ئەڤرۆ

چاڤەڕێ‌ دهێتە كرن سوبەهی ل دەمژمێر 9:45 شەڤ تیما تەپا پێی یا یانەیا دهۆك ل یاریگەها شەهید فرانسۆ حەریری ببیتە مێڤانا یانەیا هەولێر ژ چارچووڤێ‌ هەڤڕكیێن گەڕا 24ێ‌ یا بۆ یانەیێن خولا پلا نایابا ئیراقێ‌ د یاریەكا تایبەتمەند و كلاسیكۆیا دو یانەیێن كوردستانێ‌ دا،
ئەڤ یاریە دبیتە یا دویێ‌ د ماوەیێ‌ پێنچ هەیڤێن بۆری دا پشتی بۆرینا هەشت سالێن دووركەفتنا كلاسیكۆیێ‌ و یاریا ئێكێ‌ یانەیا هەولێر دێ‌ مێڤانداریا دهۆكێ‌ كەت، ئەلهۆیێن چیا نوكە ب كۆمكرنا 36 خالان رێزا شەشێ‌ دهێت، هەمبەری وێ‌ یانەیا پایتەختی یاری بۆ یاری رەوشا وێ‌ باشتر لێدهێت پشتی هاتنا راهێنەرێ‌ نوو عەباس عوبێد ئەوا ل رێزا 13ێ‌ دهێت ب كۆمكرنا 29 خالان.
• ئامار د بەرژوەندیا تیما هەولێرێ‌ دانە
ئامارێن هەردو یانەیێن كوردستانی د یاریێن خولا ئیراقێ‌ دا د بەرژوەندیا هەولێرێ‌ دا هاتینە تۆماركرن ئەوا 15 جاران سەركەفتن ئینایی، ئەلهۆیێن چیا 14 جاران سەركەفتن هەبووینە د بەرانبەر دا هەردو یانە 13 جاران وەكهەڤی ئیناینە، 44 گۆل ل سەر هەولێرێ‌ تۆماركرینە و 49 گۆل ل سەر هاتینە تۆماركرن، ئێكەم یاریا كلاسیكۆ ل 10-7-1981ێ‌ بوو ژ چارچووڤێ‌ پلا دو یا ئیراقێ‌ ل یاریگەها دهۆكێ‌ هاتبوو كرن ب سەركەفتنا هەولێرێ‌ ب چار گۆلان بەرامبەر گۆلەكێ‌ بوو، دووماهی یاری یا بەری حەفت سالان ل وەرزێ‌ 14-2-2014 ژ پلا نایاب سەركەفتنا یانا هەولێر ب گۆلەكێ‌ بێ‌ بەرامبەر ل یاریگەها فرانسۆ حەریری دووماهی هاتبوو، لێ‌ دووماهی یاری ژ وەرزێ‌ ئەڤ سالە ل 30-10-2022 ل یاریگەها دهۆكێ‌ هاتبوو كرن و بێ‌ گۆل وەكهەڤبوون.
ژ یاریێن دی یێن ئەڤرۆ، ئەلقاسم- سیناعە، نەفت – دیوانیە، كەربەلا- كەرخ، سوبەهی تەلەبە- حدوود زەورا – نەوروز، نەفت ئەلوەسەت- شورتە، رۆژا پێنچ شەمبی، جەویە – نەفت ئەلمیسان، كارەبا – نەفت ئەلبەسرا.
بۆ زانین شورتە ب 48 خالان سەرێ‌ لیستێ‌ دهێت، جەویە 47 خال، كارەبا 45 خال، زەورا 44 خال، تەلەبە 39 خال، دهۆك 36خال، نەفت میسان 35 خال، رێزێن دویێ‌ هەتا حەفتێ‌ دهێن، نەوروز 32 خالان رێزا 10ێ‌، هەولێر 29 خال و زاخۆ 26 خال رێزێن 13ێ‌ و 15ێ‌ دهێن.

ئەڤرۆ

د دادخویانیەكێ‌ هاریكارێ‌ راهێنەرێ‌ تیما باسكێت بۆلا یانەیا زاخۆ دیار كر پشتی دەربازبوونا تیما وان بۆ چار گۆشەیا زێرین و قۆناغا پلەیی ئۆڤ بۆ وەرزێ‌ بهێت ئەوان پشكداریا خوە د ئێك ژ قارەمانیێن دەرڤە دا مسۆگەر كریە.
