ئەڤرۆ

پشتی دووركەفتنەكا درێژ بڕیارە یانەیا ئافرەتێن دهۆكێ‌ بۆ وەرزێ‌ 2023ێ‌ ب تیمێن ل سەر ئاستێ‌ تاك و چەنكی ب هێز ڤەگەڕێتە دناڤ چالاكیێن خول و قارەمانیێن كوردستانێ‌ و ئیراقێ‌ دا و پێنگاڤا ئێكێ‌ دێ‌ پشكداری قارەمانیا جۆدۆیا كوردستانێ‌ بن ئەوا بڕیارە هەڤڕكیێن وێ‌ ل سەر ئاستێ‌ پشكۆژ، تازەپێكەهشتیان و لاوان ل 16ێ‌ ڤێ‌ هەیڤێ‌ باژێرێ‌ دهۆكێ‌ مێڤانداریا وێ‌ بكەت.
د داخویانیەكێ‌ دا جریسك یۆنس سەرۆكا یانەیا ئافرەتێن دهۆكێ‌ بۆ رۆژناما ئەڤرۆ گۆت: بڕیار هاتیە دانا وەكو كارگێریا یانێ‌ پشكداریێن ئەڤ سالە زێدەتر گرنگی دان ب یاریێن تاكی و چەنكی بن پێخەمەت زێدەتر پشتەڤانیا یاریزانێن كچ یێن یاریێن جودا، پێنەڤێت ئەڤ پێنگاڤە ژی دێ‌ ل دووڤ شیانێن مە یێن دارایی بن ئەو داهاتێ‌ هەیڤانە ژلایێ‌ كارگێریا پارێزگەها دهۆكێ‌ بۆ مە دهێت بزاڤێ‌ كەین بشێوەكێ‌ رێكخستی و پلان پشكداریێ‌ د قارەمانیێن جودا دا بكەن، ئێكەم قارەمانی ژی دێ‌ یا جۆدۆیا كوردستانێ‌ بیت ئەوا بڕیارە ل 16 ڤێ‌ هەیڤێ‌ پارێزگەها دهۆكێ‌ بهێتە كرن، دووڤدا دێ‌ چالاكیێن خوە زێدەكەن و پشتەڤانیا كچێن باژێرێ‌ خوە كەین كو ل دووڤ شیانان تیمێن تایكۆاندۆ و تێنسا ئەردی یێن یانەیا مە پشكداری قارەمانیێن داهاتی یێن كوردستانێ‌ و ئیراقێ‌ بكەن.
هەروەسان ناڤهاتی ئەوچەندە ژی گۆت: ئەم رژدین یانەیا ئافرەتێن دهۆكێ‌ ب هێز ڤەگەڕیت و نەبتنێ‌ پشتەڤانیا فۆتسالێ‌ و یاریا تەپا پێی بكەت، بەلكو هەر یاریەكا پێدڤی و ل دووڤ شیانێن مە یێن دارایی كو بكەڤیتە د خزمەتا وەرزشا پارێزگەهێ‌ و تەخا وەرزشڤانێن كچ دێ‌ هەموو بزاڤا نەكەین گرنگیەكا تایبەت پێ‌ بدەین.

ئەڤرۆ

قەیس وەیس:

د داخویانیەكێ‌ دا راهێنەرێ‌ تیما كیك بۆكسینگا یانەیا دهۆك بۆ رۆژناما ئەڤرۆ دیار كر ژبەر چەند ئەگەران تیما خوە ژ قارەمانیا ئیراقێ‌ ڤەكێشا، ئەوا بڕیارە هەڤڕكیێن وێ‌ پێنچ شەمبیا بهێت باژێرێ‌ نەجەف مێڤانداریا وێ‌ بكەت.
زێدەتر سالح كەكوی گۆت: هەرچەندە هەر قارەمانیەكا هاتیە ئەنجامدان وەكو تیما یانەیا دهۆك پشكدار بوویە لێ‌ ژبەركو قارەمانیا ئەڤجارە چەند ئەگەرەك بووینە رێگر ئەم نەچاربووین پشكدار نەبین ژ وانا ئەو سیستەمێ‌ بۆ هەڤڕكیان هاتیە دانانا ئەو ژی(light contact, kick light, point fighting) هەموو یاریزانێن مە بەرهەڤی بوو نەكرینە و دیسان بۆ چەند راهێنەرێن یانەیێن دی ژی یێن پارێزگەهێ‌ بزحمەت بووینە، لێ‌ ئەگەرێن سەرەكی ئەو دەمێ‌ هاتیە دەستنیشانكرن بۆ قارەمانیێ‌ یێ‌ گۆنجایی نەبوو كو خوە بەرهەڤبكەن، بەرانبەری وێ‌ پرانیا یاریزانان دەلیڤا پشكداریێ‌ نابیت كو دەمەكی دایە تایبەت یانەیا دهۆك سەرباری ئەو سیستەمێ‌ قارەمانی دهێتە كرن ل دەڤ مە یێ‌ هەیی و چەند یاریزانێن مە دبەرهەڤن لێ‌ دەمێ‌ كورت ئەو دەلیڤە نەدایە مە ئەم باشترین شێوە بەرهەڤ بكەین.
ژلایەكێ‌ دووڤە ناڤهاتی گۆت: دووماهی قارەمانیا هەرێما كوردستانێ‌ یا پرۆڤێشنال سێ‌ یاریزانێن پارێزگەهێ‌ و ئیدارا سەربەخوەیا زاخۆ پشكدار بوون و دو ژوانا رێزێن ئێكێ‌ ب دەستڤە ئینان ئەوژی موستەفا فەرسەت و سەلیم خەلەف، ئەڤەژی نیشانێن پێشكەفتنا یاریا كیك بۆكسینگێ‌ نە.

