دهۆك، لەزگین جوقی:

بەرپرسێ‌ تەكنیكی ل رێڤەبەریا سەخبێریا ریك و پران ل پارێزگەها دهۆكێ‌ دیار كر، حوكمەتا هەرێما كوردستانێ‌ گرنگیەكا مەزن ب سەخبێری و چێكرنا جادەیێن گوندان ل سنوورێ‌ پارێزگەها دهۆكێ‌ دایە، نوكە ب گوژمێ‌ پتر ژ 13 ملیار دیناران جادەیێن 64 گوندان یێ‌ دهێنە سەخبێركرن و چێكرن.
هەڤال عەلی محەمەد، بەرپرسێ‌ تەكنیكی ل رێڤەبەریا سەخبێریا ریك و پران ل پارێزگەها دهۆكێ‌ بۆ رۆژناما ئەڤرۆ خویا كر، ژ بودجەیا پارێزگەها دهۆكێ‌ دەست ب ئەنجامدانا 16 پڕۆژەیێن جاددەیان ل 64 گوندان هاتیە كرن و گۆت: «رێیێن هەموو گوندان دێ‌ هێنە چێكرن و سەخبێركرن، نوكە دەست ب پڕۆژەی هاتیە كرن، بەردەوام كار ل سەر ئەنجامدانا پڕۆژەیێن جاددەیێن گوندان دهێتە كرن، ئەڤ پڕۆژە ب گوژمێ‌ 13 ملیار و 500 ملیۆن دیناران دێ‌ هێتە بجهئینان».
ناڤهاتی ئاشكرا كر كو ژ بلی چێكرن و سەخبێركرنا جاددەیان، كار ل سەر سەخبێریا پران ژی دهێتە كرن، ئەڤ سالە ژ ئەگەرێ‌ بارانبارینێ‌ و دروستبوونا لەهیان گەلەك زیان گەهشتیە جاددە و پران.

ئەڤرو، دلڤین رەشید:

كاروان حەجی، بەرپرسێ‌ راگەهاندنا بنگەهێ‌ لالش یێ‌ رەوشەنبیری و جڤاكی بۆ روژناما ئەڤرۆ دیار كر، بنگەهێ‌ لالش ب پشتەڤانیا راستەوخوە یا سەرۆكێ‌ حوكمەتا هەرێما كوردستانێ‌ 6ی تیرمەها ئەڤ سالە دێ‌ فیستەڤالا لالش یا كەلتۆری ل پارێزگەها دهۆكێ‌ دێ‌ گێڕیت و دبێژیت: ئەڤ فیستەڤالە دێ‌ دەربڕینێ‌ ژ چاند و كەلتۆر و زمانێ‌ رەسەنێ‌ كوردێن ئێزدی ل سەر ئاستێ‌ هەرێما كوردستانی و وەلاتێ‌ قەفقاسیا كەت.
نافهاتی گۆت: «مەرەم ژ ڤێ‌ فیستەڤالێ‌ نیشادانا چاند و كەلتۆرێ‌ ئێزدیانە ل هەرێما كوردستانێ‌ و دەرڤەی هەرێمێ‌، مینا: وەلاتی ئەرمینیا و جۆرجیا و قەفقاسیا، د ڤێ‌ فیستەڤالێ‌ دا چاندا ئێزدیان ل وان وەلاتان ژی دێ‌ هێتە نیشادان و چەندین گرۆپێن هونەری و كەلتۆری یێن جودا جودا د فیستەڤالا لالش دا دێ‌ پشكدار بن».
كاروانی گۆتژی: «ئەڤ فیستەڤالە ل سەر ئاستەكێ‌ بلند ل پارێزگەها دهۆكێ‌ دێ‌ هێتە ئەنجامدان و چەندین كەسایەتی هاتینە داخوازكرن، ژ لایێ‌ راگەهاند و پەیوەندیانڤە و بەرهەڤیەكا باش ژ بۆ سەركەفتنا ڤێ‌ فیستەڤالێ‌ هاتیە كرن، فیستەڤال بۆ دەمێ‌ رۆژەكێ‌ دێ‌ یا بەردەوام بیت».

