دهێتە چاڤەڕێ‌ كرن سوبەهی و ئەینیا بهێت یاریێن گەڕا 38ێ‌ و دووماهییا وەرزێ‌ 2022- 2023ێ‌ یا خولا پلا نایابا ئیراقێ‌ یا تەپا پێی ئەوا ب سیستەمێ‌ خوە یێ‌ كلاسیكی ڤە دێ‌ هێتە كرن ژبەر كو بڕیارە ل وەرزێ‌ بهێت ب سیستەمێ‌ نوو یێ‌ پیشەكاری خولا ئیراقێ‌ بهێتە ئاپدێتكرن پشتی فیدراسیۆنا تەپا پێی یا ئیراقێ‌ دگەل فیدراسیۆنا ئسپانی رێكەفتین.
دهۆك دێ‌ ل بەغدا خاترا خوە ژ وەرزەكێ‌ ب ئاستەنگ خازیت
بڕیارە سوبەهی تیما تەپا پێی یا یانەیا دهۆك دێ‌ ل پایتەختێ‌ ئیراقێ‌ بەغدا بیتە مێڤانا یانەیا زەورا د یارییەكا ب هێز دا بۆ كوڕێن ئەلهۆیێن چیا و دێ‌ پەردێ‌ ل سەر پشكداریێن خوە یێن وەرزێ‌ ئەڤ سالە دا دانیت ئەوا دێ‌ ل دەمژمێر 7:15ێ‌ شەڤ هێتە كرن، تیما دهۆكێ‌ ئەوا ب 49 خالا رێزا 12ێ‌ دهێت ژ 11 سەركەفتن، 16 وەكهەڤی و 10 خوسارەتییان دهێت، بەرانبەر دا تیما زەورا ئەوا هیڤیێن ئەڤ سالە یێن ناسناڤی ژ دەستدایین دێ‌ بزاڤێ‌ كەت د ناڤ ئەرد جەماوەرێ‌ خوە دا دیارییا دووماهیی ب سەركەفتن پێشكێشی وان بكەت ئەوا نوكە ب 67 خالان رێزا سێیێ‌ دهێت، د كاروانێ‌ تیما دهۆكێ‌ یا وەرزێ‌ ئەڤ سالە دا گوهۆڕین كەفتە ئاست و ئەنجامێن وێ‌ هەر ژ گەڕا 31ێ‌ ل رێزا شەشێ‌ ب 45 خال كۆمكربوون لێ‌ د گەڕا 32ێ‌ دا پشتی ب چار گۆلان بەرانبەر دو گۆلان دگەل نەجەف د ئەردێ‌ خوە دا خوسارت بوویی پاشڤە هاتە رێزا هەشتێ‌، دووڤدا یاری بۆ یاریی ئاست و ئەنجام خوەجه نەبوون، هەرچەندە ستێرا وێ‌ یێ‌ كۆتیڤۆاری گراهێریانیك زاكێری نەه گۆل و برێنس ئۆبۆكۆ هەشت گۆل ئینابوون.
زاخۆ دێ‌ بزاڤێ‌ كەت دیارییەكێ‌ ب دەتە جەماوەرێ‌ خوە
ژلایێ‌ خوەڤە تیما یانەیا زاخۆ دێ‌ ل رۆژا ئەینییا بهێت دەمژمێر 7:15 شەڤ بهێت ل یاریگەها خوە و دناڤ ئەرد و جەماوەرێ‌ خوە دا بیتە مێڤانداریا یانەیا نەفت ئەلبەسرا كەت، تیما كوڕێن خابووری ئەوا د كاودانەكێ‌ نە گۆنجایی دا ژ ئاست و ئەنجام دەرباز دكر ل دووماهیێ‌ شیا مانا خوە د خولێ‌ دا 41 خال كۆمكرینە و رێزا 15ێ‌ دهێت ژ نەهـ سەركەفتن، 14 وەكهەڤی و 14 خوسارەتی، ژلایێ‌ خوەڤە نەفتا بەسرا ژی مانا خوە پاراستیە و ب 42 خالان رێزا 14ێ‌ دهێت، سەركەفتنا ڤێ‌ یاریێ‌ دێ‌ هەڤڕكی بۆ رێزا 14ێ‌ بیت، تیما زاخۆ ئەوا د دەمەكی دا ترسا داكەفتنێ‌ ل سەر هەر هەبوو لێ‌ پشتی گوهۆڕتنا راهێنەرێ‌ خوە حەیدەر عەبدلئەمیر و هاتنا یێ‌ سوری نزار مەحرۆس ئاستێ‌ وێ‌ ژ بەری هاتنا وی باشتر لێهاتن.
