست سالان و دگه‌ل وه‌لاتێن دی یێن ده‌ڤه‌رێ بكه‌ین، ژلایێ ده‌لیڤه‌یێن كارى و ئازادیا ده‌ربرینێن سیاسى و دیمۆكراسیه‌تێ و هه‌بوونا كه‌ره‌سته‌یێن خزمه‌تگوزاریێن ژیانێ مینا ئه‌نترنێت و ترومبێل و هه‌تا داهاتێ هه‌یڤانه‌ڤه‌ باشترین ژ به‌رێ و ژ گه‌له‌ك وه‌لاتێن دیتر یێن ده‌ڤه‌رێ ژى، لێ بێ شكۆبوون و بێبهایا به‌رژه‌وه‌ندیێن گشتى د ناڤ جڤاكا مه‌دا، ژیان ب گشتى یا شێواندى و رۆژ ب رۆژێ ژی پتر یا به‌ ب تاریاتیێ و هه‌لوه‌ریانێ ڤه‌ دچیت.
د جڤاكا مه‌دا ب گشتى، به‌رپرس و رێڤه‌به‌ر ئه‌رك و خزمه‌تا خه‌لكى ل پشتى پاشه‌رۆژا خوه‌و زارۆ و كه‌سوكارێن خوه‌دا دبینن، نۆشدار مرۆڤایه‌تیێ ل پشت پاره‌و بازرگانیێ دا دبینن، ئه‌ندازیار كوالێتی یا ئاڤاهى و پڕ و جادده‌یان ل پشتى خوه‌ ده‌وله‌مه‌ند كرنێ دا دبینن، مامۆستا پاشه‌رۆژا قوتابیان ل پشتى بێهنڤه‌دان و خوه‌شیا خوه‌دا دبینن، دادوه‌ر بریارا قانوونى و دروست ل پشتى ڕازیكرنا به‌رپرس و ده‌ره‌به‌گان دا دبینن، رۆژنامه‌نڤیس باوه‌ر و ئه‌ته‌كێت و ڕه‌وشتێ راگه‌هاندنێ ل پشتى پاره‌ و پاراستنا ئاسایشا گشتى و هه‌ستێن مرۆڤى و نه‌ته‌وه‌یى دبینن، شۆفێر یێ به‌رهه‌ڤه‌ سه‌رپێچیا قانوونى بكه‌ت داكو بتنێ چه‌ند چركه‌یان بله‌زتر بگه‌هیته‌ جهێ ژبۆ دچیت، ژبۆ وى گرنگ نینه‌ خێزانه‌ك ب ئه‌گه‌رێ سه‌رپێچیا وى ڕاستى ڕوودانه‌كێ ببن و ژناڤ بچیت…هتد.
ده‌مێ (ئه‌ز و تو و ئه‌م و ئه‌و) هه‌میان و ژبۆ پێكاندنا به‌رژه‌وه‌ندیێن تایبه‌ت، به‌رژه‌وه‌ندیێن گشتى بێبهاكرن و پشتگوهخستن، ل وى ده‌می ده‌روون و به‌رخته‌وه‌ریا مه‌یه‌ هه‌ر دیسا باجێ دده‌ته‌ڤه‌، بێگومان ل داویێ ژى كه‌سێ ڕازى نابیت!، واته‌ نۆشدار زارۆیێ ئه‌ندازیارى ب دروستاهى چاره‌سه‌ر ناكه‌ت، ئه‌ندازیار جادده‌یا نۆشدارى و شۆفێرى ب كوالێتى دروست ناكه‌ت، و شۆفێر زارۆیێ نۆشدارى و ئه‌ندازیارى ل روودانان ناپارێزیت، مامۆستا زارۆیێن وان په‌روه‌رده‌ ناكه‌ت و دادوه‌رژى تاوانبار و تاوانلێكریان ژێكجودا ناكه‌ت…هتد، واته‌ چ قانوون و جوانى و په‌یوه‌ندیێن مرۆڤایه‌تیێ نامینن و هه‌مى ژناڤدچن، ل شوونا وان گه‌نده‌لى و فێل و تالان و نه‌دادى جهێ خوه‌ دگرن. له‌وما ب چ بها و قوربانیدانه‌كا هه‌بیت، گرنگه‌ ل ده‌سپێكێ هه‌م ده‌ستهه‌لاتا سیاسى و قانوونى و زانكۆ و ڕاگه‌هاندن و هه‌م ژی ل سه‌ر ئاستێ تاكى د ناڤ جڤاكا مه‌دا پێداچوونێ د سیسته‌مێ په‌روه‌ردێ و باوه‌رێن خوه‌دا بكه‌ین و به‌رژه‌وه‌ندیێن گشتى ب تایبه‌ت یێن مرۆڤى و نیشتیمانى ژی بكه‌ینه‌ بابه‌ته‌كێ گرنگ د به‌رنامه‌ و دزات و وژدانا خوه‌ و زارۆ و خه‌لكێ وه‌لاتی دا ژبۆ به‌خته‌وه‌ریێ و ئارامیا ده‌روونى یا خوه‌ ب تایبه‌تى!.

كامى كه‌مال

د دیرۆكا ده‌وله‌تاندا گه‌له‌ك جاران ملله‌تان ب هزره‌ت و هیڤیێن ژیانه‌كا باشتر و ژ هه‌ژیتر بزاڤا گوهارتنێن جومگه‌یێن سیاسى و ئیدارى یێن ولاتێن خوه‌ یێن كری، هه‌لبه‌ت ئه‌ڤ خواسته‌ خواسته‌یه‌كا سروشتى و ڕه‌وایه‌و ڕێره‌وا پێشڤه‌چوونا ولاتانه‌ د هه‌مى واره‌كی دا، لێ گوهارتن دهه‌ر ده‌مه‌كی دا و دهه‌ر دیفاكتۆیه‌كێ دا و بێ هویربینى و دویربینی دبیت ببیته‌ فاكته‌رێ نه‌هامه‌تى و وێرانكاریان بۆ ملله‌تان.
د هه‌ر هه‌لبژارتنه‌كێدا پێدڤیه‌ ده‌نگده‌ر هه‌مى لایه‌نێن ئه‌رێنى و نه‌رێنى ب باشى و هویرى بخوینیته‌ڤه‌، هه‌مى ده‌مه‌كێ سروشتییه‌ كو حزب و لایه‌نێن سیاسى دبێ ده‌سه‌لاتیێدا ب تیۆرى خوه‌ ب هێزێن ئاشتیخواز و یه‌كسانخواز و دژه‌ گه‌نده‌لى پێناسه‌ بكه‌ن، لێ ده‌مێ دگه‌هنه‌ ده‌سه‌لاتێ و جومگه‌یێن سیاسى و رێڤه‌به‌رییا ولاتان دگرنه‌ ده‌ست، ئه‌ڤجا جه‌وهه‌رێ سیاسه‌ت و ئه‌جندایێن وان دیار دبن، بێ گومان ئه‌گه‌ر چه‌ند لاپه‌ره‌یێن دیروكا ده‌وله‌تێن ده‌وروبه‌رێن خوه‌ ڤه‌كه‌ین ب روونى دێ بینین كو گوتن و درووشم دگه‌ل كریاران گه‌له‌ك ژێك دویرن و دجودانه‌.
ئه‌گه‌ر ئه‌م هه‌ڤبه‌ریه‌كێ دناڤبه‌را پارتى و حزبێن دیتر دا بكه‌ین، دێ پتر تێگه‌هین كو بۆچى ئه‌ڤرۆ ب هێزبوونا پارتى پێدڤیه‌كه‌ بۆ ملله‌تێ كورد؟.
به‌رى زێده‌تر ژ سه‌د سالان بارزان بۆ په‌ناهگه‌هه‌كا ئارام و هیڤیه‌كا مه‌زن ژبۆ هه‌ر كورده‌كێ سته‌م لێ دهێته‌كرن، سه‌خمه‌راتى وێ چه‌ندێ كو حوكمه‌تێن داگیركه‌ر خودان چه‌ك و هێزه‌كا مه‌زن بوون و چه‌ندین جاران هێرشێن سه‌ربازى كرنه‌ سه‌ر بارزان، لێ بارزان ب خوه‌راگرى ڕاوه‌ستیا و كول نه‌دا، بارزان نه‌ك بتنێ په‌ناهگه‌كا ئارام بۆ ژبۆ ئه‌و كوردێن سته‌م لێ دهاته‌كرن كو خوه‌ دگه‌هانده‌ بارزان، به‌لكى بارزان باوه‌شا خوه‌ ژبۆ وان ئه‌رمه‌نى و جوهیان ژى ڤه‌كر كو ژبه‌ر سته‌م و دوژمنایه‌تیا ره‌گه‌زپه‌رستیێ خوه‌ دگه‌هانده‌ بارزان، بارزان پارێزه‌رێ گیانه‌وه‌ران و ژینگه‌هێ و مافێن ژن و زارۆیان ژی بۆ گه‌له‌ك زێده‌تر ژ ده‌ڤه‌رێن دیتر، ب ڤى ره‌نگى بارزان بۆ هیڤى و جهێ باوه‌ریێ ژبو نه‌ته‌وه‌یه‌كا سته‌م لێ كرى و ژێر ده‌سته‌یا بناڤێ كورد، واته‌ رێبازا بارزان ل ئێش و نه‌هامه‌تیێن ڤى وه‌لاتى دروست بوو، لسه‌رده‌مێ شێخ عه‌بدولسه‌لام بارزانى و شێخ ئه‌حمه‌دێ بارزانى و بارزانیێ نه‌مر ژبۆ ڕزگاركرنا ملله‌تێ كورد شۆرشێن بارزان ژدایكبوون، و پشتى ڤان قۆناغان ل سالا 1946 پارتى هاته‌ دامه‌زراندن، واته‌ بوو حزبه‌ك كو سه‌رچاڤێ وێ رێبازا بارزانیه‌ و بۆ درێژه‌پێده‌رێ خه‌بات و شۆرشێن بارزان، و هه‌تا ڤێ چڕكه‌یێ ژی ل ژێر سیبه‌را بارزان و مالباتا بارزانی دا ملله‌تێ كورد شكۆ و كه‌رامه‌تا خوه‌ پاراست و خوه‌ ب ده‌ستێ دوژمن و داگیركه‌رانڤه‌ به‌رنه‌دایه‌، پارتى ل ژێر سه‌ركردایه‌تیا مالباتا بارزانی دا شیان د گوپیتكا نه‌بوونێ و بێ چه‌كیێ دا خوه‌ ڕاگرن و د تاریترین و درێژترین تونێلان دا ل سه‌ر هزاران پلان و ناپاكیێن دوژمنێن ناڤخوه‌ و ده‌رڤه‌ ده‌ربازبوون و سه‌ركه‌فتن، د ڤان سه‌د سالێن خه‌باتا بارتیدا گه‌له‌ك شه‌ڕ لسه‌ر پارتى هاتنه‌ سه‌پاندن، دوژمنان كرێگرتى و جاشێن خوه‌ ب جۆره‌ها ڕه‌نگ و پلان ل دژى پارتى بكارئینان، ژبه‌ر هه‌بوونا ناپاك و كرێگرتیان پارتى و ملله‌تێ كورد باجێن مه‌زن دان، لێ دیسا سه‌ركه‌فتن بۆ كوردان مایه‌ڤه‌ و ئه‌ڤرۆ دبینین به‌رهه‌مێ شۆرش و به‌رخوه‌دانێن كو ل بارزان ده‌ستپێكر گه‌هشته‌ قۆناغه‌كێ كو مه‌زنترین په‌یوه‌ندیێن سیاسى و دبلۆماسی و ئابوورى د ناڤبه‌را حوكمه‌تا كوردستانێ و ولاتێن زلهێزێن جیهانێدا چێبوونه‌، ژبۆ كوردان جهێ شانازیێ یه‌ كو هه‌تا ولاتێن داگیركه‌رى ژی ل گوپیتكا شوڤێنییه‌تێ دا دیفاكتۆیا هه‌رێما كوردستانێ په‌ژراندو په‌یوه‌ندیێن ئابوورى و سیاسى و كه‌لتوورى دگه‌ل كوردان گرێدان و ئالایێ كوردستانێ ژی ل فرۆكه‌خانه‌یێن خوه‌ بلندكرن.
