ئه‌ڤرۆ، عه‌زیز هه‌ورامی:
وه‌زیرێ خواندنا بلند و ڤه‌كوِلینێن زانستی دبێژیت زانگۆیا هه‌ڵه‌بجه پێدڤی ب هاریكاریێن زێده‌تر هه‌یه، دیسان بۆ ڤه‌كرنا كولیژا نوشدارییان هه‌ڵه‌بجه مژوویلی ڤه‌كۆلینایه ولیژنێن تایبه‌ت بۆ هاتینه دانان، ب شێوه‌كێ گشتی مه‌سرور بارزانی سه‌رۆك وه‌زیرێن حوكمه‌تا هه‌رێما كوردستانێ پشته‌ڤان و هاریكارێ داخوازیێن قوتابیان بوویه.
ئارام محه‌مه‌د وه‌زیرێ خواندنا بلند و ڤه‌كولینێن زانستی بۆ رۆژناما ئه‌ڤرۆ راگه‌هاند، زانكۆیا هه‌ڵه‌بجه ماف ل سه‌ر مه هه‌موویان هه‌یه، هه‌ڵه‌بجه ناسناما نشتیمانیا مه كه‌لتۆره‌كێ ده‌وله‌مه‌ند هه‌یه، زانكۆیا هه‌ڵه‌بجه پێدڤی ب هاریكاریه‌كا زێده‌تره، هیڤیدارم حكومه‌تا هه‌رێما كوردستانێ ب چاڤه‌كه‌ێ تایبه‌ت ل زانكۆیا هه‌ڵبجه بنێریتن.
ئارام محه‌مه‌د وه‌زیری وه‌زتره‌تا ناڤبری گۆت: زانكۆیا هه‌ڵه‌بجه چاڤه‌رێ هاریكاریه‌كا زێده‌تره بۆ بهێته كرن، ئه‌م وه‌ك وه‌زاره‌تا خواندنا بلند و ڤه‌كۆلینێن زانستی ل گۆره‌ی وان شیانێن لبه‌رده‌ستێن مه هه‌ین مه خه‌مساری ل گه‌ل زانكۆیا هه‌ڵه‌بجه نه‌كریه، ده‌نگ و داخوازیێن زانكۆیا هه‌ڵه‌بجه مه گه‌هاندینه جڤاتا وه‌زیران، هه‌ڵه‌بجه یا هه‌ژیه زانكۆیه‌كا باش هه‌بیت، ژ ئالیێ كوالتی و خواندن و سه‌نته‌رێ ڤه‌كۆلینا و پشكێن ناڤخوه‌یی، زانگۆیا هه‌ڵه‌بجه پێدڤی ب لێنێرینه‌كا رژد هه‌یه.
وه‌زیرێ خواندنا بلند و ڤه‌كولینێن زانستی خوه‌یاكر، بۆ ڤه‌كرنا كولیژا نوشداری ل زانكۆیا هه‌ڵه‌بجه مژوویلی ڤه‌كۆلینایه، ولیژنێن تایبه‌ت بۆ هاتینه دانان ل گه‌ل چه‌ندین ناڤه‌ند وئالیێن جوداجودا مه ئه‌و بابه‌ت به‌حسكرینه، كو هنده‌ك پێدڤی هه‌نه دڤێت بۆ بهێنه ئاماده‌كرن، مه نه‌ڤێت بهێته ڤه‌كرن و پشتی ده‌مه‌كی تووشی شكه‌ستنێ ببیت، پێدڤی ب دروستكرنا نه‌خۆشخانه‌كا تایبه‌ت هه‌یه ل گه‌ل بهێته ڤه‌كرن زێده‌باری پشكێن ناڤخوه‌یی و تاڤیگه‌هێن تایبه‌تمه‌ند، ده‌مێ پشكا نوشداران ڤه‌دكه‌ین بۆ هندێ یه ره‌وشا ساخله‌میێ ل كوردستانێ باشتر بكه‌ین، مه نه‌ڤێت كاره‌كێ نیڤه‌رۆ وبێ مفا بكه‌ین.
ئارام محه‌مه‌د ل دووماهیێ دووپاتكر، بشێوه‌كێ گشتی به‌رێز مه‌سرور بارزانی سه‌رۆكێ حكومه‌تا هه‌رێما كوردستانێ پشته‌ڤانێ داخوازیێن قوتابیان بوویه، بۆ دابینكرنا هاریكاری و پێدڤیی و ده‌رمالێن دارای، بگشتی جڤاتا وه‌زیران كه‌س نه‌بوو ژ ئه‌ندامێن چڤاتا وه‌زیران دژی خزمه‌تكرنا قوتابیان بیت یان یێ نه‌راوی بیت، به‌رۆڤاژی وێ چه‌ندێ هه‌موو ب خه‌مخوری ڤی ب خزمه‌تكرنا كوڕ و كچێن وه‌لاتێ مه پشته‌ڤان و هاریكارن.
نيشاندان