د داخویانیەکێ دا سکرتێرێ یانه‌یا زاخۆ بۆ رۆژنامه‌یا ئەڤرۆ دیار کر وان تیما دویێ یا ردیف دروست کریە و ئارمانجا وان ژ ڤێ پێنگاڤێ وێ تیمێ بەرهەڤبكه‌ن ژ کورێن زاخۆ بۆ تیما وان یا تەپا پێی د خولا ستێرێن ئیراقێ دا.
زێدەتر هشیار شەهباز گۆت: لدووف بریارا ئێکەتیا تەپا پیێ یا ئیراقێ کو هەر تیمەکا پشکدار بیت د خولا ستێرێن ئیراقێ یا تەپا پێی دا پێدڤیە تیما ردیف ژی دروست بکەت لەوما د ئێکەم پێنگاڤ دا مە راهێنەر بەناڤ ئەحمەد دەست نیشان کریە وەکو راهێنەرێ وێ تیمێ و دەست ب کار بوویە، هەر دیسان ئەو تیمە هەمی ژی کورێن زاخۆنە، ئەنجامێن وێ تیمێ بۆ مەد گرنگ نینن ، لێ یا گرنگ ئەوە بشێن وان یاریزانان بەرهەڤبکەین بۆ تیما مە ئەوا پشکدار د خولا ستێرێن ئیراقێ یا تەپا پێی دا ژبەرکو د پاشەرۆژێ دا دێ مفایی ژ وان یاریزانان وەرگرین، د وەرزێ بهێت دا دێ لدووف پلانا دەستەیا کارگێریێ مینت کو ئایا وان دێ پێدڤی ب شیانێن چەند یاریزانان هەبیت ژبەر کو دێ لدووف داهات و شیانان پلانا خوە دانین کو دێ تیمەکێ بۆ هەڤرکیێ یان ژی بۆ مانا تیمێ د خولێ دا دروست کەین لێ ب شێوەیەکێ گشتی ئەو تیما نوو بۆ مە یا گرنگە.
ناڤبری گۆت ژی: دروستکرنا وێ تیمێ پێنگاڤەکا دروستە ژبەر کو دێ زێدەتر دەلیڤە بۆ یاریزانان پەیدا بیت شیانێن خوە ب شێوەیەکێ باشتە دیار بکەن و دەلیڤەیێن باش د خولا ئیراقێ دا پەیدا ببن.

بەرپرسێن یانەیا بەرشەلۆنا بەرهەڤییا بۆ كۆمبوونەكا تایبەت یا ب دو قۆناغ دگەل راهێنەرێ‌ تیما خوە یا تەپا پێی چاڤی هێرناندێز دكەن ژبۆ دانانا پلان و بەرنامەكێ‌ نوو بۆ وەرزێ‌ بهێت و دهێتە پێشبینیكرن كۆمەكا یاریزانان بهێنە دوورئێخستن و دوور نینە ستێرێ‌ وان یێ‌ پۆلەندی رۆبێرت لیڤاندۆڤێسكی ژی دگەل دا بیت.
ل دووڤ راپۆرتا رۆژنامەیا سپۆرت یا ئسپانی دیاركریە پشتی كارگێریا یانەیا كاتەلۆنی باوەری دایە راهێنەرێ‌ خوە چاڤی بۆ وەرزێ‌ بهێت، ئێكەم پێنگاڤا وان دێ‌ دەست ب دوورئێخستنا چەند یاریزانان و ئینانا هندەكێن دی بیت، كۆمبوونا ئێكێ‌ دێ‌ پشتی ب دووماهی هاتنا وەرزێ‌ ئەڤ سالە بیت و دێ‌ بیتە دەستپێكا شورەشا دوورئێخستنا یاریزانان كو دهێتە پێشبینیكرن هەر ئێك ژ جۆل كۆندی و رۆنالد ئاراخۆ، ژلایەكێ‌ دیڤە دێ‌ دانۆستاندنێ‌ ل سەر درێژكرنا گرێبەستێ‌ یان مانا هەر ئێك ژ یاریزانان سێرجی رۆبێرتۆ، فرینكی دی یۆنگ ل كامپ نو.