هەولێر و نەورۆز چاڤ ل سەركەفتنێ‌ نە
ژ یاریێن سوبەهی تیما یانەیا نەورۆز دێ‌ ل یاریگەها خوە دەمژمێر پێنجێ‌ ئێڤاری یانەیا جەوییە مێڤان كەت، نەورۆز خودانا 51 خالان رێزا نەهێ‌ دهێت و جەوییە ب 75 خالان رێزا دویێ‌ دهێت، هەر ژ یاریێن سوبەهی، دیوانییە- نەفت ئەلمیسان، نەفت ئەلوەسەت- كەربەلا، ژیاریێن رۆژا ئەینییا بهێت، تیما یانەیا هەولێر خودانا 55 خالان رێزا حەفتێ‌ دهێت دێ‌ مێڤاندارییا یانەیا ئەلقاسم كەت ئەوا ب40 خالان رێزا 16ێ‌ دهێت هەر ژ یاریین رۆژا ئەینی، نەجەف- تەلەبە، كارەبا- نەفت، سیناعە – كەرخ،
شورتە ناسناڤ پاراست و زەورا زووترین جار بوویە قارەمان
بۆ جارا دویێ‌ ل دووڤ ئێك تیما یانەیا شورتە یا بەغدایی ناسناڤێ‌ خولا پلا نایابا ئیراقێ‌ یا تەپا پێی و بۆ جارا حەفتێ‌ د دیرۆكا خوە دا ب دەستڤە ئینا بەری ب دووماهی هاتنا خولێ‌ ئێك گەڕ پشتی 79 خال كۆمكرین ب جووداهیا چار خالان ژ هەڤڕكا خوە یانەیا جەوییە رێزا ئێكێ‌ بهێت و ناسناڤێ‌ خولێ‌ مسۆگەر بیت، گۆلكەرێن وێ‌ عەلا عەبدولزەهرە ب12 گۆلان، ئەحمەد فەرحان ب10 گۆلان و محەمەد ئەلمواسە ب نەه گۆلان شیان ببنە ئەگەرێن سەركەفتنێن گەلەك یاریێن تیما خوە، ل دووڤ تۆمار و دیرۆكا خولا ئیراقێ‌ دا ئەوا ئێكەم جار ل وەرزێ‌ 1974-1975ێ‌ هاتیە كرن و جەوییە بۆ جارا ئێكێ‌ بدەستڤەئینایی، یانەیا زەورا خودانا بلندترین رێژەیا ب دەستڤە ئینانا ناسناڤایە ب 14 جاران، جەوییە حەفت جاران، شورتە بوو حەفت جار، تەلەبە پێنچ، هەولێر چار، یانەیا ئەلرەشید سێ‌ جاران، هەر ئێك ژ یانەیا دهۆك، نەفت ئەلوەسەت، ئەلجەیش، سەلاحەدین، مینا هەر ئێك ژوان جارەكێ‌ ب دەستڤە ئیناینە.

قەیس وەیس:

دهێتە چاڤەڕێ‌ كرن سوبەهی پێنج شەمبیێ‌ هەڤڕكیێن قۆناغا دووماهیێ‌ ژ خولا پلا دو یا كوردستانێ‌ دەربازبوون بەر ب پلا ئێكا تەپا پێی بهێنە ئەنجامدان، هەردو یانەیێن تەناهی و شێلادزێ‌ وەكو نوونەرێن پارێزگەها دهۆكێ‌ نە و ب هیڤیێن مەزن و كاودانێن هەستیار رژدن هەڤڕكیێ‌ بۆ پلێتا دەربازبوونێ‌ بكەن ئەوا شەش یانە بۆ دو پلێتێن دەربازبوونێ‌ دێ‌ شەڕی كەن و یاریێن وان ب شێوەیێ‌ خول ئێك قۆناغ دێ‌ هێنە كرن.
تیما یانەیا تەناهی دێ‌ ل پارێزگەها سلێمانیێ‌ بیتە مێڤانا یانەیا مەخموور، سەرۆكێ‌ یانەیا تەناهی جاسم شەعبان بۆ رۆژناما ئەڤرۆ گۆت: ئەركێ‌ مە د قۆناغا دووماهیێ‌ و ڤەبڕ دا ب سانەهی نینە ژبەر كو كاودانێن مە یێن دارایی د هەستیارن لەوما مە چەند بزاڤ كرینە هەڤكاریا مە بهێتە كرن دا بشێن ب سەركەفتیانە كاروانێ‌ خوە بڕێڤە بەین و بەر ب خولا پلا ئێك ڤە بچیت، یا د شیان دا بیت دێ‌ بۆ سەركەفتنان كەین و نا راوەستیین و دێ‌ رژدبین بۆ ئارمانجا خوە.
