بڕیارە ئەڤرۆ چار یاریێن مایی ژ چارچووڤەیێ‌ هەڤڕكیێن گەڕا 30ێ‌ یا خولا ستێرێن ئیراقێ‌ فوتبۆلێ‌ بهێنە ئەنجامدان كو دهێتە هژمارتن گەڕا ئاگرین بۆ یانەیێن دهۆك، زاخۆ و هەولێر و شەڕێ‌ پاراستن و پێشڤەچوونا خوە بۆ رێزبەندییا خولێ‌ بكەن.
دهۆك و زەورا دیدارا ئاگرین و تۆلڤەكرنێ‌
سوبەهی چارشەمبی ل دەمژمێر 6:15ێ‌ ئێڤاری پشتەڤانێن یانەیا دهۆك ب ژڤانن دناڤا یاریگەها سەرەكی دا و دیدارا ئاگرین یا تیما فوتبۆلا دهۆكێ‌ بەرانبەر مێڤانا وێ‌ یانەیا زەورا یا بەغدایی كو دهێتە هژمارتن ئێك ژ ب هێزترین هەڤڕكیێن ڤێ‌ گەڕێ‌ د خولێ‌ دا، ئەلهۆیێن چیا د بریندارن پشتی د یارییا بۆری دا بەرانبەر نەجەف تووشی خوسارەتیێ‌ بووین و ترسا ژ دەستدانا رێزبەندیا خوە هەیە ئەوا نوكە ب 44 خالان ژ 11 سەركەفتن و 11 وەكهەڤیان و حەفت خوسارەتیان رێزا شەشێ‌ دهێت، بۆ ڤێ‌ یاریێ‌ راهێنەرێ‌ دهۆكێ‌ ئەحمەد خەلەف و یاریزانێن وی داخوازكرینە ژبۆ ب دەستڤە ئینانا سێ‌ خالێن یاریێ‌ و تۆلڤەكرنا یارییا قۆناغا بۆری ئەوا ب سێ‌ گۆلێن پاقژ ل بەغدا تووشی خوسارەتیێ‌ بووی بەرانبەر زەورا، دبیت ئامارێن دیداران دناڤبەرا هەردو یانەیان د بەرژوەندیا زەورا دابن ئەوێن 12 جاران خوسارەتی گەهاندینە دهۆكێ‌ بەرانبەرنەهـ وەكهەڤییان و دهۆكێ‌ بتنێ‌ سێ‌ سەركەفتن ئیناینە، دیسان زەورا ئەوا نوكە 56 خال هەین ل رێزا سێیێ‌ دهێت دێ‌ هەمی بزاڤان كەت ب سەركەفتن یان ب خالەكێ‌ ژ یاریگەها دهۆكێ‌ ب دەركەڤیت ژبۆ پاراستنا جهێ‌ خوە یان بەردەوامییا هەڤڕكیێ بۆ رێزێن پێشیێ‌.
زاخۆ و هەولێر کلاسیکو یا كوردستانی دانە
ژلایێ‌ خوە ڤە ئەڤرۆ ل دەمژمێر 6:15 ئێڤاری پشتەڤانێن یانەیا زاخۆ ژی ب ژڤانن بۆ دیدارەكا ب هێز ئەوێ‌ دێ‌ تیما وان مێڤاندارییا یانەیا هەولێر كەت كو دهێتە هژمارتن دیدارا دێربیێ‌ كوردستانێ‌، گورێن خابووری ئەوێن ئاست و ئەنجامێن وان دباشن ب سەركێشییا راهێنەرێ‌ قەتەری تەلال ئەلبلۆشی ب49 خالان رێزا چارێ‌ دهێت ژ 12 سەركەفتن، 13 وەكهەڤییان و سێ‌ خوسارەتی هەنە، هەرچەندە د یارییا قۆناغا ئێكێ‌ دا ل هەولێرا پایتەخت یانەیا زاخۆ ب دو گۆلان دووماهی سەركەفتن ئینابوو لێ‌ ئامارێن بەرچاڤ هەنە كو 31 جاران بەرانبەر ئێك بووینە یانەیا هەولێر 15 جاران سەركەفتن ئینایە، بەرانبەر 10 وەكهەڤییان و بتنێ‌ شەش سەركەفتن بوو زاخۆ بووینە، دهێتە پێشبینیكرن سوبەهی جەماوەرێ‌ یانەیا هەولێر ببیتە مێڤانێن زاخۆیان ئەوێن هەردەم شێوازەكێ‌ جوان رێك بۆ مێڤانێن خوە ڤەكرین، یاری بۆ هەردو یانەیان ب سانەهی نابیت و هەردو پێدڤی ب خالێن یاریێ‌ هەنە ژبۆ موكمكرن و پاراستنا جهێن خوە.
