ب ئامادەبوونا ماجد سەید سالح، جێگرێ پارێزگارێ دهۆكێ و ئیسماعیل محەمەد، دەڤەردارێ دهۆكێ و خانم رەوشەن ئەترووشی، ڕێڤەبەرا رێكخراوا VNG یا هۆلەندی ل ئیراقێ و ڕێڤەبەرێن ڕێڤەبەریێن بەنداڤا دهۆكێ‌ و ئاڤا دهۆكێ‌ و ئاڤدێریێ و ئاڤا ژێر ئەرد، دوهی 19/2/2025 ل هۆلا سەنتەرێ ڕەوشەنبیری و جڤاكی یێ زانكۆیا دهۆك كۆمبوونەك ل دۆر ئاڤا ڤەخوارنێ و ئاریشە و گرفت و چارەسەریان هاتە ئەنجامدان.
د كۆمبوونێ‌ دا بەحسێ مەترسیێن كێمیا بارانان و هشكەسالیێ و ئەگەرێن پەیدابوونا ئاریشەیێن ئاڤێ و چاوانیا سەرەدەریا د گەل دا و ڕۆل و ئەركێ دام و دەزگەهێن پەیوەندیدار و مفاوەرگرتن ژ جۆرێن ئاڤێ و هشیاریا وەلاتیان و هەڤكاریا رێكخراوا ناڤبری ل گەل لایەنێن پەیوەندیدار هاتە كرن، هەروەسا ڕولێ زانكۆیێ د ڤەكۆلینەكێ‌ دا ل دۆر چاوانیا كێمكرنا ب هەدەردانا ئاڤێ هاتە كرن.

د. سالار عوسمان، ئەندامێ كۆمیتەیا ناڤەندی و بەرپرسێ پشكا ڕەوشەنبیری و ڕاگەهاندنا پارتی، دوهی 19/2/2025 پێشوازی ل مالباتا نڤیسەر و هۆزانڤان و چیرۆكنڤیس و كارمەندێ دەزگەهێ‌ چاپ و بەلاڤكرنێ‌ یێ‌ موكریان، خودێ‌ ژێ‌ رازی (حەسەن جاف) كر.
بەرپرسی پشكا ڕەوشەنبیری و ڕاگەهاندنا پارتی د دیدارەكێ‌ دا، بەرهەم و كار و هەلوەستێن (حەسەن جاف)ی بلند هەلسەنگاند و پشتەڤانیا پشكا رەوشەنبیری و راگەهاندنا پارتی بۆ پاراستنا مێژوو و بەرهەمێن خودێ‌ ژێ‌ رازی دوپاتكر.
مالباتا (حەسەن جاف) سوپاسیا پشكا رەوشەنبیری و راگەهاندنا پارتی دیموكراتی كوردستان كر، ل بەرانبەر هندێ‌، كو د دەمێ‌ نەخۆشی و ڕێورەسمێن ڤەشارتنێ‌ دا رۆلەكێ‌ مەزن دیت.

دهوك، لەزگین جوقی:

رێڤەبەرێ نەخۆشخانا هیڤی یا زارۆكان ل پارێزگەها دهۆكێ بۆ رۆژناما ئەڤرۆ دیار كر، ڤایرۆسەك د ناڤ زارۆكان دا پەیدابوویە، زارۆكێن د بن ژییێ دو سالیێ‌ دا و زارۆكێن ساڤا د بن ژییێ شەش مەهیێ‌ دا گەلەك تووش بووینە.
د. نزار بەكر، ڕێڤەبەرێ نەخۆشخانا هیڤی یا زارۆكان ل پارێزگەها دهۆكێ ئاشكرا كر، ب تنێ د ڤێ مەهەكێ‌ دا هەتا هەشت هزار زارۆكان سەرەدانا نەخۆشخانا هیڤی یا زارۆكان كریە و گۆت: «رۆژانە 60 هەتا 70 زارۆكان ل نەخۆشخانا هیڤی یا زارۆكان دهێنە نڤاندن، د ڤی دەمێ سالێ دا ڤایرۆسەك پەیدا دبیت، گەلەك زارۆك تووش دبن و د ناڤ زارۆكان دا بەلاڤ دبیت».
گۆتژی: «ل سەر دەیك و بابان پێدڤیە چاڤدێریا زارۆكێن خۆ بكەن و شیرێ خۆ ب دەنە زارۆكێن خۆ و زارۆكێن خۆ یێن ساڤا یێن د بن ژییێ شەش مەهیێ‌ دا ب پارێزن».

