پەرلەمانتارەکێ بەرێ یێ تورکیا دیار دکەت، دڤێت تورکیا هەسەدێ وەکو مەترسی بۆ خوە نەبینیت، نها ل تورکیا قوونا‌غەکا نوو دەستپێکریە و تورکیا دشێت هەسەدێ ژی وەکو هەڤپەیمانەکێ خوە ل سووریێ ببینیت و هەکە وەسا سەرەدەریێ بکەت چو ئاریشە ژی بۆ تورکیا دروست نابن.
محەمەد مەتینەر ئەندامێ بەرێ یێ پەرلەمانێ تورکیا سەر ب فراکسیۆنا ئاکپارتیێ دیار کر، پێدڤیە تورکیا سیاسەتا خوە ل هەمبەر هەسەدێ بگوهۆڕیت، مادەم تورکیا دڤێت پرسا کوردی چارەسەر بکەت و ل گەل ئۆجەلانی ژی هەڤدیتنێن باش هاتینە کرن، وی دەمی تورکیا دشێت نێرینا خوە ل هەمبەر هەسەدێ ژی بگوهۆڕیت، نابیت تورکیا وەکو دوژمن سەرەدەریێ ل گەل هەسەدێ بکەت، ئەو یەک د بەرژەوەندیا تورکیا دا نینە و گۆت: (بەری چەندین سالان ل تورکیا گەلەک کەسان دگۆت دڤێت نەهێلین چو هەرێمێن کوردی ل ئیراقێ ژی دروست ببن، پەیوەندیێن تورکیا و هەرێما کوردستانێ دەمەکێ ژی ئالۆز بوون، لێ نها هەرێما کوردستانێ پەیوەندیێن گەلەک باش ل گەل تورکیا هەنە و ئەو یەک د بەرژەوەندیا هەر دو ئالیان دایە، ئانکو تورکیا دشێت هەمان پەیوەندیان ل گەل هەسەدێ و کوردێن سووریێ ژی دروست بکەت).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، هەسەدە و کوردێن سووریێ چو دەمەکێ نەبووینە مەترسی بۆ تورکیا، چو ئاریشە ژی ژ بۆ تورکیا دروست نەکرینە، ئانکو پێدڤی ناکەت تورکیا ژی سەرەدەریەکا خراب ل گەل هەسەدێ بکەت، رەنگە دەستهەلاتا نها یا شامێ پشتی دەمەکێ نەمینیت و هێزەکا دی بهێتە سەر دەستهەلاتێ و دژبەریا تورکیا بکەت، وی دەمی دێ ل سووریێ گەلەک ئاریشە ژ بۆ تورکیا دروست بن، ژ بەر ڤێ یەکێ ژی گرنگە تورکیا هزرا هەر تشتەکێ بکەت و باشترە تورکیا پەیوەندیێن خوە ل گەل هەسەدێ باش بکەت و گۆت: (بەرپرسێن هەسەدێ و کوردێن سووریێ چەندین جاران دیار کرینە وان دڤێت پەیوەندیێن باش ل گەل تورکیا دروست بکەن، ئانکو ئەو ئامادەنە و تشتێ ئەز دزانم نها پەیوەندی ژی ل گەل تورکیا دروست کرینە، ئانکو پێدڤی ناکەت تورکیا سەرەدەریەکا توند ل گەل هەسەدێ و کوردێن سووریێ بکەت، ئەو یەک ژ بلی زیانێ چو مفایەکا خوە بۆ تورکیا نابیت).
پەرلەمانتارێ بەرێ یێ ئاکپارتیێ ئەو یەک ژی نەڤەشارت، هەکە تورکیا دژبەریا کوردێن سووریێ بکەت وی دەمی دێ گەلەک کەس ڤێ پرسیارێ کەن، هەکە تورکیا ل دژی مافێن کوردان ل سووریێ بیت پا دێ چاوا مافێن کوردێن خوە دەتێ، ژ بەر ڤێ یەکێ ژی گرنگە سەرۆک کۆمار ئەردۆغان ب سیاسەتەکا نوو پەیوەندیێن تورکیا و هەسەدێ ئاسایی بکەت و ئەو یەک دێ بیتە ئەگەرێ بهێزبوونا پێگەهێ تورکیا ل سووریێ.
