دهۆك، له‌زگین جوقی:

رێڤه‌به‌رێ‌ گه‌شتوگوزارێ‌ ل ئێداره‌یا سه‌ربخوه‌ یا زاخۆ دیار كر، پڕۆژه‌یێ‌ چێكرنا شه‌مه‌نده‌فڕا هه‌لاویستی ل سه‌ر رووبارێ‌ خابیری ل زاخۆ بۆ پتر سه‌رنجراكێشانا گه‌شتیارانه‌ و دبێژیت: ئه‌ڤ پڕۆژه‌ ژ لایێ‌ كۆمپانیه‌كا بیانی ڤه‌ دێ‌ هێته‌ بجهئینان.

چیا ئه‌مین، رێڤه‌به‌رێ‌ گه‌شتوگوزارێ‌ ل ئیداره‌یا سه‌ربخوه‌ یا زاخۆ بۆ ئه‌ڤرۆ گۆت: “پڕۆژه‌یێ‌ شه‌مه‌نده‌فڕا هه‌لاویستی هاتبوو پیشنیازكرن ل پارێزگه‌هه‌كا هه‌رێما كوردستانێ‌ بهێته‌ چێكرن، لێ‌ ژ به‌ر رووبارێ‌ خابیری، بڕیار هاته‌ دان ل زاخۆ بهێته‌ بجهئینان، بجهئینانا ڤی پڕۆژه‌ی ژی دێ‌ بیته‌ ئه‌گه‌ر قه‌ره‌بالغا هاتنوچوونێ‌ ل سه‌ر جاده‌یێن زاخۆ كێم ببیت و پترگه‌شتیار قه‌ستا ئیداره‌یا سه‌ربخوه‌ یا زاخۆ بكه‌ن”.

گۆتژی: ” ئه‌ڤ پڕۆژه‌ ل سه‌ر رووبارێ‌ خابیری ب درێژاهیا نێزیكی شه‌ش كیلۆمه‌تران دێ‌ هێته‌ چێكرن، ژ به‌ركو هاتنوچوونا گه‌شتیاران پتر ل سه‌ر رووبارێ‌ خابیری هه‌یه‌، دیسا د پاشه‌رۆژی دا نێزیكی 15 كیلۆمه‌تران ئه‌ڤ پڕۆژه‌ دێ‌ هێته‌ درێژكرن ل سه‌ر رووبارێ‌ خابیری داكو مفایه‌كێ‌ مه‌زنتر ژێ‌ بهێته‌ دیتن”.

چیای خویا ژی كر، هه‌ر ده‌ما رازیبوون ل سه‌ر بهێته‌ كرن و پاره‌یێ‌ پێدڤی بۆ پڕۆژه‌ی بهێته‌ ته‌رخانكرن دێ‌ كه‌ڤیته‌ د وارێ‌ بجهئینانێ دا”.

ئامێدیێ، مه‌حمود نهێلی:

ژ ئه‌نجامێ شه‌ڕێ د ناڤبه‌را چه‌كدارێن په‌كه‌كێ و له‌شكرێ توركیا دا د ڤان دو سالێن ده‌ربازبووی دا، پتر ژ 50 جاران كاره‌با ناوچه‌داریا كانی ماسێ كه‌فتیه‌ به‌ر هێڕشێن تۆپ و فرۆكان و ژ كار كه‌فتیه‌.

ئه‌ندازیار ئارام جه‌لال، رێڤه‌به‌رێ كاره‌با ده‌ڤه‌رداریا ئامێدیێ بۆ رۆژناما ئه‌ڤرۆ دیار كر، ژ ئه‌گه‌رێ شه‌ڕ و پێكدادانێن د ناڤبه‌را چه‌كدارێن په‌كه‌كێ و له‌شكرێ توركیا دا ل سنوورێ ناوچه‌داریا كانی ماسێ روو دده‌ن، گه‌له‌ك جاران هێلا كاره‌با ناوچه‌داریێ‌ ژ كار كه‌فتیه‌ و كاره‌ب هاتیه‌ بڕین.