شرۆڤەكارێ‌ وەرزشی بۆچوونا خوە دیار كر
ل دۆر یاریێن هەردو یانەیێن پارێزگەهێ‌ وەحید رەشید شرۆڤەكارێ‌ وەرزشی ل پارێزگەها دهۆكێ‌ بۆ رۆژنامەیا ئەڤرۆ گۆت: هەردو یاری ب سانەهی نابن بۆ یانەیێن پارێزگەهێ‌ ژبەركو قۆناغا دویێ‌ یە و یاریێن هەستیارن و هەر تیمەك بزاڤێن دەستڤە ئینانا خالان دكەن، بۆ یارییا دهۆك و زەورا ئەركێ‌ دهۆكێ‌ ب سانەهی نابیت ژبەركو دێ‌ بەرانبەر تیمەكێ‌ بیت یا جەماوەری و ئەڤە 13 یارییە خوسارەتی نەدایە، ئانكو د قۆناغا دویێ‌ دا ئاست و ئەنجامێن وێ‌ گەلەك دباش لەوما دڤێت راهێنەر د هوشداریێ‌ دا بیت، بۆ یارییا ئەڤرۆ ژی دێ‌ بزاڤێ‌ كەت بەردەوامیێ‌ بدەتە ڤێ‌ ڕێكێ‌، ئاریشەیا یانەیا دهۆك هەتا دووماهی یاری ژی راهێنەری چو پلانێن دروست دناڤ یاریگەهێ‌ دا نینن و ئێك ستایل هەیە، هندەك یاریزان هەنە دێ‌ شێن بۆ جوداهیێ‌ پەیداكەن لێ‌ زوو پشت گەرمیێ‌ پێ‌ ناكەت نموونە هێران ئەوێ‌ یارییا بۆری ئەگەرێ‌ ئاست بلندییا تیمێ‌ بوو، یاری دناڤ جەماوەرێ‌ خوە دابیت دڤێت راهێنەری هێز و كێماسیێن یانەیا زەورا خاندبن و مفایی ژ جەماوەری وەربگرن.
ل دۆر یارییا زاخۆ و هەولێر ناڤهاتی گۆت: ل دووڤ رێزبەندیا تیما هەولێرێ‌ و ئەو كاودانێن سەردا هاتین دیارە ژی یا د رەوشەكا نە جیگیر دا و رێزبەندیەكا خراب دایە، لێ‌ پشتی گوهۆڕینا كارگێریێ‌ و هاتنا دەستەكا نوو یا بەروەخت و ئینانا راهێنەرێ‌ خەلكێ‌ باژێرێ‌ هەولێرێ‌ سەمیر بابو، دبیت گوهۆڕین بكەڤیتە ل سەر ئاست و شێوازێ‌ یارییا هەولێرێ‌، لێ‌ تیما زاخۆ كو هەتا نوكە ئێك ژ تیمێن ب هێزە و هەڤڕكە د رێزبەندیێن پێشیێ‌ یێن خولێ‌ دا دێ‌ هەمی بزاڤان كەت دەلیڤەیا سەركەفتنێ‌ ژ دەست نەدەت و نا هێلیت رێزبەندییا خوە ژی یا چارێ‌ ژ دەست بدەت، راهێنەرێ‌ وێ‌ تەلال ئەلبلۆشی هەتا نوكە دگەل تیما خوە یا سەركەفتی یە سەرباری هندەك جاران یاریزان خەلەتیێن نە چاڤەڕێ‌ كری ددەن، لێ‌ یارییا ئەڤرۆ دێ‌ بێتە ئێك ژ یاریێن خوەش وەكو د خولێ‌ دا وەكو یا دهۆك و زەورا و ب هیڤی نە جەماوەر ژی خوەشیێ‌ ژێ‌ بینیت.