ب مەرەما پتر خزمەتكرنا وەلاتیان و باشتركرنا كەرتێ‌ كارەبێ‌، وەزارەتا كارەبا حوكمەتا هەرێما كوردستانێ د مەها گولان و خزیرانا ئەڤ سالە دا 17 پڕۆژەیێن جودا جودا یێن كارەبێ‌ ل سەرانسەری پارێزگەها دهۆكێ‌ ئەنجام داینە و كەفتینە د خزمەتا وەلاتیان دا.
پارێزگەها دهۆكێ‌ د پەیجێ‌ خوە یێ‌ تۆرا جڤاكیا فەیسبووكی دا بەلاڤكریە، د مەهێن گولان و خزیرانا ئەڤ سالەدا، د بیاڤێ‌ كەتێ‌ كارەبا نیشتمانی دا، 17 پڕۆژە ل پارێزگەها دهۆكێ هاتینە بجهئینان و كەفتینە د خزمەتا وەلاتیان دا، هەمی پڕۆژە ژی ل سەر بودجەیا وەزارەتا كارەبا حوكمەتا هەرێما كوردستانێ هاتینە بجهئینان.
هندەك ژ وان پڕۆژەیان: گەهاندنا هێلا كارەبێ بۆ چەند تاخان ل گەل ڤەگوهاستن و دانانا براكێتێ سێ گوشە ل تاخێن (بەڕۆشكێ، نزاركێ، گژەبەرا، ئێمینكێ، ماسیك و مالتایێ)، گەهاندنا كارەبێ بۆ چەند مالەكێن نوو ل (مسیرێكێ، دانانا گوهۆركێ ئۆڤەرلورد ل ناحیا فەیدیێ، دانانا گوهۆركێ ئۆڤەرلۆد ل تاخێ تەناهی ل دەڤەرداریا سێمێلێ)، دانانا گوهۆركێ ئۆڤەرلۆد ل ناوچەداریا خانكێ و كۆمەلگەها تەناهی و سەخبێركرنا گوهۆركێن ژ كاركەفتی بۆ عمبارێن رێڤەبەریا بەلاڤكرنا كارەبا شێخان، دیسا گەهاندنا كارەبا نیشتمانی بۆ چەند تاخێن دەڤەرداریا شێخان و گوندێ دەحلێنەوێ ل ناوچەداریا ئەترووش.

زاخۆ، دلۆڤان هالۆ:

وەزارەتا باژێڕڤانی و گشتوگوزارێ‌ ل حوكمەتا هەرێما كوردستانێ د پێگەهێ خوە یێ فەرمی دا ڕاگەهاندیە، كو د چارچوڤەیێ پڕۆژەیێن وەزارەتا باژێڕڤانی و گەشتوگوزارێ دا و ب مەرەما گەهاندنا خزمەتگوزاریێن زێدەتر بۆ هەمی باژێڕێن هەرێما كوردستانێ، پڕۆژەیێ قێركرنا هەژمارەكا جاددەیان و دروستكرنا سۆلینێن ئاڤڕێژان ل تاخێ ئەیاز ل ئیدارەیا سەربخوە یا زاخۆ هاتە بجهئینان.
وەزارەتا باژێڕڤانی و گشتوگوزارێ‌ ل حوكمەتا هەرێما كوردستانێ ئاماژە ب وێ چەندێ ژی كریە كو ئەڤ پڕۆژە ب گوژمێ 309 ملیۆن و 459 هزار دیناران ل سەر بودجەیا سەرۆكاتیا باژێڕڤانیا زاخۆ دهێتە بجهئینان و ژ قێركرنا جاددەیان و دروستكرنا سۆلینێن ئاڤڕێژان ل تاخێ ئەیاز ل ئیدارەیا سەربخوە یا زاخۆ پێك دهێت.
ئاشكرا ژی كریە كو د دەمەكێ نێزیك دا هەر ل هەمان تاخ دێ قووناغەكا دی یا ڤی پڕۆژەیی دێ‌ هێتە بجهئینان.