زێدەتر جۆتیار عەلی بۆ رۆژناما ئەڤرۆ گۆت: ل دووڤ رێنمایێن ئێكەتیا باسكێت بۆلا ئیراقێ‌ هەر تیمەكا ب گەهیتە چارگۆشەیا زێرین و قۆناغا پلەیی ئۆڤ دێ‌ مافێ‌ پشكداریێ‌ د هەر قارەمانیەكا دەرڤە دا هەبیت ل دووڤ لیستا دووماهیێ‌ یا رێزبەندیا خولێ‌ دهێتە دەستنیشانكرن، ژبەركو ل سەر ئاستێ‌ عەرەبی دو قارەمانی، رۆژئاڤا ئاسیا ئێك قارەمانی، ڤاڤارتنێن ئاسیا ئێك و قارەمانیێن ڤەكری ژی هەنە، ئانكو رێژەیا 100% بۆ وەرزێ‌ بهێت تیما زاخۆ پشكدار د ئێك ژ قارەمانیەكێ‌ دا مسۆگەر كریە و ئەڤە ژی باشترین دەلیڤەیە بۆ كوڕێن زاخۆ و یانەیێ‌ بۆ تۆماركرنا دیرۆكێ‌.
ژلایەكێ‌ دووڤە ناڤهاتی بۆ یاریا ئەڤرۆ گۆت: د نوكە دا ئەم بەرهەڤیان بۆ هەردو یاریێن پلەیی ئۆڤ دكەین و ئەڤرۆ دێ‌ بەرانبەر نەفت بین، سیستەمێ‌ ڤێ‌ قۆناغێ‌ ژ چار یاریان و ئێكا چارەنڤیسە، ئانكو دو یاریێن چوویی یێن دەمێ‌ خولێ‌ دا و دو یاریێن ڤێ‌ قۆناغێ‌ نە، د هەردو یاریێن خولێ‌ ئەم تووشی خوسارەتیێ‌ بووینە، دڤێت ڤان هەردو یاریا ب سەركەڤین هەتا یاریا چارەنڤیس بكەین ئەگەر نە ئەم دەرباز نابیتە دووماهیێ‌ و گۆت: یا دشیان دابی تدێ‌ بۆ ڤێ‌ یاریێ‌ كەین سەربار نە پشكداریا كاپتنێ‌ تیمێ‌ چەگەر عەلی و عادل محەمەد، ب هیڤینە بگەهینە ئارمانجا خوە.

قەیس وەیس:

بڕیارە سوبەهی چارشەمبی ل دەمژمێر 3:15 حەفت یاری ژ هەڤڕكیێن گەڕا 27ێ‌ یا خولا كوردستانێ‌ بۆ یانەیێن پلا نایاب یا تەپا پێی بهێنە ئەنجامدان كو دهێنە هژمارتن یاریێن چارەنڤیس و ب هێز بۆ هندەك یانەیان بەری ب دووماهی هاتنا وەرزێ‌ ئەڤ سالە ب سێ‌ گەڕان.
ل یاریگەها خوە زاخۆ دێ‌ سیروانی نوو مێڤان كەت ب دروشمێ‌ ژبلی سەركەفتنێ‌ چو بژاردەیێن دی نینن ژبۆ خوە قۆرتالكرن ل رێزا دووماهیێ‌ و داكەفتن بۆ پلا ئێك، كوڕێن خابووری 23 خال كۆمكرینە رێزا 15ێ‌ و دووماهیێ‌ دهێت دێ‌ بەرانبەر یانەكێ‌ بیت ئەوا 30 خال كۆمكرین رێزا 12ێ‌ دهێت، سەرۆكێ‌ یانەیا زاخۆ بلند شەفیق دیاركربوو ئەو دێ‌ كۆمەكا باش یا یاریزانێن خولا ئیراقێ‌ بۆ تیم زێدەكەن پێخەمەت خوە قۆرتالكرنێ‌.