د هەمان راپۆرت دا هاتییە چاڤی ژ ئاستێ‌ هێرشبەرێ‌ خوە یێ‌ پۆلەندی رۆبێرت لیڤاندۆڤێسكی رازی نینە لێ‌ نە شێت دەست ژێ‌ بەردەت لێ‌ كارگێریا یانەیێ‌ حەز دكەت دەست ژێ‌ بەردەت ژبەركو مووچەیێ‌ وی یێ‌ سالانە زێدەبوویە و بۆ وەرزێ‌ ئەڤ سالە داخوازا زێدەتر ژی دكەت ئەڤچەندە ژی یانەیا كاتەلۆنی رازی نابیت، دبیت داخواز ژێ‌ بكەت مووچەیێ‌ خوە ڤەگەڕینتە یا سالا ئێكێ‌ كو 20 ملیۆن یۆرۆ بوون ل جهێ‌ یا نوكە 24 ملیۆن یۆرۆیان، كۆمبوونا بهێت دێ‌ گەلەك بابەت هێنە ئێكلا كرن.

د داخویانیەكێ دا پەیڤدارێ یانەیا ئاكرێ یا وەرزشی دیار كر بەرپرسێ‌ مەكتەبا رێكخستنا پارتی دیموكراتی كوردستانی ل پارێزگەها دهۆكێ‌ یانەیا ئاكرێ‌ خەلاتكر پشتی تیما فوتبۆلێ‌ ناسناڤێ خولا نایابا كوردستانێ بۆ وەرزێ‌ 2023- 2024ێ‌ ب دەستڤەئینایی و هەتا نوكە بەردەوام تەخ و چینێن دەڤەرێ سەردانا یانەیێ دكەن ب مەبەستا گەهاندنا پیرۆزباهیان.
زێدەتر سوهەیب عەلی بۆ رۆژنامەیا ئەڤرۆ گۆت: د چارچووڤێ سەردانا خوە دا سەربەست لەزگین ئەندامێ مەكتەبا سیاسی و بەرپرسێ مەكتەبا رێكخستنا پارتی دیموكراتی كوردستان ل پارێزگەها دهۆك و ب هەڤالینا هاریكارێ بەرپرسێ مەكتەبێ و شاندەكێ بەرپرسێن دەڤەرێ سەردانا یانەیا ئاكرێ یا وەرزشی كر ژلایێ ستافێ یانەیێ پێشوازی لێهاتەكرن.
ناڤبری گۆتژی: د سەردانا خوە دا بەرپرسێ مەكتەبا رێكخستنا پارێزگەها دهۆك یا پارتی پیرۆزباهی ل یانەیێ كر بەرامبەر ب دەستڤەئینانا ناسناڤێ خولا نایابا كوردستانێ و بوون ب دووەم ل كۆپا كوردستانێ و هیڤیا سەركەفتنێ بۆیانەیێ خواست و دلخۆشیا خوە ب ئەڤان ئەنجامێن یانەیا ئاكرێ نیشاندا.
ناڤهاتی گۆت: سەربەست لەزگین دیارییەكا ماددی پێشكەشی یانەیێ كر بەرامبەر وان ئەنجامێن ل خولا كوردستانێ و كۆپا كوردستانێ ب دەستڤەئینای و پشتەڤانیا خوە بۆ یانەیێ دیاركر.

ل حەفتییا بۆری دەهـ یاریێن ژ هەڤڕكیێن گەڕا 27ێ‌ یا خولا ستێرێن ئیراقێ‌ یا فوتبۆلێ‌ ب ئەنجامێن جودا هاتبوونە كرن ب گشتی چو گوهۆڕین د ناڤ رێزبەندییا خولێ‌ دا نە هاتە كرن تایبەت رێزبەندیێن هەردو یانەیێن پارێزگەهێ‌ و نوونەرێن بادینان دهۆك و زاخۆ ئەوێن ژ دەرڤەیی یاریگەهێن خوە ب خالەكێ‌ ڤەگەڕیان.
دهۆك بەردەوامە ل سەر وەكهەڤییان
تیما یانەیا دهۆك بۆ یارییا سێیێ‌ ل دووڤ ئێك و یا 11ێ‌ د خولێ‌ دا ئەنجامێ‌ وەكهەڤیێ‌ و ژ دەستدانا خالان یا بەردەوامی، پشتی دگەل خودانێن ئەردی یانەیا كەربەلا ب گۆلەكێ‌ وەكهەڤ بوویی، گۆلا دهۆكێ‌ ژلایێ‌ یاریزانێ‌ وێ‌ هێران ئازاد د خولەكا 24ێ‌ دا تۆماركر، لێ‌ كەربەلا ب گۆلا پیشەكارێ‌ خوە جویێل فلۆرێنت د خولەكا 57ێ‌ دا گۆلا وەكهەڤیێ‌ ئینا، ئەلهۆیێن چیا بەلانسا رێزبەندیێ‌ گەهاندنە 41 خالان ژ 10 سەركەفتن و 11 وەكهەڤییان و رێزا شەشێ‌ پاراست.
