ئه‌ڤرۆ نیوز:

بریاره‌ ئه‌ڤرۆ ئه‌و شاندێ هه‌رێما كوردستانێ كۆ چه‌ند رۆژێن بوری سه‌ره‌دانا به‌غداكری، سه‌ره‌دانا په‌رله‌مانێ كوردستانێ بكه‌ت، ل گه‌ل سه‌رۆكایه‌تی و سه‌رۆكێن فرتاكسیونان كۆمبیت.

ئاوات شێخ جه‌ناب وه‌زیرێ داراییێ هه‌رێمێ و شاندێ هه‌ڤالبه‌ند كۆ چه‌ند رۆژه‌كێن بوری ل به‌غدا بوون و پرسا پترۆل و غازێ و بودجێ و كاره‌بێ ل گه‌ل لایه‌نێن په‌یوه‌ندیدارێن حكومه‌تا فیدرال ڤه‌ دانوستاندن ل سه‌ر كرین، دێ ئه‌ڤرۆ سه‌ره‌دانا په‌رله‌مانێ كوردستانێ كه‌ن و ل گه‌ل سه‌رۆكاتی و سه‌رۆكێن فراكسیونێن په‌رله‌مانێ كوردستانێ كۆم بن و بریار و ده‌رئه‌نجام و هیرده‌كاریێن ئه‌وێ سه‌ره‌دانێ بۆ په‌رله‌مانی روون بكه‌ن.

رۆژا 19/4/2020 ل سه‌ر داخوازیا حكومه‌تا عیراقێ شانده‌كێ هه‌رێما كوردستانێ كۆ پێك هاتبوون ژ وه‌زیرێ دارای و وه‌زیرێ پلاندانانێ و سه‌رۆكێ دیوان و سكرتێرێ جڤاتا وه‌زیران و وه‌زیرێ هه‌رێم بۆ كارۆبارێن په‌یوه‌ندێن هه‌رێم و به‌غدا سه‌ره‌دانا به‌غدا كر و سێ رۆژان چه‌ندین دیدار و دانوستاندن كرن ل سه‌ر پرسێن هه‌لاویستی یێن ناڤبه‌را هه‌رێم و به‌غدایێ دا.

ئه‌ڤرۆنیۆز، سالار دۆسكی:

فه‌رمانگه‌هه‌ك ل پارێزگه‌ها دهۆكێ‌ هه‌تا نوكه‌ یا به‌رده‌وامه‌ ل سه‌ر خزمه‌تكرنا خه‌لكی و ته‌خا جۆتیاران و رۆژانه‌ دكاری دانه‌، رێڤه‌به‌رێ‌ وێ‌ فه‌رمانگه‌هێ‌ خۆیاكر كو زێده‌تر ده‌وام كریه‌ ژ پێشتر ل ده‌واما ئاسایی.

د.ئه‌مجه‌د عوبێد رێڤه‌به‌رێ‌ باغداریێ‌ یا سه‌ر ب رێڤه‌به‌ریا گشتی یا چاندنێ‌ ڤه‌ ل پارێزگه‌ها دهۆكێ‌ بۆ مالپه‌رێ‌ ئه‌ڤرۆ نیۆز ئاشكراكر كو ژ رۆژا بوویه‌ بهێنڤه‌دان ژ به‌ر نه‌خوشیا كورونایێ‌ هه‌تا نوكه‌ وه‌ك رێڤه‌به‌ریا باغداری ل گه‌ل كرێكاران به‌رده‌وام ده‌وام كرینه‌ و خزمه‌تا جۆتیاران دا بووینه‌ و هه‌تا نوكه‌ ژی رۆژانه‌ ل سه‌ر كاری نه‌.

رێڤه‌به‌رێ‌ باغداریێ‌ ئه‌و ژی ئاشكراكر كو كارێ‌ سه‌ره‌كیێ‌ رێڤه‌به‌ریێ‌ به‌رهه‌م ئینانی نه‌مامانه‌ و سالانه‌ و ب رێكا گولخانێن(مالتا، زاخۆ، ئاكرێ‌) ئه‌ف ساله‌ شیاینه‌ رێژه‌كا باش ب بهایێن گونجای ل سه‌ر جۆتیاران به‌لاڤ بكه‌ین، هه‌تا 300 هزار نه‌مام وه‌ك (قلم) ئه‌ف ساله‌ هاتینه‌ چاندن و 550 نه‌مام ب رێكا توڤی هاتینه‌ چاندن و (90) هزار نه‌مام بۆ سالا داهاتی هاتینه‌ به‌رهه‌فكرن و كارێ‌ به‌رده‌وامه‌ .

ئه‌و ژی گۆت: نوكه‌ كارێ‌ سه‌ره‌كی و رۆژانه‌ دهێته‌كرن(ئاڤدان، خه‌باره‌، ئاده‌) ژناڤبرنا نه‌خوشی و چاڤدێریا نه‌مامان دهێته‌كرن. د.ئه‌مجه‌د عوبێد، رێڤه‌به‌رێ‌ باغداریێ‌ ل پارێزگه‌هێ‌ ئه‌و ژی دیاركر كو هه‌ر نه‌مامه‌كا ل ده‌ڤه‌رێ‌ دهێته‌ چاندن ل رێڤه‌به‌ریا باغداریێ‌ دهێـته‌ به‌رهه‌م ئینان بۆ نموونه‌ (شه‌ش جورێن تری، سێ‌ جورێن سێڤا، سێ‌ جورێن هژیرا، سێ‌ جورێن حلیك، فسته‌ق، گیرز، زه‌یتن، باهیف، مژمژه‌) هه‌ر دو جورێن دێَمی و ئاڤی و هنده‌ك نه‌مام دو سالان دهێنه‌ چاڤدان.

د. ئه‌مجه‌د ئه‌و ژی ئاشكراكر كو بهایێ‌ نه‌مامێ‌ ژ 500 دیناران ده‌ست پێ‌ دكه‌ت هه‌تا 1500 و ئه‌ڤێن 1500 ئه‌ون یێن دو سالان چاڤدان ل سه‌ر دهێته‌كرن و سالانه‌ بها دهێنه‌ گوهورین ل دووف رێنمایێن وه‌زاره‌تێ‌.