ناڤهاتی دیار ژی كر، دووماهی جار ژی به‌ری دو رۆژان، هێلا كاره‌با گوندێن سه‌ره‌ڕۆ، ئوره‌، دشێش و ئه‌دنێ ژ ئه‌گه‌رێ‌ كه‌فتنا گولله‌ تۆپه‌كێ ل نێزیك هێلا فیده‌رێ ئاسته‌نگێ سه‌ر ب ویستگه‌ها كانی ماسێ ڤه‌ كاڕه‌با وان گوندان هاتبوو بڕین و گۆت: “تیما كاره‌با كانی ماسێ ب سه‌رپه‌رشتیا به‌رپرسێ سه‌خبێریێ هێلا كاربێ سه‌خبێركره‌ ڤه‌ و كاره‌ب بۆ وان گوندان هاته‌ ڤه‌گه‌ڕاندن ڤه‌”.

دهۆك، نه‌وزاد هلۆری:

ب مه‌ره‌ما ده‌ربڕینا سۆز و هه‌ڤخه‌می و پشكداربوون د به‌هیا پێنج شه‌هیدێن روودانا چه‌ند رۆژێن بۆری یا مێردینێ، دوهی 22/1/2023 شانده‌كێ پارێزگه‌ها مێردینێ سه‌ره‌دانا پارێزگه‌ها دهۆكێ كر.

د. عه‌لی ته‌ته‌ر، پارێزگارێ دهۆكێ د چارچوڤێ پێشوازیكرنا وان دا گۆت: (ئه‌م هه‌موو دلگرانین، كو پێنج وه‌لاتیێن پارێزگه‌ها دهۆكێ د روودانه‌كێ دا ل مێردینێ هاتینه‌ شه‌هیدكرن، بێگۆمان نوكه‌ ده‌ستهه‌لات و خه‌لكێ مێردینێ ژی پتر دلگرانن، ئه‌ڤ روودانه‌ چو كارتێكرنێ‌ ل برایه‌تی و په‌یوه‌ندیێن جڤاك و ئابووری ژی د ناڤبه‌را پارێزگه‌ها دهۆكێ و باكوورێ كوردستانێ و مێردینێ دا ناكه‌ت، لێ‌ ئه‌م دخوازین تاوانبارێن روودانێ ب زووترین ده‌م بگه‌هنه‌ سزایێ خوه‌).

عه‌لی خه‌یری جه‌لیك، موفتیێ مێردینێ گۆت: (ئه‌م بناڤێ خوه‌ و گه‌لێ مێردینێ ب گشتی دلگرانین ب ئه‌نجامدانا روودانا چه‌ند رۆژێن بۆری ل سه‌ر رێیا نسێبینێ، كو تێدا پێنج وه‌لاتیێن دهۆكێ ب دڕنده‌ترین شێوه‌ هاتنه‌ شه‌هیدكرن، ئه‌م ئه‌ڤرۆ هاتینه‌ ڤێره‌، كو هه‌ڤخه‌میا خوه‌ بگه‌هینین پارێزگار و خه‌لكێ دهۆكێ و ناخوازین برایه‌تی و په‌یوه‌ندیێن مه‌ بهێنه‌ تێكدان).

پشتی سه‌ره‌دانا پارێزگارێ دهۆكێ، شاندێ ناڤبری سه‌ره‌دانا مزگه‌فتا سه‌یدۆ ژی كر بۆ پشكداربوون د به‌هیا وان پێنج شه‌هیدێن روودانا مێردینێ دا.

دیسا هه‌ر دوهی پارێزگارێ دهۆكێ و دام و ده‌زگه‌هێن په‌یوه‌ندیدار پێشوازی ل خانم د. خانزاد ئه‌حمه‌د، ئه‌میندارا جڤاتا خانمان ل حكومه‌تا هه‌رێما كوردستانێ و شاندێ د گه‌ل دا كر، د كۆمبوونه‌كێ دا باس ل كار و به‌رنامێ ئه‌نجوومه‌نێ خانمان و ئه‌جێندا و پلانا كارێ وان هاته‌ كرن.

