ئەڤرۆ

دهۆك، لەزگین جوقی:

رێڤەبەرێ‌ كۆچ و كۆچبەران و بەرسڤدانا قەیرانان ل پارێزگەها دهۆكێ‌ دیار كر، چو بڕیار بۆ دائێخستنا كەمپێن ئاوارەیێن شنگالێ‌ نەهاتینە دان و بتنێ‌ رێكخراوان هەڤكاریێن خوە كێمكرینە و بەردەوام حكومەتا هەرێما كوردستانێ‌ هاریكاریان پێشكێشی ئاوارەیێن شنگالێ‌ دكەت.
پیر دەیان جەعفەر، رێڤەبەرێ‌ كۆچ و كۆچبەران و بەرسڤدانا قەیرانان ل پارێزگەها دهۆكێ‌ بۆ ئەڤرۆ خویا كر، چو راستی بۆ دائێخستنا كەمپێن ئاواران نینە و هەتا نوكە چو بڕیار نەهاتینە دان كەمپێن ئاوارەیێن شنگالێ‌ بهێنە دائێخستن و گۆت: «هەتا نوكە رەوشا شنگالێ‌ یا باش نینە، كو ئاوارە بشێن ڤەگەرنە شنگالێ‌، هەروەسا حكومەتا هەرێما كوردستانێ‌ چو كەمپان دانائێخیت، ب چو شێوەیەكی ئاوارە ب زۆری ناهێنە ڤەگەراندن، بەلكو ئاوارە د ئازادن یێ‌ حەز بكەت ڤەگەریت رێ‌ پێ‌ دهێـتە دان، لێ‌ ئاوارە ناخوازن ڤەگەڕن».
گۆتژی: «هەتا نوكە نێزیكی 300 هزار ئاوارەیان ل دهۆكێ‌ ماینە و ژ بەر خرابیا رەوشا دەڤەرێن خوە نەشیاینە ڤەگەرن، نوكە رەوشا ئاوارەیان یا باش نینە، ژ بەركو رێكخراو وەكو سالێن بۆری هەڤكاریا وان ناكەن و هاریكاریێن خوە كێمكرینە».

ئەڤرۆ

دهۆك، لەزگین جوقی:

پەیڤدارێ‌ رێڤەبەریا گشتی یا رەوشەنبیری و هونەرێ‌ ل پارێزگەها دهۆكێ‌ دیار كر، ل ژێر درووشمێ‌ ئادارنا مە رێڤەبەریا گشتی یا رەوشەنبیری و هونەری ل دهۆكێ‌ ب پشتەڤانیا د. عەلی تەتەر، پارێزگارێ‌ دهۆكێ‌، ئەڤ سالە هەموو بیرەوەریێن هەیڤا ئادارێ‌ و نەورۆزێ‌ ل پارێزگەها دهۆكێ‌ دێ‌ هێنە ساخكرن و دبێژیت: هەر دوهی 6/3/2023ێ‌ دەست ب ئەنجامدانا چالاكیان هاتە كرن.
حەسەن فەتاح، پەیڤدارێ‌ رێڤەبەریا گشتی یا رەوشەنبیری و هونەری ل پارێزگەها دهۆكێ‌ بۆ رۆژناما ئەڤرۆ خویا كر، دوهی و ب هەلكەفتا بیرەوەریێن ئادار و نەورۆزی، دیدارا ئێكی یا ئەدەبێ‌ ژنان ل دهۆكێ‌ دەستپێكر و گۆت: «بەرنامەك هاتیە دانان، كو چەندین چالاكی بهێنە ئەنجامدان و هەموو بیرەوەریێن ئادارێ‌ و نەورۆزێ‌ بهێنە ساخكرن، ل دهۆكێ‌ و ئاكرێ‌ و ئامیدیێ‌ و شێخان و سێمیل و بەردەڕەش چالاكی دێ‌ هێنە ئەنجامدان، ئەڤ چالاكیە پێكهاتینە ژ ڤەكرنا پێشانگەهەكا فوتوگرافی بناڤێ‌ دهۆك د چاڤكێن كامیرێ‌ دا و رۆژا سەرهلدانا باژێری دهۆكێ‌ و بوونا بارزانیێ‌ نەمر و سەرهلدانا باژێرێ‌ سێمێلێ‌ دێ‌ هێنە ساخكرن و هەوەكا دارچاندنێ‌ ژی ل سێمێلێ‌ دێ‌ هێتە ئەنجامدان».
گۆتژی: «ل رۆژا 14/3/2023ێ‌ رۆژا سەرهلدانا دهۆكێ‌ و بوونا بارزانیێ‌ نەمر ب گێڕانا بزاڤەكا هونەری و ئەدەبی ئەو رۆژە دێ‌ هێتە ساخكرن، دیسا ل رۆژا 20/3/2023 ئاهەنگا نەورۆزێ‌ ل دهۆكێ‌ دێ‌ هێتە كرن، ل رۆژا 27 هەیڤێ‌ رۆژا جیهانیا شانۆیێ‌ ب پێشكێشكرنا شانۆگەریەكێ‌ دێ‌ هێتە ساخكرن».

