د چارچووڤێ‌ نێزكبوون و هایداربوونا كەرتێ‌ وەرزشێ‌، ل ئێك شەمبییا بۆری د. پشتیوان سادق ئەندامێ‌ مەكتەبا سیاسی و بەرپرسێ‌ مەكتەبا رێكخستنا پارتی دیموكراتی كوردستان ل پارێزگەها دهۆكێ‌ ب یاوەرییا شاندەكێ‌ رێكخستنێ‌ سەرەدانا هەر ئێك ژ یانەیا دهۆك و یانەیا گارە یێن وەرزشی كرن ئەوێن ژلایێ‌ دەستەكا كارگێرییا هەردو یانەیان هاتینە پێشوازی كرن.
د هەڤدیتنەكێ‌ دا دگەل سەرۆكێ‌ یانەیا دهۆك د. عەبدوللا جەلال بەحس ل گرنگییا وەرزشی و چاوانییا پێشڤەچوونا وێ‌ كر و بوویە جهێ‌ دلخوەشیێ‌، دیسان د. پشتیوان سادق پشتەڤانییا خوە بۆ پێشڤەچوونا وەرزشێ‌ دۆپاتكر، هەر د سەردەردانێ‌ دا بەرپرسێ‌ رێكخستنێ‌ چاڤ ل ئەكادیمییا وەرزشی یا یانەیا دهۆكێ‌ كر ئەوا پێكهاتی ژ چەند یاریێن كۆم و كت و داخوازا سەركەفتنێ‌ بۆ هەمی یاریزانان خواست.
ژلایەكێ‌ دووڤە بەرپرسێ‌ مەكتەبا رێكخستنا پارتی و شاندێ‌ دگەل دا سەرەدانا یانەیا گارە یا وەرزشی كر ئەوێن ژلایێ‌ سەرۆكێ‌ یانەیێ‌ شێروان بەشار و دەستەكا كارگێریێ‌ ڤە هاتینە پێشوازی كرن، د. پشتیوان سادق تەكەز ل سەر رۆلێ‌ مەزن یێ‌ وەرزشی د ناڤ چڤاكی دا كر وەكو هوكار و ئامرازەكێ‌ بهێزە بۆ نیاسینا مللەتان، هەروەسان شاندێ‌ رێكخستنێ‌ ژ نێزیك هایداری رەوشا ئەكادیمییا یانەیا گارە ژی بوو و پشتەڤانییا خوە بۆ یانەیێ‌ و كار و چالاكییان دوپاتكر و هیڤییا بەردەوامییا هەبوونا ئەكادیمیان خواست پێخەمەت ببنە پاشەرۆژەكا گەش و مفایی ژ شیانێن یاریزانان وەربگرن.