بێگومان ئاسایی و سروشتییه‌ كو ل ژێر حوكمرانییا پارتیدا كێماسى ژی گه‌له‌كێن هه‌ین، لێ ئه‌ڤ كێماسییه‌ پتر كێماسی یێن كه‌لتوورى و ده‌مكینه‌، پارتى ناخوازیت ب گڤاشتن و ب له‌ز گوهارتنێن كه‌لتوورى بكه‌ت، گرنگه‌ كوردان ئارامى هه‌بیت كو دگه‌ل پێشڤه‌چوونا ئاستى ره‌وشه‌نبیرى و شارستانییه‌تێ كێماسى و نادادیێن ئیدارى ژی نامینن.
ئه‌ڤرۆ گرنگه‌ ملله‌تێ كورد ل دیرۆكا حزب و لایه‌نێن دیتر ژى یێن سیاسى بنێریت كو هاتنه‌ سه‌ر سفرا به‌رهه‌ڤكریا به‌رهه‌مێن شۆرشێن بارزان، پترین ژ وان حزب و لایه‌نان ب سپۆنسه‌رى و پشته‌ڤانیا ده‌وله‌ت و لایه‌نێن داگیركه‌ر و دوژمنێن كوردان چێبوون و ئه‌و كه‌ش و ژینگه‌ها دیمۆكراسى كو پارتى باوه‌رى پێ هه‌ى و به‌رهه‌مێ شۆرشێن بارزان ئافراندى بو ده‌لیڤه‌یه‌ك كو ل ژێر ماسكێن كوردایه‌تێى و درووشمێن ڕه‌نگاوره‌نگێن بێ بنه‌ما دژایه‌تیا هه‌بوونا هه‌رێما كوردستانێ بكه‌ن.
هه‌رچاوا هونه‌ر و زانست و ته‌كنولوژیا ل جیهانێ پێشڤه‌ چوون، ب وى ره‌نگى دوژمن و داگیركه‌رژى ب پلان و هونه‌ره‌كێ زیره‌كانه‌تر ژبه‌رێ هه‌نده‌ك كوردێن لاواز ب كرێ دگرن و ل دژى حوكمه‌ت و ده‌ستكه‌فتێن كوردان بكاردئینن، دسه‌رده‌مێ به‌رێ دا راسته‌وخوه‌ و ب ئاشكه‌را جاش و كرێگرتی دگرتن و چه‌كدار دكرن ل دژى شۆرشێن كوردان، لێ ئه‌ڤرۆ دوژمن ب شاره‌زایانه‌ وان ب جلوبه‌رگێن كوردى دخه‌ملینیت و ب درووشمێن چاكسازیێ و دلسۆزیێ رۆژانه‌ پلانێن زال كرنا دوژمنان لسه‌ر كوردان دادرێژن!، لێ خوشبه‌ختانه‌ هه‌تا ئه‌ڤرۆ ژى ل ژێر سیبه‌رو هه‌دارو شاره‌زاییا سه‌رۆك بارزانى بتنێ شه‌رمزارى ژبۆ وان لایه‌ن و حزبێن سیاسى یێن ماینه‌ڤه‌، گرنگه‌ تاكێ كورد ژبیر نه‌كه‌ت كو كاروانێ بزاڤا ڕزگارى خوازا گه‌لێ كورد هێشتا نه‌گه‌هشتیه‌ ئارمانجا داویێ كو سه‌ربخوه‌بوونه‌، بێ سه‌ربخوه‌یى و ده‌وله‌تا كوردستانى چاره‌نڤیسێ كوردان یا زامن نینه‌، گرنگه‌ هه‌مى ملله‌تێ كورد پشته‌ڤانیا پارتى بكه‌ن هه‌تا دگه‌هنه‌ سه‌ربخوه‌بوونێ و ده‌وله‌تا كوردستانى، پاش ڤێ قۆناغێ ئێدى ئه‌گه‌ر ملله‌ت شاشیه‌كێ ژی د هه‌لبژارتنێ دا بكه‌ت، دكاریت قه‌ره‌بۆ بكه‌ته‌ڤه‌، لێ د ڤێ قۆناغا نوكه‌دا كو كوردان ده‌وله‌ت نینه‌ ب ساناهى شاشى دهه‌لبژارتناندا ناهێته‌ قه‌ره‌بۆكرن.

كامى كه‌مال
ئیران د هه‌مبه‌ر كوشتنا سلێمانى دا
بۆیه‌رێن كوشتنا قاسم سوله‌یمانى نه‌ك تنێ نه‌هێلانا فه‌رمانده‌یه‌كێ ب هێزێ سه‌ربازیێ ئیرانێ بوو د گۆره‌پانا سیاسى و سه‌ربازیا ده‌ڤه‌رێ دا، به‌لكى ئینانا قووناغه‌كا نوى یا سیاسى بوو ل رۆژهه‌لاتا ناڤه‌راست، پێناسه‌یا كه‌سایه‌تیا سوله‌یمانى ل جه‌م خه‌لكێن ئیرانێ ب ئاوایه‌كێ ئه‌فسانه‌یى بو كو ئه‌و دكاریت ب ساناهى هه‌ڤكێشه‌یێن سه‌ربازى و ئه‌وله‌هى ل دژى هه‌مى وه‌لاته‌كێ د به‌رژه‌وه‌ندیا سیاسه‌تا ئیرانێ دا ب دووماهى بینیت و تنێ د حاله‌ته‌كێدا دبیت، دوژمنێن وان بشێن دربه‌كێ لێ بده‌ن ده‌مێ ب ته‌مامى وه‌لاتێ وان ژ لایێ سه‌ربازیڤه‌ دادرۆخیت..
ئه‌مریكا و ئیسرائیلێ گه‌له‌ك جاران د دیرۆكا خوه‌دا بنكه‌یێن ئه‌تۆمى یێن ئیرانێ و ئه‌و باره‌گایێن سه‌ر ب ته‌هرانێ ڤه‌نه‌ یێن بۆمبه‌باران كرین، لێ ژنشكه‌كێڤه‌ نۆچه‌یێ كوشتنا مه‌زنترین و ب هێزترین فه‌رمانده‌یێ وان یێ سیاسى و سه‌ربازى كو رۆله‌كێ مه‌زن د ئاراسته‌یێن سیاسه‌تا ده‌رڤه‌یا ئیرانێ دا ژى هه‌بوو، بۆ خه‌لكێ ئیرانێ شۆكه‌كا مه‌زن و باوه‌رنه‌كرى بوو.
هه‌لبه‌ت كوشتنا قاسم سوله‌یمانى بۆ ئیرانێ بخوه‌ ژى ب تنێ ژده‌ستدانا فه‌رمانده‌یه‌كێ مه‌زن نه‌بوو، ئیران د نها دا یا ڕاستى ئێحراجه‌كا سیاسى یا مه‌زن بۆى، هه‌م ژلایێ خه‌لكێ ئیرانێ ڤه‌ و هه‌م ژى ل سه‌ر ئاستێ نێڤده‌ولى و ده‌ڤه‌رێ ڤه‌، ژبه‌ركو د چاڤێن خه‌لكێ خوه‌ و هه‌ڤپه‌یمانێن خوه‌ دا، ئیران داره‌ك نینه‌ ب ساناهى بهێته‌ هه‌ژاندن و ریشه‌كێش كرن، و هه‌مى ده‌ما گه‌فێن ژناڤبرنا هه‌ڤڕك و دۆژمنێن خوه‌ دكه‌ت، له‌وما خه‌لكێ وێ ب گشتى و هه‌ڤپه‌یمانێن وێ چاڤه‌رێى كارڤه‌دانه‌كا مه‌زن و به‌رسڤه‌كا ژهه‌ژى قوربانیبوونا فه‌رمانده‌یێ وانن ل حوكمه‌تا ئیرانێ دكه‌ن.
ئه‌مریكا بوچێ سلێمانى كوشت؟
كوشتنا قاسم سوله‌یمانى بۆ ئه‌مریكایێ ژى ب تنێ ژناڤبرنا فه‌رمانده‌یه‌كێ مه‌زنێ ئیرانى نه‌بوو، ب وێ بۆیه‌رێ ئه‌مریكایێ چه‌ندین په‌یامێن جودا جودا دانه‌ ئیرانێ، ب دیتنا من ئه‌مریكایێ هه‌نده‌ك ئه‌گه‌ر (فاكته‌ر) ئافراندن كو قووناغه‌كا نوى یا سیاسى بگریته‌به‌ر، كو دهێته‌ چاڤه‌رێ كرن قووناغێن سه‌ربازى و دژوار بن بۆ ئیرانێ، و ب ڤێ كریارا سه‌ربازى ل دژى ئیرانێ، ئه‌مریكایێ گوته‌ ئیرانێ كو هه‌رده‌مێ مه‌ بڤێت ب رێیا ته‌كنۆلوژیا پێشكه‌فتى و سه‌ربازییا خوه‌ دێ شێین هه‌ستیارو بهێزترین خالێن وه‌ یێن سه‌ربازى ب پێكین و ژناڤ ببه‌ین، هه‌روه‌سا ئه‌مریكایێ ئیران ئێخسته‌ ددۆخه‌كێدا داكو گه‌ره‌كه‌ كارڤه‌دانه‌كا ب هێز ئه‌نجام بده‌ت و ب كێمى ڤه‌ لایه‌نێ مه‌عنه‌وى یێ خه‌لكێ وێ و هه‌ڤپه‌یمانێن وێ زیندى ببیته‌ڤه‌، هه‌لبه‌ت خالا هه‌ستیار بۆ ئیرانێ ژى كود بیت لێ بترسیت ئه‌ڤه‌یه‌ كو ئه‌مریكاژى چاڤه‌رێى كارڤه‌دانه‌كا سه‌ربازى یا ئیرانێ بیت داكو بكه‌ته‌ به‌هانه‌و ئیرانێ ڕاكێشیته‌ د شه‌ره‌كێ مه‌زن دا، یان ژى ب كێمى ڤه‌ به‌هانه‌یان دروست بكه‌ت داكو بنگه‌هێن وێ یێن ئه‌تۆمى بۆمباران بكه‌ت..
د نها دا ئیران یا كه‌فتیه‌ د دۆخه‌كێ هه‌ستیاردا، پاشڤه‌چوونا وێ ئانكو ئه‌گه‌ر تۆلێن كوشتنا قاسم سوله‌یمانى نه‌ڤه‌كه‌ت، هه‌م دێ خه‌لكێ وان و هه‌ڤپه‌یمانێن وان ل هێز و درووشم و پرۆپاكنده‌یێن حوكمه‌تا ئیرانێ كه‌ڤنه‌ گۆمانێ و بێ هیڤى بن، هه‌م ژى دێ ئوپۆزسیون و به‌ره‌یێ خوه‌نێشاندانان ل ئیرانێ ب هێز كه‌ڤیت، هه‌كه‌ ئیرانێ پێنگاڤان ژى ب هاڤێژیت و توله‌یێن سوله‌یمانى ڤه‌كه‌ت، دیسا دبیت ڕاستى شه‌ره‌كێ ببیت كو سه‌ركه‌فتن بۆ وێ دبیت یا مه‌حال بیت.