دهۆك، نه‌وزاد هلۆری:

ب مه‌ره‌ما گه‌هاندنا ده‌نگێ خوه‌ بۆ ئالیێن شوله‌ژێ، پشكه‌ك ژ فه‌رمانبه‌رێن لقێ‌ دهۆكێ‌ یێ‌ كومسیۆنا سه‌ربخوه‌ یا هه‌لبژارتنان ل ئیراقێ‌ ل هه‌مبه‌ر ئاڤاهیێ كومسیۆنێ خرڤه‌بونه‌كا نه‌رازیبوونێ ئه‌نجام دا.

دلگه‌ش نافع، نوونه‌رێ خرڤه‌بوویان بۆ رۆژناما ئه‌ڤرۆ گوت: (ئه‌م وه‌كو فه‌رمانبه‌رێن گرێبه‌ست یێن كومسیۆنا سه‌ربخوه‌ یا هه‌لبژارتنان خرڤه‌بووینه‌ بۆ وێ یه‌كێ ده‌نگێ خوه‌ بگه‌هینینه‌ ئالیێن شوله‌ژێ، ژ به‌ركو ئه‌ڤه‌ چه‌ند ساله‌ وه‌كو فه‌رمانبه‌رێن گرێبه‌ست ل كومسیۆنێ كار دكه‌ین، چه‌ندین هه‌یڤه‌ گرێبه‌ستێن مه‌ هاتینه‌ راگرتن، ئه‌ڤه‌ سته‌مه‌كا زۆره‌ ل مه‌ دهێته‌ كرن، ژ به‌ركو هه‌رده‌مێ هه‌لبژارتن دهێنه‌ كرن كاری ب مه‌ دكه‌ن، ده‌مێ هه‌لبژاتن نه‌بن مه‌ پشت گوهڤه‌ د هاڤێژن).

دلگه‌ش گۆت: (هه‌ژمارا فه‌رمانبه‌رێن كو دخوازن بهێنه‌ دامه‌زراندن ل سه‌رانسه‌ری ئیراقێ سێ هزار 27 كه‌سن، پتری 900 ژ وان ل هه‌رێما كوردستانێ نه‌، به‌هرا دهۆكێ ژی 272 كه‌سن، ئه‌ڤ هه‌ژماره‌ زۆر كێمه‌).

كارمه‌نده‌كا كچ یا كومسیۆنێ و پشكدار د خرڤه‌بوونێ دا بۆ ئه‌ڤرۆ گۆت: (ئه‌ڤه‌ ساله‌ك و چه‌ند هه‌یڤه‌ به‌رده‌وام ئه‌م دووڤچوونێ ل سه‌ر راوستاندنا گرێه‌ستێن خوه‌ دكه‌ین، به‌لێ هه‌تا نوكه‌ چو ئالیان به‌رسڤا مه‌ نه‌دایه‌، هنده‌ك ژ وان گرێبه‌ستێن كو هاتینه‌ ڕاگرتن دزڤرن بۆ سالا 2009ێ، زۆلمه‌كا هه‌ری مه‌زنه‌ ل مه‌ دهێته‌ كرن، له‌وا داخوازێ دكه‌ین ئاریشا مه‌ چاره‌سه‌ر بكه‌ن).

دهۆك، له‌زگین جوقی:

ب مه‌ره‌ما دووڤچوونا پڕۆژه‌یێن خزمه‌تگوزاری ئه‌وێن ل سه‌نته‌رێ دهۆكێ دهێنه‌ ئه‌نجامدان، دوهی 22/1/2023 ب چاڤدێریا د. عه‌لی ته‌ته‌ر، پارێزگارێ دهۆكێ و ب به‌رهه‌ڤبوونا ماجد سه‌ید سالح، جێگرێ پارێزگارێ دهۆكێ بۆ كاروبارێن ته‌كنیكی و جه‌هوه‌ر عه‌لی، ده‌ڤه‌ردارێ دهۆكێ و چه‌ند رێڤه‌به‌رێن گشتی یێن په‌یوه‌ندیدار پڕۆژه‌یێ‌ قێركرن و كۆنكریتكرنا جاده‌ و رێكێن ناڤخویی ل تاخێن مالتا سه‌ری و مالتا بنی و تاخێ گرێ سۆر ل سه‌نته‌رێ دهۆكێ ب گوژمێ ملیاره‌ك و 672 ملیۆن دیناران هاته‌ ڤه‌كرن، دیسا به‌رێ بنیاتی بۆ پڕۆژه‌یێ ڤه‌كرن و قێركرنا جاده‌كا جۆتسایدی یا 30 مه‌تری ل كه‌رتێ 45 ل ماسیكێ ب گوژمێ دو ملیار و 927 ملیۆن دیناران هاته‌ دانان.

ل دووماهیێ پارێزگارێ دهۆكێ سه‌را ده‌رگه‌هێ‌ زالگه‌ها ئالۆكا، رێكا سه‌ره‌كی یا دهۆكێ‌ بۆ مووسلێ‌ دا و ژ نێزیك سه‌حكره‌ رێكا ناڤبری و بزاڤا هاتنوچوونا ترۆمبێلان.

ل دۆر پڕۆژه‌یان و سه‌ره‌دانێ پارێزگارێ دهۆكێ بۆ ده‌زگه‌هێن راگه‌هاندنێ گۆت: “ئه‌و جادا 30 مه‌تری یا مه‌ به‌رێ بنیاتی بۆ دانای گه‌له‌كا گرنگه‌ و دێ بیته‌ هاریكار قه‌ره‌بالغا هاتنوچوونا ترۆمبێلان ل سه‌ر جادا گشتی كێم بكه‌ت، دیسا ل نێزیك دێ ده‌ست ب چێكرنا ئوڤه‌رپاسا ل نێزیك پرا شندۆخا كه‌ین بو كێمكرنا قه‌ره‌بالغێ ل ناڤ باژێری و جاددا بارزان”.

پارێزگارێ دهۆكێ ته‌كه‌ز كر، پڕۆژێن خزمه‌تگوزاری ب یه‌كسانی و ل دووڤ پێدڤیا هه‌ر ده‌ڤه‌ره‌كێ دهێنه‌ بجهئینان.

سه‌باره‌ت رێكخستنا ده‌رگه‌هێ‌ رێكا سه‌ره‌كی ل ئالۆكا گۆت: “ژ به‌ر كو ئه‌ڤ ده‌رگه‌هه‌ پشكه‌كه‌ ژ رێكا نیڤده‌وله‌تی یا دهۆكێ‌ بۆ توركیا، له‌ورا مه‌ بڕیار دا هه‌ردو ره‌خێن رێكێ بهێنه‌ رێكخستن و جوانكرن و زێده‌گاڤی بهێنه‌ راكرن، كو سیمایه‌كێ شارستانی ب ده‌ته‌ ده‌ڤه‌رێ، دیسا د پاشه‌رۆژێ‌ دا دو پرێن نوو ب ره‌خ پرێن كه‌ڤن ڤه‌ دێ هێنه‌ چێكرن و رێك دێ بیته‌ سێ ساید و هاتنوچوونا ترۆمبێلا خوشتر لێ بهێت”.

ئه‌ڤرۆ، سالار محه‌مه‌د دۆسكی:

ژ سه‌رجه‌مێ پتر ژ 400 ده‌رچوویێن كولیژێن چاندنێ و ڤێتێرنه‌ری و جوتیاران، هه‌تا نوكه‌ 120 جوتیاران ژ خه‌لكێ دهۆكێ مفادار بووینه‌ و مامه‌لێن خوه‌ بلندكرینه‌، لێ‌ هه‌تا نوكه‌ ل پارێزگه‌ها دهۆكێ چو جوتیار ژ پرۆژه‌ی مفادار نه‌بوویه‌، به‌لی ل هه‌ولێر و سلێمانیێ‌ و هه‌له‌پچه‌ و ئیدارێن سه‌ربه‌خۆ مفا ژ پرۆژه‌ی هاتیه‌ وه‌رگرتن و ئه‌ڤه‌ پشته‌ڤانیه‌كا مه‌زنه‌ بۆ جوتیاران و ده‌رچوویێن هه‌ردو كولیژان و داخازێ ژێ دكه‌ین مفا ژ ڤێ ده‌لیڤێ وه‌ربگرن و خزمه‌تا گه‌ل و وه‌لاتێ خوه‌ بكه‌ن.

گه‌یلان تاهر، ل پشكا قانوونی ل رێڤه‌به‌ریا گشتی یا چاندنێ ل پارێزگه‌ها دهۆك بۆ رۆژناما ئه‌ڤرۆ گۆت: ل رێكه‌فتی 19/9/2022 رێكه‌فتنه‌كا لێك تێگه‌هشتنێ دناڤبه‌را وه‌زاره‌تا چاندنێ ل حوكمه‌تا هه‌رێما كوردستانێ و  به‌نكا (قورتاسه‌) یا ئیسلامی هاته‌كرن ل سه‌ر دانا قه‌رزێن چاندنێ ژلایێ بانكا ناڤبری ڤه‌ بۆ جوتیاران و ده‌رچوویێن كولیژێن ڤێتێرنه‌ری و چاندنێ و دیتنا ده‌لیڤێن كاری ب دروستكرنا پرۆژێن بچووك، ب نڤیسار رێنمایێن گرێدایی دانا قه‌رزان ل سه‌ر رێڤه‌به‌رێن گشتی و رێڤه‌به‌رێن چاندنێ ل قه‌زا هاتنه‌ به‌لاڤه‌كرن بۆ مفا وه‌رگرتنێ.

ناڤبری ئه‌و ژی گۆت: دڤێت داخوازكه‌ر ده‌رچوویێ ئێك ژ كولیژێن چاندنێ یان ڤێتێرنه‌ری بیت، یان جوتیار بیت و پشته‌ڤانیا رێڤه‌به‌ریێن گشتی یێن چاندنێ ل گه‌ل دا هه‌بیت دا بۆ بانكێ بهێته‌ ره‌وانه‌كرن، خودانێ پرۆژه‌ی دڤێت كه‌فیله‌ك ل گه‌ل هه‌بیت و فه‌رمانبه‌ر بیت سه‌ر ب حوكمه‌تا هه‌رێما كوردستانێ ڤه‌، ل دووڤ پێدڤیا پرۆژه‌ی ژ 15 ملیونان هه‌تا 100 ملیونان دیناران پشته‌ڤانی ل پرۆژه‌ی دهێته‌كرن و د ماوێ پێنچ سالان دا، پشتی شه‌ش هه‌یڤێن ئێكێ و مفا وه‌رگرتنێ ئه‌و قه‌رز دهێنه‌ زڤراندن بۆ بانكا ناڤبری، و ب تنێ كارێ وه‌زاره‌تێ پشته‌ڤانیه‌ و هه‌لسه‌نگاندن و چاڤدێری یا پرۆژه‌ی یه‌ ژ روویێ هونه‌ری و قانوونی و پێشخستن و دابینكرنا ده‌لیڤێن كاری بۆ جوتیاران و ده‌رچوویێن هه‌ردو كولیژێن ڤێتێرنه‌ری و چاندنێ و هه‌می كارێن قانوونی و دارایی و كارگێری ل بانكێ دهێنه‌ ئێكلاكرن و هه‌ر چ پارێ زێده‌ ل سه‌ر ناهێته‌ وه‌رگرتن چونكه‌ ئه‌ڤه‌ بانكه‌كا ئیسلامی یه‌.