د یاریا دویێ‌ دا و دهێتە هژمارتن دێربیێ‌ پارێزگەهێ‌ تیما ئاكرێ‌ ل یاریگەها خوە دێ‌ دهۆكێ‌ مێڤان كەت، ئەلهۆیێن چیا لڤینەكا باش كریە كو ئێك رێز پێشڤە هاتیە د لیستا خولێ‌ دا ئەوا 25 خال كۆمكرین و رێزا 14ێ‌ و بەری دووماهیێ‌ دهێت، لێ‌ مەترسیا داكەفتنێ‌ بەردەوامە و دێ‌ بزاڤێ‌ كەت سەركەفتنێ‌ بینت بۆ زێدەتر خوە دووركرن ژبەركو بتنێ‌ ئێك تیم داكەڤیتە پلا ئێك ل دووڤ سیستەمێ‌ خولێ‌ 16 یانە دو پاشڤە دچن، ژبەركو 15 ماینە پشتی خوەڤەكێشانا یانەیا نەورۆز، ژلایێ‌ خوەڤە تیما ئاكرێ‌ چ مەترسی و گڤاشتن ل سەر نینن ئانكو ئەنجام كارتیكرنێ‌ ل سەر ناكەت.
ژ یاریێن دی، هەردو یانەیێن باژێرێ‌ پیرمام پێشمەرگەیا هەولێر خودانا سەرێ‌ لیستێ‌ دێ‌ بیتە مێڤانا ئارارات ئەوا رێزا دویێ‌ دهێت، هەردو تیم 44 خال كۆمكرینە، برایەتی- شێروانە، چوارقۆرنە- هندرین، چەمچەمال- سەیدسادق، شەقلاوە- دەربەندیخان.

ئەڤرۆ

زاخۆ، عەلی حاجی:

بریاره‌ ئه‌ڤرۆ ده‌مژمێر 9:45 شه‌ڤ تیما ته‌پا پێی یا یانه‌یا زاخۆ ببیته‌ مێڤانا یانه‌یا نه‌جه‌ف ژ چارچووڤێ هه‌ڤڕكیێن گه‌ڕا 23 یا خولا ئیراقێ بۆ یانه‌یێن پلا نایاب، كوڕێن خابۆری رێزا 15ێ دهێن ب26 خالان و نه‌جه‌ف 33خالان رێزا نه‌هێ دهێت، د یاریا قۆناغا بۆری دا زاخۆ د ناڤ ئه‌ردێ خوه‌ دا ب گۆله‌كێ خوساره‌ت بوو.
ل دور به‌رهه‌ڤیێن تیما كورێن خابۆری دلژار عەدنان ئه‌ندامێ كارگێریێ بۆ رۆژناما ئه‌ڤرۆ دیاركر یاریا وان به‌رانبه‌ر تیما نەجەفێ ژ یاریێن گرنگن ژبەر کو دەمەکە تیما مە نەشیایە سەرکەفتنێ تومار بکەت و گۆت: سه‌ركه‌فتن دڤێ یاریێ دا دێ گەلەک خزمەتا یانه‌یا مە کەت ژبەر کو دێ خوە ژ رێزبەندیێن دووماهیێ دوورئێخن و پێنگاڤه‌كا باش بیت، دیسان ژ روویێ دەروونی ڤە تیما بەرە ب قۆناغەکا دیتر چێت و جەماوەرێ مە ژی تێهنیێ سەرکەفتنایە، تیمێ هەمی بەرهەڤی کرینە بۆ وێ یاریێ و تنێ یاریزانەک یاریێ ناكه‌ت، هەرچەندە یانه‌یا نەجەف ژی د رەوشەکا ب زەحمەت دا دەرباز دبیت ب تایبەتی ژی دەست ژ کارکێشانا راهێنەرێ وێ تیمێ و ئەنجامێن ڤێ دووماهیێ یێن لاواز ئەرکێ وان ب زەحمەت ئێخستیە، لێ ئەڤە وێ چەندێ ناگەهینیت کو تیما نەجەف دێ تیمەکا ب ساناهی بیت و ئەرد و جەماوەر ژی د بەرژەوەندیا وێ یانێ دایه‌. ناڤبری گۆت ژی : هەمی پێدڤیێن تیمێ ژی ژلایێ دەستەیا کارگێریێ ڤە هاتینە دابینکرن و چو کێشە نینن و چاڤەرێ ئەنجامەکێ باشین و گه‌شبینن د وێ یاریێ دا سێ خالان ب دەستخوە ڤە بینن

ئەڤرۆ

چاڤەڕێ‌ دهێتە كرن ئەڤرۆ و سوبەهی ل دەمژمێر 10 شەڤ چار یاریێن ئاگرین و ڤەبر ژ چارچووڤێ‌ گەڕا دویێ‌ و چارێك دووماهیا قارەمانیا یانەیێن ئۆرۆپا قارەمانێن خولا چامپیۆنز لیگ بهێنە كرن و شەڕێ‌ مەزن بۆ دەربازبوو بەر ب قۆناغا پێش دووماهیێ‌ ئەوێن چەند یانەیا نیڤا رێكێ‌ دەربازكرین و چەند یانە ژی لبن گەڤێن راوەستیانا خەونانە.
