رەمەزان زەكەریا:

لقێ بەردەڕەشێ‌ یێ ئێكەتیا قوتابی و لاوێن دیموكراتا كوردستانێ د چارچۆڤێ پڕۆژەیێن خۆ یێن خزمەتگوزاری دا، دەست ب بەلاڤكرنا سەلكێن ئازۆقەی ل سەر قوتابیێن پشكێن ناڤخۆیی یێن بەردەڕەشێ‌ كر.
هارون عەبدوللا، بەرپرسێ لقێ بەردەڕەشێ‌ یێ ئێكەتیا قوتابی و لاوێن دیموكراتا كوردستانێ بۆ ئەڤرۆ گۆت: «وەكو ئەركەك ل سەر ملێن مە و بۆ خزمەتكرنا قوتابی و لاوان ل دەڤەرا بەردەڕەشێ‌، مە سەلكێن ئازۆقەی پێشكێشی قوتابیێن پشكێن ناڤخۆیی كرن».
گۆت ژی: «ئەڤ پێنگاڤە د چارچۆڤێ كار و چالاكیێن بەردەوام یێن ڕێكخراوا مە دایە، داكو بشێین ب كێمترین ئاست هەڤكار بین د دابینكرنا پێدڤیێن ژیانا قوتابیان دان ب تایبەت ئەوێن دووری خێزانێن خۆ ل پشكێن ناڤخۆیی دژین».

دهۆك، دلۆڤان ئاكرەیی:

بەرپرسێ پشكنینا كار ل رێڤەبەریا گشتی یا كار و دەستبەریا جڤاكی دیاركر، بەری كابینەیا نەهێ یا حكومەتا هەرێما كوردستانێ كێمتر ژ 80 هزار كرێكاران د دەستبەریا جڤاكی دا تۆماركری بوون، بەلێ ل گەل دەست ب كاربوونا كابینەیا نەهێ و هەتا نوكە 305 هزار كرێكار هاتینە دەستەبەركرن.
ئەردەلان گەزنەیی، بەرپرسێ پشكنینا كار ل رێڤەبەریا گشتی یا كار و دەستبەریا جڤاكی بۆ رۆژنامەیا ئەڤرۆ گۆت: «كابینەیا نەهێ ب سەرۆكاتیا مەسرور بارزانی د بزاڤێن خۆ دا بۆ دابینكرنا مافێن كرێكاران گەلەك سەركەفتی بوویە، لایەنێن پەیوەندیدارێن حكومەتێ ژی ئاسانكاریێن مەزن د وی بیاڤی دا كرینە و بەردەوام دووڤچوونا كێشە و گرفتێن وان دكەن».
گۆت ژی: «ژ بەر شەڕێ 40 رۆژی یێ د ناڤبەرا ئیران و ئەمریكا دا، پشكەك ژ كۆمپانیان دخواستن كرێكارێن خۆ فرێكەنە مال، بەلێ مە رێگری لێ كر و مە دووپاتی ل سەر وێ چەندێ كر كو ئەڤ رەوشە یا دەمكییە و هەر رەوشەكا ئەمنی یان سیاسی ل رۆژهەلاتا ناڤین پەیدا ببیت، كارتێكرنا راستەراست ل سەر رەوشا كرێكاران هەیە، دەما بڕیارا مەسرور بارزانی، سەرۆك وەزیرێن هەرێما كوردستانێ بۆ دیاركرنا مووچەیێ مەهانە یێ كرێكاران دهێتە بجهئینان (مووچێ كرێكاری ژ 450 هزار دیناران كێمتر نەبیت)، ئەڤە پێنگاڤەكا باشە و كرێكار كێمتر دكەڤنە بن كارتێكرنا گوهۆڕینێن ئەمنی و سیاسی دا»

دووڤچوون: قائید میرۆ

پەیڤدارێ وەزارەتا چاندنێ ئاشكراكر، ئەڤ سالە ل سەرانسەری هەرێما كوردستانێ سێ ملیۆن و 1300 دۆنەمێن ئەردی ب گەنمی هاتینە چاندن و نێزیكی 50 هزار جوتیاران ژ چاندنا گەنمی مفاداربووینە و گۆت: سەرەڕای سەرەدانێن وەزیرا چاندنێ و ژێدەرێن ئاڤێ و لیژنا بلندا حوكمەتا هەرێما كوردستانێ، هێشتا وەك پێدڤی ماف و شایستەیێن جوتیارین هەرێمێ ناهێنە دان.