عیراق پشتى كوشتنا سوله‌یمانى
ژبلى كو عیراق كو هه‌ڤسنۆر و هه‌ڤپشكه‌ د گه‌له‌ك به‌رژه‌وه‌ندیێن ئابوورى و سیاسى و جڤاكى ڤه‌ دگه‌ل ئیرانێ، ده‌سه‌لاتا عیراقێ د نها دا یا ل ژێر كونترۆلا وان كه‌سایه‌تیان یێن كو ب مه‌رجه‌عیه‌ت و سیاسه‌تا تایفه‌گه‌رایه‌تیێ ڤه‌ دگرێدایى، حوكمه‌تا عیراقێ ل هه‌مبه‌رى هێزا مه‌رجه‌عێن شیعه‌ڤه‌ خوه‌ گه‌له‌ك لاواز و بێ ده‌سه‌لات دبینیت و چو حوكمه‌ته‌ك ل به‌غدایێ د نها دا نكاریت بێ ڕه‌زامه‌ندیا دلێ سیستانى و هنده‌ك كه‌سایه‌تى یێن دیتر یێن مینا موقته‌دا سه‌در سه‌ركه‌فتنێ بینیت (هه‌لبه‌ت ئه‌ڤه‌ دیفاكتۆیه‌)، خالا هه‌ڤپشك یا د ناڤبه‌را مه‌رجه‌عێن عیراقێ و ولاتێ ئیرانێ ڤه‌، تایفه‌گه‌رایی و دیرۆكا هه‌ڤپشكا مه‌زهه‌بی یه‌، هه‌روه‌سا پترین سه‌ركرده‌یێن شیعه‌ یێن عیراقێ ته‌مه‌نه‌كێ یێن ل ژێر په‌روه‌ردا سیاسه‌تا ئیرانێ دا فێربووى و ب زه‌حمه‌ته‌ بشێن یێن سه‌ربخوه‌ بن د بریارێن سیاسى یێن عیراقێ دا، ئه‌گه‌ر چ ئه‌مریكایێ ده‌ستهه‌لاتا به‌عس ژناڤبر و گۆره‌پانا ده‌سه‌لاتێ بۆ شیعه‌یێن عیراقێ ب پلا ئێكێ ڤالا كر لێ ب ڤى كارى ژى ئه‌مریكا نه‌شیایه‌ ئه‌و په‌یوه‌ندیێن سۆزدارى و فه‌رهه‌نگى یێن د ناڤبه‌را شیعه‌یێن عیراقێ و ئیرانێ دا هه‌ى ب ئاوایه‌كێ لاواز بكه‌ت كو، ژبه‌ر ڕازیكرنا دلێ ئیرانێ شیعه‌یێن عیراقێ دوژمنایه‌تیا ئه‌مریكایێ ل ده‌ڤه‌رێ نه‌كه‌ن!، له‌وما ئاینده‌و چاره‌نڤیسا ده‌سه‌لاتا ئیرانێ و حوكمه‌تا د جه‌وهه‌ر دا تائیفگه‌رایى یا عیراقێ یێن پێكڤه‌ گرێداینه‌.
هه‌رێما كوردستانێ و بۆیه‌رێن نوى
هه‌رێما كوردستانێ د نها دا ناخوازیت تێكهه‌لى كێشه‌یێن د ناڤبه‌را ئیرانێ و ئه‌مریكایێ دا ببن و سه‌ربخوه‌بوونا خوه‌ دپارێزیت، ئه‌وله‌هیا سنۆرێن ل گه‌ل ئیرانێ بۆ كوردان دگرنگن. سه‌باره‌ت ب بۆیه‌رێن كوشتنا سوله‌یمانى ل به‌غدایێَ كوردژى نكارن ژبیر بكه‌ن كو ته‌هرانێ د بۆیه‌رێن 16ـه‌ى ئوكتۆبه‌رێدا ب پشتگیریا حه‌شدا شه‌عبى ل دژى ده‌سه‌لاتا كوردان ل هه‌ولێرا پایته‌خت رۆله‌كێ زۆرێ نێگه‌تیڤ هه‌بوویه‌، له‌وما دبیت هه‌سۆزى و هه‌ڤخه‌میه‌كا گه‌رم و ژدل یا كوردان ل گه‌ل ولاته‌كێ كو بێ هه‌بوونا چو ئه‌گه‌ر و به‌هانه‌یه‌كا لۆژیك خواستا ژناڤبرنا وان هه‌بوو كاره‌كێ لۆژیك و شایسته‌ نه‌بیت.
داكو كوردستان ڕاستى په‌رمیچكێن ئاگرێ شه‌ڕ و كێشه‌یێن د ناڤبه‌را ئیرانێ و ئه‌مریكا دا نه‌بیت، پێدڤیه‌ هه‌رێما ئه‌وله‌هیا قونسولگه‌رى و نوونه‌رایه‌تى و دبلۆمان و كه‌سایه‌تى یێن بیانى ل كوردستانێ ب هشیارانه‌ بپارێزیت، بینینه‌ به‌رچاڤێن خوه‌ ئه‌گه‌ر قاسم سوله‌یمانى ل هه‌ولێرێ هاتبایه‌ كوشتن، دا كوردستان ڕاستى چ دوژمنكاریه‌كا تایفه‌گه‌رى بیت؟، د ڤان سالێن ده‌ربازبوویی دا كو هه‌رێما كوردستانێ بوویه‌ قه‌واره‌یه‌كێ سیاسى یێ ب هێز ل ده‌ڤه‌رێ به‌رده‌وام ئالایێ ئاشتیێ یێ بلندكرى و داخوازا دۆستایه‌تیێ و ڤه‌كرنا لاپه‌ره‌یێن نوو یێن كرى هه‌تا ل گه‌ل وان وه‌لات و لایه‌نان یێن كو ده‌ست د كوشتارا كوردان و وێرانكرنا كوردستانێ دا هه‌بووى، بۆ به‌رژه‌وه‌ندیێن كوردستانێ و سه‌ركه‌فتنا پرۆسا سیاسى یا كوردان، پێدڤیه‌ كورد به‌رده‌وام ب لۆژیكى و ئارامى سه‌ره‌ده‌ریێ ل گه‌ل وان كاودانان بكه‌ن یێن كو دهێنه‌ چاڤه‌رێ كرن یێن دژوار و ب هێز بن.

كامى كه‌مال

پشتى روخیانا ده‌سه‌لاتا دیكتاتۆرییا حزبا به‌عس یا عیراقى ل سالا 2003، ئه‌مریكا و هه‌ڤپه‌یمانێن وێ كو د نها دا سه‌ركێشیا رێڤه‌به‌ریا جیهانێ ب گشتى دكه‌ن، دیسا دیرۆك دوباره‌ كره‌ڤه‌ و بزاڤكرن كو هه‌مى نه‌ته‌وه‌و ئوول و فه‌رهه‌نگێن جودا جودا یێن عیراقێ دبن كه‌پرا ده‌وله‌ته‌كێ ڤه‌ بهێلن، د ناڤ زۆما هه‌ر نێرینه‌كا لۆژیكى دا، هه‌كه‌ ل ژیوارێ دیمۆگرافى و جڤاكناسى و سیاسى و فه‌رهه‌نگیێ پێكهاته‌یێن عیراقێ بنێرى، ب ساناهى دێ گه‌هیه‌ وێ ده‌ره‌نجامێ كو كۆمبوون و پێكهاتن د ناڤبه‌را ڤان نه‌ته‌وه‌و ئوولان ڤه‌ ل عیراقێ كاره‌كێ خه‌یالى و نالۆژیكی و نامه‌نتقیه‌، گه‌ر ب هوورتر لێ بنێرین، دبیت ئه‌ڤ وه‌لاتێن زلهێز كو سه‌ركێشی یا جیهانێ دكه‌ن د ڤان سه‌د سالێن ده‌ربازبوویی دا ئالۆزى و شه‌ر و نه‌ئارامیا ڤان ولاتان د به‌رژه‌وه‌ندیا ستراتیژییا وه‌لاتێن خوه‌دا دبینن، ئه‌و وه‌سا دبینن كو پرسگرێكێن ده‌ڤه‌رێ ب تایبه‌ت یێن كوردان به‌هانه‌یێن باشن ژبۆ به‌رفره‌هكرنا هه‌ژموونێ وان ل ده‌ڤه‌رێ، هه‌روه‌ك چاوا ئه‌وان داگیركاریا “سه‌دام حوسێن” ل دژى ولاتێ كوێتێ كره‌ میكانزمه‌ك بۆ به‌رفره‌هكرنا هه‌ژموونێ خوه‌ یێ سیاسى و سه‌ربازى و ئیكونۆمى ل رۆژهه‌لاتا ناڤین، له‌وما ئه‌و ناخوازن خوه‌ د وان راستیان بگه‌هینن كو پارچه‌بوونا عیراقێ د به‌رژه‌وه‌ندیا خه‌لكێن عیراقێ دایه‌ ودێ بیته‌ فاكته‌ره‌ك بۆ ئارامیا ده‌ڤه‌رێ. بێگۆمان د سیاسه‌تێ دا ئه‌ڤه‌ هه‌ڤكێشه‌یه‌كا سه‌یر نینه‌، هه‌روه‌ك یا خۆیایه‌ مافێن مرۆڤان یێن بووینه‌ ڤیتامین و خوراك بۆ چه‌وربوونا سیاسه‌ت و هه‌ژموونێ ده‌وله‌تان كو ل سه‌رده‌مێ فیرعه‌ونان هه‌تا نها ژى یا به‌رده‌وامه‌. د ڤان هه‌یامێن ده‌ربازبووی دا، لایه‌نێن عیراقى ب پاڵپشتیا هێزێن ده‌ره‌كى ل سه‌ر پێلێن ساده‌یی و نه‌هوشیاریا جڤاكێ عیراقی ڤه‌ شیان ب به‌هانه‌یا گه‌نده‌لیێ و زۆربوونا رێژه‌یا هه‌ژاریێ سه‌رۆك وه‌زیرانێ عیراقێ ناچار بكه‌ن كو ده‌ست ژ كار ڤه‌كێشانا خوه‌ پێشكێشى په‌رله‌مانى بكه‌ت. جڤاكێن عیراقێ بێى كو لێكۆلینه‌كا ساخله‌م بۆ فاكته‌رێن هه‌بوونا گه‌نده‌لیێ و نایه‌كسانی و هه‌ژاریێ ل عیراقێ بكه‌ن و ئه‌لته‌رناتیڤه‌كێ باش پێشكێش بكه‌ن، داخوازا هه‌لوه‌شاندنا حوكمه‌تێ دكه‌ن، هه‌ر چه‌نده‌ژى د دیرۆكا عیراقێ دا سه‌خمه‌راتى هه‌مى كێماسیان كابینه‌یا “عادل عه‌بدولمه‌هدى” ل هه‌مى كابینه‌یێن ده‌ربازبوویی باشتر و نیاز پاقژتر بوو. ئه‌و راستى یا ئاشكرایه‌ كو جه‌وهه‌رێ مه‌به‌ست و ئاراسته‌یا ناكۆكى و ئالۆزى یێن خوه‌نیشاندانێن عیراقێ ژپێخه‌مه‌ت تائیفگه‌رایه‌تی و ناڤچه‌گه‌رایه‌تیێ یه‌، كه‌واته‌ بۆ ئارامبوونا عیراقێ باشترین هه‌لبژارده‌ دابینكرنا ئاره‌زۆ و خواسته‌كا تائیفه‌و نه‌ته‌وه‌یێن عیراقێ یه‌ كو هه‌ر تائیفه‌و مه‌زهه‌ب و نه‌ته‌وه‌یه‌كێ ل عیراقێ خوه‌ برێڤه‌ببه‌ت و ئه‌ڤ وه‌لاتێ كو ب خورتى هاتیه‌ پێكڤه‌ نیاساندن پارچه‌ پارچه‌ ببیت، پێدڤیه‌ سه‌ركرده‌و خه‌لكێن عیراقێ ڤێ راستیى بپه‌ژرینن كو پارچه‌بوونا عیراقێ بتنێ دێ بوویه‌ فاكته‌ره‌ك بۆ باشتركرنا باردوخێ ئه‌وله‌هى و ژیانا تاك تاكێن وان ب گشتى. ل ئه‌نجامێن ئه‌و ئه‌زموونێن كه‌ڤن ل گه‌ل عیراقێ و دو وربینى و هوشیاریا كوردان ب سه‌رۆكایه‌تیا رێزدار “مه‌سعود بارزانى” هه‌ر ل پشتى رۆخیانا رژێما به‌عس یا عیراقى خواندنه‌كا ساخله‌م بۆ ڤى ولاتى هه‌بوو و دزانى كو عیراق نه‌دشێت ئارامیا خوه‌ بپارێزیت و نه‌ خوه‌دى سایكولۆژییه‌كه‌ كو ماف و ئازادیێ بۆ گه‌لێ كورد بپه‌ژرینیت، كه‌واته‌ پێدڤى بوو كو كورد هه‌مى جۆره‌ شه‌ره‌كێ بكه‌ن بۆ زامنكرنا ئاینده‌یا خوه‌، هه‌ر ژبه‌رڤان ئه‌گه‌ران كوردان نه‌ڤیایه‌ ره‌گێن سه‌ربخوه‌بوونا ئابوور و سیاسه‌تا خوه‌ یا