– ناپۆلی و میلان شەڕێ‌ دووماهیێ‌ د سیناریۆیا ئۆرۆپا دا
ئێك ژ یاریێن ب هێز ئەوێن بڕیارە ئەڤ شەڤە بهێتە ئەنجامدان دێ‌ یاریا ئاگرین و شەڕێ‌ ئیتالی د سیناریۆیا چامپیۆنز لیگ دا بیت، د یاریا ئێكێ‌ دا یانەیا میلان شیابوو ل یاریگەها خوە سان سیرۆ ب گۆلەكێ‌ سەركەفتنێ‌ ل سەر ناپۆلی بینت ئەوا ژلایێ‌ ئیسماعیل بن ناسر هاتیە تۆماركرن، یاریا ئەڤ شەڤە دێ‌ ل یاریگەها دیێگۆ ئارماندۆ مارادونا یا ناپۆلی بیت ئەوێن هیڤیێن دەربازبوونێ‌ بۆ قۆناغا پێش دووماهیێ‌ ژ دەست نەداینە سەرباری ب گۆلەكێ‌ تووشی خوسارەتیێ‌ بوون، خودانێن ئەردی سەركێشا خولا ئیتالیا یە و دێ‌ شەڕی كەت نە بتنێ‌ بۆ پلێتا دەربازبوونێ‌ بەلكو تۆلڤەكرن د چامپیۆنز و خولێ‌ دا، هەرچەندە راهێنەرێ‌ وێ‌ لۆتشیانۆ سیالێتی نەشێت سپێرتا خوە ل سەر هەردو یاریزانان ئاندرێ‌ ئانگۆیسا ئەوێ‌ هاتیە دوورئێخستن ب كارتا سۆر و یێ‌ چاپانی كیم مین گایی، لێ‌ ڤەگەڕیانا ستێرێ‌ یانێ‌ یێ‌ نێجیری فیكتۆر ئۆسیمین دێ‌ هێزێ‌ دەتە ناپۆلی بۆ سەركەفتنێ‌، بەرانبەر دا راهێنەرێ‌ میلان ستیڤانۆ بیۆلی باش دزانین دەلیڤەیا دەربازبوونێ‌ بتنێ‌ 50% مایە و وەكهەڤی یان سەركەفتن دێ‌ دەربازبوونێ‌ مسۆگەر كەت.
