هەرهین محەمەد:

ل رۆژا 25/9/2023 پرۆژێ‌ گەشانەوە ژلایێ‌ مەسرور بارزانی سەرۆكێ‌ حوكمەتا هەرێما كوردستانێ‌ ڤە هاتبوو راگەهاند و مەرەم ژ ڤی پرۆژەی ژی ئەوە رێژەیا بێكاریێ‌ بهێتە كێمكرن و ئەڤ پرۆژە ژی نە ب تنێ‌ ژ گەنجان دگریت، بەلكو هەتا ژیێ‌ 60 سالی ژی دشێت وەرگریت، ئانكو خودان پرۆژە پرۆژێ‌ خوە بەرفرەهتر لێ‌ بكەت.

گوهدار عەبدوللا رێڤەبەرێ‌ قەرزێن بچووك بۆ لاوان گۆت: پرۆژێ‌ گەشانەوە دەستپێشخەری و پالپشتیی و حوكمەتا هەرێما كوردستانێ‌ و هەماهەنگی ل گەل رێكخراوا كارسازی و بەنكا جیهان بۆ پەرەپێدان ب پرۆژان و ئەو كەسێ‌ ڤی پرۆژەی پێشكێشبكەت دڤێت وی پرۆژە هەبیت و ژ خودان كاران دگریت، ئانكو سالەك ب سەر وی كاری دا دەرباز بیت و ژ نوو دشێت ڤی پرۆژەی پێشكێشبكەت.
ل دور مەرجێن پێشكێشكرنێ‌ ژی گوهدار دبێژیت: مەرجێن پێشكێشكرنێ‌ ژ ژیێ‌ 21 سال هەتا 60 سال بیت و فەرمانبەر نەبیت و پرۆژە ناڤخویی بیت و ئاكنجیێ‌ كوردستانێ‌ بیت و ئەڤ پرۆژە دەستپێدكەت ژ 20 ملیونان هەتا 150 ملیون دیناران و پێشكێشكرنا ڤی پرۆژی ژی ب رێكا ئونلاینە و مفایێ‌ ل سەر وی پارەی ب تنێ‌ 2% یە، ئەو ژی رێنماێن كارگێری نە و زڤراندنا ڤی پارەی ژی د دەمێ‌ سێ‌ سالان دایە و ئەڤ پرۆژە یێن چاندنێ‌ ژی دگریت، بەلێ‌ بۆ پرۆژێن چاندنێ‌ نەمەرجە قستێ‌ خوە هەر هەیڤ ب زڤرینیت، چونكو هەیڤانە داهاتێ‌ وی ناهێت، لەورا قستێن وان دێ‌ ل دووڤ داهاتێ‌ وان بیت و نوكە ئەڤ پرۆژە دەستپێكریە.
ناڤهاتی زێدەتر ژی گۆت: دو خالێن دی ژی یێن گرنگ هەنە ئەو ژی یو پی ئێن و یو بی ئێن هەر كەسەكی ل كوردستانێ‌ ئەڤە هەنە و دشێن ب دەست خوە ڤە بینن ل بەنكا مالتایێ‌، یان بەنكا دومیز و ل ئیدارەیا سەربەخویا زاخۆ بەنكا خابیر و ل ئاكرێ‌ بەنكا پیرس و ئامێدیێ‌ بەنكا سولاڤ، بەلێ‌ پرۆژێن چاندنێ‌ پێدڤی یو ئی ئێن نابن، ب تنێ‌ دێ‌ نڤیسارەكێ‌ ژ رێڤەبەرییا چاندنێ‌ ئینیت و پالپشتیەكێ‌ ژ ناحیێ‌ ئینیت، بەلێ‌ پرۆژێن دی دڤێت یو ئی ئێنی بینت و ڤێ‌ ژمارێ‌ ژی دێ‌ ژ رێڤەبەرییا تۆماركرنا كومپانیا ئینت و هەر كەسەكێ‌ ناڤەكێ‌ بازرگانی هەبیت و ناڤێ‌ خوە ل وێرێ‌ توماربكەت و یو ئی ئێنی دەنی و هەكە ئەڤە نەبیت نەشێت پێشكێشبكەت.
رێڤەبەرێ‌ قەرزێن بچووك بۆ لاوان ئەو چەندە ژی گۆت: هەتا نوكە ل سەرانسەری كوردستانێ‌ ب تنێ‌ 13 كەسان ئەڤ پرۆژە پێشكێشكریە، خەلكەك ژ نوو یێ‌ ئاگەهدارە ل سەر ڤی پرۆژەی و دیسان دبیت رێنمایێن پرۆژێ‌ گەشانەوە ب زەحمەت بن و ئەڤ كارە د بەرژەوەندییا خەلكی دایە و مەرەم ژێ‌ كێمكرنا رێژا بێكاریێ‌ یە.

