دیدار، سالار محەمەد دۆسكی:

پێشمەرگێ‌ هەر دو شۆڕەشێن ئیلون و گولانێ‌، (سەگڤان توفیق ئەحمەد) یێ‌ بەرنیاس ب ( سەگڤان كەمەكی) ل سالا 1956ێ‌ ل گوندێ‌ كەمەكا ل دەڤەرا دۆسكیا ژ دایك بوویە، ل سالا 1961 ل باژێرێ‌ دهۆكێ‌ ئاكنجی بووینە و پشتی سێ‌ جاران گوندێ‌ كەمەكا هاتیە سوتن و جارا چارێ‌ هاتیە راستكرن و ژ بەر ڤەگوهاستنێ‌ نەشیا خواندنا خوە تەمام بكەت، و نەچار دبیت ل قوناغا سیێ‌ بنەرەت دەست ژ خواندنێ‌ بەردەت، ل سالا 1972ێ‌ چەكێ‌ شەرەفێ‌ هەلدگریت و دبیتە پێشمەرگە و هەتا نوكە یێ‌ بەردەوامە.
سەگڤان كەمەكی پێشمەرگێ‌ هەر دو شۆڕەشێن ئیلون و گولانێ‌ ددیدارەكێ‌ دا گەل رۆژناما ئەڤرۆ گۆت: ل دەسپێكا شۆڕەشا ئیلونێ‌ (70) پێشمەرگە ل گوندێ‌ كەمەكا هەبوون، وی دەمی گوند(300) مال تێدا دژیان و ژ بەر ڤێ‌ هژمارا پێشمەرگەی، خودێ‌ ژێ‌ رازی (مەلا مستەفا بارزانی) سێ‌ چار جاران هاتیە گوندێ‌ (كەمەكا) دگۆت كەمەكا بارزانا بچویكە، ل سالار 1992ێ‌ دەمێ‌ سەرۆك مەسعود بارزانی هاتیە دەڤەرێ‌ و فەرمان دا بچیتە سەر گورێ‌ شەهید (حەمو كەمەكی) ل گوندێ‌ (كەمەكا) ل گەل جەنابێ‌ سەرۆكی مە قەستا گوندی كر، و ل سەر گورێ‌ شەهید (حەمو كەمەكی) جەنابێ‌ سەرۆكی دەستێ‌ خوە دانا سەر كێلیا وی گۆت: حەمو حەمو تو ئێك ژ مالێ‌ بووی و دڤیابا مە تو بربایە بارزان ڤەشارت بای لێ‌ بارزانیێ‌ مەزن گۆتیە كەمەكا بارزانا بچووكە و ژبەر ئاخفنا وی ل جهێ‌ خوە بمینە، گوندێ‌ مە ب خەباتا خوە دناڤا شۆڕەشێن كوردی دا یێ‌ بەرنیاس بوویە.
سەگڤان كەمەكی زێدەتر گۆت: ل سالا 1972ێ‌ ژ بەر عەشقا من بوو پێشمەرگاتیێ‌ بابێ‌ من ل گەل من هات و برمە دەف (عەبدوالرزاق گەرماڤی) وی دەمی وەكیلێ‌ (عەلیێ‌ خەلیل) بوو، جەنابێ‌ وی گۆتە من هێشتا تویێ‌ بچوویكی هەر بخوە تڤنگەكێ‌ پەیدا كە و دووڤدا وەرە دێ‌ تەكەینە پێشمەرگە و بتنێ‌ قەناعە بوومن دروستكر وی دەمی هێشتا دو سال بوو من مابوون و بابێ‌ من برنوویەك بوو من ب(120) دیناران كڕی، ناڤێ‌ من ل گەل شەهید (حەمو كەمەكی)یێ‌ توماركری بوو، و بتنێ‌ سالەك بوو من دهاتە هژمارتن، هەتا نەسكویا سالا 1975ێ‌ ل سالا 15/11/1979ێ‌ مە پەیوەندی ب (محەمەد ساركی) كر، وی دەمی ئامر مەفرەزە بوو ل گەل رێكخراوا شەهید (وەیسی بانی )، وبەرپرسێ‌ رێكخراوێ‌ (خالد بانكی) و (ئەحمەد بارمەنی) جێگرێ‌ رێكخراوێ‌ بوو، و سێ‌ سالان مامە ل گەل و ئەز و كاك (عجێل زاویتەی) دبەرنیاس بووین گەلەك پیا دچووین و پێ‌ سڤك بووین.
