ئەڤرۆ
زاخۆ، عەلی حاجی:
سەرۆكێ لژنا هەلكەفتێن ئادار و نەورۆزێ ل ئیدارەیا سەربخوە یا زاخۆ بۆ رۆژناما ئەڤرۆ دیار كر، ل دووڤ بەرنامەیێ ئیدارەیا سەربخوە یا زاخۆ د هەموو رۆژێن رەمەزانا پیرۆز دا خانی بۆ وەلاتیێن دەستكورت دێ هێنەدان، زێدەباری وێ چەندێ ژی چەندین هاریكاریێن دیتر ژی ب وان دهێنەدان.
سەیفی حاجی، سەرۆكێ لژنا هەلكەفتێن ئادار و نەورۆزێ ل ئیدارەیا سەربخوە یا زاخۆ گۆت: “بۆ سالا دویێ ل دووڤ ئێك ئیدارەیا سەربخوە یا زاخۆ و گوهدار شێخۆ، سەرپەرشتێ ئیدارەیا سەربخوە یا زاخۆ بەرنامەیەكێ تایبەت دانایە بۆ هاریكاریكرنا خێزانێن كێم دەرامەت، كو د سالا ئێكێ دا هاریكاریێن جوراوجور دهاتنەدان، وەكو: دیتنا دەلیڤەیێن كاری د كەرتێ تایبەت دا بۆ وان خێزانێن دەستكورت و نووژەنكرنا خانیێن وان و هاریكاریكرن ل گەل نەخوەشێن وان، دیسا پێشكێشكرنا پارەیەكێ باش و گەلەك جۆرێن دیترێن هاریكاریان، ئەو كار ژی هەر ب هاریكاریا سەرمایەدارێن زاخۆ دهاتە ئەنجامدان، بەلێ بۆ رەمەزانا ئەڤ سالە بەرنامەیەكێ رێكوپێكتر هاتیە دانان، ئەو ژی د درێژاهیا مەها رەمەزانا پیرۆز دا، كو هەر خێزانەكا گوهدار شێخۆ سەرەدانا وان بكەت دێ خانیەكی پێشكێشی وان كەت و هەتا هندەك هاریكاریێن دیتر ژی دهێنە پێشكێشكرن، بۆ نموونە: د سەرەدانێن بۆری دا و پشتی سەرەدانا خێزانەكا دەستكورت هایتە كرن و خانیەك پێشكێشی وان هاتیە كرن، سەرپەرشتێ ئیدارەیا سەربخوە یا زاخۆ چارەسەركرنا نەخوەشیا ئافرەتەكا وێ خێزانێ ژی ب ستوویێ خوەڤە گرت و دێ بۆ وەلاتێ توركیا هێتە رەوانە كرن”.
ناڤبری گۆتژی: “سەرمایەدارێن زاخۆ ژی د گەل مە دا هاریكارن و پشتەڤانیا وان ژی دێ پڕۆژە ب شێوەیەكێ سەركەفتی ب رێڤە چیت، وان بەرنامەیێن گەلەك باش یێن هاریكاریان هەنە و ئەو ب شێوەیەكێ باش چاڤدێریا هەموو خێزانێن دەستكورت دكەن، كو هەر خێزانەكا ب دروستی پێدڤی ب هاریكاریێ بیت ئەو دەستێ هاریكاریێ بۆ درێژ دكەن”.
نيشاندان