مەسعوود بارزانی

پشكا دوازدێ‌

داستانا خواكوڕكی

143

پێشمەرگەیێن قەهرەمان ركمانیا ڤێ‌ سیاسەتا رژێمێ‌ كر كو ژ ناڤبرنا مللەتێ‌ مە و بزاڤا رزگاریخوازا وی كریە ئارمانج، پێشمەرگەیێن مەیێن خۆراگر كوردستان كریە دوزەخا دوژمنان و ل پاشەرۆژەكا نێزیك رژێم دێ‌ روو ب روو كۆمەكا ئاستەنگێن ناڤخوە بیت و مللەتێ‌ ئیراقێ‌ دێ‌ بنە سۆتەمەنیا شەری و سیاسەتێن خراب یێن رژێما بەعس.
لەشكرێ‌ ژرێمێ‌…
ئەم دژایەتیا هەوە ناكەین و ب تنێ‌ بەرگریێ‌ ژ هەبوونا خوە و مللەتێ‌ خوە و پاراستنا وی دكەین ل سەر ئاخا وی هەمبەری كۆمكوژی و ژناڤچوونێ‌ كو هوون ب چاڤێن خوە دبینن رژێمێ‌ هوون تووشی شەرەكی كرینە ل كوردستانێ‌. ئەڤە دەلیڤەكا باشە بۆ گوهارتنا هزركرنێ‌ د روودانێن چەندین سالێن بووری دا، ژ بەر كو یێ‌ برایێن هەوە دكوژن، ئیراقی یێ‌ ب دەستی ئیراقی دهێتە كوشتن، رژێمێ‌ رەوشەكا تایبەت ب سەر هەوەدا سەپاندیە كو بەردەوامبوونا كوشتن و تیرۆر و ترساندنا هەموو مللەتێن ئیراقێ‌ یە، ب عەرەب و كورد و پێكهاتێن جودا ڤە و كۆمكوژیا هزاران كەسان یێن ژ شەڕی رەڤین و یێن ئۆپۆزسیۆن و بوویە بەلا سەرێ‌ مللەتێن ئیراقێ‌.
گەلی سەرباز و ئەفسەران! داخوازێ‌ ژ هەوە دكەین پەیوەندیێ‌ ب رێزێن شۆڕەشا ئیراقێ‌ بكەن پێخەمەت ژ ناڤبرنا رژێمێ‌ و ئازادیێ‌ و دیمۆكراتیێ‌ و ئاشتیێ‌ بۆ ئیراقێ‌ و ئۆتۆنۆمی بۆ كوردستانێ‌ و ڤەگەڕاندنا سەقایێ‌ برایەتیێ‌ و ڤیانێ‌ بۆ وەلاتێ‌ مە، ل شوونا وان شەری و كوشتنێ‌ و ترساندنێ‌ و كارەساتان یێن بووینە ئەگەرێ‌ شەڕێ‌ ناڤخوە یێ‌ بەردەوام.
كورێن ئیراقێ‌! ئازادیخواز و دیمۆكراتخوازێن ل وەلاتێن عەرەبی…
سیاسەتا خوینرێژتنێ‌ و دژی مرۆڤایەتیێ‌ یا رژێمێ‌ دێ‌ بیتە ئەگەرێ‌ زیانگەهاندنێ‌ ب برایەتیا دیرۆكی یا كورد و عەرەبان، ڤێ‌ قۆناغێ‌ پێدڤی ب ئێكخستن و ئەركێ‌ رزگاریخوازیێ‌ و نشتیمانی یێ‌ مەزن هەیە ب مەرەما روو ب رووبوونا د گەل ئیمپریالیزم، رەگەزپەرستی و كەڤنەپەرستییێ‌.
گەلێ‌ كورێن قەهرەمانێن كوردستانێ‌، د بیرەوەریا 27 سالیا شۆڕەشا نشتیمانی دا، سالا 1961ێ‌ ب سەركردایەتیا سەرۆكێ‌ بزاڤا رزگاریخوازا مللەتێ‌ مە، بارزانیێ‌ نەمر، د داستانا خواكوڕكی دا داكۆكیێ‌ ل گیانێ‌ خۆراگریێ‌ و بەرخۆدانێ‌ د ناڤ مللەتێ‌ خوە دا دكەین و بەرهەڤی قوربانیێن زێدەترین هەتا گەهشتن ب سەركەفتنێ‌.