ژ یاریێن دی یێن گەڕا 30ێ‌ یێن ئەڤرۆ، جەوییە- كارەبا، مەربەلا- نەقت ئەلمیسان.
رێزبەندیا گۆلكەرێن خولێ‌
هەتا نوكە هێرشبەرێ‌ یانەیا جەوییە ئەیمەن حسێن ب 23 گۆلان سەرێ‌ لیستەیا گۆلكەران دهێت، دووڤدا پیشەكارێ‌ نەفت ئەلمیسان عەلائەدین ئەلدانی ب17 گۆلان رێزا دویێ‌، پیشەكارێ‌ شورتە یێ‌ سوری مەحمود ئەلمواس ب 14 گۆلان رێزا سێیێ‌ دهێت، گۆلكەرێن ئێكێ‌ یێن ل سەر ئاستێ‌ یانەیێن كوردستانی یێ‌ یانەیا نەورۆز و پیشەكارێ‌ نیجیری ئیبراهیم تۆمیوا 12 گۆل تۆماركرینە، یێ‌ یانەیا هەولێر محەمەد قاسم هەشت گۆل تۆماركرینە، ستێرێ‌ بەرازیلی و یانەیا زاخۆ فرانك سیدریك حەفت گۆل هەنە، یێ‌ تونسی و یانەیا دهۆك عیماد ئەللواتی شەش گۆل هەنە.
رێزبەندییا خولێ‌ بەری ب دووماهی هاتنا گەڕا 30ێ‌.
1- شورتە 64 خال.
2- جەویە 63 خال.
3- زەورا 56 خال.
4- زاخۆ 49 خال.
5- نەجەف 49 خال.
6- دهۆك 44 خال.
7- نەورۆز 44 خال.
8- حدود 39 خال.
9- نەفت 39 خال.
10- نەفت میسان 37 خال.
11- تەلەبە 37 خال.
12- ئەلمینا 33 خال.
13- كارەبا 32 خال.
14- كەربەلا 29 خال.
15- هەولێر 28 خال.
16- كەرخ 27 خال.
17- نەفت ئەلبەسرا 26 خال.
18- ئەلقاسم 22 خال.
19- ئەمانەت بەغدا 19 خال.
20- نەفت ئەلوەسەت 12 خال.

عەلی حاجی:

د داخویانیەکێ دا ئەندامەکێ دەستەیا کارگێریا یانا زاخۆ یا وەرزشی بۆ رۆژنامه‌یا ئەڤرۆ دیار کر پرۆتۆكۆلا یانه‌یا مه‌ د گه‌ل یانه‌یا سه‌د یا قه‌ته‌ری كه‌فته‌ د بوارێ بجهئینانێ دا و ئێك ژ رێکەڤتنا یاریزانێن هنگاڤتی دناڤبه‌را هه‌ردو یانه‌یان چارەسەر بکەن.
