دكتۆر ئالان حەمە سەعید، وەزیرێ پەروەردێ ل حوكمەتا هەرێما كوردستانێ‌ دوهی 16/7/2023 د كۆنگرەكێ رۆژنامەڤانی دا ل دهۆكێ دیار كر، رۆژێن شەمبی ل ناڤەندێن خواندنێ‌ یێن حكومی بۆ سالا نوو یا خواندنێ‌ 2023 – 2024 ل هەرێما كوردستانێ‌ دێ‌ بیتە بێهنڤەدان و دەستپێكرنا سالا نوو یا خواندنێ‌ ژی دیار كر.
وەزیرێ پەروەردێ خویا ژی كر، ب كۆیێ‌ دەنگێ‌ ئەندامێن جڤاتا وەزارەتێ‌ بڕیار هاتەدان، رۆژێن شەمبی ل هەمی ناڤەندێن خواندنێ‌ یێن هەرێما كوردستانێ‌ دێ‌ بیتە بێهنڤەدان و ب رێیا گشتاندنەكێ‌ هووركاریێن ڤێ‌ بڕیارێ‌ بۆ هەمی پەروەردێن گشتی و ناڤەندێن خواندنێ‌ دێ‌ هێنە رۆهنكرن.
ل دۆر دەستپێكرنا سالا نوو یا خواندنێ‌ 2023 – 2024 وەزیرێ‌ پەروەردێ‌ گۆت: «سالا نوو یا خواندنێ‌ ل رێككەفتی 13/9/2023 دێ‌ دەستپێكەت و رۆژا 17/9/2023 دێ‌ مامۆستا دەست ب گۆتنا وانان بۆ قوتابیان كەن و سالا نوو یا خواندنێ‌ ژ 170 رۆژان كێمتر نابیت».
ئالان حەمە سەعید، وەزیرێ پەروەردێ ئاشكرا ژی كر، ئێك ژ مفایێن گرنگ یێن ڤێ بڕیارێ بۆ مامۆستایان ل شوونا شەش رۆژان دێ پێنج رۆژان د حەفتیێ دا دەوامێ كەن و هاتنوچوون ژی دێ‌ كێم بیت.

ئەڤرۆ رۆژا ئێك شەمبی 16ی تیرمەها 2023ێ ب بەرهەڤبوونا د. عەلی تەتەر، پارێزگارێ دهۆكێ و جەهوەر عەلی، دەڤەردارێ‌ دهۆكێ‌ و ئەندازیار مللەت سالم، سەرۆكێ باژێرڤانیا دهۆكێ، دیسا خودانێن كۆمپانیێن بجهئینەر، دوهی 16/7/2023 پڕۆژەیێ چەندین جاددە و كۆلانان ل تاخێن جودا یێن سەنتەرێ‌ دهۆكێ‌ هاتە ڤەكرن.
ئەو پڕۆژە ژ ڤەكرن و قێركرن و كۆنكریتكرنا 165 جاددە و كۆلانان پێك دهات ل سەنتەرێ باژێرێ دهۆكێ ل سنوورێ هەردو باژێرڤانیێن رۆژهەلات و رۆژئاڤا ب درێژاهیا 35 كیلۆ مەتران و ب رووبەرێ‌ 268 مەترێن دوجار.
پڕۆژە ب گوژمێ نێزیكی 13 ملیار و 366 ملیۆن و 362 هزار دیناران ل سەر بودجا حوكمەتا هەرێما كوردستانێ هاتە بجهئینان.
پڕۆژە ب سەرپەرشتیا ئەندازیارێن سەرۆكاتیا باژێرڤانیا دهۆكێ هاتیە ب رێڤەبرن و ژ لایێ كۆمپانیێن (داڤەرست و كاڤین) ڤە هاتیە بجهئینان.
دیسا هەر دوهی و ب مەرەما خواترخواستنێ‌ و ب دووماهی هاتنا ئەركێ‌ وی، ئولیڤێ دیكوتینی، قونسلێ كۆمارا فرەنسا ل هەولێرێ سەرەدانا پارێزگەها دهۆكێ‌ كر و ژ لایێ‌ د. عەلی تەتەر، پارێزگارێ دهۆكێ ڤە پێشوازی لێهاتە كرن.
د هەڤدیتنێ دا پارێزگارێ دهۆكێ سۆپاسیا هەڤكاری و هەماهەنگیا قونسلخانا فرەنسا و قونسلێ وان ل هەرێما كوردستانێ كر و رۆلێ وان دخۆرتكرنا پەیوەندیێن هەردو وەلاتان دا بلند هەلسەنگاند و هیڤیا سەركەفتنێ د ئەركێ وان یێ نوو دا بۆ خواست.