هێشتا گۆت: بانكا ناڤبری پارێ كاش ناده‌ته‌ جوتیاران یان ده‌رچوویێن چاندنێ و ڤێتێرنه‌ری، به‌لكو ل دووڤ پرۆژه‌ی كا خودانێ هزرێ پێدڤی ب چیه‌ بۆ نموونه‌ خانیێن پلاستیكی بانك دێ بۆ خانیێن پلاستیكی دابین كه‌ت، ئه‌ڤجا ب ڤی ره‌نگی هه‌ر تشتێ داخواز بكه‌ت.

گۆت ژی “هێشتا هه‌تا نوكه‌ 120 وه‌لاتیان داخازا وه‌رگرتنا قه‌رزان كریه‌ و هه‌ر هه‌می جوتیارن و ژ ڤێ هژمارێ ئافره‌تن و ب مخابنی ڤه‌ هه‌تا نوكه‌ ده‌رچووویێن چاندنێ و ڤێتێرنه‌ری د بێ ده‌نگن، نزانین ئه‌رد نینه‌ یان ژی خوه‌ ناهاڤێنه‌ كاری، رێكارێن ده‌سپێكی دڤێت ئه‌و كه‌س داخازه‌كێ بۆ خوه‌ پێشكێش بكه‌ت ل هوبا چاندنێ ل سنورێ قه‌زا خوه‌ و دێ پشكنین بۆ هێته‌كرن و دێ پشته‌ڤانی بۆ هێته‌كرن بۆ قه‌زایێ و ل دووڤ دا بۆ رێڤه‌به‌ریا گشتی یا چاندنێ كارۆبارێن قانوونی دهێته‌ ره‌وانه‌كرن و ب رێكا مه‌ دێ بۆ پشكا قانوونی ل وه‌زاره‌تا چاندنێ و ژێده‌رێن ئاڤێ هێته‌ بلندكرن و دێ بۆ بانكا ناڤبری هێته‌ ره‌وانه‌كرن هه‌تا نوكه‌ پتر ژ 400 كه‌سان ل كوردستانێ پێشكێشكریه‌ و 150 بۆ بانكێ هاتینه‌ ره‌وانه‌كرن و ب لیسته‌ دێ كار ل سه‌ر هێته‌ جێبه‌جێكرن.

گه‌یلانی ئه‌و ژی دیاركر، ئه‌و ژنێن پێشكێشكرین ژی هه‌ر هه‌می جوتیارن، به‌لكو ده‌رچوویێن كولیژێن چاندنێ و ڤێتێرنه‌ری نینن و پتریا داخازكریان داخازا كولانا بیران و خانیێن پلاستیكی و په‌له‌وه‌ران و ته‌رش و كه‌والی و خودانكرنا مێشان كرینه‌ و به‌رده‌وام خه‌لكێ داخاز دكه‌ت.

هێشتا گۆت: مه‌ داخازا لقه‌كێ بانكا ناڤبری كریه‌ كو ل پارێزگه‌ها دهۆك بهێته‌ڤه‌كرن، چونكه‌ جوتیار نه‌شێن هه‌رده‌م بچنه‌ هه‌ولێرێ پارا بۆ بانكێ بزڤرینن و رازیبوون ل سه‌ر ڤه‌كرنێ هاتیه‌كرن لێ هێشتا نه‌ كه‌فتیه‌ د كاری دا.

ئامێدیێ‌، مه‌حمود نهێلی:

جادا دناڤبه‌را ناوچه‌داریا دێره‌لۆك بۆ ناوچه‌داریا شێلادزێ‌ دا ب درێژاهیا پتر ژ 10 كیلومه‌تران هاتیه‌ دوساید كرن، ب تنێ‌ دو كیلومه‌تر ماینه‌. ئه‌ڤ یه‌كه‌ ژی زێده‌باری پێشاندانا دیمه‌نه‌كی نه‌یێ‌ شارستانی، گه‌له‌ك جاران ژی بوویه‌ ئه‌گه‌رێ‌ په‌یدابوونا روودانان و وه‌لاتی ژی داخاز دكه‌ن ئه‌ڤ پارچا مایی یا جاده‌یی بهێته‌ چێكرن.

