قائید میرۆ:
شارەزایەكا كەرتێ پەروەردێ ئاماژە پێ كر، ڤەخوارنێن كحولی و هۆشبەر ب رێژەیەكا بەرچاڤ زێدە كریە و دبێژیت: ب شێوەیەكی دیاردا بكارئینانا ماددێن هۆشبەر یا بەربەلاڤە و گەهشتیە رادەیەكی سنێلە ل قوتابخانێ ژی بكار دئینن..
رەهێل دزەیی، شارەزا ل كەرتێ پەروەردێ بۆ رۆژناما ئەڤرۆ دیار كر، ژبەر گۆهۆڕینێن جیهانێ بخۆڤە گرتی چەندین داهێنانێن مەزن و مفادار بەرهەم ئیناینە بۆ خزمەت كرنا وەلاتیان و مرۆڤایەتیێ، بەرۆڤاژی ل هەمبەر پێشكەفتنێن جیهانێ بخۆڤە گرتی ئەركێ خێزانێ گرانتر كریە و گۆت: (چونكی وی سەردەمێ دایك و باب سنێلە بوون و زۆر جودایە ل گەل سەردەمێ نوكە ئەم تێدا و زارۆكێن دایك و بابا بووینە سنێلە، ژبەركو ئەو سیستەمێ دایك و باب ل سەر هاتینە پەروەردە كرن ل گەل ئەڤرۆ ناگونجیت، ئەڤەژی بوویە ئەگەر ئاستەنگ و گرانی یێن زۆر بۆ دایك و بابا پەیدا كرینە، هەتا بشێن زارۆیێن خوە پەروەردە بكەن ب باشترین شێوە و مرۆڤەكێ پێگەهشتی پێشكێشی جڤاكی بكەن).
دزەیی گۆتژی: (مخابن جگارە و جگارێن ئەلكترۆنی و نارگیلە، هەروەسا ڤەخوارنا ماددێن كحولی و هۆشبەر ب رێژەیەكێ بەرچاڤ زێدە كریە دناڤا گەنجان و سنێلەیان، بتایبەتی ئەڤێن نەگەهشتیە تەمەنێ 18 سالیێ).
رەهێل دیار كر كو ئەگەر زۆرن بۆ هاندنا گەنجان و سنێلەیان بۆ بكارئینانا ماددێن كحولی و هوشبەر و جگارە و نارگیلێ، ل هەرێما كوردستانێ زارۆكەك یان سنێلە دشێت بشێوەیەكێ زۆر ساناهی ماددێن كحولی و جگارە و نارگیلێ بدەستڤە بینن، چو رێگری نینە ل هەمبەر تەخا گەنجان و سنێلەیان، هەتا زۆر جارا زەلام زارۆكێن خوە دهنێرن بۆ كڕینا جگارا ئەڤە ژی مەترسیە بۆ سەر زارۆكان.
ژلایەكێ دیڤە دزەیی زێدەتر گۆت: (راگەهاندنێ كارتێكرن ل سەر جڤاكی هەیە بۆ بەلاڤكرنا ئەڤێ دیاردا مەترسیدار، ب رێیا وان ماددێن دهێنە بەلاڤكرن خەلك دهێتە هاندان بۆ بكارئینانا وان ماددێن زیان بەخش، ژبیر نەكەین سنێلە جگارە و ماددێن كحولی بكار دئینن هەتا دەستپێكێ بۆ خوە و پاشی بۆ دەوروبەرێ خوە ب سەلمینن مەزن بووینە.
رەهێل دزەیی دیار ژی كر كو بشێوەیەكی دیاردەیا بكارئینانا ماددێن هۆشبەر یا بەرلاڤە گەهشتیە رادەیەكی سنێلە ل قوتابخانێ ژی بكار دئینن، بكارئینانا ڤێ رێژا زۆر یا ماددێن هۆشبەر ل ئەڤان سالێن دووماهیێ جهێ ترسێ یە و گەفە لسەر ژیانا گەنج و سنێلەیان و گۆت: (چونكە بكار ئینان و بازرگانیا ب ماددێن هۆشبەر یا بەرب زێدەتر دچیت، ئەڤجا ئەركێ دایك و بابانە چاڤدێریا زارۆكێن خوە بكەن).
نيشاندان