ئهڤرۆ،
دهێته چاڤهڕێ كرن ئهڤرۆ ل دهمژمێر 10ی شهڤ یاریا دویێ یا ڤهبر ژ چارچووڤێ قۆناغا پێش دووماهیا كۆپا جیهانێ 2022 دهربازبوون بۆ یاریا دووماهیێ ل یاریگهها ستادیۆم ئهلمهدینه د ناڤبهرا قارهمانا مۆندیالا بوری و ههلبژارتیێ مهغرب ههسپێ رهش بۆ تۆماركرنا دیرۆك بهێته كرن.
رێكا هاتنا ههردو ههلبژارتیان
ههلبژارتیێ مهغرب ب ناڤێ ههسپێ رهش یێ مۆندیالا قهتهر هاتیه نیاسین شیایه بۆ جارا ئێكێ وهكو ههلبژارتیهكێ ئهفریقیا و عهرهبی ب گههیته قۆناغا پێش دووماهیێ، د چارچووڤێ كۆما شهشێ دا وهكو خودانا سهرێ لیستێ بوو حهفت خال كۆمكربوون ژ وهكهههڤیهكێ ل گهل كرواتیا بێ گۆل، سهركهفتن ل سهر ههلبژارتیێن بهلجیكا ب2-چنه و كهنهدا 2-1 گۆلا، د قۆناغا 16ێ دا شیا ب لێدانێن پهنهلتیان سهركهفتنێ ل سهر ئێك ژ بهربژارێن ناسناڤی ههلبژارتیێ ئسپانیا بینت پشتی یاری بێ گۆل ب دووماهی هاتی، ههموو بۆچوون هوسا دهاتنه گۆتن كو دبیت دقۆناغا ههشتێ دا ل گهل پۆرتۆگال هیڤیێن وێ ب راوهستیێن لێ شیا ب گۆلا ستێرێ خوه یوسف ئهلنهسری د خولهكا 42دا دهربازبیته قۆناغا پێش دووماهیێ، ژلایێ خوهڤه گههشتنا ههلبژارتیێ فرهنسا یا بهرنیاسه ب دروشمێ دیكلی بۆ قۆناغا ههشتێ وهكو خودانا سهرێ لیستا كۆما چارێ هاتبوو ژ دو سهركهفتنان ل گهل ئوسترالیا 4-1، ل سهر دانیمارك 2-1 و تووشی خوسارهتیا نه چاڤهڕێ كری بوو ههمبهری تۆنسێ ب گۆلهكێ بێ بهرامبهر، د قۆناغا 16ێ دا شیابوو ب سێ گۆلان بهرامبهر گۆلهكێ سهركهفتنێ ل سهر پۆلهندا بینت ب گههیته قۆناغا ههشتێ و ههمبهری ئێك ژ بهێزترین ههڤڕكێن ناسناڤی ههلبژارتیێ ئنگلتهرا بیت كو دیاریهكا پری ههڤڕكی دا شیا ب دو گۆلان بهرامبهر گۆلهكێ دهربازبیته قۆناغا ههشتێ.
دیرۆك د بهرژوهندیا كێ دایه!
ههرچهنده دیرۆكا ههلبژارتیێ مهغرب وهكو یا فرهنسا ب دهستكهفت نینه و باشترین دهستكهفتێ وێ ل مۆندیالا 1986 بوو دهمێ گههشتیه قۆناغا16ێ، لێ د مۆندیالا ئهڤجاره دا ئهڤ قۆناغه ژی دهرباز كر و دهێته هژمارتن دیرۆكهكا نوو بۆ كێشوهرێ ئهفریقیا و ههلبژارتیێن عهرهبی تۆماركریه، پێنهڤێت ئهڤ پێنگاڤه وهكریه ههموو شرۆڤهكارێن وهرزشی پهسنا مهغربێ بكهن و ژ ههژی ناسناڤێ ههسپێ رهش بینن، ژلایهكێ دووڤه ههلبژارتیێ فرهنسا خودان دو ناسناڤێن مۆندیالانه ئهو ژی ل 1998 و 2018ێ، لێ ترسا وێ ئهو هیڤیێن خوه ژ دهست نهدهت ههروهكو ل مۆندیالا 2006 دهمێ رێزا دویێ هاتی ودیسان د ههردو مۆندیالێن 1958 و 1986 ل رێزێن سێیێ ب دهستڤه ئینایه.