ژلایێ‌ خوە تیما تیما شێلادزێ‌ نوونەرا دویێ‌ یا پارێزگەها دهۆكێ‌ دێ‌ مێڤاندارییا یانەیا پەروەردە یا هەولێری كەت، تیما شێلادزێ‌ ب كۆمەكا گەنجێن باش گەشبینن بەردەوامیێ‌ ب دەنە سەركەفتن و تۆماركرنا دەستكەفتەكێ‌ بۆ باژێر و پارێزگەها خوە.
ژ یاریێن یێن رۆژا پێنج شەمبییا بهێت، بەختیاری دێ‌ مێڤاندارییا هەلبجەیا شەهید كەت بۆ زانین 19 یانەیێن هەرێمێ‌ پشكداری كربوون و هاتبوونە بەلاڤكرن ل سەر سێ‌ كۆما، كۆما پارێزگەها دهۆكێ‌ پێكهاتی بوون ژ یانەیێن، شێخان، تەناهی، باتیفا، بەردەرەش، شێلادز، دینارتە.

پشتی یانەیا دهۆك سكالایەك ل سەر یانەیا ئەلقاسم پێشكێشی لژنەیا رێكۆپێكیێ‌ ل فیدراسیۆنا تەپا پێی یا ئیراقێ‌ كری ل سەر نەبوونا ترۆمبێلا ئەمبولانس یا هەوارهاتنێ‌ د ناڤ یاریگەهێ‌ دا كری كو د دەمێ‌ دەستنیشانكری دا بەرهەڤ نەبوویە ئەڤچەندە دژی رێنمایێن فیدراسیۆنێ‌ یە و ئەوە یانەیا د ماوەیێ‌ 15خولەك بەری یاریێ‌ بەرهەڤ نەبیت دێ‌ هێتە سزادان، سكالایا یانەیا دهۆك د یاریا وان ژ چارچووڤێ‌ یا خولا پلا نایابا ئیراقی بوو و پشتی بۆرینا 22خولەكا ژ نوو هاتە د ناڤ یاریگەهێ‌ دا.
لژنەیا رێكۆپێكیێ‌ ئەڤ سكالایە ڕەدكر ب بوهانا هندێ‌ ل دووڤ راپۆرتا سەرپەرشتێ‌ یاریێ‌ و دادڤانان كو ترۆمبێلا ئەمبولانس د خولەكا 13ێ‌ دا هاتییە د ناڤ یاریگەهێ‌ دا بئاگەهداربوونا سەرپەرشتێ‌ یاریێ‌ و ئەو نەرازیبوون ناهێتە وەرگرتن، ژلایێ‌ خوەڤە یانەیا دهۆك ب بەلگە و ڤیدیۆ دیاركرییە كو ئەوا هاتیە روودان دڤیابا یانەیا ئەلقاسم هاتبا سزادان لێ‌ نەرازیبوونا وان هاتە ڕەدكرن، دیاركریە كو هەموو مەرجێن دروست یێن نەرازیبوونێ‌ پێشكێشی لژنەیا رێكۆپێكیێ‌ كرینە و بڕیارا وان یا دادی نینە و بێ‌ دەنگییا فیدراسیۆنا تەپا پێی یا ئیراقێ‌ ب شەرمزاری و كرێتی دا دیاركرن و ئەڤچەندە هەكە بەردەوامبیت دێ‌ بیتە ئەگەر ئێدی باوەری ب بڕیارێن وان نەمینیت، دیسان دیاركر ژ دەستدانا خالێن ڤێ‌ یاریێ‌ بووینە ئەگەر رێزبەندیێ‌ ژی پاشڤە بچیت و خویاكر گیرۆبوونا بڕیارێ‌ پشتی 20 رۆژان بخوە جهێ‌ گۆمانێ‌ یە و یانەیا دهۆك هزر دكەت كو چەند دەست ل پشت گوهۆڕینا بڕیارێن لژنەیا رێكۆپێكیێ‌ هەنە و ناهێلێن كارێ خوە ب باشی ئەنجام بدەن و ئەڤچەندە ژی باش دیاربوو د ڤی وەرزی دا و چەند یانەیێن دی ژی گازندە هەبووینە.