ده‌رڤه‌ ب ئێخنه‌ بن ره‌حما حوكمه‌تێن تائیفى یێن به‌غداڤه‌ كو پتریا به‌رپرس و سه‌ركرده‌یێن وان دشۆڤێنى و دیكتاتۆر خوازن، ئه‌گه‌ر چ ب مخابنی ڤه‌ شۆێنی و دوژمنێن كوردان یێن شیاین هنده‌ك كوردان مینا لۆبى و كرێگرتى ل دژى پاشه‌رۆژ و ئه‌ڤرۆیا كوردستانێ بكاربئینن. هه‌كه‌ ئه‌ڤرۆ ل كوردستانێ كێماسى یێن ئابوورى و ئیدارى ژى هه‌بن ئه‌گه‌رێن وان ئه‌و كرێگرتى و لۆبى یێن داگیركه‌رانن كو خوه‌دى جه‌ماوه‌ره‌كێ زۆرن ل كوردستانێ، هه‌لبه‌ت ئه‌ڤ چه‌نده‌ژى به‌رهه‌مێ نه‌زانینێ و لاوازییا ئاستێ روشنبیریێ جڤاكا مه‌ ب گشتى یه‌. ئه‌ڤرۆ كو چاره‌نڤیسێ عیراقێ یێ به‌ر ب ئالۆزیێن پتر ڤه‌ دچیت و شه‌ره‌كێ خویناوى یێ تائیفى چاڤه‌ریێ عیراقێ دكه‌ت، پێدڤیه‌ سه‌ركردایه‌تیا كوردان ب تایبه‌تى ل هه‌ڤلێرێ له‌زێ بكه‌ن و بالانسێ ئێكۆنۆمى یێ ولاتى كونترۆل بكه‌ن، ئه‌ڤجا چ بزاڤێ دكه‌ن رێژه‌یا هنارتنا نه‌فت و غازان زێده‌ بكه‌ن، ئان ژى له‌زێ ل پروسسا چاكسازیێ بكه‌ن و یه‌ده‌گێ خوه‌ به‌رهه‌ڤ بكه‌ن گه‌ر هاتو حوكمه‌تا عیراقێ ب هه‌ر ئه‌گه‌ره‌كێ بیت بۆدجه‌ و مووچه‌یێن خه‌لكێ كوردستانێ بڕیڤه‌.  (ژبلى ئه‌و ترسا كو ژ گرۆپه‌كێ چه‌كداریێ ب ناڤ كوردستانى دهێته‌كرن كو ناپاكى یێن 16 ئوكتۆبه‌رێ ئه‌نجامدا بوون) لایه‌نێ سیاسى و دپلۆماسیێ كوردستانێ د نها دا ل هه‌رده‌مه‌كێ ب هێزتره‌، پێدڤیه‌ كورد ب له‌زتر بشێن سه‌ربخوه‌بوونا خوه‌ یا ئابوورى زامن بكه‌ن و نه‌هێلن ئه‌ڤ چه‌نده‌ ببیته‌ ئه‌گه‌رێ تێكچوونا شیرازه‌یا جڤاكى و هه‌لچوونا خه‌لكێ كوردستانێ. لاوازییا ئاستێ جڤاكى ب گشتى، هه‌بوونا گه‌نده‌لیێ و نایه‌كسانیێ ب شێوازه‌كێ كارا، كاركرنا لۆبى و كرێگرتی یێن داگیركه‌ران ل كوردستانێ، سێ فاكته‌رێن گرنگن كو دوژمن دشێن بۆ شكاندنا كوردان بكاربئینیت، گه‌ر سه‌ركردایه‌تیا كوردستانێ شیان ئابوورێ ڤى ولاتى راگرن و نه‌هێلن دوباره‌ برس و قه‌یران به‌رۆكێن ژیانا خه‌لكى بگریت، بێگومان كارت و كارێن دوژمنێن كوردان و كرێگرتى یێن وان سه‌رناگرن. هه‌روه‌سا تێكچوونا باردۆخێ سیاسى و ئه‌وله‌هیا عیراقێ دێ ده‌لیڤه‌كا مه‌زن بۆ كوردان چێكه‌ت كو ئه‌نجامێن ریفراندۆمێ كارا بكه‌نه‌ڤه‌ و سه‌ربخوه‌بوونا ده‌وله‌تا كوردستانێ بكه‌نه‌ دیفاكتۆ.

كامى كه‌مال
هێدى هێدى ده‌رهاڤێژێن شه‌رێ د ناڤبه‌را په‌كه‌كێ و سۆپایێ توركیا دا زێده‌تر مینا په‌لێن ئاگرى یێ له‌شێ خه‌لكێ باشۆرێ كوردستانێ دسۆژیت، گۆمان د وێ چه‌ندێ دا نینه‌ كو شه‌ڕ و خوینڕشتن ژبلى چاندنا ڕق و كه‌ربێ و زیانێن ماددى و جانى چیادیكه‌ ل دووڤ خوه‌دا شین ناكه‌ت..
بۆیه‌رێن ڤێ داویێ كو د ئه‌نجاما بوردۆمانا فرۆكه‌یێن توركیا دا چه‌ند هه‌ڤوه‌لاتیێن سڤیل ل باشۆرێ كوردستانێ بوونه‌ قوربانى و شه‌هیدكرن و پشتى وێ چه‌ندێ خه‌لكێ ده‌ڤه‌را شێلادزێ چوونه‌ سه‌ر باره‌گایه‌كێ سه‌ربازى یێ توركیا ل (سیریێ) نێزیك شێلادزێ، دیسا ئالۆزێ خوین ڕشتن ل دووڤ دا هاتنه‌ڤه‌..
گومان د وێ چه‌ندێ دا نینه‌ توركیا وڵاته‌كه‌ كو مه‌زنترین پارچه‌یا كوردستانێ یا داگیركرى، ئه‌گه‌ر ئه‌ڤرۆ سه‌ره‌ده‌ریه‌كا بازرگانى و دبلۆماسى د ناڤبه‌را توركیا و باشۆرێ كوردستانێ دا هه‌بیت، ژ ئه‌نجامێن وێ چه‌ندێنه‌ كو توركیا ناچار بوویه‌ دان ب دیفاكتۆیا هه‌رێما كوردستانێ دا بئینینت و وێ مینا قه‌واره‌یه‌كا كاریگه‌ر ل سه‌ر ئاستێ جیهانێ بپه‌ژرینیت و سه‌ره‌ده‌ریێ ژى دگه‌ل دا بكه‌ت، ئه‌گه‌ر چ توركیا به‌رى كو ب ڤێ دیفاكتۆیێ ڕازى ببیت زۆر بزاڤ كرن هه‌رێما كوردستانێ ب ته‌مامى ژناڤبه‌ت و نه‌هێلیت، لێ ژبه‌ركو هه‌رێما كوردستانێ رێبه‌ره‌كێ حه‌كیم و زانا و ب هه‌ڵویست و دڵسوز هه‌بوو ب ناڤێ مه‌سعود بارزانى، توركیا ل داویێ ناچار بوو ژیر و لۆژیكانه‌ سه‌ره‌ده‌ریێ بكه‌ت و ئه‌گه‌ر هه‌بوونا كوردستانێ بۆ وێ یا باش ژى نه‌بیت، لێ وێ بپه‌ژرینیت، واته‌ توركیا ب ناچارى دان ب هه‌رێما كوردستانێ دا ئینایه‌ نه‌ك ژبه‌ر چ رێككه‌فتنێن ژێر ب ژێر ل دژى لایه‌نه‌كێ سیاسى وه‌كى كو حزبێن دژه‌ پارتى دئیننه‌ زمان. (بێ گۆمان ئه‌و شه‌رێ ڕاگه‌هاندنێ كو توركیا ل دژى هه‌رێمێ دكه‌ت زۆر جودایه‌ ل جه‌وهه‌رێ سه‌ره‌ده‌ریا توركیا دگه‌ل هه‌رێمێ و كاریگه‌ریێن نێگه‌تیڤ ل سه‌ر به‌رژه‌وه‌ندى یێن گشتى یێن هه‌رێما كوردستانێ ناكه‌ت)، ژ هه‌ژى گۆتنێ یه‌ هه‌ر ده‌مه‌كێ توركیا بشێت دێ هه‌موو هه‌رێما كوردستانێ داگیركه‌ت، ئه‌ڤه‌ ژى نه‌یا سه‌یره‌و نه‌یا نه‌مه‌نتق، ژبه‌ركو ئه‌ڤه‌ د سیاسه‌تێ دا مینا خۆراكه‌كا چه‌وره‌ و هه‌ر وه‌ڵاته‌كێ بشێت ل داگیركاریێ ناڕاوه‌ستیت هه‌تا هه‌موو جیهانێ داگیر نه‌كه‌ت، ل ڤێره‌ یا گرنگه‌ هه‌رێما كوردستانێ خوه‌ بپارێزیت و ب چ ئاوایه‌كێ وان ده‌روازه‌یان ڤه‌نه‌كه‌ت كو رێك و شه‌رعیه‌تێ دده‌نه‌ داگیركارى یێن توركیا ئان هه‌ر وه‌ڵاته‌كێ دیكه‌. ل ڤێره‌ حه‌تا ڕاده‌یه‌كێ ئه‌م ل سه‌ر جه‌وهه‌رێ دۆژمنایه‌تى و دۆستیا دبلۆماسى یا توركیا و هه‌رێمى هاتینه‌ زمان، یا گرنگه‌ ئه‌م ل سه‌ر هه‌بوونا په‌كه‌كێ و كریارێن وێ یێن ڤان 28 سالێن ده‌ربازبوویی ل باشۆرێ كوردستانێ و كاریگه‌رى یێن وێ ژى بنڤیسین، دا پتر ئه‌گه‌رێن ڤان ئالۆزى یێن ڤێ داویێ ڕوى داى دیار ببن. ئه‌گه‌ر ئه‌م جارێ ل دیرۆك و په‌یره‌و ئارمانجێن په‌كه‌كێ بگه‌ڕین و مینا شاهد (كو ل ژیێ خوه‌دا مه‌دیتى) ل سه‌ر بنڤیسین و شرۆڤه‌ بكه‌ین، دێ گه‌هینه‌ هنده‌ك ئه‌نجامان كو په‌كه‌كێ چ هیمایه‌كا كوردایه‌تیێ و پاراستنا كوردستانێ ب خوه‌ڤه‌ نه‌هێلایه‌و بگره‌ د هه‌موو قووناغه‌كێ دا پتر ژ وه‌ڵاتێن داگیركه‌رێن كوردستانێ زیانێ ب هه‌رێما كوردستانێ گه‌هاندى، ل سالێن 1990 دا بێ چ به‌هانه‌یه‌كا مه‌نتق هێرش كره‌ سه‌ر باره‌گایێن پارتى و چه‌ندین هزار پێشمه‌رگه‌ و لاو خه‌لكێن سڤیلێن كوردستانێ كرنه‌ قوربانى و شه‌هید كرن، ئه‌م هه‌موو دزانین دوان ساڵاندا ئه‌زمه‌یا ئابوورى یا توند بوو و خه‌لكێ كوردستانێ د باردۆخه‌كێ زۆرێ خراب دا دژیان، د سه‌ر وێ چه‌ندێدا په‌كه‌كێ گوند و باژێرك دكرنه‌ ئارمانج و سه‌دان مال سۆتن و گوند داگیركرن و تانها ژى هزاران گوندێن باشۆر ژ به‌ر هه‌بوونا په‌كه‌كێ یێن كاڤلن!. ل سه‌ر ئاستێ نیڤده‌وڵه‌تێ مه‌ دیت ب بزاڤ و هیمه‌تا سه‌رۆك بارزانى و چه‌ندین سه‌ركرده‌ و كه‌سایه‌تیێن دیارێن جیهانێ و باكۆرێ كوردستانێ پڕۆسا ئاشتیێ ده‌ست پێ كر و باردۆخێ خه‌لكێ كوردستانى ل باكۆر مه‌زنترین گوهۆرینێن پۆزه‌تیڤ ژ هه‌موو لایه‌نانڤه‌ بخوه‌ڤه‌ دیت، لێ به‌رده‌وام مه‌ به‌یاننامه‌یێن په‌كه‌كێ ددیتن كو گه‌فێن وێرانكرنا ئه‌نقه‌ره‌ دكر!، ل داویێ مه‌ دیت بێ كو به‌هانه‌یه‌كا مه‌نتق هه‌بیت په‌كه‌كێ دو پۆلیسێن سڤیل یێن توركیا د خه‌وێ دا كوشتن و ل ڕۆژا داویێ ڕاگه‌هاند كو تۆلڤه‌كرن بوو ل دژى توركیا، ئه‌و بوو به‌هانه‌یه‌كا شه‌رعى دا سۆپایێ توركیا كو دیسا باكۆرێ كوردستانێ وێران بكه‌ن و دربێن مه‌زن ل نه‌ته‌وه‌یا كورد بده‌نه‌ڤه‌. ل ڤێره‌ ژى په‌كه‌كێ شكه‌ستن خوار و ل سه‌ر ئاستێ جیهانێ دیار كر كو حزبا ئاڤاكرنێ و ئاشتیێ نینه‌ و هه‌ناسه‌یا هه‌ڤدو په‌ژراندنێ د هناڤێن وێ دا نینه‌.