هێزا ههردو یاریزانان
ههلبژارتیێ فرهنسا هێدی بهر ب هیڤیێن خوه یێن مهزن د چیت ژبۆ پاراستنا ناسناڤێ خوه یێ مۆندیالا بۆری و دهستڤه ئینانا ستێرا سێیێ، وهكو دیار فرهنسا ب كۆمهكا مهزن یا یاریزانێن خودان شیان ههنه ژوانا كلیان مباپی ئێك ژ گۆلكهرێن قارهمانیێ ههتا نوكه ب پێنچ گۆلان، عوسمان دیمبلی، ئۆلیڤێی جێرۆ خودانێ چار گۆلان، ئنتۆنی گرێزمان، كۆندی و تیچۆامینی، ههمبهری وێ ههلبژارتیێ مهغرب ب راهێنهرهكێ شارهزا وهكو وهلید ئهلركراكی و یاریزانێن خودان شیان و بووینه جهێ باوهریێ ژوانا حهكیم زیاتش، رۆمان سایس، سوفیان بۆفال، زهكهریا ئهبۆ خلال، یوسف ئهلنهسری، ئهشرهف ئهلحهكیمی و ژبیرنهكهین یاسین بۆنۆ ئهو گۆلپارێزێ بوویه جهێ حێبهتیا ههموو وهرزشڤانێن جیهانێ كو ئێك ژ ئهگهرێن مهزنه یا سهركهفتنا ههلبژارتیێ مهغرب.
سهرۆكێ فرهنسا دێ بهرههڤبیت
بڕیاره ئهڤرۆ سهرۆكێ وهلاتێ فرهنسا ئیمانویێل ماكرۆن ب گههیته وهلاتێ قهتهر ژبۆ پشتهڤانیا ههلبژارتیێ وهلاتێ خوه و بلندكرنا مۆرالا یاریزانان ل دووڤ داخویانیا وی یا تویتهری دا دیاركربوو ههموو وهلات دێ پشتهڤان بیت و ئهز ژی دێ ل یاریگههێ پشتهڤانبم و نابیت سڤكاتیێ ب ههلبژارتیێ مهغرب بكهن.
دیدارێن ههردو ههلبژارتیان
ل دووڤ دیرۆكا یاریێن دناڤبهرا ههردو ههلبژارتیان 11 جاران ههمبهری ئێك بووینه ژ وانا پێنچ یاریێن فهرمی بوون، ب گشتی حهفت سهركهفتنێن فرهنسا ل سهر مهغرب بوون و سێ وهكههڤی و ئێك سهركهفتن بۆ مهغرب بوو، دووماهی یاری ل 2007 بوو ب وهكههڤی ب دووماهی هاتبوون.
دادڤانێ یاریێ
ئێكهتیا تهپا پێی یا جیهانی -فیفا- دادڤانێ نێڤدهولهتی یێ مهكسیكی سیزار رامۆس بۆ یاریێ دهست نیشانكر، ئهوێ ههتا نوكه سێ یاریێن مۆندیالا قهتهر بڕێڤهبرین و د مۆندیالا 2018ێ دا بۆ چهند یاریان هاتبوو دهستنیشانكرن، ههروهسان ههمان دادڤانه ل ئۆلمپیادا ریۆ دی جانیرۆ 2016ێ یاریا ئیراقێ و دانیمارك برێڤهبریه ئهو ب وهكههڤیا بێ گۆل ب دووماهی هاتبوو.
نيشاندان