سەگڤان كەمەكی گۆتژی: مەبدەئەكێ‌ گەلەك ب هێز مە هەبوو و مە گەلەك حەز و ڤیان ل سەر پێشمەرگاتیێ‌ هەبوو، و دەمێ‌ هاتینە ڤەگوهاستن بۆ لژنا دهۆك ژ باگێرا هاتینە دەڤەرا مەمانێ‌ و گەهشتینە گوندێ‌ كەمەكا (خالد بانی) گۆت سەگڤان هەرە مال من گۆتێ‌ ناچم و ئەو شەش هەیڤ بوو من مالا خوە نەدیتی، لێ‌ مە باوەریەكا گەلەك ب هێز هەبوو، و مە حەزدكر خزمەتا مللەتێ‌ خوە بكەین، و چالاكێن لەشكری ئەنجام بدەین، ل گەل هەڤالێن خوە و هەتا گەهشینە (بابوخكێ‌) دناڤا رەبیا را دەربازبووین وی دەمی رەبیا ئەم دیتن ژی لێ‌ ژ بەر هەبوونا هەژمارەكا زوور یا پێشمەرگەی نەدوێریان خوە د مەهلكەن، و رۆژا دووڤدا چووینە بەرخابیری و گەلیێ‌ دیهێ‌ و (فەتەح گولی، جەمیل بێسفكی، حسێن بێسفكی) ل گەلیێ‌ دیهێ‌ بوون، و (فەتەح گولی) مور رادەستی (خالد بانی) كر، و گۆتێ‌ تو بەرپرسێ‌ لژنا دهۆكی ولژنە جانتەكێ‌ دبلوماسی بوو ل سەر پشتا هێسترەكێ‌ و چو بارەگا نەبوون، و دووڤدا ل سالا 1983ێ‌ بارەگایێ‌ لژنێ‌ ل شكەفتێ‌ ل گوندێ‌(چرانێ‌) هاتەدانان و دووڤدا هاتە ڤەگوهاستن بۆ گەلیێ‌ هەسناڤاكێ‌ ل گوندێ‌ گەلناسكێ‌.
سەگڤان كەمەكی زێدەتر گۆت: ل سالا 1985ێ‌ جێگرێ‌ رێكخراوا (دەشتا سێمێل) بووم و بەرپرسێ‌ رێكخراوێ‌ (عەلی بەندی) بوو، سەر ب لژنا دهۆك ڤە وی دەمی (سلو خدر) بەرپرسێ‌ لژنێ‌ بوو و میلاكێ‌ مە (120) پێشمەرگە بوون، (سلو خدر) هەر چەند هەیڤانە سەرەدانا دەڤەرا شێخان دكر و دڤێت ئێزدیێن دەڤەرێ‌ دیتبان و هەمی رێكخستنێن نهێنی ل گەل بوون، داخاز ژ من كر ل گەل هندەك پێشمەرگان ل گەل بچین وی دەمی بووینە (34) پێشمەرگە چووینە دەڤەرا شێخان، وی دەمی ئەگەر مرۆڤ ب پیان چووبا تشتەكێ‌ گەلەك سرۆشتی بوو و بتنێ‌ چەند دەمژمێر بوون و پشتی چووینە سندورێ‌ و بادێ‌ و بەرێ‌ بوهار ل دانێ‌ مەغرەب گەهشتینە (سین و شێخ خدرا) ژڤان بوو سپێدێ‌ بگەهینە (كورەژارەك) هەیە پشتا نزاركێ‌ یە و ب شەڤێ‌ بچینە دەشتێ‌ و هێشتا نەگەهشتینە (كورەژاری) هەڤالێن مە گازیكرن كو چەتە نێزیكی مە نە و بزڤرن، و ئەوا نەزانین ئەم پێشمەرگەی و ئەوا هزر كر ئەم ژی چەتەینە و گەهشتینە سەرێ‌ گوندی وی دەمی (یونس مزیری) ل گەل مەنەبوو و (یونس) هێشتا نیڤا رێكێ‌ بوو یێ‌ پێ‌ گران بوو،(سلو خدر) گۆت خوە ب هاڤێژە و پێلە، من گۆتێ‌(یونس) ناهێلم، حەفت پێشمەرگە ل گەل من مان و پێشمەرگێن ل گەل (سلو شێخ خدر) قەلابەكێ‌ خوە قورتالكرن چوونە گوندێ‌ (دوستەكا) و هێزەكا دی یا لەشكری یا ژ دەشتێ‌ بەرەف دەڤەرێ‌ دهێت و (یونس) گەهشتە مە و ئەم چووینە ناڤ گوندی و مە پرسیارا پێشمەرگەی