زاخۆ، دلۆڤان هالۆ:

ژێدەرەكێ تایبەت بۆ ڕۆژناما ئەڤرۆ دیاركر كو ل دووڤ پلانا فەرمی یا پەسەندكری ژ لایەنێن پەیوەندیدارێن حكومی، بڕیار هاتیەدان؛ د ماوێ دو مەهێن بهێن دا 15 هزار پارچەیێن ئەردی ل سنۆرێ ئیدارەیا سەربخوە یا زاخۆ بهێنە بەلاڤكرن.
وی ژێدەری ئاماژە ب وێ چەندێ ژی كر كو هەر ژ بۆ ڤێ مەرەمێ چار جهێن ژێكجودا ل ئیدارەیا سەربخوە یا زاخۆ هاتینە دەستنیشانكرن بۆ بەلاڤكرنا ڤان پارچەیێن ئەردی، ب شێوەیێ پشككێشان ل سەر 15 هزار فەرمانبەر و پێشمەرگە و خانەنشینان دێ‌ هێنە بەلاڤكرن.
وی ژێدەری گۆت:»پێشبینی دهێتە كرن، بەلاڤكرنا ڤان پارچەیێن ئەردی كاریگەریەكا مەزن ل بهایێ پارچەیێن ئەردی بكەت د بازاڕێ كرین و فرۆتنا ئەردی دا، زێدەباری ڤێ چەندێ ئەگەرەكێ باشە ژ بۆ گەشەپێدانا ئابووری ل دەڤەرێ».

دهۆك، دلۆڤان ئاكرەیی:

راوێژكارێ یاسایی ل وەزارەتا ناڤخۆیا هەرێما كوردستانێ دیاركر، حوكمەتا ئیراقێ ئاریشەكا دی بۆ هەرێما كوردستانێ دروستكریە و رێ نادەت ل بازگەهان چو ترومبێلێن هەژمارە كاتی یێن كوردستانێ دەربازی پارێزگەهێن ئیراقێ ببن و گۆمركا وان وەردگریت و دبێژیت: ئەڤ بڕیارە دێ بازاڕێ ترومبێلان ل كوردستانێ خاڤ كەت.
د. سامی جەلال، راوێژكارێ یاسایی ل وەزارەتا ناڤخۆیا هەرێما كوردستانێ بۆ رۆژنامەیا ئەڤرۆ گۆت: «حەفتیەكە سیستەمێ (ئەسیكۆدا) ل بازگەهێن ئیراقێ دهێتە بجهئینان، پێناسا گۆمركی ل هەرێمێ و ئیراقێ ژ ئێك جودایە و چ رێككەفتن ل سەر نەهاتینە كرن، لەورا ئەو ترومبێلێن هەژمارە كاتی یێن هەرێمێ ئەگەر بچنە پارێزگەهێن دی یێن ئیراقێ دێ جوداهیا پارەیێ گۆمركی ژێ هێتە وەرگرتن».
گۆتژی: «هەر ترومبێلەكا هەژمارە كاتی یا هەرێما كوردستانێ بەرەڤ پارێزگەهێن ئیراقێ بچیت ل بازگەهێن حوكمەتا فیدرالی دهێتە دەستەسەركرن، پاشی دڤێت خودانێ ترومبێلێ بچیت ل گۆمركا ئیراقێ جوداهیا پارەیێ گۆمركی بدەت، هەتا ترۆمبێلا وی بدەنەڤە، چونكی پارەیێ گۆمركا ترۆمبێلان ل هەرێما كوردستانێ ژ ئیراقێ‌ كێمترە، هەر ترومبێلەكا نوو ئەوا دهێتە ئینان، ئەگەر ب رێكا هەرێمێ بیت گۆمركەكا كێمتر دكەڤیتە سەر».