دێ‌ ل سەر خۆراگریێ‌ و خەباتێ‌ ب شێوەكێ‌ نوو د ڤێ‌ رەوشا نوو دا بەردەوام بین، هێشتا ئەرك و ئارمانجێن مەزن ل پێشیا مەنە ب مەرەما بدەستڤەئینانا وان. شەڕێ‌ مە شەڕەكێ‌ دادپەروەرانە و ڕەوایە، پێدڤی ب خۆراگری و بەردەوامی و بێهنا فرەهـ هەیە، بەردەوامییا خۆراگرییێ‌ دێ‌ بیتە ئەگەرێ‌ باوەرییا گەلێ‌ مە ب كێشا وی یا رەوا و دادپەروەرانە و دێ‌ بیتە ئەگەرێ‌ زێدەتر گرنگیدانا جیهانێ‌ ژ روویێ‌ سیاسی و میدیای و راگەهاندنێ‌ ڤە، دێ‌ مفا ژ هەموویان وەرگرین پێخەمەت كێشەیا خوە، هەروەكو د بەیانناما كۆمبوونا بووری یا كۆمیتەیا ناڤەندی یا پارتیا دا ل رۆژ 20 تیرمەهێ‌ هاتی، توندوتیژی نە ب تنێ‌ كێشا كوردی چارە ناكەت، بەلكو دێ‌ ئالۆزتر لێكەت. بۆ جارا ئێكێ‌ یە سەقایەكێ‌ ئارام و سەقامگیر د ناڤبەرا ئۆپۆزسیۆنا ئیراقێ‌ دا دروست بوویە ب مەرەما ئێكخستنا شیانان و بەرفرەهكرنا چالاكیان ل ژدی رژێما دكتاتۆر و شەرێ‌ زالمێ‌ وان ل كوردستانێ‌ و ئەم پێشوازیێ‌ ل ڤێ‌ ئاراستا نشتیمانی یا راست و دروست دكەین ب مەرەما بەرفەرهكرنا بەرەیێ‌ كوردستانا ئیراقێ‌ د هەموو واران دا.
نەمری و سەربلندی بۆ شەهیدێن داستانا خواكوڕكی و هیڤیا سلامەتیێ‌ بۆ برینداران دخوازین.
نەمری سەربلندی بۆ شەهیدێن هێرشێن رژێمێ‌ بۆ سەر دەڤەرا بەهدینان.
سلاڤ ل گەلێ‌ مە، ل دەهان هزار پەنابەران كو د حەفتیێن بووری دا پەنا بریە توركیا و ئیرانێ‌.
مرن و سەرشۆری بۆ هێرشێن رژێما شۆڤینی یا رەگەزپەرست.
بژیت پارتییا مە ب سەرۆكاتیا هەڤال مەسعوود بارزانی.
سلاڤ ل بەرەیێ‌ كوردستانا ئیراقێ‌ بن.
بێگۆمان سەركەفتن بۆ خەباتا گەلێن ئیراقێ‌ یە پێخەمەت دیمۆكراتی و ئازادی و ئاشتییێ‌ بۆ ئیراقا ئازاد كو تێدا ئۆتۆنۆمیا راستەقینە بۆ كوردستانێ‌ و مافێن رەوشەنبیری و ئیداری بۆ پێكهاتەیێن نەتەوەیی و ئۆلی بەردەست بكەت
5ی ئیلۆنا 1988ێ‌
مەكتەبا سیاسی
پارتییا دیمۆكراتا كوردستانێ‌ ــ ئیراق (3)
د سەروبەندێن شەڕێ‌ خواكوڕکی دا، چەند چەكدارەكێن پەكەكێ‌ ل دەڤەرێ‌ بوون، لێ‌ پشتی دەمەكێ‌ كورت دیار نەمان، نەهاتە زانین چو لێ‌ هاتن و بەر ب كیڤە چوون و بۆچی و چاوا چوون و خوە ل كیرێ‌ ڤەشارت ..!
شەرێ‌ خواكوڕكی، د میدیایا جیهانی دا دەنگڤەدانەكا بەرچاڤ هەبوو، رادیۆیا لەندەن ژ زارێ‌ مەسعوود بارزانی بەلاڤكر كو: شەر هەتا نها ل پارێزگەها هەولێرێ‌ـ ل باكورێ‌ ئیراقێ‌، د ناڤبەرا جەنگاوەرێن پارتیا دیمۆكراتا كوردستانێ‌ و لەشكرێ‌ ئیراقێ‌ دا هەر بەردەوامە
ئاژانسا (ئەسۆشێیتدپرێس) ژی راگەهاند: هێزێن ئیراقێ‌ پشتی شەڕێ‌ وان د گەل ئیرانێ‌ نەمای، لڤینێن لەشكری ب ئالیێ‌ دەڤەرێن كوردی بادایە و چەكێ‌ كێمیایی و گازا ژەهراوی د شەڕان دا بكارئینایە.
