وەزیرێ بەرگریێ یێ تورکیا دیار دکەت، د رەوشا نها دا ئەو نەشێن هێزێن خوە ژ ئاخا سووریێ ڤەکێشن، چونکی مەترسیا تیرۆرێ ل سەر سنۆرێن وان هەیە، هەروەسا دڤێت رەوشا سووریێ یا ئارام بیت و پەنابەرێن سووریێ ژی ڤەگەرنە ڤە جهێن خوە، هەتا ئەو یەک بجه نەهێت تورکیا یا بەرهەڤ نینە هێزێن خوە ژ ئاخا سووریێ ڤەکێشیت.

یاشار گولەر وەزیرێ بەرگریێ یێ تورکیا د داخۆیانیەکێ دا راگەهاند، دەمەکە بەرپرسێن سووریێ داخواز دکەن تورکیا هێزێن خوە ڤەکێشیت دا دەست ب قۆناغەکا نوو ل گەل ئەنقەرە بکەن، لێ رەوش نها بۆ ڤێ یەکێ یا گونجای نینە، چونکی بەری هەر تشتەکێ نها ل سەر سنۆرێن تورکیا و سووریێ رەوشەکا گەلەک ئالۆز یا هەی، مەترسیا تیرۆرێ ل سەر ئاسایشا تورکیا هەیە، ل ئالیێ دی حوکمەتا سووریێ نها ئەو شیان ژی نینن بشێت حوکمێ ل هەموو ئاخا سووریێ بکەت و رەوشەکا ئارام دروست بکەت، ژ بەر هندێ ژی بەردەوام مەترسی ل سەر تورکیا هەنە، سنۆرێن تورکیا ل گەل سووریێ نها ئارام نینن و گۆت: (تورکیا چو دەمەکێ نەڤێت ئاخا وەلاتەکێ جیرانا خوە داگیر بکەت، چاڤێ تورکیا ل ئاخا چو وەلاتەکێ نینە، لێ د هەمان دەمی دا تورکیا نەرچارە ل هەمبەر هەر مەترسیەکێ ژی د ئامادەباشیێ دا بیت، نها ل سووریێ مەترسی ل سەر تورکیا هەنە و دڤێت شام ب ئەرکێ خوە رابیت، مخابن نها ل سووریێ گەلەک هێز و گرۆپێن جودا جودا هەنە، ژ بەر هندێ ژی هەتا رەوشا سووریێ یا ئارام نەبیت و گرۆپێن تیرۆرستی ژناڤ نەچن، تورکیا ژی نەشێت هێزێن خوە ژ ئاخا سووریێ ڤەکێشیت).
ناڤهاتی ئەو یەک ژی دیار کر، دڤێت شام کار بۆ هندێ بکەت دا ئالۆزیێن هەی چارەسەر بکەت و پەنابەرێن سووریێ یێن نها ل تورکیا ژی ڤەگەرنە ڤە جهێن خوە، مخابن نها رەوشەکا وەسا نینە و تورکیا ژی نەچارە ل هەمبەر هەر مەترسیەکێ د ئامادەباشیێ دا بیت، ژ بەر هندێ ژی نها داخوازیا شامێ یا بۆ ڤەکێشانا هێزێن تورکیا ل سووریێ د جهێ خوە دا نینە و تورکیا د رەوشا نها دا بەرهەڤ نینە بێی مەرج هێزێن خوە ژ ئاخا سووریێ ڤەکێشیت.
ل ئالیێ دی وەزارەتا دەرڤە یا سووریێ ژی راگەهاند، مانا هێزێن تورکیا ل سووریێ ئالۆزیان دروست دکەت و هەتا هێزێن بیانی ل سووریێ بمینن بێگومان ناهێلن رەوشا سووریێ یا ئارام بیت، تورکیا پشتەڤانیێ ل گرۆپێن تیرۆرستی دکەت و هەتا پشتەڤانیا تورکیا بۆ وان گرۆپان یا بەردەوام بیت دێ رەوشا سووریێ ژی هەر یا ئالۆز بیت، بەری نها ژی سووریێ داخواز ژ تورکیا کریە پشتەڤانیێ ل گرۆپێن تیرۆرستی نەکەت و هەموو هێزێن خوە ژ ئاخا سووریێ ڤەکێشیت، لێ مخابن هەتا نها تورکیا ئەو یەک نەکریە، ژ بەر ڤێ یەکێ ژی شام یا بەرهەڤ نینە ل گەل تورکیا دەست ب قۆناغەکا نوو بکەت.