د. عەلی تەتەر، پارێزگارێ دهۆكێ ب هەڤالینا د. سامان بەرزنجی، وەزیرێ ساخلەمیێ یێ حوكمەتا هەرێما كوردستانێ سەرەدانا پڕۆژەیێ مەزنترین نەخۆشخانەیا نێڤدەولەتی یا گشتی و تایبەتمەندا پەنجەشێرێ ل دهۆكێ دا.
پڕۆژەیێ مەزنترین نەخۆشخانەیا نێڤدەولەتی یا گشتی و تایبەتمەندا پەنجەشێرێ، ئێك ژ پڕۆژەیێن ستراتیژی یێن وەبەرهێنانێ‌ یێ‌ كەرتێ‌ تایبەتە د بیاڤێ‌ ساخلەمیێ‌، حوكمەتا هەرێما كوردستانێ مۆهلەت و ئەرد و ئاسانكاری بۆ كرینە، كو وەبەرهێنان د كەرتێ‌ ساخلەمیێ‌ دا بهێتە كرن، نوكە نەخۆشخانە د قووناغێن بجهئینانێ دایە، ئەڤ پڕۆژەیێ نێڤدەولەتی دێ خزمەتا هەرێما كوردستانێ و ئیراقێ و هەمی دەڤەرێ كەت، كو ب نووترین ئامیرەیێن نۆشداری یێن مودێرن و سەردەم ل سەر ئاستێ رۆژهەلاتا ناڤەراست دهێتە بجهئینان.
وەزیرێ ساخلەمیێ ل حوكمەتا هەرێما كوردستانێ و پارێزگارێ دهۆكێ پشتی گەریان د ناڤ هەردو ئاڤاهی و قووناغێن بجهئینانا نەخۆشخانێ دا كرین، د روونشتنەكێ دا ل گەل وەبەرهێنەر و تیمێ سەرپەرشت، دوپاتی ل گرنگی و پێدڤیا دەڤەرێ ب دووماهی ئینانا پڕۆژەی كر و بەرهەڤیا حوكمەتا هەرێمێ و كارگێریا پارێزگەهێ بۆ هەر ئاسانكارییەكێ دیاركرن.

هەولێر، قائید میرۆ:

بەرپرسەكێ وەزارەتا بازرگانی ئاشكرا كر، پرۆسەیا وەرگرتنا گەنمێ جۆتیاران ل هەرێما كوردستانێ ب دووماهی هاتیە و ب فەرمانا مەسرور بارزانی، سەرۆكێ حوكمەتا هەرێما كوردستانێ ئاریشەیا جۆتیارێن گەنمێ وان نەهاتیە وەرگرتن هاتە چارەسەركرن.
سەروەر هاواری، بریكارێ وەزارەتا بازرگانی د كۆنگرەیەكێ رۆژنامەڤانی دا راگەهاند: «ل سەر فەرمانا سەرۆكێ حوكمەتا هەرێما كوردستانێ لیژنەیەكا ڤەكۆلینێ ل دۆر ئاریشەیا گەنمێ جۆتیاران هاتیە پێكئینان و دووڤچوون بۆ گەنمێ وان جۆتیاران هاتیە كرن یێن ل سرا سایلۆیێ بووینە و بەری نوكە هاتینە تۆماركرن، بەلێ د هەمان دەم دا ئەو رێژا بۆ هەرێمێ هاتیە دیاركرن نەمایە و هەموو هاتیە وەرگرتن، كو 500 هزار تەنێن گەنمی بووینە، لەوڕا بڕیار هاتەدان هەموو بارهەلگرێن سڕا گرتی ب هەمان بهایێ حوكمەتا ئیراقێ ژ لایێ كۆمپانیەكا ناڤخوەیی بهێتە وەرگرتن».
ناڤهاتی گۆت: «پرۆسا وەرگرتنا گەنمێ جۆتیاران بۆ ئەڤ سالە ب دووماهی هاتیە و پێڕابوون هەمبەر كەسێن خەمسار دێ هێنە وەرگرتن یێن بووینە ئەگەرێ بێ بەهركرنا هەژمارەكا جۆتیاران، سەرۆكێ حوكمەتێ یێ رژدە ل سەر هاریكاریا جۆتیاران و دەستپێكێ هەتا پرۆسە ب دووماهی هاتی هاریكاربوویە، ب بزاڤێن مەسرور بارزانی پشكا هەرێما كوردستانێ هاتە زێدەكرن بۆ 500 هزار تەنێن گەنمی».

