ئه‌ڤرو، نه‌وزاد هلوری:

كچه‌كا كریستیان بۆ ده‌مێ چه‌ندین سالایه‌ كار د ئاشته‌وایی یا جڤاكی و خێزانی ب تایبه‌تی دناڤبه‌را هه‌ڤژینان دا دكه‌ت، پێخه‌مه‌ت وێ یه‌كێ كو خێزانه‌كا به‌خته‌وه‌ر دناڤبه‌را هه‌ڤژینان بهێته‌ ئاڤا كرن و دبێژیت: 50% ژ وان ئاریشێن كو توندتیژی تێدا هاتیه‌ كرن و هاتینه‌ سه‌نته‌ری مه‌ چاره‌سه‌ر كرینه‌.

مافپه‌روه‌ر ماریان وه‌ردا، به‌رپرسا سه‌نته‌رێ راوێژكاریا خێزانی ل پارێزگه‌ها دهۆكێ بۆ رۆژناما ئه‌ڤرۆ گۆت: (سه‌نته‌رێ راوێژكاریا خێزانێ وه‌كو ئێكه‌م سه‌نته‌ر ل دووماهیا سالا 2012ێ ل هه‌رێما كوردستانێ ل پارێزگه‌ها دهۆكێ هاته‌ دامه‌زراندن، پێكدهێت ژ هوبا كارگێری، هوبا خزمه‌تگۆزاری و ده‌روونی و یاسایی و جڤاكی، دیسان هوبا دیراسات و ڤه‌كولینان، هوبا هێلا گه‌رم 119 و هوبا لژنا ئاشته‌وایی و هشیاری).

ماریانێ‌ گۆتژی: (ئارمانج ژ دامه‌زاندنا سه‌نته‌ری چاره‌سه‌ر كرنا ئاریشێن وان خێزانایه‌ یێن كو سه‌ره‌دانا رێڤه‌به‌ریا مه‌ دكه‌ن كو ل گوره‌ی بریارا دادوه‌رێ ڤه‌كولینێ بۆ مه‌ دهێنه‌ ره‌وانه‌ كرن، پاشی ئاریشه‌ ب رێیا كه‌سانێن شاره‌زا و تایبه‌تمه‌ند دهێنه‌ چاره‌سه‌ر كرن، دیسان سه‌نته‌رێ مه‌ چاره‌سه‌ریا وان ئاریشان ژی دكه‌ت یێن كو خودانێ ئاریشێ نه‌ڤێت ببیته‌ سكالا، نوكه‌ هه‌مان سه‌نته‌ر ل پارێزگه‌هێن دی یێن هه‌رێما كوردستانێ ژی هاتیه‌ دامه‌زراندن، ب ئومێدا وێ یه‌كێ كو بشێین خزمه‌ته‌كا باش بۆ خێزانان بكه‌ین).

مافپه‌روه‌رێ‌ زێده‌تر گۆت: (مه‌ ل سه‌نته‌ری 22 كه‌سێن تایبه‌تمه‌ند هه‌نه‌ كو ماموستایێن زانكۆیێ نه‌ د هه‌موو تایبه‌تمه‌ندی و بیاڤان دا، خودان زانست و باوه‌رنامێن ئه‌كادیمی نه‌، رۆژانه‌ سێ ژ وان ل سه‌نته‌ری ده‌وامێ دكه‌ن و ل نێزیك ل سه‌ر وان كه‌یسان د روونن یێن دهێنه‌ سه‌نته‌ری و ب شێوه‌یه‌كێ هه‌ره‌ باش گوهداریا وان دهێته‌ كرن و نهێنیێن وان دهێنه‌ پاراستن و ئاریشه‌ دهێته‌ چاره‌سه‌ر كرن به‌ری نه‌خوش بیت).

به‌رپرسا سه‌نته‌رێ‌ راوێژكاریا خێزانی دیار كر ژی كو ئاریشێن گرێدایی خێزانێ ب تنێ دهێنه‌ سه‌نته‌رێ وان ئه‌وێن دناڤبه‌را ئه‌ندامێن خێزانێ و هه‌ڤژینان و گۆت: (ئه‌و ئاریشێن دهێنه‌ سه‌نته‌ری جوراو جورن، به‌لێ ب گشتی گرێدایی خێزانێ نه‌، پتری 50% ژ وان كه‌یس و ئاریشێن خێزانی یێن دهێنه‌ سه‌نته‌ری دهێنه‌ چاره‌سه‌ر كرن).

