جەماوەرێ وەرزشی ل پرانییا وەلاتێن جیهانی چاڤەڕێ یاریێن ئەڤ شەڤە یێن چامپیۆنز لیگن ئەوێن دهێتە پێشبینیكرن هندەك ئاگرین بن و تۆلڤەكرنێ بن ئەوا دێ هەشت یاری ژ چار كۆمێن جودا یێن گەڕا دویێ یا قۆناغا كۆمان ژ چارچووڤێ هەڤڕكیێن قارەمانییا یانەیێن ئۆرۆپا قارەمانێن خولا هێنە كرن.
كۆما پێنجێ:
د یارییا ئێكێ یا ڤێ كۆمێ دا یانەیا ئەتلەتیكۆ مەدرید یا ئسپانی ل یاریگەها خوە سیڤیتاس مێترۆ بۆلیتانۆ دێ مێڤاندارییا یانەیا فینۆرد رۆتردام یا هۆلەندی كەت ئەوا دێ ل دەمژمێر 7:45 شەڤ هێتە كرن، د یارییا گەڕا ئێكێ دا فینۆردێ شیابوو سەركەفتنەكا گرنگ ل سەر سێلتیك یا ئسكۆتلەندی بینت، بەرانبەر دا ئەتلەتیكۆ ب گۆلەكێ دگەل لاتسیۆ وەكهەڤبوو، خودانێن ئەردی دێ بزاڤێن سەركەفتنا ئێكێ د قۆناغا كۆمان دا كەن ڤەگەڕیان بۆ هەڤڕكیێن چامپیۆنزێ، لێ بەرانبەردا تیما هۆلەندی ب سانەهی نابیت ئەوا كۆمەكا یاریزانێن خودان شیان دناڤ دا هەنە، د یارییا دویێ دا یانەیا لاتسیۆ یا ئیتالی دێ بینە مێڤانا یانەیا سێلتیك یا ئیسكۆتلەندی ئەوا دێ ل دەمژمێر 10 شەڤ ل یاریگەها سێلتیك هێتە كرن، یانەیا ئیتالی د رەوشەكا خراب دایە ل خولا كالیچویی ئەوا ژ حەفت یاریان بتنێ حەفت خال كۆمكرینە رێزا 16ێ دهێت، بەرۆڤاژی سێلتیك ئەوا سەرێ لیستا خولا وەلاتێ خوە دهێت ب زاخەكا بلند دێ هێتە دناڤ یاریێ دا.
كۆما شەشێ:
د ڤێ كۆمێ دا یانەیا پاریس سانجێرمان یا فرەنسی ئەوا خەونێن ناسناڤی دبینیت دێ بیتە مێڤانا یانەیا نیۆكاسل یا ئنگلتەرایێ د یارییەكا دهێتە چاڤەڕێ كرن یا هەڤڕكی و كۆپیتكا كۆما شەشێ یە ئەوا یاریگەها سانت جێمس هێتە ئەنجامدان، هەرچەندە یانەیا ئنگلتەرایێ دیارییا ئێكێ دا ل یاریگەها میلان شیا خالەكا گرنگ بینت لێ بەرامبەر پاریس سانجێرمان ئەوا ب ئارمانج و هیڤیێن مەزن بۆ چامپیۆنزێ دێ ب سەركێشییا ستێرێ خوە كێلیان مباپی بزاڤێن سەركەفتنا دویێ كەت و خوە ژ ئاستەنگا نیۆكاسل دەربازكەت، یارییا دویێ یا ڤێ كۆمێ دهێتە هژمارتن ئێك ژ یاریێن ئاگرین یێن ئەڤرۆ چاڤەڕێ بهێتە ئەنجامدان ئەوا دێ یانەیا بۆرۆسیا دۆرتمۆد یا ئەلمانی مێڤاندارییا میلان یا ئیتالی كەت، هەردو تیم حەفت جاران بەرانبەر ئێك سێ سەركەفتن بۆ هەر تیمەكێ بەرانبەر وەكهەڤییەكێ، راهێنەرێ میلان بیۆلی دێ گوهۆڕینێ د پلانا هێرشبرنێ دا كەت ب دانا سێ گۆشەیا دربێ بۆلیسستشل، لیاوو و جیرۆ پێخەمەت سێ خالان و ڤەگەڕیانا هیڤیێن بەردەوامیێ بۆ هەڤڕكییا خولێ، لێ دۆرتمۆند ئەو تیما ب سانی نابیت بۆ ژ دەستدانا خالان تایبەت دناڤ ئەرد و جەماوەرێ خوەدایە، بۆ زانین هەردو یاری دێ ل دەمژمێر 10ـی شەڤ هێنە ئەنجامدان
