ئەڤرۆ

هەولێر، قائید میرۆ:

بەرپرسێ دەزگەهێ بلندێ ئیلۆن و گولانێ ئاشكرا كر، ناڤێن پێشمەرگەیێن بەرێ دێ هێنە رێكخستن و بزاڤ دهێنە كرن پشتی مرنێ ژی مووچێ وان یێ بەردەوام بیت هەمبەر خەباتا وان بۆ گەلێ كوردستانێ كری و د دەمێ نوكە دا فۆرمەك بۆ پێشمەرگەیێن بەرێ دهێتە بەلاڤكرن.
عەبدولڕەحمان مەلا رەسول، بەرپرسێ دەزگەهێ بلندێ ئەیلۆن و گولانێ بۆ رۆژناما ئەڤرۆ دیار كر، هەژمارەكا زۆرا كەسان ل دەزگەهی ناڤێن خوە تۆماركرینە و ل سەر دەمێ شۆڕشێن ئەیلۆن و گولانێ پێشمەرگە بووینە و گۆت: «مخابن هەژمارەكا زۆرا وان پێشمەرگەیێن بەرێ نەماینە و وەغەركرینە، ئەم نوكە بەردەوام دووڤچوونێ بۆ كەسوكارێن وان دكەین و یێن مووچە بۆ هاتیە دابینكرن بزاڤان دكەین مووچێن وان بەردەوام بن».
عەبدولڕەحمان مەلا رەسول گۆتژی: «ل گورەی رێنمایێن حوكمەتێ مووچێ وان دێ هێتە رێكخستن و د دەمێ نوكە دا بادەك بۆ دهێنە ڤەكرن و فۆرمەك هاتیە بەرهەڤكرن و پێشمەرگەیێن ئەیلۆن و گولانێ تێدا دهێنە تۆماركرن و هەر جهەكی پێدڤی ب هەڤكاریا دەزگەهی هەبیت دێ هاریكار بین چ ل گەل لایەنێن پەیوەندیدار یان ژی بارەگەهێ بارزانی».

ئەڤرۆ

سولین سلێمان:

بهایێ پێدڤیێن خارنێ ل بازارێن هەرێما كوردستانێ هندی بهێت بلندتر دبن و ئەڤ چەندە ژی بوویە بارگرانی لسەر ملێن خەلكی ژ وان ژی بلندبونا بهایێ گوشتی، ژبەركۆ رێك ناهێتە دان ئاژەل و گوشت ژ دەرڤەی وەلاتی بهێتە هاوردەكرن، دیسا ژبەر كێمیا بەرهەمێ ناڤخۆ بوویە ئەگەرێ‌ وێ كیلویەكا گوشتی نۆكە 20 هزار دیناران بیت.

فیراس سەدیق، رێڤەبەرێ سامانێن ئاژەلان ل هەرێما كوردستانێ بۆ رۆژناما ئەڤرۆ گۆت: گرانبوونا بهایێ گوشتێ سور نۆكە ژبەر گرانبوونا ئالیكیە، دیسا ژی بلندبوونا بهایێ دولاری بەرامبەر دیناری ئەگەرەكێ دیە ژ بۆ گرانبوونا بهایێ گۆشتێ سور.
رەمەزان سدیق كۆ زێدەتر ژ 10 سالایە كارێ گۆشتفرۆشیێ دكەت بۆ رۆژناما ئەڤرۆ گۆت: بهایێ گوشتی دو مەهن بەردەوام زێدە دبیت ب جۆرەكی كۆ ژ 17 هزار دیناران بۆیە 20 هزار دینار، ئەگەرێ وێژی ئەوە مە داهاتێ ناڤخۆ نینە خەلك نۆكە دا ب تنێ نیڤ كیلۆیا گوشتی دبەت و نە زێدەتر.
خویاكر: وەك یا دیار ئەم نێزیكین ژ جەژنا نەورۆزی و خەلك ئامادەكاریان ژ بۆ ڤێ جەژنێ دكەن، ئەڤ چەندە ژی دبیتە ئەگەر خواست ل سەر كالا و پێدڤیێن خوارنێ زێدە ببیت و بها ژی گرانتر ببن، لێ هندەك جاران ژی ب نێزیكبوونا ڤان جۆرە بونەیان فرۆشیار ب خوە ژی ل دەڤ خوە بهایێن خارنێ و كەل و پەلان گران دكەن، ئەڤ چەندە پێدڤیە حوكمەت چاڤدێریا وان بكەت دا كو بارێ وەلاتیان گران نەكەن.

