ئامێدیێ، مەحمود نهێلی:

سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی دیموكراتی كوردستان ل پارێزگەها دهۆكێ‌ ب بەرهەڤبوونا بەرەڤان حەمدی، بەرپرسێ لقێ ١٨ و سەباح بەیتوللا و د. ڤیان سلێمان، جێگرێن بەرپرسێ مەكتەبا ڕێكخستنێ‌ و فەریق فاروق، بەرپرسێ پشكا ڕێكخستنێ، د دو كۆمبوونێن جودا دا ل سەرسنكێ و دێرەلۆكێ ل گەل بەرپرس و كارگێرێن هەر هەشت لژنێن ناوچەیێن سنوورێ لقێ 18 و بەرپرسێن ڕێكخراوان، چەند بابەتێن گرنگ و جودا ل دۆر روودان و بوویەرێن دەڤەرێ بەحسكرن.
سەربەست لەزگین گۆت: «پەیوەندیێن مە ل گەل بەغدا و ئیرانێ بەر ب باشیێ د چن و ئەو پێشوازیا مەزن و كۆمبوونێن جودا یێن سەرۆكێ هەرێمێ ل بەغدا و ئیرانێ رەنگڤەدانەكا ئەرێنی هەبوویە و تێگەهشتنەكا باش پەیدابوویە، دیسا ئاریشەیا مووچەی ژی د ڤان ڕوژێن دووماهیێ‌ دا چارەسەر بوویە».
ناڤهاتی گۆتژی: «تێبینی و نەرزایبوونێن پارتی سەبارەت هەلبژاتنان ل بەرچاڤ هاتینە وەرگرتن، لەوما یا گرنگە كار بۆ سەركەفتنەكا مەزن بكەین و مە باوەری ب خەلكێ خوە هەیە، ئەم ئێك تیمین و سەركەفتنا مە باشترین بەرسڤە بۆ ئەوان پێنگاڤێن دژی هەرێمێ دهێنە هاڤێتن».

هەولێر، قائید میرۆ:

رێڤەبەرێ گشتیێ ئاڤێ ل هەرێما كوردستانێ خویا كر، پلان بۆ چارەسەركرنا ئاریشەیا نەبوون و كێمیا ئاڤێ هاتینە بەرهەڤكرن و ژبلی پڕۆژەیێن رۆژانە هەژمارەكا پڕۆژەیێن ستراتیژی دێ هێنە تەمامكرن.
ئاری ئەحمەد، رێڤەبەرێ گشتیێ هەرێما كوردستانێ بۆ رۆژناما ئەڤرۆ گۆت: «مە پلانەك هەیە یا سالانە وئەم ل دەستپێكا وەرزێ هاڤی نێینە ل هەموو پارێزگەه و ئیدارەیێن سەربخوە بەرهەڤی بۆ وەرزێ هاڤینێ دهێنە كرن، هەتا ئاریشەیا كێمئاڤیێ ل ئەڤان دەڤەرێن د وەرزێ هاڤینێ دا ئاریشەیا كێمئاڤیێ هەی بهێتە چارەسەركرن و سالانە چەندین بیرێن ئاڤێ دهێنە لێدان و تۆڕێن ئاڤێ دهێنە سەخبێركرن، بێگومان بودجەیێ تایبەت ژی بۆ ئاریشەیا ئاڤێ هەیە».
ئاری ئەحمەد گۆتژی: «پلانەكا دی هەیە، ئەم دبێژینێ یا دۆمدرێژ ئەو پلان ب رێیا بجهئینانا پڕۆژێن ئاڤێ دهێتە بجهئینان، د دەمێ نوكە دا هەژمارەكا پڕۆژەیان بۆ چارەسەركرنا ئاریشەیا ئاڤێ هەنە، ژ وان ژی: پڕۆژێ ئاڤا بارزان و ئاڤا ئاكرێ و ل سلێمانیێ و راپەڕین ژی دو پڕۆژە هەنە، هەر چەندە ئەڤ سالە ژ بەر هاتنا رێژەیەكا زۆر یا بارانێ رەوشا ئاڤێ دێ باشتربیت، بەلێ هندەك دەڤەر و باژێڕان ئاریشەیا كێمیا ئاڤێ هەر هەیە و حوكمەت بزاڤێن دابینكرنا ئاڤێ دكەت».