قەیس وەیس:
بزاڤێن ب دەستڤە ئینانا یاریزانان ژلایێ‌ یانەیێن كوردستانی و ئیراقێ‌ بەردەوامن خوە بەرهەڤكرن بۆ وەرزێ‌ نوو 2023- 2024 یێ‌ خولا تەپا پێی یا ئیراقێ‌ یا پیشەكاران ژ وانا یانەیێن دهۆك و زاخۆ ئەوێن هەتا نوكە لڤینەكا كێم كرینە ئەوا بڕیارە دەرگەهێ‌ ڤەگۆهاستێن یاریزانان هەتا پێنجی چرییا ئێكێ‌ یا ئەڤ سالە بهێتە گرتن، هەرچەندە هەتا نوكە بازار دەستپیكرییە لێ‌ كرین و فرۆتن یا كێمە.
د ماوەیێ‌ بۆری دا كارگێرییا یانەیا دهۆك گرێبەستا چەند یاریزانێن نافخۆیا ئیراقێ‌ و پیشەكار راگەهاندی نە بۆ وەرزێ‌ نوو و بڤی شێوەیی: حسێن حەكیم ژ یانەیا دیوانییە، رێباز رەحیم و رابەر جەلال ژ یانەیا پێشمەرگەیا سلێمانی، عومەر عەتا ئەللا ژ یانەیا شرگات، جەبار كەریم ژ یانەیا ئەمانە بەغدا، پێشەكارێ‌ غانا رۆبێن ئەكوا، ژلایەكێ‌ دووڤی ب فەرمی گرێبەستا یاریزانێن خوە رێوان ئەمین و هەرسێ‌ پیشەكارێن خوە یانیك زاكێری، مۆزێز لۆكاس، نۆرۆ سۆلێ‌.
ژلایێ‌ خوەڤە یانەیا زاخۆ ژبلی راگەهاندنا گرێبەستا راهێنەرێ‌ خوە یێ‌ نوو یێ‌ قەتەر تەلال ئەلبەلۆشی و پیشەكارێ‌ بەرازیلی ئینك سۆسا چو گرێبەستێن دی نە راگەهاندنی نە، ژێدەرێن نێزیك ژ یانەیا زاخۆ دیار كریە كو د ماوەیێ‌ بهێت دا دێ‌ گرێبەستێن چەندین یاریزانێن دی هێنە راگەهاندن و ئەو چاڤەڕێ‌ نە حەفتییا بهێت راهێنەرێ‌ وان ب گەهیتە زاخۆ ژبۆ دانانا پلانێن خوە و دیسان دووڤچوونا ئەوان یاریزانێن وەرزێ‌ بۆری دناڤ خولێ‌ دا ژبۆ ئێكلاكرنا گرێبەستێن وان.
د بەرانبەر دا ژبەر كو یانەیا هەولێر ب یارییا دووماهییا كۆپا ئیراقێ‌ ڤە مژویل بوو و نەشیا چو پێنگاڤێن نووكرن یان ئینانا یاریزانان بكەن لەوما دهێتە پێشبینیكرن د ماوەیێ نێزیك دا كارگێریا یانەیێ‌ بەرنامەیێ‌ خوە رابگەهینت، ژلایێ‌ خوە یانەیا نەورۆز نووكرنا گرێبەستا راهێنەرێ‌ خوە كەریم وەلی راگەهاند و دووڤدا چەند گرێبەست ژی راگەهاند ژ وانا، مورتەزا هەدیب و موستەفا عەبدولجەلیل ژ یانەیا نەجەف، پیشەكارێ‌ غامبییا لامین ساماتا ئەوێن دێ‌ بۆ وەرزێ‌ بهێت دگەل یانەیێ‌ یاریێ‌ كەن.
ب گشتی ئەو یانەیێن د خولا پیشەكاران دا تایبەت یێن بەغدایی گرێبەستێن چەندین یاریزانان ئیمزاكرینە و هندەك ژی نووكرینە چاڤەڕێ‌ دهێتە كرن د ماوەیێ‌ بهێت دا زێدەتر بازارێ‌ ڤەگۆهاستنا یاریزانان گەرم بیت.

عەلی حاجی:

د داخویانیەکێ دا ستێرێ تیما ته‌پا پێی یێ یانه‌یا زاخۆ بۆ رۆژناما ئەڤرۆ دیار کر هەتا نوکە سێ گرێبه‌ست ژ یانەیێن پشکدار د خولا نایابا ئیراقێ دا هاتینە و چو بڕیار نەدایە و دگه‌ل زاخۆ ژی ئێكلا نه‌بوویه‌.
زێدەتر رەمەزان سەدیق یێ ناسیار ب سیپان سەدیق گۆت: وەرزێ بوری دا من شیا ئاستەکێ باش دگەل یانەیا زاخۆ د خولێن نایابا ئێراقێ و کوردستانێ یێن تەپا پێی دا ئاستەکێ باش پێشکێش بکەم و زێدەتر ژ سێ جهان د ناڤ یاریێ دا من یاری ئەنجامدا و هەر جهەێ راهێنەری پێدڤی ب من هەبا من ل وی جهی یاری دکر،ب شێوەیەکێ گشتی ئەز ژ ئاستێ خوە یێ رازی بوم و د شیانێن من دایە د سالێن بهێت دا ئاستەکێ باشتر پێشکێش بکەم ژبەر کو من شیانێن باشتر هەنە، هەر چەندە من هەڤبەستا دو سالان دگەل زاخۆ یا هەیی لێ ژلایێ یانەیێن پشکدار د خولا نایابا ئێراقێ یا تەپا پێی دا سێ گرێبه‌ست بۆ من هاتینە و ئێک ژ وان یانەیەکا کوردی یە و دو یێن دیتر ژی بەغدایی نە، لێ هەتا نوکە وی بەرسڤا چو گرێبه‌ست نەدایە یێن وی بۆ من هاتین، ئەز لەزێ ناکەم د ڤی بابەتی دا و دێ زێدەتر چاڤەرێکەم.
ناڤبری گۆت ژی: هەتا نوکە ئەز خوه‌ ب یاریزانێ یانەیا زاخۆ دزانم و دێ چاڤەرێ یانەیا خوه‌ بم کو دێ گرێبه‌ست ب چ شێوه‌ بیت دووڤدا دێ بریارا خوە دەم کو دێ دگەل زاخۆ مینم یان ژی دێ بریارا چونێ دەم.