دهۆك، لەزگین جوقی:

سەرپەرشتێ‌ پڕۆژەیێ‌ نووژەنكرنا پەرستگەها لالش دیار كر، نوكە دەزگەهێ‌ خێرخوازیێ‌ بارزانی پڕۆژەكێ‌ ئاڤێ‌ بۆ پەرستگەها لالش بجه دئینیت.
خالد نەرمۆ، سەرپەرشتێ‌ پڕۆژەیێ‌ نووژەنكرنا پەرستگەها لالش بۆ رۆژناما ئەڤرۆ ئاشكرا كر، دەزگەهێ‌ خێرخوازیێ‌ بارزانی پڕۆژەیێ‌ عمبارا ئاڤێ‌ ل پەرستگەها لالش بجه دئینیت و گۆت: «ئەڤ پڕۆژە بۆ خزمەتكرنا پەرستگەه و نیشانگەه و ئاقدێن پەرستگەها لالشێ‌ یە و ب گوژمێ‌ 80 هزار دۆلاران ژ لایێ‌ دەزگەهێ‌ خێرخوازیێ‌ بارزانی ڤە دهێتە بجهئینان».
گۆتژی: «ئەڤ پڕۆژە دێ‌ 500 هزار لیترێن ئاڤێ‌ كۆم كەت و ل دووڤ نەخشە و پلانێن ئەندازیاری یێن رێكوپێك دهێتە بجهئینان د چارچوڤێ‌ پڕۆژەیێ‌ نووژەنكرنا پەرستگەها لالش دا».

سەباح زوهێر

رێڤەبەرێ‌ پەروەردا ئاكرێ‌ راگەهاند، ل سنورێ‌ قەزا ئاكری هژمارەكا قوتابخانا نها كار تێدا دهێتەكرن و هندەك گەهشتینە قوناغا دووماهیێ‌ و هندەكان پارە ژی بۆ هاتیە خەرجكرن، لێ‌ ل تەندەری دا ماینە، هەروەسا هندەك قوتابخانێن دی ژی رەزامەندی بۆ هاتیە و هاتینە راگەهاندن و گۆت: ئەگەر ئەو پلانا مە دانای بهێتە جێبەجێكرن، كێشا كێمیا قوتابخانان ل ئاكرێ‌ نامینیت.

كاروان زاهر، رێڤەبەرێ‌ پەروەردا ئاكرێ‌ بۆ رۆژناما ئەڤرۆ دیار كر، ل سنورێ‌ قەزا ئاكرێ‌ 301 قوتابخان هەنە 13 باخچەنە و 39 قوتابخانێن ئامادەیی و 2 دواناوەندی و 247 قوتابخانێن بنەرەت هەنە، ل سنورێ‌ قەزا ئاكرێ‌ ب گشتی زێدەتر ژ 2600 ماموستایێن وانەبێژ هەنە كو ل ناڤەندێن خواندنێ‌ دا دەواما خوە دكەن.
ل دور پرۆژێن گرێدای پەروەردێ‌ ل سنورێ‌ ئاكرێ‌ رێڤەبەرێ‌ پەروەردا ئاكرێ‌ گۆت: ل سنورێ‌ قەزا ئاكرێ‌ رەزامەندی بۆ چەند قوتابخانا هاتیەكرن، ئەو ژی قوتابخانەكا 18 پولی ل سەنتەرێ‌ ناحیا گردەسێن كو بەرێ‌ بنیاتێ‌ بۆ هاتیە دانان و نوكە كار تێدا دهێتەكرن، هەروەسا ل تاخێ‌ گولان رەزامەندی بۆ قوتابخانەكا 12 پولی هاتیە و كار تێدا دهێتەكرن هەروەسا قوتابخانەكا دی ل تاخێ‌ بیوك كو 95% كار تێدا هاتیەكرن و گەهشتیە قوناغا دووماهیێ‌، هەروەسا دەمێ‌ مەسرور بارزانی سەرۆكێ حكومەتا هەرێما كوردستانێ‌ سەرەدانا قەزا ئاكرێ‌ كری دو قوتابخانێن دی یێن 18 پولی هاتنە راگەهاندن كو ل سەنتەرێ‌ ناحیا دینارتێ‌ و بجیلێ‌ نە.
زێدەتر گۆت: هەروەسا هژمارەكا قوتابخانێن دی رەزامەندی بۆ هاتیە كو ئەز قوتابخانە هاڤێتینە د تەندەری دا، لێ‌ هێشتا نەگەهشتینە قوناغا كاركرنێ‌ دا كو ئەو ژی 6 قوتابخانەنە كو هەمی بنەرەتن تایبەت یێت وان گوندانە ئەڤێن رێژا قوتابیان تێدا كێم بیت و قوتابخانێن وان دخراب.
كاروان زاهر رێڤەبەرێ‌ پەروەردا ئاكرێ‌ ئەو چەندە ژی گۆت: ل دووڤ پلانا مە یا سالانە كو مە دایە رێڤەبەریا پەروەردا گشتی یا دهۆك و قایمقامیا ئاكرێ‌ و پارێزگەها دهۆك مە هژمارەكا قوتابخانان د وێ‌ پلانێ‌ دا دیاركریە كو ئەو ژی شەش قوتابخانێن 18 پولی نە كو مە پێدڤیەكا زور پێ هەیە، هەروەسا پلانا گشتی یا چەند سالان مە پتر پێدڤی و كێماسیێن خۆ تێدا دیاركرینە كو تێدا مە هوورتر پێدڤیا خوە دیاركریە و مە گەهاندیە جهێن بلند، ئەگەر ئەڤ پلانە ب درستی بهێتە جێبەجێكرن مە ئاریشا كێمیا قوتابخانان چارەسەربیت.

