هه‌ولێر، قائید میرۆ:

رێڤه‌به‌ریا گشتیا هاتنوچوونا هه‌رێما كوردستانێ ئامارا سالا بۆری یا هاتنوچوونێ به‌لاڤكر و تێدا هاتیه‌: د سالا بۆری دا زێده‌تری ملیۆن زێده‌گاڤی ب رێیا كامیرێن له‌زاتیێ هاتینه‌ تۆماركرن و ب ئه‌گه‌رێ روودانێن هاتنوچوونێ ژی 445 كه‌سان گیانێ خوه‌ ژ ده‌ستدایه‌.

عه‌مید محه‌مه‌د روشدی، په‌یڤدارێ هاتنوچوونا هه‌رێما كوردستانێ د كۆنگره‌یه‌كێ رۆژنامه‌ڤانی دا دیار كر، ل هه‌رێما كوردستانێ دو ملیۆن و 411 هزار تڕۆمبێل هاتینه‌ تۆماركرن و  گۆت: “ل سه‌رانسه‌ری هه‌رێما كوردستانێ دو ملیۆن و 79 هزار و 73 كه‌سان مۆهله‌تا شۆفێریێ هه‌یه‌ و ب تنێ د سالا بۆری دا 797 هزار مۆهله‌ت هاتینه‌ نووكرن و ده‌ركرن، دیسا چار هزار و 476 تڕۆمبێل هاتینه‌ هه‌لوه‌شاندن و پشكنین بۆ 531 هزار تڕۆمبێلان ژی هاتیه‌ كرن”.

عه‌مید محه‌مه‌د روشدی گۆتژی: “د سالا بۆری دا 499 هزار و 394 زێده‌گاڤی هاتینه‌ تۆماركرن و ب تنێ ب رێیا كامیره‌یێن هاتنوچوونێ ملیۆن و 825 زێده‌گاڤی هاتینه‌ تۆماركرن، هه‌روه‌سا سێ هزار و 706 روودانێن هاتنوچوونێ هاتینه‌ تۆماركرن و بووینه‌ ئه‌گه‌رێ گیان ژ ده‌ستدانا 445 كه‌سان و برینداربوونا حه‌فت هزار و 225 كه‌سان، هه‌ر د سالا بۆری دا هاتنوچوونا هه‌رێما كوردستانێ 15 هزار كه‌سێن زێده‌گاڤی كری داینه‌ دادگه‌هێ و ده‌ست ب سه‌ر زێده‌تری 14 هزار تڕۆمبێلان داهاتیه‌ گرتن”.

ئه‌ڤرۆ، ئه‌میر ئه‌ترووشی:

سه‌رۆكێ‌ باژێرڤانیا باتیفا راگه‌هاند، ب گوژمێ‌ سێ‌ ملیار و 425 ملیۆن دیناران ده‌ست بجهئینانا پڕۆژه‌یێ‌ جۆتسایدێ‌ باتیفا ل سنوورێ‌ ئیدارا سه‌ربخوه‌ یا زاخۆ هاته‌ كرن و ب پڕۆژه‌یه‌كێ‌ گرنگ دهێته‌ هژمارتن.

مه‌سعود غانم، سه‌رۆكێ‌ باژێرڤانیا باتیفا بۆ رۆژناما ئه‌ڤرۆ دیار كر، جۆتسایدێ‌ باتیفا كه‌ڤته‌ د وارێ‌ بجهئینانێ دا و نها ده‌ست پێ‌ هاتیه‌ كرن، درێژاهیا ڤی پڕۆژه‌ی كیلۆمه‌تره‌ك و 700 مه‌ترن و ماوێ‌ پڕۆژه‌ی 180 رۆژن و ژ لایێ‌ كۆمپانیا هێژا ڤه‌ دهێته‌ بجهئینان و گۆت: “پڕۆژه‌ ب گوژمێ‌ سێ‌ ملیار و 425 ملیۆن دیناران دهێته‌ دروستكرن و ئه‌ڤه‌ ئێكه‌ ژ پڕۆژه‌یێن گرنگ یێن رێڤه‌به‌ریا گشتی یا باژێرڤانیان بۆ خزمه‌تكرنا وه‌لاتیان دهێـته‌ بجهئینان”.

خویا ژی كر كو د هه‌مان سال دا، پڕۆژه‌یێ‌ ڤه‌كرن و قێركرنا رێیێن ناڤخوه‌یی ل كۆمه‌لگه‌ها بێگوڤا ب گوژمێ‌ 137 ملیۆن دیناران هاتیه‌ بجهئینان و پڕۆژه‌یێ‌ چێكرنا سۆلینێن ئاڤرێژ ب گوژمێ‌ 97 ملیۆن دیناران چوویه‌ د وارێ‌ بجهئینانێ‌ دا.

د سالا بۆری یا 2022ێ‌ دا، 118 پڕۆژێن خزمه‌تگوزاری ب گوژمێ‌ 48 ملیار دیناران ژ لایێ‌ رێڤه‌به‌ریا گشتی یا باژێرڤانیان ل پارێزگه‌ها دهۆكێ‌ هاتینه‌ ئه‌نجامدان.