ئەڤرۆ

رۆژنامەیا ماركا یا ئسپانی دیار كر یانەیا ریال مەدرید بەردەوامە ل سەر بزاڤێن خوە ژبۆ پشتەڤانیا هەڤڕكا خوە یا خولا ئسپانیا یانەیا بەرشەلۆنا بەرانبەر دۆسەیا بەرتیلكرنا دادڤانان ئەوا ئەندامەكێ‌ لژنا دادڤانێن ئسپانی یانەیا كاتەلۆنی گۆنەهباركری ب دانانا كۆژمەكێ‌ بۆ چەند دادڤانان د وەرزێ‌ 2017-2018ێ‌ دا.
هەمان رۆژنامێ‌ دیار كر یانەیا ریال مەدرید ب رژدی كار كریە كو ئەڤ دۆسەیە نەمینت و بەرژەوەندیا یانەیا بەرشەلۆنا ب دووماهی بهێت ئەو ژی ژبەر ئەڤان ئەگەران، یا ئێكێ‌ دا هەڤپەیمانا یا سەرەكی د پرۆژێ‌ قارەمانیا سۆپەر لیگ ژ دەست نەدەت، ژبەركو ئەڤ پرۆژە ژلایێ‌ چەند یانەكا هاتیە دروستكرن ب سەرپەرشتیا یانەیا ریال مەدرید، هەروەسان بەرشەلۆنا هەڤپەیمانا وێ‌ یە د بابەتێ‌ پەخشێ‌ ئێكسەر یێ‌ تلەفزیۆنی د قارەمانیا سۆپەرا دا، ئەڤ هەردو بابەتە بۆ هەردو یانەیان گرنگ لەوما ریال ناهێلیت بەرشەلۆنا تووشی چو سزایان بیت.

ئەڤرۆ

زاخۆ، عەلی حاجی:

د داخویانیەكێ‌ دا سەرپەرشتێ‌ تیما باسكێت بۆلا یانەیا زاخۆ دیار كر ئێك بۆ دو یاریێن بهێت دێ‌ پێنگاڤەكا مەزن تیما مە بەر ب قۆناغا چارگۆشەیا زێرین یا خولا نایابا ئیراقێ‌ بەت دهێتە هژمارتن بۆ جارا ئێكێ‌ یە بگەهنە ڤێ‌ قۆناغێ‌.
زێدەتر عەبدولستار عەلی بۆ رۆژناما ئەڤرۆ گۆت: ژبەركو تیما دیفاع ئەلجەوی ئێك ژ هەڤڕكێن مە بوو ژبۆ قۆناغا چارگۆشەیا زێرین ئەم شیاین سەركەفتنەكا گرنگ ل سەر بینن ئەوا ب زەحمەترین یاری بوو پێنەڤێت ب پشتەڤانیا جەماوەرێ‌ خوە ئەڤ سەركەفتنە زێدەتر نێزیكی ئارمانج خوە بووینە، لەوما د نوكە دا دەربازبوون د دەستێ‌ مە دایە و سێ‌ یاریێن ڤەبڕ و بهێز ماینە هەكە ئێك یا دو سەركەفتنان د وان یاریان دا بینن دێ‌ دەربازبوون مسۆگەربیت، لێ‌ هەكە بتنێ‌ ئێك سەركەفتن هات ئەم دێ‌ پێدڤی ب ئەنجامێن تیما خوە ل سەر ئاستێ‌ لاوان بن ئەوێن د خولا ئیراقێ‌ دا بۆ لاوان پشكدارن ژبەركو ئەنجامێن وان ژی دێ‌ كارتیكرنێ‌ لسەر خالێن مە كەت ل دووڤ سیستەمێ‌ خولا ئیراقێ‌.
ژلایەكێ‌ دووڤە ناڤهاتی گۆت: ئەو یاریێن بهێت تیمێن بهێزن و هەڤڕكن تایبەت بۆ ناسناڤێ‌ خولێ‌، لێ‌ ئەڤە نایبتە رێگر ئەم دەستدان ژ ئارمانجێن خوە بەرنەدەین و یاریێن دناڤ ئەرد و جەماوەرێ‌ مە دا ناهێلین تووشی خوسارەتیێ‌ بین و مە جەماوەرەكێ‌ دلسۆزێ‌ مەزن هەیە و پشتەڤانیا بەردەوام یا كارگێریا یانێ‌ ئەم شیانێن خوە زێدەتر مەزێخین بۆ باشترین ئەنجام.