كومسیۆنا بلند یا سەربخوە یا هەلبژارتنان ڕاگەهاند، جارەكا دی دەرگەهێ تۆماركرنا بایۆمەتری ل هەرسێ پاریزگەهێن (هەولێر، سلێمانی، دهۆكێ‌)، هاتە ڤەكرن.
ل دووڤ ڕاگەهاندنا كومسیۆنێ ئەو دەنگدەرێن هەتا نوكە كارتا بایۆمەتری وەرنەگرتی، ب تایبەت ژ دایكبوویێن 2006ێ سەرەدانا نێزیكترین بنگەهێ تۆماركرنێ بكەن، داكو داتایێن وان بهێنە نووكرن و كارتا دەنگدانێ بۆ بهێتە دروستكرن.
هەروەسا دیار كر، ئەو دەنگدەرێن شوون تبلێن وان نەهاتینە خواندن، دڤێت سەرەدانا نێزیكترین بنگەهێ ئاكنجیبونێ یێ جهێ خۆ بكەن بۆ نووكرنا شوون تبلێن خۆ.
هەروەسا ئەو كەسێن كارتێن خۆ یێن دەنگدانێ بەرزەكرین، دڤێت سەرەدانا بنگەهێن خۆ بكەن بۆ ب ڕێڤەبرنا مامەلێن بەرزەبوونێ و گەرەنتیكرنا مافێ‌ پشكداریكرنێ د هەلبژارتنان دا.

بێوار حەمدی:

د نۆكە دا سۆشیال میدیا یا بوویە جهێ تڕانەپێكرنێ و بەڵاڤكرنا نهێنیان و یا ژ هەموویان خراپتر ژی تیكتوكە. هێمن سلێمان عەقیدێ مافپەروەر ژی گۆت: تیكتوك پتر بوویە جهێ بەڵاڤكرنا ڤیدیویان و بەڵاڤكرنا نهێنیێن كەسان و تا كۆ دبیتە ئەگەرێ ئەنجامدانا تاوانێن سەردابرنێ و گەفلێكرنێ و ب مخابنی ڤە ژی پتریان وان گەنجن و د ژیەكێ بچووك دانە.

هێمن سلێمان، عەقیدێ مافپەروەرە د دیدارەكێ دا بۆ ڕۆژناما ئەڤرۆ گۆت: جهێ داخێ یە د نوكەدا سوشیال میدیا یا بوویە جهێ تڕانەپێكرنێ و بەڵاڤكرنا نهێنیێن كەسان، هەر ل دەسپێكێ ب ڕێیا فەیسبوكی و پاشان ئینستگرامی و د نوكە دا یا ژ هەمیان خرابتر تیكتوكە و گۆت: (تیكتوك ژ هەمیان پتر جهێ بەڵاڤكرنا ڤیدیویا و نهێنیێن كەسانە و ب مخابنی ڤە ژی پتریا وان كەسێن ڤان كاران دكەن گەنجن و د ژیێن بچووك دانە).
عەقیدێ مافپەروەر زێدەتر گۆت: پتریا كەسێن ڤان كاران دكەن ژ بۆ مەرەما هندێ یە دا كۆ داهاتەكی بدەست خۆبێخن، بەلێ بلا د پشت ڕاست بن، ئەو داهاتە بۆ دەمەكی یە، بەلێ هەتكبەری بۆ هەتا هەتایێ یە و گۆت: (ژ هەردوو رەگەزێن گەنج تاوانان ب سوشیال میدیایێ ئەنجام ددەن، ل دەسپێكێ ڕێژەیا پتر ڕەگەزێ نێر بوون، بەلێ نوكە ڕێژەیا ڕەگەزێ مێ ژی بلندبویە و سزایێ وان ژی د یاسایێ دا وەكی ئێكە، بەلێ ل دەمێ دادگەهێ دادوەرێ تایبەتمەند بریارێ ددەت دبیت هندەك جاران هندەك بارودوخان ل بەرچاڤ وەربگریت).
د بەردەوامیا ئاخفتنا خۆ دا هێمنی دیار كر، پتریا وان تاوانێن بڕێیا سوشیال میدیایێ پەیدادبن (سەردابرنە، گەفلێكرنە، بەڵاڤكرنا وێنە و ڤیدیویانە) و سزایێ وان كەسان ژی ژ 6 هەیڤان دەستپێ دكەت تا كۆ 5 ساڵان یان غەرامەكرن ب ملیونەكێ تا كۆ پێنج ملیونان، بەلێ ئەگەر كەسەك پیشەیا خۆ خراب بكاربینیت د توڕێن جڤاكی دا، بۆ نموونە نوژدار بیت یان ئەفسەر، ل وی دەمی دێ سزایێ وان توندتر بیت.
ل دووماهیێ ژی گۆت: ئەز دبێژمە هەموو وان كەسێن سوشیالێ خراب بكاردئینن و ب تایبەتی گەنجان كۆ دێ ڕۆژەكێ هەر هێتە گرتن، ئەڤجا چ ئەڤرۆ یان سوباهی هەر دێ ئاشكرا بن، ئەڤجا داخوازێ ژ هەمی گەنجان دكەم بلا سوشیال میدیایێ ژ بۆ مەرەمێن باش بكاربینن، چونكی مە نەڤێت گەنجێن خۆ سزابدەین، ژ بەر كۆ ل دەڤ مە ئەو گەلەك د خۆشتڤی نە، بلا خۆ بپارێزن و بلا باش بزانن ئەون پاشەڕۆژا مللەتێ مە.