ئه‌ڤرۆ نیۆز، عه‌زیز هه‌ورامی:

پاش ئه‌وه‌ی ماموستاییه‌كی ئاینی له‌ سلێمانی گیانی له‌ده‌ستدا به‌ ڤایرۆسی كۆرۆنا لیژنه‌ی فتوا و پارێزگار و به‌ڕێوه‌به‌رایه‌تی ئه‌وقافی سلێمانی بڕیاریاندا، نوێژی به‌كۆمه‌ڵ ڕابگیردرێت و ئه‌م هه‌فته‌یه‌ش نوێژی هه‌ینی له‌ مزگه‌وته‌كان ناكرێت.

دكتۆر ئه‌حمه‌د شافعی ئه‌ندامی لیژنه‌ی فتوا له‌ مزگه‌وتی سلێمانی، به‌ ئه‌ڤرۆ نیۆزی ڕاگه‌یاند:” بڕیارماندا به‌وه‌ی هه‌موو نوێژه‌ به‌كۆمه‌ڵه‌كان له‌ مزگه‌وه‌ته‌كان ڕابگیردرێن بۆ كاتێكی نادیار و ته‌نها له‌ مزگه‌وته‌كان بانگ ده‌درێت و پاش بانگه‌كه‌ بانگ بێژه‌كه‌ داوا له‌ موسڵمانان ده‌كات له‌ ماڵه‌كانی خۆیان نوێژه‌كانیان بكه‌ن.

هه‌روه‌ها ئاماژه‌ی به‌وه‌كرد، بڕیاردرا بۆ ئه‌م هه‌فته‌یه‌ نوێژی هه‌ینی له‌ مزگه‌وته‌كان ڕابگیردرێت، پاشان له‌سه‌ر ڕه‌وشی ڤایرۆسه‌كه‌ بڕیاری ترده‌درێت بۆ هه‌فته‌كانی تر. ناوبراو ده‌ڵێ، له‌به‌ر ئه‌وه‌ی ئه‌م نه‌خۆشیه‌ له‌ ڕێگه‌ی ته‌وقه‌ و كۆكه‌ و پژمین ده‌گوازرێته‌وه‌ له‌ نێوان مرۆڤه‌كان به‌پێویست زاندرا نوێژی به‌كۆمه‌ڵ له‌ ئێستادا له‌ مزگه‌وته‌كان ڕابگرین.

ئه‌ڤرۆ نیۆز، عه‌زیز هه‌ورامی:

له‌ پارێزگای سلێمانی 6 حاڵه‌تی نه‌خۆشی كۆرۆنا تۆماركراوه‌ یه‌كێكیان گیانی له‌ده‌ستداوه‌، نزیكه‌ی 700 كه‌سیش له‌ كرینتینه‌ له‌ ژێرچاودێری پزیشكیدان و له‌ وڵاتی ئێران گه‌راونه‌ته‌وه‌.

دكتۆر هێرش سه‌ید سه‌لیم جێگری به‌ڕێوه‌به‌ری گشتی ته‌ندروستی پارێزگای سلێمانی، به‌ ئه‌ڤرۆ نیۆزی ڕاگه‌یاند:” ئه‌مڕۆ شه‌شه‌م حاڵه‌تی توشبوو به‌ ڤایرۆسی كۆرۆنا تۆماركراوه‌، ماموستاییه‌كی ئاینییه‌ گوتاربێژی مزگه‌وتی مه‌حووی ناوبازاڕی سلێمانییه‌، ته‌مه‌نی 70 ساڵه‌ گیانی له‌ ده‌ست داوه.

دكتۆر هێرش سه‌ید سه‌لیم ئاماژه‌ی بۆ ئه‌وه‌شكرد، ماموستا ئاینییه‌كه‌ هه‌ڵگری ڤایرۆسی كۆرۆنا بوو له‌گه‌ڵ داخڵبوونی به‌نه‌خۆشخانه‌ نه‌ی ده‌توانی هیچ قسه‌یه‌ك بكات و تا گیانی له‌ده‌ستدا، خێزانه‌كه‌شی ئینكاری ئه‌وه‌ده‌كه‌ن سه‌ردانی ده‌وڵه‌تی ئێرانی كردبێت.

هه‌روه‌ها ئاماژه‌ی بۆ ئه‌وه‌شكرد، پێنچ توشبووه‌كه‌ی تری ڤایرۆسی كۆرۆنا ڕه‌وشی ته‌ندروستییان زۆر باشه‌ و به‌رده‌وام چاره‌سه‌ریان بۆ ده‌كرێت، له‌ وڵاتی ئێرانه‌وه‌ گه‌ڕاونه‌ته‌وه‌، له‌ ئێستادا نزیكه‌ی 700 كه‌س له‌ كرنتینین له‌ ژێرچاودێری پزیشكیدان، ته‌واویان سه‌ردانی ده‌وڵه‌تی ئێرانیان كردبووه‌.