دیدار، سالار محەمەد دۆسكی:
پێشمەرگێ دێرین، فەیسەل ئەمین محەمەد صالح رۆستینكی دۆسكی خەلكێ گوندێ روستینكێ یە ل سالا 1957 ل گوندێ رۆستینكێ ژ دایك بوویە، ژ بەر تێكچوونا كاودانێن وی سەردەمی و دەسپێكا شۆڕەشا ئیلونێ مالا وان ژ گوندی بۆ باژێرێ دهۆك دهێتە ڤەگوهاستن.
پێشمەرگێ دێرین، فەیسەل ئەمین محەمەد سالح بێ بەرنیاس ب فەیسەل رۆستینكی، دیدارەكێ دا ل گەل رۆژناما ئەڤرۆ بەحسێ ژیانا خوە یا زارۆكینیێ دكەت، و ئەو كاودانێن تێدا دەربازبووین و گۆت: ل پائیزا سالا 1961ێ خانیێ باپیرێ من (محەمەد صالح رۆستینكی) ژ هەمی خانیێن گوندی مەزنتر بوو، رۆژەكێ موختارێ گوندی گازیكر فرۆكە هاتن و مە هەمی یا پێكڤە قەستا خانیێ باپیری كر، و فرۆكان رەمی كر و دئەنجامدا حەفت كەسێن سڤیل ل گوندێ مە شەهید بوون ئێك ژوانا خویشكا من یا هەشت سالی بوو و سەرێ وێ ژ كەلەخێ وێ هاتە جوداكرن و دایكا من ژی بگرانی بریندار بوو هەر وێ شەڤێ باب و خالێ من هێسترەك ئینا و ژ گوندی گەهاندینە (كانی چناركێ) و دایكا من گەهاندە (مانگێشكێ) و هاتە رەوانەكرن بۆ نەخوشخانا (دهۆك) دیسا ئە ژی بریندار ببووم و هەتا نوكە جهێ برینا من یێ دیارە، ئانكو مەچاڤێن خوە ڤەكرن ل بەر دەنگێ توپ و فرۆكان و لەوما كوردینی ما دسەرێ مە را باب و برایێن مە هەر كورد بووینە و ئەم بڤی رەنگی مەزن بووین و هاتینە ئاڤاكرن و ئەمژی دێ زارۆكێن خوە ل سەر ڤێ رێبازێ فێركەین و پەروەردە كەین چونكە مە چ رێك ژڤێ ریكێ شەریفتر نەدیتی نە قەست بكەینێ.
فەیسەل رۆستینكی زێدەتر گۆت: باپیرێ من یێ دەولەمەند بوو و خانیەك ل (تاخێ شێلێ) كری بوو و ئەم حەفت مال دوی خانی دا دژیاین و هەر مالەك دژوورەكێ ڤە بوو و خواندنا خوە یا سەرەتایی ل قوتابخانا (جدیدە) مە دەست پێكر، و ژ قوتابیێن هەرە زیرەك بووم ل قوتابخانێ، وی دەمی ژلایێ مال ڤە دهاتمە شیرەتكرن كو خواندن گەلەك یا باشە و مرۆڤ ب خواندنێ پێش دكەڤیت، وبڤی رەنگی مێشكێ مە هاتە پەروەردەكرن و بخوینە تو خوسارەت نابی و چەند بخوینی هندێ تینی و خواندن چ جاران