كۆما حەفتێ:
یانەیا مانچستەر ستی یا ئنگلتەرایێ ب ژڤانە بۆ تۆماركرنا سێ خالێن دی ل سەر رێزبەندیا كۆما خوە و پاراستنا سەرێ لیستێ دەمێ ل یاریگەها رێدبۆل ئارینا ببیتە مێڤانا یانەیا لایبزیك یا ئەلمانی ئێك ژ یاریێن ئاگرین یێن ئەڤرۆ، یانەیا ئەلمانی تووشی خوسارەتیێن مەزن بوویە بەرانبەر مان ستی و دووماهی جاران ل وەرزێ بۆری یا چامپیۆنزێ یانەیا ئنگلتەرایێ ب حەفت گۆلان تۆرا یا ئەلمانی هەژاند بوو ژوانا پێنچ گۆل -میگا هاتریك- یێن ستیرێ وێ یێ نەرویجی ئیرلینگ هالاندی تۆماركربوون و بوویە گرێیا یانەیا ئەلمانی ئەوێ دگەل دۆرتمۆندێ ژی شیابوو ژ چار یارییان شەش گۆلان تۆماربكەت و پێنچ گۆلێن مان ستی ئانكۆ د شەش یارییان دا 11 گۆل تۆماركرینە، ماركۆ رۆز راهێنەرێ لایبزیك دیاركرییە ئەوی رێكەكا هەیی سەرەدەریێ دگەل هالاندی بكەت و ب چاڤێ ترسێ ژی سەحدكەتە یاریێ و بهیڤینە گڕێیا وی ڤەكەن، یارییا دویێ یا ڤێ كۆمێ دناڤبەرا خودانێن ئەردی سرڤینیا زڤیردا یا سربی و مێڤانا وێ یۆنگ بۆیز یا سویسری، هەردو یانە د گەڕا ئێكێ دا تووشی خوسارەتیێ بووینە دێ بزاڤێ كەن ئەڤرۆ بۆ دەستڤە ئینانا سێ خالێن یاریێ و گەشكرنا هیڤییان، یاریێن ڤێ كۆمێ دەمژمێر 10ـی شەڤ هێنە كرن.
كۆما هەشتێ:
ئێك ژ یاریێن دی یێن بهێز و هەڤڕكی جەماوەرێ وەرزشی چاڤەڕێ ل یاریگەها دارجاو دەمێ یانەیا پۆرتۆ یا پۆرتۆگالی مێڤاندارییا هەڤڕكا خوە یا دیرۆكی بەرشەلۆنا یا ئسپانی دكەت، هەردو یانە دێ شەڕی بۆ سەرێ لیستا كۆما خوە و بزاڤێن سەركەفتنا دویێ كەن، پۆرتۆ خودانا دو ناسناڤێن چامپیۆنزێ یە و هەڤڕكەكا سەرسەخت یا بەرشەلۆنایە ئەوا پێنچ ناسناڤ هەین و ئەڤ سالە دا بەربژارا بهێزە بۆ ناسناڤێ شەشێ، دیدارێن پێشتر یێن هەردو یانەیان بەرشەلۆنا شیایە شەش سەركەفتنان بەرانبەر چار سەركەفتن بۆ پۆرتۆ هاتینە تۆماركرن، دەنگۆباسێن رۆژنامەڤانی دیاركرییە ژبەر هنگاڤتنێ هەر ئێك ژ راڤینیا، پێدرێ و فرینكی دی یۆنگ پشكداریێ دگەل تیما بەرشەلۆنا دا نابن لێ پشتگەرمییا چاڤی هێرناندێز راهێنەرێ كاتەلۆنی ب رۆبێرت لیڤاندۆڤێسكی، جواو فێلێكس و ئیلكایی جۆندۆجان گەشبینە ب دەستڤەئینانا سێ خالان، یارییا دویێ دڤێ كۆمێ دا ئەوا دێ ل دەمژمێر 7:45 شەڤە دناڤبەرا رۆیال ئانتویریب یا بەلجیكی و مێڤانا وێ شاختار دۆنێتسك یا ئوكراینی، هەردو تیم پێدڤی ب سەركەفتنێ هەیە بۆ ڤەگەڕاندنا هیڤییان ئەوێن دیارییا ئێكێ دا تووشی خوسارەتیێ بووین.
بەرشەلۆنە، میلان و مان ستی ب چاڤێن ترسێ دێ بەرانبەری هەڤڕكێن خوە بن
نيشاندان