رەمەزان زەكەریا:

وەزیرێ‌ ئەوقاف و كاروبارێن ئایینی یێ حوكمەتا هەرێما كوردستانێ‌ ل فڕۆكخانەیا نێڤدەولەتیا هەولێرێ‌ پێشوازی ل ئێكەم كاروانێ‌ حەجیێن هەرێما كوردستانێ‌ كر و د كۆنگرەكێ‌ رۆژنامەڤانی دا ئامارا وان حەجیێن ئەڤ سالە گیانێ‌ خۆ ژ دەست دای راگەهاند.
پشتیوان سادق، وەزیرێ ئەوقاف و كاروبارێن ئایینی د كۆنگرێ‌ ڕۆژنامەڤانی دا گۆت: «د وەرزێ ئەڤ سالە یێ فەریزا حەجێ دا 30 وەلاتیێن خەلكێ هەرێما كوردستانێ ل مەككەهێ گیانێ خۆ ژ دەست دایە، كو ب تنێ كەسەك ژ وان ب ڕێیا وەزارەتا ئەوقافێ‌ چوویە سعوودیێ».
پشتیوان سادق گۆتژی: «ئەڤ سالە نێزیكی 25 هزار كەسان ل دەرڤەی ڕێكارێن وەزارەتا ئەوقافێ چووینە حەجێ».
ژ لایەكێ‌ دیڤە وەزارەتا ساخلەمیا وەلاتێ سعودیێ‌ ئاشكرا كریە، ئەڤ سالە هزار و 301 حەجیان ل مەككەهێ گیانێ خۆ ژ دەست دایە.

جێگرێ پارێزگارێ نەینەوا دیار كر، ئاوارەیێن دزڤڕینە شنگالێ‌، هەكە خانی نەبن پلان وەسا هاتیە دانان بۆ وان ئاوارەیان خانی بهێنە ئاڤاكرن، نوكە چار پلان بۆ ئاڤاكرنا خانیان ل شنگالێ‌ هەنە.
عەلی عومەر، جێگرێ پارێزگارێ نەینەوا بۆ رۆژناما ئەڤرۆ گۆت: «چار پلان بۆ ئاڤەدانیا شنگالێ‌ و ئاڤاكرنا خانیان بۆ وەلاتیان هەنە، ژ وانا ژی: پلانا حكومەتا ئیراقێ ئەوە دو هزار و 500 خانیان ئاڤا بكەت، هزر وەسا بوو شوقە بۆ ڤەگەڕاندنا ئاوارەیان بهێنە ئاڤاكرن، لێ ئەم رازی نەبووینە، چونكو باشترە خەلك بزڤڕنە سەر گوند و دەڤەرێن خۆ و خانی بۆ بهێنە ئاڤاكرن».
ناڤهاتی خویا ژی كر، رێكخراوەك هەتا هزار خانیان دێ‌ بۆ وان ئاوارەیێن زڤڕینە شنگالێ‌ ئاڤاكەت، دیسا ئێدارا نەینەوا ب هەماهەنگی ل گەل رێكخراوان خانیێن ئاوارەیان نووژەن بكەت و ئەو خانیێن خرابووین بۆ خەلكی ئاڤا بكەن، ب تایبەتی ژی ئەو ئاوارەیێن دزڤڕنە شنگالێ‌، هەكە خانی نەبن خانی بۆ وان دێ هێنە ئاڤاكرن و گۆت: «ئەڤە بوونە 10 سال خەلكێ شنگالێ‌ ئاوارەنە، نوكە خەلك حەز دكەن ڤەگەڕنە شنگالێ‌، ئەز دبینم باشترە ئاوارە ڤەگەڕن و شنگال بهێتە ئاڤاكرن و ئارامی پەیداببیت».

ئامێدیێ، مەحمود نهێلی:

