ئەڤرۆ
دهۆك، لەزگین جوقی
پەرلەمانتارەكێ پارتی ل جڤاتا نوونەرێن عیراقێ دیار كر: «دەست ب كۆمكرنا ئیمزایێن پەرلەمانتاران هاتیە كرن بۆ دامەزراندنا هزار پولیسێن خەلكێ قەزا شنگال».
مەحما خەلیل، پەرلەمانتارێ پارتی ل جڤاتا نوونەرێن عیراقێ راگەهاند:» بریار بوو 2500 پولیس بۆ شنگال دناڤ بۆدجەیا سالە 2023ێ دا ل دووڤ رێكەفتنا دناڤبەرا هەرێما كوردستانێ و عیراقێ دا بهێنە دامەزراندن بۆ ئاساییكرنا رەوشا شنگال و خەلكێ شنگال فۆرم پر كرن دا كو بهێنە دامەزراندن و پاراستنا شنگال بكەن، نوكە ب تنێ رازیبوون ل سەر 1500 پولیسان هاتیە كرن و ناڤێن هزار كەسێن دی نەهاتیە و نوكە ئەم كار دكەین رازیبوون ل سەر وان هزار كەسان ژی بهێتە كرن».
ئاشكەرا كر: «نوكە دەست ب كۆمكرنا ئێمزایێن پەرلەمانتاران هاتیە كرن بۆ دامەزراندن و دەستڤەئینانا مافێن وان هزار كەسێن بەغدا رازیبوون ل سەر ناڤێن وان نەكری، ئەم دێ هەموو هەولا دەین مافێ وان بەرزە نەبیت، ئەو ژی بهێنە دامەزراندن و ببنە پولیس».
مەحما خەلیل دیار كر:» پەرلەمانتارێن پارتی شیاین 50 ملیار دیناران بێخنە سەر سندوقا ئاڤەدانیا شنگال و پشتی بۆدجەیا عیراقێ پەسەند بیت، ئەڤ كوژمێ پارەی دێ بۆ ئاڤەدانیا شنگال هێتە تەرخانكرن».
ئاشكرا كر:» كوژمەكێ مەزن یێ پارەی بۆ ئاڤەدانیا شنگال یێ هاتیە تەرخانكرن و دێ هژمارەكا مەزن یا پرۆژەیان ل شنگال هێنە بجهئینان و ئەڤ پرۆژە دێ بنە ئەگەر ئاوارە ڤەگەرنە سەر جه و مالێن خۆ، لەورا ئەم هیڤدارین گرۆپێن نەشەرعی ئاستەنگان دروست نەكەن، چونكو ژبەر گرۆپێن نە شەرعی شنگال نەهاتیە ئاڤەدانكرن و ئاواران ژی نەشیایە ڤەگەرن».
نيشاندان