دهۆك، له‌زگین جوقی:

رێڤه‌به‌رێ‌ كۆچ و كۆچبه‌ران و به‌رسڤدانا قه‌یرانان ل پارێزگه‌ها دهۆكێ‌ دیار كر، حكومه‌تا ئیراقێ‌ بڕیار دایه‌ كه‌مپێن ئاواره‌یان بهێنه‌ تێكه‌لكرن و دبێژیت: ئه‌ڤ بڕیاره‌ ژ كه‌مپێن سنوورێ‌ پارێزگه‌ها دهۆكێ‌ ناگریت.

پیر ده‌یان جه‌عفه‌ر، رێڤه‌به‌رێ‌ كۆچ و كۆچبه‌ران و به‌رسڤدانا قه‌یرانان ل پارێزگه‌ها دهۆكێ‌ بۆ رۆژناما ئه‌ڤرۆ گۆت: “ل پارێزگه‌ها دهۆكێ‌ 16 كه‌مپ هه‌نه‌، لێ‌ چو ژ وان ناهێنه‌ تێكه‌لكرن، چونكو كه‌مپێن ل پارێزگه‌ها دهۆكێ‌ د پڕن ژ ئاواره‌یان و جهێ‌ ئاواران تێدا نینه‌ هنده‌ك ئاواره‌ ژ ده‌رڤه‌ی كه‌مپان ژی دژین ب تنێ‌ ل هه‌ولێر و سلێمانیێ‌ كه‌مپ هه‌نه‌ هژمارا ئاواره‌یان د ناڤ دا كێمبوویه‌، ئه‌و كه‌مپ دبیت بهێنه‌ تێكه‌لكرن”.

ناڤهاتی ئاشكرا ژی كر، ئه‌ڤه‌ ده‌مه‌كه‌ چو ئاواره‌ ڤه‌نه‌گه‌ڕیاینه‌ شنگالێ‌، ژ به‌ركو ره‌وشا شنگالێ‌ یا باش نینه‌ و خزمه‌تگوزاری ژی نینن، له‌ورا خه‌لكێ‌ شنگالێ‌ ماینه‌ د ناڤ كه‌مپان دا ڤه‌ناگه‌رن و گۆت: “خه‌لكێ‌ شنگالێ‌ چاڤه‌ریێ‌ بجهئینانا ریككه‌فتنا د ناڤبه‌را حكومه‌تا هه‌رێما كوردستانێ‌ و ئیراقێ‌ دا دكه‌ن، داكو بشێن ڤه‌گه‌رنه‌ سه‌ر جهێن خوه‌”.

ئاكرێ‌، سه‌باح زوهێر

ل گۆره‌ی گۆتنا رێڤه‌به‌رێ‌ شوونواران ل قه‌زا ئاكرێ‌ پتری 500 جهێن شوونواری هه‌نه‌ و ئه‌ڤ جهه‌ بووینه‌ ده‌رگه‌هه‌ك گه‌شتیار زێده‌تر قه‌ستا ئاكرێ‌ بكه‌ن، ب تایبه‌ت باژێرێ‌ كه‌ڤنێ‌ ئاكرێ‌، لێ‌ مخابن به‌رده‌وام جهێن شوونواری ل بن مه‌ترسیێ‌ نه‌ و ژلایێ‌ گروپێن نه‌نیاسڤه‌ ده‌ستكاری لێ‌ دهێنه‌كرن و زێده‌گاڤی ل سه‌ر دهێنه‌كرن.

هیوا شیمال رێڤه‌به‌رێ‌ شوونواران ل ئاكرێ‌ بۆ روژناما ئه‌ڤرۆ دیار كر، ئاكرێ‌ ژلایێ‌ روویێ‌ شوونواری و مێژوویی و دیروكی ڤه‌ ئێك ژ وان قه‌زایێن كه‌ڤناره‌، ب شێوه‌كێ‌ گشتی هه‌تا نها ل ئاكرێ‌ هه‌تا 500 جهێن شوونواری هاتینه‌ توماركرن، ل ڤان جهێن شوونواری هه‌ر ئێكێ‌ تایبه‌تمه‌ندیا خوه‌ هه‌یه‌ ژلایێ‌ مێژوویی و دیروكی ڤه‌، ئه‌م وه‌كو رێڤه‌به‌ریا شوونواران ل ئاكرێ‌ هه‌می هه‌ولاده‌ین ئه‌و جهێن شوونواری دپاراستی بن و بهێنه‌ نووژه‌نكرن و ببنه‌ جهێن شوونواری بۆ گه‌شت و گوزاری.

