هەولێر، قائید میرۆ:

بەرپرسەكا وەزارەتا ناڤخوە یا حوكمەتا هەرێما كوردستانێ دیار كر، دەركرنا بڕیارا ڤەگەڕاندنا ئاوارەیان ژ لایێ حوكمەتا ئیراقێ ڤە مەرەمێن دی هەنە و دبێژیت: نەتەوێن ئێكگرتی و حوكمەتا هەرێما كوردستانێ ب شێوەیەكێ فەرمی حوكمەتا فیدڕال ل دۆر كاریگەریێن بڕیارا ڤەگەڕاندنا ئاوارەیان ئاگەهداركریە.
سروە رەسول، رێڤەبەرا گشتیا بەرسیڤدانا قەیرانان ل هەرێما كوردستانێ بۆ رۆژناما ئەڤرۆ دیار كر، حوكمەتا ئیراقێ بڕیار دایە ئاوارە بهێنە ڤەگەڕاندن و گۆت: «ئەم وەسا دبینین دەركرنا بڕیارا ڤەگەڕاندنا ئاوارەیان مەرەمێن دی ل پشت هەنە، چونكی حوكمە تاهەرێما كوردستانێ ل گەل نەتەوێن ئێكگرتی مژوولی بەرهەڤكرنا پلانەكێ یە ژ بۆی ڤەگەڕاندنا ئاوارەیێن ئیراقێ ئەڤێن ل هەرێما كوردستانێ ئاكنجی، بەلێ حوكمەتا ئیراقێ بێی وەرگرتنا بۆچوونا حوكمەتا هەرێمێ و ئاوارەیان بڕیارا ڤەگەڕاندنێ دەركریە».
سروە رەسول گۆتژی: «حوكمەتا هەرێما كوردستانێ ب رێیا حوكمەتا فیدڕال سودانی ل سەر كاریگەریێن بڕیارا ڤەگەڕاندنا ئاوارەیان ئاگەهداركریە و نەتەوێن ئێكگرتی ژی ب شێوەیەكێ فەرمی حوكمەتا ئیراقێ ئاگەهداركریە، چونكی پێدڤیە ڤەگەڕاندنا ئاوارەیان ب پلان بیت و نابیت ئێكلایەنە بڕیار ل سەر ڤەگەڕاندنا ئاوارەیان بهێتەدان، نوكە ئەم چاڤەڕێی بەرسڤا حوكمەتا فیدڕالینە ل دۆر بڕیارا ڤەگەڕاندنا ئاوارەیان».

وەزارەتا ساخلەمیا حوكمەتا هەرێما كوردستانێ د نڤیسارەكێ دا داخوازێ ژ وەزارەتا ناڤخوە دكەت، ئەوان پەیجێن ل سۆشیال میدیایێ ڕیكلامێ بۆ گیادەرمانان، ماددەیێن جوانكاریا رۆخسار و پیستی و وەریانا پرچێ ل گەل ب هێزكرنا هەستێن جنسی دكەن، بهێنە دائێخستن، چونكی ئەڤە بەروڤاژی ڕێنمایێن وەزارەتا ساخلەمیێ نە.
وەزارەتا ساخلەمیا ئاشكرا ژی كریە، ئەو پەیجە دوورن ژ پرەنسیپێن دەرمانسازی و نۆشداری و زیانێ دگەهیننە لایەنێن ساخلەمییا مرۆڤی و هندەك كەس ب ناڤێ نۆشدار و دەرمانسازان بازرگانیێ دكەن.
وەزارەتا ساخلەمیێ خویا كریە كو پێدڤیە ڕێكارێن یاسایی بگرنەبەر ل دژی ئەو كەسێن ئەوی كاری دكەن.