چێلسی خەونا ب ریمۆنتادا بەرانبەر ریالێ‌ د بینت
د یاریەكا دی یا ئەڤ شەڤە دا كو ئێك ژ هێزترین دیدارێن چامپیۆنزێ‌ یە، یانەیا چێلسی یا ئنگلتەرایێ‌ ل یاریگەها خوە ستامفۆرد برێدچ دێ‌ مێڤانداریا ریال مەدرید كەت ئێك ژ بەربژارێن بهێز یێن چامپیۆنزێ‌ و خودانا ناسناڤێ‌ وەرزێ‌ بۆری، چێلسی د یاریا ئێكێ‌ یا ڤێ‌ قۆناغێ‌ دا ل یاریگەها سانتیاگۆ بێرنابیۆ ب دو گۆلان تووشی خوسارەتیێ‌ بوو و هیڤیێن دەربازبوونێ‌ بۆ قۆناغا پێش دووماهیێ‌ لاواز بووینە، لێ‌ د یاریا ئەڤرۆ دا ناڤ ئەرد و جەماوەرێ‌ خوە پێدڤی ب ریمۆنتادا یە هەتا بشێت پلێتا چوونێ‌ وەربگریت و خەونا پێڤە دبینت، راهێنەرێ‌ وێ‌ فرانك لامبارد ئەركێ‌ تیما خوە ب زەحمەت نابینت و داخواز ژ یاریزانێن خوە كر دەستكەفتێ‌ 2011-2012 دۆبارە بكەنەڤە پشتی شیایی د قۆناغێن دووماهیێ‌ دا سەركەفتنێ‌ ل سەر بەرشەلۆنا و بایرن میۆنخ بینن ب ناسناڤی بهێنە خەلاتكرن، لێ‌ ئەو ئاستێ‌ وی دەمی و یێ‌ نوكە تیما چێلسی گەلەك ژێك دوورن و بزەحمەتە بەرانبەر یانەكا وەكو ریالێ‌ مەدرید شارەزاهی و تایبەتمەندیا وێ‌ چامپیۆنز بیت ئەوا دێ‌ هەموو بزاڤا كەت دڤێ‌ یاریێ‌ دا یان پاراستنا هەردو گۆلێن خوە بكەت یان زێدەتر ژی گۆلان تۆماربكەت.
ئامارێن چارەنڤیس هەنە
سەرجەمێ‌ گشتی یێ‌ دیدارێن دناڤبەرا وان 10 جاران بووینە و پرانیا وان یاریان ژی چارەنڤیس بۆ ناسناڤی و دەربازبوون بۆ قۆناغێن دووماهیێ‌ بووینە، د چامپیۆنزێ‌ دا پێنج جاران بەرانبەر ئێك بووینە، ل وەرزێ‌ 2021-2022 د قۆناغا پێش دووماهیێ‌ دا ژ هەردو یاریان چێلسی دەربازبوو یاریا دووماهیێ‌ ب وەكهەڤیەك و سەركەفتنەك، ل وەرزێ‌ بۆری ژ چارێك دووماهیێ‌ دا ریال دەربازبوو یاریا پێش دووماهیێ‌ د یاریا ئێكێ‌ دا3-1 سەركەفتن بوو و یا دویێ‌ 3-2 خوسارەت بوو سەرجەم 5-4 دەبازبووـ ل حەفتیا بۆری ریال شیابوو دو گۆلان بێ‌ بەرانبەر سەركەفتنێ‌ بینت، دادڤانێ‌ یاریا ئەڤ شەڤە یێ‌ ئیتالی دانیێلی ئۆرساتۆ بیت.
بایرن بەرانبەر ئەركەكێ‌ مەحال دا
بڕیارە سوبەهی چارشەمبی دو یاریێن دی یێن ڤەبڕ ژبۆ دەستڤەئینانا پلێتا دەربازبوونێ‌ بۆ یاریا پێش دووماهیا قارەمانیا چامپیۆنز لیگ دەمژمێر 10شەڤ بهێنە كرن، یاریا بایرن میۆنخ یا ئەلمانی و مانچستەر ستی یا ئنگلتەرا ئێك ژ گرنگترین یاریێن ڤێ‌ قۆناغێ‌ یە جەماوەرێ‌ وەرزشی هەموو چاڤەڕێ‌ دیتنا ڤێ‌ یاریێ‌ بیت ژبەركو هەردو یانە ب سەنگ و زلهێزیا خوە هەیە، د یاریا ئێكێ‌ یا بۆری دا بایرن میۆنخ تووشی خوسارەتیەكا نە پێشبێنیكری بوو دەمێ‌ ل یاریگەها ئستاد ئتیحاد دگەل خودانێن ئەردی مان ستی ب سێ‌ گۆلان خوسارەت بووی و هیڤیێن وێ‌ لاوازكری، هەردو یانە 11 جاران بەرانبەری ئێك بووینە پێنچ سەركەفتن بۆ بایرنێ‌ و شەش بۆ مان ستی بووینە.