گۆت ژی: ب خوشحالیڤه‌ هژماره‌كا ژ گه‌شتیاران سه‌ره‌دانا جهێن شوونواری دكه‌ن، ب تایبه‌تی باژێرێ كه‌ڤنێ‌ ئاكرێ‌، ژ به‌ر كو ئاكرێ‌ یا كه‌ڤن جهه‌كێ‌ جوان و سه‌رنج راكێشه‌، جهێن كه‌له‌پوری دناڤدا هه‌نه‌، بوویه‌ هێمایه‌ك بۆ باژێرێ‌ ئاكرێ‌ و نوكه‌ ئه‌م د پلانێن خوه‌دا هه‌می هه‌ولان ده‌ین جهێن شوونواری بكه‌ینه‌ ده‌رگه‌هه‌ك بۆ هاتنا گه‌شتیاران بۆ ده‌ڤه‌را ئاكرێ‌.

جهێ داخێ‌ ل كوردستانێ‌ و ل ئاكرێ‌ ژی مخابن گروپه‌كێ‌ نه‌نیاس هه‌ولا دده‌ست درێژیكرنا جهێن شوونواری دكه‌ن و ئاكرێ‌ بێ‌ به‌هرنه‌بوویه‌ ژ وان زێده‌گاڤیان، مه‌ وه‌كو رێڤه‌به‌ریا شوونواران ب هه‌ماهه‌نگی دگه‌ل ده‌زگه‌هێن ئێمناهیێ‌ ل سه‌ر خه‌تین ئه‌و كه‌سێن ڤان زێده‌گاڤیان دكه‌ن بهێنه‌ ده‌سته‌سه‌ركرن ل دووڤ یاسا پاراستنا كه‌ل و په‌لێن شوونواری سه‌ره‌ده‌ری دگه‌ل بهێته‌كرن و بهێنه‌سزادان، مخابن ل ئاكرێ‌ هنده‌ك جه هه‌بووینه‌ زێده‌گاڤی ل سه‌ر هاتیه‌كرن، پێدڤیه‌ لایه‌نێن په‌یوه‌ندیدار هه‌وله‌كا جدی بده‌ن ل سه‌ر ڤی بابه‌تی شول بكه‌ن، چونكی ئه‌ڤ گروپه‌ یێ‌ شه‌هره‌زایه‌، دا كو ئه‌ڤ جهه‌ زێده‌تر نه‌هێنه‌ تێكدان، ئه‌م وه‌كو رێڤه‌به‌ریا شوونواران ل ئاكرێ‌ هه‌می هه‌ولاده‌ین بۆ پاراستنا ڤان جهان، لێ‌ چونكی هه‌ردوو قه‌زایێن ئاكرێ‌ و به‌رده‌ره‌ش ل بن چاڤدێریا مه‌نه‌ و مه‌ درستی شیان نینه‌ دوو قه‌زایان درستی بپارێزین، چونكی ئه‌ڤ جهێن شوونواری پێدڤی چاڤدێرانه‌ و پێدڤی كارمه‌ندایه‌.

رێڤه‌به‌رێ‌ شوونواران گۆت ژی: پلانا مه‌ ئه‌وه‌ هنده‌ك جهێن شوونواری ل ئاكرێ‌ بكه‌ینه‌ جهێن گه‌شت و گوزاری، ئێك ژ وان جهان ئاڤاهیێ‌ قشلا ئاكرێ‌ یه‌. ئه‌م نوكه‌ یێ‌ كار ل ئاڤاهیێ‌ قشلا ئاكرێ‌ دكه‌ین، پلانا مه‌ل به‌ره‌ ئاڤاهی بكه‌ینه‌ جهه‌كێ‌ شوونواری و كه‌له‌پوری كو بیته‌ دو موزه‌خانه‌ (موزه‌خانا كه‌له‌پوری و شوونواری) ژ بۆ هندێ‌ پتر سه‌رنجا گه‌شتیاران بهێته‌ راكێشان، هه‌تا نوكه‌ موزه‌خانه‌ نینه‌ ل ئاكرێ‌ و موزه‌خانه‌ زورا پێدڤی و گرنگه‌، چونكی دێ‌ مێژوو و كلتورێ‌ ئاكرێ‌ دیاركه‌ت، مه‌ چه‌ندین نڤیسار ژی بۆ لایه‌نێن په‌یوه‌ندیدار، لێ‌ پێدڤی ئاڤاهیه‌كێ‌ یه‌ و هه‌تا نوكه‌ چ دیار نینه‌.

ل داویێ‌ گۆت: رێڤه‌به‌ریا شوونواران ل ئاكرێ‌ ل سالا 2005ێ‌ هاتیه‌ دامه‌زراندن، لێ‌ مخابن هه‌تا نوكه‌ چ ئاڤاهیه‌ك نینه‌، ل ده‌ستپێكێ‌ ئه‌م ل ناڤ قشلا ئاكرێ‌ بووین، لێ‌ ژبه‌ر مه‌ترسیا هه‌رفینێ‌ ئه‌م نه‌چاربین لێ‌ ده‌ركه‌فتین، نوكه‌ ژی ئه‌م ل ناڤ ئاڤاهیێ‌ گه‌شت و گوزارا ئاكرێ‌ داینه‌.