ب دووماهی ناهێت، سێ پەروەردە هەنە ئێك یا (مال، قوتابخانێ، پشتی دەرچوونێ) كا چ فێربووی و بەرهەمێ تە دێ چەوا مفا ژێ هێتە وەرگرتن، وێنێ دهۆكێ ل سالێت شێستان هێشتا پێش چاڤێن منە، (تاخ، و كەسانێن ناڤدار) وی دەمێ تێدا ژیایم پارێزگەها دهۆكێ بگشتی پێنجی ترۆمبێل نەبوون و ب هژمار دزانم كیشكا كێ بوو، مامۆستا و قوتابخانە هەمی بیرا منن، بیرا من دهێت ل قوناغا سەرەتایی رێڤەبەرێ مە (عەبدوللا سیاری) بوو، مە مامۆستایەكێ مەسیحی هەبوو دگۆتنێ (پەتروس) یێ بەرواری بوو مامۆستایەكێ خودان كەسایەتیەكا بلند بوو و كەسەكێ ب زەووق بوو و رەنگە گەلەك جاران ستران بوومە دپولێ دا دگۆتن و قوتابیێ زیرەك مامۆستا حەژێ دكەن هەر كورێ كێ بیت مامۆستا حەژێ دكەن، وی دەم وی دەمی قوتابیەكێ زیرەك بووم، جەژنا مەسیحی یا هات و ل گەلدو هەڤالان بناڤێ(شەعبان) یێ دی ل بیرامن نینە مە قەستا مالا مامۆستایێ خوە یێ مەسیحی كر ب مەرەما پیرۆزكرنا جەژنێ، وی دەمی (جسرەك) ئانكو پرەك هەبوو یا بچوویك ل بازاری وی دەمی ئاسنگەرەك نێزیك وی جهی هەبوو (مەڕ و مەربێل) وی ئاسنگەری چێ دك رن و مالا مامۆستایێ مە یێ مەسیحی ل نێزیك ئاسنگەریێ بوو، چووینە جەژنێ و مامۆستایی بخێرهاتنا مەكر و كەیفا خوە ب مەئینا و سێنیكا شریناهی یا ئینا و جگارە ژی ل گەل بوون و مامۆستای گۆتی بخوە جگارا راكەن مە گۆتێ ناكێشین مامۆستا گۆت بخوە راكەن جەژنە و هەر ئێك ژ مە بخوە ئێك راكر و مە جگارێن خوە ب رێكێ ڤە بەردانێ و بەرەف مال هاتین و هەمان دەم كومەكا مامۆستایێن خوە لایێ دیێ جادێ دیتن ئەو ژی چوونە جەژنا مامۆستا (پتروسی) و مە جگارێن خوە ڤەشارتن، رۆژا پاشتر مامۆستا(عەبدوللا سیاری) دەرگەهێ پولێ ڤەكر وێ رۆژێ مە وانا (علوم) هەبوو گازی من كر چاف شین وەرە و گەرم هات گۆت ئەو تو كی بوون هەوە دهی جگارە كێشا و گۆت بێژە هەڤالێن خوە وەرن، بۆچی هەوە جگارە كێشا و ب شفكا هنارێ چار دار ل دەستێن من دا و چار دار ل پشتا تلێن من ژی دان چریسك ژ چاڤێن من چوون و من ژ وێ رۆژێ جگارە نەكێشانە ڤە.
