دهۆك، لەزگین جوقی:

پەیڤدارێ‌ رێڤەبەریا گشتی یا گەشتوگوزارێ‌ ل پارێزگەها دهۆكێ‌ دیار كر، شاندەكێ‌ كۆمپانیێن گەشتیاری یێن پارێزگەها دهۆكێ‌ بۆ ئینانا گەشتیاران ژ وەلاتێ‌ توركیا دێ‌ سەرەدانا باژێرێ‌ جولەمێرگێ‌ ل باكوورێ‌ كوردستانێ‌ كەت و هەڤدیتن د ناڤبەرا كۆمپانیێن گەشتیاری یێن دهۆكێ‌ و توركیا دا دهێنە كرن ب مەرەما ئینانا گەشتیاران ژ توركیا بۆ هاڤینگەه و جهێن گەشتیاری ل دهۆكێ‌.
رێوار مەحمەد رەشید، پەیڤدارێ‌ رێڤەبەریا گشتی یا گەشتوگوزارێ‌ ل پارێزگەها دهۆكێ‌ بۆ ئەڤرۆ گۆت: «ب مەرەما خورتكرنا بازارگەریا گەشتوگوزارێ‌ ل دهۆكێ‌، شاندەكێ‌ كۆمپانیێن وەلاتێ‌ توركیا ژ باژێرێ‌ جولەمێرگێ‌ سەرەدانا دهۆكێ‌ كریە و وی شاندی سەرەدانا هاڤینگەه و جهێن گەشتوگوزاریێن پارێزگەها دهۆكێ‌ كریە، مەرەم ژ سەرەدانا وان ئەو بوویە، هەماهەنگی د ناڤبەرا كۆمپانیێن پارێزگەها دهۆكێ‌ و كۆمپانیێن وەلاتی توركیا دا هەبیت بۆ ئینانا گەشتیاران ژ توركیا بۆ دهۆكێ‌، داكو ب تنێ‌ پشت بەستن ل سەر گەشتیارێن ناڤەراست و باشوورێ‌ ئیراقی ناهێتە كرن و كار یێ‌ هێتە كرن رێژەكا زۆر یا گەشتیاران ژ باكوورێ‌ كوردستانێ‌ و توركیا قەستا دهۆكێ‌ بكەن».
رێوار ئاشكرا ژی كر، د دەمەكێ‌ نێزیك دا كۆمپانیێن گەشتیاریێن پارێزگەها دهۆكێ‌ ژی دێ‌ سەرەدانا باكوورێ‌ كوردستانێ‌ كەن، داكو هەماهەنگی د ناڤبەرا كۆمپانیێن گەشتیاریێن دهۆكێ‌ و باكوورێ‌ كوردستانێ‌ خۆرت بیت بۆ ئینانا گەشتیاران».

دهۆك، لەزگین جوقی:

حەمزە رەزیكی، بەرپرسێ‌ راگەهاندنێ‌ ل رێڤەبەریا گشتی یا ساخلەمیا پارێزگەها دهۆكێ‌ دوهی د كۆنگرەكێ‌ رۆژنامەڤانی دا ئامارێن جەژنا قوربانی دیار كر و دبێژیت: د رۆژێن جەژنا قوربانێ‌ دا پێنج هزار و 267 نەخۆشان سەرەدانا پشكێن تەنگاڤیان كریە و 513 نەخۆش هاتینە نڤاندن و 52 نشتەرگەری هاتینە ئەنجامدان و 206 زارۆك ژ دایكبووینە، ژ وانا ژی: 116 كوڕ و 90 كچ بووینە و 8 نشتەرگەریێن قەسترا ب لەز یێن دلی ل گەل نشتەرگەریەكا ڤەكرنا سینگی بۆ نەخۆشان هاتینە ئەنجامدان.
رەزیكی گۆت: «شەش كەسان ژ ئەگەرێ‌ روودانێن جودا گیانێ‌ خوە ژ دەست دایە و بۆ نۆشداریا داد هاتینە هنارتن ژ وانا ژی، دو كەس ژ ئەگەرێ‌ گرتنا كارەبێ‌ گیانێ‌ خوە ژ دەست دایە، زارۆیەك ب روودانا ترۆمبێلێ‌ گیانێ‌ خوە ژ دەست دایە، كەسەك ب چەقویان هاتیە كوشتن و كەسەك ژی ژ ئەگەرێ‌ كەتن ژ بلنداهیێ‌ مریە، دیسا حەفت كەسان ژی ژ ئەگەرێ‌ نەخۆشیان گیانێ‌ خوە ژ دەستدایە».
ناڤهاتی گۆتژی: «61 كەسان سەرەدانا نەخۆشخانا سۆتنێ‌ كریە و 95 نەخۆشان سەرەدانا سەنتەرێ‌ نەخۆشیا پەنجەشێرێ‌ كریە، ژ وانا ژی: 16 نەخۆش هاتینە نڤاندن، نێزیكی 400 كەسان ژی پەیوەندی ب تیمێن 122ێ‌ كریە 96 ژی بۆ دەزگەهێن ساخلەمیێ‌ هاتینە ڤەگوهاستن».
دیسا ئاشكرا ژی كر زێرەڤانیا ساخلەمیێ‌ 98 سەرەدان كرینە و 32 هوشداری هاتینەدان و 12 جه هاتینە سزادان و دائێخستن.