لەزگین جوقی

ئاوارێن شنگال دبێژن، بۆ ئاڤەدانی و وەرگرتنا قەرەبووكرنێ‌ ئەم بێ‌ ئومید بووینە ژ بەغدا، ئەڤە نەه سالن بەغدا سۆزێ‌ ددەتە ئاواران و هەتا نوكە ژی خانیێن خەلكی د خرابووینە و ب هیڤیا عیراقێ‌ ڤە بیت دێ‌ هەر شنگال وێرانكری بیت، ئەم نەچارین ڤەگەرین و خانیێ‌ خۆ و شنگال ئاڤەدان بكەین.

خەیری زیبان، ئێكە ژ ئاوارێن شنگال ل كۆمەلگەها شاریا سەر ب قەزا سێمێلێ‌ ڤە ئاكنجی یە دیار كر: «ئاوارە گەهشتینە وێ‌ باوەریێ‌ خانیێن وان ژلایێ‌ حوكمەتا عیراقێ‌ ڤە ناهێنە ئاڤاكرن، خەلك نەچاربوویە بچنە شنگال و دەست ب ئاڤاكرنا خانیێن خۆ بكەن و خۆ ل هیڤیا حوكمەتا عیراقێ‌ ناگرن، ژبەركو ئەڤە نەه سالن هێشتا بەغدا بۆ ئاڤەانیا شنگال چو نەكریە.
زێدەتر گۆت:» هەتا نوكە گەلەك گوند ل شنگال هەنە، هێشتا حوكمەتا عیراقێ‌ پاقژ نەكرینە، گەلەك بەرمایكێن تیرۆرستێن داعش دناڤدا ماینە، ئەڤە وێ‌ دگەهینیت بەغدا ئاگەه ژ شنگال نینە و ئێزدی چەند داخوازیا بكەن بجهناهێن».
نایف سەیدۆ، قایمقامێ‌ قەزا شنگال ب وەكالەت دیار كر:» شنگال ل سالا 2014ێ‌ تووشی مەزنترین كارەسات بوویە، هەتا نوكە ژی ئاڤەدانیا شنگال نەهاتیە كرن، ل گۆرەی وێ‌ وێرانكاریا شنگال چێبوویی، ئەم هیڤدارین پرۆژەیێن ستراتیژی و گرنگ ل شنگال بهێنە بجهئینان و گرنگیەكا تایبەت ب شنگال بهێتە دان».