ئه‌و تانك و زریپۆشێن توركیا كو هه‌رێما كوردستانێ ناچاركرى ل شێلادزێ و بامه‌ڕنێ بن ژ ئه‌نجامێن وێ كوشتار و وێرانكاریا په‌كه‌كێ بوون كو ل ئابا 1995 په‌كه‌كێ ل دژى باشۆر به‌رپا كرى، بومباران كرنا خه‌لكێ سڤیلێ باشۆرێ كوردستانێ دیسا ژ ئه‌نجامێن هه‌بوونا په‌كه‌كێ یه‌ ل ده‌ڤه‌رێ، ئه‌ڤ ڕاستیه‌ ئه‌گه‌ر یێن شیرین ژى نه‌بن ناچارین بپه‌ژرینین، ئه‌ڤرۆ د هه‌موو لایه‌نانڤه‌ نه‌ته‌وه‌یا كورد ب گشتى ل هه‌ر چار پارچه‌یێن كوردستانێ یێن باجا شاشى یێن په‌كه‌كێ دده‌ن، پێدڤیه‌ په‌كه‌كه‌ ده‌ست ژ زمانێ كه‌له‌شینكۆفێ هه‌لگریت و باوه‌ریێ ب هه‌بوونا زمانه‌كێ بینیت كو دبێژنێ زمانێ دبلۆماسى و سیاسى كو زۆر ل زمانێ تانك و تۆپ و كه‌له‌شینكۆفا ڕۆسى یا كه‌ڤن ب هێزتره‌، زمانێ چه‌كى بۆ نه‌ته‌وه‌یه‌كا بن ده‌ست كو شه‌رعیه‌ت و پێچێبوونێن چێكرنا ده‌بانجه‌كێ نینن ده‌مه‌كه‌ بسه‌رڤه‌چووى ب تنێ د حاله‌كێ دا نه‌بیت كو بۆ به‌رگیریكرن ل مانا خوه‌ بكاربئینن نه‌ك ب كه‌له‌شینكۆفێ گه‌فێن نه‌هێلانا سیسته‌مێن جیهانى و وه‌ڵاتێن زلهێز بكه‌ن، ئه‌ڤ جۆره‌ هزركرنه‌ یارى كرن و قۆماركرنه‌كا دۆڕاندیه‌ ل گه‌ل جان و ژیان و دۆزا نه‌ته‌وه‌یه‌كێ بن ده‌ست و خێر نه‌دیتیێ مینا نه‌ته‌وه‌یا كورد.

كامى كه‌مال

كورتبینى و شاشیه‌كا مه‌زنه‌ ئه‌گه‌ر ئه‌م وه‌سا هزر بكه‌ین سیاسه‌ت و چاره‌نڤیسێ ویلایه‌تێن ئێكگرتى یێن ئه‌مریكا مینا ب هێزترین و زلهێزترین هێز و وه‌ڵاتێ جیهانێ ب مه‌زاج و ڤیان و تێگه‌هشتنا كه‌سه‌كێ ڤه‌ گرێدایی بیت، نه‌ “دۆناڵد ترامپ” مینا سه‌رۆك دشێت ستراتیژیا سیاسى یا ده‌هان سالى یێن ئه‌مریكا بگوهۆریت و نه‌ “برێت مه‌كگورك”ـه‌ك دشێت سیاسه‌تا ده‌رڤه‌و پلانێن ئه‌مریكا ب خواسته‌ك و به‌رژه‌وه‌ندى یێن خوه‌ یێن تایبه‌تڤه‌ گرێ بده‌ت، ئه‌گه‌ر پرۆگرام و سیاسه‌ت و چاره‌نڤیسێ ڤى وڵاتى ب مه‌زاج و به‌رژه‌وه‌ندیێن تاكانڤه‌ یا گرێدایی بیت كه‌واته‌ نه‌دیمۆكراسینه‌ و نه‌عه‌قلانى و نه‌خوه‌دى به‌رنامه‌!، واته‌ ئه‌مریكا ژى هه‌ر مینا عیراقا “سه‌دام حوسێن” و لیبیایا “موعه‌مه‌ر قه‌زافى”یه‌!!، د ڕاستی دا سروشتێ كه‌سایه‌تى یێ “تڕامپ”ـه‌ ل گه‌ل ئه‌ڤرۆیا ئه‌مریكا دگونجیت نه‌ك سیاسه‌تا ئه‌مریكا د گه‌ل سروشت و كه‌سایه‌تیا ترامپ بهێته‌ گوهۆرین!، له‌وما په‌یامێن ترامپ ل ناڤه‌رۆك و به‌رنامه‌یێن ستراتژیه‌تا ئه‌مریكا سه‌رچاوه‌ دگریت نه‌ك مه‌زاج و ڤیانا وى ڤه‌!.
گه‌له‌ك ده‌ڤه‌رێن رۆژهه‌لاتا ناڤین ب گشتى و ب تایبه‌تى وڵاته‌كێ مینا عیراقێ پتر ژ نیڤ چه‌رخێیه‌ گۆره‌پانێن ژێك ڤاڤارتنێن به‌رژه‌وه‌ندى و بالانسێن سیاسى یێن ولاتێن زلهێزن، مه‌رج نینه‌ ئه‌ڤ وڵاتێن زلهێز بتنێ ل سه‌ر لاشه‌یێ وڵاته‌كێ مینا عیراقێ ل دووڤ به‌رژه‌وه‌ندیێن ئابوورى ب تنێ ڤه‌ بن، به‌لكى ئه‌و وڵات یێن شیاین نه‌زانینا خه‌لكی و نه‌دلسۆزیا سه‌رۆك و رێڤه‌به‌رێن ڤان وه‌لاتان ب گشتى بۆ به‌رژه‌وه‌ندیێن سه‌ربازى و زانستى و به‌رفره‌هكرنا هه‌ژموونێ خوه‌ ل جیهانێ ب كاربئینن، باجا كاریگه‌ر یا ڤێ چه‌ندێ ژى خه‌لكێن ڤان ولاتان دده‌ن. هاتنا داعش بۆ عیراقێ ده‌سپێكا گوهارتنه‌كا مه‌زن بوو ل ده‌ڤه‌رێ كو مه‌حال بوو بێ پشتگیرییا ولاتێن مه‌زن ئه‌و هێز شیابا ب وى ئاوایی د ماوه‌یه‌كێ كێمدا ناڤه‌ڕاستا عیراقێ ببرێت!، گه‌له‌ك لایه‌نێن عیراقى و كوردستانى ب هاتنا وێ هێزا تۆندوتیژ و یا ڕادیكالى ب هێز بوون و گه‌له‌ك ژى لاواز بوون ئه‌گه‌ر چ دبیت هێشتا ئه‌و هێزبوون و لاواز بوون ب ئاوایه‌كێ باش دیار نه‌ببن، پشتى كو شه‌ڕێ داعش ب گشتى ب داوى هاتى، ئه‌نجامدانا ڕیفراندۆمێ پێنگاڤه‌كا دیكه‌ بوو كو باشتر هێمایێن گوهارتنان ل ده‌ڤه‌رێ دیاربوون، ریفراندۆم ژ لایێ سه‌رۆك بارزانى ڤه‌ ب ئاوایه‌كێ خورت هاته‌ پشتگیرى كرن و ئه‌نجامدان، (چ جاران ئه‌و پێنگاڤ ل سه‌ر بنه‌مایه‌كێ ڤالا نه‌بوویه‌ و خواندنه‌كا هوور و ب هێز بۆ پاشه‌رۆژا سیاسى و جۆگرافیا ده‌ڤه‌رێ یا هه‌بووى)، پشتى ڕیفراندۆمێ ب چه‌ند رۆژه‌كا بۆیه‌رێن 16ێ ئۆكتۆبه‌رێ چێبوون، كورت بینینا ئه‌و دیفاكتۆیا سیاسى كو ل جیهانێ بڕیارا گوهارتنان دده‌ت ژ لایێ بالێ ب هێزێ ئێكه‌تیا نیشتیمانیا كوردستانێ ڤه‌ بۆ ئه‌گه‌ر كو ئه‌و ل دژى به‌رژه‌وه‌ندیێن زلهێزان كار بكه‌ن (ژبلى كو ناپاكیه‌كا نه‌ته‌وه‌یی بوو)، چاڤپۆشیكرنا ئه‌مریكا ل پێنگاڤێن حه‌شدا شه‌عبى و هێزێن عیراقى كو ب ڕه‌نگه‌كێ دیار ل بن هه‌ژموونا وڵاتێ ئیرانێ ڤه‌بوون چ جاران یا بێ حیكمه‌ته‌ك بۆ به‌رژه‌وه‌ندیێن وان نه‌بوویه‌، پاشڤه‌چوون د سیاسه‌تێ دا گه‌له‌ك جاران خاپاندن و پلانن، ئه‌و ده‌مێن هێزێن ئه‌مریكى چاڤپۆشیى ل زێده‌گاڤى و داگیركاریا عیراقێ ل دژى كوردستانێ دكر چ وه‌لاتیه‌كێ ئه‌مریكى باجى نه‌ددا!، هه‌روه‌سا ئاخا ئه‌مریكا ژى نه‌هاته‌ داگیركرن داكو ئه‌و وڵات هه‌ست ب شكه‌ستنێ بكه‌ت!، به‌لكى بتنێ ئه‌مریكى شه‌تره‌نجه‌كه‌ ل ده‌ڤه‌رێ دكه‌ن و خه‌لكێ ده‌ڤه‌رێ بخوه‌ژى باجێ دده‌ن. د ڤان هه‌یامێن ده‌رباز بوویدا ل نشكه‌كێڤه‌ تڕامپ بڕیارا ڤه‌كێشانا هێزێن ئه‌مریكى ل سووریێ دا، هه‌روه‌سا ترامپ د داخۆیانیه‌كێ دا ڕاگه‌هاند ئه‌م خۆشحال نینین كو كوردان پیچه‌كا نه‌فتێ یا هه‌ى و دفرۆشنه‌ ئیرانێ!، هه‌روه‌سا ترامپ گۆت: كورد شه‌ڕكه‌رێن زیره‌كن ئه‌گه‌ر ئه‌م فرۆكه‌یێن F18 یێن ئه‌مریكى دگه‌ل دا ببه‌ینه‌ شه‌ڕى، بێگۆمان ئه‌ڤ داخۆیانى یێن ترامپ په‌یامێن زۆر ڕوون و هه‌ستیارن بۆ كوردان ب تایبه‌ت ئه‌و بالێ ئێكه‌تیێ كو وه‌سا هزر دكر ڕاده‌ست كرنا هه‌ژموونێ ئابوورى و سیاسى بۆ ئیرانێ دێ یا بێ باج بیت، ترامپ زۆر ب ئاشكرایی دبێژیت ئه‌گه‌ر ئه‌م پشته‌ڤانییا سه‌ربازى یا كوردان نه‌كه‌ین ئه‌و نكارن خوه‌ ل به‌ر توندڕویا نه‌یارێن خوه‌ بگرن، هه‌روه‌كى پتر دیار دبیت گوهارتنێن پتر یێن ب رێڤه‌و كورد پێدڤیه‌ خوه‌ د ناڤبه‌را هه‌ڤپه‌یمانى كرن ل گه‌ل ئه‌مریكا (هه‌ڤپه‌یمانێن وێ) و ئیرانێ ئێكلا بكه‌نه‌ڤه‌، كورد د نها دا مینا نه‌ته‌وه‌یه‌كێ بنده‌ست و بێ سه‌روه‌ریا ده‌وله‌تداریێ پتر نه‌چارێن وێ چه‌ندێنه‌ ب ئێكگرتنێ قه‌ره‌بوویا بێ ده‌وله‌تیا خوه‌ بكه‌ن و مینا هێزه‌كا كاریگه‌ر ببنه‌ دیفاكتۆ و نه‌هێلن به‌رژه‌وه‌ندى یێن به‌رته‌نگێن حزبى و كه‌سێتى نه‌ته‌وه‌یا وان دیسا ڕاستى كاره‌ساتان بكه‌ته‌ڤه‌، په‌كه‌كه‌ و ئێكه‌تى نیشتیمانى كوردستان ب تایبه‌تى پێدڤیه‌ وان ڕاستیان بپه‌رژینن كو سیاسه‌ت بۆ نه‌ته‌وه‌یه‌كێ پێدڤى ب واقع بینى و دووربینى یێیه‌، ب سیاسه‌تا ده‌مكى و فرۆتنا چه‌ند به‌رمیلێن نه‌فتێ ئان د خه‌و بینینا جیهانگوهرینێ دا! كوردستان و ئه‌و بخوه‌ ژى چ جاران یێن پاراستى نابن.