پەروین سەلاح:

خودانا جوانكاریەكێ دیار كر، پێدڤیە هەر خودان كارەك هاریكاربیت دەلیڤێن كاری بۆ گەنجان دابین بكەت، چونكە گەنج نموونا مللەتەكی نە و دڤێت پاشەرۆژەكا باش بۆ هەبیت و گۆت: ئەو گەنجێ دهێتە دەلیڤەیا كاری و كاربكەت دڤێت خودانێ كاری رەفتارەكا باش دگەل بكەت.

مهاباد عەلی عومەر، كچەكا پارێزگەها دهۆكێ یە و خودانا جوانكاریێ یە بۆ رۆژناما ئەڤرۆ دیار كر: بێ گومان دێ بینین گەلەك جهێن كاری دهێنە ڤەكرن، لێ پێدڤیە خودانێ وی كاری یێ هاریكاربیت هەر دەلیڤەیەكا كاری بۆ گەنجێ مە هەبیت، چونكە پتریا جاران گەنج دێ بەرەڤ وی جهی ڤە چیت یێ كار لێ هەی، بەلێ‌ خودانێ كاری دەلیڤەیا كاری نادەتێ، دێ بەرسڤا وی دەن و بێژنێ تۆ دگەل كارێ مە ناهێیە گونجاندن، بێ گومان هەتا نەهێتە گونجاندن ژی، دڤێت خۆدانێ كاری پالپشتیێ ل وی گەنجی بكەت فێری كاری ببیت.
زێدەتر گۆت: من جوانكاری هەیە و چەندین كچ ل دەف من كاردكەن، هەروەسا خولێن فێركرنا كارێ جوانكاریێ ڤەدكەم و ب ژمارەیەكا باش ژ هەردوو رەگەزان تێدا بەشداردبن، كچ و كۆر و ب رێكا خولێن فێركرنێ دەلیڤەیێن كاری بۆ گەنجان دبینین.
مهابادێ خۆدانا جوانكاریێ گوت ژی” دنوكەدا پتر ئافرەت سەرەدانا جوانكاریێ دكەن و هەردەم حەزدكەن گوهۆرینا ل دەف خۆ پەیدابكەن و گۆت: پێدڤیە دگەل گەنجێ خۆ بین ژ هەردوو رەگەزان، كچ و كوران و چ جوداهی نەئێخینە دناڤبەرا وان دا و دیسان دەستێن وان بگرین و فێری كاری بكەین.

هەولێر، قائید میرۆ:

شارەزایەكێ جڤاكی ئاشكرا كر، رێژا قەیرەبوونێ ل هەرێما كوردستانێ بەر ب زێدەبوونێ یە و گۆت: پڕۆژێ هەڤژینیا سەردەم هاتیە بەرهەڤكرن و هەكە بهێتە پەسەند كرن و ئاسانكاری هەبن دێ گەلەك كەس هەڤژینیا سەردەم ئەنجام دەن.