ئۆلیڤەر كان: چو ئەنجام مەحال نینن
بۆ یاریا ئەڤ شەڤە ژی بایرنێ‌ چو بژاردە نینن ژبلی ریمۆنتادا زێدەتری سێ‌ گۆلان بێ‌ گۆل ل سەر بهێنە كرن لێ‌ تیما مێڤان بڤی شێوەیی هوسا ب سانەهی نابیت و خوە دەست بەردەت و راهێنەرێ‌ وێ‌ گۆاردیۆلا دێ‌ تیما خوە ئینیتە دناڤ یاریگەهێ‌ دا ب چەكێ‌ خوە یێ‌ مەزن تایبەت ل هێلا ناڤین ژ رۆدرێگۆ هێرناندێز، كێڤێن دی برۆیین، ئیلكایی گۆندۆگان، جاك كریتێچ، ریاز محرز، و سەركێشێ‌ گۆلكەرێن چامپیۆنزێ‌ ئیرلیگ هالاند خودانێ‌ 11 گۆلان، بۆ ڤێ‌ یاریێ‌ بایرن میۆنخ هیڤیێن خوە ژ دەست نەداینە هەروەكو رێڤەبەرێ‌ تیمێ‌ ئۆلیڤەر كانی دیاركری چو ئەنجام مەحال نینن و ئەم تیمەكا مەزنینن و دێ‌ د ناڤ ئەرد و جەماوەرێ‌ خوە دا كەین، سێ‌ گۆل گەلەكن لێ‌ گیانێ‌ كۆم و شەڕێ‌ ب وەفاداری و ئیمان دێ‌ سەركەفتن و گەهشتن بۆ ئارمانجێ‌ هەبیت.
ەنفیكا پشت گەرمیا جەماوەر خوە بەرهەڤە بۆ دیدارا میلانێ‌
د یاریەكا دی یا ب تاما تۆلڤەكرێ‌ دا ئەوا دێ‌ سوبەهی هێتە كرن، یانەیا ئەنتەر میلان ل یاریگەها خوە سان سیرۆ دێ‌ مێڤانداریا بەنفیكا یا پۆرتۆگالی كەت، یاریا ئێكێ‌ یا ڤێ‌ قۆناغێ‌ ئەنتەرێ‌ شیابوو ب دو گۆلان خوە نێزیكی پلێتا دەربازبوونێ‌ بكەت لێ‌ ئەڤ دو گۆلە بەرانبەر خودانێن ئەردی ئێكلاكەر نابن و دێ‌ شەڕی كەت ناهێلیت هیڤیێن خوە ژ دەست بدەت، هەرچەندە هەردو یانە دو جاران بەرانبەر ئێك بووینە ژ چارچووڤێ‌ چامپیۆنزێ‌ ئەوژی ل سالا 1965 بوو د یاریا دووماهیێ‌ دا ئەنتەر ب گۆلەكێ‌ سەركەفتن تۆماركربوو، یاریا دویێ‌ یا حەفتیا بۆری بوو ئەوا ب دو گۆلان بۆ سەركەفتنا ئەنتەرێ‌ ب دووماهی هاتی، لێ‌ سێ‌ جارێن دی ژی بەرانبەر ئێك بووینە وەكهەڤیەك و دو سەركەفتن بۆ ئەنتەر بووینە، ئانكو یانەیا پۆرتۆگالی نەشیایە چو سەركەفتنا تۆماربكەت، بۆ یاریا ئەڤ شەڤە بەنفیكا دێ‌ هەمی شیانێن خوە بۆ سەركەفتنا ئێكێ‌ مەزێخیت ب پشت گەرمیا جەماوەرێ‌ خوە.
بیرەوەریێن بەنفیكا و ئەنتەر د چامپیۆنزێ‌ دا
یانەیا بەنفیكا یا پۆرتۆگالی پێنج جاران دەربازبوویە یاریێن دووماهیا چامپیۆنزێ‌ د سالێن شێستێ‌ یێن چەرخێ‌ بوری دا، دو جاران ناسناڤ دەستڤە ئیناینە و سێ‌ جاران ژ دەست دایە، بەرانبەر دا یانەیا ئەنتەر چار جاران دەربازبوویە یاریا دووماهیێ‌ د ماوەیێ‌ 1964 هەتا 1972ێ‌، دو ناسناڤ دەستڤە ئیناینە دیسان دو ژ دەستداینە.