ئەڤرۆ

ئەمیر ئەترووشی

ئابوورناسەكی دیار كر، پرۆژەیێن وەبەرهێنانێ‌ هیڤیێن گەنجان بۆ بدەستڤەئینانا كاری و كاركرنێ‌ یێن ژناڤبرین، چونكو چەند وەبەرهێنەرەك دەست ب پرۆژەیەكی دكەت، ل شوونا كرێكارێن دهۆكێ‌ یێن بیانی ل گەل خوە دئینیت و دەمێ‌ پرۆژە دەستبكار ژی دبیت، كارمەندێن وی بیانی نە و گۆت: وەبەرهێنەرێن بیان برگا 10% لێبوورین ژ باجێ‌ مفادار دبیت، وێ‌ بڕگا خویك و گومركێ‌ نادەت و هەموو كەل و پەلان ژ دەرڤە دئینیت مفای ژێ‌ دكەت، لێ‌ بڕگا مفا وەرگرتن و دانا دەلیڤێن كاری بۆ گەنجێن خوجهێن دەڤەرێ‌ ل پشتگوهـ دهاڤێژن.

د. كاوە عەبدولعەزیز، مامۆستایێ‌ زانكۆیێ‌ بۆ ئەڤرۆ دیار كر، ل گۆرەی یاسایا ژمارە 4 یا سالا 2006 یا پشتەڤانی و راكێشانا وەبەرهێنەران بۆ هەرێما كوردستانێ‌، هەموو ئاسانكاری بۆ وەبەرهێنەران كرینە كو بهێن ل هەرێما كوردستانێ‌ وەبەرهێنانێ‌ بكەن و پێنگاڤەكا باش بوو ژ بۆ وێ‌ قوناغێ‌، ب تنێ‌ ئێك خال پشتەڤانیا گەنجێن هەرێما كوردستانێ‌ تێدایە و كڤانەك دناڤ دا دانایە، بۆ هندێ‌ مفای ل گەنجێن هەرێمێ‌ بكەت و دەلیڤێن كاری بۆ گەنجێن خوجهێ‌ پارێزگەها دهۆكێ‌ بكەن.
زێدەتر دبێژیت: جهێ‌ داخێ‌ یە ژ خەمساریا حۆكمەتێ‌ و خەمساریا دەستەیا وەبەرهێنانێ‌، كۆمپانیێن بیانی دەمێ‌ دهێن پرۆژەیێن خوە یێن وەبەرهێنانێ‌ بجهدئینن، وێ‌ برگا 10% لێبوورین ژ باجێ‌ مفادار دبیت، وێ‌ بڕگا خویك و گومركێ‌ نادەت و هەموو كەل و پەلان ژ دەرڤە دئینیت مفای ژێ‌ دكەت، لێ‌ بڕگا مفا وەرگرتن و دانا دەلیڤێن كاری بۆ گەنجێن خوجهێن دەڤەرێ‌ ل پشتگوهـ دهاڤێژن.
مامۆستایێ‌ زانكۆیێ‌ ئەو یەك ژی نە ڤەشارت، سالانە وەزارەتا كار و كاروبارێن كۆمەلایەتی ل هەرێما كوردستانێ‌ رێژەیێن بێكاریێ‌ رادگەهینن كو رەنگە نێزیكی 24% بێكاری ل هەرێما كوردستانێ‌ هەیە، ئەرێ‌ باشە چاوا هوون دبێژن ب ڤێ‌ رێژەیێ‌ بێكاری یا هەی و هوون ب خوە دەلیڤێ‌ ددەنە كرێكارێن بیانی بهێن ل هەرێما كوردستانێ‌ كاربكەن.
خویا ژی كر، نوكە ل بازارێن دهۆكێ‌ كرێكارێن ب دەهان وەلاتان كاردكەن، لێ‌ د راستی دا گەنجێن بیانی دچن ل وان وەلاتان كاردكەن كو بێكاری ل وی وەلاتی نەبیت، یان ژی گەنج نەبن ل وی وەلاتی كاربكەن و هەمی خودان كاربن و ژ نەچاری گەنجان ژ دەرڤە دئینن ل وەلاتێ‌ وان كاربكەن و گۆت ژی: وەلاتەكێ‌ وەكو ئیماراتێ‌ بلا خەلكێ‌ بیانی بچن لێ‌ كار بكەن، چونكو بێكاری نینە و پێدڤی ب كرێكارانە.
ئابوورناس د. كاوە عەبدولعەزیز دیار كر، جهێ‌ داخێ‌ یە ئەو قەیرانێن د چەند سالێن بۆری دا ب سەر هەرێما كوردستانێ‌ دا هاتین، بوویە ئەگەر ب سەدەها گەنجێن هەرێما كوردستانێ‌ ژ بەر نەبوونا كاری چووینە دەرڤەی وەلاتی و ئەو ل دەرڤە وی كاری دكەن كو ل ڤێرێ‌ شەرم دكرن بكەن، وەكو ل بەر خوارنگەهان یان ژی ئامان شووشتنێ‌ و گەلەك كارێن دی.
ئاشكرا ژی كر كو دڤێ حۆكمەتێ‌ پلانەك بۆ دیتنا دەلیڤێن كاری ل هەرێما كوردستانێ‌ هەبیت و خوە هەتا پلان بۆ هندێ‌ هەبیت دەمێ‌ پشكەكێ‌ یان كولیژەكێ‌ ل زانكۆیەكێ‌ ڤەدكەن، بزانن كا دەرچوویێن وێ‌ پشكێ‌ دێ‌ چو مفا گەهیننە دەڤەرێ‌، بۆ نموونە وەلاتەكێ‌ وەكو ئوسترالیا پلانێ‌ بۆ هندێ‌ ددانیت كو بۆ ماوێ‌ پێنچ سالێن دی وەلاتێ‌ وان پێدڤی ب كیش جۆرێ‌ دەرچوویێ‌ زانكۆیێ‌ هەیە و ل كیڤە كێماسی هەیە، پشتبەستنێ‌ ل سەر وێ‌ كۆلیژێ‌ دكەن.