زێدەتر دلژار عەدنان گۆت: پشتی سەرەدانا شاندەکێ یانه‌یا زاخۆ بۆ وەلاتێ قەتەر و چەندین کۆمبوون و دیدار هاتینە ئەنجامدان،ژ دەرەنجامێن وان کۆمبوونان پرۆتۆكۆله‌ك هاتیه‌ دانان، ئێک ژ وان رێکەڤتنان وان دگەل یانەیا سەد یا قەتەری یە کو هەر یاریزانەکێ ژ دەرڤە بهێتە زاخۆ کو ژبەریا یانەیا زاخۆ گرێبەستێ دگەل دا ئیمزا بکەت دێ ل وەلاتێ قەتەر ئەو یاریزانە کەڤیتە ل بن تاقیکرنێ دا و هەکە ئەو یاریزانە بۆ جهی رەزامەندیا یانەیا سەد دێ ژ نوو گرێبەستێ دگەل دا ئیمزا کەین و هەر دیسان دێ هەتا پشکنینێن پزیشکی ژی بۆ وی یاریزانی ژی ل یانەیا سەد هێنە کرن، هەر دیسان هەر یاریزانەکێ یانەیا مە تووشی هنگاڤتنێ بوو ئەم دشێن رەوانەیی وەلاتێ قەتەر بکەن و ل وێرێ چارەسەریا وی یاریزانی بهێتە کرن و هەر دیسان چەندین لێکتێگەهشتنێن دیتر هەنە دناڤبەرا مە و یانەیا سەد دا.
ناڤبری گۆت ژی: بەرهەڤیێن مە بۆ وەرزێ نوو بەردەوامن و ئەو چاڤدێریا یاریزانان دکەن ژ بۆ دروستکرنا تیمەکا باش بۆ وەرزێ بهێت و یاریزانەکێ ب رەگەز ئیراقی نوکە ل زاخۆیە و ل بن چاڤدێریا راهێنەر تەلال بەلوشی دایە و هەکە د تاقیکرنێ دا ب سەرکەڤت دێ بۆ وەرزێ بهێت گرێبەستێ دگەل دا ئیمزا کەین.

فیدراسیۆنا فوتبۆلا ئۆرۆپا ب فەرمی راگەهان بۆ وەرزێ‌ 2024-2025ێ‌ یێ‌ قارەمانییا یانەیێن ئۆرۆپا قارەمانێن خولا سیستەم و هژمارەیا یانەیێن پشكدار دێ‌ هێتە گوهۆڕین و یانە دێ‌ زێدەبن.
ل دووڤ راگەهاندنا پەیچێ‌ فەرمی یێ‌ فیدراسیۆنا ئۆرۆپا دیار كر 25 یانە ئێكسەر دێ‌ دەربازبنە چامپیۆنز لیگ ل دووڤ هەلوەستێ‌ وان یێ‌ رێزبەندیێن خولێن نافخوە، دگەل قارەمانا چامپیۆنز و قارەمانا یۆرۆ لیگ، هەروەسان سیستەمێ‌ دۆبارە بەلانسكرن كو دهێتە زانین ئەو یانەیا بوویە قارەمانا چامپیۆنز لیگ یان یۆرۆ لیگ و رێزبەندییا وێ‌ یا دناڤ خولا نافخوە دا پێشییێ‌ یە، دێ‌ ئەو یانەیێن دووڤدا یێن خولێ‌ پلێتا دەربازبوونێ‌ وەرگرن.
هەروەسان گوهۆڕینا سیستەمێ‌ چامپیۆنزێ‌ دێ‌ ل دووڤ شێواز خول بیت ئانكو هەر 36 یانە د كۆم دانە، لێ‌ دێ‌ هەلسەنگاندن هەبیت كو هەر یانەك هەشت یارییان ل دووڤ ئاستێ‌ دیاركری كەن، چار یاری د ناڤ یاریگەها خوە دا و چار ژ دەرڤەیی یاریگەهێ‌ بێ‌ كو یانەك یاریێن هاتن و چوونێ‌ دگەل هەمان یانەیا هەڤڕك بكەت.