ئەڤرۆ

رەمەزان زەکەریا:

دەڤەرا ئاكرێ ب ناڤ و بانگە بۆ بەرهەمئینانا هنگڤینێ خومالیێ مێشان و سالانە رێژا بەرهەمێ هنگڤینی زێدە دبیت و خواستەكا باش ل سەر بەرهەمێ هنگڤینێ ئاكرێ هەیە ژلایێ كریكاران ڤە و ژ نافخۆیا ئاكرێ و پارێزگەهێن دن یێن كوردستانێ.

یاسین حەكیم، مێشڤانەكێ دەڤەرێ یە بۆ ئەڤرۆ گۆت: ب خودانكرنا مێشا كارەكێ ب ساناهی نینە، بەلێ ژبلی حەزا ب خودانكرنێ بەرهەمێ مێشا یێ باشە و د شیاندایە خێزان پشت بەستنێ ب داهاتێ وێ بكەت، ژبەر وێ خواستا ل سەر هنگڤینی هەی، كەش و هەوای كاریگەری هەیە ل سەر بەرهەمێ مێشا و هنگڤینی ئەگەر یێ خۆش بیت بەرهەمێ زۆرە، ئەگەر هشكەسالی بیت بەرهەم كێم دبیت ب گشتی ئاكرێ گەلەك جهەكێ باشە بۆ ب خودانكرنا مێشا و چەندین جۆرێن هنگڤینی هەنە و بهایێ وان ژی یێ جۆدایە ژ 25 هزارا بۆ پتر ژ 100 هزاران دهێتە فرۆتن.
فازل مستەفا، رێڤەبەرێ چاندنا ئاكرێ بۆ ئەڤرۆ گۆت: ئاكرێ خودان تایبمەندیە بۆ كەرتێ چاندنێ و ئاژەلداریێ و ب خودانكرنا مێشا ژبەر وی كەش و هەوایێ پاقژ و رێژا كەسكاتی، ئاكرێ بەرهەمێ هنگڤینی زۆرە سالانە رێژە زۆرتر دبیت.
ناڤبری گۆت ژی: ل ئاكرێ و ناوچەداری و گوندێن دەڤەرێ مێشڤانێن باش هەنە و سالانە بەرهەمەكێ باش یێ هنگڤینێ ئاكرێ دكەڤیتە بازاری و خواستەكا زۆر ل سەر هەیە ژلایێ كرێكاران ڤە.
ناڤهاتی خویاكر: ل ئاكرێ 517 مێشڤان هەنە و 19 هزارو 500 مالە مێش هەنە رێژا بەرهەمئینانا هنگڤینی سالانە بلند دبیت و دگەهیتە 132 تەنێن هنگڤینی ، هنگڤینی ئاكرێ ل بازاری ژی خواستەكا باش ل سەر هەیە و زوو دهێتە فرۆتن.

ئەڤرۆ

قائید میرۆ:

بەرپرسەكێ ئێكەتیا هاوردە و هەناردەكارێن كوردستانێ دیار كر، فرۆتنا دۆلاری ب بهایێ بانكا ناڤەندی دێ كاریگەری ل سەر بازاڕی و داكەتنا بهایێ كەلوپەلان هەبیت و دبێژیت، پێشبینی دهێتەكرن دۆلار دەوروبەرێ 142 هزار دینار جێهگیر ببیت و ئالۆزیا ل بازاڕی هەی نامینیت، چونكە بلندبوون و داكەتنا بهایێ دۆلاری كاریگەریێن خراپ ل سەر بازاڕی هەبووینە.

