كۆمپانیا (HKN)، كو د بیاڤێ‌ پترۆلێ‌ دا ل هەرێمێ‌ كار دكەت، ل دووڤ راسپاردێن سەرۆك مەسعود بارزانی دوهی 25/3/2024 و وەكو هەڤخەمی ل گەل زیاندارێن لەهیێن باژێرێ دهۆكێ 18 ترێلێن كەلوپەلێن كارەبایی و ناڤمالێ‌ بۆ زیاندارێن لەهیێن دهۆكێ‌ رادەستی د. عەلی تەتەر، پارێزگارێ دهۆكێ كرن.
پارێزگارێ دهۆكێ بناڤێ خوە و خەلكێ پارێزگەها دهۆكێ و سەرۆك مەسعود بارزانی و سەرۆكێ حوكمەتا هەرێما كوردستانێ سوپاسیا كۆمپانیا (HKN) كر ل دۆر ئەو هاریكاریێن بۆ زیاندارێن لەهیێن دهۆكێ پێشكێشكرین و گۆت: «بەری نوكە ژی كۆمپانیا (HKN) و د دەمێ تەنگاڤیان دا گەلەك جاران هاریكاریێن مرۆڤایەتی پێشكێشی خەلكێ پارێزگەهێ كرینە و خواست ئەڤ هاریكاریە د بەردەوام بن».
هەژی گۆتنێ یە ئەڤ هاریكاریە پێك هاتینە ژ (384 تەباخ و 572 سەلاجە و 554 بەفرگر)ان ل گەل هزار دەستێن نڤینان، كو ژ بەتەنی و دوشەك و بالیفك و كەلوپەلێن دی پێك دهاتن.

سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی دیموكراتی كوردستان ل پارێزگەها دهـۆكێ ل رۆژا 24/3/2024 ل بارەگایێ مەكتەبا رێكخستنێ پێشوازی ل شاندەكێ مامۆستایێن ئایینێ پیرۆزێ ئیسلامێ یێن دهۆكێ‌ كر.
د هـەڤدیتنەكێ دا شاندێ مامۆستایێن ئایینی سوپاس و پێزانین خوە ب رێیا بەرپرسێ مەكتەبێ ئاراستەیی سەرۆك ”مەسعود بارزانی” كرن بۆ هاریكاری و پشتەڤانیا وی یا بەردەوام بۆ خەلكێ زیانڤێكەفتیێن لەهـیان ل دهـۆكێ و دلسۆزی و رۆلێ جەنابێ سەرۆكی بلند هەلسەنگاند و ئاماژە ب وێ چەندێ ژی كرن، كو هەر جەنابێ سەرۆك بارزانی یە ل كاودانێن دژوار دا خوە ل ڤی میللەتی دكەتە خودان.
هەروەسا ژ لایەكێ دیڤە و د پشكەكا دی یا هەڤدیتنێ دا مامۆستایێن ئایینی سوپاسیا مەكتەبا رێكخستنا پارتی ژی كر، كو وەكو ئەركەكێ ئایینی و نیشتمانی و مرۆڤایەتی هەردەم ل سەر هێل بوویە و ئەوا د شیان دا هەبیت بۆ زیانڤێكەفتیێن لەهیێ ئەنجام دایە.

د. عەلی تەتەر، پارێزگارێ دهۆكێ دوهی 25/3/2024 سەرپەرشتیا كۆمبوونا لژنا بلندا قەرەبووكرنا زیاندارێن لەهیان كر و بڕیار هاتەدان هەر ژ ئەڤرۆ 26/3/2024 دەست ب قەرەبووكرنا زیاندارێن مایی بهێتە كرن.
د. عەلی تەتەر، پارێزگارێ دهۆكێ دوهی 25/3/2024 ل دیوانا دەڤەرداریا دهۆكێ سەرپەرشتیا كۆمبوونا لژنا بلندا قەرەبووكرنا زیاندارێن لەهیان كر و تێدا بڕیار هاتەدان ئەڤرۆ دەست ب قەرەبووكرنا زیاندارێن مایی بهێتە كرن و ب سەر پێنج لژنان دا بەلاڤبووینە و لژنا شەشێ بۆ دووبارە پێداچوون د ماستەرپلانا هشكەڕۆی دا هاتیە پێكئینان و ب زووترین دەم و ب هووركاری كارێ خوە ب دووماهی بینن.
دیسا هە دوهی د. عەلی تەتەر، پارێزگارێ دهۆكێ و د بەردەوامیا هەوا پاقژكرنا جه و تاخێن د ناڤا باژێرێ دهۆكێ دا پشكداری د هەوا پاقژكرنا مزگەفتا تاخێ ماسیكێ دا كر، هەروەسا سەرەدانا كەنیسا چادرا ستایشكرنێ دا پشتی تووشی زەرەر و زیانێن لەهیان بووین.