وه‌لاتیه‌ك ب ناڤی خسرو هابی بۆ رۆژناما ئه‌ڤرۆ دبێژیت: ئه‌ڤ پارچا جادێ‌ یا مایی گه‌له‌ك یا بێ‌ سه‌روبه‌ره‌ و نابیته‌ گه‌له‌ك كو حكومه‌ته‌ك نه‌شێت دروست بكه‌ت و گۆت: ل سه‌ر ڤێ‌ پارچا مایی گه‌له‌ك جاران روودان دروست بووینه‌ و قوربانی ژی لێ‌ په‌یدابووینه‌.

وه‌لاتیه‌كێ‌ دی ب ناڤێ‌ به‌هدین دیار كر، نوكه‌ ناحیا دێره‌لۆكێ‌ و شێلادزێ‌ بووینه‌ ئێك باژێر و هاتن و چون دناڤبه‌رێ‌ دا گه‌له‌ك زۆره‌، ژ به‌ر وێ‌ یه‌كێ‌ ژی پێدڤیه‌ جاده‌یا دناڤبه‌را شێلادزێ‌ و دێره‌لۆكێ‌ بهێته‌ دوسایدكرن و گۆت: ئه‌ڤ پارچا مایی یا جادا دناڤبه‌را دێره‌لۆكێ‌ و شێلادزێ‌ پارچه‌كا گه‌له‌ك كێمه‌ د سه‌ر هندێ‌ را یا بێ‌ سه‌روبه‌ره‌ و قه‌له‌بالغه‌كا زۆر یا ل سه‌ر، رۆژانه‌ هاتن و چونه‌كا زۆر ل سه‌ر دهێته‌ كرن و هند جاران ژی روودان ژێ‌ په‌یدابووینه‌ و قوربانی ژی ل په‌ی هه‌بووینه‌.

غازی عزه‌ت رێڤه‌به‌رێ‌ ناوچه‌داریا دێره‌لۆك ب وه‌كاله‌ت بو رۆژناما ئه‌ڤرۆ دیاركر، ئه‌ڤ جاده‌یه‌ دكه‌ڤیته‌ سنورێ‌ باژێرڤانیا دێره‌لۆكێ‌ دا، ده‌مێ‌ جادا دوسایدی یا دناڤبه‌را دێره‌لۆكێ‌ و شێلادزێ‌ دا هاتیه‌ چێكرن كو ژلایێ‌ رێڤه‌به‌ریا رێك و پران ڤه‌ دهاته‌ سه‌په‌رشتیكرن تایبه‌ت بوو ب جاده‌ین دره‌ڤه‌ ڤه‌، ئه‌ڤ پارچا جادێ‌ مایه‌ و نه‌بوویه‌ دوساید و دورێن 2 كیلومه‌ران دبیت و ته‌كه‌ستكر، چێكرنا ڤێ‌ جادێ‌ ژی ئێك ژ پرۆژێن گرنگ و ستراتیژی نه‌ و پێدڤیه‌ ده‌ست پێ‌ بهێـته‌ كرن.

زێده‌تر گۆت: وان وه‌ك رێڤه‌به‌ریا ناوچه‌داریا دێره‌لۆك چێكرنا ڤێ‌ جاده‌یێ‌ كریه‌ د پلانا سالا 2023 یێ‌ دا و ژ پرۆژێن ده‌سپێكی یه‌ ژ لایێ‌ گرنگی یێ‌ ڤه‌. وان پلانا ئه‌ڤ ساله‌ ژی بلند كریه‌ و ئه‌ڤ پرۆژه‌یه‌ ل ده‌سپێكێ‌ یه‌ و چاڤه‌رێ‌ رازیبوونێ‌ نه‌ و هه‌ر ده‌مه‌كێ‌ رازیبوون ل سه‌ر هاته‌ كرن دێ‌ ده‌ست ب چێكرنا وێ‌ هێته‌ كرن و كه‌ڤیته‌ د خزمه‌تا خه‌لكێ‌ ده‌ڤه‌رێ‌ دا.