كر، و یا ژ خەلكێ‌ گوندی ڤە ئەم ژی چەتەینە و كەسەكێ‌ چو ئاخفتنێن دروست بوومە نەگۆتن، و ناڤ مالەكێ‌ مە قەلابەك دیت و چووینە تێدا و مە گۆتێ‌ مە قورتال كە و ژ گوندی دەركەفتین و نێزیكی لەشكری بوورین و بەرەف گوندێ‌ (دوستەكا) چووین، (سلو شێخ خدر) گۆت: هێزا حوكمەتێ‌ یا مەزنە و مە هێزا وا نینە و ئەم چو شەڕان ل گەل ناكەین، و مە گۆتێ‌ هەوە ئەم هێلاینە و ئەم دێ‌ شەڕی كەین و دووڤدا دێ‌ زڤرین و ئەم بووینە (15) پێشمەرگە ماین شەڕی بكەین، و (سلو شێخ خدر و محەمەد صالح بوتی) ل گەل پێشمەرگێن مای ب سەر چیایی كەفتن و هێدی هێدی هێزا حوكمەتێ‌ یا ژ دەشتێ‌ نێزیكی مە دبیت و ئەم نوزانین هێزەكا ژ پشتێ‌ ژی دهێت، ئانكو ژ نزاركێ‌ ب سەردكەڤیت و هەر (سلو خدر) ئەوێ‌ گازی دكەن وەرن و ئەمێ‌ دبێژینێ‌ ناهێن دێ‌ شەڕی كەین، شەهید(تاهر زێوەی) بەرپرسێ‌ رێكخراوێ‌ بوو و زەلامێن وەك وی نەبووینە و مرۆڤەكێ‌ ب نامیس و شەرەف بوو و ئەگەر هەر گوندەكێ‌ چووباینێ‌ دا هەمی پێشمەرگەی كوم كەت، و بێژیت ئەو مال هوون دچنێ‌ خویشك و دەیكێن هەوە نە و هەر شاشیەكێ‌ ژ پێشمەرگەكی ببینم دێ‌ بڤێ‌ دەمانجێ‌ كوژم، شكەفتەك ل گوندێ‌(دوستەكا) هەیە و ل بانێ‌ وێ‌ كانیەك هەیە و ئەو شكەفت یا بەرنیاسە، مە خوە بەلاڤكر و (تاهر زێوەی) جهێ‌ شكەفتێ‌ بوومن دانا و ئارپیچێ‌ ل گەل من بوو بۆ لێدانا ئارمانجێ‌ كو (زریپۆش یان دەبابە) خوە نێزیك بكەت ئەز بكەمە ئارمانج، من گۆتە شەهید (تاهر زێوەی) ئەگەر تە جهێ‌ خوە بەردا دێ‌ مینمە ئاسێ‌ د شكەفتنێ‌ دا، شەهید تاهر گۆت بتنێ‌ ئەگەر شەهیدبم ئەز جهێ‌ خوە بەردەم ئەگەر پشست راسبە جهێ‌ خوە بەرنادەم وی دەمی باوەری د ناڤبەرا پێشمەرگان دا هەبوو و هەمی خودان ئاخفتن بوون، وی دەمی ئەگەر چار پێشمەرگە ل سەرێ‌ گركەكی بان و ئەگەر چەند هێز هاتبایێ‌ نەدشیان راكەن، ل شكەفتێ‌ (ئەز و سالم مەمانی، سیابەندێ‌ خەچ ئەمینێ‌، مەهدی، مەتین بەرواری) ماین و بریارا شەری د دەستێ‌ شەهید( تاهر زێوەی) دایە و هەتا ئەو تەقێ‌ نەكەت، نابیت پێشمەرگە تەقێ‌ بكەت و پێزانین دروست گەهشت بوونە لەشكەرێ‌ عیراقێ‌ و ئەو هێز بەرەف چیای هات و ئەم نوزانین هێز یا ژ پشتێ‌ ڤە ژی ب سەركەفتی و ژووردا دهێتە خوار و دەمەكی (تاهر زێوەی) لێدا و پێشمەرگەی ل تلیلیا دا و هاڤێتە وێ‌ هێزێ‌ و شكەستن و زڤرینە (دوستەكا) و پشتی كومبوونەك ئەنجام دای و بۆ جارا دووێ‌ هاتن و دەمژمێر هەشتی سپێدێ‌ شەری دەست پێكر و هێزا سەری ژی هاتە خوارێ‌ و ئەوا ژی شەر كر و كەسەكێ‌ هاش كەسەكێ‌ نینە، دەمەكی هەڤالەكی گوتەمن(تاهر و یونس) شەهید بوون