د پرێسكۆنفرانس دا عەلی وەهیب هاریكارێ‌ راهێنەرێ‌ دهۆكێ‌ گۆت: خالەكا ژ چنەیێ چێترە بەرانبەر كەربلا سەرباری مە هندەك دەلیڤەیێن گۆلكرنێ‌ ژ دەستدان، گڤاشتنێن یاریان كو هەر چار رۆژا جارەكێ‌ و هەر یاریەكێ‌ گەشتەك ژ دهۆكێ‌ بۆ ئێك ژ دەرڤەرێن ناڤەراست یان باشۆرێ‌ ئیراقێ‌ گڤاشتن ل سەر ئاست و شیانێن یاریزان كرینە بوو ئەگەر مە گەلەك هنگاڤتن پەیدابوون
زاخۆ دو خال ژ دەستدان
پشتی چار سەركەفتنێن ل دووڤ ئێك تیما یانەیا زاخۆ دو خالێن گرنگ ژ دەرڤەیی یاریگەها خوە ژ دەستدان پشتی دگەل یانەیا ئەمانەت بەغدا بێ‌ گۆل وەكهەڤ بوویی، ئەڤ وەكهەڤییە وەنە كرییە كو كوڕێن خابووری رێزبەندییا خوە ژ دەستبدەت ئەوا نوكە ب كۆمكرنا 47 خالان رێزا چارێ‌ دهێت لێ‌ نێزكبووك دگەل رێزبەندیێن كێمتر دا پەداكرییە.
د پرێسكۆنفرانسەكی دا نەبیل عەودا هاریكارێ‌ راهێنەرێ‌ زاخۆ دیار كر یاریزانێن وان ئەو دەلیڤەیێن گۆلكرنێ‌ ژ دەستداین و مفا ژێ‌ نە وەرگرت، تیما ئەمانە یا ل بن مەترسیا داكەفتنێ‌ دا ئەوێ‌ شەڕێ‌ مان و نەمانێ‌ دكر، لێ‌ مە ژی بۆ سێ‌ خالان دكر مخابن گڤاشتنێن ل سەر جەستەیا یاریزانی ژبەر گەشتێن بەردەوام بۆ دەڤەرێن دوور یێن ئیراقێ‌ وەكو باشۆر و ناڤەراست كارتیكرن هەبوو، لێبۆرینێ‌ ژ جەماوەری د خوازین.
هەولێر د مەترسیێ‌ دایە
تیما یانەیا هەولێر بەردەوامە ل سەر ئەنجامێن لاواز و نێزكی مەترسیا داكەفتنێ‌ دا یە، ئەوا یارییا خوە یا ڤێ‌ گەڕێ‌ بێ‌ راهێنەر كر دگەل خودانێن ئەردی یانەیا كەرخ بێ‌ گۆل وەكهەڤبوو، ئەڤ ئەنجامە یا خراب بوو ئەوا ب24 خال كۆمكرین و رێزەكێ‌ پاشڤە چوو یا 17ێ‌، د پرێسكۆنفراس دا ئەحمەد ئەلقدۆر هاریكارێ‌ راهێنەرێ‌ هەولێرێ‌ گۆت: ئەم د دەمەكێ‌ هەستیار دا دەرباز دكەین و تیما مە بێ‌ راهێنەرە، راستە مە گەلەك دەلیڤە بەرانبەر گۆلپارێزێ‌ كەرخێ‌ ژ دەستدان لێ‌ یاریزانان هەمی شیانێن خوە تەرخانكرن و سۆپاسیا وان دكەین بۆ یاریێن بهێت دڤێت قەرەبوو بكەین.
