د داخویانیەكێ دا جێگرێ سەرۆكێ یانەیا سێمێل یا وەرزشی نەرازیبوونا خوە ل سەر شێوازێ ژێگرتنا راهێنەر و یاریزانێن هەلبژارتیێ پارێزگەهێ دیار كر پشتی كو كادرێ نوو یێ راهێنانێ و تیمەك هاتیە پێكئینان ژبۆ پشكدار د قارەمانییا ئیراقێ ل سەر ئاستێ پارێزگەهان دا.
زێدەتر پەروەر حسێن گۆت: بۆ پشكدارییا هەر قارەمانییەكێ ل سەر ئاستێ پارێزگەهان دڤێت فیدراسیونا تەپا پێی یا پارێزگەهێ دگەل نوونەرێن هەمی یانەیێن پارێزگەهێ كۆمبن بۆ دیاركرنا پلان و بەرنامەیێن وێ قارەمانیێ و چاوانییا ژێگرتنا كادرێ راهێنانێ و یاریزانان لێ مخابن ئەڤچەندە نە هاتە كرن، فیدراسیونا دهۆكێ كادرێ راهێنانێ و یاریزان ل دووڤ حەزا خوە داناییە و چەند یانە پشتگۆهاڤێتنە ژ وانا یانەیا سێمێل و راهێنەرێن باژێرێ مە، ئەڤچەندە ژی غەدرە ل وەرزشا سێمێلێ هاتیە كرن و فەرق و جوداهی هاتیە كرن.
هەروەسان ناڤهاتی گۆت: مە كۆمەكا یاریزان و راهێنەرێن باش هەنە هەكە فیدراسیۆنا تەپا پێی یا پارێزگەهێ دگەل یانەیا سێمێلێ كۆمبوون كربا دا هەڤكار و پشتەڤانییا وان كەین بۆ بەرهەڤكرنا یاریزانان، لێ مخابن شێوازێ دروستكرنا هەلبژارتیێ پارێزگەهێ دروست نەبوویە و ئەم ب مافێ خوە د زانین و نە هاتینە ئاگەهداركرن، ئیدی بەس بیت سیستەمێ بەرژوەندییان و سەرخاترا فلان كەسی، یانەیا سێمێل پشكەكە ژ وەرزشا پارێزگەهێ ئەوا فیدارسیونا تەپا پێی كری مە هەست ب غدرێ كرییە، ئەڤە چەندین جارە یانە و كوڕێن سێمێلێ تووشی ئەڤێ نە حەقیێ دبن، هیڤییا مە ئەوە جهێن پەیوەندیدار دووڤچوونێ بكەن و مافێ یانەیا سێمێلێ ژی بۆ ڤەگەڕینن.
پەروەر حسێن: فیدراسیۆنا تەپا پێی یا پارێزگەهێ راهێنەر و یاریزانێن سێمێل پشتگوهـ هاڤێتینە
نيشاندان