حەسەن حاجی نەعمان گەرماڤی ل سالا 1934ێ ل گوندێ گەرماڤا ل دەڤەرا دۆسكی یا ژ دایك بوویە، خواندنا خوە یا سەرەتایی ل خواندنگەها (دهۆك یا سەرەتایی) ب دووماهی ئینایە، ل سالا 1953ێ قووناغا ناڤنجی ل (سەناویا دهۆك یا تێكەل) ل ئاڤاهیێ ئامادەیا (كاوە) یا نوكە تەمامكریە، ل سالا 1956ێ ل (خانا مامۆستایان) ل پارێزگەها سلێمانیێ ب دووماهی ئینایە.
ل رێكەفتی 1/10/1959 بۆ جارا ئێكێ وەكو مامۆستا ل قوتابخانا (چەرمەگا) ل قەزا (دوكان) هاتە دامەزراندن، ل سالا 1964 ب فەرمانەكا حوكمەتا وی سەردەمی یا ئیراقێ هاتە دەستەسەركرن و زیندانكرن، پشتی چار سالێن نەخۆش و ئەشكەنجەدانەكا دژوار ل سالا 1968 هاتە ئازادكرن، د دووڤ دا بۆ گوندێ (دحێلە) ل پارێزگەها نەینەوا هاتە نەفیكرن، بۆ ماوێ سالەكێ ل وی گوندی دمینیت، ل 26/9/1962 ژ قوتابخانا (باختمە) بۆ قوتابخانا (دهۆك یا ئێكێ) دهێتە ڤەگوهاستن و دبیتە هاریكارێ رێڤەبەرێ قوتابخانێ، ل رێكەفتی 3/10/1974 دبیتە رێڤەبەرێ قوتابخانا (سەلاحەددین) و هەتا 18/10/1976 بەردەوام دبیت، د دووڤ دا دبیتە سەرپەرشتیارێ پەروەردەیی و 26 سالان د ڤی كەرتی دا خزمەتێ دكەت.
خودێ‌ ژێ‌ رازی د ماوێ خزمەتا پەروەردەیی دا ل ئەڤان قوتابخانان وەكو مامۆستا و رێڤەبەر كاركریە (چەرمەگا، بەرۆشكا سەعدونی، زێوكا عەبۆ، باختمە، دهۆك یا ئێكێ) چەندین سوپاسی و دەستخۆشی ژ بەرپرسێن پەروەردەیی و حوكمەتێ وەرگرتینە، پشتی 63 سالێن ژیێ خوە دهێتە خانەنشینكرن، خودێ‌ ژێ‌ رازی ل سەر لیستا پارتی دیموكراتی كوردستان بۆ ئەندامەتیا جڤاتا پارێزگەها دهۆكێ دهێتە هەلبژارتن و وەكو سەرۆكێ لژنا پەروەردە و فێركرنێ بۆ ماوێ (9) سالان خزمەتێ‌ دكەت.
خودێ‌ ژێ‌ رازی ل رۆژا 26/6/2026 چوویە بەر دلۆڤانیا خودێ

زنار، سندس و دلۆڤان:

حكومەتا هەرێما كوردستانێ ب رێیا دو ماستەرپلانێن مەزن، دو باژێڕێن گەشتیاری یێن نوو ل چیایێ زاوا و پشت بەنداڤا دهۆكێ دێ دروستكەت، كو دێ بنە ئەگەرێ پەیداكرنا ب هزاران دەلیڤەیێن كاری و د ماوێ سێ بۆ شەش سالان دا دێ هێنە بجهئینان.
د. هەڤال سدیق، رێڤەبەرێ گشتییێ وەبەرهێنانێ ل پارێزگەها دهۆكێ دیاركر، تێچوویێ ڤان هەردو پڕۆژەیان هێشتا ب تەمامی دیار نەبوویە، چونكی پڕۆژە د نوونە و ل سەر بنیاتێ ماستەرپلانەكا گشتگیر هاتینە دارشتن و ل سەر چەندین پشك و پێكهاتێن جودا د بەلاڤكرینە، ل دەمێ راگەهاندنا وی، هەر وەبەرهێنەرەك دشێت پشكەكێ ژ پڕۆژەی وەربگریت و بجهبینیت.
رێڤەبەرێ گشتییێ وەبەرهێنانا دهۆكێ ئاشكرا كر ژی، دەمێ وەبەرهێنەرەك پشكەكا پڕۆژەی وەردگریت، دەمەك بۆ دهێتە دیاركرن بۆ بجهئینانێ، دهێتە پێشبینیكرن د ماوێ سێ بۆ شەش سالان دا هەمی پشكێن ڤان پڕۆژەیان ب تەمامی بهێنە چێكرن و بكەڤنە د خزمەتێ دا.
د. هەڤال سدیق گۆت: «ژ لایێ حكومەتێ ڤە و ل سەر بودجەیا پارێزگەها دهۆكێ، ل دەستپێكێ كۆڕنیشەك ل پشت بەنداڤا دهۆكێ دێ هێتە چێكرن، پشتی بڕێڤەچوون و ب دووماهی هاتنا كۆڕنیشی، ل دووڤ ماستەرپلانێ دێ دەست ب راگەهاندنا پڕۆژەیێن وەبەرهێنانێ كەین، داكو وەبەرهێنەر بهێن و هەر ئێك ژ وان پشكەكا پڕۆژەی بجهبینیت».
گۆت ژی: «دو ماستەرپلان بۆ چیایێ زاوا و پشت بەنداڤا دهۆكێ هاتینە دانان، ئەڤ پڕۆژە ل نك حكومەتا هەرێما كوردستانێ و ب تایبەتی مەسرور بارزانی، سەرۆكوەزیران گەلەك د گرنگن، ئارمانجا وان پێشئێخستنا كەرتێ گەشتیاری، دیتنا ژێدەرێن نوو یێن داهاتی و راكێشانا گەشتیارێن بیانییە بۆ هەرێما كوردستانێ».

دهۆك، دلۆڤان ئاكرەیی:

ئێك ژ سەرپەرشتێن پڕۆژەیێ رێكخستنا شەهیانا ب كۆم ل دەڤەرا سێمێلێ دیاركر، ئەڤ پڕۆژە ب پشتەڤانی و سەرپەرشتیا ڕاستەوخۆ یا فەرماندە مەنسور بارزانی دهێتە ئەنجامدان و ئارمانج ژێ هاریكاریكرن و ئاسانكاریكرنە بۆ گەنجێن كێم دەرامەت، دا كو بشێن ژیانا هەڤژینیێ پێكبینن.
سەردار ئێك ژ سەرپەرشتێن ڤی پڕۆژەی و بەرپرسێ ناوچەیا دوبان یا پارتی بۆ رۆژنامەیا ئەڤرۆ گۆت: «د ئەڤ سالە دا نێزیكی 450 هەتا 500 كچ و كوڕان دێ مفادار بن، ناڤێ 150 كەسان ب ڕێیا پشككێشانێ‌ دێ هێتە دیاركرن و تایبەتمەندی بۆ مالباتێن شەهیدان هاتیە دیاركرن و بێ پشككێشان و ئێكسەر ناڤێن وان دێ چنە د قووناغا شەهیانێ دا، دیسا پشككێشانەكا جودا و تایبەت بۆ برایێن مە یێن ئێزدی و مەسیحی هاتبوو ڕێكخستن، دا كو مافێ‌ كەسێ بەرزە نەبیت، 11 كەس بوون، پشككێشان بۆ هاتە كرن، ناڤێ‌ چار كەسان بۆ ئێزدیان و دو كەسان بۆ مەسیحیان دەركەفتن».
گۆت ژی: «سالێن بۆری، ژبەر كو ڕێژەیا پشكداران یا كێم بوو، پشككێشان نەبوو، بەلێ ئەڤ سالە ژ بەر زێدەبوونا هەژمارا وان، پشككێشان بۆ هاتە كرن، ڤی پڕۆژەی چو پەیوەندی ب حزبایەتیێ‌ و ئایین و پێكهاتان ڤە نینە و دەرگەهـ بۆ هەمی كەسان یێ‌ ڤەكریە».

