سەرۆك مەسعود بارزانی و مەسرور بارزانی ب هەلكەفتا گیان ژ دەستدانا هەژمارەكا قوتابیان د روودانەكا هاتنوچوونێ‌ دا پەیامەكا سەرەخوشیێ‌ بەلاڤ كر و تێدا سەرەخوشی ئاراستەی مالبات و كەسوكارێن وان قوتابییێن قووناغا ئامادەیی كرینە، یێن دوهی 14/5/2024 د روودانەكا هاتنوچوونێ‌ دا ل سەر رێیا كەلار بۆ كفری گیانێ‌ خوە ژ دەست دای.
د پەیاما سەرۆك مەسعود بارزانی دا هاتیە: «سەرەخوشیێن خوە ئاراستەی مالبات و كەسوكارێن قوربانیێن وێ‌ روودانا ب خەم دكەم و خۆ ب هەڤپشكێ‌ خەما هەوە دزانم، داخوازێ‌ ژ خوادایێ‌ مەزن دكەم شیفایەكا ب لەز بۆ برینداران فرێ بكەت گیانێ‌ قوربانیان ژی ل بهەشتا بەرین شاد بكەت».
دیسا د پەیاما مەسرور بارزانی، سەرۆكێ‌ حوكمەتا هەرێما كوردستانێ‌ دا هاتیە: «سەرەخوشیێن خوە ئاراستەی مالبات و كەسوكارێن قوربانیێن روودانێ‌ دكەم و هەڤپشكێ‌ خەما وانم، خوادایێ‌ مەزن گیانێ‌ وان ل بهەشتێ‌ شاد بكەت و داخوازا زوو ساخبوونێ‌ بۆ برینداران دخوازم».

سالار محەمەد دۆسكی:

عەمید حەسن خورشید تاهر، رێڤەبەرێ بەرەڤانیا باژێری ل دهۆكێ بۆ رۆژناما ئەڤرۆ دیار كر كو پشتی روودانا سۆتنا بازاڕێ چەلێ چەندین مەرجێن سلامەتیێ بۆ دوكانێن د ناڤ سەنتەرێ باژێری دا هاتینە دەركرن و دڤێت د ماوێ مەهەكێ‌ دا ئەو رێنوما بهێنە بجهئینان.
عەمید حەسن خورشید گۆت: «پێدڤی یە دوكانێن ب پەرۆكان یان ب پەردەكێ‌ دهێنە نخافتن، د ماوێ مەهەكێ‌ دا بكەنە خەبەنك یان بكەنە جامخانە و ب چ رەنگان نابیت پەرۆك ل دەرڤەی دوكانێ بهێنەدانان، دیسا وایرێن كارەبێ ب رێكوپێكی بهێنەدانان ب شێوەكێ ئەندازیاری، گلوپێن زێدە نابیت نێزیكی پەرۆكان بهێنەدانان، نابیت دیكورێن دوكانان ژ كەرستێن نایلۆنی و فلینان بهێنە دروستكرن، بەلكو پێدڤی یە ژ ئەوان كەرستان بن یێن ئاگر زووكا نە بەربیتێ، پێدڤی یە بانێن هەمی دوكانان ژ بەرمایكێن گلێشی بهیـنە پاقژكرن، ب چ رەنگان نابیت دەبل و قاتع و سركێت ل بن كەرستێن دوكانێ بهێنە بەرزەكرن و باشتر ئەوە ل جهەكێ دیار و ب سلامەت بن، پێدڤی یە زێرەڤانێن شەڤێ بزانن بتلێن ئاگرڤەمراندنێ بكاربینن بۆ هەر روودانەكێ، دەبلێت كارەبێ پێدڤی یە ب شەڤ بهێنە ڤەمراندن، چونكی پتریا روودانان ژ ئەگەرێ‌ شۆرتێن كارەبێ نە، پێدڤی یە هەمی دوكانان بتلێن ئاگرڤەمراندنێ هەبن و ئامیرەیێن هەستیارێن دیكێلێ و ئاگری، نابیت كەلوپەل پەرۆك و كەرەستێن دی ب شەڤێ ل دەرڤەی دوكانێ بمینن، پێدڤی یە هەمی دوكاندار پێگیریێ‌ ب ڤان رێنومایان بكەن».

دهۆك، لەزگین جوقی:

وەزارەتا كۆچ و كۆچبەرێن ئیراقێ‌ رژدیێ‌ ل سەر ڤەگەڕاندنا ئاوارەیان دكەت و خویا كریە كو ڤەگەڕیانا ئاوارەیان ژ كارێن وان یێن پێشیێ یە و هەتا دووماهیا مەها حەفت دڤێت هەمی ئاوارە ڤەگەڕن».
وەزارەتا كۆچ و كۆچبەرێن ئیراقێ راگەهاند، پشتی دەربازبوونا 10 سالان ل سەر ئاوارەبوونێ و دەربازبوونا حەفت سالان ل سەر شكەستنا داعشێ‌، لێ‌ هەتا نوكە پشكەكا مەزن یا ئاوارەیان نەشیاینە ڤەگەڕن.
پیر دەیان جەعفەر، رێڤەبەرێ كۆچ وكۆچبەران و بەرسڤدانا قەیرانان ل پارێزگەها دهۆكێ بۆ ئەڤرۆ گۆت: «هێشتا نێزیكێ 330 هزار كەسێن ئاوارە د ناڤ كەمپان و ژ دەرڤەی كەمپان ل سنوورێ پارێزگەها دهۆكێ دژین».
ناڤهاتی گۆتژی: «ئەم هەموو ئاسانكاریان بۆ وان ئاوارە دكەین یێن حەزا زڤڕینا شنگالێ‌ هەی، دەرگەهێن مە دڤەكرینە و هندی ئاوارە بمینن دێ خزمەتا وان هێتە كرن، ئاوارەیێن د ناڤ كەمپان دا د ئازادن بۆ زڤڕینا شنگالێ‌«.
پیردەیان گۆتژی: «هیشتا 70% خەلكێ د ناڤ كەمپان دا ئاكنجیێن دەڤەرداریا شنگالێ نە».