رۆژنامەیا (ریسالەت) یا چاپا تەهرانێ‌ ژی ل رۆژا 10ی تەباخا 1988ێ‌، د بابەتەكی دا ل دۆر شەرێ‌ خواكوركی بەلاڤكر: كورد ل باكورێ‌ ئیراقێ‌ خەباتێ‌ دكەن بۆ رزگاركرنا ئاوارە و بریندارێن خوە ژ پێلا درندانە یا هێرشێن رژێمێ‌. پارتییا دیمۆكراتا كوردستانێ‌، ل باكوری وەلاتی بەرهنگاری دەستدرێژیێن رژێمێ‌ دبیت.
رادیۆیا (دەنگێ‌ ئەمریكا) ژی ل رۆژا 10ی تەباخا 1988ێ‌، ب ڤی شێوەی بەحسی شەڕێ‌ خواكوركی دكەت، مەسعوود بارزانی دبێژیت: ل باكورێ‌ رۆژهەلاتێ‌ ئیراقێ‌ د ناڤبەرا هێزێن مە و هێزێن رژێمێ‌ دا شەر روودایە». لێكۆلەرێن كاروبارێن كەنداڤی دبێژن، رەنگە كورد بشێن درێژیێ‌ ب خەباتا خوە بدەن، هەرچەند شەرێ‌ ئیراقێ‌ و ئیرانێ‌ ژی راوەستیایە.
داستانا خواكوركی، پێگەهێ‌ پەراوێزخستی و ژبیركرییێ‌ كوردان ب گشتی و پارتیا دیمۆكراتا كوردستانێ‌ ب تایبەت، پشتی هەشت سالێن شەڕی و جینۆساید و كێمیاباران و ئەنفالان، جارەكا دی ئینا مەیدانێ‌. ئەڤ سەرهلدانەڤە د دەمەكی دا بوو كو پشتی شەرێ‌ خویناوی و وێرانكار یێ‌ هەشت سالان رەنگ بوو پرسا نەتەوەیی یا كوردی ب ئێكجاری بهێتە پەراوێزخستن و پشتی خواكوركی كو ئارمانجا پاككرنا و رامالینێ‌ هاتبوو پەیرەوكرن، ئەو پرس د ناڤبەرا كڤانێ‌ ئیرانێ‌ و ئیراقێ‌ دا نەك هەر فەتسی بمینیت، بەلكو پێدڤی بوو بپەقیت.
ل رۆژا 14ی تەباخا 1988ێ‌، ژ خواكوركی و ژ كوژیێ چەپێ‌ و سێگۆشەیەكا ژبیركری و دوور من دخواست ڤێ‌ بگەهینمە گوهێ‌ جیهانێ‌ و ئیراقێ‌ و ئیرانێ‌ كو دو ئالیێن شەرێ‌ هەشت سالی بوون ل دژی ئێك و دو: ئەم كورد د بەرخۆدان و سەركەفتنێ‌ داین، ئانكو ئەم زیندی نە، ئەم یێن هەین و ل ڤێرێ‌ ینە، ل سەر جهێ‌ باب و باپیرێن خوەینە (4).
(1) پشتی ب برینداری كەفتیە دەستێ‌ پێشمەرگەی، بۆ چارەكرنێ‌ ژ ئالییێ‌ پێشمەرگەی ڤە هاتە ڤەگوهاستن بۆ پاشییا بەرۆكیێن شەری. ژ پێشمەرگەیەكی پرسیار كر، دێ‌ چو ل من كەن، وی ژی گۆت بوو دێ‌ چینە نك پزیشكان دا برینا تە دەرمان بكەین. وی ژی گۆتی: نەخێر من بكوژن و هەر كەسێ‌ هەوە گرت بكوژن، ژبەركو هوون ل ڤان چیایان و ب ڤێ‌ ژیانا سەخت رازی نە، هێشتا دێ‌ چارەسەرییا مە ژی كەن، من بكوژن، ژ دەمژمێر پێنجی ئێڤاری هەتا یازدەی شەڤێ‌ ساخ بوو، پاشی ژ بەر گرانییا برینا وی گیانێ‌ خوە ژ دەست دا.
(2) ئەبووفارووق (عومەر عەلی شێخ)، ئەندامێ‌ مەكتەبا سیاسی یا حشع بوو.
(3) بەرێخوە بدەنە بەلگەنامەیێن هەژمار (6).
(4) بەرێخوە بدەنە بەلگەنامەیێن هەژمار (7 و 8).