د دیدارەكێ دا گۆلپارێزێ تیما تەپا پێی یا یانەیا دهۆك گەشبینییا خوە دیار كر سەرباری هاتنا چەند ئۆفەران لێ هندی یانەیا پێدڤی ب شیانێن وی هەبیت ئەو گرێبەستا چو یانەیان ئیمزا ناكەت و بۆ وەرزێ بهێت تیما وان دێ ب شێوەكێ باشتر و بهێزتر هێتە دناڤ خولا ئیراقێ یا پیشەكاران دا.
زێدەتر بەشار ئەحمەد بۆ رۆژنامەیا ئەڤرۆ گۆت: سەرباری تیما مە ل رێزبەندیا نەهێ راوەستیا لێ دووڤ ئەوان كاودانێن ل سەر تیمێ هاتین تایبەت د قۆناغا دویێ دا و جارا ئێكێ یە پشتی ڤەقەتیانا زێدەتری شەش سالان دبینم یا باش بوو و پشكداریەكا سەركەفتی بوو، چنكو دەم یێ كورت بوو دناڤبەرا خولا پلا ئێك و پلا نایاب، نەبوونا یاریزانێ بەرهەڤ، د قۆناغا دویێ دا وەستیان و گڤاشتن هەبوون، لێ وەكو پشتەڤانی كارگێریا یانەیێ ب ماددی و مەعنەوی بەردەوام پشتەڤان بوون، بۆ وەرزێ بهێت ژی ب هیڤییا وێ چەندێ لایەنێن پەیوەندیدار پشتەڤانیا یانەیێ بكەن و گەشبینم دێ باشتر و بهێزتر ڤەگەڕیێن، چنكو كارگێرییا یانەیێ وەرزشڤانن و رژدی كار دكەن.
ژلایەكێ دووڤە گۆلپارێزێ یانەیا دهۆكێ گۆت: هێشتا من گرێبەستا خوە نوو نەكرییە و هەردەمێ كۆمبوون هاتە كرن دێ بڕیارا خوە ئێكلا كەم لێ هندی یانەیا دهۆك پێدڤی ب شیانێن من هەبیت ئەز گرێبەستا چو یانەیان نا گرێبەدەم سەرباری هەبوونا زێدەتر سێ ئۆفەرێن بۆ من هاتین، لێ ژبەركو ل خالێن سەركەفتنێ و رێزگرتنێ ل یانەیا دهۆك یا هەیی و هەبوونا جەماوەرەكێ دلسۆز و پشتەڤان ژی، ب ئۆمێدێن بۆ وەرزێ بهێت دێ ب ئاستەكێ بلند هەڤڕكیێ كەین.
ل دووماهیێ ناڤهاتی نە ڤەشارت كو ئەو تووشی نەحەقیێ بوو د دەمەكی دا و گۆت: د خولا پلا ئێك هەتا گەهشتینە نایابێ و هەمی یاریێن مە ئەنجامداین ب بەلگەیا پرانییا جەماوەری و وەرزشڤانان شیابوون ئاستەكێ مەزن نیشان بدەین لێ ژبەر خەلەتیەكێ راهێنەرێ من بۆ پێنچ یارییان ئەز دوورئێخستم ئەڤە ژی كارتیكرنا خوە یا دەرۆنی هەبوو لێ رژدییا من یا بەردەوامبوو ژبۆ باشتركرنا ئاست و شیانێن خوە، هەرچەوابیت دەستخووشیا كارگێری، جەماوەر، یاریزان و كادرێ راهێنانێ دكەم بۆ وەرزێ بۆری ئێك دل و گیان كارەكێ مەزن دهاتە كرن.
بەشار ئەحمەد: هندی دهۆك پێدڤی ب شیانێن من بیت گرێبەستا چو یانەیێن دی ئیمزا ناكەم
نيشاندان