هەولێر، قائید میرۆ:

بڕیارە ئەڤرۆ دەست ب پرۆسا بەلاڤكرنا ئاهێن خوارنێ بهێتە كرن و رێڤەبەرێ گشتیێ بازرگانی ژی ئاشكرا كر، چار كەرەستە بۆ مەها رەمەزانێ هاتینە زێدەكرن، بەلێ هێشتا بڕیارا بەلاڤكرنا كەرەستەیێن زێدە نەهاتیەدان.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ دیار كر، بڕیارە ئەڤرۆ رۆژا پێنج شەمبیێ دەست ب بەلاڤكرنا پشكا ئاهێن خوارنێ یا مەها ئێك بهێتە كرن، بۆ ڤێ مەرەمێ ژی بریكارێن ئاهێن خوارنێ هاتینە ئاگەهداركرن و گۆت: «ب هەمان كەرەستەیێن مەهێن بۆری ئاهێن خوارنێ‌ یێن مەها ئێك دێ هێتە بەلاڤكرن، بەلێ هێشتا چو بڕیار بۆ بەلاڤكرنا ئاهێن خوارنێ‌ یێن زێدە ب هەلكەفتا هاتنا مەها رەمەزانێ نەگەهشتینە بەردەستێ مە».
نەوزاد شێخ كامل گۆتژی: «بڕیارە چار كەرەستە ل پشكا ئاهێن خوارنێ بۆ مەها رەمەزانێ ل سەر وەلاتیان بهێنە بەلاڤكرن، چونكی هەر سال ل مەها رەمەزانێ هژمارا كەرەستەیێن خوارنێ بۆ وەلاتیان دهێنە زێدەكرن، ئەڤە ژی وەكی هاریكاری بۆ وەلاتیان د مەها رەمەزانێ دا.

هیلین سالم:

ل گەل نێزیكبوونا مەها رەمەزا پیرۆز خواستەكا زۆر ل سەر بازاری هەیە، ب تایبەت ژی د مەها رەمەزانێ دا و خەلك گازندا دكەن و دبێژن بهایێ كەلوپەلان ل مەها رەمازانێ گران دبیت.
مللەت زكری، سەرۆكێ لژنا دووڤچوونا بازاری ل دەڤەرداریا دهۆكێ ل دۆر بابەتی بۆ رۆژناما ئەڤرۆ گۆت: «وەكی هەرسال مە چاڤدێریەكا باش ل سەر بازاری هەیە، ب تایبەتی ل رۆژێن دەستپێكا رەمەزانێ چاڤدێریا شریناهیان یا توندە و هەتا كەلوپەلێن جەژنێ مە ئاگەهداری ل سەر بهایێن كەلوپەلان هەیە و هەر كەسێ كەلوپەلێن خۆ گران بكەت، پێرابوون ل گەل دێ هێنە كرن».
گۆتژی: «دەڤەرداریا دهۆكێ ب هەماهنگی ل گەل باژێرڤانیێ دێ چاڤدێریا بازارێن تاخان ژی كەن و هەر كەسێ زێدەگاڤیێ بكەت و ببیتە جهێ نەخوشیا بۆ هاتنوچوونا وەلاتیان، پێرابوون ل گەل دێ هێنە كرن».

ئاكرێ‌، رەمەزان زەكەریا:

ل سەنتەرێ دەڤەرداریا ئاكرێ مەزنترین پڕۆژەیێ گەشتیاری ب ناڤێ‌ (بلنداهیا ئاكرێ) ل سەر رووبەرێ 446 دۆنەمێن ئەردی دهێتە دروستكرن.
ئەمین سەلیم، رێڤەبەرێ گەشتوگوزارا ئاكرێ بۆ ئەڤرۆ گۆت: «ب گوژمێ 150 ملیۆن دیناران ل سەر رووبەرێ 446 دۆنەمێن ئەردی مەزنترین پڕۆژەیێ گەشتیاری ل سەر ئاستێ ئیراقێ، ل سەنتەرێ دەڤەرداریا ئاكرێ دێ هێتە دروستكرن، دەمێ پڕۆژەی ژی حەفت سالن».
ناڤبری گۆتژی: «ب تەمامبوونا پڕۆژەی گەشتیارێن زێدەتر دێ سەرەدانا ئاكرێ كەن، سالانە ب تنێ د جەژنا نەورۆزێ دا پتری 100 هزار گەشتیاران سەرەدانا ئاكرێ دكەن».
خویا ژی كر، ب دووماهی هاتنا پڕۆژەی دێ بزاڤەكا خورت یا گەشتیاری ل باژێری دروست بیت و گۆت: «مە پێدڤی ب ڤان جۆرە پڕۆژەیان هەیە، چونكی دێ گەشتیار ل ئاكرێ‌ مینن، پڕۆژە ژ پێنج پشكان پێكهاتیە، شكا هۆتێل و مۆتێلان، ل گەل 100 خوارنگەهـ و كۆشكان و پشكا یەكەیا بازرگانی و هۆلێن هەلكەفتان ل گەل تلفریكەكێ».