نەورۆز‌ مفادارا ئێكانە بوو
تیما یانەیا نەورۆز مفادارا ئێكانە یا یانەیێن كوردستانی بوو د گەڕا 27ێ‌ دا دا پشتی ب سەركەفتنەكا گرنگ ب دو گۆلان بەرانبەر گۆلەكێ‌ هیڤیێن پێشڤەچوونێ‌ بۆ رێزێن پێشیێ‌ باشتر لێبكەت، سەرباری جهێ‌ خوە پاراست لێ‌ خالێن خوە نێزكتر لێكرن كو گەهاندنە 41 ل رێزا حەفتێ‌.
ژ ئەنجامێن دی یێن ڤێ‌ گەڕێ‌ نەجەف 2-چنە تەلەبە، كارەبا 2-2 شورتە، نەفت ئەلبەسرا 1- چنە نەفت ئەلوەسەت، حدود چنە- 3 جەویە، مینا چنە- چنە نەفت، زەورا 3-1 نەفت میسان.
هەلوەستێ‌ گشتی بڤی شێوەیە.
1- جەوییە 59 خال.
2- شورتە 58 خال.
3- زەورا 52 خال.
4- زاخۆ 47 خال.
5- نەجەف 46 خال.
6- دهۆك 41 خال.
7- نەورۆز 41 خال.
8- نەفت 38 خال.
9- حدود 37 خال.
10- نەفت میسان 36 خال.
11- تەلەبە 34 خال.
12- ئەلمینا 31 خال.
13- كارەبا 29 خال.
14- كەربەلا 26 خال.
15- كەرخ 25 خال.
16- نەفت ئەلبەسرا 25 خال.
17- هەولێر 24 خال.
18- ئەلقاسم 18 خال.
19- ئەمانەت بەغدا 18 خال.
20- نەفت ئەلوەسەت 12 خال. بۆ زانین ئەڤرۆ و سوبەهی دێ‌ دەست ب هەڤڕكیێن گەڕا 28ێ‌ یا خولا ستێرێن ئیراقێ‌ هێتە كرن، ژ یاریێن ئەڤرۆ، نەفت- هەولێر، نەفت ئەلوەسەت- كارەبا، ئەلقاسم- مینا، سوبەهی هەردو یانەیێن دهۆك و زاخۆ د ناڤ ئەرد و جەماوەرێ‌ خوە دا دێ‌ مێڤاندارییا یانەیێن نەورۆز و كەرخ كەن.

هاریكارێ‌ راهێنەرێ‌ تیما یانەیا هەولێر عەبدولقادر حسێن ئەوێ ب شێوەكێ‌ بەروەخت بوویە راهێنەر پشتی دوورئێخستنا راهێنەرێ‌ تیمێ‌، بەحس ل سەر كاودانێن یانەیێ‌ دكەت كو د نەخۆشترین دەم دا دەرباز دكەت كو بوویە ئەگەر ئاست و ئەنجامێن تیما تەپا پێی د خولا ستێرێن ئیراقێ‌ د خراب بن و گەڤێن داكەفتنێ‌ ل سەر بمینن.
ناڤهاتی بۆ دەزگەهێن راگەهاندنێ‌ گۆت: تیما مە د مەترسیا داكەفتنێ‌ دایە د خولا ئیراقێ‌ دا، ژبەر ئەوا ئاریشەیێ‌ كەڤتیێ‌ ژ وانا یێن دارایی نە د نەخۆشترین كاودان دا دەرباز دكەت ژبەر نە پووتەدانێ‌، هندەك یانەیێن هەرێمێ‌ هەنە باشترین شێوە كارێن خوە برێڤە دبەن و كاودانێن دارایی گەلەك دباش نلێ‌ یانەیا هەولێر یا گەهشتیە قۆناغا دەستڤالا ژ پارەیی و شیان نینن مووچەیێ‌ یاریزانێن خوە بەرهەڤبكەت، هەتا گەهشتییە وێ‌ رادەیی نەشێت یاریزانێن خوە رازیبكەت بۆ راهێنانان.
هەروەسان هاریكارێ‌ راهێنەری گۆت: بەرپرسێن حكومی ل هەولێرێ‌ چو پشتەڤانییا دارایی ل یانێ‌ ناكەت و دبێژن ئەوا چار ملیار دینار یێن مەزاختین، د نوكە دا كارگێرییا یانەیێ‌ نە مایە و گەلەك ئاریشە هەنە و هەكە بڤی شێوەیی بمینت دێ‌ تیما مە داكەڤیت، هیڤییا مە ئەوە زووترین دەم هەوارا یانێ‌ بهێن بۆ چارەسەركرنا ئاریشەیان.