زنار تۆڤی:

بریكارێ وەزارەتا چاندنێ و ژێدەرێن ئاڤێ ل حوكمەتا هەرێما كوردستانێ دیار كر، سێ سایلۆیێن نوو د دەمێ كابینا نەهێ دا هاتینە دروستكرن، نوكە د ئامادەنە بۆ وەرگرتنا گەنمێ جۆتیاران و هەر سایلۆیەك دشێت 40 هزار تەنێن گەنمی وەربگریت، كو سەرجەمێ وان هەرسێیان دبیتە 120 هزار تەنێن گەنمی، هەروەسا ل دووماهییا ڤێ مەهێ‌ بڕیار ل دۆر وەرگرتنا گەنمێ جۆتیاران دێ هێتەدان.
كەریم سلێمان، بریكارێ وەزارەتا چاندنێ و ژێدەرێن ئاڤێ بۆ رۆژناما ئەڤرۆ گۆت: «ل هەرێما كوردستانێ نەه سایلۆ هەنە، ئەوان سایلۆیان شیانێن وەرگرتنا 566 هزار تەنێن گەنمی هەنە، ژ بلی وان هەر نەه سایلۆیان، كابینەیا نەهێ یا حوكمەتا هەرێمێ سێ سایلۆیێن نوو یێن دیتر دروستكرینە، ئەڤ سالە ئەو سایلۆیە ژی دئامادەنە گەنمی وەربگرن و هەر ئێك ژ وان سایلۆیێن نوو شیانێن وەرگرتنا 40 هزار تەنێن گەنمی هەنە».

هەولێر، قائید میرۆ:

وەزارەتا خواندنا بلند و ڤەكۆلینێن زانستی ئاشكرا كر، دوهی رۆژا ئێكشەمبی كۆمبوونەك ل دۆر دامەزراندنا ئێكەمێن هەرێما كوردستانێ و مامۆستایێن وانەبێژ ییێن زانكۆ و پەیمانگەهان هاتە ئەنجامدان و ناڤێ هەموو دەرچوویێن ئێكێ بۆ دامەزراندنێ هاتینە بەرهەڤكرن.
وەزارەتا خواندنا بلند وێنەیەكێ ئەنجامێن كۆمبوونێ بۆ رۆژناما ئەڤرۆ هنارتیە و تێدا هاتیە: «دوهی رۆژا ئێكشەمبی ل سەر راسپاردەیا وەزیرێ خواندنا بلند كۆمبوونەك ل دۆر بابەتێ دامەزراندنا ئێكەمێن زانكۆ و پەیمانگەهان و مامۆستایێن وانەبێژ ل زانكۆ و پەیمانگەهان هاتە كرن، د كۆمبوونێ دا دووپاتی ل سەر فەرمانا سەرۆكێ حوكمەتا هەرێما كوردستانێ بۆ دامەزراندنا ئێكەمێن زانكۆ و پەیمانگەهان هاتە كرن، د دەمێ پێنج رۆژان دا ناڤێن سێ ئێكەمێن زانكۆ و پەیمانگەهان هاتینە بەرهەڤكرن».
وەزارەتا خواندنا بلند ئاماژەكریە: «ل چەند رۆژێن بۆری لیستا ناڤێن هزار و 982 مامۆستایێن زانكۆیێ بۆ بەغدا هاتیە هنارتن ب مەرەما دامەزراندنێ و بەغدا رازیبوون ل سەر دامەزراندنا 226 كەسان دەركریە، كو یێن دەڤەرێن كوردستانی نە، بەریا نوكە ژی دەرچوویێن سێ ئێكەمێن زانكۆیێن نۆشداری هاتینە دامەزراندن ژ لایێ حوكمەتا هەرێما كوردستانێ ڤە، وەزارەت دێ هەموو بزاڤەكێ بۆ دامەزراندنا دەرچوویێن سالا 2018 هەتا ئەڤ سالە ب رێیا حوكمەتا ئیراقێ كەت، چونكی دامەزراندنا ئێكەمێن زانكۆ و پەیمانگەهان ئەركێ حوكمەتا فیدڕالە».