ئەڤرۆ

ئەڤرۆ، مەحمود نهێلی

مەزنترین پرۆژێ‌ دیتنا دەلیڤێن كاری ل سەر ئاستێ‌ كورستانێ‌ و عیراقێ‌ ب هەڤكاری ل گەل چەند رێكخراوێن بیانی ژلایێ‌ رێڤەبەریا راهێنانێن پیشەی ل پارێزگەها دهوكێ‌ دێ‌ هێتە ڤەكرن كو تێدا چەندین گەنج دێ‌ بنە خودان كار و پرۆژە.

نیبار شینو، رێڤەبەرێ‌ راهێنانێن پیشەیی ل پارێزگەها دهوكێ‌ بۆ رۆژناما ئەڤرۆ دیاركر، رێڤەبەریا وان ب هەڤكاری ل گەل رێكخراوا كار یا نیڤ دەولەتی و رێكخراوا(IOM) دێ‌ رابن ب ڤەكرنا 23 خۆلێن جۆدا ل سەر هەشت تایبەتمەندیان ل سەرانسەرێ‌ پارێزگەها دهوكێ‌ و گۆت: ئەڤ خۆلە پێك دهێن ژ راهێنانێن بیناسازی، میكانیكا ترۆمبێلا و ئامیری پشكنینا ترۆمبێلا، فوتوگرافی و مونتاژ، رستنا مەحفیرا، چاندنا كڤاركان و هشككرنا فێقی و چێكرنا مورەبایێ‌ و خزمەتكرنا بكرا.
ناڤهاتی دیار ژی كر، كو ئەڤ خۆلە هند ژ وانا دێ‌ ل سەنتەرێ‌ پارێزگەهێ‌ بن و یێن دن ژی دێ‌ ل دەڤەرداریا ئامێدیێ‌ و ناوچەداریێن سەر ب وێ‌ دەڤەرێ‌ ڤە بن و هەر خۆلەك ژ ڤانا دێ‌ بۆ هەیاما 45 رۆژان بەردەوام بیت.
رێڤەبەرێ‌ راهێنانێن پیشەیی گۆت ژی: خۆلا خزمەتكرنا بكرا دێ‌ هەشت رۆژ بن و ب هەڤكاری ل گەل رێڤەبەریا گشتی یا چاندنێ‌ ل پارێزگەها دهوكێ‌ و رێڤەبەریا چاندنا ئامێدیێ‌ دێ‌ بازارەكێ‌ فرۆتنا فێقی ل نێزیك سەرسنكی هێتە چێكرن ل گەل چێكرنا دورێن 10 كەپران كو ئەرد ژلایێ‌ چاندنێ‌ ڤە هاتیە دەستنیشانكرن و ئەڤ قوتابیێن پشكدار دێ‌ هندەك هێنە هەلبژارتن و ئەڤ جهە دێ‌ بۆ مینن بۆ كاری.
و دیار ژی كر، كو دێ‌ پتر ژ 345 كەس پشكدار بن دڤان خۆلان دا و و 40% دێ‌ خەلكێ‌ نیشتەجێ‌ یێ‌ پارێزگەها دهوكێ‌ بن و 30% ئاوارەنە و 30% پەنابەر و دێ‌ باوەرنامە پێ‌ هێنە دان.
و دیار ژی كر، ئەڤ كەسێن پشكدار دبن دڤێت ژیێ‌ وان دناڤبەرا 18 سالیێ‌ بو 30 سالیێ‌ دا بیت و نابیت فەرمانبەر و قوتابی بیت و كەسانێن بێ‌ كار دێ‌ پشكدار بن و خەلكێ‌ سەرانسەرێ‌ پارێزگەها دهوكێ‌ هەكە مەرج لێ‌ بگرن دشێن پشكداریێ‌ د وان خۆلان دا بكەن یێن ل سەنتەرێ‌ پارێزگەهێ‌.
و گۆت: پشتی ب دووماهی هاتنا خۆلان دێ‌ 100 پشكدار هێنە ژێگرتن و دێ‌ خۆلەكا دی یا (syb) بۆ هێتە ڤەكرن كو پتر یا گرێدایە ب ڤەكرنا پرۆژان و دێ‌ چاوا سەركەفتنێ‌ تێدا ئینیت.