شێخ ئاریان بەرزنجی، شارەزایێ جڤاكی بۆ رۆژناما ئەڤرۆ گۆت: (ل سالا 2007ێ وەرە پڕۆژەیەك من بەرهەڤ كریە و پێشكێشی لایەنێن پەیوەندیدار كریە ب مەرەما پەسەندكرنێ، پڕۆژە پێك هاتیە ژ ئەنجامدانا هەڤژینیا سەردەم، هەڤژینیا سەردەم مەرەم ژێ ئەوە دوو كەس هەڤژینیێ بكەن ب شێوەیەكێ سەردەمیانە).
شێخی دیار كر كو نوكە خەلكەكێ زۆر ل هەرێما كوردستانێ هەڤژینیا سەردەم ئەنجام ددەت، هەڤژینیا سەردەم ب كورتی ئەوە كەسەكی پێدڤی ب هەڤژینێ‌ هەبیت یان ژی هەڤژینا دویێ و شیانێن مادی نەبن، د هەڤژینیا سەردەم دا ژن ژ هندەك مافێن خوە زەلامی ئازا دكەت كو ل مالا خوە بژیت و دەمێ پێدڤی ژی دێ پێكڤە بن و گۆت: (ئەڤە زێدەتر بۆ وان كچانە یێن قەیرە یانژی بێژن داكو ئەو ژی نەمینن بێ هەڤژین، بەلێ ئەڤرۆ رەوشا هەرێما كوردستانێ وەسا دخوازیت رێكێن نوو بهێنە بكارئینان بۆ ئەنجامدانا ئەڤی جورێ هەڤژینیێ، چونكی ژلایێ ماددیڤە هەموو كەسەكی شیانێن هەڤژینیێ نینن، ئەڤجا هەكە ئاسانكاری بۆ بهێنە كرن ئەڤە كارەكێ باشە و خەلكەكێ زۆر دێ مفادار بیت، بەلێ دڤێت چوارچوڤێ قانوونی بهێتە رێكخستن و جڤاك بهێتە هشیار كرن لدۆر هەڤژینیا سەردەم).
بەرزنجی دا زانین كو خەلكەكێ زۆر نوكە ل هەرێما كوردستانێ پرۆسا هەڤژینیا سەردەم ئەنجام ددەت، بەلێ بشێوەیێ قانوونی نەهاتیە رێكخستن، هەتا شەریعەتی ئاریشە ل گەل هەڤژینیا سەردەم نینە بتنێ ژلایێ قانوونی دڤێت رێك بهێتە دان و گۆت: (زانایێن ئایینی ژی بۆچوونێن جودا ل سەر هەنە و هندەك ل گەل ئەڤی جورێ هەڤژینیێ دانە و هندەك ژی دژن، زانایێن سەردەم ل گەل هەڤژینیا سەردەمن ئەگەر بهێت و مەرجێن ئایینی تێدا دیار بن و بهێنە بجهئینان، بدیتنا من پرۆسا هەڤژینیا سەردەم هەموو مەرجێن هەڤژینیا ئاسایی تێدا هەنە، بەلێ زێدەتر بۆ وان كچانە یێن تەمەنێ وان گەهشتیە سەر 35 سالیێ و ژنێن زەلامێن خوە ژ دەست داینە و یێن بەردایی).
ئاریان بەرزنجی ئاماژە پێ‌ كر كو دناڤا جڤاكێ كوردستانێ رێژا قەیرەبوونێ بەر ب زێدەبوونێ یە ئەگەر ژی بۆڤێ چەندێ ڤەدگەڕیت هاندان نینە بۆ پرۆسا هەڤژینیێ، رەوشا ئابوری ژی كاریگەریێن زۆر كرینە سەر پرۆسا هەڤژینیێ و مەرجێن زۆر گران هەنە ل سەر وان كەسێن دخوازن بچنە دناڤا پرۆسا هەڤژینیێ و گۆت: (دەمێ گڤاشتن دهێنە كرن ل سەر ئەڤی كەسی و دخوازیت پرۆسا هەڤژینیێ پێك بینیت دبیتە ئەگەر ئەو پرۆسە نەهێتە ئەنجامدان و سال بۆ سالێ یا بەر ب كێمبوونێ دچیت، ئەگەر هەڤژینیا سەردەم بهێتە پەسەند كرن دێ كاریگەری ل سەر نەهێلانا قەیرەبوونێ هەبن ل زۆر وەلاتێن جیهانێ ژی ئەو جورێ هەڤژینیێ دهێتە بجهئینان بۆ نموونە ل وەلاتێ سعودیێ نوكە هەڤژینیا سەردەم بوویە قانوون و خەلك ئەنجامددەت).