هەشت یانەیێن ئێكێ‌ دێ‌ ئێكسەر دەربازبنە قۆناغا 16ێ‌، ئەو یانەیێن رێزێن نەهێ‌ هەتا 24ێ‌ دێ‌ ل پاشكۆ شەڕی بۆ هەمان قۆناغ، هەروەسان ئەو یانەیێن دناڤبەرا 25 هەتا 36ێ‌ دێ‌ هەڤڕكیێ‌ كەن و شەش یانە ئێكجاركی دێ‌ هێنە دوورئێخستن ژ چامپیۆنزێ‌.
ئەو یانەیێن بۆ وەرزێ‌ بهێت پشكداریێ‌ د چامپیۆنزێ‌ دا بكەن ل دووڤ رێزبەندییا وان د خولێن نافخوە دا بڤی شێوەی نە.
ئنگلتەرا، مانچستەر ستی، ئارسنال، لیڤەرپۆل و ئاستۆن ڤێلا، ئیسپانیا، ریال مەدرید، بەرشەلۆنا، جیرۆنا و ئەتلەتیكۆ مەدرید، خولا ئەلمانیا، بایرن لیڤەركۆزن، شتۆتگارت، بایرن میۆنخ و لایپزیك، خولا ئیتالیا، ئینتەر میلان، ئەی سی میلان، بۆلۆنیا و یۆڤانتۆس، خولا فرەنسا، پاریس سانجێرمان، مۆناكۆ و بریست، خولا هولەندا، ئایندهۆڤن و ڤینۆرد، خولا پۆرتۆگال، سپۆرتینگ لاشبۆنا، خولا بەلجیكا كلۆپ برۆج، خولا ئیسكوتلەندا سێلتیك، خولا نەمسا شتۆرم گراتس.
هەروەسان ل دووڤ سیستەمێ‌ چامپیۆنزێ‌ هەردو یانەیێن ئاتلەنتا یا ئیتالی و بۆرۆسیا دۆرتمۆند یا ئەلمانی ژبەر رێزبەندی وپلەكرنا وان دێ‌ پشكداربن دگەل ئەوا یانەیێن ل دووڤ سیستەمێ‌ هەلسەنگاندنا نوو ئەو ژی شاختار دونێتسك یا ئوكراینی و بەنفیكا یا پۆرتۆگالی د هەلسەنگاندنا یۆرۆ لیگ دا.

لژنەیا پێرابوونا ل فیدراسیۆنا نێڤدەولەتی یا یاریێن گۆرەپانێ‌ ب فەرمی قارەمانێ‌ جیهانێ‌ بەزۆكێ‌ كینیا رۆدگێرز كۆیمۆی بۆ شەش سالان راوەستاندن ژ پشكداریێن چالاكیێن نافخوە و دەرڤە، پشتی ب كارئینانا مادەیێن هێزا جەستەیی یێن قەدەغەكری.
بەزۆكێ‌ كینی قارەمانێ‌ جیهانێ‌ بۆ بەریكانەیا درێژ یا 10 هزار میتران ئەوێ‌ بەرهەڤی بۆ یاریێن ئۆلمپیادا پاریس 2024ێ‌ دكر د پشكنینێن لژنەیا سەرپەرشت یا ئۆلمپیادا دا دیاربوو كو مادەیێن قەدەغەكری یا هێزا جەستەیی ب كار ئینایە، سەرباری بزاڤێن وەلاتێ‌ كینیا بۆ راستڤەكرنا بابەتێ‌ ب كارئینانا مادەیێن هێزێ‌ لێ‌ فیدراسیۆنا نێڤدەولەتی ب بەلگە دیاركر كو بەزۆكێ‌ كینی سەرپێچییا كری و بۆ شەش سالان ژ هەمی چالاكیێن نافخۆیا وەلاتێ‌ وی و یێن جیهانی دوورئێخست.