ب فەرمی ستێرێ‌ ئیڤۆاری و یاریزانێ‌ یانەیا بەرشەلۆنا فرانك كێسی گرێبەستا یانەیا ئەهلی جەدە یا سعۆدیێ‌ ئیمزاكر و بڕیارە ئەڤرۆ بگەهیتە ناڤ رێزێن یانەیێ‌ دا پشتی پشكنینین پێدڤی بۆ هاتینە كرن.
ل دووڤ رۆژنامەیا ئەلریازییە یا سعۆدیێ‌ یانەیا ئەهلی گرێبەست دگەل ستێرێ‌ بەرشەلۆنا فرانك كێسی بۆ ماوەیێ‌ سێ‌ وەرزان هەتا 2026ێ‌ ئیمزا كرییە و ئەڤرۆ دێ‌ ب فەرمی گەهیتە سعۆدیێ‌ بەری یارییا تیما وی یا نوو دگەل ئەلحەزم ژ گەڕا ئێكێ‌ یا دەستپێكرنا خولا سعۆدیێ‌ رۆشن، ل دووڤ رێكەفتنێ‌ یانەیا ئەهلی دێ‌ 11 بۆ 12 ملیۆن یۆرۆیان د ئێك وەرز دا پێشكێشی بەرشەلۆنا كەت د بەرانبەر دا 14 ملیۆن یۆریان سالانە وەكو ماف بۆ كێسی دێ‌ هێتە بەرهەڤكرن.
بۆ زانین یانەیا ئەهلی بەری وی یاریزانێ‌ مانچستەر ستی یێ‌ جەزائیری ریاز محرز، یێ‌ بەرازیلی و یانەیا لیڤەرپۆل رۆبێرتۆ فێرمینۆ و یێ‌ سینیگالی و چێلسی ئیدواردۆ مێندی و یێ‌ فرەنسی سانت ماكسیمان ئیناینە دناڤ رێزێن تیما خوە دا.

قەیس وەیس:

د داخویانیەكێ‌ دا سەعید خەلیل ئەندامێ‌ فێدراسیۆنا تێنسا ئەردی یا ئیراقێ‌ دیار كر ئەڤرۆ هەلبژارتیێن ئیراقێ‌ ژ وانا پێنچ كەس وەكو شاند یێن ئاستێن جودا بۆ كوڕان و كچان گەهشتنە وەلاتێ‌ مسرێ‌ ب مەرەما دانانا كەمپەكێ‌ راهێنانێ‌ ئەوا دێ‌ بۆ ماوەیێ‌ 12 رۆژان ل دووڤ بەرنامەیێ‌ كادرێ‌ راهێنانێ‌ بەردەوامبیت خوە بەرهەڤكرن بۆ چەند قارەمانیێن داهاتی ژ وانا ئۆلمپیادا ئاسیا.
زێدەتر ناڤهاتی ئەوێ‌ دهەڤ دەم دا سەرۆكێ‌ شاندێ‌ هەلبژارتیێ ئیراقێ‌ یە بۆ رۆژنامەیا ئەڤرۆ گۆت: ئەڤرۆ شاندنێ‌ هەلبژارتیێن ئیراقێ‌ ب هەمی ئاستێن خوە كو 23ێ‌ یاریزانێن كوڕ و كچ گەهشتنە پایتەختێ‌ وەلاتێ‌ مسرێ‌ قاهیرە ب مەرەما دانانا كەمپی راهێنانێ‌ ئەوا دێ‌ هەتا 19ێ‌ ڤێ‌ مەهێ‌ بەردەوام بیت خوە بەرهەڤكرن بۆ قارەمانیێن داهاتی ل سەر ئاستێ‌ عەرەبی و ئاسیا تایبەت ئۆلمپیادا ئاسیا ئەوا بڕیارە هەڤڕكیێن وێ‌ ل چڕییا ئێكێ‌ یا بهێت وەلاتێ‌ چینێ‌ مێڤاندارییا وێ‌ بكەت، پێنەڤێت ئەڤ كەمپە ل دووڤ پلانا كادرێ‌ راهێنانێ‌ و فیدراسیۆنا تێنسا ئەردی یا ئیراقێ‌ پێخەمەت وەرگرتنا زێدەترشارەزاهیی و بلندكرنا ئاستێ‌ هەمی یاریزانان.
هەروەسا سەعید خەلیل گۆت: د ناڤ شاندێ‌ هەلبژارتیێ‌ ئیراقێ‌ دا هەر سێ‌ كچێن پارێزگەهێ‌ و یانەیا دهۆكێ‌ هانا ئاڤدەل حەسەن، زەلال سەعید خەلیل و لارا ئاڤدەل حەسەن ئەوا دێ‌ ل راهێنانێن وان ل دووڤ پلانەكا رێكخستی یا تیۆری و پراكتیكی بن و هەردو یاریزانان لارا و خویشكا وێ‌ هانا ئاڤدەل دێ‌ بەرهەڤییان ژی بۆ ئۆلمپیادا ئاسیا كەن.
ژلایەكێ‌ دووڤە ناڤهاتی ئەوچەندە ژی ئاشكەرا كر د كۆمبوونا وان یا دووماهیێ‌ بڕیار هاتیە دان خولا وەرزێ‌ نوو یێ‌ خولا پلا ئێك بهێتە رێكخستن و ئەو یانەیێن رێزێن دووماهیێ‌ یێن خولا پلا نایاب پاشڤە بهێنە پلا ئێك و دێ‌ د دەمەكێ‌ نێزیك ژڤانێن چالاكیێن داهاتی ژی هێنە راگەهاندن دیسان پێدڤیێن وەرزشی بۆ یاریزان و راهێنەرێن هەلبژارتیێ‌ ئیراقێ‌ هاتنە بەلاڤكرن ژبۆ رێكخستنا درێسێ‌ هەمی یاریزانان.

گۆلپارێزێ‌ هەلبژارتیێ‌ ئەلمانیا و یانەیا بایرن میۆنخ مانۆێل كەیفخوەشیا خوە دیار كر ئەو ژ قۆناغا نەشتەرگەریێ‌ قۆرتال بوویە و د نوكە دا چوویە د قۆناغا راهێنانێن دەستپێكی و باوەری هەیە بۆ وەرزێ‌ نوو یێ‌ بەرهەڤبیت.
نۆیێر بۆ رۆژنامەیا بێلد گۆت: من گەلەك نەخۆشی د نەشتەرگەرییا پێ‌ خوە دا دیتینە و دەرئێخستنا پارچەكا ئاسنی د جهەكێ‌ هەستیار یا چۆكێ‌ پێی، هاتبوومە ئاگەهداركرن كو ڤەگەڕیانا من یا ب زەحمەتە و من باوەر نەدكر دێ‌ دۆبارە د ناڤ یاریگەها دا شاد بمەڤە، لێ‌ سۆپاس بۆ خۆدێ‌ و هەمی نۆژدار و یانەیا خۆ دكەم بزاڤێن مەزن دكرن ئەز ڤەگەڕییم، ئەڤچەندە هێزەك دا من ئەز ل دووڤ ئامۆژگاریێن نۆژداری بچم هەتا ب گەهمە ئەڤرۆ كو دەلیڤە بۆ من بهێتە دان راهێنانێن دەستپێكی یێن پشتی نەشتەرگەریێ‌ بكەم، پێشبینی دكەم دێ‌ بۆ وەرزێ‌ نوو بهێز ڤەگەڕێنم و سۆپرایزێ‌ بۆ جەماوەرێ‌ یانەیێ‌ و هەلبژارتیێ‌ ئەلمانیا چێكەم.