ئەڤرۆ

هەولێر، قائید میرۆ:

پەیڤدارێ وەزارەتا ئەوقاف و كاروبارێن ئاینی ل حوكمەتا هەرێما كوردستانێ‌ ئاشكرا كر، بڕیارە پێداچوون د بهایێ ملكێن ئەوقافێ دا بهێتە كرن و هەموو مۆلكێن ئەوقافێ‌ ژی بهێنە ئەلكترۆنی كرن و رێكخستن.
نەبەز ئیسماعیل، پەیڤدارێ وەزارەتا ئەوقاف و كاروبارێن ئاینی بۆ رۆژناما ئەڤرۆ دیار كر، جڤاتا ئەوقافێ‌ بڕیار دایە پێداچوون د ملكێن ئەوقافێ دا بهێتە كرن و پرۆسا رێكخستن و پێداچوونێ د ملكێن ئەوقافێ‌ دا هاتیە دەستپێكرن و گۆت: «بڕیارە دوبارە پێداچوون د بهایێ ملكێن ئەوقافێ‌ دا بهێتە كرن و د دووڤ دا كرێ دێ هێتە دیاركرن ب شێوەیەكی د بەڕژەوەندیا ئەوقافێ‌ و كرێداران دا بیت، ئەو ملكێن كریا وان ئەرزانتر ژ بازاڕی ل گورەی رێنمایێن وەزارەتێ بها ل سەر دێ هێتە دانان».
نەبەز ئیسماعیل گۆتژی: «ل گەل پێداچوونێ د مۆلكێن ئەوقافێ‌ دا پرۆسا ب ئەلكترۆنیكرنێ ژی هاتیە دەستپێكرن و هەموو ملكێن سەر ب ئەوقافێ‌ ڤە ل گورەی سیستەمێ ئەلكترۆنی دێ هێنە تۆماركرن، پێنگاڤێن باش بۆ پرۆسا ئەلكترۆنیكرنێ هاتینە هاڤێتن و گەهشتینە قووناغێن گرنگ، كو ئیدی ب سیستەمێ ئەلكترۆنی سەرەدەری ل گەل ملكێن ئەوقافێ‌ دێ هێتە كرن، ئەڤە پێنگاڤەكا گرنگە بۆ رێكخستنا ئەو ملكێن ئەوقافێ‌ ل هەرێما كوردستانێ هەین».

ئەڤرۆ

ب مەرەما پتر گرنگی دان ب كەرتێ پەروەردێ و ئاڤاكرنا قوتابخانەیان ژ لایێ كابینەیا نەهێ‌ یا حوكمەتا هەرێما كوردستانێ ڤە، نوكە دو قوتابخانە ل سنوورێ پەروەردا ئامێدیێ دهێنە ئاڤاكرن.
وەجیهـ سەعید، رێڤەبەرێ پەروەردا ئامێدیێ بۆ رۆژناما ئەڤرۆ دیار كر، د بەردەوامیا كار و پڕۆژەیێن خزمەتگوزاری دا، ئەوێن ل دەڤەرێ دهێنە بجهئینان، ب تایبەت د بیاڤێ‌ كەرتێ پەروەردێ و پێشختنا ئاستێ زانستی و گرنگی دان ب قوتابخانان دا، رازیبوون ل سەر ئاڤاكرنا دو قوتابخانەیان هاتیە كرن و نوكە ل ژێر بجهـئینانێ نە و گۆت: «قوتابخانەكا 18 رێزی ل كۆمەلگەها سیریێ یا گرێدایی ناوچەداریا شێلازێ دهێتە ئاڤاكرن و گوژمێ ملیارەك و 800 ملیۆن دینار بۆ هاتینە تەرخانكرن، دیسا ل تاخێ ئامێدییا نوو ل سەنتەرێ دەڤەرداریێ قوتابخانەكا دی یا 12 رێزی ب گوژمێ ملیارەك و 178 ملیۆن دیناران دهێتە ئاڤاكرن و نوكە دورێن 40% هاتیە بجهئینان و بۆ سالا نوو یا خواندنێ دێ‌ كەڤیتە د خزمەتا قوتابیان دا».
رێڤەبەرێ پەروەردا ئامێدیێ ئاشكرا ژی كر، ئەڤ هەر دو قوتابخانە ل دووڤ سیستەمێ نوو یێ پێشكەفتی دهێنە ئاڤاكرن و هەموو پێدڤیاتێن خواندنێ وەك تاقیگەهـ، گورەپانێن یاریێن وەرزشی و چەندین پكشێن دی د ناڤ دا هەنە.