ئانتۆنی بلینکن وەزیرێ دەرڤە یێ ئەمریکا د داخۆیانیەکێ دا راگەهاند، هەتا نها ئیران یا بەرهەڤ نینە سەبارەت ب بەرنامێ ئەتۆمی ل گەل ئاژانسا جیهانی یا ئەتۆمی هەڤکاریێ بکەت، ژ بەر هندێ ژی ئەمریکا هۆشداری دایە ئیرانێ، چونکی ئەمریکا و هەڤپەیمانێن وێ ب چو رەنگەکێ رێ نادەن ئیران ببیتە خوەدانا چەکێ ئەتۆمی، ئەو یەک مەترسیەکا خوە یا گەلەک مەزن بۆ هەموو جیهانێ هەیە، هەکە بەرپرسێن ئیرانێ سەبارەت ب بەرنامێ ئەتۆمی یا پێدڤی نەکەن ئەمریکا ژی ل گەل ئیرانێ چو دانوستاندنان ناکەت، هەروەسا ئەمریکا دێ سزایێن توندتر ژ جاران ژی ل سەر ئیرانێ سەپینیت.
ئەو یەک د دەمەکێ دایە کو بەری دو رۆژان ناسر کەنعانی پەیڤدارێ وەزارەتا دەرڤە یا ئیرانێ ژی راگەهاند، پێنگاڤا ئێکێ یا رێککەفتنا وان ل گەل ئەمریکا ب رەنگەکێ باش بجه هات و وەکو ئیران ئەو چاڤەرێ نە ئەمریکا سەبارەت ب بەرنامێ ئەتۆمی یێ ئیرانێ ژی دەست ب دانوستاندنان بکەت، هەکە ئەمریکا ئەو ئیرادە هەبیت، ئیران ژی یا بەرهەڤە ل گەل ئەمریکا سەبارەت ب چارەسەرکرنا بەرنامێ ئەتۆمی دەست ب قۆناغەکا نوو بکەت.

بنیامین نەتانیاهۆ سەرۆک وەزیرێن ئسرائیلێ راگەهاند، نها پەیوەندیێن وەلاتێ وی ل گەل هەموو وەلاتێن عەرەبی د باشن و ئەو ل گەل سعوودیێ ژی نێزیکی ئیمزاکرنا رێککەفتنەکا دیرۆکی بووینە و ئەو یەک دێ کاریگەریا خوە ل هەموو دەڤەرێ کەت، چونکی پێدڤیا رۆژهەلاتا ناڤین ب ئاشتیێ یا هەی.
ناڤهاتی ئەو یەک ژی دیار کر، ژ بلی سعوودیێ، ئسرائیل یێ بزاڤا دکەت پەیوەندیێن خوە ل گەل هەموو وەلاتێن دی یێن عەرەبی ژی باشتر بکەت، نها ژی پەیوەندیێن ئسرائیلێ ل گەل پڕانیا وەلاتێن عەرەبی د باشن و ئەو یەک ژی د بەرژەوەندیا هەموو ئالیان دایە.

هەولێر، قائید میرۆ:

بڕیارەكا وەزارەتا چاندنا ئیراقێ زیان ب جۆتیارێن هەرێما كوردستانێ گەهاندیە و وەزیراچاندنێ ژی دبێژیت: بەرهەمێ جۆتیارێن كوردستانێ بەهرا بازاڕێ ئیراقێ دكەت و رێكێ نادەین بەرهەمێن بیانی بهێنە د بازاڕێ دا، هندی بەرهەمێ ناڤخوە هەبیت.
بێگەرد تالەبانی، وەزیرا چاندنێ د كۆنگرەیەكێ رۆژنامەڤانی دا راگەهاند: «حوكمەتا ئیراقێ ب نڤیسارەكێ رێك دایە ئینانا بەرهەمێ بیانی بۆ ناڤا ئیراقێ و هەرێما كوردستانێ، ئەڤە د دەمەكی دایە، بەرهەمێ چاندنێ یێ هەرێما كوردستانێ بەهرا بازاڕێ ئیراقێ دكەت و هاتنا بەرهەمێ بیانی كاریگەریێن خراپ ل سەر كەرتێ چاندنێ هەیە و زیانێن مەزن دێ‌ گەهینیتە جۆتیارێن هەرێما كوردستانێ، مە حوكمەتا ئیراقێ ئاگەهداركریە بڕیارا خوە هەلوەشینیت و ب نڤیسارا فەرمی مە چاندنا بەغدا ئاگەهداركریە بەرهەمێ جۆتیارێن هەرێما كوردستانێ بەهرا بازاڕی هەنە».
بێگەرد تالەبانی گۆتژی: «ل سەرانسەری هەرێما كوردستانێ مە رێكێن سەرەكی ل هەمبەر هاتنا بەرهەمێ بیانی گرتینە و رێكێ نادەین بەرهەمێ بیانی ب رێیا ئیراقێ بهێتە د ناڤا هەرێمێ دا، چونكی زیان بۆ جۆتیارێن مە هەنە، جۆتیارێن دهۆك و هەولێر و سلێمانیێ بەرهەمێ خوە بۆ بازاڕێن پارێزگەهێن دی یێن ئیراقێ دبەن، رۆژناما چاندنێ هەیە و هەر بەرهەمەكێ ناڤخوە هەبیت نابیت بەرهەمێن بیانی بهێنە ناڤا ئێراق و كوردستانێ».