كامى كه‌مال هه‌ر لایه‌نه‌كێ كوردستانى ئه‌گه‌ر بخوازیت مافێن گه‌لێ كورد وه‌ربگریت و خزمه‌تا كوردستانێ بكه‌ت، ڕێز گرتن ل سه‌روه‌رى و حوكمه‌تا هه‌رێما كوردستانێ كو به‌رهه‌مێ ده‌نگ و قوربانى دانا خه‌لكێ كوردستانێ یه‌ پێدڤیه‌ ئه‌وله‌ویاتا كارێن وێ بیت، حوكمه‌تێن ل دووڤ ئێكێن عیراقێ د هه‌ر هه‌لومه‌رج و ده‌لیڤه‌یه‌كێدا بزاڤ یا كرى سه‌روه‌رى و ده‌ستكه‌فتێن كوردان ژناڤببه‌ن و خوه‌ ب خورتى بكه‌نه‌ حوكمڕان و بابێ ئاخ و ڤێ نیشتیمانێ. پشتى ئه‌و ناپاكى یێن 16ێ ئۆكتۆبه‌رێ هاتیه‌كرن حوكمه‌تا عیراقێ ئه‌و ڕاستى سه‌لماند كو هه‌رده‌مه‌كێ بشێت دوباره‌ دێ كوردستانێ وێران كه‌ت و مینا ڕژێما به‌عسیان ب تانك و زریپوشان سه‌ر ب له‌شێ خه‌لكێ كوردستانێ كه‌ڤن، هه‌روه‌كى به‌غدا هه‌مى بزاڤ كرن لێ خۆشبه‌ختانه‌ ل مه‌حمودیه‌ و پردێ ب قه‌هره‌مانیا پێشمه‌رگه‌یێن كوردستانێ سنوره‌ك بۆ هاته‌ دانان، حوكمه‌تا به‌غدا ب لاوازكرنا حوكمه‌تا هه‌رێما كوردستانێ ب تنێ ئێك ئارمانجا سه‌ره‌كى یا هه‌ى، ئه‌و ژى ژناڤبرن و نه‌هێلانا ئیراده‌یا خه‌لكێ كوردستانێ یه‌، حوكمه‌تا به‌غدا دخوازیت خه‌لكێ كوردستانێ باوه‌رى ب وێ حوكمه‌تێ نه‌مینیت یا كو وان بخوه‌ ب ده‌نگێن خوه‌ ئاڤا كرى و بونیاتێ وێ داناى، هه‌ر سه‌ردانه‌كا كو بۆ به‌غدا دهێته‌ ئه‌نجامدان ژلایێ حزب و لایه‌نێن سیاسى یێن كوردستانێ ئه‌گه‌ر بێ هه‌ماهه‌نگى و ڕه‌زامه‌ندیا حوكمه‌تا هه‌رێما كوردستانێ بیت گوپیتكا بێ ڕێزیێ یه‌ به‌رامبه‌ر ب ئیراده‌یا خه‌لكێ كوردستانێ. خۆشبه‌ختى یا پارتى دیموكراتى كوردستانێ د وێ چه‌ندێ دایه‌ كو حزبێن دیكه‌ یێن دژى وێ ب هه‌لویست و كردارێن خوه‌ یێن نامه‌نتق هه‌مى گۆره‌پانا كوردایه‌تیێ بۆ پارتى یا چۆل كرى، حزبێن ب نیاز (ئه‌نتى پارتى) ب كردارو لڤینێن خوه‌ یێن سیاسى وێ ڕاستیێ دسه‌لمینن كو پارتى دیموكراتى كوردستانێ ئیراده‌و هێزا خه‌لكێ كوردستانێ یه‌و بێ هه‌بوونا پارتى ئیراده‌یا ڤى ملله‌تى یا د مه‌ترسیێ دا. ئێك ژ شاشى یێن دیكه‌ یێن لایه‌نێن دژه‌ پارتى ل كوردستانێ ئه‌وه‌ كو ستراتیژى نه‌شێن سیاسه‌تێ فێم بكه‌ن، پارتى دیموكراتى كوردستان و سه‌رۆك بارزانى بێ به‌رنامه‌و پلان نه‌بوون ده‌مێ ڕژد بووى ل سه‌ر ئه‌نجامدانا ڕیفراندۆمێ ل 25ێ ئه‌یلولا سالا ده‌رباز بوویی، حوكمه‌تا به‌غداژى وێ ڕاستیێ دزانیت كو ب ئه‌نجامدنا ریفراندوومێ كوردان قووناغه‌كا مه‌زن و هه‌ستیار بڕى و هه‌تا گوپیتكێ نزیكى سه‌ربخوه‌ بوونێ بوون، ب مخابنیڤه‌ مینا دیرۆكێ دووباره‌و چه‌ندباره‌ وڵاتێن داگیركه‌ر په‌نایا خوه‌ بره‌ ده‌ف هنده‌ك لایه‌نێن نادلسۆز و ناپاك دناڤ كوردستانێ داو شیان دربه‌كا دیكه‌ یا دیرۆكى ل رێیا وان ناپاكانڤه‌ ل خه‌لكێ كوردستانێ بده‌ن. گرنگترین ئه‌و بۆیه‌رێن پشتى 16ێ ئۆكتۆبه‌رێ چێبووى ئه‌و بوون كو كوردان زانى نیازێن به‌غدا دچه‌په‌ل و مه‌ترسیدارن، زانینا ڤێ ڕاستیێ پێدڤیه‌ هێزه‌كا مه‌زن بده‌ته‌ ئیراده‌و خوه‌ڕاگیریا گه‌لێ كوردستانێ، سه‌رۆكێ حوكمه‌تا عیراقێ”حه‌یده‌ر عه‌بادى” ئه‌و كه‌س بوو كو ب تانك و زریپوشا و ئارتێشا عیراقێ به‌ر ب سنورێن هه‌رێما كوردستانێ هاتى و چه‌ندین پێشمه‌رگه‌ شه‌هید كرى ب مه‌به‌ستا داگیركرنا هه‌رێما كوردستانێ، واته‌ حه‌یده‌ر عه‌بادى ب چ ئاوایه‌كێ نكاریت خه‌لكێ كوردستانێ مینا خه‌لكێ وڵاتێ خوه‌ بنێریت، ئه‌و حوكمه‌تا ب هێزو ئارتێش بزاڤا داگیركرنا هه‌رێما كوردستانێ داى نه‌شێت جوداهیێ د ناڤبه‌را خه‌لكێ به‌سراو هه‌ولێرێ دا نه‌كه‌ت. ئه‌گه‌ر خزمه‌ت و كوردایه‌تى ئه‌و بیت یاكو ته‌ڤگه‌را گۆڕان و كۆمه‌ڵا ئیسلامى و هنده‌ك میراتگرێن دیكه‌ یێن سیاسى و ناپاكیێ ل كوردستانێ ئه‌نجام دده‌ن و دچنه‌ به‌غدا و خوه‌ بۆ عه‌بادى سڤك و بێ بها دكه‌ن و ده‌رگه‌هێن خزمه‌تێ بۆ كوچكا عه‌بادى ڤه‌دكه‌ن، بێگۆمان پارتى ڤى كارى بكه‌ت حه‌یده‌ر عه‌بادى و هه‌مى سه‌ركرده‌یێن عیراقێ ب مه‌منونى ڤه‌ دێ ل پێشوازیا پارتى دا بن و ب چ ئاوایه‌كێ بهایێ بۆ لایه‌ن و حزبێن دیكه‌ یێن د ناڤ كوردستانێ نادانن، لێ پارتى دیمۆكراتى كوردستان ل سه‌ر وێ بناغه‌یێ دروست نه‌بوویه‌ یاكو نه‌یارێن وێ ل سه‌ر چێبووى، باشترین خزمه‌ت كو نه‌یارێن پارتى ل كوردستانێ بۆ خه‌لكێ كوردستانێ بكه‌ن و بزاڤێ بكه‌ن د پاشه‌ڕۆژێ دا شوونا پارتى بگرن و حۆكمڕانیا ڤى ولاتى بكه‌ن، خزمه‌ته‌كا ڕاسته‌قینه‌یه‌، ئه‌و خزمه‌ت ژى پشتى وێ چه‌ندێ دهێت كو ده‌ست ل خوه‌ سڤك كرن و بێ ئیراده‌یی و كارێن نابه‌جێ به‌رده‌ن و بزاڤێ بكه‌ن خزمه‌تا ئیراده‌یا كوردان بكه‌ن نه‌ك به‌رۆڤاژى.

كامى كمال
ژ ئه‌وان به‌ربه‌ستێن كو ل به‌رامبه‌ر حوكمه‌تا هه‌رێما كوردستانێ دانه‌و نكاریت شه‌ڕه‌كێ ڕژد ل گه‌ل گه‌نده‌ڵكاراندا بكه‌ت و ڤێ دیارده‌یێ ل كوردستانێ لاواز بكه‌ن، لاوازیا كه‌لتوورى (فه‌رهه‌نگیه‌)، دو هه‌بوونا ده‌ستێ ده‌ره‌كى یه‌.