گەیلان حاجی سەعید، ئەندامێ ئێكەتیا هاوردە و هەناردەكارێن كوردستانێ بۆ رۆژناما ئەڤرۆ دیار كر» سیستەمێ گۆهۆڕینا دۆلاری بۆ بازرگانان وەك پێدڤی نینە، ژ بەر كو ئاستەنگێن زۆر تێدا هەنە و پەسەندا بانكا ناڤەندی بۆ كۆمپانیا زۆر درەنگ ڤەدگەڕیت و هندەك ژی دهێنە رەتكرن، چونكە بۆ عێراقێ سیستەمەكێ نوویە و هەتا نوكە كار ب ڤی سیستەمی نەهاتیەكرن ئاستەنگ هەنە بۆ بجهئینانێ، ئەڤە ژی بوویە ئەگەر بهایێ دۆلاری هەر بلندی بمینیت و داناكەڤیت، بەلێ ئەم گەشبینین ب سیستەمێ نوكە دهێتە بجهئینان بۆ گۆهۆڕینا پارەی.
زێدەتر گۆت: ژ بەر كو دۆلاری چەندی ئەرزان بۆ بازرگان و كۆمپانیا بهێتە گۆهۆڕین دێ كاریگەری ل سەر لڤینێن بازرگانی و داكەتنا بهایێ كەلوپەلان هەبیت، ئەگەر سیستەم بهێتە پێشبرن و گۆهۆڕین تێدا بهێنەكرن و دۆلاری ب بهایێ بانكا ناڤەندی بدەنە كۆمپانیا بێگومان پێنگاڤەكا زۆر باشە و دێ زۆر مفا هەبن بۆ وەلاتی و بازرگانان، چەند بازرگان و كۆمپانیا دۆلار ب بهایەكێ گونجای دەستكەڤیت دێ هند كاریگەری ل سەر بازاڕێ عێراقێ و هەرێما كوردستانێ پەیداكەت، بەلێ هێشتا نەبوویە سیستەمەكێ رێكوپێك و وەك خوە ناهێتە بجهئینان و ئاستەنگ هەنە و بۆ داهاتی دێ كارەكێ زۆر باش و ئەرێنی بیت رەنگڤەدان ل سەر كەرتێ بازرگانی و بازاڕی دێ هەبیت.
گەیلان حاجی سەعید ئاماژەكر» داكەتن و بلندبوونا بهایێ دۆلاری زیانێن زۆر گەهاندینە كەرتێ بازرگانی و وەلاتی گازندا دكەن ل دۆر گۆهۆڕینا بهایێ كەلوپەلان، بەلێ پلان هەیە بازاڕ بهێتە رێكخستن و بهایێ دۆلاری بهێتە جێهگیركرن ئەز پێشبینی دكەم ل داهاتی بهایێ دۆلاری ل بهایەكی جێهگیرببیت هەتا 142 هزار دیناران بۆ 100 دۆلاران، چونكە عێراقێ دەست ب ڤەكێشانا پارێ خوە كریە ل بازاڕی ئەو ژی ب رێیا كۆمپانیا، دەمێ دینار كێم دبیت ل بازاڕی دێ بهایێ دینارێ‌ عێراقی بەرەف بلندبوونێ بچیت هەمبەر دۆلاری.
هەروەسا دێ كاریگەری ل سەر لڤینێن بازرگانی ژی هەبیت، سیستەمێ بانكی چەند بەرەف پێشڤەبچیت و بهێتە رێكخستن دێ كاریگەری لسەر كەرتێ بازرگانی هەبیت، ئەز وەسا دبینم ل داهاتی هەم بهایێ دۆلاری بهێتە جێهگیركرن هەمبەر دینارا عێراقی هەم ژی كاریگەری لسەر بازاڕی هەبن بۆ ئەرزانبوونا بهایێ كەلوپەلان.