مافپه‌روه‌ر ماریان وه‌ردا، د درێژاهیا ئاخفتنێن خودا دیار كر ژی كو  پشكه‌ك ژ خه‌لكی شاش ل كار و بارێن سه‌نته‌رێ راوێژكاریا خێزانی دگه‌هن و هزر دكه‌ن كو كارێ وان  ئه‌وه‌ بتنێ پشته‌ڤانیا ئافره‌تان دكه‌ن ب دژی زه‌لامان و گوت:  (سه‌نته‌ر ب چ ئاوایا پشته‌ڤانیا ئاریشێ نینه‌ چ ئافره‌ت بكه‌ت یان زه‌لام،  هه‌ر ئه‌ندامه‌كێ خێزانێ شاشیێ بكه‌ت، بێگومان هه‌لویست دهێته‌ وه‌رگرتن داكو ئه‌و پێداچونێ بكه‌ت و دووباره‌ ڤه‌گه‌ریت بۆ ئاشته‌وایا خێزانی و ژیانه‌كا ئارام، ئه‌م كار ل سه‌ر ئاڤاكرنا خێزانێ دكه‌ین و مه‌ دڤێت هه‌ڤژین و ئه‌ندامێن خێزانێ ب باشترین شێوه‌ و د خوشترین ژیان دا بژین، ژبه‌ركو خێزان بنیاتێ ئاڤاكرنا جڤاكی یه‌ و ستونا راگرتن و په‌روه‌رده‌بونا تاكێ جڤاكیه‌).

ماریانا د درێژاهیا ئاخفتنێن خوه‌دا دیار كر ژی كو ئه‌و سالانه‌ ستافێ سه‌نته‌ری  ب رێیا خول و  سمینار و چالاكیێن جودا نوو دكه‌ن و گوت: (مه‌ره‌م ژ ڤان جوره‌ چالاكیان پێخه‌مه‌ت باشتر خزمه‌تكرنا خێزانێ یه‌، خزمه‌تگۆزاریا مه‌ یا راوێژكاریا خێزانی بۆ هه‌موو خه‌لكێ پارێزگه‌ها دهۆكێ و ل گه‌ل هه‌موو كه‌مپێن ئاواره‌ و په‌نابه‌ران ژی یه‌).

به‌رپرسا سه‌نته‌رێ راوێژكاریا خێزانی ئه‌و چه‌نده‌ ژی گۆت: (دیسان ژ روویێ دروونیڤه‌ ژلایێ تایبه‌تمه‌ندێن مه‌ چاره‌سه‌ریێن هه‌ره‌ باش بۆ وان كه‌سان دهێنه‌ كرن یێن كو دهێنه‌ سه‌نته‌ری و ئه‌م پێشوازیا خه‌لكی و قوتابیان و  گروپ و هه‌موو وان كه‌سان ژی دكه‌ین یێن كو ب هه‌ر رێیه‌كا هه‌بیت رولێ خوه‌ د ئارامی و ئاشته‌وای و باشتركرنا خێزانێ بگێریت).

ماریانێ‌ گۆتژی: (سه‌نته‌رێ مه‌ راوێژكاریێ دده‌ته‌ وان كه‌سان یێن كو پێدڤی ب راوێژكاریێ و به‌ری بچیت بو توماركرنا سكالایێ و مه‌ ژۆره‌كا تایبه‌ت بۆ زارویان هه‌یه‌ و چه‌ندین یاریێن جودا تێدا هه‌نه‌ و تێدا زارۆ دهێنه‌ مژوولكرن داكو ل سه‌نته‌ری تێكه‌لی ئاریشێن خێزانا خوه‌ نه‌بن، دیسان په‌رتوكخانه‌كا پری په‌رتوك ژی ل سه‌نته‌ری هه‌یه‌ داكو ئه‌و كه‌سێن سه‌ره‌دانا مه‌ دكه‌ن مفای ژێ وه‌ربگرن، رۆژانه‌ بۆ ده‌ما 24 ده‌مژمێرا ب رێیا هێلا گه‌رم به‌رسڤێن وه‌لاتیان دهێنه‌ دان و راوێژا دده‌نه‌ خه‌لكی كو بشێن ب شێوه‌ییه‌كێ باشتر و بێ ئاریشه‌ دناڤ خێزانێن خوه‌دن بژین).

سێمێل، دلڤین ره‌شید:

شاره‌زایه‌كا ده‌روونی بو روژناما ئه‌ڤرۆ دیار كر كو، باوه‌ری ب خوه‌ بون دهێته‌ هژمارتن  ئێك ژ خالێن گرنگ د ژیانێ‌ دا ، ئه‌ڤ سیفه‌ته‌ هه‌ر ژ زارۆكینی لده‌ف مرۆڤێ‌ په‌یدا دبیت و گۆت: د زانستێ‌ ده‌رونی دا یاسایه‌ك هه‌یه‌ ژ بۆ هندێ‌ كو مرۆڤی باوه‌ری بخوه‌ هه‌بیت دبێژنێ‌ یاسایا  ته‌ركیزێ‌.

