هەولێر، قائید میرۆ:
جڤاتا دادوەریێ ل هەرێما كوردستانێ ئامارا بەردانێ یا دو سالێن بۆری بەلاڤ كر و تێدا دیار كریە كو سالانەرێژا بەردانێ ل سەر ئاستێ هەرێما كوردستانێ بەر ب زێدەبوونێ یە، ل سالا بۆری بتنێ ل دادگەهێن دهۆكێ هزار و 992 حالەتێن بەردانێ هاتینە تۆماركرن، چالاكڤانەك ژی دبێژیت، هەتا ئەگەرێن پەیدابوونا بەردانێ نەهێنە چارەسەركرن دێ رێژا بەردانێ هەر بلند بیت.
جڤاتا دادوەریێ ئامارا بەردانێ یا دو سالێن بۆری بەلاڤ كریە و تێدا هاتیە: رێژا بەردانێ سال بۆ سالێ بەر ب زێدەبوونێ یە و سالا 2021ێ ل سەرانسەری هەرێما كوردستانێ، یازدە هزار و 699 حالەتێن بەردانێ هاتینە تۆماركرن و رۆژانە 32 حالەتێن بەردانێ هاتینە تۆماركرن، بەلێ ل سالا بۆری 2022ێ سێزدە هزار و 967 هزار حالەتێن بەردانێ هاتینە تۆمار كرن و گۆت: (بڤێ چەندێ ژی رۆژانە 38 حالەتێن بەردانێ هاتینە تۆمار كرن ل دادگەهێن هەرێما كوردستانێ و زۆرترین رێژا بەردانێ ژی ل پارێزگەها هەولێرێ هاتیە تۆمار كرن و تێدا بتنێ د سالا بۆری دا پێنج هزار و 645 حالەتێن بەردانێ هاتینە تۆمار كرن).
هەر ل گورەی ئامارا جڤاتا دادوەریێ ل پارێزگەها دهۆكێ تنێ ل سالا 2021ێ هزار و 796 حالەتێن بەردانێ هاتینە تۆماركرن، بەلێ سالا بۆری 2022ێ ل پارێزگەها دهۆكێ رێژە زێدە بوویە و گەهشتیە هزار و 992 حالەتێن بەردانێ، ئانكو ل سالا بۆری رۆژانە ب بەردەوامی پێنج حالەتێن بەردانێ ل دادگەهێن بارێ شارستانی یێن دهۆكێ هاتینە تۆمار كرن.
دەریا شێروانی چالاكڤانا مەدەنی لدۆر زێدەبوونا حالەتێن بەردانێ بۆ رۆژناما ئەڤرۆ دیار كر كو ئەگەرێن زێدەبوونا بەردانێ زۆرن و سالێن بۆری ژی چەندین جاران مە بەحسێ وان ئەگەران كریە، هەتا ئەو خالێن سەرەكی نەهێنە چارەسەر كرن رەوش بەر ب باشتر ناچیت و دێ رێژا بەردانێ هەر یا بلند بیت و بەر ب زێدەتر چیت و گۆت: (ئێك ژ وان خالان لێك تێنەگەهشتنا هەڤژینایە و ئەنجامدانا پرۆسا هەڤژینیێ یە ل سەر بنەمایەكێ نە یێ دروست، هەروەسا ئامیرێن گەهاندنێ و سۆشیال بووینە ئێك ژ ئەگەرێن سەرەكی یێن بەردانێ ل هەرێما كوردستانێ، مخابن خراب بكار ئینان و نە شارەزایا خەلكێ مە بووینە ئەگەر تاوانێن مەترسیدار ب رێیا ئامیرێن گەهاندنێ و سۆشیال میدیایێ بهێنە ئەنجامدان).
چالاكڤانا مەدەنی دیار كر كو پێدڤیە بەری پرۆسا هەڤژینیێ بهێتە ئەنجامدان كچ و كوڕ باش هزرا خوە د چێكرنا خێزانێ دا بكەن و بڕیارێن ژیرانە بدەن، هندەك جاران هندەك خێزان بشێوەیەكی دهێنە پێك ئینان وەكی دیوارێ سەر بەفرێ یە، هەر ئاریشەیەكا بچووك دناڤبەرا واندا پەیدا ببیت دبیتە ئەگەرێ هەلوەشاندنا ئەڤێ خێزانێ و گۆت: (رەوشنبیریا نفشێ نوكە یا جودایە ژ نفشێ بەرێ لدۆر پێك ئینانا خێزانێ، خرابیا رەوشا ئابوری و دەستوەردانێن دەرەكی ژی هۆكارن بۆ تێك چوونا خێزانێ، چەندین خێزان هاتینە هەلوەشاندن ئەگەر مایتێكرن بوویە ژلایێ كەس و كارێن وان، نابیت كەسێن دەوروبەر مایتێكرنێ د ژیانا هەڤژینان دا بكەن و نەبنە ئەگەرێ تێكچوونا رەوشا چو خێزانان).
Aphorismi ) شەزەرە نڤیسینە.
نيشاندان