هەرهین محەمەد:

د داخویانیەكێ‌ دا نەشوان عەلی راهێنەرێ‌ یانەیا دهۆك بۆ ئەڤرۆ گۆت: ئەڤە بۆ دەمەكێ‌ درێژ نینە ئەكادیمی هاتیە ڤەكرن و ژمارەكا مەزن یا زارۆكان پشكداربووینە و مژیلی هندێ‌ نە هندەك یاریزانان ب هەلبژێرین و یانەیا دهۆك ئاڤا بكەن و مە گەلەك ئەكادیمی و یانە هەنە و هەر ئەم پەنایێ‌ د بەینە بەر یاریزانێن بیانی، لێ‌ بتنێ‌ هەكە چاڤدانا یاریزانێن مە بهێتە كرن چەند سالەكێن دی ئەم پێدڤی چو یاریزانێن بیانی نابین، لێ‌ ب مخابنی ڤە چاڤدانا یاریزانان گەلەك یا كێمە و ڤەبوونا ئەكادیمی یا وەكو پرۆژەكێ‌ بازرگانی لێهاتیە دوەرزێ‌ هاڤینێ‌ دا و پاشان دبیتە دەمێ‌ دەوامان زارۆك چەند یێ‌ زیرەك بیت ژی دبیت باوەریا دایك و بابا نەهێت زارۆیێ‌ خوە بهێلتە ل ئەكادیمیێ‌ كو دێ‌ چاڤدانا ئەوی هێتەكرن و هەكە چاڤدان هەبیت چەند سالێن دی دهۆك دێ‌ پر بیت ژ یاریزانێن باش و دبیت ئەم یاریزانان ب هنێرینە ژدەرڤەی وەلاتی ژی.
گۆت: زارۆكێن مە گەلەك حەزژ یاریا تەپاپێ‌ دكەن و تەماشە دكەن و پێڤە هاتینە گرێدان و گەلەك ژ ئەوان ژی بووینە یاریزان و و هەبووینە هندی حەزژ تەپاپێ‌ كری ل دووماهیێ‌ بووینە یاریزانەكێ‌ باش راستە ل پارێزگیها دهۆكێ‌ بتنێ‌ گرنگی ب دو یاریان دهێتە دان و نوكە مە دو سێ‌ ئەكادیمیێن باسكت بوولێ‌ هەنە خولێن تایبەت ب باسكتبولێ‌ هاتینە ڤەكرن و زارۆك ژی ب رێژەكا باش پشكداردبن ب تایبەت رەگەزێ‌ مێ‌.

بڕیارە سوبەهی پێنج شەمبی مۆندیالا جیهانی ل سەر ئاستێ‌ خانمان ب پشكدارییا 32 هەلبژارتیان ل وەلاتێن ئۆسترالیا و نیۆزیلەندا بهێتە ئەنجامدان ئەوا بۆ جارا ئێكێ‌ ل سالا 1991ێ‌ دەستپێكری و هەلبژارتیێ نەتەوەیێن ئەمریكا وەكو بەربژارا سەرەكی یا بۆ ناسناڤێ‌ سێ‌ ل دووڤ ئێك شیایە بیتە قارەمانا جیهانێ‌ و ئەلمانیا خودانا دو ناسناڤ هەڤڕكن بۆ ناسناڤی.
هەر 32 هەلبژارتی هاتینە بەلاڤكرن ل سەر هەشت كۆما، یاریێن وان ب شێوەیێ‌ خول ئێك قۆناغ دێ‌ هێنە كرن دو هەلبژارتی دێ‌ دەربازبنە قۆناغا 16ێ‌ ئەو هەلبژارتیێن پشكدار ئەو ژی:
كۆما ئێكێ‌: نیۆزیلەندا، سویسرا، نەرویج، فلپین.
كۆما دویێ‌: ئۆسترالیا، ئیرلەندا، نیجییریا، كەنەدا.
كۆما سێیێ‌: كۆستاریكا، زامبییا، چاپان، ئسپانیا.
كۆما چارێ‌: ئنگلتەرا، دانیمارك، چین، هایتی.
كۆما پێنجێ‌: فێتنام، پۆرتۆگال، ئەمریكا، هۆلەندا.
كۆما شەشێ‌: جامایكا، پەنەما، فرەنسا، بەرازیل.
كۆما حەفتێ‌: ئەفریقییا باشۆر، ئیتالیا، ئەرجەنتین، سوید.
كۆما هەشتێ‌: كوریا باشۆر، ئەلمانیا، مەغرب.
یاریێن رۆژا پێنچ شەمبی: نیۆزیلەندا – نەرویج دەمژمێر 10ی سپێدێ‌، ئۆسترالیا- ئیرلەندا دەمژمێر ئێكێ‌ نیڤرۆ، یاریێن رۆژا ئەینی: نێجیریا- كەنەدا دەمژمێر پێنجی سپێدێ‌، فلپین- سویسرا دەمژمێر هەشت سپێدێ‌، ئسپانیا- كۆستاریكا دەمژمێر 10ی سپێدێ‌.
بۆ زانین هەلبژارتیێ‌ نەتەوەیێن ئەمریكا ب چار ناسناڤ دەستڤە ئیناینە، ئەلمانیا دو ناسناڤ، چاپان ناسناڤەك و نەرویج ناسناڤەك ئینایە.