ئەڤرۆ

ئێكەتیا تەپا پێی یا نێڤدەولەتی فیفا هزر د هەلوەشاندنا دەمێ‌ زێدەكری یێ‌ نیڤا دویێ‌ ژ یاریێن قارەمانی و خولان دا كریە ب مەرجەكی ئێك ژ یانەیان یا پێشكەفتی بیت ب هژمارەكا مەزن یا گۆلان.
رۆژناما دەیلی مێل یا بریتانی دیاركر ئەڤ هزرە هاتیە پشتی یاریا كلاسیكۆیا ئنگلتەرایێ‌ دناڤبەرا لیڤەرپۆل و مانچستەر یۆنایتد ئەوا ب حەفت گۆلێن پاقژ بۆ لێڤەر ب دووماهی هاتی بوو ئەگەر سەرۆكێ‌ لژنا دادڤانێن فیفایێ‌ یێ‌ ئیتالی بیێرلۆیجی كۆلینا پێشنیار كریە هەردەمێ‌ تیمەك یا سەركەفتی بیت ب زێدەتر پێنچ گۆلان پێدڤی ناكەت دەمێ‌ زێدەكری بهێتە بلندكرن بتنێ‌ هەكە یاری بوو دەمەكێ‌ درێژ بهێتە راوەستاندن ژبەر روودانەكێ‌.
ل وەرزێ‌ بۆری پێشنیارەكا دی ژلایێ‌ پسپۆرێن فیفایێ‌ هاتبوو بەلاڤكرن كو بۆ هەر دو نیڤێن یاریێ‌ ل جهێ‌ 90 خولەكان ببیتە 60 خولەك ب مەرجەكی هەردەمێ‌ تەپە ب هەر ئەگەرەكێ‌ بهێتە راوەستاندن دێ‌ خولەك ژی هێنە راوەستاندن هەتا یاریی بهێتە كرن وەكو سیستەمێ‌ یاریا باسكێت بۆلێ‌ بیت.

ئەڤرۆ

ژێدەرێن رۆژنامەڤانە ل ئسپانیا دۆپاتكرن چوونا بنزێمایی ژ یانەیا خوە ریال مەدرید ئێكلا بوویە و سێ‌ یاریزان وەكو پێكگۆرێ‌ وی هاتینە دەستنیشانكرن، ئەوێ‌ دهێتە پێشبینیكرن وەرزێ‌ ئەڤ سالە یێ‌ خولا پلا ئێكا ئسپانیا یا تەپا پێی یێ‌ دووماهیێ‌ بیت.
رۆژناما مۆندۆ دیپۆرتیڤۆ ئاشكەرا كر یانەیا ریال مەدرید سێ‌ یاریزان ژبۆ قەرەبوویا جهێ‌ كەریم بنزێمایی دەستنیشانكرینە ئەو ژی یێ‌ بەرازیلی ریتشالیسۆن هێرشبەرێ‌ تۆتنهام یا ئنگلتەرایێ‌، یێ‌ پۆرتۆگالی غۆنسالۆ رامۆس هێرشبەرێ‌ بەنفیكا و یێ‌ فرەنسی كێلیان مباپی ستێرێ‌ پاریس سانجێرمان، ئەڤ پێنگاڤە بوویە بەلگە یانەیا ئسپانی چو پێنگاڤ نە هاڤێتینە بۆ نووكرنا گرێبەستا بنزێمایێ‌ ئەوا دێ‌ ل خزیرانا ئەڤ سالە ب دووماهی هێت، هەروەسان دیاركر دبیت یێ‌ كرواتی لۆكا مۆدرێچ و یی ئەلمانی تۆنی كروز دهێتە پێشبینیكرن ڤەدەرمەندیا خوە رابگەهینن.