ئامێدیێ، مەحمود نهێلی:

ژ بۆ پتر گرنگیدان ب كەرتێ گەشتوگوزاری و خزمەتكرنا وەلاتیان و جوانكرنا سیمایێ باژێڕان، پاركەكا گشتی ل سەنتەرێ ناوچەدارییا دێرەلۆكێ‌ دهێتە چێكرن.
ئەندازیار عەبدولمەناف رەشید، سەرۆكێ باژێرڤانیا دێرەلۆكێ‌ بۆ رۆژناما ئەڤرۆ دیار كر، پڕۆژەیێ چێكرنا پاركەكێ ل سەنتەرێ ناوچەدارییا دێرەلۆكێ‌ نوكە د قووناغا بجهئینانێ‌ دایە و گۆت: «ئەڤ پاركە ل سەر رووبەرێ 10 هزار مەترێن دوجار و ب گوژمێ 310 ملیۆن دیناران دهێتە چێكرن».
ناڤهاتی گۆت ژی: «ئەم د بزاڤان داینە د دەمەكێ نێزیك دا دەست ب چێكرن و تمامكرنا پاركێ‌ بهێتە كرن و بكەڤیتە د خزمەتا خەلكێ دەڤەرێ دا، ب چێكرنا ڤی پڕۆژەی دێ سیما و روویەكێ جوان و یێ گەشتیاری دەتە باژێڕكێ دێرەلۆكێ».

رەمەزان زەكەریا:

د چارچۆڤەیێ بەردەوامیا كاروانێ ئاڤەدانی و خزمەتگوزاریێ یێ كابینەیا نەهێ یا حكومەتا هەرێما كوردستانێ دا، ب مەرەما چارەسەركرنا ئاریشەیا كێمبوونا ئاڤێ. دەست ب پڕۆژەیێ كۆلانا دو بیرێن نوو یێن ئاڤێ ل پڕۆژەیێ ئاڤا گردەسێن ل دەڤەرداریا ئاكرێ هاتە كرن.
ژ بەر نزمبوونا ئاستێ ئاڤا بن ئەرد د دەمێ بۆری دا، بەرهەمێ ئاڤێ ل پڕۆژەیێ ناڤبری كێم ببوو، وەلاتی ڕووبڕووی كێم ئاڤیێ‌ ببوون، ب تەمامبوونا هەردو بیران دێ ئاستێ بەرهەمئینانا ئاڤێ د پڕۆژەی دا ب ڕێژەیەكا بەرچاڤ زێدە بیت، دیسا گورانكاریەكا مەزن د بەلاڤكرنا ئاڤێ دا دێ‌ پەیدا بیت و ئاڤ دێ ب شێوازەكێ گەلەك باشتر و بێ كێماسی گەهیتە وەلاتیان.

زاخۆ، دلۆڤان هالۆ:

زانكۆیا پۆلیتەكنیكی یا دهۆك ب هەڤكاری ل گەل حەفت زانكۆیێن هەڤپشك یێن ناڤخوەیی و نێڤدەولەتی، كۆنفرانسێ دووێ یێ نێڤدەولەتی یێ ژیریا چێكری بۆ بەردەوامیێ د جیهانا پێشكەفتی دا دێ ئەنجامدەت.
زانكۆیێن هەڤپشك د ڤی كۆنفڕانسی دا ژ زانكۆیا ڕاپەڕین وەكو مێهڤاندارا سەرەكی و زانكۆیا پۆلیتەكنیكی یا دهۆك و زانكۆیا ئاكرێ بۆ زانستێن كرداری، زانكۆیا پۆلیتەكنیكی یا گەرمیان و زانكۆیا هەولێر یا نێڤدەولەتی و زانكۆیا سۆران، زانكۆیا لۆبنانی یا فڕەنسی و زانكۆیا تۆن ئۆن حسێن یا مالیزی پێك دهێن.
دهێتە چاڤەڕێكرن، ئەڤ كۆنفڕانسە ل 3 و4ی مەها تشرینا دووێ یا ئەڤ سالە ل زانكۆیا ڕاپەڕین ل باژێڕێ ڕانیە بهێتە ئەنجامدان، لەورا لیژنەیا زانستی یا كۆنفرانسی داخوازێ ژ مامۆستا و ڤەكۆلەر و قوتابیێن خواندنا بلند دكەت، ڤەكۆلینێن خوە یێن ڕەسەن د بیاڤێ ژیریا چێكری دا بۆ بەردەوامیێ د جیهانا پێشكەفتی دا پێشكێش بكەن.