ئامێدیێ، مەحمود نهێلی:

د دو روودانێن جودا دا ل دەڤەرا ئامێدیێ گەنجەك ژلایێ هەڤالێ وی ڤە ل ناوچەداریا بامەرنێ دهێتە كوشتن، هەروەسا ل ناوچەداریا دێرەلۆكێ ژی تەرمێ كەسەكێ دهێتە دیتن.
ژێدەرەكێ ئەولەهیێ بۆ رۆژناما ئەڤرۆ دیار كر، پشتی بنگەهێ پۆلیسێن دێرەلۆكێ‌ ل سەر دیتنا تەرمەكی د رووبارێ زێی دا هاتیە ئاگەهەداركرن، ئێكسەر تیمێن وان گەهشتنە جهێ روودانێ و گۆت: «پشتی ڤەكۆلینێن دەسپێكی تەرم هاتە رەوانەكرن بۆ نۆشداریا دادا ل دهۆكێ».
دیار ژی كر، ل دووڤ وان ڤەكۆلینێن دەسپێكێ دیار بوویە، ئەو تەرم یێ ئافرەتەكا تەمەن 25 بۆ 30 سالی یە و ل دووڤ راپێچ و جلكێن وێ دیار بوویە، خەلكا دەڤەرێ نینە و چێدبیت ل باكوورێ كوردستانێ یان ژی دەڤەرێن ل ژێر دەسهەلاتا گەریلایێن پەكەكێ هات بیت.
ژ لایەكی دیڤە و ل ناوچەداریا بامەرنێ و ژ ئەجامێ دەستكاریكرنا چەكی، گەنجەكێ 17 سالی بناڤێ (سەعدوللا ئیحسان) ژ لایێ هەڤالەكێ خوەڤە، ب خەلەتی ڤە دهێتە كوشتن و ڤەكۆلین ل سەر وێ روودانێ ژی دەسپێكریە.

هەولێر، قائید میرۆ:

بارانێن ئەڤ سالە كاریگەری ل سەر زێدەبوونا ئاستێ ئاڤێ ل بەنداڤێن هەرێما كوردستانێ هەبوویە و د دەمێ نوكە دا زێدەتری ملیارەك و 600 ملیۆن مەترێن سێجا یێن ئاڤێ زێدەترن ژ سالا بۆری و رێژا عمباركرنا ئاڤێ ب شێوەیەكێ بەرچاڤ ل بەنداڤ و پۆندێن هەرێما كوردستانێ زێدەبوویە.
رەحمان خانی، رێڤەبەرێ گشتیێ بەنداڤان ل هەرێما كوردستانێ بۆ رۆژناما ئەڤرۆ دیار كر، ئەڤ سالە رێژەیەكا زۆرا بارانێ باریە و كاریگەریێن زۆر ل سەر زێدەبوونا ئاڤێ هەبوویە و گۆت: «پتریا بەنداڤان پڕ بووینە و یێن مای ژی هند نەمایە پڕ ببن، د دەمێ نوكە دا ملیارەك و 600 ملیۆن مەترێن سێجا یێن ئاڤێ ژ سالا بۆری زێدەترن، ئەڤە ژی رێژەیەكا زۆرە یا ئاڤا عمباركری».
رەحمان خانی گۆتژی: «رەوشا بەنداڤێن بچووك ژ بەنداڤێن مەزن باشترە، چونكی بەنداڤێن بچووك رێژەیەكا كێم یا ئاڤێ پێدڤیە و هندەك بەنداڤ ژی هەنە وەكی یا دەربەندیخان مە نەهێلایە پڕ ببن و ئاڤ دهێتە بەردان، چونكی ئاڤا دەربەندیخان دچیتە سەر رووبارێ سیروان بۆ چاندنێ دهێتە بكارئینان».

زنار تۆڤی:

ئەندامەكێ پەرلەمانێ ئیراقێ ژ فراكسیۆنا پارتی دیموكراتی كوردستان دیار كر، ل رۆژێن بهێن نڤێسینگەها ماددەیێ 140 یێ‌ دستووری ل شنگالێ دێ هێتە ڤەكرن بۆ قەرەبووكرنا ئەوان خێزانێن ل سەردەمێ رژێما بەعس زیان گەهشتینێ و بۆ جهێن دیتر هاتینە ڤەگوهاستن.
شێروان دوبەردانی بۆ رۆژناما ئەڤرۆ گۆت: «ل ڤان رۆژێن بهێن لژنا بجهئینانا ماددەیێ 140 یێ دەستووری دێ سەرەدانا شنگالێ كەت، ئەو كەسێن ل شنگالێ هەتا مەخمۆرێ هەر ژ سالێن حەفتێیان ژ سەدێ بۆری هەتا سالا 2003 ێ زیان گەهشتیێ و ئەوێن ژ لایێ رژێما بەعسڤە ل سەر جهـ و وارێن وان هاتینە دەرئێخستن، كو پتری 23 هزار كەسانە و كەیسێن وان هەموویان ل شنگالێ نە دێ هێنە قەرەبووكرن‌، خێزانێن كوردان ب گوژمێ 10 ملیۆن دیناران و یێن عەرەبان ژی ب 20 ملیۆن دیناران دێ هێنە قەرەبووكرن».