خاڵا لاواز یا فه‌رهه‌نگی، ئه‌و ده‌مێن ئاستێ ره‌وشه‌نبیریا جڤاكى ب گشتى د ئاسته‌كێ پێدڤیدا نه‌بیت مه‌حاله‌ ده‌سه‌ڵات بشێت هه‌م پره‌نسیپێن دیمۆكراسیێ ل به‌رچاڤ بگریت و هه‌م ژى شه‌ڕى دگه‌ل دیارده‌یا گه‌نده‌ڵیێ بكه‌ت، ئێك ژ ئه‌و كارێن داگیركه‌ران د سه‌ده‌یا ده‌رباز بووییدا ل سه‌ر خه‌لكێ كوردستانێ ئه‌نجامداى، لێدانا فه‌رهه‌نگى بوو، دۆژمن ئانكو داگیركه‌ر وێ ڕاستیێ دزانن كو نه‌زان كرنا جڤاكى باشترین میكانزمه‌ كو جڤاگه‌كێ ل ژێر داگیركارییا خوه‌ بهێلن و رێكێن ئازادیێ لێ وندا بكه‌ن، له‌وما پشتى رێككه‌فاتنا سایكس پیكۆ دوژمنێن كوردان نه‌هێلان ل كوردستانێ قوتابخانه‌و سه‌نته‌رێن ره‌وشه‌نبیرى و ناوه‌ندێن پێشكه‌فتنێ ب چ ئاوایه‌كێ مینا پێدڤى كار بكه‌ن، ئه‌ڤ چه‌نده‌ژى فاكته‌ره‌كێ مه‌زنه‌ كو جڤاكا مه‌ هه‌تا نهاژى ب دروستى نزانیت دوست و دوژمنێن خوه‌ لێك جودا بكه‌ت، پتریا ڤیان و كه‌ربا وان بۆ سه‌ركرده‌و رێڤه‌به‌رێن وڵاتى یان عاتفیه‌ یان ژى مینا میراته‌كا باب و باپیران یا بۆ كوڕ و نه‌ڤیان مایه‌ڤه‌!. پتریا ژیانێ مینا بیركاریێ یه‌، واته‌ باڵانس و هه‌ڤكێشه‌نه‌، گه‌له‌ك جاران مه‌ ئاگه‌ه ژێ دبیت دبێژن ئه‌گه‌ر فلان قوتابى بۆ بیركاریێ یێ زیره‌ك بیت زۆر گرنگه‌، مه‌به‌ست ل ڤێ تێگه‌هێ ئه‌وه‌ كو بیركارى واته‌ لێكدانه‌ڤه‌و شرۆڤه‌كرن، واته‌ كاركرن ب مه‌ژى و تێگه‌هشتن ل هه‌ڤكێشه‌و باڵانسان، پڕانیا مه‌ كوردان گازندان ژ گه‌نده‌ڵكاران دكه‌ین واته‌ ب باشى تاڵانكرنێ و ژناڤبرنا سامانێ گشتى یێ وڵاتى دبینین، لێ فاكته‌رێن هه‌بوونا گه‌نده‌ڵیێ نه‌ك بتنێ نابینین به‌لكى مه‌نه‌ڤێت خوه‌ تێبگه‌هینین ژى ژبه‌ركو ئه‌گه‌ر مه‌ خوه‌ تێگه‌هاند دێ ب ساناهى گه‌هینه‌ وێ باوه‌ریێ كو ئه‌گه‌رێن هه‌بوونا گه‌نده‌ڵیێ ل كوردستانێ جڤاك بخوه‌یه‌، ئه‌گه‌ر رێژه‌یه‌كێ ته‌خمین بكه‌ین زێده‌تر ژ 90% خه‌لكێ وڵاتێ مه‌ ده‌مێ دگه‌هیته‌ ده‌سه‌ڵاتێ و به‌رپرسیارییه‌تێ درێغیێ ل تاڵانكرنا سامانێ گشتى ناكه‌ت!، كه‌سوكار و بگره‌ هوزا وى ژى پشتگیرییا وى دكه‌ن!. سه‌رنجێ بده‌ خه‌لكێ سلێمانیێ و گه‌رمیان ب گشتى و گازنده‌یێن وان ژ پارتى!، پارتى دیموكراتى كوردستان ل وان ده‌ڤه‌ران شیانێن ڤه‌گوهاستنا فه‌رمانبه‌ره‌كێ ژى نینه‌، ل پشتى سه‌رهه‌ڵدانا 1991 هه‌تا نها ل وان ده‌ڤه‌ران پارتى چ جاران حوكم نه‌كرییه‌، نه‌ك بتنێ ده‌سه‌ڵاتدارێن سلێمانیێ سامانێن وان تاڵانكرن كرن، به‌لكى مه‌ هه‌میا دیت زۆر ب ئاشكه‌رایی نیڤیا كوردستانێ ل 16ێ ئوكتۆبه‌رێ فرۆته‌ عیراقێ و ئیرانێ!، ئه‌ڤجاژى خه‌لكێن وان ده‌ڤه‌ران ب گشتى ب ماموستاو دكتور و شاره‌زاو رۆژنامه‌نڤیسڤه‌ به‌رده‌وام پارتى تاوانبار دكه‌ن!، واته‌ ئێش و كێشه‌یێن ڤى وڵاتى ب بنبڕكرنا گه‌نده‌ڵیێ چاره‌سه‌ر نابن، به‌لكى پتر دێ ئالوز بن و كێشه‌ ل دووڤدا هێن، كورد پێدڤیه‌ لایه‌نێ خوه‌ یێ فه‌رهه‌نگى و زانستى پێش ب ئێخیت.
د ئه‌ڤ ساڵه‌دا نیشانێن گوهرینێن مه‌زنێن سه‌رتاسه‌رى زۆر ئاشكه‌را بوونه‌، پارتى دیمۆكراتى كوردستان دساڵا 2017ێدا ب ئه‌نجامدانا ریفراندۆمێ تاپویه‌ك بۆ كوردستانێ چێكر و به‌رهه‌ڤ كریه‌ بۆ ده‌مێ پێدڤى، شه‌رێ سیاسى و ته‌كتیكیێ د ناڤبه‌را ئیرانێ و ئه‌مریكادا هێدى هێدى به‌ر ب قووناغه‌كا نووتر و دژوارتر دچیت و دبیت ببیته‌ شه‌ره‌كێ سه‌ربازى، نها خوه‌نیشاندانان ل ئیرانێ ده‌ست پێ كریه‌، ئه‌گه‌ر ده‌ستێ ده‌ره‌كێ ل پشت هه‌بیت (كو ئه‌ز باوه‌رم یا هه‌ى) دێ ئیران به‌ره‌ف هه‌لوه‌شاندنێ چیت، ئه‌گه‌ر ئه‌ڤ خوه‌نیشانده‌ژى ب داوى هاتن، پلان و كارتێن دیكه‌ مینا ئه‌لته‌رناتیڤ به‌رده‌وام دده‌ستێن ئه‌مریكا دا هه‌نه‌، ئه‌گه‌ر ده‌م گوهارتێن جۆگرافى هات وه‌ڵاتێن زلهێز دشێن به‌هانه‌یان ب چه‌ند كاتژمێره‌كا چێكه‌ن و هه‌مى باڵانسێن سیاسى و جۆگرافى بگوهرن، ئه‌ز باوه‌رم گوهارتنێن ل نشكه‌كێڤه‌ دێ ل ده‌ڤه‌رێ هه‌بن، ناپاكی یێن 16ێ ئۆكتۆبه‌رێ دربه‌كا مه‌زن ل خه‌لكێ كوردستانێ دا، لێ كوردان ب ئه‌نجامدانا ریفراندۆمى ده‌ستكه‌فته‌كا هنده‌یا مه‌زن ب ده‌ستڤه‌ ئینا كو گرانى و قه‌باره‌یێ ناپاكێن 16ێ ئۆكتوبه‌رێ زۆر بچویكتره‌ ژ وان ده‌ستكه‌فتان.
حوكمه‌تا هه‌رێما كوردستانێ پێدڤیه‌ به‌رده‌وام بیت و به‌رنامه‌یێن خوه‌ یێن چاكسازیێ بكه‌ته‌ كردار، خه‌لكێ كوردستانێ پێتڤییه‌ وێ ڕاستیێ ژبیر نه‌كه‌ن ئه‌و بخوه‌ خودانێن حكومه‌تێنه‌ و دشێن مینا وان دڤێت بگوهرن، لێ ئیراده‌ و ڕاست ڕوویى گه‌ره‌كه‌.

كامى كمال
هه‌ر حزب و سازیه‌ك، ئانكو هه‌ر ده‌مێ كۆمه‌كا كه‌سان خوه‌ دكه‌ن هێزه‌كا رێخستى، بێ گۆمان گه‌ره‌كه‌ ئارمانجه‌كا دیارى كرى ل پێشیا وان هه‌بیت كو ژپێخه‌مه‌ت وێ ئارمانجێ بشێن سازیا خوه‌ پێش ب ئێخن و رێكخستنێن خوه‌ به‌رفره‌ه بكه‌ن.
ئه‌و ده‌مێن نیه‌تێن راسته‌قینه‌ یێن حزبه‌كێ و درووشمێن وێ هه‌ڤدو نه‌گرن، ئه‌و حزب نكاریت خوه‌دى ستراتیژی و به‌رنامه‌یه‌كێ دیار كرى بیت و ل گه‌ل خه‌لكێ خوه‌ ژى ڕاستگۆ بیت، ئه‌و جۆره‌ حزب به‌رده‌وام ل گه‌ل باردۆخێ سیاسى خوه‌ دگوهۆرن. ل ساڵا 2009ێدا ته‌ڤگه‌را گۆڕان ل زارۆ دانكێ ئێكه‌تیێ ده‌ركه‌فت و ژدایكبوو، ب هه‌مان ئارمانج و هه‌مان رێبازا برایم ئه‌حمه‌د ل ژێر كراسه‌كێ دیكه‌ درێژى ب خه‌باتا دژه‌ پارتى و بارزانییه‌تێ دا، دهه‌ر ده‌لیڤه‌ و د هه‌رده‌مه‌كێ دا كو زه‌مینه‌ ژبۆ ڤێ بزاڤێ ساز ببیت ب تنێ ئارمانجا ڕاسته‌قینه‌یا وێ ژناڤبرنا پارتى دیمۆكراتى كوردستان بوویه‌!، ئه‌و ڕاستى ناهێته‌ ئینكاركرن كو پارتى دیمۆكراتى كوردستان زێده‌ترین گرنگیێ ب سه‌ربخوه‌بوونا كوردستانێ دده‌ت و ب پراكتیك ژى هه‌م پێنگاڤ بۆ هاڤێتن و هه‌م ژى قوربانى یێن مه‌زن بۆ داینه‌ و دده‌ت و به‌رهه‌ڤى یا خوه‌ژى ژبۆ هه‌ر قوربانیه‌ك دیار دكه‌ت، ئه‌گه‌ر ژلایه‌نێ گه‌نده‌لیێ و نایه‌كسانیێ هه‌ر كێماسیه‌ك و گازنده‌ك ژ پارتى دیمۆكراتى كوردستان هه‌بیت ڕه‌واو مه‌نتقه‌، لێ ئه‌و ڕاستى ناهێته‌ ئینكار كرن كو هه‌مى حزبێن كوردستانێ ل دووڤ شیان و ده‌سه‌ڵاتێن خوه‌ درێغی ژ گه‌نده‌ڵیێ و نایه‌كسیانیێ نه‌كرینه‌ و هه‌ر چار حزبێن دیتر یێن كوردستانێ ژى پشكدارى حوكمڕانیا كوردستانێ بوونه‌، لێ پارتى دیمۆكراتى كوردستان د به‌رێ و نها دا ژ لایه‌نێ نه‌ته‌وه‌یی و ئازادیا وه‌ڵاتى ڤه‌ ئاستێ وێ یا بێ ڕكابه‌ره‌، سه‌رنجێ بده‌ حزبێن گه‌نده‌ڵ و پڕ ژ نائێكسانى ب به‌هانه‌یا گه‌نده‌ڵیێ هێرشێ دكه‌نه‌ سه‌ر پارتى!، ل ژێر هه‌ر به‌هانه‌و په‌رده‌ و ماسكه‌كى دا د ڤى باردۆخێ نازكێ وه‌ڵاتى دا هێرشكرن بۆ سه‌ر پارتى و گه‌فێن ژناڤبرنا پارتى ژ لایێ هنده‌ك لایه‌ن و حزبێن كوردستانێ ڤه‌ هێرش و گه‌فن ژ بۆ تاكه‌ بزاڤ و هیڤیا دامه‌زراندنا ده‌وڵه‌تا كوردستانى، ئه‌ڤ چه‌نده‌ ژى به‌لگه‌یه‌ كو ئه‌و حزبێن ل كوردستانێ دژایه‌تی یا پارتى دیمۆكراتى كوردستان دكه‌ن پشكه‌كن ژ ئه‌جندا و لۆبى یێن دۆژمنى (هه‌لبه‌ت مه‌به‌ست ڕه‌خنه‌گر نینن، مه‌به‌ست ئه‌و لایه‌نن یێن كو ب ئاشكه‌رایی بزاڤا ژناڤبرنا پارتى دكه‌ن!).