زاخۆ، دلۆڤان هالۆ:

ل ئیدارەیا سەربخوە یا زاخۆ، كەسەكی ب گوللـەیان خووشكا خوە كۆشت و پۆلیسان تۆمەتبار دەستەسەركریە و پێڕابوون بۆ تاوانلێكریێ ژی هاتینە كرن.
ئەحمەد حسێن، بەرپڕسێ ڕاگەهاندنا ڕێڤەبەریا پۆلیسێن زاخۆ بۆ ڕۆژناما ئەڤرۆ دیار كر كو ئەڤرۆ 12/5/2024 ل ئیدارەیا سەربخوە یا زاخۆ و ل دەمژمێر ١٠ی سپێدێ ل ناوچەیا دەركارێ تۆمەتبارێ بناڤێ (ب. م. ع) ب دەسترێژیا گوللـەیان و ب چەكێ كلاشینكۆفێ‌ خووشكا خوە یا بناڤێ (ك. م. ع) كۆشت و ئێكسەر ئەفسەر و كارمەندێن بنگەهێ پۆلیسێن دەركارێ ل جهێ ڕوودانێ ئامادەبوون و ئێكسەر تۆمەتبار دەستەسەركرن و دەست ب سەر وی چەكی ژی دا هاتە گرتن یێ تاوان پێ كری.
بەرپڕسێ ڕاگەهاندنا ڕێڤەبەریا پۆلیسێن زاخۆ، ئاماژە ب وێ چەندێ ژی كر كو لاشێ تاوانلێكریێ بۆ نۆشدارییا داد ل زاخۆ هاتە ڕەوانەكرن و یا پێدڤی ژ ڕوویێ ڤەكۆلینێ ڤە ژ ئالیێ بنگەهێ ناڤبری ڤە ل جهێ ڕوودانێ هاتە كرن و گۆت: «ب بڕیارا دادوەری پەرێن ڤەكۆلینێ بۆ ڤێ ڕوودانێ ل دووڤ بەندێ ٤٠٥ ژ یاسا سزایان ژ ئالیێ بنگەهێ پۆلیسێن نەخوەشخانێ ڤە هاتینە ڤەكرن و ڤەكۆلینێ دەستپێكریە».

دووڤچوون:

ل وەزارەتا خواندنا بلند نڤیسارەك بۆ زانكۆیێن حكوومی هاتە كرن، بۆ هنارتنا ناڤێن دەرچوویێن ئێكەم یێن زانكۆیان و بەرپرسەكێ وەزارەتێ دبێژیت:» 10 هزار ئێكەمێن زانكویان هەنە و زانیاریێن وان و ناڤێن وان بۆ بەغدا دێ هێنە هنارتن.»

د نڤیسارەكێدا، كۆ ل 8ێ5ێ 2024، ل وەزارەتا بلند و ڤەكۆلینێن زانستی یا هەرێما كوردستانێ دەرچوویە و كۆپییەك دەست(باسنیوز) كەفتیە، داخواز ژ هەمی زانكۆیێن حكوومی هاتیە كرن، كۆ ناڤ و زنیاریێن سێ ئێكەمین ئێكێ یێن سالا 2017 بۆ 2018 هەتا سالێن 2022 بۆ 2023، پنێرن.
ل دووڤ نڤیسارێ، دڤێت د ڤێ حەفتیێدا ناڤ بۆ وەزارەتێ بهێنە هنارتن. داخواز هاتیە كرن ناڤێن چوارقوڵی یێن ئێكێ، دگەل ناڤێن زانكۆ و كۆلێژ و پشك و جۆرێن باوەرنامێ و ساڵا دەرچوونێ و كوژمێ مووچەی و ناڤ و نیشانێن وان بهنێرن.
د. توانا نەجەف، رێڤەبەرێ گشتیێ دیوانا وەزارەتا خواندنا بلند و ڤەكۆلینێن زانستی راگەهاند:» هەتا بزانین ناڤێن ئێكێ یێن زانكۆیان چەندن، و چەند پارە بۆ دامەزراندنا وان پێتڤیە و ناڤێن وان بۆ بەغدا پنێرن.»
ئاماژە ب وێ ژی دا:» هژمارا وان زێدەترە ژ 10 هزار كەسان و پێكۆلان دكەین بهێنە دامەزراندن.»
توانا نەجەف ئاشكراكر، سوبەهی رۆژا ئێكشەمبی 12ێ ئایارێ، كۆمبوونەك ل وەزارەتا خواندنا بلند ب پشكداریا رێڤەبەرێ تۆمارا گشتی یا زانكۆیێن حكوومی دێ برێڤەچیت. هەتا نوكە سێ ئێكەمێن ئێكێ یێن زانكۆیێن حكوومی چەند سالە ژلایێ هەرێما كوردستانێ هاتنە دامەزراندن.