ئامێدیێ، مەحمود نهێلی:

بو دەمێ‌ پتر ژ دو مەهانە دەست پ كاراكرنا پلێن ئاهێن خوارنێ‌ یێن ئەلكترۆنی ل پارێزگەها دهۆكێ‌ هاتیە كرن و هەتا نوكە ب رێژا 76% ژ خێزانێن پارێزگەها دهۆكێ‌ پلێتێن خوە كارا كرینە.
قەیس وەیس، بەرپرسێ‌ راگەهاندنا رێڤەبەریا رێكخستنا پلێتێن ئاهێن خوارنێ‌ ل پارێزگەها دهۆكێ‌ بۆ رۆژناما ئەڤرۆ دیار كر، ل سنوورێ‌ دەڤەرداریا ئامێدیێ‌ دو هزار و 950 خێزان ژ سەرجەمێ‌ 17 هزار خێزانان ماینە و پلێتێن خوە یێن ئاهێن خورانێ‌ كارا نەكرینە و گۆت: «ل سەرانسەری پارێزگەها دهۆكێ‌ 215 هزار خێزانان پلێتێن خوە كارا كرینە، كو دبیتە رێژا 76% ژ سەرجەمێ‌ گشتی یێ‌ پارێزگەها دهۆكێ‌«.
گۆتژی: «دووماهی ژڤان بۆ كاراكرنا پلێتێن ئاهێن خوارنێ‌ رۆژا پێنجشەمبی 20/7/2023ێ‌ یە و هەر كەسەكێ‌ هەتا ڤێ‌ رۆژێ‌ پلێتا خوە كارا نەكەت دێ‌ بەهرا وی یا ئاهێن خوارنێ‌ ژێ‌ هێتە بڕین».
ناڤهاتی ئاشكرا ژی كر، هەتا نوكە چ دیار نینە، كانێ‌ ئەڤ دەمە دێ‌ هێتە درێژكرن یان دێ‌ هەر وەكو خوە مینیت، ژ بەر وێ‌ یەكی، ئەم داخوازێ‌ ژ خەلكێ‌ پارێزگەها دهۆكێ‌ ب گشتی دكەین یێن هەتا نوكە پلێتێن خوە كارا نەكرین، ب زووترین دەم سەرەدانا بنگەهێن كاراكرنێ‌ بكەن.

رەمەزان زەكەریا

ب بەرهەڤبوونا د. ئارام محەمەد قادر وەزیرێ خواندنا بلند و ڤەكۆلینێن زانستی د حوكمەتا هەرێما كوردستانێ دا و د. عەلی تەتەر پارێزگارێ دهۆكێ و سەرۆكێن زانكۆیا دهۆك و پولیتەكنیكا دهۆك و راگرێن كۆلیژ و پەیمانگەهێن ئاكرێ و بەردەڕەش زانكۆیا ئاكرێ بۆ زانستێن كرداری هاتە ڤەكرن.

د. مەنهەل ئیلهام، سەرۆكێ زانكۆیا ئاكرێ بۆ زانستێن كرداری ب وەكالەت بۆ ئەڤرۆ گۆت: دامەزراندنا زانكۆیا ئاكرێ بۆ زانستێن كرداری دبیتە ئێكەم زانكۆ ل سەر ئاستێ هەرێما كوردستانێ و عیراقێ ب ناڤ و نیشانێ هەیی بۆ ئاكرێ و كوردستانێ هەموویێ یا گرنگ بوو دامەزراندن و ڤەكرنا زانكۆیێ و نوكە كار لسەر كاروبارێن هونەری یێن زانكۆیی دكەین.
د. مەنهەل گۆت ژی: نوكە ل ئاكرێ سێ كۆلیژ و دوو پەیمانگەهـ هەنە، بەلێ هەتا ئەم بەرهەڤیا دكەین و ئاڤاهیا دروستبكەین، ژبەركۆ نوكە ئاڤاهی دكێمن، دێ دگەل بەفرەهبوونا ئاڤاهیا كۆلیژ ژی هێنە زێدەكرن بۆ زانكۆیا ئاكرێ.
سەرۆكێ زانكۆیا ئاكرێ ئاشكراكر: هەتا نوكە دیارنینە دێ بۆ سالا نوو یا خواندنێ قوتابی ل سەر ناڤێ زانكۆیا ئاكرێ بۆ زانستێن كرداری هێنە وەرگرتن یان ژی هەر لسەر ناڤێن وان كۆلیژ و پەیمانگەهان بیت، ئەم یێ كار دكەین بۆ هەموو كاروبارێن زانكۆیێ ئەم دێ هەموو بزاڤا كەین بۆ وێ چەندێ بۆ سالا نوو قوتابیا وەرگرین، ئەو كۆلیژ و پەیمانگەهێن نوكە هەین پێدڤیە ناڤێن وان بهێنە گوهۆرین و گۆهرینا پرۆگرامی بهێتە كرن، بۆ وێ چەندێ ل گەل ناڤێ زانكۆیێ بهێنە گونجاندن.
د. مەنهەل خویاكر: نوكە وان كۆلیژ و پەیمانگەهێن ئاكرێ هژمارەكا قوتابیان هەیە كۆ دگەهیتە نێزیكی شەش هزار قوتابیان.