هەولێر، قائید میرۆ:

بەرپرسەكێ ئێكەتیا وەبەرهێنەرێن كوردستانێ دیار دكەت، لژنەك یا پێداچوونێ د پڕۆژەیێن وەبەرهێنانێ یێن دبیاڤێ‌ ئاكنجیبوونێ دا دكەت و دبێژیت: مەرج و پیڤەرێن نوو بۆ ئەنجامدانا پڕۆژەیێن وەبەرهێنانێ، ب تایبەتی هەبوونا پیڤەرێن زانستی دێ هێنە دانان.
كەمال ئاغا، جێگرێ سەرۆكێ ئێكەتیا وەبەرهێنەرێن كوردستانێ بۆ رۆژناما ئەڤرۆ دیار كر، ب فەرمانا سەرۆكێ حوكمەتا هەرێما كوردستانێ لژنەك بۆ پێداچوونێ د پڕۆژەیێن ئاكنجیبوونێ یێن گرێدایی دەستەیا وەبەرهێنانێ هاتیە پێكئینان و گۆت: «د دەمێ نوكە دا مۆهلەت بۆ پڕۆژەیێن وەبەرهێنانێ هاتینە راگرتن، بەلێ بڕیارا راگرتنا مۆهلەتێن ئاكنجیبوونێ بۆ پڕۆژەیێن وەبەرهێنانێ یا دەمی یە و دێ جارەكا دی دانا مۆهلەتان دەستپێكەت، بەلێ ئەڤە ژی پشتی پێداچوون د پڕۆژەیێن بەری نوكە مۆهلەت وەرگرتی دا دهێتە كرن».
كەمال ئاغا گۆتژی: «لژنەكا تایبەتمەند یا كاری دكەت بۆ دیاركرنا كێماسیێن د ناڤا پڕۆژەیێن وەبەرهێنانێ دا هەین و چەندین مەرج و پیڤەرێن نوو بۆ دەستپێكرنا یەكەیێن ئاكنجیبوونێ دێ هێنە دیاركرن، ئانكو سیستەمێ بجهئینانا پڕۆژەیێن وەبەرهێنانێ دێ گوهۆڕین ب سەردا هێن و پێدڤیە هەموو وەبەرهێنەر و كۆمپانی پێگیریێ ب مەرجێن حوكمەتێ بكەن، ژ وان ژی: پڕۆژە ب كوالێتیەكا بلند بهێنە بجهئینان و هەموو سالوخەتێن زانستی تێدا هەبن».

بەرپڕسێ ڕاگەهاندنا ڕێڤەبەریا گشتی یا ساخلەمیا زاخۆ د كۆنفڕانسەكێ رۆژنامەڤانی دا ئامارێن جەژنا قوربانێ ل زاخۆ دیار كرن و دبێژیت: د هەر چار ڕۆژێن جەژنا قوربانێ دا ٦٧ زاڕۆك ژ دایك بووینە، ژ وان 39 كوڕ بووینە و 28 ژی كچ بووینە.
ئەمیر عەلی، بەرپڕسێ ڕاگەهاندنا ڕێڤەبەریا گشتی یا ساخلەمیا زاخۆ دیار كر، د هەر چار ڕۆژێن جەژنا قوربانێ دا پێنج هزار نەخوەشان سەرەدانا نەخۆشخانا هاوارهاتنێ كریە و 238 نەخوەشان سەرەدانا نەخۆشخانا ئافرەت و زاڕۆكبوونێ كریە، دیسا نەهـ ڕوودانێن تڕافیكی دروست بووینە، كو د ئەنجام دا دو كەسان گیانێ خوە ژ دەست دایە، ئێك ژ وان كوڕ بوویە و یا دی كچ بوویە و دو كەسێن دیتر ژی ژ ئەگەرێ لێدانا جەلتێ گیانێ خوە ژ دەست دایە.
ناڤهاتی گۆت: «د رۆژێن جەژنێ‌ دا 678 پشكنین بۆ نەخوەشان هاتینە كرن، دیسا دووپشكی ب هەشت كەسان ڤەدایە و ١٧ كەس ژی بۆ نەخۆشخانا دهۆكێ یا گشتی هاتینە هنارتن».

