ئەڤرۆ
هەرهین محەمەد:
ل دووڤ ئامار و داتایێن رێڤەبەریا كەشناسیا پارێزگەها دهۆكێ، هێشتا كارتێكرنا هشكەسالیێ ل سەر پارێزگەها دهۆكێ یا مای، بەلێ ل هەردوو هەیڤێن بهارێ ژی دەلیڤا باران بارینێ یا مای و دهێتە پێشبینیكرن د وان هەیڤان دا رێژەكا باش یا باران بارینێ بباریت، بەلێ ڤان بارانان باشی و خرابێن خوە هەنە.
وار شەوكەت، ژ راگەهاندنا كەشەناسیا پارێزگەها دهۆكێ دبێژیت: هشكەسالی دهێتە گرێدان ب رێژا وێ بارانێ ڤە ئەوا دهێتە بارین ل هەر دەڤەرەكێ، هەر چەند ئەو باران یا كێم بیت مەترسیا هشكەسالیێ دێ پتر بیت، هەر ژ سەد ملیمان هەتا هزار ملیمان و دەڤەر ژ بۆ دەڤەرەكا دی جوداهی هەیە و گۆت: دەڤەرێن چیایی ئەڤێن دكەڤنە پارێزگەها دهۆكێ سالانە بارینا بەفرێ ب رێژەكا باش دباریت و هەكە ئەم سەنتەرێ قەزایان وەرگرین هەتا هزار ملیمێن بارانێ دبارن.
زێدەتر گۆت: ل سەنتەرێ پارێزگەها دهۆكێ ئەم 530 ملیمان وەردگرین، ئەڤ سالە 227 ملیمێن بارانێ بارینە و دیاردبیت كو هێشتا كارتێكرنا هشكەسالیێ ل سەر دەڤەرێ یا مایی، بەلێ دهێتە پێشبین كرن ل هەیڤا سی َو چار دەلیڤێن بارانێ یێن باش هەبن و د راستی دا بارانێن هەیڤا یازدە و دوازدە و ئێك گەلەك دباشن و هەیڤا دو دبیتە بەفر و بارانێن هەیڤا سێ زیانێ دگەهینن، چونكو سرۆشتێ بارانێن هەیڤا سێ و چار بلەز دبارن و كارتێكرنا خوە ل سەر بەروبۆمێ چاندنێ هەیە و كولیلكێن داروباری د وەریێن و دیسان دبنە ئەگەر لەهی پەیدابن.
هەروەسا گۆت: باران بارین كەرەمەكە ژ دەڤ خودێ و ب راستی ژی ئەو سازیێن ل وێ دەڤەرێ كاردكەن دڤێت بهایێ وێ بارانێ بزانن و سكران دروستكەین و ل دەڤەرێن مە رووبار ژی هەنە و هندی رووبار هەبن ئەم ب ئاڤا رووباران كاركەین و ئاڤا سكری بۆ وی دەمی بیت دەمێ هشكەسالی پەیدا دبیت.
واری زێدەتر گۆت: ئەم نەشێین بێژین فلان دەڤەر هشكەسالی یا ل سەر مای هەتا دو سێ سال ب سەر ڤە نەچن، بۆ نموونە هەكە بارانێن پار و پێرار گەلەك دباش بن ل سەنتەرێ پارێزگەها دهۆكێ ئەڤ سالە باران دكێم بن نابێژین هشكەسالیە و دبێژینێ كێم بارانی و هینگی دێ بیتە هشكەسالی.
ناڤبری گۆت ژی: مە ئەگەرێن دەستكرد ژی هەنە ژ بۆ نەهاتنا بارانان، نوكە دیاردەكا جیهانی یا كەش و هەوای هاتیە روودان، ئەو ژی گوهورینا كەش و هەوایە و ئەڤ گوهورینە ژی گەلەك ناوچەیێن رۆژهەلاتا ناڤەراست ب خوە ڤە گرتینە، بۆ نموونە ل گەلەك جهان دبینین ل دەڤەرێن بیابانی ل ناڤچا ئەفریقا و رۆژئاڤایێ ئاسیا ئەو بیابانن بەفرۆ باران لێ دباریت و كەسكاتی سەرێ خوە هلدایە دیمەنەكێ باوەریێ چێبوویە و جهێ مە ژی یێ جوگرافی و ئەم دوور نینین ژ ڤێ گوهورینێ و كارتێكرنا خوە ل سەر دەڤەرا مە هەبوویە. هەتا ژ ڤێ گوهورینێ مە هەست پێكری ئەنجامەكێ نەرێنی یە بۆ مە و نە د بەرژەوەندیا مە دایە ئەڤ جۆرێ گوهورینێ و ئەگەر ژی جوگرافیە، هەروەسا یێن دەستكرد ژی ئەڤ پلا گەماتیێ یا كارگەهان و بیرێن نەفتێ هەموو دبنە ئەگەر پلا گەرماتیێ بلند بیت و ئەڤ چەندە ژی ل بەر چاڤ ناهێتە وەرگرتن ژ وان میكانزمێن كەش و هەوا پێڤە دهێتە گرێدان.
نيشاندان