پێشمەرگێ دێرین، فەیسەل رۆستینكی زێدەتر گۆت: پەروەردا مال هەمی گاڤا بنیاتە بۆ ئاڤاكرنا زارۆكی و ئەو شەر و نەخوشیێن مللەتێ مە تێدا دەربازبووین هەر دەم دمێشكێ مە دا بوون و هەر دەم حوكمەت دگۆندێ مە رادەربازدبوو و بەرەف ئامێدیێ دچوون و زولم و زورداری یا مللەتێ كوردان دهاتەكرن، بیرا من ل رێكخستنێن نهێنی دهێت پشتی سالا 1975ێ كورمامێ من دەرچووویێ كولیژا ئەندازیاری و كورخالەتێ من حاكم (سالم) و جیرانێ من ئەڤە هەمی یان كارتێكرن ل سەر من هەبوو و دەمێ هاتینە دەستەسەركرن گەلەك جاران ب فرۆكێ چوویمە زیندانا ئەبو غورێب و من سەردایە، جارەكێ پوستەكێ رێكخستنێ من تیپ كر و باش وەرپێچا و دانا بن پێ خوە و بن گورا خوە و من گەهاندە زیندانا ئەبو غورێب و رادەستی رێكخستیێن مە كر، دووڤدا ئەم ژێككفەتبووین هندەك هاتنە سێدارەدان و هندەك هاتنە زیندانكرن و ئەڤە بۆ ئەگەر زێدەتر مرۆڤ ل كێشا مللەتێ خوە یێ رژدبیت، قوناغا كولیژێ هەر قوتابیەك چوو كولیژەكێ و رێكخستنێن نهێنی ئاشكەرابوون، كەفتنە دەستێ بەعسیان لێ كوردینی هەر هەبوو و وی دەمی مە باوەری هەبوو كورد سكالایێ ل كوردەكی ناكەت، دا چینە بەراهی یا ترۆمبێلێن مەزنێن توركا و مە داخازا كاسێتێن (شڤان پەروەری) دكر و بەلاڤەدكرن و جارا ئێكێ من گوهداری یا (شڤان پەروەری) كری ل سالا 1977ێ بوو، و راستی ئەڤ هونەرمەندە قوتابخانە بوو و ب دەهان مرۆڤ سەرا ئەڤی دەنگی هاتنە سێدارەدان، و هەر دەم دلێ مەیێ بترس بوو كەنگی دەرگەهێ مرۆڤی دهێتە قوتان و ئەمن دێ مرۆڤی گازی كەت.
پێشمەرگێ دێرین، فەیسەل رۆستینكی گۆتژی: ل سالا 1979ێ بۆ 1980 خواندنا كولیژا پەروەردێ پشكا بایلوجی ل بەغدا من بدووماهی ئینا و ل سالا 1981ێ هاتمە دامەزراندن وەك مامۆستا ل قوتابخانا (دووا ناڤنجیا سەرسنگێ) ل سەرسنگێ و بتنێ سالەكێ من دەوام كر وەك مامۆستا و بیرا من دهێت وێ سالێ رێژا سەركەفتنا قوتابیێن من 100% بوو و هاتینە خەلاتكرن ژلایێ رێڤەبەرێ پەروەردێ ڤە، ل سالا 1981ێ چوومە ناڤ رێزێن شۆڕەشا 26ی گولانێ و بوومە پێشمەرگە و 3/12/1982 چوومە ئیرانێ، وی دەمی دایك و بابێن من گەلەك حەژ دهۆكێ دكر و دیسا مالەك ل گوندی ژی هەبوو و مالا خوە ژ گوندی ئینا هاڤینگەها (سیارەتیكا) خویشك و برایێن من ل دهۆكێ دخواندن و بابێ كێم دهاتە دهۆكێ و ئەگەر هاتبا ژی دو شەڤا ل مالەكێ نە دنڤست چونكە ئەگەر حوكمەتێ زانیبا گەهشتیمە پێشمەرگە وی دەمی دا بابێ من هێتە دەستەسەركرن یان سێدارەدان یان دا هێتە ڕەوانەكرن بۆ باشورێ عیراقێ و ئەڤە ئێك ژ ئەگەران بوو دووركەفتیم و چوویمە ئیرانێ وی دەمی هزرا من ئەو بوو بچمە دەرڤە و خواندنا خوە یا ماستەرێ تەمام بكەم، ل نیسانێ سالا 1983ێ بۆ جارا ئێكێ من جەنابێ سەرۆك (مەسعود بارزانی) دیت و بابەتێ چوونا دەرڤە بۆ خواندنا ماستەرێ من ل گەل ڤەكر و جەنابێ وی نەهێلا بچمە دەرڤە، و گۆت مللەتێ كورد پێدڤی ب كەسانێن وەك تەیە هەر چ نەبیت تە باوەرناما باكالوریوس یا هەی وێ ئاخفتنێ گەلەك كارتێكرن ل سەر من هەبوو و مامە ل ئیرانێ و مە خەباتكر هەتا سەرهلدانا پیرۆز.
نيشاندان