هیوا عەلی، پەیڤدارێ وەزارەتا چاندنێ بۆ رۆژناما ئەڤرۆ دیار كر «ل سەرانسەری هەرێما كوردستانێ ئەڤ سالە سێ ملیۆن و300 هزار دۆنەمێن ئەردی ب بەرهەمێ گەنمی هاتینە چاندن، هەروەسا ئەڤ سالە رێژەیەكا زۆر یا بارانێ باریە و ل هندەك دەڤەران پێنج هندی سالا بۆری باران هاتیە و ل هندەك دەڤەران زێدەتری ئێك هزار ملیمێن بارانێ هاتینە، ئەڤەژی رێژەیەكا زۆر باشە بۆ بەرهەمێ چاندنێ.
زێدەتر گۆت: ئەم پێشبینی دكەین هەتا 50 هزار جوتیاران بەرهەمێ گەنمی ل هەرێما كوردستانێ چاندبیت، لەوڕا ژی پێشبینی دكەین بۆ ئەڤ سالە بەرهەمێ گەنمێ هەریما كوردستانێ بگەهیتە دو ملیۆن و 500 هزار تەنان، مخابن پێدڤی بوو نیڤا ئەڤی بەرهەمی ژلایێ حوكمەتا بەغداڤە بهێتە وەرگرتن.
ل سالا بۆری ب تنێ 400 هزار تەنێن گەنمێ هەرێمێ ژلایێ ئیراقێ ڤە هاتنە وەرگرتن، هەروەسا پێرار ژ سەرجەمێ شەش ملیۆن تەنێن هاتینە وەرگرتن تنێ حەفسەد هزار تەنێن گەنمی جوتیارێن هەرێمێ هاتبوونە وەرگرتن، جوداهیەكا زۆر دهێتەكرن دناڤبەرا هەرێما كوردستانێ و پارێزگەهێن ناڤەڕاست و باشوورێ ئیراقێ، چونكە پرۆسا وەرگرتنا گەنمی ل ئەڤان پارێزگەهان بشێوەیەكێ زۆر رێك و پێك دهێتە رێڤەبرن و تنێ لهەمبەر هەرێما كوردستانێ نەبیت.
هیوا عەلی گۆتژی» سەرەڕای سەرەدانێن وەزیرا چاندنێ و ژێدەرێن ئاڤێ و لیژنا بلندا حوكمەتا هەرێما كوردستانێ هێشتا وەك پێدڤی ماف و شایستەیێن جوتیارین هەرێمێ ناهێنە دان، هەتا ئەو گەنمێ دهێتە رادەستكرن پارەیێ جوتیارێن كوردستانێ ب چەندین ئاستەنگ و ئاریشەیان دەرباز دبیت هەتا دهێتە مەزاختن، هەرێما كوردستانێ بوویە قوربانیا پرۆسا رادەستكرنا گەنمی و هەموو سالەكێ چاندنا ئیراقێ ئاریشە هەنە، حوكمەتا هەرێمێ و وەزارەتا چاندنێ هەموو بزاڤەكێ و گڤاشتنەكێ دێ بكەن بۆ بدەستڤەئینانا مافێن جوتیاران، هەموو لایەنێن پەیوەندار ل حوكمەتا هەرێمێ و یا فیدڕال هاتینە ئاگەهداركرن لدۆر ئاریشەیا وەرگرتنا گەنمێ جوتیاران، چونكە ئەڤێ پرۆسێ زیانێن مەزن بۆ هەرێما كوردستانێ هەنە.

ئەڤرۆ، دلۆڤان ئاكرەیی

ڕێڤەبەرێ گشتی یێ بازرگانی و پیشەسازی ل هەرێما كوردستانێ دیاركر، نێزیكی ٩٥٪ ژ خەلكێ هەرێما كوردستانێ خودان فۆرمێن ئەلیكترۆنی نە و ئەو كەسێن كێشە هەبووین وەك نەبوونا كارتا نیشتمانی یان ل دەرڤەی وەلاتی بوون، ئەگەر كارتا نیشتمانی هەبیت و ل ناڤ هەرێمێ بن، نوكە دشێن ناڤێن خۆ تۆمار بكەن.

نەوزاد شێخ كامیل، ڕێڤەبەرێ گشتی یێ بازرگانی و پیشەسازی ل هەرێما كوردستانێ بۆ رۆژنامەیا (ئەڤرۆ) گۆت: تۆماركرنا زارۆكان ل باژێرێن هەلەبجە و دهۆكێ زێدەتر ژ مەهەكە یا بەردەوامە بۆ هەمی زارۆیێن ژ تەمەنێ ١٢ سالیێ كێمتر و پرۆسەیا جوداكرنا فۆرمێن ئەو كەسێن ژ هەڤ جودا بووین (تەلاق) یا بەردەوامە و پێدڤی ب پێشكێشكرنا بەلگەنامەیێن یاسایی و كارتا نیشتمانی یا هەڤژینێ بەری نوكە هەیە بۆ جوداكرنا فۆرمێن وان.
سەبارەت ب كۆژمێ پارەیێ بریكارێن خوارنێ ناڤبری گۆت: ب شێوەیەكێ فەرمی ل هەرێما كوردستانێ پێدڤیە هەر وەلاتیەك ١٢٥٠ دیناران بدەتە بریكاری و ل ڤان دوو مەهێن دەربازبووی، هندەك بریكاران ١٥٠٠ دینار وەردگرتن، ژ بەر كو سیستەمێ نوی هێشتا ب تەمامی جێگیر نەبوویە و پشكا بریكاران ژ لایێ كۆمپانیا گشتی یا بازرگانی ڤە كێم هاتیە دیاركرن كو بتنێ ٢٥ دینار بۆ بریكاران دمینێن و د مەهێن بهێتدا پشتی جێگیربوونا سیستەمی، دێ بڕێ پارەیی بیتە ١٢٥٠ دینار و هەر بریكارەك دێ ٢٥٠ دینار وەك قازانج بۆ مینن.
ل دۆر پشكا خوارنێ ئاشكراكر، كو پشكا خوارنا وەلاتیان ژ ڤان كەرەستان پێكدهێت:
سێ كیلۆگرام برنج. ئێك كیلۆگرام شەكر. 400 گرام ئاڤا باجانێ، ئێك لیتر زەیت. نیڤ كیلۆگرام نیسك. نیڤ كیلۆگرام نۆك. 9 كیلۆگرام ئار بۆ هەر كەسەكی.
هەروەسا ئاماژە ب وێ چەندێ كر كو كێشەیا كێمییا زەیتی چارەسەر بوویە و ڕۆژانە بڕێن پێدڤی دگەهنە دەستێ وەلاتیان.