ئیمان سه‌گڤان ئه‌و شاره‌زایا ده‌روونیه‌ دیار كر، باوه‌ری ب خوه‌ بون دهێته‌ هژمارتن  ئێك ژ خالێن گرنگ د ژیانێ‌ دا ، ئه‌ڤ سیفه‌ته‌ هه‌ر ژ زارۆكینی لده‌ف مرۆڤێ‌ په‌یدا دبیت و ژ كه‌سه‌كی بۆ كه‌سه‌ك دی جودایه‌ و دمینته‌ ل سه‌ر هه‌ست و هزرێن مرۆڤی.

شاره‌زایا ده‌روونی گوت: (د جڤاكی دا گه‌له‌ك ئه‌گه‌ر هه‌نه‌ كو تاكی باوه‌ری ب خوه‌ نه‌بیت، ئێك ژ ئه‌گه‌ران چاڤلێكرنا خه‌له‌ته‌ و ب رێكا چاڤلێكرنێ‌ باوه‌ریا مرۆڤی كێم دبیت، چونكی هه‌ر مرۆڤه‌كی سیفه‌ت و كه‌ساتیا خوه‌ یا تایبه‌ت هه‌یه‌).

ئیمانێ‌ زێده‌تر گۆت: (به‌لێ‌ قوناغا گرنگ ژ ژیانا مرۆڤی ده‌مێ‌ زارۆكینیێ‌ یه‌، ئه‌ڤ قوناغه‌ گه‌له‌ك یا گرنگه‌ ژ بۆ ئاڤا كرنا كه‌ساتیا تاكی، چونكی هنده‌ك جاران  ژلایێ‌ خێزانێ‌ و قوتابخانێ‌ و جڤاكی ڤه‌ هنده‌ك ئاخفتنێن نه‌ جوان دهێنه‌ ئاراسته‌كرن ژ بۆ زاروكی و ڤێ‌ چه‌ندێ‌ ژی كارتێكرنه‌كا خراب ل سه‌ر كه‌ساتیا زارۆكی هه‌یه‌ كو ئاستێ‌ باوه‌ری بخوه‌ بونێ‌ ل نك كێم بیبت و باوه‌ری بخوه‌ نه‌بون دبیته‌ ئه‌گه‌ر كو مرۆڤ ببیته‌ خودان  كه‌ساتیه‌كا لاواز).

ئیمان سه‌گڤان شاره‌زایا ده‌روونی ئه‌و چه‌نده‌ ژی دیار كر داكو مه‌ باوه‌ری ب خوه‌ هه‌بیت دڤێت هه‌ر ژ ده‌ستپێكی سه‌ره‌ده‌ریه‌كا باش ل گه‌ل خوه‌ و نه‌فسا خوه‌ بكه‌ین،  ب تایبه‌ت ژی ده‌مێ‌ مرۆڤ گرنگیێ‌ ب خوه‌ و هه‌ست و  سه‌روبه‌رێ‌ خوه‌ یێ‌ ناڤخویی و ده‌ره‌كی بده‌ت و حه‌ژ خوه‌ بكه‌ت و هزرێن خوه‌ گه‌شبین بكه‌ت و گۆت: (ئه‌ڤه‌ هه‌موو وه‌دكه‌ن كۆ مرۆڤ كه‌سه‌ك بیت باوه‌ری بخوه‌ هه‌بیت و خودان كه‌ساتیه‌كا بهێز  بیت، ئه‌ڤ چه‌نده‌ هاریكاریا مرۆڤی  دكه‌ت داهێنانێ‌ د كارێ‌ خوه‌ دا بكه‌ت و یێ‌ سه‌ركه‌فتی بیت د ژیانا خوه‌ یا رۆ ژانه‌دا).

ئیمانێ‌ به‌رده‌وامی ب ئاخفتنێن خوه‌ دا و دیار كر كو د زانستێ‌ ده‌رونی دا یاسایه‌ك هه‌یه‌ ژ بۆ هندێ‌ كو مرۆڤی باوه‌ری بخوه‌ هه‌بیت دبێژنێ‌ یاسایا  ته‌ركیزێ‌ و گۆت: (ده‌مێ‌ مرۆڤ ته‌ركیزێ‌ ددانیته‌ سه‌ر كه‌ساتیا خوه‌ یان رێكێن ب ساناهی بۆ ئارمانجا خوه‌ ببینیت، ئه‌و خالێن بهێز یێن د كه‌ساتیا مرۆڤی دا هه‌ین ب هێزتر بكه‌ت و یێن لاواز ژی كار ل سه‌ر بكه‌ت داكو ب هێز ببن و مرۆڤی باوه‌ری ب وان تشتان هه‌بیت یێن مرۆڤی هه‌ین د ژیانا خوه‌ دا).