هه‌كه‌ سه‌رنجێ بده‌ین پترین گڤاشتنێن ته‌ڤگه‌را گۆڕان و كۆمه‌ڵا ئیسلامى و هه‌ڤ ئاوازێن وان ل وان ده‌مان ده‌ست پێ دكه‌ن كو وه‌ڵات ڕاستى قه‌یرانه‌كا مه‌زن دبیت!، ژبه‌ر كو ئه‌و وه‌سا هزر دكه‌ن د قه‌یرانان دا پارتى لاواز دبیت و خوه‌ ل به‌ر گڤاشتنێن وان ناگریت و دێ هه‌لوه‌ریت!، بۆ وان گرنگ نینه‌ كو كورێن خه‌لكى بهێنه‌ كوشتن و ملیۆنان دۆلار زیان بگه‌هیته‌ خه‌لكێ هه‌ژار و نه‌دارێن ڤى وه‌لاتى و هێزێن دوژمنێن ده‌ره‌كى مفاى ژ تێكچوونا باردۆخێ كوردستانێ ببینن…هتد، پتر ژ چار سالان ته‌ڤگه‌را گۆڕان و كۆمه‌ڵا ئیسلامى خوه‌دى وه‌زاره‌ت و ده‌هان ڕێڤه‌به‌رى و پۆستن ل حوكمه‌تا هه‌رێما كوردستانێ و مینا ئۆپوزسیۆن ژى دبزاڤا كۆمكرنا جه‌ماوه‌ری داینه‌ ب خاپاندن و پڕۆپاگنده‌یێن نه‌ڕاست، ئه‌و ده‌مێن كو “نێچیرڤان بارزانى” سه‌رۆكێ حوكمه‌تا هه‌رێما كوردستانێ داخواز ژ په‌رله‌مانێ كوردستانێ كرى پێنگاڤێن پێدڤى بۆ هه‌لبژارتنان بهێنه‌ هاڤێتن و به‌رهه‌ڤیان بكه‌ن و هه‌تاكو سێ هه‌یڤێن دیتر هه‌لبژارتن بهێنه‌كرن، هه‌ر ل دووڤ دا ته‌ڤگه‌را گۆڕان و كۆمه‌لا ئیسلامى خوه‌ ل حوكمه‌تا هه‌رێما كوردستانێ ڤه‌كێشا!، ب راستى ئه‌ڤ چه‌نده‌ یایكرنه‌ ب سۆز و مه‌ژیێ خه‌لكێ كوردستانێ ب درووشم و په‌یام داخوازا گۆهارتنێن ریشه‌یی یا حوكمه‌تێ دكه‌ن و بۆ ئیمتیازێن ماددى و مه‌عنه‌وى پشكداریێ د ناڤ حوكمه‌تێ دا دكه‌ن!.
ئه‌ڤرۆ پێدڤیه‌ خه‌لكێ كوردستانێ ب باشى و ژیرانه‌ پێنگاڤێن هه‌مى لایه‌نێن سیاسى بخوینن و بریاره‌كا ساخله‌م بۆ به‌رژه‌وه‌ندیێن وه‌ڵاتێ خوه‌ بده‌ن.
كێموكاسى یێن حوكمه‌تا هه‌رێما كوردستانێ زۆرن، لێ د ڕاستیدا حوكمه‌تا هه‌رێمێ و به‌رپرس و رێڤه‌به‌رێن وێ ژ ئه‌سمانان نه‌هاتینه‌ خوارێ و پشكه‌كن ژ خه‌لكێ كوردستانێ، گه‌ره‌كه‌ خه‌لك بزاڤێ بكه‌ت ب رێیێن پۆزه‌تیڤ ئاراسته‌یێن شاش یێن رێڤه‌به‌ریێ بگوهۆرن، فاكته‌رێ سه‌ره‌كى یێ گه‌نده‌لیێ و نایه‌كسانیێ هه‌مى جڤاكه‌ ب گشتى، ئه‌گه‌ر جڤاك ب گشتى ل دژى گه‌نده‌ڵ و نایه‌كسانان نه‌ڕاوه‌ستن و تاك ژخوه‌ ده‌ست پێ نه‌كه‌ت، چ كه‌سه‌ك نكاریت ڤێ كێشه‌یێ چاره‌سه‌ر بكه‌ت.

كامى كمال
هه‌ڤڕكى ئێك ژ ئه‌گه‌رێن سه‌ره‌كى یێن پێشكه‌فتنێ یه‌ ژ هه‌مى ئالیه‌كێڤه‌، لێ ب مه‌رجه‌كێ هه‌ڤڕكى یا ئه‌رێنى (پۆزه‌تیڤ) بیت، ئه‌و ده‌مێن مرۆڤه‌ك نه‌شێت هه‌ڤڕكیا ئه‌رێنى ل گه‌ل به‌رامبه‌رى خوه‌ بكه‌ت باشترین بژارده‌ ئه‌وه‌ دانپێدان بئینیت و رێیێن نه‌رێنى (نێگه‌تیڤ) ب چ ئاوایه‌كێ هه‌لنه‌بژێریت، ژبه‌ركو وى ده‌مى دێ به‌ر ب ئاقاره‌كێ خراب و مه‌ترسیدار چیت.
د ناڤ دیرۆكا كوردان دا یا دیاره‌ كو بارزان خوه‌دى دیرۆكه‌كا پڕ ژ شۆڕه‌ش و قوربانیدانه‌، هه‌تا نها ژى ده‌مێ كه‌سه‌ك سه‌ردانا ده‌ڤه‌رێن بێخمى و ده‌وروبه‌رێن بارزان دكه‌ت ب ئاشكه‌رایی دبینیت كو هێشتا شوونه‌وارێن دوژمنان یێن ماین كو چه‌ند پزاڤ دكرن بارزان كۆنترۆل بكه‌ن و ژناڤببه‌ن، ئێك ژ وان پلانان ئه‌وبوو كو دوژمنان دخواست به‌نداڤا بێخمێ دروست بكه‌ن داكو وێ بزاڤا خورتا شۆڕه‌شگێرى یا كوردى ل بارزان ڕابگرن، لێ ب پشته‌ڤانیا خه‌لكێن دلسۆز و پێشمه‌رگه‌یێن كوردستانێ ئه‌و پلانێن دۆژمنێن كوردان سه‌رنه‌گرتن و شكستن خوارن.
گومان د وێ چه‌ندێ دا نینه‌ كو سلێمانیێ خوه‌دى ده‌هان سه‌ركرده‌ و شۆڕه‌شگێرێن دلسۆز و كوردپه‌روه‌ر بوویه‌، لێ ئه‌و ڕاستى ل سه‌ر ئاستێ هه‌رچار پارچه‌یێن كوردستانێ ناهێته‌ ئینكاركرن كو د سه‌ده‌یا ده‌رباز بووی دا مالباتا بارزانى پترین خزمه‌ت و قوربانى بۆ دۆزا كوردان دایه‌ و شیاینه‌ هه‌ستێ كوردایه‌تیێ ب هێز و خورت بكه‌ن، بۆ سه‌لماندنا ڤێ ڕاستیێ ژى دیرۆك ب خوه‌ شاهده‌.
ل ده‌سپێكا سالێن 1960 ـاندا مالباتا برایم ئه‌حمه‌د و جه‌لال تاله‌بانى ل گه‌ل بارزانیێ نه‌مر ل هه‌ڤڕكیا ئه‌رێنى بێ هیڤى بوون، ئه‌و گه‌هشتنه‌ وێ ڕاستیێ كو بارزانیێ نه‌مر ژ هه‌مى ئالیه‌كێ ڤه‌ بهێزترین كه‌سایه‌تى و شۆڕه‌شگێرێ كورده‌ و خوه‌دى ب هێزترین پێگه‌هێ جه‌ماوه‌ریه‌ ل كوردستانێ، له‌وما ڤان مالباتان هێدى هێدى ده‌ست ب هه‌ڤڕكیه‌كا نه‌رێنى و مه‌ترسیدار كر هه‌تاكو ل سالا 1966 ب ئاشكه‌رایی بوونه‌ هێزه‌كا تایبه‌ت سه‌ر ب دوژمنى و شه‌ڕ ل گه‌ل شۆڕه‌شا كوردان به‌رپا كر، ئه‌ڤ چه‌نده‌ ل ده‌ف جه‌لال تاله‌بانى دیرۆكه‌كا ته‌عل بوو، لێ تاله‌بانى ڕاستى تاریاتیه‌كێ ببوو كو خه‌زیرێ وى بۆ وى ئافراند بوو، هه‌ر ل وى سه‌رده‌مى هه‌تاكو تاله‌بانى وه‌غه‌را داویێ كرى نیازێن وى بۆ دووماهیئینانا پێگه‌هێ بارزانى ب داوى نه‌هاتن، تاله‌بانى به‌رى كو نه‌ساخ ببیت ب هه‌مى شیانێن خوه‌ پشتگیریا كه‌سایه‌تیێ دیكتاتۆرخواز و دوژمنێ كوردان “نوورى مالكى” كره‌ڤه‌!، هه‌رچه‌نده‌ تاله‌بانى ل ده‌ه سالێن داویێ دا گه‌هشت بوو وێ باوه‌ریێ كو ژ ناڤبرنا بارزانى و پێگه‌هێ وى یێ جه‌ماوه‌رى و سه‌ربازى پاریه‌ك نینه‌ دگه‌وریا واندا بچیت، لێ دیسا ده‌مێ پشتگیریا مالكى كرى دیار بوو كو ئه‌گه‌ر شیابا درێغى نه‌دكر و دا دربا خوه‌ ل بارزان ده‌ته‌ڤه‌!. د ڤى بابه‌تی دا من نه‌ڤێت زێده‌تر لاپه‌ره‌یێن دیرۆكى ڤه‌كه‌م، لێ پشتى كو تاله‌بانى وه‌غه‌را داویێ كرى ل 16 ئۆكتوبه‌رێ دوباره‌ میراتگرێن وى مه‌زنترین درب ل كوردستانێ داڤه‌ و كه‌ركووك و هه‌مى ئه‌و ده‌ڤه‌رێن د كۆنترۆلا وان دا ڕاده‌ستى دوژمنى كره‌ڤه‌!، ئه‌گه‌ر سه‌رۆك بارزانى ل كه‌ركووكێ ڕیفراندۆم ئه‌نجامنه‌دابا ئێدى دۆزا كوردى دا زڤریته‌ڤه‌ به‌رى سه‌رهه‌لدانا 1991ێ، لێ ژبه‌ر كو ڕیفراندۆم هاته‌ كرن ئێدى زێده‌تر ژ 90% خه‌لكێ كه‌ركووكێ سه‌لماند كو كه‌ركووك كوردستانیه‌، واته‌ ئه‌ڤ چه‌نده‌ به‌لگه‌یه‌كێ شه‌رعى و یاسایی یێ ب هێزه‌ كو د نها دا كه‌ركووك باژێره‌كێ ناكووكى ل سه‌ر نینه‌ به‌لكى ب هێز و خیانه‌تا گرۆپه‌كێ كرێ گرتى یێ هاتیه‌ داگیركرن.
پشتى كو نه‌ڤى یێن برایم ئه‌حمه‌د و تاله‌بانى ئه‌و خیانه‌ت كرى مینا دیرۆكێ دوباره‌ بزاڤێ دكه‌ن ب هێرشكرنا سه‌ر پارتى و بارزانى ناپاكى یێن خوه‌ ڤه‌شێرن و تۆزێ دكه‌نه‌ ڤه‌ د چاڤێن خه‌لكێ كوردستانێ دا.
د نها دا مینا دیرۆكێ نێچیرڤان بارزانى به‌رهه‌ڤیێن ڕێخستنا په‌یوه‌ندى و ب هێزكرنا پێگه‌هێ كوردستانێ ل سه‌ر ئاستێ جیهانێ دكه‌ت، هه‌روه‌كى دیار عیراق یا كه‌فتیه‌ دگومه‌كا شێلى دا و ده‌ركه‌فتنا وێ یا ب ساناهى نابیت، وه‌كى دیار ئه‌مریكا و هه‌ڤپه‌یمانێن وێ دخوازن ئیران و عه‌بادى ڤان پێنگاڤێن شاش بهێنه‌ پێش، د نها دا ناڕاسته‌خوه‌ ئاگرى دده‌نه‌ بن كه‌سێن مینا لاهۆر شێخ جه‌نگى وى یتر هان دده‌ن به‌رده‌وام بیت ل سه‌ر ناپاكى یێن خوه‌!، ئه‌و ژى مینا سنێله‌یه‌كێ سیاسى یێ گه‌رم بووى و گه‌فان دكه‌ت!، بێ كو بزانیت نانێ ئه‌مریكا د هه‌رده‌مه‌كی دا خێر و به‌ره‌كه‌ت نینه‌!، به‌لكى به‌روڤاژى هنده‌ك جاران ژه‌هره‌كا دژوارو بێ چاره‌سه‌ریه‌.