بێوار حەمدی:

چالاكڤانەكا جڤاكی دیار كر كو هەكە هەڤژینان نهێنیێن دناڤبەرا خۆدا نە پاراستن و ئاریشێن خو برنە ژ دەرڤەی خێزانێ‌ داكو چارەسەر ببن، هینگێ‌ چ ئەگەر نامینن كو ئەو ژیانا خۆ ل گەل ئێكدو تەمام بكەن، لەوما پێدڤیە نهێنی ژ چارچوڤێ خێزانێ نەدەركەڤن و بهێنە پاراستن.

سارا سلێمان چالاكڤان د بیاڤێ‌ جڤاكی دا د دیدارەكێ دا بو روژناما ئەڤرو دیار كر كو د نوكە دا ئەوێن هەڤژینیێ پێك دئینن پتریا وان د ژیێن بچویك دانە و هەر ژبەر هندێ ژی پێگیریێ ب خالێن هەڤژینیێ ناكەن و نهێنیا ناپارێزن و گوت: (هەكە ژ رادەیەكی بوری و نهێنیێن وان نەهاتنە پاراستن ل وی دەمی نەشێن ژیانا خۆ ل گەل ئێك تەمام بكەن و چ ئەگەر نامینن بو مانا وان ل گەل ئێك).
چالاكڤانێ دیار كر ژی، هەردەما ئەو كەسێن هەڤژینێ پێك دئینن د بنەمایێن خێزانێ نەگەهن و لێك تێگەهشتن و هزر كرنا ساخلەم دناڤ خێزانا وان دا نەبیت، ل وی دەمی ئەو نەشێن زالگەهیێ ل سەر نهێنیێن خۆ بكەن و دێ نهێنی ژ چارچوڤێ خێزانا وان دەركەڤن و گوت: (گەلەك ئەگەر هەنە كو نهێنی ژ مالێ دەربكەڤن بو نمونە هەكە ئافرەت ب رازیبونا خۆ زەلامی ب هەلبژێریت و ڤیان دناڤبەرا واندا هەبیت و پشتی هینگێ هەردەما ئاریشەك یان ئالوزیەك كەفتە پەیوەندیا وان، ئافرەت گەلەك نە ئارام دبیت و گازندێن خۆ بو كەسێن خۆ یێن نێزیك دبێژیت، لێ‌ هێدی هێدی دێ ئاریشا وان بەلاڤ بیت و خەلك ژی ژ ەف خۆ دێ مەزنتر لێكەن).
سارایێ ئەو چەندە ژی دیار كر، رێزگرتن و باوەری و حەزژێكرن بهایێ هەڤژینیێ ددەنە دیار كرن و دڤێت هەڤژین د یەكسان بن ل گەل ئێكدا و رێزێ ل بوچونێن ئێكدو بگرن و ب نهێنی ڤە ئاریشێن دناڤبەرا خۆدا چارەسەر بكەن و گوت: (ئەگەرێ سەرەكی یێ خێزانا سەركەفتی رێزگرتن و باوەریە ، ئاخفتنەكا كوردی یاهەی دبێژیت، ژن و مال نە مێر و مال ئانكو ئەگەرێ ئاڤاكرنا مالێ ژنە).