رەمەزان زەكەریا:

ل سنۆرێ دەڤەرداریا ئاكرێ هەژمارەكا كەسێن نەنیاس ب مەبەستا ب دەستڤەئیننا پارچە شوونوارێن گرانبها گۆڕستانەك كۆلایە و گۆڕ تێكداینە.
هیوا شەمال، رێڤەبەرێ شوونوار و كەلەپوورێن ئاكرێ بۆ ئەڤرۆ گۆت: «ل گوندێ خرابە ژووری ل ئاكرێ هندەك كەسێن نەنیاس گۆڕستانەكا كەڤن كۆلایە و دەست ب ڤەكۆلینێ بۆ ئاشكراكرن و دەستەسەركرنا وان كەسان هاتیە كرن».
ناڤبری گۆتژی: «ل ئاكرێ هندەك كەس ژ بەر تێكدانا شوونواران هاتینە گرتن و سزایێ وان كەسێن شوونواران تێك ددەن، گەلەك یێ‌ گرانە و بۆ دەمێ 10 سالان دێ هێنە زێندانیكرن و پێرابوونێن توند ل گەل كەسێن تێكدەر دێ هێنە كرن».
ناڤهاتی خویاژی كر، ب هاریكاریا جهێن پەیوەندیدار دووڤچوونا وان كەسان دهێتە كرن، یێن شوونواران دكۆلن بۆ هەر مەرەمەكا هەبیت و نابیت كەس شوونواران بكۆلیت، ژ بەركو تاوانە.

ئامێدیێ، مەحمود نهێلی:

ژ ئەنجامێ هەلكرنا ئاگرێ مەقلێ و نەمانا ئوكسجینێ ل بن خیڤەتا وانا سێ كەسان ل گوندێ باوەركێ یێ سەر ب ناوچەدارییا سەرسنكێ ڤە گیانێ خوە ژ دەست دا و كەسەك ژی بریندار بوویە.
مەسعود تاهر، هاریكارێ رێڤەبەرێ ساخلەمیا دەڤەردارییا ئامێدیێ بۆ رۆژناما ئەڤرۆ دیار كر، ئەو كەسێن ل گوندێ باوەركێ ل سنۆرێ ناوچەدارییا سەرسنكێ گیانێ خوە ژ دەست دای هەموو ژ ئێك خێزانن و ژ ئەنجامێ گازا ژ پەلێن مەقلێ بلند دبیت خەندقینە و گۆت: «ئەڤ خێزانە خەلكێ رەبیعەنە و كارێ شڤانیێ دكر، مەقلا پەلا بریە دبن خیڤەتێ ڤە و بوویە ئەگەرێ نەمانا ئوكسجینێ و بابێ وان بناڤێ سوگەر حسێن حەمید ژ دایكبوویێ سالا 2001ێ گیانێ خوە ژ دەست دایە و دو زارۆیێن وی ژی بناڤێ تەمانی و شەهد یێن ئێك سالی و دو سالی گیانێ خوە ژ دەست دایە، هەروەسا هەڤژینا وی بناڤێ نەوا‌و تركی حەمید تووشی نەمانا ئوكسجینێ بوویە و هاتیە ڤەگوهاستن بۆ نەخۆشخانا هەوارهاتنا دهۆكێ و رەوشا وێ باش نینە».

دهوك، لەزگین جۆقی:

رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ راگەهاند، نوكە حكومەتا ئیراقێ هەمی جۆرێن هاریكارییان بۆ ئاوارەیێن د ناڤ كەمپان دا ڕاگرتینە و دبێژیت: پێدڤیە حكومەتا ئیراقێ هەڤكارییا ئاوارەیان بكەت.
پیر دەیان، رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ بۆ رۆژناما ئەڤرۆ دیار كر، نوكە ب تنێ حكومەتا هەرێما كوردستانێ د هەمی سێكتەران دا هەڤكاری و پشتەڤانیا ئاوارەیێن د ناڤ كەمپان و دەرڤەی كەمپان دا دكەت و برێڤە دبەت، ب تایبەت سێكتەرێ پەروەردێ و ساخلەمی و ئاڤ و كەهرەب و باژێرڤانیێ، د ڤان سێكتەران دا هەڤكاریێ دكەت، ئەڤە ژی د دەمەكی دایە، كو ئەڤە ئەركێ حكومەتا ئیراقێ یە، لێ ناكەت.