ئامێدیێ، مەحمود نهێلی:

پشتی پێنج رۆژان ژ كەفتنا كرێكارەكی ل سەر ئاڤاهیەكی ل ناوچەداریا شێلادزێ، ل شەڤا ئێك ل سەر دویێ ڤێ مەهێ‌ ل نەخۆشخانێ گیانێ خوە ژ دەست دا.
ئێك ژ كەسوكارێن وی بۆ رۆژناما ئەڤرۆ دیار كر، ئەڤ كەسە كرێكار بوو ل سەر ئاڤاهیەكی كار دكر و د ئاڤاهی دا كەفتبوو، پشتی گەهاندیە نەخۆشخانێ و بۆ دەمێ‌ پێنج رۆژان ل نەخۆشخانێ مای گیانێ خوە ژ دەست دا، ناڤێ وی كرێكاری (هەڤال سەدیق)ە و بەری پێنج رۆژان ل دەمێ كاركرنێ ل سەر ئاڤاهیەكی ل شێلادزێ دكەڤیت و ب تێلێن كارەبێ دكەڤیت و پاشی ب ئەردی دكەڤیت و ب گرانی بریندار دبیت و دهێتە ڤەگوهاستن بۆ نەخۆشخانا هەوارهاتنێ ل دهۆكێ، لێ ب بخابنی ڤە ژ بەر گرانیا برینا وی گیانێ خوە ژ دەست دا.

رەمەزان زەكەریا

دەمەكە حوكمەتا هەرێما كوردستانێ دەست ب نووژەنكرنا قشلا ئاكرێ ئاكرێ كریە، بریارە پشتی كارێن وێ ب دووماهی دهێن ببیتە مۆزەخانە، ژ بەر كو هەتا نوكە دەڤەرا ئاكرێ مۆزەخانە نەبوویە.

هیوا شەمال، رێڤەبەرێ شوونوار و كەلەپوورێن ئاكرێ بۆ ئەڤرۆ گۆت: ب هاریكاری و پشتەڤانیا حوكمەتا هەرێما كوردستانێ و پارێزگەها دهۆكێ و ب سەرپەرشتیا رێڤەبەرییا گشتی یا شوونەوار و و كەلەپوورێن هەرێما كوردستانێ و رێڤەبەریا شونوار و كەلەپوورێن دهۆكێ، نووژەنكرنا ئاڤاهیێ قشلا ئاكرێ قوناغێن باش دەرباز كرینە ب رەنگەكێ باش و كەڤنار هاتیە نووژەنكرن.
ناڤهاتی گۆت ژی: بۆدجێ نووژەنكرنا قشلا ئاكرێ ژلایێ حوكمەتا هەرێما كوردستانێ ڤە هاتیە دابینكرن ب كوژمێ 166 ملیۆن دیناران و رێكخراوا GIZیا ئەلمانی دەرفەتا كارێ بۆ 63 كرێكاران ڤەدیتیە د ناڤ پرۆژێ نووژەنكرنا قشلا ئاكرێ دا بۆ دەمێ 80 رۆژان و رێكخراوا یۆنسكۆ 60 ملیۆن دینار تەرخانكرینە بۆ بەردەوامبوونا كارێ نووژەنكرنێ و دەرفەتا كاری بۆ 39 كرێكاران و دەرچوویێن زانكۆیێ بۆ دەمێ 40 رۆژان.
هیوا ئاشكراكر: قوناغێن نووژەنكرنا قشلا ئاكرێ بەردەوامن كو ژ بال رێڤەبەریا شوونوار و كەلەپوورێن ئاكرێ دهێتە جێبەجیكرن و د پلان دایە ئەڤ جهە ببیتە موزەخانە و مفا ژێ بهێتە وەرگرتن بو كەرتێ گەشت و گوزاری و ببیتە داهات بۆ حوكمەتا هەرێما كوردستانێ.