ژ ئەگەرێ بەردانا ئاڤا سكرێ گەلیێ رەشاڤە، پڕۆژەیێ هایدروپاوەرێ دێرەلۆكێ‌ مەترسی ل سەر وی خەلكی دروستكریە یێن ب مەرەما ماسیگرتنێ یان ژی مەلەڤانیان قەستا رووباری زێی دكەن.
رێبەر سادق، رێڤەبەرێ ناوچەداریا دێرەلۆكێ‌ بۆ رۆژناما ئەڤرۆ دیار كر، پڕۆژەیێ هایدرۆپاوەرێ دێرەلۆكێ‌ ئاگەهداریا وان كریە و داخواز ژێ كریە، كو خەلكی ژ رەخێن رووباری دوور بكەن، داكو گیانێ وان یێ پاراستی بیت و گۆت: «پڕۆژێ هایدرۆپاوەرێ دێرەلۆكێ‌ ئاگەهداریا خەلكێ دەڤەرێ دكەت خوە ژ رەخێن رووباری دوور بكەن، ب تایبەت ژی ل نێزیك پڕۆژەی و سكرێ گەلیێ رەشاڤە، چونكی چێدبیت ژ نشكێڤە ئاڤا سكری بهێتە بەردان و ببیتە مەترسی ل سەر ژیانا وان».
ناڤهاتی گۆتژی: «داكو خەلكێ مە یێ پاراستی بیت ژ هەر روودانەكا نەخواستی، پێدڤیە ئەو وەلاتیێن ب مەرەما ماسیگرتنێ یان ژی مەلەڤانیان دچنە سەر رووبارێ زێی خوە ژ رەخێن ئاڤێ دوور بكەن، ب تایبەتی ژی ئەوێن خوە نێزیك پڕۆژەی دكەن، چونكی بەردانا ئاڤا سكری ل هەر دەمەكی یا چاڤەرێ كریە».

ئاكرێ‌، رەمەزان زەكەریا:

سەرۆكێ سەندیكا كرێكارێن كوردستانێ تایێ ئاكرێ د كۆنگرەكێ رۆژنامەڤانی دا ئاشكرا كر، گەلەك كرێكاران گازندە گەهاندینە سەندیكایێ ژ بەر دەمژێرێن زۆر و كرێیەكا كێم.
شێرزاد حسۆ هەركی، سەرۆكێ سەندیكا كرێكارێن كوردستانێ تایێ ئاكرێ گۆت: «ل دووڤ بڕیار و رێنمایێن وەزارەتا كار و كاروبارێن جڤاكی ل حكومەتا هەرێما كوردستانێ، پێدڤیە هەر دەمژمێرەكا كاری ب دو هزار و 500 دیناران بهێتە هەژمارتن و نابیت كرێكار ژ هەشت دەمژمێران زێدەتر كار بكەن».
ناڤبری گۆتژی: «نابیت مووچەیێ هەیڤانە یێ كرێكاران ژ 350 هزار دیناران كێمتربیت، پێدڤیە چاڤێ خودانكاران ل كرێكاران بیت».

ئومێد ئەحمەد، پەیڤدارێ وەزارەتا كارەبێ ڕاگەهاند، د رۆژێن بهێنڤەدانێ دا كارەبا نیشتمانی د ناڤبەرا 12 بۆ 14 دەمژمێران دا بۆ وەلاتیان د هاتەدان، لێ ژ بەر بلندبوونا پلەیێن گەرمێ، داخوازیا وەلاتیان ل سەر كارەبێ گەلەك زێدەبوویە و دەمژمێرێن دانا كارەبا نیشتیمانی دێ كێم بن.
ئەڤە د دەمەكی دایە، كو پلەیێن گەرمێ‌ بەر ب بلندبوونێ‌ دچن و وەلاتی پتر پێدڤی ب كارەبێ‌ نە.

دهۆك، لەزگین جۆقی:

رێڤەبەرێ كۆچ و كۆچبەران و بەرسڤدانا قەیرانان ل پارێزگەها دهۆكێ دیار كر، ڤەگەڕیانا ئاوارەیان بۆ شنگالێ‌ یا بەردەوامە، ئەڤرۆ ژی دێ 80 خێزانێن ژ دەرڤەی كەمپان ل ناوچەداریا خانكێ قەستا شنگالێ‌ كەن.
پیر دەیان جەعفەر، رێڤەبەرێ كۆچ و كۆچبەران و بەرسڤدانا قەیرانان ل پارێزگەها دهۆكێ بۆ ئەڤرۆ گۆت: «ئەم هەمی ئاسانكاریان بۆ وان ئاواران دكەین یێن حەزا زڤڕینا شنگالێ هەی و دەرگەهـ دڤەكرینە، هەر رۆژا وان بڤێت دشێن ڤەگەڕن و هەتا ئاوارە بمینن دێ خزمەتا وان هێتە كرن».
ئاشكرا ژی كر، هەمی ئاوارە د ئازادن بۆ زڤڕینا شنگالێ، ئاوارە دشێن ناڤێن خۆ ل رێكخراوێ تۆمار بكەن بۆ زڤڕینا شنگالێ، كو وەزارەتا كۆچ و كۆچبەرێن ئیراقێ راگەهاندیە، ئەڤ سالە دێ دەرگەهێ كەمپان هێتە دائێخستن، لێ ئەم چ ئاوارەیان ب زۆری ڤەناگەڕینین.